Nyabukopura, ayupu ton nyabuk. “Anda pia diba, weiknye ulyame. Tonda anda aning-aning deice tam umince, pia mikip weiknye ulyame. Se, anda dipkoprob mambul weiknye Ulyama anya arye, tukwak nang nirya arye, an si kel bikamikce, ‘Seʼ tenebuka winikinyake. An mikip deice arye, yuk mutuku nang nirya ap, yuk mikip ulul ning nirya ap ati, malye kibuka deice tam ulyame. Anda pia diksukumnye, umince weik ninye deiyoknye erebuka, ulyama anya arye, yuk Raja nang nirya ara, an amu tamuk unyake. Aning ara, talye ati kum nyapkine. Winimince, im tam ulul ning babye, tukwak mutuku noutam ulul ning nirya babye, an ninguk ulule. Anda Yahweh arye aning-aning nirya ap, ninye mutuku sirya im sirya nirya ap, talilyamce, weik deiyoknye ulyame. Sik nirya ara, an amu tam unyak bukni, anda pia deice tamuk umince, aning-aning nirya talilyame. Ati, na ni koproba Allah Yahweh, anda aning-aning nirya ap, yata nang do nirya ati, ancuk ninye deiyoknye kibuka delilyame. Ati na nio, anda mikip weik nirya ara, anuk taliplumce, aning-aning nirya kwepdeiplumce, talibuka ulyamnye biti, teleb nyapkine.
Wahyu 5:13 - Eipomek13 Amot kekepse talak ara, adiparyuk tonok mot ton nyanmekba, kekepse. Ara, kam ulul ning ayala-yala nirya, im deice ulul ning ap, tukwak mutuku ulul ning ap, laut mekwen deice ulul ning ap, laut mekwen pum tam ulul ning ap, tukwak mutuku amu tam ulul ning ap, tonok babye batakna kum, sik nirya arye amot senmekba, kekepse. Amot senmek yupu ara, ani. “Weik ninye deiyoknye bun ning deice bululnye Allah ap, Domba Mi Atonye ap ati, nun kam unyap ning nirya arye, sik bitinye ati, ‘Sikda pia telebe,’ nyabuka, kibuka sik si pia erenamabe. Si eren ning nirya ap, mikip weik ulul ning nirya ap ara, sik deiceuk pia unamle. Aning-aning nirya ara, wini talak arye dipdongobuka, doryanamle talak noutamak nirya ara, sik deiceuk apia unamle,” nyabuka mot senmekba kekepse. အခန်းကိုကြည့်ပါ။ |
Wahyu 5:13
29 ပူးပေါင်းရင်းမြစ်များ
Aminyan talak ara, kanye imun ning noutam arye kam tuba unamak nang ara, sik Kanye deibikirye, weik yupu deice arye mot nyapnamake. Atalak ara, keting komulban tam ulamice nang arye, Allah Yahweh el Weik Erenanye birye, mikip pil dolul ning ap, pia telebuk ulul ning ap atibuk, laka nyabikceba, kekebikirye, Allah ati si erenamake.
Na Allah arye anggun tukwak ninye nirya ati nyapsine. Anggun nirya arye, na Allah Yahweh ati, kanye deibuka, “Nun ni Allah pia teleb ulule,” nyabuka, winiryuk mot deice arye, na si erebuka si kinamnulume. Anggun mutuku sirya, im sirya ululum ninye arye, na Allah ati, mot senamluma deice arye, na si erenamnulume. Aning atonun, anggun weik laut mekwen deice arye, weik mek liya yo wekuka mekwen deice balamlum nang ap, tonda weik laut mekwen kup-kup ulalum nang ap, na Allah ati, mot senamluma deice arye, na si erenamnulume.
‘Malye upnamak do?’ tenen, ‘Weik ikin winilden ning kum arepnamsilam’ tenen, moropkiyabe. Aning kum bukni, tonda, Pia Malye Uning Deiyoknye, ara Isa Mutuku Dongonye arye, ‘Malye ulisulul anya arye, malye winibibyak’ tenen, ‘Ance kalikuka disimince melinamsilam’ tenen, moropkiyabe. Ayupu nyabuka, Allah moronamlulume. Yesus arye el yupu kekenmek nang ati nyabuk. Nyabukce ayupu tonap nyabuk.
Aning ara talye kum nyapne. Deiyok ara ani. Allah arye aning-aning nirya kwepdeiamukba, ulul ning nirya ara, Allah el mikip deice aniryuk tuba teleb ulule. Tonda, sirya talak ara, elcuk aning-aning nirya deice tam erebuka ulirye, aning nirya talinamle. Aning nirya ara, el ninguk unamle. Aning ati ara, ‘Ninye im sirya, mutuku sirya nirya arye el siuk erebikirye, Allah ati, “Elda pia telebuk ulule,” nyabuka nyanamak’ tenen, Allah moronune. ‘Dipkoprop anyapman touk pia aunamle’ tenen, Amin nyapne.
Aning ati ara, nun Deiyoknye Yesus Kristus melisilya deice arye el ap, nun nirya ap, kanye talima dukdongobuka unamap talak noutamak nirya ara, nun Ni Kopropa Allah, pia weik Kel Kina Deiyoknye ati, el si weik arye erebuka si kinamabe. ‘Dipkoprop wininab’ tenen, Amin, nyapsine. Na Paulus arye anggun Roma mutuku ululum ninye nirya ati, “Telebe,” nyapsinarye, asukumuk deipne.
Tonda, nun apu yapu ara, Israel yala ninye arye delilamikba dadeipdanin, yangalamik nang ara, weik mambul nang ulamik. Tonda, ninye lyena ati, Allah arye wibuka dopkwetepsuknye, Kristus el deiamrik nang bitinye babye, sik apu yapu ara, Israel yala ninyeuk ulamik. Anirya ati ara, sik Israel ninye ara, talye ninye kum unyake, nyapmasine. Aning atonun Kristus babye, talinye kum ulule. Elda, aning-aning nirya talibuka deice tam Weik Deiyoknye kibuka ulule. Elda, dipkoprop Allah ulule. ‘El si ara, pia erenauk unamap’ tenen, Amin nyapsine.
Nunce Allah ati, dib tenenyap ninye, nun noutamak arye, pil dosiliba, pia teleb unyap ning ap, Yesus Kristus arye, pia mambul pil dosilye ning ap, anirya adeice arye, Allah el si weik arye, erenamabe. Ara, wini talak ap, aminyan doyanamle talak nirya ap, “Allah elda pia mambule,” nyabuka el si erenamabe. ‘Aning ara, nun ap, nunce debibyeba dadeipdanin, banamak ninye babye, Allah el siuk pia erenamak’ tenen, patanulule. Aning ara, ‘Dipkoprop winipnamle’ tenen, na Paulus birye, “Amin,” nyapsine.
Allah arye Yesus erepdeibukura, pia mambul si dobuka deiyok ara, ani. Ara, im deice unyak nang ap, tukwak mutuku nirya unyak ninye ap, tukwak amu tam ulul ning nirya ap, babye, yata kam un ning do nirya, sirya talak ara, ‘Yesus el si kekebikirye, kutam tuku dinikdongobuka si erepnamake. Narye anang nirya dobuka, Yesus el amutamuk bulubuka deipnamne,’ Allah arye tenyamuk. ‘Winipnamne’ tenen, Allah arye Yesus erebuka deibuk.
‘Nun ni Allah, kum bataksilirye, el teleb kibuka el dam boyanamsil’ tenen, patapsilyopura, unamlulume. Anggun adiparyuk, Allah el laka teleb yupu, ninye lyena yupu kekemunce, pia tuba-tuba diba tenebuka, batakana kumce, ayupu uk talibuka, pia kanye lamabuka unamlulume. Winipmunyopura, Allah arye pia teleb kipdeipsilirye, el dam boyanamsile. Tonda, Allah el laka teleb yupu, ninye lyena yupu noutamak ubuk ning nirya, peterelamsikbuk, akunum kekelamlum ning nirya ara, kanye bokoltona kum arye, ‘Dipkoprop winipnamsil’ tenen, anggun adiparyuk kintinibuka dinauk unamlulume. Ura, peterelamsikba, kekelalum yupu, Allah el laka teleb yupu ara, yuk mutuku nang babye, dolonyakce, ninye mutuk sirya nirya akunum peterepra banyake. Tonda, na Paulus arye Allah el laka teleb yupu, ninye lyena yupu ara, peterepra bana ati, apiluk pia donune.
An winin ning nirya ap, an petereminye ning nirya ap, ‘Malye nyapnikcak’ tenen, pia moubuka dildanamlyame. Ara, ‘Na babye, na peterenye yupu kekenyak ninye babye, Allah arye lyepnamsil’ tenen, an adiparyuk batakna kum arye, tuba-tuba wininamlyame. Winipminyopura, Allah arye an ap, an peterepnalam ninye ap, lyepnamsile. Na Paulus arye nyabuka sekeibkine.
Winipmanto ning ara, yatanye do, Allah yupu nyalulnye bira, Allah el dam yaturye, nyaptubuk elce ila tamubuka nyapsutu touk, pia mikip deice arye peternamsile. Aning atonun, yuk ninye ati, melibuka pil dolulnye bira, Allah arye el mikip arisilya deice arye, yuk ninye ati melibuka pil donamle. Allah arye, ‘Na pil donamak’ tenen, talye arisilye pil dona deiyok ning deice arye, Yesus Kristus ap, kanye dukdongobuka umunce, anggun wininamlulum ning nirya ara, teleb ubuka unamlulume. Winibuka umunyopura, yuk nang eipsikirye, Allah el si weik arye erebikirye, elti, “Telebe,” nyanamake. Ninye mutuku-mutuku nirya arye, Allah el si erebikirye, ‘Weik mikip ululnye bira, Allah eluk,’ tenebuka, ‘Pia unamak’ tenen, Allah moronune. Akunuma.
Nun ni Allah arye nyapdeibukura, Yesus Kristus pil dopsuka deice arye, nun Lyena Deiyoknye Allah el tonokuk ulule. Allah yuknye ton kum ulule. El tonokuk ulule. Aning ati ara, el si weik arye erenamabe. Allah elda mikip pia weik ulirye, aning-aning nirya, Talena Deiyoknye ulule. Elda, pia teleb, dirina weik Sisinanye, Raja atonun ulule. Aning-aning nirya min kweipdeibuk talak arye, aning nirya, Talena Deiyoknye ulamuka ani, wini talak tuba ulirye, aminyan yanamle talak nirya babye, pia unamle. Ati, dipkoprop el siuk erebuka unamabe. ‘Aning nirya winipnamle’ tenen, “Amin” nyapne. Telebe, na Yudas arye, asukumuk deipne.
Lyepsuka deiyok ara, ‘Na ni Allah el amu tam bukuka, elti, pil donyaka deice arye, yuk ninye im sirya, mutuku sirya nirya, Allah el yupu kekenamak’ tenen, Yesus teleb updeipsukba, Allah arye, ‘Anggunda na tenen ninye’ tenen, talisulule. Ati, ‘Ninye nirya arye Yesus el siuk pia erenamak’ tenen, Allah moronune. Ninye im sirya, mutuku sirya nirya arye, Yesus ati, “Elda weik mikipnye ulule. Dotalak nirya ara el siuk weik arye erenamabe,” nyabuka, ‘El ti si pia erenamak’ tenen, ‘Se,’ tenenune. ‘Aning ara dipkoprop nong upnamle’ tenen, “Amin,” nyapsine.
Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.
Aning nirya eipse ning ara, anyapnusin ning ton eipse. Allah el weik bun ning deice bukmokce, el sirik taruk deice weik mambul buku talipmokak, eipse. Abuku dana-dana nirya ara, sekna ninguk ubukba eipse. Tonda, abuku gum-gum bisik deice ara, ‘Abuku talye nang arye mangkau asa eibicak’ tenen, urasin ara yo cang atonun bukni, buku gum-gum deice taplakdongamukak, eipse.
Weik yupu deice arye senmek mot ara, ani. “Domba Mi Atonye obiknye bira, pia telebuk ulula anya arye, aning-aning nirya doplirye, talinamle ara, pia telebe uka. Yata ninye do, yata kam un ning do nirya arye, el tonok ati kibuka, el siuk weik arye erenamake. Sik nirya arye elti, ‘An tonok ara weik mikip ap, weik ning nirya ap, weik kel bikna deiyok ning nirya ap, bona uto-utoa talin ning dekna weik ning nirya ap, an deiceuk unamkile. Anda, el si erena ning nirya ara, an deiceuk unamkile.’ Anda pia telebe, nyabuka,” el si erenmekce, mot senmekak kekepse.
Malaikat arye nyanmok buk, im deice unmek kili sal nirya ap, tukwak mutuku unmek kili sal nirya ap, tuku amu tam unmek ninye nirya ati, ‘Amambul buku bikilin ning deiamuk ning, cobuka isipturye siklipsutu do?’ tenen, dipdeyik bukni, pia diksukum ululnye tonok babye kum ubuka ati, abuku delina ap, tebuka delina ap ati, winipmantonye kum ubukba, kum eibik.
Nyapnukba dipdesirye, ayanmoknye eipse. Anye bira, el nong urasin ara, Domba Mi atonun upmok. Domba Mi atonun upmok bukni, akunum obuka deiamna atonun kibuk. Elda, aweik mambul bun ning deice tam tikmokbuk, sik dumbarye kam unmek ning ap, sik 24 deiyok nang ap nirya arye, el noutamak tikmokbuk, sikce dana-dana tam nirya tikuka warikdongobuka, tikmekba eipse. Domba Mi atonunye domba basam atonun, yang el kisok deice tikamukba, eipse. El asing ara, tekbarye ubuk. Atekbarye asing, ‘Sik nong noutamak deiyok tenebuka, kel biknamak’ tenen, uamuk ning ara, ani. Ara, Allah elce dopdeiamukba, tekbarye dib kanye arye tukwak mutuku, im sirya, mutuku sirya melibuka banyak ati, uamukak eipse.
Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.
Duknubikce, pia ilil weik ubukba, nyanmek. “Se, nun mambul weik upsile. ‘Anggun amutuku kon ap, weik keil nirya ap, nun nong deice sakuka, singnipsutumce, opsutum’ tenen, moropseabe. Ara talye ati kume. Deiyok ara, weik Ninye Deiyoknye, bun ning deice bululnye, Allah arye eipsilirye, wenepsilyak ati ara, nun minopce sakuka opsutumce, siknipsutume,” nyabuka moropseabe. Tonda, ‘Domba Mi Atonye, yu weik upliba, weika arye wenebuka opnamsile’ tenen, ati ara, anggun amutuku kon ap, weik keil nirya ap, “Nun nong deice sakuka singnipsutumce opsutume,” nyabuka moropseyabe.