Kat ning perunggu arye memepdeibuk ayukumna bitinye ap, mouse tam bakung bunga kita lalamla atonun ubuka deiamukak nirya ap, bunga arye kwanibuka, merekeiamuk ning nirya ap ara, adice deibuk. Ayukumna yo nirya ara, Allah el si eren aik, bublan wekelban sukum ikeibuk, ton ning ara, iknaipye tam ikdeibukce, ayukumna el si ara, ‘Yakinʼ nyabuk. Ton ayukumna ara, dabu tam ikukce, el si ara, ‘Boasʼ nyabuk.
Wahyu 3:12 - Eipomek12 Malye winin ning ati, ‘Nun like’ tenen, malye kilamice ninye ati ara, pia teleb kipdeipniba, mikip weik ubikirye, darabuka unamake. Ara, na ni el si erena aik, weik arye domik aik ara, el ayukumna yo pia darabuka, kat asa tiklamle touk, aninye sik kanye talima nirya mikip kipniba, pia darabuka kat asa, telebuk unamake. Allah el ulya im deice ara, bikirye batakuka kum binamake. El ap pia neika unamake. Anggunce malye winin ning ati, malye kibuka bisinamlum ninye ati ara, narye winiryuk si winilye si nyabuka, anggun asok deice sekeipnamsine. Tonok ning ara, na ni Allah el si ap, bitinye ning el unamlak Yerusalem Winiryuk mutuku si ap, winilye ning ara, na si winiryuk si ap, anggun asok deice sekeipnamsine. Allah arye weik asik el si ara Yerusalem Winiryuk mutuku kintinipsilirye, im deice arye dopkwetepliba, yanamle. အခန်းကိုကြည့်ပါ။ |
Wahyu 3:12
26 ပူးပေါင်းရင်းမြစ်များ
Raja-Raja nang ap, sik yin talin nang arye, ‘Lyepdanamap’ tenen, bibik abuka, bindobik bukni, nun ni Allah, ance anang nirya ati, obuka sirya daklume. Winipmanto ning ara, ani. Ara, keting panalyangalamle tam arye, mikip weik kum yalirye, Tarsis mutuku, weik mek deice balamle ning, el si laut mekwen deice, mikip arye peiyang aplyeba, kapal nirya dakuka, sice bultakalamle touk, winiplume. Ara, sik yuk-yuk mutuku Raja nang ap, sik yin nang ap, obuka sirya dakupe.
Winipyopura, tukwak nang mutuku sirya, im sirya nirya, daunyak nang nirya ara, narye, “Na mapu koproba, sik Israel nang ati lopdeipnirye, lyepdopnamne,” nyabuka, nyalin yupu nyapse ning ara, akunum winipniba, lak arye eipnamake. Tonda, tukwak mutuku noutam nirya, ninye deiyok kibuka, Raja unyak nang, mutuku sirya, im sirya nirya talinyak nang arye, Israel anggun tamubuka, teleb kipdeipsiniba, pia teleb unamlum ning ara, weik dirina ulamle touk upliba, eipnamake. Tonda, na Allah Yahweh arye, anggunti, winiryuk si sipsiniba, yuk nang nirya, aning kekebuka kel bikikcopura, sikce anggun Israel nang ati, auku siuk sinyanamake. Ara, sik tuba tamubuka, pia teleb kipdeipnamsin touk, na Allah Yahweh aryuk anggunti, asi si sipnamsine.
“Narye, ‘Aninye ara na mapu koproba’ tenen, wipdeiamsiba, na si tuba ereninyak nang arye, anggun malye ululum ninye ati, dipdongobuka anggun si malye nyanamsiyake. Tonda, na Allah Yahweh arye aning-aning nirya talinirye, ‘Winipnamne’ tenenye touk, ninye winipmanto kum pil donanye birye nyapsine. Nara, Weik Erena Deiyoknye aryuk, anggun malye-malye ululum ninye ati, obuka sirya dakanamsine. Bukni, na amu tam unyakce, na si erenyak ninye ati, winiryuk si pia teleb ning arepnamne.
Anyapnukin ning ara, Yeremia anda, pia moubuka kekeplyame. Narye an deice mikip weik akunum arepmakine anya arye, sik amutuku ninye arye, anti, malye yupu nyapkikirye, ‘Anye optibye’ tenen, piridenamkiyaka babye, kum opnamkiyake. Ati yata weik nang do nirya, amutuku noutamak unyak nang, sik ninye deiyok talibuka Raja unyak nang ap, Raja nang, sik amu tamukirye, weik deiyok nang nirya ap, yuk-yuk deiyok talibuka pil donyak nang ap, tonda na Allah si erenyak aik pum tam pil dona deiyok nang ap, sik anang amu tam talye daunyak ninye nirya ap, anti bisibuka kum opnamkiyake. Ance sikti, malye kibuka bisipnalame. Ati asum ara, an deice mikip weik ning arepmakina anya arye, winipmanto yupu nyapnukine. Anda aik dobikirye, weik kat ning arye, poka dobuka antanaldongolamak atonun kipdeipkine. Tonda pia weik kat besi ning arye, ikuka dolamak aik ayukumna yo kintinibuka deibikirye, dobikiba, mikip weik ulamle touk, na mikip dobuka, an deice deipkine. Tonda, kat ning, el si tembaga dobuka, keil poka dobikiba, yuk mutuku nang arye, apoka fakuka, wekmanto kum ulamak touk, an deice mikip weik arepkine. Ati, sik amutuku unyak ninye arye, an nyapnamalam yupu bisibuka kum opnamkiyake.
Allah el si eren aik domik ning, wekelban bisik dam, atolonga domik ning kiklipdeyukura, atam arye dipdongobuka, otam el pala ara, 10.6 meter lebar kibuk. Tonda, anyaik wekelban bisik dam bukni, atolonga atam arye, dipdongobuka otam kiklipdeyukura, el cang ara, 6 meter kibuk. Tonda, anyaik atolonga welebana ati ara, el takubarye (10) moryamikce, kintinip deiamik ning eipse. Tonda, ninye tukwak arye asukum welebuka, anyaik wekelbana ati, bisik dana-dana tam ara, cang weik ayukumna bitinye ikuka domik. Ton ayukumna ara atam, ton ikamik ton ning ara, otam ikuka domik.
Akat keil arye, cang poka dopnamlum ning ara, kota Yerusalem antanap dongobuka dana-dana tam nirya nukmunyopura, el cang nirya ara, 9 kilometer deice kiklibuka dopnamlume. Tonda, kota Yerusalem dona ati, anggun deiyok koupnamlum talak arye dipdongobuka, keting tamun oyanamle talak nirya ara, akota si ton si sinamak nang ara, ani. Akota el si ara, ‘Allah Yahweh, amutuku noutam tuba aulule,’ nyabuka, kota si ati sisinamlume.
Nyabukura, sikce akeil uang lake kipdeyikopura, Yesus arye asipdeyuk. “Anggun ton akeil uang dipdelulume. Akeil uang deice el ninye urasin atouk puturubuka deibik ning ara, yatanye urasin do? Tonda, ninye si sekuka deibik ning ara, yatanye si do?” nyabuka Yesus arye asipdeyuk. Asipdeyukura, sikce tamubuka, “Ara, weik ninye deiyoknye Kaisar el ning,” nyabik.
Kel kipnik ning ara, yuk nang arye, “Anang ara, weik deiyok nang,” nyalamikbuk, aulamik nang, sik si ara Yakobus ap, Peterus ap, Yohanes ap, sik nirya arye, na ap, Barnabas ap ati, sirik taruk arye telebe nyabuka arepsikce kipsik. Ara, sikce nunti, ‘Anang ara nun pil donyap touk, sik babye atonun pil donyake’ tenen, sirik taruk arye talipsikce, kipsike. Taruk talibuka kipsika ara, na laka nyalamse yupu kekebikce, ‘E, Allah arye Paulus biti bico tenyamukce, el kanye aniryuk Paulus biti weika arye melyamukba, Paulus birye Allah el pil teleb ubuka dolule’ tenen, kel biknikce, taruk talipsik talak ara, sik Yerusalem mutuku unyaka deiyok nang nirya eibike. Winipsikce, yupu talibupu talak ara, nyapnik. “Ura, nunda, ‘Yahudi yala ninye diba tenenamak’ tenen, peterelbinamap bukni, Paulus ap, el neika unyak nang ap arye, yuk yala ninye nirya, Yahudi yala kum ninye nirya ati, peterelbinamak,” nyabuka, yupu nyapdapu. ‘Aning ara telebe,’ tenen, neika atonun tenebupe. Na Paulus birye laka nyapsine.
Ura, na kayapo. Sik minop talak ulamik Israel ninye, asing eipmanto ning dam yangalamik bukni, anggun wini talak ululum ninye ara, pia yuk nang dam yanmalume. Anggunda, Sion mutuku, Pia Kam Una Deiyoknye Allah, el ulul mutuku, im deice Yerusalem asik dam yanganmalume. Anggunda, weik yupa weik kum nukmanto, im deice pil don nang teleb kanye deibuka, malaikat beribu-ribuan bulubuka, weklamak dam yanganmalume.
Aning ara, talye ati kum nyapsine. Deiyok ara, tukwak mutuku im sirya, mutuku sirya nirya noutamak ara, nun aik pia unamsilak kum ulule. Aning kum bukni, ‘Nun pia unamap aik ara, aminyan talak yanamsil’ tenen, kintinibuka dinauk unyabe. Ati Yesus atibuk diba tenebibirye, eluk talibibirye, yuk ninye arye lyek-lyek nyabuka, ikin ning nun nong deice deipsica babye, ‘Aning ara telebe uka,’ tenebibirye unamabe.
Na mapu atonun nango, anggunda Allah ati, diba tenebuka taliplum nang ara, anggun talima ak usilinye, Allah, el mikip pia weik ulule. Bukni, tilila yupu peterenyak nang nirya, sik talima ak ulirye, talilinye bira, Isa Mutuku Dongonye, el mikip mitika. Ati ara, Allah el mikip deice talisilibuk, ululuma anya arye, Isa Mutuku Dongonye, el talilye nang nirya, akunum yanibuka bataklulume.
Min nyapmasin ning eipsopura, na Yohanes arye aminyan eipse ning ton laka nyapnusine. Ara tonok weik mutuku dup, el si ara Sion mutuku, Domba Mi Atonye ap, elce akunum lyebuk ninye ap, sik yupa weik 144.000 ninye ap, amutuku dup deice tikmeka, eipse. Sik 144.000 ninye nirya ara, Domba Mi el si ap, el Li Kopropa Allah el si ap, sik asok deice sekdeiyamuk ning ara, eipse.
“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.
Aning ati ara, anggun amul aupsililiba, ayupu kekepmanto ululum ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Malye winin ning nirya ati, malye kibuka kinyak ninye nirya ara, ninye dipna like bitinye talak dipnamak ning ara, sik kum dipnamake. Malye winin ninye ila tuba tonap like bitinye dipnamak bukni, malye ning ati, ‘Nun like’ tenebuka, malye kilamice ninye ara kume. Kamuk unamake. Ayupu nirya ara, Semirna mutuku diba tenebuka unyak ninye ati nyapnamlyame. Ayupu nirya nyapnuke.
“Aning ati ara, anggun amul aupsililiba, ‘Ayupu deiyok ani’ tenen, kekepmanto ululum ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Malye winin ning nirya ati, ‘Nun like’ tenebikirye, malye kilamice ninye nirya ati ara, narye duknyamse kwaning, el si ara manna, bokuka arenamsine. Tonda anggun winiryuk si ati, tenebuka wipnirye, silye keil kurun ning deice seknyopura, aninye ati arepnamsine. Anggun winiryuk si ara, yuk ninye kum kel biknamake. Doprobica ninye aryuk, sik bidamang siuk kel biknamake. Ayupu nirya ara, Pergamus mutuku unyak diba tenena ninye ati nyapnamlyame,” nyapnuke. Ninye Mi Koprop Atonunye arye, na Yohanes ati nyapnuke.
Anggun amul wapsilyopura, ‘Ayupu deiyok ara ani’ tenen, kekepmanto ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Ara, malye winin ning nirya ati, malye kibuka kinyak ninye nirya ati ara, na pia teleb ununa noutamak tikuk yo ati, “Teleb amolul yo duk ara anggunda dakuka diplulum,” nyapnamne. Ayo duk din ning ninye nirya ara, pia kamuk unamak anya arye, ayo el si ara, Kam Una Yo nyanyabe. “Ayupu nirya ara, Efesus mutuku diba tenebuka unyak ninye ati nyapnamlyame,” nyapnuke.
Allah im deice tam noutamak arye, weik asik el si ara, Yerusalem Winiryuk dopkwetebukba, koluka yanganmoka, eipse. Yerusalem Winiryuk asik noutamak ara, malye ning tonok babye kum ulamukce, pia telebuk uamuk asik eipse. Winipmanto ara, ninye arye, ‘Nun tam nang kil dopnul’ tenen, kam kil el nong deice pia urasin teleb baju ap, kwerya ning ap weika arye memebuka dolilamak touk, Yerusalem Winiryuk (Yerusalem Baru nyalamiknye) asik nirya ara, urasin pia telebuk ubukba, eipse.
Ati malye winin ning aning-aning nirya, ‘Nun like’ tenen, malye kilamice ninye ati ara, anyapmasin ninye atonun, pia lek kurun baju arepniba, ongonamake. Kam Pia Unamak Ninye Si Sekna Buku noutamak anggun ninye si sekeipsik nang ara, pia kum kilipnamne. Ato ninye, sik si kum kilipnamne bukni, na ni Allah el dam binuka, “Aninye ara na mapu kopropa unyake,” nyabuka, sik si lakak si nyapnamne. Tonda, Allah el im deice pil don nang, sik malaikat nirya babye, aninye sik si lakak nyapneba, kekenamake.
ကြော်ငြာတွေ