Wenena aik daulamik ninye nirya ara, talye ati kum wenena aik kum ulamik. Deiyok ara, Allah el yupu deice arye, ‘Aning wininamlulume. Aning ara, kum wininamlulume,’ nyapdeiamuk ning ati, sikce, moubuka kum taleamikce, yaniltalamikba, Allah elce yuk nang deice mikip arebukba, sik amalye ulamik ninye nirya ara, yuk mutuku nang arye, sik nong deice ikin ning delilamikba, kanye imun kanye uk, bobuka ulamik. Tonda, Allah aning-aning nirya talibuka, deice tam erebuka, Pia Mikip Weik Deiyoknye ulul bukni, elce nyalamuk yupu nirya ati ara, ‘Nun like, aning kum wininamabe,’ nyabuka, moubuka kum talilamikce, yaniltalamikba, Allah arye aninye ati wenelamuk.
Wahyu 3:18 - Eipomek18 Ati ara, narye anggunti nyapsine. Emas ning dobukapnarye, ‘Malye ning nirya kum danul’ tenen, uku dongopnaba, malye ning nirya uku dipliba, pia teleb uplye ning ara, anggunce na dam dekelyanganulum. Aning winipnumunyopura, dipkoprop bona uto-uto talin ninye atonun unamlume. Na dam yanuka pia lek kurun baju dekmunyopura, anggun talye nong demuk balamunye ninye ara, anggun nong bol lelna ati, teleb koprop kurun baju ongopmunce, teleb unamlume. Tonda, na dam yanuka asing likne obat, kweten ning dekmunyopura, anggun asing likmunyeba, teleb upsilyopura, teleb kibuka elinamlum. Wini talak ara, anggunce malyeuk winimunye ning ara, bita kum dilalulume. အခန်းကိုကြည့်ပါ။ |
Wahyu 3:18
34 ပူးပေါင်းရင်းမြစ်များ
Na ni Allah Yahweh arye nyasulule. Narye, “Abisikuk binamlulume,” nyabuka, peteresinye bisikuk banamlume. Ara, ‘Sikce talibuka wininamak ning nirya ap, sik kam unamak talak nirya ap, pia telebuk wininamle’ tenen, “Abisikuk banamlume. Awinin ning ara, telebe, aning ara, malye ning,” nyabuka, peterenamsine. Winipsinirye, anggunti kalikuka melipsiniba, diksukum bisikuk banamlume.
Narye anggunti, “Teleb un ning ara ani, diksukum bana ati, teleb bisik ara ani,” nyabuka laka nyalamsise bukni, na nyalamsise yupu nirya, mangkau kanye uk bolamlume. Anggunce, ‘Aweik kel bikna deiyok ning lak len kil arye wenen yupu nyasulul ning ara, nun like’ tenen, yaniltana uk ulamlume. Ati ara, anggun malye ulamluma dekna ati winipnamsile.
Winipmanto ara, ninye arye weik dekna weik ning dekicopura, ‘Aning ara pia talinamne’ tenen, batakana kumce, pia moubuka talilamak touk, anggunce dipkoprob yupu ap, weik kel kina yupu ap, peterena teleb yupu ap, diksukum una deiyok ning ap, ‘Aning ara, weik ilile’ tenen, pia pi dobuka dolonamlume. Dopropmunce, kel bikmunyopura, aminyan winipnin banamlum talak noutamak nirya ara, aning nirya ara, pia kum batakanamlulume.
Ninye deiyoknye Raja birye, “Aning wininamlume, aning ara pia kum wininamlume,” nyabuka, nyapdeipsilye yupu ara, kekepmunce, aning moubuka talipmunce unamlume. Deiyok ara, minop talak ara anggunce Allah ati, “Nun ni Allah, ance wipdeipsulumnye Raja birye nyapnamsil yupu ara, kekebibirye, dobolbanamabe,” nyabuka, nyalin yupu deice arye akunum nyapdeipluma ati, aninguk dipkoprob wininamlume.
Tonda, winipmanto ara, anggunda banauk banmamunba, yuk nang arye, anggun nong bananguk dinmasikiba, alye weik dakalanamlume. Ninye nirya ara, anggunti, yep-yep abuka, nalipsikca ati, alye weik unamsilume. Deiyok ara, na Allah arye, anggun Babel mutuku nang, anggun malye weik ulamluma ati, tuba tenilamnya arye, anggunti wenebuka kwang daknamsine. Anggun Babel mutuku nang ara, tonok nang babye, ton kum lyepdanamake. Na Allah arye anggun nirya ati wenepnamsine.
Allah el si Yahweh arye, ‘Israel ninye na dam yangakiba, narye teleb kibuka melinamne’ tenen, adomon yupu nyabuk. Anggun mek patasulu ninye nirya ara, narye kintineipse mek dekna kum, ur talye yanduka dobuka dina ati yalume. Anggun yo bok kum ninye ara, na dam yamunce, yo bok kum upmalibuk, anggun din ning ara, dekna kumce, urdem arye dopropmunce, dinamlume. Winipmanto ning ara, anggur tapu duk mek ap, sapi basam moum yung ap, akunum kintinipsise ning ara, dekna kum urdem arye yamunce dobuka dinamlume. Ati, na dam yanulume.
Anggun dengna ati, winipmanto ara, anggun alye dakana ati, yu nang aryuk, anggun kilapu cang kain sirik tam talibukapsikirye, tomubuka kisok tam bobisikiba, anggun nong banang dem upsilyeba, alye weik daklamsil touk, weik tonun wenepsiliba, yuk nang nirya arye eipsikcopura, anggunda alye dakdanamlume.
Tonda, atalak noutam aryuk, ninye weik tonun akunum diamikce nang babye, tamubuka kam buknamake. Ara diamikba, tuku palyamik nang ara, tuku pum tam arye kam buknamake. Kam bukikirye, ton tam nang ara, pia bola koplobuka, kam una deiyok ning dopropbikirye, tuba tamubuka bukikirye, kam kipman pia telebuk unamake. Bukni, ton tam nang ara, kanye imun weik ning doprobikirye, alye dakdanamake. Sikda, kanye imun weik ning doprobikirye, uku bisik bikirye, malye nyabuka ngalukikirye, pia engenauk unamake.
Tonda, anggun Safir mutuku ululum ninye ara, yuk mutuku ninye arye anggunti, obuka sirya daksikirye, anggun ululum mutuku batakuka, yuk pera mutuku bobinamsiyak talak ara, baju ongona kumce, talye nong bananguk binamlume. Winipmunyopura, anggunda, alye weik dakanamlume. Tonda, anggun Zanan mutuku ululum ninye ara, anggun umunye mutuku ara, batakuka yuk mutuku ton, kum bitume. Ara, ‘Yuk mutuku ninye arye, yanuka opsicak’ tenen, anggun asik nirya antanabuka, doamlum cang pala keil poka, bai tam kum binmanto upnamlume. Bukni, sik Bet-Haezel mutuku unyak ninye ara, sik olan ninye arye, sik domik aik ap, keil poka domik ning ap nirya ara, dakuka uluplopnamake. Tonda, ‘Aning pia aunamle’ tenen, tuku pum tam deiamik pala keil babye, palibuka daklobikirye, sik aik nirya uluplobikiba, atu butbuta atonun unamla ati, nyapne.
Allah Yahweh aning-aning nirya talibuka, deice tam mikip weik ununye birye nyapsine. “Se anggun Niniwe mutuku nango, narye anggun pia malye weik ulamlum ning wenena ati, kanye imun weik ning deipnamsine! Winipmanto ara, ninye arye malye un kilapu, ‘Alye weik daknamakʼ tenen, sik malye-malye wininyak talak ara, tomobikirye, sik akilapu ongolamik baju, el si kain sarung, tonda rok ara, yuk nang mutuku nirya, din sukum arye kwiribuka erepdipnirye, sik orok ara dangabuka, akilapu sik kisok deice koupdongobikiba, yuk nang nirya arye, sik nong bananguk elilamak touk, narye anggunti, alye weik dakan ning arepnamsine. Sik kanye imun ning akunum arepnyopura, sik yuk-yuk mutuku deiyok nang babye disikiba, anggun alye weik dakalanamlume.
Na yanamne sum ara, malye ulamice ninye ap, teleb ulamikce ninye ap ati, yupu lipsisikuka bokolina ati yanamne. Nara, yupu lipsisikuka bokolina deiyoknye unune. Winipmanto ara, dekna weik ning el si perak, uku dabikirye, moubuka dinmakibuk, uku arye malye wamlye nirya uku diplirye, teleb ninguk laka upliba, aning dobuka, moubuka memelamak touk, narye malye ning aning-aning nirya, kum kipdeipnirye, teleb kipdeipnamne. Malye ning bataknamne. Teleb ning ara, ‘Naʼ tenen, deipnamne. Aning atonun, dekna pia weik ning emas do, perak do, malye wamlibuk, teleb kililamak touk, narye sik Lewi yala nang, imam-imam nang nirya ati, yanuka yupu lipsisikuka bokeipnirye, teleb kipdeipnamne. Winipnyopura, sik Lewi yala deiyok nang arye, ila tuba tamubuka, na Allah Yahweh ati, kam ning obuka arelyakirye, na si erena ati, uku dongopnamake. Winibikiba, na Allah arye kanye deipnamne. Narye sikti, teleb kipdeipniba, na tenenye touk wininamake.
Ayupu nyabukopura, domon yupu tonap nyabuk. “Allah arye ninye weike lyeplirye, anggun talima talisilye atonun ning ara, nyapnusine. Yuk nang ara, ‘Malye nang arye nun dekna weik ning ubula dopropsikcak’ tenen, tuku palibuka duknyamik bukni, tonoknye talye mangkau asa banmokce, aduknyamik ning eibuk. Eibukce, ‘Yuk nang arye, adekna weik ning doprobikcak’ tenen, elce aning dobuka ila tonap moubuka duknubuk. Dunubukce, utenebuk. ‘Awa tuku deknyopura, adekna weik ning awa noutamak, tuku palibuka duknubuka deiamuk ning ababye doproptinye,’ tenebukce el min arye talyamuk ning nirya dekukabukce libuka, awa talyamika deiyok nang dam biyukce, ayo bok deice arye awa tuku dekuk.” Yesus arye nyabuk. Tonda, ayupu nyabukopura, ayupu atonun ning ton nyabuk.
Yesus arye adomon yupu nyabukopura, akekenmek ninye ati ayupu tonap nyabuk. “Anyapmasin ning ara, ‘Na mutan’ tenen, aning-aning weike deiamuk bukni, kum dopromok cuk dibuk touk, yata nang do nirya, Allah arye mambul tenelye ning delina ap, kintinina ap una kum arye, sik babye, sik un ning atibuk deililamak nang ara, atonun unamake,” nyabuk.
Aning ara talye ati kum nyapsine. Deiyok ara ani. Nun Deiyoknye Yesus arye nun nirya ati, bico tenelamsukce, weik arye melyamsuk touk, ‘Nun babye atonun wininamap’ tenen, nyapsine. Ara, anggun kele, nun Deiyoknye Yesus, el kanye aniryuk bico tenenyamsukce, melipsuka deice arye, teleb kipdeipsuke. Elda im deice pia weik sisinanye ulamuk bukni, nun melina ati ara, talye bona utotowa talina kum nang atonun dayukce, tukwak mutuku yayuk. Winibuka ulamuk ning ababye, deiyok aupmale. Ara, el talye bona utotoa talina kum nang atonun dayukce, pil dopsuka deice arye, ‘Sik tukwak ninye ara, bona utotowa talina kum ninye atonun unyak bukni, narye aninye lyepnyopura, sikda bona weik talilamak ninye atonun unamake,’ tenebuka wipsuke.
Tonda, bona weik talin nang ati ayupu ton nyanamlyame. “Sik bona weik talin nang ara, sik bona weik aulye touk, teleb un ning weik arye pia upmunyopura, aning ara, bona weik talin nang atonun unamake. Tonda, ‘Se aning ara, ‘Na’ tenen ning anya arye, kum arenamne’ tenen, teniltona kum aryuk, talye kanye bobuka yuk ninye ati, anggun ning weik arye bokuka arenamlume,” nyabuka peterenamlyame. Na Paulus arye nyapmakine.
Ura, na kayapu, na nyapnusin yupu moubuka kekeplulume. Aning kum tenipmalum do? Sik diba tenena kum arye, talye tukwak ninye nirya arye, ‘E, anang ara, pia talye kankan ninye anya arye, sikda mambul pia kume,’ tenelamsikce nang ara, Allah arye akankan unyak ninye ara, kunum wipbuke. Allah arye wipsuka ara, ‘Dib tenena deiyok ning ara weik arye arepnamne’ tenen, anang wibuk. Deiyok ara, anang ara na Allah ati, ‘Weik arye diba tenenamniyake,’ tenepsuke. Ura, yata winin ning do nirya, Allah elda ikin kum uptue. ‘Aning-aning nirya kanam aniryuk ulule’ tenen, Weika arye diba tenenyaba anya arye, bona weik kum talinyab bukni, bona weik talinan nye atonun akunum kipdeipsuke. Tonda, Allah arye, ‘Na ti, kanye deibuka ulamice nang ara, na im deice talibuka unye ning ara, sirya talak arepnamsine,’ nyapdeiamsuk touk, arepsilibuk dolonamabe. Ati, talye kankan ninye wipsuka ara, kum tenipmalum do?
Kanye winilden ning usilye ning ara, deiyok nyapnusine. Ara, anggun diba tenebuka, Yesus talibuka umunye ning nirya ara, winilesilyebuk, talima wisipsilye, ‘Dipkoprop pia gat uk, dipkoprop ninguk unamsil’ tenen, yangalule. Dekna weik ning emas ara, ‘Malye ning ubuk ning, kum uptue’ tenen, uku dongopmacebuk, malye ning diplyopura, teleb ubuka delinyak bukni, emas babye kum uptue. Emas ara, dekna weik ning ulul bukni, mitik mambul ninguk ulule. Anggunce diba tenebuka, Yesus talibuka umunye ning nirya ara, weik dekna weik ning atonun, weik mambul ulule. Diba tenelulum ning winilesilyebuk, akunum teleb uplyopura, Allah arye nyapdeiplibuk, Yesus Kristus tamubuka lakak yanamle talak ara, Allah arye telebe nyana ap, si erena ap, weik dirina ap, weik si ap, arepsilirye, erelinamsile.
Atalak aryuk Yesus arye ayupu nyabukba, kekepse. “Anggun nirya kanye mouplulume. Ubula don nang talya karin arye duknubuka yangalamak touk, anggun kum bikmamunye talakuk talye karin arye yanamne. Allah arye teleb updeiplirye, meliliba kanye deibuka unamlanye wininamle ning ara, lak nyapnusine. Winipmanto ara, ninye arye, ‘Nun mankau mapmabye talak, baju kum ongopmabibuk, nun kayapu yacopura, alye dakdapyak’ tenen, baju ongobikirye kanye moubuka kintinibuka dilamak touk, Allah arye melinamlanye babye kintinibuka dinauk unamle.” “Ayupu nong noutam ara, ani. Anggunce, ‘Nun ni kopropa dan talak dolyanamsil do?’ tenen, kintinibuka dinauk upmunyopura, aminyan talak ara, anggun alye kum dakanamlume. Tonda, winipmanto ara, kintinina kumopura, ninye dinmacak, talye nong demuk banyak ninye arye, alye dakaldalamak touk anggun babye kintinibuka dinauk kum upmunyopura, na tamubuka yanamne talak ara, alye dakdanamlume. Ati kanye mouplulume, nyapsine.” Yesus arye ayupu nyanmokak kekepse.
El dopnamal kil ato ninye ara, pia teleb namin baju, lek ning, dirin weik ulul ning ara, akunum arepmalaba, ongopmake.” Ayupu nirya nyabikba, Na Yohanes arye, kekepse. (Na Yohanes arye nyapsine. Pia teleb namin baju nyabuk ning ara, winipmanto ulul bukni, aning nong ara, ani. Ara, Allah arye wiamukba, elti, diba tenebuka, el yupu kekebuka dobolbalamik ninye arye, diksukumuk ulamik ning ati, tenenyabe.)
Anggun imun kanye dobuka umunye ning ap, ikin usilye ning ap, aning-aning nirya kum dasukba, talye bona utotoa kum ninye umunye ning ap ara, na kel bikamsise. Aning-aning nirya kum talilulum bukni, na kanye ara, anggunda bona uto-uto talin ninye atonun ululume. Sik yuk nang arye, “Nunda, dipkoprop Yahudi yala ninye, Allah el mapu unyabe,” nyabuka talye nyaltakalamak ninye arye, anggun Semirna mutuku diba tenena nang ati, malye yupu weika arye nyasinyak deice arye lululisinyaka ara, na kele. Aning ara, Isa Mutuku Dongonye arye talilulba, el siuk erenyake. Na mapu kum unyake.
Anggun bidamnye arye, anggun bidamang ati nyalalulume. “Kume, nunda aning-aning ayala-ayala nirya weika arye bulubuka akunum deiamuba ati, nunda bona uto-uto talin ninye akunum unyabe. Yata ning do nirya kum patasulule,” nyabuka kwalilulume. Utenebukce nyalalulum bukni, dipkoprop winimunye ning ara, moubuka kum tenelulume. Allah arye anggunti el kanye ara, ‘Kume, aninye ara, pia malye-malyeuk wininyaka anya arye, yuk nang nirya arye anggunti, se sikda bicoe,’ tenenamake. Sikda talye bona utotoa kum ninye ap, asing kun ninye ap, talye nong demuk banang banyak ninye ap atonun unyake. Allah arye anggun ati, ‘Sik Laodikia ninye ara, na like,’ utenesulule.
Apia mambulnye bukmokak, dana-dana nirya ara, im deice ninye deiyok nang bun ning ton, yupa weik 24 ubukba, eipse. Abukmok ning deice ara, sik talima wisamukba, Allah kum batakmanto nang, weik deiyok nang, 24 nang bukmekba, eipse. Adeiyok nang nirya ara, pia teleb kurun baju ongopmekce, sik kisok deice ara, emas ato ning el si ara mahkota, kalupdongopmekak, eipse.
ကြော်ငြာတွေ