Winipnyopura, nara, el Li Allah unamne. Elda na mi unamle. Winibuka unanam bukni, el mitik malye ton uplyopura, wenen ning mapu, sik ni yapu ou tapu arye, litukuka wenelamaka atonun wininamne. Ara, narye arepnibuk, yuk nang arye, elti, wenebikirye, el nong deice ikin ning dipnamake. Aning nirya ara, narya.
Wahyu 3:19 - Eipomek19 “Narye bico tenebuka melinun ninye ara, malye winibikcopura, wenepnirye lipsisikuka peterenune. Ati, talye kanye bobuka, ‘Dauplye’ tenen, talye nyaltakana kum bukni, dipkoprop anggun malye winilulum ning nirya batakuka urasin tamupmunce, diksukum bisikuk banamlulume. အခန်းကိုကြည့်ပါ။ |
Wahyu 3:19
31 ပူးပေါင်းရင်းမြစ်များ
Allah ara, aning-aning nirya deice tam ulirye, Weik Erena Deiyoknye, mikip weiknye ulule. Malye winibibyeba, Allah el si Yahweh arye, ikin ning nun nong deice deibuka wenesilya ara, ‘Aning ara, teleb uka, dipkoprob teleb updeipmanile,’ tenenamabe. Deiyok ara, ‘Na mapu teleb updeipnamne’ tenen, wenesulula ati, elce wenepsilyopura, ‘Teleb ulinmanile,’ tenepnamabe. Wenena deice arye, nun un ning nirya teleb kipnamsila ati, ‘Se yata ati wenepmasil do? Wenena ara, nun like’ tenena kume. Dipkoprop pia, Allah ara aning-aning deice tam ulirye, mikip pia weik ulule. Elda Pia Weik Erenanye ulula anya arye, el tibuk kanye deibibirye dobolbanamabe.
Kume, yuk-yuk mutuku noutam unyak nang, yuk-yuk nirya ara, Allah elcuk, sik malye winin ning ati, yupu lipsisikuka bokeiplirye, wenebuka olule. Tonda, tukwak mutuku, im sirya, mutuku sirya nirya unyak nang ara, Allah elcuk, weik kel bikina deiyok ning peterelule. Yuknye birye kume. Elce petereliba, tukwak mutuku noutam unyak nang, yuk-yuk nirya arye binyake. Ati ara, tukwak mutuku nang arye, malye wininyak ning ati, talye mangkau kinauk ulul do? Kume, elce, sik malye winin ning ati, dipkoprob wenebuka opnamle!
Ninye ton malye winin ninguk ulirye, Allah arye, “Teleb un bisikuk dobolbanamlulume,” nyabuka peterelirye, “Aning ara wininamlulume, aning ara, pia kum wininamlulume,” nyabuka, nyalisulul yupu moubuka kum kekenyak nang ara, aminyan talak Allah arye sik dam weik kanye imun un ning arenamle. Aning atonun, yata ninye do nirya, sik deiyok nang arye, “Moubuka unamlume,” nyabuka, nyanyak yupu kum kekenyak ninye ara, aminyan talak ara, Allah arye wenebuka opliba dipnamake.
Ninye ton yuk nang arye wenebuka peterena yupu ap, lipsisikuka peterena yupu ap, nyabice talak, sikce ayupu moubuka kum kekenyakce, melibuka kum dobolbanyak ninye ara, dipkoprob sik bidamnye ati kum kalikildanyake anya arye, wininyaka deice arye, sik diamuk malye ulilanyake. Wininyak bukni, yata ninye do nirya, yuk nang arye wenebuka peterenyak yupu ati, kanye deibikirye, moubuka kekenyak ninye ara, weik kel bikna deiyok ning ton, weik tabakuka kel kipnin banamake.
Aning atouk, sik mitik mapu arye, ‘Kume nunda malye un ning atibuk winiptibye,’ tenebuka unyak ning ara, sik talima pum tam palibuka ulule. Bukni, sik ni yapu ap, sik nin yapu ap arye, ‘Kume, nun mapu sik malye ulamak ning batakikirye, teleb asa arye unamak’ tenen, kama deice arye debuka wenepmunce, lipsisikuka peterepmunyopura, amapu, sik malye winilamikce ning batakuka tamubikirye, ila tamubuka teleb winin ninguk talibuka unamake.
Aning ati ara, na ni Allah ance, nunti wenepnamsilam bukni, nun ni Allah, an yu weik upkilye talak arye, nun deice weik kanye imun ning deibuka wenebuka ona kume. Dipkoprop, an yu upkilye talak arye, wenepsiminyeura, nunda adiparyuk, an dam arye, kum kipdopnamsile. Ati, ‘Mitik ikin ninguk, nun deice deibuka wenepsutumeʼ tenen, moropkine na nio.
Anggun ap, anggunce delilalum mapu ap ati, ‘Na yupu kekepnamak’ tenen, anggun wenena ati, anggun dam ikin deilisilye ning ara, anggun kel kum bikilulume. Ati, anggun wenesinye ning ara, talye atibuk wenelamsise do? Anggunce, ‘Se, nun malye unyaba ati, wenepmasile,’ kum tenelulume. Ara, winipmanto ara, bai tam ulamle yu kus, el si singa kus, weik yu kus arye, yu nguru-nguru alamlirye, talye daulamle kam ning obuka, dilamle touk ululume. Ara, na yupu nyaipneba, laka nyana deiyok nang nabi-nabi nang dopdeipsiseba, anggunce anabi nang nirya oltakalulume.
Aning ara, talye ati kum nyapsin bukni, deiyok ara, naryuk anggunti yanuka lyepropsinirye, anggun ap neika unamabe. Narye anggun wenena ati, yuk-yuk mutuku noutam yakuka, dopkwetcamsise mutuku nang nirya ara, wenebuka opnyopura, sice buklopnamnarya! Bukni, anggunda, na mapu koproba ara, ‘Naʼ tenen nang ululuma ati, tuba tonap yakuka donoknyeba, yuk-yuk mutuku noutam, kum binuka unamlume. Anggunda, pia ati amutuku uk unamlume. Winipnamsin bukni, anggunce minop talak malye-malye weik winilamlum ning ati ara, dipkoprob wenepsinirye, deken ning arepnamsine. Dipkoprop anggun malye winilamlum ning ara, talye Luba kum kipnamne. Amalye winilamlum ning ati, ‘Daupmalye,’ kum nyaptinye. Aning kum bukni, anggun malye winilamlum touk, anggun deken ning ton, wenebuka arepnamsine. Bukni, winibuka wenepsinirye, tamubuka teleb kipdeipnamsine. Narye anggun Israel nang ati, kume kum daneipnamsine. Ayupu ara, na Allah Yahweh arye akunum nyapdeipsine.
Nyabukce, ayupu ton dukdongobuka nyabuk. Na mapu Israel ninye, sik kanye imun upliba, moronyak ning ara kekenune. Ara, nyanyake. “Se, nun ni Allah, nun malye ulamupuba, ance nun wenena ati, ikin ning weik arelamsulumba, awenen ning nirya dololamupu. Winipmanto ara, nunda ninye arye delina kum ning, bai tam talye kam ulamak ning atonun ulamupu. Bukni, winira ance, ‘Diksukum winin ninguk winilamting’ tenen, peteresilyame. Adeice, ‘Nun malye wininyap ning batakuka, an damuk tamubuka yanamap’ tenen, kintininyabe. Ati ara, nun ni koproba Allah, anda Yahweh, ancuk nun dobuka, an dam boyasilyame,” nyabuka morobik.
Ati ara, an Yeremia birye, sik Israel ninye ati, laka nyanalam yupu ara, ani. Allah arye nyapmasile. Se, anggun Yerusalem mutuku umunye ninyeo, anggunda, anggun ni koprop Allah, el si Yahweh arye nyasulul yupu ara, pia kum kekemunce, ayupu talibuka kum winilulume. Tonda, na Allah arye wenen ning ap, ikin ning ap, arelamsise talak ara, anggunce, ‘Se, nunda malye unyap ninye’ tenen, malye nyabuka kum ngaluk wininamlulume. Tonda, anggun malye winilulum ning ara, kum batakalulume. Ati ara, dipkoprob nyan yupu ara, tuba kum nyalulume. Anggun noutamak arye, tonoknye babye, diksukum yupu tuba kum nyalulume. Anggun nirya ara, tilila yupu uk nyalulume.
Aweik asik donyakak unyak nang nirya ara, Allah arye do, ninye arye do, ‘Aning ara, wininamlume Aning ara, pia kum wininamlume,’ nyabuka, wenena yupu nyaptinga babye, amutuku ninye arye, ayupu pia kum kekenyake. Atonun, Allah arye, ‘Aning ara, malye wininmaluma ati, aning ara, pia bataknulume,’ nyaptua babye, mandipna ubikirye, ‘Dauplye,’ tenen, pia kum kekebikirye, kum bikmanto unyake. Tonda, amutuku noutam unyak nang ara, sik kanye nirya dobuka, Allah el deice pia kum delinyake. Tonda, sikce, ‘Allah Yahweh aryuk, melibuka lyepropnamsileʼ tenen, diba kum tenenyaka ati, elti kum moronyake. Tonda, sikce, ‘Nun si erenyap Allah, el dam ton tamubuka yanamabe,’ pia kum tenenyake.
Aninye nirya ati wenebuka bai tam yakuka dopkwetebukura, Yesus elce wipdeiamuk nang arye, Allah yupu noutamak sekamik yupu ila tuba tonap tenebik. Sik tenebik yupu ara ani. ‘Naie, ninye nirya arye, an weik mambul aik ati, ‘Si erenamkiak’ tenen, pia pi dobuka, pil dopnyopura, kanye imun ning weik unamnile.’ (Mazmur 69:9)
Atalak-atalak nirya ara, ‘Lik unilya ati, daupmalye’ tenen, talye kanye bobuka kum unamlulume. Aning pia kum bukni, anggun unamlum talak noutam nirya ara, ‘Adonamne pil ara, na Deiyoknye Yesus atibuk donamne. Nara, el pil melinanye unune,’ tenebuka el piluk donamlulume. Winipmunce, Yesus el amutamuk dobolbamunce, el piluk kanye deibuka pia donamlulume.
Yesus arye, “Anggun malye ning ani,” nyabuka yupu lipsisikuka bokeipsilirye, nun nong deice ikin ning delisilya ara, ‘Na mapu ati, wini talak yupu bokipnirye, wenepyopura, aminyan talak ara, Allah arye, talyeukirye dib kum tenenyak ninye nirya ati, yupu lipsisikuka bokuka weneplirye, oplopnamle talak ara, na mapu ap tabakuka, Allah arye, kum oplopnamle’ tenen, wini talak Yesus nimalye arye, wenesulule.
Anang nirya arye nunti kel bikisinyak bukni, “Anang ara, mambul kume, sikda talye nang uka,” nyasinyake. Sikce nunti, “Kume, anang ara, dipnamakca, ati sik dauplye,” nyasinyak bukni, kum omsikceba tuba kam unyaba ara, anggunce ton elisululume. Nun nong deice ara, kama arye weik bongobuka osinyak bukni, min kum oplopsikba, kum dibupa anya arye, anggun kele, nun tuba kam unyabe.
Ara, anggun Korintus ninye ton tenipdelulume. Wenen surat dopdeipsukba, Allah arye anggun talima noutamak pil dobukba, anggunda mambul kanye bobuka engepluma deice arye winipsuk ning ara, telebuka. Ara ani. Anggunce nati, ‘Anang ara, teleb nang tenepnamsil’ tenen, pia pi dobuka yupu nyalamnulum ning ap, tonda, ‘Malye winipsuk ning kum daneiptibye’ tenen, pi dobuka pil dolamlum ning ap, tonda, ‘Se, yata ati malye winin ning nun noutamak tuba upmasil do?’ tenen, ilil kanye bobuka ululum ning ap, tonda, ‘Malye winin ning batakuka, teleb ninguk wininamabe’ tenen, patana ap, ‘Malye usilye ning batakuka, teleb kibuka mupdeipnamap’ tenena ap, tonda, malye usilye ning ati, “Dauplye,” kum nyanamap bukni, malye ning nirya ati ‘Yupu bokeibibirye, lipsisiknamap’ tenena ap, anirya ati ara, na kanye ara, telebuka. Adeiyok nirya ati ara, anggunce apil nirya dolamluma deice arye, ‘Anang ara, teleb winin ninyeuk unyak’ tenen, laka upsilaba akunum kel kisinyabe.
‘Nong ara winibuka unamle’ tenen, deiyok ning teleb ninguk winiptopura, “Yuk nang arye peteresikceba, sikti, kanye deibuka, sikti, pil pi dobuka dona ara telebuka,” nyapsitinye. Ara, na ap, anggun ap neika unyap talakuk kum bukni, “Atalak-atalak nirya winina ara telebuka,” nyapsitinye. Bukni, yuk nang arye anggun Galatia mutuku ululum ninye peteresikce deiyok ning ara, malye winiptopura, “Anirya ara malyeuka,” nyapsitinye. Na kanye ara, anang arye peteresinyaka deiyok ara, malye ulule.
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Kanye imun ning uplirye, winilelye talak kum batakalirye, pia palibuka pil dolamlenye bira, kanye deibuka telebuk unamle. Ara winildena talak noutam nirya arye, ikin ning weik ulamlye bukni, elda pia darapdongobuka ulamlyopura, el dekna ning dopropnamle atia. Amenenga ning dopropnamle ara, Allah arye, “Na ti kanye deipnice nang ara, winibuka arepnamsine,” nyapdeibuk touk, pia kam una deiyok ning dopropnamle.
Ati, anggun moubuka tenenamlulume. Minop talak nati kanye deiyamnulum ning ara, pia teleb bukni, wini talak ululuma ara, pia yuk tenebuka ululume. Mitika aryuk kanye delinululume. Amalye winiplum ning ati, batakmunce, urasin tamubuka, minop tam pia teleb ulamlum touk, ila tuba tonap winipmunyopura, telebe nyapsitinye. Wini talak anggun malye winiplum ning ati, kum batakmunyopura, narye anggun dam yanirye, anggun weisa delina deiyok ning deipsa ara, dopnamsine.
ကြော်ငြာတွေ