Wahyu 6:8 - Eipomek8 Dinmasiba, tonok kuda basam tonap yayukba, el urasin ara, bol ekamuk kuda basam unmokba, eipse. Akuda deice bukmoknye, el si ara Ninye Dipna Deiyoknye bukmok. El menekuka banmokba, el aminyan tam meneng dam yanganmok ning ara, akunum diblamice ninye unyak aik talibuka, ulye deiyoknye yanganmok. Ayanganmarik nang bitinye ara, Allah arye, ninye dipna deiyok ning aribukba, doproprik. Ara tukwak mutuku im sirya, mutuku sirya nirya unyak ninye noutamak bukni, anirya dobuka yupa dumbarye wilibuka deiprikirye, yupa winilye batakuka, ‘Tukwak ninye yupa tonok weik arye oplopnamrak’ tenen, dipna deiyok ning aribukba, doproprik. Dipna deiyok ning doproprikce, sik mikip deice arye pil dopricopura, ninye weika arye dipnamak ara, ani. Ton tam nang arye, ton tam nang ati ya ap, yin ap arye pia olanamaka deice arye, ninye weik dibinamake. Tonda din ning aning-aning nirya kum daliba, din patapliba, din dina kum deice arye, ninye weik dibinamake. Tonda, kanye imun uk, weika arye dilamlyani, ninye weik tonap sakdanin balirye, weika arye dibinamake. Ton ning ara, ninye kum unyakak, bai mutuku noutamak kam ulul ning nirya arye, yu weik upliba, ninye weik olyanganamake. အခန်းကိုကြည့်ပါ။ |
Wahyu 6:8
26 ပူးပေါင်းရင်းမြစ်များ
Dibina deiyok ning akunum kum kipdeiplyopura, Allah Yahweh ara, aning-aning deice tam erebuka, mikip weik ulinye birye, im deice yin talin malaikat talilule. Ati, el mikip deice arye ninye mutuku sirya im sirya nirya ara engenyaka deiyok ning nirya ara, kum kipdeiplirye sirya daknamle. Tonda Allah arye, ‘Na tenen nang unamakʼ tenen, minop talak wibuka akwamsuk nang ara, tuba tonap teleb kipdeipnamle. Ara, yuk-yuk mutuku nang arye, el ‘Naʼ tenen, nang ati, sik nong deice ikin ning weik delilamikba, alye dakuka ulamik ning deiyok nirya ara, Allah arye aning dobuka pia pere sukum donoknamle. Ura, aning nirya ara, Allah Yahweh aning-aning deice tam mikip weik ululnye birye, el bidamnye akunum nyapdeipsuka ati, aning nirya ara, dipkoprob nong upnamle.
Sik amalye winilamice ning nirya ati, ‘Se, nun malye wininyap ning ati, mambul kanye bopmabe. ‘Aning kilipsimince lyepnamsil,’ tenebikirye, din dina kumce, si tebuka ukirye, moronamniyaka babye, kum kekenamne. Tonda, Israel ninye arye, ‘Se, nun malye wininyap ning ati, Allah arye talye mangkau kibuka oplopsutu bukni, nun malye wininyap ning kilipsilirye, namin kipnamsil’ tenen, ‘Nun nong pununa ati, kam ning ap, koulamak ning gandum ap bobuka, yanuka uku danamabe,’ tenebikirye, winibica babye, adeice arye anggunti, kanye kum delinamsine. Yu tuba unamnile. Aning-aning nirya arepnikirye, moronamniyaka babye, sikce moronamniyaka babye, na kekepnirye, kanye kum delinamsine. Kwaning dina kumce, mambul kanye bobuka, arin ning arepnitinga babye, narye tamubuka, sik dam ara, oldana ap, din patana ap, wa wibuka kouamice ning kouluna ap, weik imun kanye bon uk dina ap, arenamsine. Ara, sik malye wininyak ning dekna ati, kanye imun ning weik arepnirye, wenepnirye, obuka sirya daknamne. Allah arye nyabuk.
Bukni, wini talak ara, na Allah arye winipmanto ning nyapsine. Ikan tomon nang arye, ikan weik tomolamak touk, ninye yukupniba, yakirye, amutuku nang yanuka tomopnamake. Tonda, narye bai kam ulamle ning, olban nang arye, aning dobonmakirye, olamak touk, ninye nyapniba, amutuku deice unyak nang ap, amutuku kon deice unyak nang ap, keil deiya dungnubuka unyak nang nirya ara, yanuka epra binamake. Eibikcopura, yakuka opnamake.
Ara ani. Amutuku noutam unamak nang nirya ara, kanye imun weik uk dina deiyok ning yalirye, amutuku noutam unamak nang, pia weik tonun dipnamake. Adipnamak nang ara, sik kayapu nang arye, anang ati kum engenamake. Tonda, amutuku yuk nang ara, anggun mal olanmamunya ani, ninye on parang arye opnamsiake. Ton nang ara, sik din ning kum daliba, din patan deice arye, dipnamake. Tonda, sik dipnamak nang, sik tam nang arye sik nong dobuka, tuku palibuka, teleb kibuka kum weipnamake. Sik adipnamak nang nong ara, talye tuku deiceuk, dana-dana tam batakikiba, lyupnamle. Ara ninye arye, tuku deice talye oplomikiba saklamle touk, unamake. Ati ara, anang akunum dibikcopura, sik nong ara, talye tuku deiceuk bataksikiba, im tam lakuka balamle maka ap, bai mutuku talye daulamle kam ning aryuk, adipnamak nang, sik nong dobuka dinamake.
Aninguk kum bukni, narye, sik Yehuda mutuku ulamik nang, yuk-yuk mutuku binuka unamak mutuku noutam nirya ara, na Allah arye ninye olan ning deiyokuk arepnyeba, yuk nang ap olanauk wininamake. Tonda, din patan ning arepnyeba, din patana deiceuk unamake. Tonda, ‘Ninye weik tonun diptingʼ tenen, wenen ning, sik dam deipnyopura, sik weik tonun dipnamake. Winipnamne bukni, akunum winipnyopura, yuk-yuk mutuku noutam bukni, sik Yehuda mutuku unamak nang nirya ara, dibuka sirya daknamake. Winibikceba, minop talak, narye sik apu yapu nang ati, ‘Amutuku arepnamsine,’ nyalin yupu deice arye nyalamsa ani, amutuku anggunti arepsise mutuku ara, Yehuda yala nang, ninye tonok babye, tuba kum unamake. Sik nirya kum kipdeipnamnarya! Allah arye nyabukba, na Yeremia birye kekepsirye, asukum sekeipse.
Na Allah Yahweh arye, im deice unyak yin talin malaikat nirya sik deiyoknye unirye, anggunti ayupu nyapnusine. Dipkoprob amutuku tuba ululum nang nirya ati, ninye mal olan ning ap, din patan ning ap, tonda uk dina deiyok ning weik arepnyeba, uk yala dakdongopdanin ban ning ap, anggun Yehuda mutuku ululum nang deice deipnamsine. Narye akanye imun ning nirya dobuka, anggun nong deice deipyopura, anggun ikin weik asa unamluma ati winipmanto yupu ton nyapnusine. Ara, ninye arye kwarang duk dakuka, ‘Dipnuyapʼ tenen, dakikirye, deipmake bukni, lyubuka tong pia weik nyaliba, dipmanto kum upliba, anang arye ayo duk batakuka donoklamak touk, na Allah arye anggunti atonun winipnamsine.”
Babel mutuku ninye deiyoknye, Nebukadnesar birye, Mesir mutuku yanamle talak ara, Mesir mutuku nang nirya obuka, sice buklopnamle. Winipnyopura, na Allah arye, ‘Amutuku nang ikin weik ning, sik nong deice deipnamnarya,’ tenyamse nang ara, pia imun kanye bon uk, weik dina deiyok ning arepniba, ninye weik tonun dipnamake. Tonda, na Allah arye, ‘Amutuku nang ara, Babel mutuku yin nang arye bobinuka, sik yuk mutuku bobinamake,’ tenyamse nang ara, tapu koubikirye, bobinamake. Tonda, narye, ‘Sik anang ati, mal olan deice arye, obikiba dipnamake,’ tenyamse nang ara, Babel yin nang arye, ninye on parang arye boyanuka, anang obikiba, asukumuk dipnamake.
Winipkinyopura, an nong ap, aikan ap nirya dobuka, mek pia kum sukum, padan gurun noutamuk donoknamsine. Winipsinyopura, an ap, ikan ap ara, ninye kum sukum noutam arye sakuka unamlume. Yuk nang arye ton, anggunti, ‘Sik Mesir nang ara pia malye weik nang,’ tenen, anggun nong nirya ara, bulubuka, tuku lukikirye, teleb kibuka kum weipnamsiyake. Anggun nong nirya ara, narye dobuka arepsinyeba, anggun yanina ati, tukwak talye bai tam kam ulul ning ap, talye lakuka balamle maka ap arye, anggun nong dipnamsile.
Narye anggunti, kanye imun weik ning arepsinyopura, anggunce talibuka ululum mutuku nang bokuka, winilye uplyopura, ton ning sepertiga ton, kanye imun weik uk yalanye yalirye, anggunti talibuka dinmasilya ani, ninye weik toun arye dipnamlume. Tonda, aning atonun, kanye imun weik din patana ton, anggun Yerusalem mutuku noutam yaliba, din kum daliba, din ning ton dina kumce, talye daunamluma deice arye, anggun kan-kan ara, ninye pia weik ton ap dipnamake. Aning atonun ton, anggun aumunye nang noutam bukni, sepertiga nang ton, sik mutuku batakuka, cang weik keil poka domlum ning, bai tam unamlum nang ara, sik yu yin talin nang arye, yu weik parang ya dobuka yakirye, anggunak sekuka oplopnamsiyake. Tonda, aning atonun, anggun amutuku ululum nang kan-kan arye bokuka, sepertiga nang ara, ‘Ninye arye opsikcakʼ tenen, Yerusalem mutuku batakuka, bai sakuka, dana-dana tam bikbik abuka binamak nang babye, sik mal olan nang arye, ‘Anang opnamakʼ tenen, bikbik abuka dobolbikirye, sik dam yanuka, yu parang ya arye, sekuka opnamake. Ara, kumanya dana-dana tam arye dolamle touk, narye sik wenena ati, mutuku sirya, dana-dana tam nirya ara, yakuka dopkwetepnamsin bukni, anggun mal olan nang arye, adopkwetepnamne nang nirya ati, yu parang ya boyanuka dobolbikirye, anggun Israel nang weik tonun opnamsiyake.
Anggunda, pia malye-malyeuk winilulum ninye ati, ‘Aninye dibikiba, tuku pum tam weipnamak’ tenen, narye anggunti lyepnamsin do, kum do? Kume, narye amalye winimunye ninye ati, kum lyepnamsine. Anggunda, tukwak mutuku ninye dibinyak ninye unyakakuk, talibuka unamlume. Se, uk din ning, weik arye weleplirye, dilamle bukni, ninye weik tonun dibinamake. Tonda, narye amutuku nirya ara, obukapnirye nirya opneba, dipnamlume. Dipmunyeba, weipsikcopura, anggun nong lyupnamsile. Dipkoprop, anggun malye winilulum ninye ati ara, narye anggunti, bico pia kum tenenamsine. Wenen ninguk arenamsine.
Sik kwalin kanye bobikirye, malye winin ninguk, wininyak ninye ara, ‘E, akunuma’ tenen, talye kanye bobuka unyake. Bona utotoa weik talin ninye, sik bona weik ap, yo bok weik ap, auplyopura, aning arye, sik nong babye, malye kililule. Aning atonun unyak ninye ara, pia kum wininamake. Winipmanto ara, ninye tukwak ninye nirya dibinyake. Diplamak bukni, dipna deiyok ning ara, ‘E, akunuma. Yuk nang ton. kum dipnamake,’ nyabuka, pia kum batakalongolule. Aning atouk, ninye dibicopura, ninye nong weilbalamakak ara, lo kum upnin balule. Yuk nang ton dibicopura, tuba weilbanauk unamake. Din dibikcopura, bulamle atonun, pia kum unamle. Sik Kasdim mutuku ninye ara, malye weik unyak ninye anya arye, winibica deice arye, ninye yuk yala ninye, mutuku-mutuku nirya ati, opna arye, ‘Nun amu tam unamak’ tenen, bulubuka delinyake. Obuka sirya dakikirye, batakanyak ninye ara, weik tonun tomobuka, tapu koubikirye, sik dam bobicopura, ikin ning sik nong deice deibikirye, ikin pil arukunyake. Allah arye, nabi Habakuk biti nyabuk.
Anggun Kapernaum mutuku ninye ara, ‘Nun teleb nang anya arye, Allah arye erebuka im deice deipnamsile,’ tenelalulum do? Kume, Allah arye wenebuka uku din mutuku donoksiliba, uku arye dibuka sirya daknamsile. Anggun Kapernaum mutuku nang ara, anggun dilamlumba, anggun mutuku noutamak narye ninye kum winipmanto ning, mambul pil dolamse bukni, diba kum tenenululume. Bukni, amambul pil ara, Sodom mutuku noutamak apiluk dolamtinyeba, eipmanitingopura, Sodom mutuku ulamik ninye arye, “Se, nun dipkoprop malye unyabe,” nyabuka, sik malye ning bataktingce, nati diba tenelamnitingopura, kam tuba unamtinge.
Ton wininamle ning ara, weik ninye deiyok nang, Raja nang arye talinyak mutuku ninye arye, yuk Raja talinyak mutuku ninye ati, binuka oldanamake. Tonda, ton yala nang arye, ton yuk yala nang ati, oldanamake. Winilamikce ati, mutuku yuk-yuk weik arye lulukunamle. Tonda, wa wibuka kouamice ning nong kum uplyopura, din pia patanauk unamle.
Minop talak dipse bukni, wini talak ara, kam unye touk, pia kam unamne. Nara, pia Kam Una Deiyoknye ununa ati ara, aminyan doryanamle talak babye, pia kamuk unamne. Nara, Ninye Dibina deiyok ning ap, akunum diamice ninye unyakak ap, talibuka una deiyoknye ununa anya arye, aning nirya ara talibuka unune.
AMem Yu Kwatima el amu cang mikip asa arye donmoka deice arye, im noutamak tuba uamuk kurya weika arye dobukabukce, tuku deice dopkwetebuk. Winibukopura, ami bomuk kil tikmokak, urasin dam tam kalikuka tikmok. Asukum tikmoka deiyok ara, ‘Akil arye mi deipkweteplyopura, na adiparyuk ami obuka dipnune,’ tenebukce, akil dam kalikuka tikmokak, eipse.
Nyabukura, nakup malaikat, terompet nyanmokba kekebuka deice arye, Efrat mek kin tapu koubuka deiyamik malaikat dumbarye lopdongobuk. Amalaikat dumbarye lopdongobuk deiyok ara, tukwak mutuku unyak ninye nirya dobuka, yupa winilye bokuka, yupa bitinye batakuka, ‘Yupa tonok ara, aninye nirya ara oplopnuyak’ tenen, lopdongobuk. Tonda, talye talakuk kum bukni, Allah arye, ‘Na tenyamse talak, awala ap, asum noutamak, aketing deice aryuk, tukwak mutuku noutamak amalye ninye onamake,’ tenelamuk touk, atalak aryuk amalaikat dumbarye lopdongobukba ninye on pil deiyok koupnamake.
ကြော်ငြာတွေ