Nyabukopura, ayupu ton nyabuk. “Anda pia diba, weiknye ulyame. Tonda anda aning-aning deice tam umince, pia mikip weiknye ulyame. Se, anda dipkoprob mambul weiknye Ulyama anya arye, tukwak nang nirya arye, an si kel bikamikce, ‘Seʼ tenebuka winikinyake. An mikip deice arye, yuk mutuku nang nirya ap, yuk mikip ulul ning nirya ap ati, malye kibuka deice tam ulyame. Anda pia diksukumnye, umince weik ninye deiyoknye erebuka, ulyama anya arye, yuk Raja nang nirya ara, an amu tamuk unyake. Aning ara, talye ati kum nyapkine. Winimince, im tam ulul ning babye, tukwak mutuku noutam ulul ning nirya babye, an ninguk ulule. Anda Yahweh arye aning-aning nirya ap, ninye mutuku sirya im sirya nirya ap, talilyamce, weik deiyoknye ulyame. Sik nirya ara, an amu tam unyak bukni, anda pia deice tamuk umince, aning-aning nirya talilyame. Ati, na ni koproba Allah Yahweh, anda aning-aning nirya ap, yata nang do nirya ati, ancuk ninye deiyoknye kibuka delilyame. Ati na nio, anda mikip weik nirya ara, anuk taliplumce, aning-aning nirya kwepdeiplumce, talibuka ulyamnye biti, teleb nyapkine.
Wahyu 19:1 - Eipomek1 Ayupu nirya Kekepsopura, im deice tam noutamak arye, ninye yupa pia weika arye, yupu weik arye nyanmekba, ayupu tonap kekepse. “Haleluya, nun nirya arye, Allah el siuk pia erenamabe. Nun Ni kopropa Allah pia telebuk ulule anya arye, el dirina ara pia weik ulule. Ninye Lyena Deiyok ning ap, weik Mikip Deiyok Ulul ning nirya ap, el deiceuk ulule. Elda Weik Erenanye ulula ati ara, nun nirya arye Allah el siuk pia erenamabe. အခန်းကိုကြည့်ပါ။ |
Wahyu 19:1
23 ပူးပေါင်းရင်းမြစ်များ
‘Ninye malye ninguk talibuka unyak ninye nirya ara, tukwak mutuku arye kum daneipnamle’ tenen, moronune. Aning atonun, yu tenebuka malye kanye bonyak ninye nirya babye, ‘Allah arye aninye wenebuka, kum daneipnamle’ tenen, moronune. Na ni Allah Yahweh, anda Weik Erenanye ulyame. Ati na kanye talima nirya an deice deipnirye, “Anda pia teleb ulyame,” nyabuka, an siuk erekunune. Nun tukwak ninye nirya arye, Allah ati, “Anda pia telebuk ulyame,” nyabuka, ‘Kanye lon mot senmabirye, teleb kilinamabe’ tenen, moronune.
Nun ni Allah Yahweh ati, “Anda pia telebnye ulyame!” nyabuka, el si erenamabe. Diba, Yahweh pia telebuk winisulula ati, nun nirya arye, “Naio anda pia teleb ulyame,” nyabuka, elti, si erenamabe. Tonda, Allah arye nunti, “Weik tonun bico tenesununa ati, ‘Pia teleb kilinamsine,’ nyabuka, nyalin yupu deice arye nyapdeipsine,” nyapdeipsuke. Aning nirya ara, pia kum bataknamle.
Nun nirya ara, nun ni koproba Yahweh ati, “Anda pia telebuk ulyame!” nyabuka, elti, si erenamabe. Tonda, na kanye talima noutam nirya arye, Yahweh ati, “Anda pia telebuk ulyame!” nyabuka, el siuk erenamne! Tonda, Allah arye, ‘Aning wininamlume. Aning ara, pia kum wininamlume,’ nyapdeiamsuk yupu, moubuka talikirye, diksukumuk wininyak nang bulunyakak binuka, Allah ati, ‘Telebe,’ nyanamne. Aning atonun, sik Israel yala ninye nirya arye, ‘Allah el dam binuka unamabe’ tenen, bulunyakak ara, narye, Allah ati, “Anda pia telebuk ulyame,” nyabuka, el si erena ati nyanamne.
Nun nirya arye, Allah Yahweh ati, “Anda pia telebuk ulyame,” nyabuka, el si erenamabe. Sik im deice ululum ning ap, malaikat ap, sik nirya arye, Allah Yahweh el tibuk, “Se, Allah anda, pia telebuk ulyame,” nyanamlulume. Aning atonun, sik im alip tam erebuka ulamlum ning nirya arye, Allah Yahweh ati, “Elda pia teleb winilulnye,” nyabuka, el tibuk si erenamlume.
Nun Israel nang nirya ara, “Allah el si Yahweh ara, pia teleb ulule,” nyabuka, el siuk erenamabe. Nun ni Yahweh el kanye delin mot, winiryuk ninguk nyanamabe. Nun Israel yala nang nirya arye, ‘Allah el siuk erenamap’ tenen, bulubuka neika unamap talak ara, Allah ati, “Anda pia telebuk ulyame,” nyabuka, mot nyan deice arye nyanamabe. Ara, batakna kumce, ‘Allah arye nyasilye yupu nirya talibuka, diksukumuk wininyap nang arye, mot nirya ara, nyanamabe’ tenen, nyapne.
Nun tukwak unyap ninye nirya arye, nun ni koprop Allah el si Yahweh ati, “Anda pia telebuk ulyame,” nyabuka, el si atibuk erenamabe. Allah Yahweh el aik ara, im deice ulula anya arye, malye ning tonok ning babye, kum ulul ati, pia telebuk lekak ulule. Ati, el mapu nirya bulubikirye, elti, “Anda pia telebuk ulyame,” nyabuka, el si pia erenamabe. Im deice pia ulirye, im deice alip tam nirya, el mikip weik deice arye, talilula anya arye, el tibuk, “Telebe,” nyabuka, kibuka si erenamabe. Ara, el mapu nirya babye, mikip arye, “Telebe,” nyabuka, el siuk erenamabe.
Se, “Na ni Allah Yahweh, anti morokunune. Ara, anda adiparyuk bukmince, na dam minop yatumce, melibuka lyepnutume!” nyabuka moropkine. Na dam yaminyeura, na ikin unilye noutam arye, melibuka lyepropnilyame na nio. Ara, talye ati kum nyapne. Nati, ‘Anye nun song ati ara, elti, oplopnuyabe,’ teneninyak nang nirya ara, an Allah arye, sik katum deice bokuka opnulyame! Sik yu weik unyak nang ara, ance obuka sirya daknulyame! Winipmanto ara, sik katum deice bobuka opminyopura, sik si nirya kuruksaknamle!
Tonda, ‘Yata ning arye melipnutu do?’ tenen, ‘Yuk nang ati, ikin ning, sik nong deice deipnyopura, sikce namin kin yo bok weik arepnitinga deice arye, aning melipnamnile,’ tenena kume. Atonun, ‘E, yuk nang, sik bona, ‘Naʼ tenen delinyak sukum weknirye, aning nirya ubula dopropnyopura, aning nirya arye melipnamnile,’ tenena kume. Tonda, aning atonun, aminyan talak sik bona weik upnin baliba, bona talin nang umunyopura, ‘E, na yo bok ap, bona ap, weik aupmanilba, talinuna deice arye, bona talinanye akunum ununa ati, aning arye melibuka lyelonamnile,’ tenena pia kume.
Aning nirya akunum winipnyopura, im deice ubuk ning nirya ap, tukwak mutuku sirya, im sirya nirya aubuk ning nirya ap ara, pia weik tonun kanye deibikirye, pin-pin kanye bobuka, weik yupu arye, ‘Telebe,” nyanamake. Ara, ‘Sik Babel mutuku noutam unmak nang opnamapʼ tenen, yanganamak nang ara, sik dabu tam mutuku nang arye olyanamake. Narye dobuka arepninyeba, anang arye yanuka, sik Babel mutuku ninye nirya, obuka malye kibikirye, sice buklopnamake.
Wininyak bukni, na Yunus bira, mot weibuka sena deice arye, “Nai Allah ance melipnulum ning ati, telebe nyapkine,” nyabuka, mot sena deice arye, si erenamkine. Tonda, an si erena ati, kam ning obuka arenamkine. Narye anti, “Wininamkine,” nyapse ning nirya ara, dipkoprob wininamne. Ninye lyen ning nirya ara, Allah an si Yahweh deice aryuk lyesilyame. Yunus birye nyabuk. Ayupu nirya ara, Yunus mek pum ikan mun pum tam ulamukce, morobukba nyabuk.
‘Malye upnamak do?’ tenen, ‘Weik ikin winilden ning kum arepnamsilam’ tenen, moropkiyabe. Aning kum bukni, tonda, Pia Malye Uning Deiyoknye, ara Isa Mutuku Dongonye arye, ‘Malye ulisulul anya arye, malye winibibyak’ tenen, ‘Ance kalikuka disimince melinamsilam’ tenen, moropkiyabe. Ayupu nyabuka, Allah moronamlulume. Yesus arye el yupu kekenmek nang ati nyabuk. Nyabukce ayupu tonap nyabuk.
Anirya dinmasibuk, aminyan ara tonoknye ton, tekbarye malaikat arye, el terompet deice lelim nyabukura, im deice tam noutamak nirya, weik yupu arye nyanmekba, kekepse yupu ara, ani. Ayupu nyanmek. “Tukwak mutuku im sirya, mutuku sirya nirya talibuka ninye deiyoknye nang nirya ara, nun Ni kopropa Allah ap, elce dopkwetepsuk Ninye Lyena Deiyoknye Kristus ap, sik bitinye arye akunum malye kibuka, aning nirya talidurake. Ati wini talak arye dipdongobuka, aminyan doryanamle talak babye, aning-aning nirya taliprikirye, Weik Ninye Deiyok nang pia unamrake.”
Isa Mutuku Dongonye ap, el malaikat ap, tukwak mutuku dopkwetebikura, im deice tam tonoknye birye ayupu weik arye nyabukba, kekepse. “Wini talak ara akunuma. Diba tenenlamikba, nun weit yapu atonun unyak ninye ati, Isa Mutuku Dongonye arye, ‘Anggunda malye,’ nyabuka, malye yupu anggun nong deice delisilirye, lululisululnye bira, akunum malye kibake. Isa Mutuku Dongonye arye, diba tenen nang nirya ati, keting noutam babye, lukunyan babye nirya ara, asum-asum nirya, Allah kekelulak tiklirye, “Anggunda malye,” ululume, nyabuka lululisulule. Bukni, elda akunuma. Tukwak mutuku akunum dopkwetepmake. Ati akunuma. Nun Ni kopropa Allah arye, el mapu nirya ati lyepnule. Wini talak aryuk Allah el weik mikip deice arye, aning-aning nirya deice tam ulirye, talipliba, aning nirya el amutamuk unamle. Tonda, Allah arye, ‘Ninye nirya lyepnamle’ tenen, dopdeipsuknye Kristus ap, el Allah ap arye aning-aning nirya talibuka unamdake.”
Nyabukopura, ninye yupa pia weika arye, yupu weik arye nyanmekba, alelim ara liman ap, mek onmalirye, weik lelim nyalamle touk, lelim ap nyanmokba, kekepse. Sikce nyabik yupu ara, ani. “Nun ni Allah ati, Haleluya, nyababe. Nun Weik Deiyoknye, nun Ni Kopropa Allah arye aning-aning nirya deice tam ulirye, Weik Eitamnye ulule. Yuk mikip ning aulul bukni, elda pia mikip weiknye ulirye, aning nirya el amu tam ululbuk elcuk talilule.