Sik tilila yupu nyakce ninye asik nang arye wininyak bukni, nara winiryuk kanye kil-kil mot nyana deice arye, na ni Allah anti, mot nyanirye, “Telebe,” nyanamkine. Amot nyanamne talak ara, mot lelim nyan ning, el si ara kecapi, tapu sepuluh wamlye ning deice arye, Allah an kanye delin mot nyanamkine.
Wahyu 5:9 - Eipomek9 Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume. အခန်းကိုကြည့်ပါ။ |
Wahyu 5:9
41 ပူးပေါင်းရင်းမြစ်များ
Nun Israel nang nirya ara, “Allah el si Yahweh ara, pia teleb ulule,” nyabuka, el siuk erenamabe. Nun ni Yahweh el kanye delin mot, winiryuk ninguk nyanamabe. Nun Israel yala nang nirya arye, ‘Allah el siuk erenamap’ tenen, bulubuka neika unamap talak ara, Allah ati, “Anda pia telebuk ulyame,” nyabuka, mot nyan deice arye nyanamabe. Ara, batakna kumce, ‘Allah arye nyasilye yupu nirya talibuka, diksukumuk wininyap nang arye, mot nirya ara, nyanamabe’ tenen, nyapne.
Nara, malye ning arye, bental wetepmana atonun pia ulamnuk bukni, Allah arye dobuka lyepnukce, lake deipnuke. Tonda, ikin weik ulamnuka ati ara, winipmanto ara, weik bental pum wekamsiba, Allah arye dobuka, mutuku yangan keil deice deipnuke. Melibuka lyepnukce, telebak deipnuka ati ara, winipmanto ara, wini talak ara, teleb kat tuku deice, dobuka deipnukba, teleb banune.
Nun nirya arye, nun ni Allah Yahweh, el si erena ati, winiryuk kanye bobuka, Mazmur yupu deice, mot nyan yupu uk nyanamabe. Deiyok ara, Allah elce, pia mikip weik ninye, dopmankum pil dolule. Tonda, Allah el pia mikip weik taruk, sirik tam ap, el pia diksukum koprop ulye mikip deice arye, elti, ‘Nun like, elda daupmalye,’ tenenyak nang nirya ara, obuka sirya dakalule.
Na Allah arye anggun tukwak ninye nirya ati nyapsine. Anggun nirya arye, na Allah Yahweh ati, kanye deibuka, “Nun ni Allah pia teleb ulule,” nyabuka, winiryuk mot deice arye, na si erebuka si kinamnulume. Anggun mutuku sirya, im sirya ululum ninye arye, na Allah ati, mot senamluma deice arye, na si erenamnulume. Aning atonun, anggun weik laut mekwen deice arye, weik mek liya yo wekuka mekwen deice balamlum nang ap, tonda weik laut mekwen kup-kup ulalum nang ap, na Allah ati, mot senamluma deice arye, na si erenamnulume.
Babel mutuku ninye deiyoknye, Raja Nebukadnesar birye, lengdar like bitinye mabuk ning ati, sekuk yupu ara, ani. “Na Raja Nebukadnesar birye, mutuku-mutuku nirya ululum ninye ap, ululum ninye ayala-ayala nirya ap, tonda anggun yupu yuk-yuk nyalulum ninye ap, anggun nirya ap ati, ayupu nyapsine. Se, na tenepne ning ara, anggun nirya teleb aryuk, pia weik upra banamlume. Tonda, anggun wininamlum ning nirya, telebuk unamsila ati, telebe nyapsine.
“Winyamuka ati, ninye ayala-ayala nirya ap, yupu yuk-yuk nyalamik ninye nirya ap, elilamikce elti, weik ilil ulamukba, yok sirim talilamuk. Ara, talye ati kume. Elce, ‘Opnun’ tenepne nang ara, atalak aniryuk, obuka bataklamuk. Tonda, ‘Kum opnune,’ tenepne nang ara, kum olamuk. Tonda, ‘Lyepropnun,’ tenepne nang ara, lyelolamuk. ‘Ereipnun,’ tenepne nang ara, erelilamuk. ‘Amu tam kipdeipnun,’ tenepne nang ara, amu tam kililamuk.”
Akunum dibikopura, ninye deiyoknye Darius birye, surat sekukabukce, ninye yala mutuku-mutuku nirya ulamik nang ap, sik yupu yuk-yuk nyalamik nang ap nirya ati, dobukabukce, “Teleb arye wininamlume, nyapmasina ara, anggun unamlumak, teleb pil dopmunyeba, aning-aning weik, upra banamsil ati, telebe nyapsine,” nyabuk.
Na unye touk, anggun babye, wininamlume. Na babye Ninye Mi Koprop Atonunye birye, na bidamnye ati patapnilye ning, ‘Ninye nirya melinamniyak’ tenen, kum yase. Narye tukwak ninye nirya, sik patalye ning ati, ‘Melinamne’ tenen, yase. Na unye touk, anggun na mapu babye atonun unamlulume. Nara, ninye nirya sik kanye arye, malye tenelamikce ning ap, malye winilamikce ning ap ati, ‘Allah arye sik wenebuka oplyak’ tenen, na opnikibuk dipnamne deice arye sekdongopnamne. Winipnyopura, ara ninye kisok arena atonun winipnamne. Allah arye tukwak ninye nirya wenebuka optu bukni, sik yok pununa ati, na dipnamne.” Yesus arye nyabuk.
“Anggur mek arepnusina ara, na ining atonun ulula ati, dobuka diplulume. Aminyan na ining atonun nyapmasina ara, lak nyapnusine. Ara, Allah min arye nyalilamsuk touk, ‘Ninye weik arye lyepnirye talinamne,’ tenelamuk touk, dipkoprop na opnikceba, na ining saknamle. Na ining saknamla ara, talya ati kume. Ara na ining deice, ninye mutuku-mutuku nirya, sik malye winilamikce ning ap, malye tenelamikce ning ap ati, kum daneipniba, Allah arye sik malye ning namin kiplirye, na ining deice arye ninye weike lyeplirye, sik kanye talima pia talinamle,” Yesus arye nyabuk.
‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.
El mi Yesus, el ining biyuk deice aryuk, nun malye wininyap ning nirya namin kipsukce, kum kipdeipsuke. Nun malye winina ati oplopsutu bukni, nun pununa ati dibuksuka deice arye lyepsuke. Nun malye ning tapu kouamsuka noutamak arye, lobuka deksukce, lyepsuke. Winipsuk ning ara, mitik tonun kume. Allah el bico tenesilye ning ap, el kanye aniryuk talye arisilye ning ap, weik arye aulye touk, weik arye areamsuke. Ara, nun malye ning ara, nukmanto kum wamsuk bukni, aning nirya kum kipdeipsukce lyepsuke.
Anggun nirya arye, anggun ap, neika ululum nang ati, mot sebuka, kanye talima kwa dilanamlulume. Ara, Mazmur Allah yupu deice sekeipsuk ning ap, ‘Allah el si erepnuyap’ tenen, anggun kanye aryuk mot sekuka nyamunye ning ap, Allah arye, anggun talima noutam, ‘Winibuka nyanamlulume,’ nyabuka laka nyasiliba, mot nyamunye ning ap, amot yala-yala nirya nyanamlulume. Amot-amot nirya nyanamlum talak ara, anggun kanye talima noutamak arye, Allah el si erepmunce, elti, kibuka si erenamlulume.
‘Nun ni Allah, kum bataksilirye, el teleb kibuka el dam boyanamsil’ tenen, patapsilyopura, unamlulume. Anggun adiparyuk, Allah el laka teleb yupu, ninye lyena yupu kekemunce, pia tuba-tuba diba tenebuka, batakana kumce, ayupu uk talibuka, pia kanye lamabuka unamlulume. Winipmunyopura, Allah arye pia teleb kipdeipsilirye, el dam boyanamsile. Tonda, Allah el laka teleb yupu, ninye lyena yupu noutamak ubuk ning nirya, peterelamsikbuk, akunum kekelamlum ning nirya ara, kanye bokoltona kum arye, ‘Dipkoprop winipnamsil’ tenen, anggun adiparyuk kintinibuka dinauk unamlulume. Ura, peterelamsikba, kekelalum yupu, Allah el laka teleb yupu ara, yuk mutuku nang babye, dolonyakce, ninye mutuk sirya nirya akunum peterepra banyake. Tonda, na Paulus arye Allah el laka teleb yupu, ninye lyena yupu ara, peterepra bana ati, apiluk pia donune.
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Allah el yupu laka nyalamik nang ara, talye nang arye, “Ayupu sekelulum,” nyalamika deice arye, kum seklamik bukni, minop talak unamik nang kan-kan noutamak arye, tilila yupu laka nyalamik nang ton ulamik touk, anggun wini talak ululum ninye noutamak babye, tilila yupu peterena nang, dipkoprop unamake. Anang arye, malye ulisulul yupu, duknubuka peternamsiake. Sikce, “Kume, Yesus Kristus ara, urtalinye ulule,” nyabuka, nun Weik Deiyoknye, aning-aning nirya talibuka lyeklobuka upnamlanye, Yesus ati, batakuka yanipnamake. Ayupu ara, pia malye yupu upmalya babye, ayupu babye nyanamake. Yesus arye, ‘Aninye babye lyepnamne’ tenen, dekuk bukni, anang arye Yesus batakuka, amalye yupu nyabikcopura, ayupu nyabikca deice arye, Allah arye sik ati minopce weneplirye, opnamle. Aning ati ara, deiyok sikca.
Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.
Nun malye tenenyap ning ap, malye wininyap ning ap, kum ubuka delina ati, akunum deksukce, lyebuka deipsuke. Allah arye nun malye unyap ning ati wenebuka opsutu bukni, ‘Sik opnyak’ tenen, nun pununa ati, Allah tenyamuk tok, sik malye nang arye, Yesus obikbuk, el ining binmoka deice arye, nun malye winin ning nirya kilibuka, kum danalisulula ak, Allah arye namin kilisulule. Ara nun malye wininyap ninguk kume. Ninye mutuk sirya im sirya nirya sik malye wininyak ning babye kiliplirye, lyelule.
Winipnukba, amalaikat arye, “Anda, tukwak im sirya, mutuku sirya nirya unyak ninye ati, ayupu tonap laka nyanamlyame. Ara, mutuku-mutuku nirya unyak nang ap, yupu yuk-yuk nirya nyanyak ninye ap, ninye ayala-ayala nirya ap, weik mutuku unyak ninye (negara-negara) nirya ap, tukwak mutuku weik ninye deiyok nang, Raja nang nirya ap ati, aminyan wininamsil ning laka nyanamlyame,” nyabukba, na Yohanes arye kekepse.
Anang bitinye oplomliba, sik nong ara bisik noutam akuk bataknamake. Ninye nirya kum bukni, mutuku-mutuku nirya unyak ninye ap, yupu yuk-yuk nyanyak ninye ap, ninye ayala-ayala nirya ap, weik mutuku yuk-yuk unyak ninye (negara-negara) ap, ton nang weika arye adiamdice nang, sik nong bitinye awamlya ak eilinamake. Eilinamak bukni, aninye kan-kan arye tonoknye babye, “Se, anang bitinye weipnuyabe,” kum nyanamake.
Tonda, Isa Mutuku Dongonye arye amalye kam ulul ning ati, ‘Allah ati akunum dib tenyamik ninye ati, olbilirye, sik nirya yanipnamle’ tenen, el mikip aribuka deice arye, Allah el wiamukba, elti, diba tenelamikce, tukwak mutuku noutamak tuba unmek ninye ati, olbanauk ulamuk. Aning atonun, el mikip uamuka deice arye, im sirya, mutuku sirya nirya unyak nang, ninye ayala-ayala nirya ap, yupu yuk-yuk nirya nyanyak ninye ap, weik mutuku yuk-yuk unyak ninye nirya (negara-negara) ap ati, laut mekwen pum tam arye yanmoknye birye, elcuk malye kibukce, sik nirya talyamuk.
Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.
Aninye nirya eipsopura, tonok malaikat ton im noutamak lakuka banmokak, eipse. Minop talak arye dipdongobuka wini talak noutamak nirya, Allah arye el laka teleb yupu, ninye lyen yupu nyalul yupu ara, amalaikat arye doprobukce, laka nyapra banmok. Nyapra banmoka ani, atalak tukwak mutuku im sirya, mutuku sirya nirya noutamak, tuba ulamik ninye kekelamik. Ara im sirya, mutuku sirya nirya unyak ninye ap, ninye ayala-ayala nirya ap, yupu yuk-yuk nyanyak ninye nirya ap, weik mutuku noutamak unyak ninye (negara-negara) ap, ‘Ninye lyena ati laka teleb yupu Kekenamak’ tenen, amalaikat arye ayupu nyapra banmokba, kekepse.
Asukum tikmek talak ara, Allah el amu tam bukuka pil dolamuknye Musa birye sekuka nyalamuk motuk senmek. Amot ara, Musa birye, Domba Mi Atonunye biti tenelamukce, amot sekuka deibukce nyalamuk. Aning atonun sik alaut mekwen damak atikmek ninye arye, Musa sekamuk mot senmekba, kekepse. Amot deice nyanmek yupu ara, ani. Nun ni Allah, anda aning-aning nirya malye kibuka, aning nirya deice tam umince, weik mikipnye, ulyame. Yuk mikip ulul ning nirya ara, mikip mitikuk ulul bukni, anda nun Weik Deiyoknye ulyame. Weik mambul pil dolyam ning ara, ninye winipmanto kum ning, sirya dakna pil dolamluma nirya ara, ‘Aning ara diksukum ulule,’ tenenyabe. Ance uminye ning ap, dib nyaminye yupu ap nirya ara, ‘Pia telebuk ulule,’ tenenyabe. Ance diksukum ubuka winiminye ning ap, dipkoprop nyalyam yupu ap nirya ara, pia telebuk ulule. Minop talak babye, anoutamak talak babye, aminyan yanamle talak babye nirya ara, aulul ning nirya ap, ninye ayala-ayala nirya ap weik deiyok talilulnye bira, an tonok uminya ati ara, anda weik Ninye Deiyoknye, Raja ulyame.
Lak nyapnukce, ayupu tonap dukdongobuka laka nyapnuke. “Arup sum Talye Yolana Deiyok Kil, weik mek dara bukmokak, eiplum ning babye, laka nyapnune. Weik mek dara ara, winipmanto ulul bukni, amek sik nong ara, ninye ayala-ayala nirya ap, yupu yuk-yuk nirya nyanyak ninye ap, weik mutuku noutamak yuk-yuk nirya unyak ninye negara-negara ap, yupa pia weik ati bikinyabe.”
“Se, nun ni Allah, anda nun Weik Deiyoknye usilyame. Aning-aning nirya ara, ance, ‘Winibuka, winibuka kwepdeibuka deipnamne,’ tenyamlum touk, adiparyuk kwepdeiamlumba, aning nirya ulule. Aning ati ara, an tonok ara pia telebuk ulyame. Telebe nyana yupu ap, si erena yupu ap, si kina ning ap, mikip kilina yupu ap, anirya ara, an deiceuk delinyabe. Ancuk aning nirya talibuka pia unamlame.” Sik 24 wisi deiyok nang arye Allah ati nyanyake. Na Yohanes arye nyapsine.
Weik yupu deice arye senmek mot ara, ani. “Domba Mi Atonye obiknye bira, pia telebuk ulula anya arye, aning-aning nirya doplirye, talinamle ara, pia telebe uka. Yata ninye do, yata kam un ning do nirya arye, el tonok ati kibuka, el siuk weik arye erenamake. Sik nirya arye elti, ‘An tonok ara weik mikip ap, weik ning nirya ap, weik kel bikna deiyok ning nirya ap, bona uto-utoa talin ning dekna weik ning nirya ap, an deiceuk unamkile. Anda, el si erena ning nirya ara, an deiceuk unamkile.’ Anda pia telebe, nyabuka,” el si erenmekce, mot senmekak kekepse.
Nyapnukba dipdesirye, ayanmoknye eipse. Anye bira, el nong urasin ara, Domba Mi atonun upmok. Domba Mi atonun upmok bukni, akunum obuka deiamna atonun kibuk. Elda, aweik mambul bun ning deice tam tikmokbuk, sik dumbarye kam unmek ning ap, sik 24 deiyok nang ap nirya arye, el noutamak tikmokbuk, sikce dana-dana tam nirya tikuka warikdongobuka, tikmekba eipse. Domba Mi atonunye domba basam atonun, yang el kisok deice tikamukba, eipse. El asing ara, tekbarye ubuk. Atekbarye asing, ‘Sik nong noutamak deiyok tenebuka, kel biknamak’ tenen, uamuk ning ara, ani. Ara, Allah elce dopdeiamukba, tekbarye dib kanye arye tukwak mutuku, im sirya, mutuku sirya melibuka banyak ati, uamukak eipse.
ကြော်ငြာတွေ