Ura, Allah el si Yahweh arye nyapdeibukba, yo aning-aning nirya tikuk. Ayo nirya ara, urasin pia teleb yo uamuk. Tonda, ayo moulamuk yo duk nirya ara, dina teleb yo duk uamuk. Allah arye, kintinip deibuk wa noutamak ara, pia teleb yo bitinye tikrik. Ton yo ara, Kam Una Deiyok Yo tikuk. Bitinye ning ara, Malye Winina ap, Teleb Winina ap Kel Bikna Deiyok Yo tikuk.
Wahyu 2:7 - Eipomek7 Anggun amul wapsilyopura, ‘Ayupu deiyok ara ani’ tenen, kekepmanto ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Ara, malye winin ning nirya ati, malye kibuka kinyak ninye nirya ati ara, na pia teleb ununa noutamak tikuk yo ati, “Teleb amolul yo duk ara anggunda dakuka diplulum,” nyapnamne. Ayo duk din ning ninye nirya ara, pia kamuk unamak anya arye, ayo el si ara, Kam Una Yo nyanyabe. “Ayupu nirya ara, Efesus mutuku diba tenebuka unyak ninye ati nyapnamlyame,” nyapnuke. အခန်းကိုကြည့်ပါ။ |
Wahyu 2:7
36 ပူးပေါင်းရင်းမြစ်များ
Winipmanto ara, duk teleb moulamle yo arye, yo duk pia teleb ninguk moulamle touk, sik malye ning tonok ning babye, kum talikirye, diksukum un ninguk, talibuka unyak ninye ara, aminyan talak kam pia una deiyok ning dopdobikirye, kam pia unamake. Tonda, yatanye do nirya, ‘Yuk ninye ton, Allah ati dib tenebikirye, sik babye kam unamak’ tenen, Allah yupu moubuka peterebikiba, yuk nang kekebikirye, dib tenebikcopura, apeteren deiyoknye bira, diksukum teleb pil dolula ati ara, elda pia kel weiknye unamle. Aminyan talak ara, Allah arye anye biti, dengna ning tabakuka arenamle.
Kanye pum tam aniryuk, ‘Se, aning ton winiptinye, aning ton doproptinye,’ tenelamlanye bira, atenelamlye ning kum uplyopura, ‘Yata deiyok ati kum upmanil do?’ tenen, malye kanye bobuka ulule. Bukni, aminyan talak el kanye pum tam arye, ‘Se, aning ton winiptinye, aning ton doproptinye,’ tenelamle touk akunum yalyopura, anye bira pia pin-pin kanye bobuka unamle.
Ninye arye yuk nang ati, yupu nyapnuce talak ara, nimalye arye tenipdekirye, teleb yupu uk nyanamake. Winibikce deice arye, yuk ninye sik kanye teleb ulinamake. Winipmanto ara pia teleb yo duk moupmaliba, ninye arye dakuka arepmakibuk dibikirye, kam ulamak touk unamle. Sik nirya arye, teleb yupu kekebikirye, sik kanye talima mikip kibuka melildakirye unamake. Wininamak bukni, yuk nang arye yuk ninye ati tenena kumce, talye tilila yupu nyaltakanyake. Atilila yupu nyaltakaca deice arye, malye kanye bobikirye, dipkoprob anang sik kanye talima kam un ning ara, mitang kilinyake.
An ulamlum mutuku ara, Eden mutuku ulamlume. Ara, Allah elce, pia teleb palamle ning, yuk-yuk ning nirya kouamukak ulamlume. An baju deice ara, urasin pia teleb dekna weik keil arye, taplakuka wiamikba, aning ongolamlume. Ara, Yaspis keil ining bi ning ap, Krisolit keil ap, Yaspis keil poron ning ap, Pirus keil permata ap, Krisopras keil ap, Neferit keil ap, Lasurit keil ap, ining bi keil ap, Tonda akeil noutam aknapdongobik ning ara, pia teleb emasuk, uamuk. Tonda, urasin teleb ning aryuk, puturubukabikce, kintinibuka deibik ning ara, pia telebuk uamuk. Aning nirya ara, an kwepdeipkuk talak aryuk, aning kintinibuka deibuke.
Allah arye minop talak kwepdeibuk mutuku, Eden mutuku tikamuk keipyal yo ara, Libanon mutuku tikuk keipyal yo atonun kume. Libanon mutuku keipyal yo ara, urasin pia teleb ubuk. Tonda, yuk mutuku tikuk yo, el si Sanobar yo ara, taruk weik ton aulul bukni, elti dektinga babye, pia kume. Libanon keipyal yo ara, el taruk cang ara, weik anya arye, yuk yo ton atonun kum ulule. Eden mutuku tikuk yo ara, Allah arye kwepdeiamuk bukni, Libanon mutuku tiklamle yo ara, el kamo urasin atonun, yuk yo ton pia kum ulule. Libanon tikilul yo ara, urasin pia teleb ninge.
Aning akunum winibikcopura, Allah arye talyamukba, diksukumuk wininyak ninye ara, Allah ap, im deice unamake. Keting deiplirye, dirina weik ulamle touk, diksukumuk wininyak ninye ara, im deice unamak talak ara, Allah arye aninye taliplirye, im deice unamle mutuku noutamak ara, sikda weik mambul ninye anya arye, pia teleb ubuka unamake. Ati, anggun amul aupsilyopura, ayupu kekepmanto ululum nang ara, na nyapmasin yupu moubuka kekepnululume. Yesus arye nyabuk.
Yata ning do nirya, ninye bola deice ulul ning ap, buru tam ulul ning nirya ap, dilulumbuk, sibabol bisik arye anggun mun pum bisik wekelul bukni, adeice arye anggun talima malye kum ulisulule. Aning kum bukni, anggun kanye talima noutamak malye tenelulum ning ara, talima noutam tenemunce, winilamlum ning deice arye malye ulisulule. Yesus arye awekuka kekenmek nang ati nyabuk.
Aning ara kum mulamuk bukni, yala tonok dokuk ning ara, mirin tuku teleb ak sakuk. Mirin tuku deice sakuk ning ara, pabukce nebukopura, duk moulamuk. Yala tonok-tonok sakukura, duk moulamuka ara, yupa pia weike seratus moubuk,” Yesus arye winipmanto yupu nyabukopura, ayupu ton nyabuk. “Amul aupmasilyeura, ayupu kekepmanto nang ara, ‘Ayupu deiyoknye dan do’ tenen, kekepnamlulume,” nyabuk.
Aning-aning nirya, min nyapmasina deiyok ara, ‘Sikce nati diba tenepnikirye, na ap, na mapu ap, kanye talima dukdongobuka neikauk ubibyopura, sik ikin kanye bona kumce, kanye deibuka telebuk unamak’ tenen, ati nyapmasine. Tukwak mutuku noutamak unamlum talak nirya ara, ikin ning ap, kanye imun ning ap, unamsile. Bukni, bouku sukuna kumce, kanye deibuka lamapdongobuka unamlume. Ara, tukwak mutuku ulul ning ap, tukwak mutuku unyak ninye ap nirya ara, narye akunum malye kibuka bisipsirye, sik deice tam akunum ununa ati nyapsine.” Yesus arye el wipdeiyamuk nang, sik 12 nang ati nyabuk.
Yesaya arye, ayupu sekamuk bukni, wini talak ara, Allah arye nyapdeibukba, Allah El Dib Kanye arye, nun talima pum tamak pil dosilya deice arye, laka kilisulule. Yata ning do nirya, ara, Allah elce minop talak duknyamuk ning babye, el yuk datenelul ning babye, Allah El Dib Kanye arye, aning nirya bobuka kel kililulce, peteresulule.
Allah dopropnukce, im deice malye ning tonok babye kum ulyak, pia teleb akuk nyapdeipnuke. Idipnukba, kekepse ning ara, ninye yupu deice arye kum laka nyaptinye. Tonda, na kekepse ning ara, tukwak ninye ara, dipnamak nang anya arye, ayupu kum kekeptinge. Ati, ‘Ayupu kekebikcak’ tenen, yupu akunum seknuka anya arye, aning ara laka kum nyapsitinye.
Anggun dipkoprop wisi nang ara, na ni yapu atonun ululume. Aning-aning nirya min kum uamuk talak, minop arye el tonok ulamuknye, Allah akunum kel kiplume. Allah akunum kel kipluma ati, ayupu seksene. Anggun kam nang ara, Pia Malye Ululnye, Isa Mutuku Dongonye akunum bisibuka yaniptapluma ati, ayupu seksene. Tonda, na mapu atouk nang ara, nun ni Allah akunum diba tenebuka kel kipluma ati, ayupu seksene.
Amalaikat winilye dinmasiba, adiparyuk im deice tam arye, ninye yupu atonun yupu arye, ayupu ton nyabukba, kekepse. Ayupu ara, ani. “Ayupu seklyame. Wini talak arye dipdongobuka, aminyan yanamle talak noutamak nirya, Yesus ap talima dukdongobuka unyak bukni, aminyan talak dipnamak ninye nirya ati, Allah arye teleb updeipliba, kanye deibuka, pia telebuk unamake,” nyabuk. Nyabukura, Allah El Dib Kanye arye nyabuk. “Dipkoprop nyaplume. Sik pil teleb ubuka dolamikba, nong uamuk ning ara, Allah arye kel kilula ati ara, aninye dibikirye, el dam welebicopura, ikin ning, sik nong deice ulamukba, pil ikin arye dolamik ning nirya batakuka, dikdik sebikirye, teleb kanye deibuka unamake. Sik ikin tonap pia kum unamake.” Allah El Dib Kanye arye nyabukba, kekepse.
Tonda weik laut mekwen atonun ubukba, eipse. Aweik laut mekwen ato ning, el urasin ara, luma kum mek, pia mirin teleb mek ak eipse. Amekwen ato ning noutamak ara, uku buk ap, mek diksukum ap tabakuka uptopura, el urasin aning atonun ubukak, eipse. Amekwen ato ning kup-kup ak tikmek ninye ara, talye nang kum bukni, pia Malye Kam Ulul Ning ap, el urasin atonun puturupdeibik ning ap, el si nomor 666 ap, aning nirya ati si erena kumce, amalye ning nirya malye kibuka nirya obik ninye tikmekba, eipse. Sik taruk arye bingkong bung-bung ana ato ning, el si ara kecapi talipmek ning ara, Allah arye sik aninye ati arepmok ning talibuka tikmekba, eipse.
Aning ati ara, anggun amul aupsililiba, ayupu kekepmanto ululum ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Malye winin ning nirya ati, malye kibuka kinyak ninye nirya ara, ninye dipna like bitinye talak dipnamak ning ara, sik kum dipnamake. Malye winin ninye ila tuba tonap like bitinye dipnamak bukni, malye ning ati, ‘Nun like’ tenebuka, malye kilamice ninye ara kume. Kamuk unamake. Ayupu nirya ara, Semirna mutuku diba tenebuka unyak ninye ati nyapnamlyame. Ayupu nirya nyapnuke.
“Aning ati ara, anggun amul aupsililiba, ‘Ayupu deiyok ani’ tenen, kekepmanto ululum ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Malye winin ning nirya ati, ‘Nun like’ tenebikirye, malye kilamice ninye nirya ati ara, narye duknyamse kwaning, el si ara manna, bokuka arenamsine. Tonda anggun winiryuk si ati, tenebuka wipnirye, silye keil kurun ning deice seknyopura, aninye ati arepnamsine. Anggun winiryuk si ara, yuk ninye kum kel biknamake. Doprobica ninye aryuk, sik bidamang siuk kel biknamake. Ayupu nirya ara, Pergamus mutuku unyak diba tenena ninye ati nyapnamlyame,” nyapnuke. Ninye Mi Koprop Atonunye arye, na Yohanes ati nyapnuke.
“Yata kil do, yatanye do, malye un ning ap, malye winin ninye ap nirya ati, ‘Nun like’ tenen, malye kibikirye, nati kum batakicopura, dekna ning arenamne. Ara, ance elinmalam ning ap, narye nyapkinaba, kekenmalam ning nirya ap arepniba, nati kum bataklamnik ninye arye dolonamake. Na Allah arye aninye nirya ati talipniba, sikda na mapu kopropa unamake. Na siuk erenamniyake.”
“Ninye arye, sik baju nininga bolpipliba, ‘Lek upnul’ tenen, mek liklamak touk, yata nang do nirya, na Yesus ati diba tenebica deice arye, sik malye ning kum daneiamsesi ninye ara, Allah arye aninye ati teleb kipdeipliba, kanye deibuka telebuk unamake. Aninye ara, Kam Una Deiyok Yo, el duk dakuka diptinge. Tonda, ananguk Yerusalem Winiryuk dana-dana dobik poka buplan noutamak arye, talye urdem wektingce, anyasik noutamak talye urdem wekenamake.
“Allah El Dib Kanye ap, tonda Domba Mi Atonye birye, el dopnamle kil ato nang, sik diba tenenyak ninye ap, sik nirya arye nati, ‘Yanamle,’ nyabuka moroninyake. Ayupu kekebikirye, diba tenenyak ninye nirya arye nati, ‘Yalyame,’ nyabuka moroninyake. Yata ninye do nirya, kam una deiyok mek ati patalul ninye nirya ara, na dam yangana telebe. Tonda, ‘Se, amek ara dobuka diptinye’ tenen, pia pataliba, kanye talima engelul nang nirya ati, narye kam una deiyok mek, dekna kum urdem arye kwebuka arenamsin ati, amek patalul ninye nirya arye kam una deiyok mek dolyangana telebuka.”
Aminyan anyaik dana-dana noutamak ubuk bisik, emas bisik noutamak amek balule. Amek kup-kup, dana-dana ara, Kam Una Deiyok Yo tikamuk. Tikamukce, el yo duk moulamle li talak ara, awala-awala nirya duk pia moulule. Keting tamun tonok noutamak ara, yuk-yuk bukni, like 12 kali duk moulule. Kam Una Deiyok Yo, el yo bok ara, atalak kam unamak ninye mutuku-mutuku nirya, sik kwetena ati, pia ayo punduk arye kwetenamle.
ကြော်ငြာတွေ