Wahyu 19:8 - Eipomek

⁸ El dopnamal kil ato ninye ara, pia teleb namin baju, lek ning, dirin weik ulul ning ara, akunum arepmalaba, ongopmake.” Ayupu nirya nyabikba, Na Yohanes arye, kekepse. (Na Yohanes arye nyapsine. Pia teleb namin baju nyabuk ning ara, winipmanto ulul bukni, aning nong ara, ani. Ara, Allah arye wiamukba, elti, diba tenebuka, el yupu kekebuka dobolbalamik ninye arye, diksukumuk ulamik ning ati, tenenyabe.)

Wahyu 19:8 ပူးပေါင်းရင်းမြစ်များ

Mazmur 132:9

Se, nun ni Allah, an si eren aik pum tam pil dona deiyok nang, sik imam-iman nang arye, pia diksukumuk wininyak ning ara, sik ap yanamake. Tonda, an Allah arye, ‘Na mapuʼ tenen, akunum wipdeiamsulum nang ara, kanye deibibirye, weik yupu deice arye, an siuk pia erenamkiabe.

Amsal 31:22

Tonda el babye akil aryuk, ‘Weik arukna li uplye talak ara, buppu upnamle’ tenen, domba basam potong doplirye, buppu baju akunum wiamlula atia. Abutum wina ati, kain ara pia urasin teleb ning, kurun ning ap, mirin ning ap, bi ning ap arye akunum wiamlula atia.

Yesaya 3:23

urasin pia teleb dekna weik namin baju ap, cang baju ongonyak ning, pia teleb ning ap, baju deice ongonyak buppu cang baju ap, moul li talak ongolamak urasin teleb cang baju, el si ara mantel ap, yo bok lina ati, urasin teleb dompet ap, aling ap, baju amu tam ongolamak ning, pia namin baju, el si kain lenan ap, dalubuka dopropnamle. Tonda, ‘Nunda weik sisin kilapu, tenepnamsiakʼ tenen, sik kisok deice kalun kwerya ap, dekna weik ning ap, ‘Nun urasin eipdatibyeʼ tenen, bolamak ning, el si kaca muka ap ara, Allah arye alubuka dopropnamle. Aning-aning nirya ara, sik akilapu arye, ‘Ninye eibikirye, se, sikda urasin pia teleb kilapu,’ tenepsikirye, ‘Nun ti mambul nyanamsiakʼ tenen, kweirya ati donyak ning nirya ara, alubuka doproplirye, kum kipdeipnamle.

Yesaya 61:10

Nabi Yesaya birye nyabuk. Aminyan talak ara, Yerusalem mutuku unyak ninye arye nyanamake. ‘Nunda Allah Yahweh atibuk weik tonun kanye delinyabe,’ nyanamake. Tonda, ‘Nun ni Allah ati, nun kanye teleb usiliba, pin-pin kanye bonyabe,’ nyanamake. Ninye arye teleb cang baju ongolamak touk, Allah arye diksukum una deiyok ning weik tonun arisiliba, telebuk unamabe. Tonda, baju ongolamak touk, Allah arye ninye lyen ning arenamsile. Arenamsila ati, winipmanto ning ara, sal arye kil dopnulye talak ara, el kisok deice kweirya teleb ning kibuka yangalamle touk, Allah arye Israel ninye ati, pia teleb ulinamsile. Atonun, sal dopnun tenebice kilapu arye, dekna weik ning, emas ap, perak ap, dekna weik keil ap, sik nong deice karaklamak touk, Allah arye Israel ninye ati pia teleb ulinamsile.

Yehezkiel 16:10

Narye, anggun akunum dopropsise ara, anggun Yerusalem mutuku ululum nang ara, winipmanto ara, bona weik talin nang arye, kil dobuka ulamak touk, narye winipsise. Ara, bona weik talin Israel nang ara, kil dolamak touk winipse. Min ara, urasin pia teleb dekna weik baju ton arepsiseba, ongolulume. Tonda, urasin pia teleb sapi basam bol, pia namin ning arye, moubuka kintinip deibikce, yan kinikna, el si sandal ton, arepsiseba ongolulume. Tonda, anggun kisok kaluna ati ara, pia teleb namin baju, el si kain lenan arye koupdongopse. Tonda, anggun nong bai tam ongona ati, dekna weik baju, el si juba, pia teleb ning dobuka, ongopdeipse.

Yehezkiel 44:17

Ura, sik imam nang arye, na si eren aik dam bana ati, bai tam domik poka botopdeiamik bisik bublan, el si gapura dam arye wekuka, acang keil arye deibuka, domik aik dam wekelbanamak talak ara, pia namin baju, el si ara, kain lenan arye wilamak baju uk, ongobuka banamnyake. Na arena ati, el si mesba delilban talak babye, tonda na si eren aik lilun ban talak babye, sik anang ara, kain wol arye wilamak baju ton, pia kum ongobuka wekelbanamnyake. Ara, domba basam potong doprobikirye, baju wilamak ning ati nyapne. Bukni, sikce ongonamak baju ara, kain lenan arye wilamak ninguk, ongonamnyake.

Matius 17:2

Sik amutuku dup welebikopura, el mapu arye adinmek bukni, Yesus ara el urasin yuk ubuk. Yesus el urasin yuk dayukce, keting deiplirye, til pia daklamle touk dirina weik ubuk. El urasin dirina weik ubuka atonun, el baju kurubukce, dirina weik ubuk.

Matius 22:12

Eibukce ayupu nyabuk. “Kao, nun kil don talak teleb baju ongonyap ning kum ongopmalam diparyuk, yata wiribuka anyaik duknubuka wekmalam do?” nyabuka wenebuk. Nyabuka wenebukopura, amalye baju ongobuka wekmoknye bira, ‘Yata nyaptinye do?’ tenen, teniltonmok bukni, alye ubuk ati kanye lamapdongobuka bukuk.

Markus 9:3

Urasin yuk ubukce, el ongon cang baju, juga kurun ubukura, dirina weik ubuk. Ninye arye ongon cang baju, mek likicebuk, kurulamle atonun kum bukni, pia lekuk ubukura, dirina weik dayuk.

Lukas 24:4

Kum eibikce, ‘Yesus el nong dan do?’ tenen, teniltonmek talak ara, wel nang bitinye bebeya lingum ablirye, dirina weik ulamle tok, pia kurun baju ongopmarik nang, talye karin arye tikilyarik.

Rasul 1:10

Kum eibik bukni, el tuba welenmok talak ara, sik tuba urasin erebuka dinmekbuk ninye bitinye kurun baju ongamrik nang bikna kum talak talye karen arye minopce anang dam tikilyarik.

Roma 13:14

Amalye winin ning nirya ara, pia kum wininamap bukni, nunda, ninye arye winiryuk baju ongolamak touk, nun Deiyoknye Yesus Kristus ap, neika kanye talima dukdongobuka umunyopura, Yesus el ulamle touk unamlume. Tonda, min diba kum tenyamubu talak arye, nun kanye talima pum tam malye ning patalamsuk ning ara, ila tuba tonap patapsiliba tenemunya babye, pia kum wininamlulume. Amalye winin ning ati, tuba tenebuka kum wininamlulume.

Roma 3:22

Wini talak diksukum kilisulul ning ara, ani. Ara yata mutuku ninye do nirya atonun, Yesus Kristus ati diba tenebibya deice arye, Allah el kanye aryuk nun malye winin ning kilipsilirye, diksukum ninyeuk kilisulule. Ninye yala yuk-yuk kum wilisulule. Yesus ati diba tenenyak ninye nirya ati ara, Allah arye atonun tenesilirye, ‘Sikda diksukum ninye unyake,’ nyabuka tenesilirye, elcuk teleb kilisulule.

Wahyu 15:4

Malye winin ning tonok babye kum umince, anda Pia Telebnye ulyame. Ati ara, ninye im sirya, mutuku sirya nirya arye an ap, an si ap ati, ‘Se, elda weik mambule’ tenen, ilil ubikirye, “Allah anda pia telebe,” nyabuka an siuk pia erenamake. Tonok yala ninye babye, anti, ‘Dauplye,’ tenen, kum batakitinge. Ninye yala-yala nirya adiparyuk an siuk pia erenamkiake. Minop talak arye dipdongobuka, wini talak nirya noutamak ara, ance pia diksukum ubuka, dolamsulum pil nirya akunum lakak kipsilama ati, im sirya, mutuku sirya nirya noutamak arye, ninye ayala-ayala nirya an dam yakirye, an si pia erenamake.” Sik amekwen dam tikmek nang arye nyanmekba, kekepse.

Wahyu 15:6

Anyaik kuklobukba, Allah el im deice tam si eren aik pum tam arye, sik tekbarye malaikat arye, ninye wenena ati, weik kanye imun ning tekbarye bobuka yanmekba, eipse. Amalaikat sik baju ara, pia kurun teleb ning dirin weik baju ap, sik taram deice ara pia teleb poron cang baju pakupmek ning ap, emas urasin ato ning ketepmek ning ap, ongopmekba, eipse.

Wahyu 19:14

Anye bira, kurun kuda deice bukmokce menekuka banmokba, Allah el im deice tam yin talin malaikat nirya arye, el aminyan tam yanganmekak eipse. Ayin talin malaikat babye kurun kuda balye deice bukuka, el aminyan tam yanganmekak, eipse. Sik baju ara, pia teleb namin baju, kurun baju ongopmekak, eipse.

Wahyu 3:18

Ati ara, narye anggunti nyapsine. Emas ning dobukapnarye, ‘Malye ning nirya kum danul’ tenen, uku dongopnaba, malye ning nirya uku dipliba, pia teleb uplye ning ara, anggunce na dam dekelyanganulum. Aning winipnumunyopura, dipkoprop bona uto-uto talin ninye atonun unamlume. Na dam yanuka pia lek kurun baju dekmunyopura, anggun talye nong demuk balamunye ninye ara, anggun nong bol lelna ati, teleb koprop kurun baju ongopmunce, teleb unamlume. Tonda, na dam yanuka asing likne obat, kweten ning dekmunyopura, anggun asing likmunyeba, teleb upsilyopura, teleb kibuka elinamlum. Wini talak ara, anggunce malyeuk winimunye ning ara, bita kum dilalulume.