Nyabukopura, Syeba mutuku deiyok kil arye Salomo biti, dekna weik ning boyanmok ning arebuk. Elce arebuk ning ara, dekna weik ning el si emas ara, el ikin ara empat ribu kilogram ap, tonda urasin pia teleb ning dekna weik keil el si ara batu permata ap, ton ning ara nintong pia teleb ning el si rempah-rempah weik ap arebuk. Anintong teleb ning rempah-rempah ap, tonda, ‘Din nintong nyapnamle’ tenen, tabakuka delilamak ning ap, boyayuk ning ara, pia kum nukmanto weike. Yuk talak nirya ara, yuk nang arye Salomo biti, aning weik tonun ton kum arelamik. Aning nirya ara, Syeba mutuku deiyok kil arye, Salomo biti arebuk.
Wahyu 18:13 - Eipomek13 Tonda, to len ning, el si kulit kayu manis ap, nintong teleb ning aning-aning nirya ap, sik si ara, mur ap, kemenyan ap, anggur mek ap, Ara yo duk teikuka dololamik minyak ap, roti dana deiyok ning terigu pia teleb ning ap, tonda ninye arye weilamak ning sapi basam ap, domba ap, kuda ap, tuku deice balamle ning yala nirya ap, ninye arye ‘Sik yo bok deice dekikirye, ikin pil arukikiba, talye pil donamak’ tenen, ninye nong tapu koubuka bobalamik ninye ap, aning-aning nirya, sik Babel mutuku unyak kili sal ila tonap kum dekenamak ati, abona dekelbalamik deiyok nang arye, ‘Se,’ tenen, engenamake. အခန်းကိုကြည့်ပါ။ |
Wahyu 18:13
25 ပူးပေါင်းရင်းမြစ်များ
Tonda, yuk nang arye arelamik ning ara, nukuka kum nyapmabe. Ara, sik bona dekna aik deiyok nang ap, sik Arab mutuku deiyok nang ap, sik pala tam talibuka Gubenur ulamik nang ap, anang-anang nirya boyangalamikce, Salomo biti arelamik ning ara, kum nukik bukni, adekna weik ning ara, pia weik arelamik.
‘Aning kel kiptibye’ tenen, ati yangalamik talak ara, elti, arin ning ati, yuk-yuk bobuka yangalamik ning ara, ani. Urasin teleb ning bukni, dekna weik ning el si ara emas ap, perak ap, tonda cang baju teleb ning ap, mal ap, yin ap, parang ap, tonda, yin talin nang arye, talinyak ning yuk yala nirya ap, tonda nintong teleb ning el si ara rempah-rempah ap, ‘Din ningto nyapnamle’ tenen, likuka delilamik ning aning-aning nirya ap, kuda basam ap, keledai basam ap, aketing tamun nirya boyangalamikce, Raja Salomo biti arelamik. Ati ara, Salomo bira pia weik bona utoto talinanye ulamuk.
Ruben yala nang ap, Gad yala nang ap, tonda Manasye yala nang noutam arye, bokdeibik nang ap arye, sik Hagri yala nang bukni, Yetur yala nang ap, Nafis yala nang ap, tonda Nodab yala nang ap arye, obikce malye kibik. Winibikopura, sik ayala-ayala nang arye, weilamik ning dalubuka doprobik. Ara, unta basam ara, lima puluh ribu (50.000) ap, domba basam dua ratus lima puluh ribu (250.000) ap, keledai basam dua ribu (2.000) ap, aning nirya alubuka doprobik. Ara, amutuku nang ati, mal olbinamika ani, akunum oplobikce, amutuku nang, sik weilamik ning alubuka doprobik. Tonda, amutuku ulamik nang ara, yupa weik, seratus ribu (100.000) nang ton, tomukabikce, tapu koubuka bobiyikce, wenen aik dongolamik. Aninguk kum bukni, tomobuka adelilyayik nang yupa weik, seratus ribu nang (100.000) tomobuka delilyayik. Ura, awinibik nang ara, Allah arye, ‘Winipnamake,’ tenyamuk touk, winibik.
Nyabukura, Syeba mutuku ninye deiyok kil arye, Raja Salomo biti, pia teleb ning boyanuka arebuk. Elce arebuk ning dekna weik ning, el si ara emas, el ikin ara yupa pia weik, empat ribu (4.000) kilogram ap, tonda urasin pia teleb dekna weik keil el si batu permata weik tonun ap, ton ning ara, nintong teleb ning el si rempah-rempah weik arye arebuk. Anintong teleb ning rempah-rempah ap, tonda, ‘Din ning to nyapnamleʼ tenen, taplakuka deililamaka ning ap boyayuk ning ara, pia kum nukmanto weik arebuk. Yuk talak nirya ara, yuk nang arye Salomo ati aweika arye arebuk atonun ton, pia kum arelamik. Aning nirya ara, Syeba mutuku ninye deiyok kil arye Salomo biti rempah-rempah weik arye, arebuk touk ton kum arelamik.
Narye ayupu tonap dukdongobuka mikip asa arye nyapse. “Minop talak ara, yuk pera mutuku ninye, Yahudi yala kum nang arye, nun mapu weik dekuka bobinamsik bukni, wini talak ara, nunce nun dam aupmasin touk, nun mapu tuba tamubuka dekuka boyangalamupu. Bukni, anggunda Yahudi yala ninye ululum bukni, anggun bidamang arye anggun mapu ati, dekelulume. Winimunya ara, yata deiyok ati do? Dan talak arye, tuba tamubuka nun mapu dekdopnamab do?” nyabuka wenepse. Nyabuka wenepsiba sik amutuku noutam talina deiyok nang ap, ‘Winipnuyabe,’ nyan deiyok nang ap arye, yupu tamubuka nyapmanto kum ubukce, sik alye ubuk ati, yupu tunim abuka bukik.
Yatanye do, ‘Yo bok dopropnamneʼ tenen do? Yuk deiyok ati do? Ninye ton el mikip arye tomobuka tapu kouplirye, bobuka yuk nang dam binuka deklyopura, el amalye upmalinye bira, el wenena ati oplopnamlume. Atonun, ‘Yo bok dopropnamneʼ tenen, ninye ton tomobuka tapu koubuka, bobinmalirye, dabinuka unmali bukni, sik deiyok nang arye, amalye upmalinye eibikirye, tomobicopura, el wenena ati obuka, bataknamnyake. Ara, el tomopmalinye bira, kam tuba unamle bukni, amalye upmalinye bira, el wenena ati ara, opnamnyake. Winiplinye bira, el adiparyuk wenebuka opmunyeba, dipnamlule.
Na dopnamnilamnye bira, an si bikinirye tenipkinyopura, winipmanto ara, nintong pia teleb minyak mek dobuka, an nong bol deice likminba, nintong pia teleb nyapliba kekenune. Aning atonun ton, amutuku nang nirya ara, anti akunum kel bikamkika ati, an si kekebikirye, ‘Anye bira, pia telebnye ulule,’ tenekinyake. Ati ara, amutuku noutam unyak wel kilapu nirya babye, anti kanye delikinyake.
Bukni wini talak ara, anggun nirya otam bisik dipdelulume! Pala pia weik mutuku, ninye pia kum unyak mutuku noutam, pata mutuku noutam arye yanamalnye bira, yatanye do? Elda, minopce bikbik abuka yanamal atia. Winipmanto ara, ninye arye weik uku ibikiba, tulum ara talye karin arye pia weik tonun welelamle touk ubuka, el babye, nun dam minop bikbik abuka yanganmale! Bukni, sik nintong pia teleb ning, dengna deiyok nang arye, nintong teleb ning yuk-yuk ning nirya dekmakiba, nintong pia teleb nyalamle touk, narye moun dinun nye babye, el nong bol deice nintong teleb nyalule. Nintong teleb nyalamle ning el si ara, mur ap, kemenyan ap, nong bol deice likin minyak mek ap, aning yuk-yuk ning nirya ara, nintong pia teleb nyalamle touk, na dopnamnilanye babye, el nong bol deice ara, nintong teleb nyalule.
Winipmanuk talak ara, ‘Na kanye delinunye dam unmalʼ tenen, ‘Na aik bublan kukeipnamanʼ tenen, bukmanu. Tonda, ‘Na nong nirya nintong teleb nyapnunilʼ tenen, nintong pia teleb nyalamle mek, el si ara mur, dobuka na nong bol deice likmanu. Diba, ‘Buplan kukeipnunʼ tenen, abublan kukuna ati, talin ning talipmanu talak ara, na taruk ara, mur mek deice moul upmanuk. Ara na taruk duk nirya ara, mur mek kwepmanua deice arye, moul weik tuba upmanukba, abublan kukuna ati talipmanu.
Na Allah Yahweh arye anggun Israel ninye, na mapu ati, nyapsine. Se, Israel ninyeo, anggunda na mapu koproba ululum bukni, anggunce tenemunya ara, ‘Allah arye nun akunum bataksuke,’ tenelulume. Ati winipmanto yupu deice nyapnune. Ara, el akanye birye, el domlye kil bataknulye ati, laka nyabuka sekelin surat, sekuka areplirye talye bataklamle touk, anggunti bataklamsise do? Winibuka batakamsitinye toura, domice kil bataknukca ati laka nyabuka sekelin surat sekuka delilamakto ning ara, dan sukum do? Aning kum ulule. Yuk domon yupu ton nyapnune. Ara, el li birye, ‘Yuk nang ning arepnamsinca,’ nyapdeipliba, aning deiyoknye birye, ‘Minopce arepnilyame,’ nyabuka moropliba, el yo bok kum anya arye, aning pununa ati, el mi uk dobuka arelbalamak touk, anggunti winilamsise do? Aning ara dipkoprob kum winilamsise. Bukni, anggun bidamang malye ulamluma deice, narye nyapsiba, yu nang arye anggunti obuka sirya daksikba, ikin ning dololamlume. Anggun minop talak malye ulamluma deice, yu nang arye anggun Israel ninye tapu koubuka bobinamsike. Ara, urdem ati kume. Anggun malye ulamluma deice arye dekna arelamsise.
Aning atouk, anggunce Yunani mutuku nang ap, Tubal mutuku nang ap, Mesek mutuku nang ap nirya ara, anggun Tirus mutuku nang dam yangalamikce, dekelana uk ulamlume. Ara, sik amutuku noutam ulamik nang arye, sik bona yuk-yuk ning nirya boyanarye, dekman ning nirya ap, sik talye pil don nang ap, dobuka yanarye, menenga arepne ning nirya arelamikba, anggun Tirus mutuku nang delilamlum bona yala-yala nirya deklamikba, anggun Tirus mutuku nang arye, deken ning yo bok weik dololamlume. Tonda, urasin pia teleb kat ning, el si perunggu boyanaba, anggunce dekuka dololamlume.
Allah Yahweh arye, ayupu ton nyapdeibukba, Amos birye kekebuk. Sik Israel yala ninye arye, tuba-tuba weik malye wininyaka ati, dipkoprob narye, sik amutuku ninye ati, wenebuka opnamne. Sik malye winilamik ning ara, namin kiyamsirye, adiparyuk wenebuka kum oplopse bukni, wini talak ara, sik malye winin ning weik wininyaka ati, aninye opnamne. Aninye opnamne ning ara, pia dipkoprob kum bataknamne. Deiyok ara, sik Israel ninye arye, pia diksukumuk unyak ninye ati, ‘E nun kayapu nang anye,’ tenena kumce, ‘Kume, anang ara, nun pil donamsiyaka ati, aninye tapu koubikirye, bobuka sik aik binuka deibipyopura, Pil donamsiyake. Sik dekna ati, sikce dekna weik ning, el si perak arepnamsulume,’ nyabuka bobanyake. Aning wininyaka atonun, aning-aning nirya kum upmale bukni, talye bona utotoa talina kum unyak ninye babye, atonun ubuka, ‘Nun pil talye donamsiyak’ tenen, tapu koubikirye, bobinuka yuk nang ati, ‘Dekenyak ning kum bukni, yan ongona ara, sandaluk arepsumunce, aninye dopropnamlume,’ nyabuka bona utotoa talina kum ninye dekenyake. Yuk nang arye, bona utoto talina kum ninye, akunum dekicopura, ikin pil dinyake.
Tonda aning atonun, anggun mek dina ati, anggur mek ara, mek makau arye kwepmunyeba, langdiplyopura, weik arye dilulume. Tonda, anggun nong bol deice, pia teleb una ati, nintong teleb mek likilalulume. Talye kanye bobuka, aning nirya winilulum bukni, Israel ninye nirya malye wininyak ning ati, mambul kanye bobuka ulamtum bukni, aning ara, pia kum tenelulume. Anggunce, ‘Se, nun apu koproba, Yusup birye deiamukba, dadeipdanin yangalamikce, nun dam unyak Israel ninye ara, yata ning deiyok ati, malye ulilanyak do?’ pia kum tenelulume.
Tonda, anggunce yuk nang ati, dekna weik ning el si ara, perak aremunya deice arye, talye bona utotoa talina kum ninye dekuka dololulume. Aning atouk, aning-aning nirya talibuka, kum unyak ninye ara, sikce dekna mitik ninguk, yan ongona ning, el si ara sandal dobuka, yuk nang ati arepmunyopura, sik bona utotoa talina kum ninye dekelulume. Aninguk kum bukni, ‘Yo bok weik dopropnamap’ tenen, dipkoprob gandum duk teleb ning kum bukni, gandum duk tikikirye wibuka, bataklamaka ning, bama laprobauk bulubukapmunce, ‘Gandum teleb ning atia,’ nyabuka, tilila nyalululumba, aning walwal nang arye, talye mangkau asa dekenyake,” Allah arye nyabuk.
Anggun babye, Israel ninye noutamak, tonoknye birye yuknye biti, ubula doproplirye, tapu koubuka taleamlirye, ‘Anye bira, talye ning atonun ulule,’ teneplyopura, aminyan talak taliplinye dobuka, yuk nang ati dekeipmali bukni, sikce anye dobuka bobikcopura, pia malye weike. Tonda, aning atonun, tonoknye birye, yuknye ubula dobuka, tapu koupdongoplirye, ‘Na mambul pil talye urdemuk pil danamnilame,’ nyaplyopura, aning babye pia malye. Yatanye do nirya, aning atonun winibicopura, yuk nang ubula doplinye bira, adiparyuk oplopnamlulume. Aning ara, batakna meme. Atonye opmunyopura, winipmunye deice, anggun Israel ninye noutamak, malye ning kum danaipmunce, sirya daknamlulume. Musa birye nyabuk.
Doupnamle talak ara, anggun ni koproba Allah arye, tamubuka mek kwen deice, kapal arye bobuka, Mesir mutuku bodeipnamsile. Mesir mutuku arye, bobuka binusuk talak ara, Allah arye, “Kume, anggunda, Mesir mutuku tamubuka kum yanamlume,” nyapdeiamsuke. Tonda nyabuk. “Mesir mutuku noutam tamubuka binamlum talak ara, anggunce, ‘Se, yata wiribuka kam uptibye do?’ tenen, anggun mal olan nang ati, “Nun sal babye, kilapu babye, yo bok deice arye deksumunye ura, anggun pil talyeuk dopnusiabe,” nyabuka, moropnamlum bukni, tonoknye babye, ton kum deknamsiake. ‘Anang ara, nun like, daupmalye,’ tenenamsiyake.
Aning atonun, sik domice kilapu batakuka, yuk kilapu talye yon nang ap, tonda, sal mamun arye, sal mamunuk yolan ninye ap, kilapu arye kilapu mamun yoldalamak kilapu ap, tonda, ‘Anang tapu koubibirye, yuk nang dam dekuka, yo bok weik doproptibye’ tenen, winin nang ap, tilila yupu talye nyaltakanyak nang ap, Allah arye amem yupu nyapdeiyamsuke. Tonda, yupu bokolin talak, “Dip nyapmabe,” nyabuka, talye nyaltakanyak bukni, tilila yupu tenepce arye nyanyak nang ap, yata malye winin ning do nirya, amalye un ninye arye, Allah el dipkoprop yupu nirya nyasilye touk yanibuka, pia malye un ning, yuk-yuk ning nirya wininyak nang ap ati, yupu wenena ati, Allah arye amem yupu nyapdeiyamsuke.
Atilila yupu peteren nang arye, ‘Aning-aning nirya weik doproptibye’ tenen, patalye ninye unyaka anya arye, sik badamnye kanye arye tenenyak ning, talye yupu uk, peteresinyak deice arye, ‘Sik ning weik dolonamap’ tenen, yum yupu nyabuka, anggun ning ubula dolonamsiyake. Minop talak ara, Allah arye, ‘Atilila peteren nang ara, wenebuka oplopnamne,’ tenyamukce, akunum kentenlamuk anya arye, aning ara lubakiplirye, kum bataknamle. Dipkoprop aminyan talak ara, aninye oplopnamlarya.
Mutuku-mutuku nirya, yata bon ning do, ayala-yala nirya dobuka dekelbalamaka deiyok nang nirya arye, Babel mutuku kum daliba, malye kanye bobuka engebikirye, ayupu ton nyanamake. “Se, anggun Babel mutuku ninye arye, ‘Pia teleb ning, aning-aning nirya dopropnamabe’ tenen, talima pum tam engelalum ning nirya ara, akunum kum upmasile. Tonda, anggun talyamlum bona uto-uto talin ning ap, urasin teleb-teleb kibuka ulamlum ning nirya ap ara, akunum kum upmasile. Tuba tonap, pia kum dopropnamlume. Anggunda bicoe,” nyabuka, sik bon-bona dekna deiyok nang arye nyanamake.
Sik bon-bona dekna deiyok nang arye, aning-aning nirya deklamikba, Babel mutuku ninye arye yo bok pia weik arilalamikba, yo bok weik dololamikce, bona uto-uto talin deiyok nang ulamik nang arye, pera mutuku arye tikmakirye, Allah arye Babel mutuku kili sal wenena ati opnamle ning eibikirye, ilil weik upliba, malye kanye bobuka engenamake.
ကြော်ငြာတွေ