Sik nirya daulamika ani, aminyan talak Abram bira, keting tamun weik, 99 tahun nukuka wisi akunum dayuk talak ara, Allah el si Yahweh arye, el dam yanuka tikukce, elti, ayupu nyabuk. “Nara, aning-aning nirya deice tam unirye, Pia Weik Mikipnye unune. Anda, batakna pia kum dipkoprop, na yupu moubuka talipmince, dobolyangalamnimince, malye winina pia kum, teleb-telebuk unamlyame.
Wahyu 4:8 - Eipomek8 Akam unyak ning dumbarye nirya, sik yuk-yuk bukni, sik pol ara naku barye ubuk. Sik nong bol deice ara, asing pia weik ubuk. Sik pol amu tam babye asing ubuk. Sik nong ap, urasin ap, anyapmasin touk ubukba eipse. Lukunyan babye, keting noutam babye, batakna pia kumce, tuba-tuba ayupu pia nyanyake. “Minop talak ulamuka ani, wini talak tuba ulirye, aminyan sirya talak yanamlanye bira, aning-aning nirya malye kibuka, aning nirya deice tam ulirye, weik mikipnye ulule. Elda nun Weik Deiyoknye ulule. Elda malye winin ning tonok babye kum ulula ati, pia telebuk pia telebnye ulule, pia telebuk pia telebnye ulule, pia telebuk, pia telebnye ulule,” nyabuka mot senyake. အခန်းကိုကြည့်ပါ။ |
Wahyu 4:8
42 ပူးပေါင်းရင်းမြစ်များ
Allah ara, aning-aning deice tam talibuka weik erena ap, mikip weik ap ululnye birye, el amu tam unyak ninye nirya ati, kalikuka melipliba, aninye ara, imun kanye bona kum diparyuk, kanye deibuka telebuk unamake. Allah aning-aning nirya deice tam talibuka, Mikip Weik Deiyoknye ulule. Ati, yata ninye do nirya, Allah el amu tam unyak ninye arye, pia ilil asa kum diparyuk, kanye deibuka telebuk unyake.
Yatanye do? Ninye arye, ‘Aning ara Allah atonun’ tenebikirye, yuk ning si erenyak ning nirya ara, an Yahweh uminya atonun kum uptinge. An winilyam touk, yuk Isa Mutuku Dongonye, sik mikip koproba deice arye, kum winiptinge. Tonda, yuk nang nirya ara, an winiminya atonun kum wininyake. An tonok ara, pia diksukumuk ulyame. Pia telebuk ulyame. Pia telebnye, dirina weiknye umince, ninye kum winipmanto ning, mambul pil, ninye winipmanto kum pil weik dolyame. Yata ning do nirya, an winiminya atonun kum wininyake.
Nyabukura, Allah arye, “Nara, aunune. Tonda pia unamne. Ati, na si ara, Yahweh. Asi deiyok ara, Na aunune. Na unamne ning ara, pia unamne. Nara, Allah uka. Ati ara, ance Israel ninye ati, nyapnamlyame. ‘Kume, Allah el si ara, Yahweh, ‘Na aunune,’ nyalul Allah arye, dopreipnuk deice arye, anggun dam yane,’ nyapnamlyame.” Allah arye, Musa biti nyabuk.
Sik wenepnamne mutuku noutam ululum nang ara, imun kanye bopmunyakarye, weik arye engenamlume. Ara, na Yahweh arye anggunti, ‘Wenebuka opnamsineʼ tenepse talak ara, akunum dam upmala atia. Atalak ara, na Allah arye, aning-aning nirya talibuka, deice tam erebuka, mikip weik ununye birye, na tenepse nang nirya ara, obuka kum kipdeipnamsin atia.
Allah arye sik Israel nang ati, nyabuk. Sion mutuku ululum nang ati, tuba dakeiam asa uk kum unamlume. Aning kum bukni, anggun lyena ati, na yupu nyanamne. Dipkoprob anggun Yerusalem mutuku weik asik noutam ululum nang ati, talye mangkau asa kum bunamake. Aning kum bukni, nara tiknirye, dakuka kum unamne. Minop talak ara, narye, ‘Na mapu koproba lopdeipnirye, lyepropnamne!’ nyabuka, nyalin yupu nyamsa ati, dipkoprob mambul pil dopnirye, winilamnya ani, sik Israel nang ati, sik ikin kanye bobuka unyak sukum arye, lopdeipnirye, lyepdopnamne. Winipnyopura, aning nirya ara, weik dirina yalirye, lalamle touk upnamle. Ninye nirya arye, aning eipnamake. Aning atonun, winipmanto ara, ninye arye weisa ubikirye, uku buk diliba, ninye nirya elilamak touk, Israel nang lyepropnamne ning ara, lake kipdeipniba, ninye nirya arye eipnamake.
Adumbarye kam ulamak ning ara, mitikto ninye urasin atonun upmek bukni, adumbarye ning sik nong ara, tonok bukni, sik urasin ara, yuk-yuk dumbaryeuk unmek. Sik nong ara, tonok-tonok unmek bukni, tonok nong ara, kisok ap, urasin ap ara, dumbarye ubuk touk, sik pol babye yuk-yuk dumbarye ubuk. Sik nong deice nirya awamuk pol ara, maka pol atonun ubukak, narye eipse.
Winipnamsiaka ati, anggunda pia moubuka dinamlulume. Keting tamun winilye deice arye, keting noutam ap, lukunyan ap, na engena deice arye, ‘Pia moubuka tenenamlulume’ tenen, pia laka nyalamsisirye, peterelamsise yupu ara, ‘Anggun talima on ning opsilyak’ tenen, ‘Moubuka dinamlulume,’ nyabuka peterelamsise yupu ara, pia tenenamlulume.” Paulus arye nyabuk.
Nun kayapu, anggun dipkoprop tuba tenelulume. Anggun ap neika ulamubu talak noutamak ara, nunce weik pil dolamubu ning ap, ikin ulamsuk ning ap ara, kum lupakeipsulume. Winilamupa deiyok ara, nunce, Tesalonika mutuku ninye ati, Allah el laka teleb yupu, ninye lyena yupu peterenamap talak nirya ara, ‘Nun patan ning ati, arepsikibuk, sik ikin upnul’ tenen, keting noutam ap, lukunyan ap, pia pil dolamubu.
An winin ning nirya ap, an petereminye ning nirya ap, ‘Malye nyapnikcak’ tenen, pia moubuka dildanamlyame. Ara, ‘Na babye, na peterenye yupu kekenyak ninye babye, Allah arye lyepnamsil’ tenen, an adiparyuk batakna kum arye, tuba-tuba wininamlyame. Winipminyopura, Allah arye an ap, an peterepnalam ninye ap, lyepnamsile. Na Paulus arye nyabuka sekeibkine.
Ara, yuk ninye arye kanye deibuka, “Peterepsilyame,” nyanyak talak babye, lik uplibuk, “Peterena nun lik,” nyanyak talak babye, anda, ‘Yata tenepnuniak do?’ tenena kum arye, ‘Allah yupu peterepnaman’ tenen, kintinilinauk unamlame. Malye upmakce talak ara, ance, “Aning bataklulume, teleb una ara, ani,” nyabuka lipsisikuka peterenamlyame. Tuba malye unyak ninye ati, “Aning ara, meme. Bataklulume,” nyabuka, yupu sekenamlyame. Teleb akunum wininyak nang ati, “E, aning ara, telebe, aning ara, pia atonun wininamlulume,” nyabuka, sik kanye moulinamlyame. Anyapmakin pil donamlam talak nirya noutam arye, pia moubuka tenepmince, Allah el yupu nyasilye touk, teleb ubuka peterenamlyame. Tonda, aninye nirya ati, minopce wana ap, lik una ap kum bukni, nimalye aryuk peterenamlyame.
Amapo, na Yohanes arye, anggun Asia tam noutamak bukni, Allah diba tenebuka, tekbarye mutuku ululum ninye ati, “Telebe,” nyapsince, abuku sekeipsene. Na Yohanes arye, anggun Asia tam ululum ninye ati tenenirye, Allah morosunun ning ara, nyapnusine. Ara, Allah el kanye aryuk bico tenesilirye, melisilye ning ap, kanye imun kanye bona kumce, kanye deibuka teleb una ati arisilya deiyok ning ap, ‘Weika arye arenamsile’ tenen, Allah morosunune. Anyapmasin ning arenamsiak ninye ara nyapnusine. Allah ara, minop talak akunum ulamuka ani, anoutam talak ulirye, aminyan sirya talak ara, yanamlanye birye arenamsile. Tonda, aning-aning deice tam ulirye, weik Ninye Deiyoknye una ati, weik buna ning deice bukliba, el urasin tam ara, Allah el melina dib kanye tekbarye bunyake. Sik adip kanye arye ton arenamsiake.
Aning-aning deice tam unirye, weik mikipnye unune. Nara, pia weik Ninye Deiyoknye Allah arye nyapsine. Aning-aning min kum uamuk talak ara, na akunum ulamse ati, na si ton, Alpa nyaninyake. Tonda, aning-aning nirya akunum kum uplyopura, nara pia kam unamne ati, na si ton Omega nyaninyake. Nara, minop talak ulamsa ani, anoutam talak unirye, aminyan doyanamle sirya talak ara, yanamne. Na Allah arye nyapsine.
“Nun Ni kopropa Allah, anda aning-aning nirya, malye kibuka, aning nirya deice tam umince, weik mikipnye ulyame. Anda nun Weik Deiyoknye ulyame. Minop talak ulaluma ani, anirye dipdongobuka tuba kamuk ulyame. An weik mikip deice arye, aning-aning nirya akunum talibuka ulyama ati, nun nirya arye anti, ‘Telebe,’ nyapkiyabe.
Aninye dobuka uku dilamlya mutuku noutamak dongopliba, uku buk arye, sik nong dilamliba, tulum welenamla ara, pia min kum kum danamle. Aminyan yanamle talak nirya babye, auku pia dilamlirye, tulum weik welenamle. Pia Malye Kam Ulul Ning, el laka kilin ning, el nomor sik nong bol deice sekekirye, el bidamang ap, el urasin atonun puturup deipnamak ning ap ati kibuka, el si erenyak ninye nirya ara, sik dikdik sena ati, lo ton pia kum unamle. Auku noutam akuk, uku arye sik nong dinmaliba, pia engebuka donauk unamake.” Winilinye yanmok malaikat arye, lakuka banmokce, ayupu nyabukba, kekepse.
Anirya kekepmaseba, sik 144.000 ninye, Domba Mi Atonye birye akunum lyebuk ninye arye winiryuk mot senmek. Winiryuk mot senmekce unmekak ara, Allah el weik bun ning deice bukmokak damak nyanmek. Tonda, sik dumbarye teleb kam unyak ning ap, sik 24 wisi deiyok nang ap asukumuk, Allah el urasin tam tikmeka damak mot senmekba, kekepse. Sik yupa weik 144.000 ninye nirya arye, winiryuk mot senmek bukni, yuk nang nirya arye sik senmek mot, winiryuk ning ara, kel kum bikmanto unmek. Bukni, Domba Mi Atonye birye, sik yupa weik 144.000 ninye, tukwak mutuku noutamak arye akunum lyelamuk ninye, sikcuk amot bikamikce nyanmek.
Asukum tikmek talak ara, Allah el amu tam bukuka pil dolamuknye Musa birye sekuka nyalamuk motuk senmek. Amot ara, Musa birye, Domba Mi Atonunye biti tenelamukce, amot sekuka deibukce nyalamuk. Aning atonun sik alaut mekwen damak atikmek ninye arye, Musa sekamuk mot senmekba, kekepse. Amot deice nyanmek yupu ara, ani. Nun ni Allah, anda aning-aning nirya malye kibuka, aning nirya deice tam umince, weik mikipnye, ulyame. Yuk mikip ulul ning nirya ara, mikip mitikuk ulul bukni, anda nun Weik Deiyoknye ulyame. Weik mambul pil dolyam ning ara, ninye winipmanto kum ning, sirya dakna pil dolamluma nirya ara, ‘Aning ara diksukum ulule,’ tenenyabe. Ance uminye ning ap, dib nyaminye yupu ap nirya ara, ‘Pia telebuk ulule,’ tenenyabe. Ance diksukum ubuka winiminye ning ap, dipkoprop nyalyam yupu ap nirya ara, pia telebuk ulule. Minop talak babye, anoutamak talak babye, aminyan yanamle talak babye nirya ara, aulul ning nirya ap, ninye ayala-ayala nirya ap weik deiyok talilulnye bira, an tonok uminya ati ara, anda weik Ninye Deiyoknye, Raja ulyame.
Aning dinmasiba, sik teleb dumbarye kam unyak ning kan-kan, tonoknye birye, karu makau eipmase ning tekbarye dobuka, sik tekbarye malaikat ati bokuka aribuk. Akaru makau emas ning pum bisik ara, kam pia unamlanye Allah, el yu una ap, ninye wenena ap, ona ap deiyok ning nirya ubuk. Pia doyanamle talak kam unamlanye Allah ara, el yu weik ning, akaru makau emas ning pum unmokak eipse.
Aisa winilye, tukwak mutuku tuba ulamik ninye deiyok nang dam balamikce, ninye kum winipmanto ning mambul pil weik dopra balamik. Tonda, awinilinye isa arye, tukwak mutuku ninye deiyok nang nirya bulubuka kintinipmeka deiyok ara, ‘Anang ap, sik mapu silip ap nirya arye, Allah el tam nang obuka sirya dakdenamak’ tenen, bulunmek. Aning ara, weik mikip ululnye, Allah arye ninye nirya ati yupu lipsisikuka, wenebuka opnamle sum ara, ‘Atukwak mutuku deiyok nang arye, Allah el yupu yanipdenamak’ tenen, bulupmekce ninye winipmanto kum pil donmekak, eipse.
Anye birye ayupu nyabukba, Allah el aik pum emas meja damnye birye ayupu kekenmok ati, tamubuka nyabuk. “Dipkoprop nyaplame. Nun ni Allah anda aning-aning nirya malye kibuka, aning nirya deice tam umince, weik mikipnye ulyame. Yuk mikip ulul ning nirya ara, mikip mitik tonun ulul bukni, anda nun Weik Ninye Deiyoknye ulyame. Weik mambul pil dolalum ning ara, ninye kum winipmanto ning, pia teleb pil dolamlum ning nirya diksukumuk ulule. Ance tukwak ninye ati yupu lepsisikuka bokeipmalamce, ance aninye nirya wenebuka onmalama ara, pia diksukumuk ulyama anya arye, ‘Aning nirya ara, pia telebe. Bita merekuka onmalame’ tenen, nyapkine,” nyabuk. Allah el aik pum emas meja dam ululnye, ayupu nyanmokak, kekepse.
Allah Yupu Deiyoknye, el si bam bol pum tam arye, yu weik parang ya belebukba, eipse. Aparang ya arye, sik malye winin ning talibuka unyak ninye ayala-yala nirya ap, im sirya, mutuku sirya nirya noutamak unyakce, malye wininyak kili sal ap ati, aparang ya arye opnamle. Tukwak ninye mutuku-mutuku nirya weik mikip deice arye talinamle. Ninye nirya arye, elti, malye kum kipmanto unamake. Winipmanto ati, ‘Anggur mek binamle’ tenen, weik keil deice pum lukikirye anggur dukdongobuka, yanibikiba, amekwen balamle touk, anye birye Allah ati mambul pil donamle. Ayupu nong ara, ani. Ara aning-aning nirya deice tam ulirye, weik mikip ap, weik eitamnye ap ululnye Allah ara, el yu weik upliba, tukwak malye un ninye nirya, weik arye wenebuka yupu lipsisikuka, oplopnamdak ati tenenyabe. Malye winin ninye ati wenena deiyoknye bira, akurun kuda deice bukuka balamlanye bira el uka.
Ayupu nyabikba, kekepse. Ayupu nyanmekba, sik 24 wisi ninye deiyok nang ap, sik teleb kam un ning dumbarye ap, sik nirya arye Allah el ninye deiyoknye bun ning deice bukmokak, urasin tam gutam tuku dipdongobuka bukmikce, ayupu ton nyabik. “Nunce, ‘Amin,’ nyababe. Ara, ‘Aning nirya dipkoprop pia ulula’ tenen, “Haleluya. An siuk, pia erenamkiyabe,” nyanmekak kekepse.
Anyasik Yerusalem Winiryuk ning noutamak nirya dipdese bukni, Allah el si erena aik ton kum domika ati, anyaik ton kum ubuk. Aning-aning nirya deice tam ulul weik mikipnye Allah, nun Weik Deiyoknye ap, Domba Mi Atonye ap, anyasik noutamak ururakba, im deice unyak ninye arye, ‘Sik si erepnuyap,’ tenebice talak nirya ara, adiparyuk talye luparabuka erenamaka ati ara, sik si eren aik kum patalula ati, anyaik ton kum domik.
Ninye Mi Koprop Atonunye birye nyapnuke. “Yohanes, ance Piladelpia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara ani.” Malye winin ning tonok ning babye kum wininirye, pia diksukumnye unune. Tonda, na nyasinye ning nirya ara, pia dipkoprop yupu ati ara, ayupu batakna kumce, anyapmasin touk dipkoprop talibuka ununye birye, ayupu nyapsine. Na aryuk nyanamne yupu ara ani. Ara, “Akili sal ara, Allah el ulya im deice wekna telebe. Bukni, anang ara, im deice kum wektinge,” nyabuka, tukwak kili sal wibuka, yuk-yuk bokolina deiyoknye bira, na unune. Narye buplan pakeipnyopura, yuk nang arye abuplan ila tuba tonap kum tiriktinge. Aning atonun, narye buplan tirikdongopnyopura, yuk ninye arye kum kukeiptinge. Bublan kukulina ap, buplan tirikina ap, deiyoknye bira na uka.
Apia mambulnye bukmokak, dana-dana nirya ara, im deice ninye deiyok nang bun ning ton, yupa weik 24 ubukba, eipse. Abukmok ning deice ara, sik talima wisamukba, Allah kum batakmanto nang, weik deiyok nang, 24 nang bukmekba, eipse. Adeiyok nang nirya ara, pia teleb kurun baju ongopmekce, sik kisok deice ara, emas ato ning el si ara mahkota, kalupdongopmekak, eipse.
Tonda, weik mambulnye bukmokak urasin tam ara, weik mekwen ton deiyamuk. Amekwen urasin ara, pia teleb mek, mulonga ap, luma ap ton kum uamukce, pia mek mirin demuk ubuk mek deibukak eipse. Aning-aning nirya noutamak ara, weik mambulnye bukmokak dana-dana tam ara, kam un ning dumbarye tikmokbuk, eipse. Akam un ning sik urasin ara pia yuke. Sik nong nirya ara, urasin tam babye, balye tam babye, asing pia weik dana-dana uamukba eipse.
Nyapnukba dipdesirye, ayanmoknye eipse. Anye bira, el nong urasin ara, Domba Mi atonun upmok. Domba Mi atonun upmok bukni, akunum obuka deiamna atonun kibuk. Elda, aweik mambul bun ning deice tam tikmokbuk, sik dumbarye kam unmek ning ap, sik 24 deiyok nang ap nirya arye, el noutamak tikmokbuk, sikce dana-dana tam nirya tikuka warikdongobuka, tikmekba eipse. Domba Mi atonunye domba basam atonun, yang el kisok deice tikamukba, eipse. El asing ara, tekbarye ubuk. Atekbarye asing, ‘Sik nong noutamak deiyok tenebuka, kel biknamak’ tenen, uamuk ning ara, ani. Ara, Allah elce dopdeiamukba, tekbarye dib kanye arye tukwak mutuku, im sirya, mutuku sirya melibuka banyak ati, uamukak eipse.
Domba Mi Atonye birye, Allah taruk deice bopmok buku dobuka, abuku noutamak denepdongamuk yo pea ato ning, tekbarye awamuk bukni, tonok ning daklobuka yokeibuk ak, eipse ning ara nyapnune. Minyuma yo pea atonun ning dakukura, sik dumbarye kam unyak ning bukni, tonoknye birye, weik yupu deice arye, “Yalyame,” nyabuk. El yupu nyabuka ara, liman arye lelim weik nyalamle touk ubukba, kekepse.
Atalak ara, sik dumbarye kam unyak ning noutamak arye, ninye yupu nyalamak atonun yupu deice arye nyanmekba, ayupu kekepse. “Wini talak ara, tonok sum nirya arye, ikin pil donmaca ani, dekne ning arenamak deice arye, din ning mitik anunuk dekenamake. Ara tonok sum nirya ikin pil dobikirye, dopropnamak dekna ning deice arye, roti dana deiyok ning, atu ato ning, el si ara terigu, tonok literuk deknamake. Akumopura, mitik teleb ning yakong atonun ning ara, 3 literuk deknamake. Bukni, Ara yo duk teikikibuk, basam kop atonun mek kwelamak ning ap, anggur mek dilamak ning ap ara, dauplye. Ance aning bitinya ati malye ulina kume, Ara yo kan-kan ap, anggur tapu wa ap ara telebuk unamle,” nyabukba, kekepse.
Ayupu nyanmek talak ara, sik malaikat nirya ara, sirya tam antanapdongobuka tikmek noutamak ara, sik 24 wisi deiyok nang ap, sik dumbarye kam unyak ning ap tikmekba, noutamak ara, Allah el weik bun ning deice bukmokak eipse. Eipse talak ara, sik nirya arye, ‘Nun Ni kopropa Allah kibuka, el si erepnuyap’ tenen, el bun ning urasin tam gutam tuku dipdongobuka bukmikce, ayupu nyanmek.
ကြော်ငြာတွေ