Aning ara, malye weik winilamik bukni, ton tabakuka, malye weik winilamik ning ara, ani. Ara, isa si erena ati, memebuka deiamika dam nirya ara, sik Yehuda yala kilapu ap, ninye ap, weik tonun arye bobuka, anyaik dam deiamikba, talye yolalamike. Ara, ‘Isa siuk erenamapʼ tenen, amem aik yangalamik ninye arye, akilapu ap, aninye ap, neika malamikce, yolalamike. Ati ara, ninye babye, kilapu babye, asukum pil dolamik ninye ara, pia malye ninguk winilalamik. Adeice arye, Yehuda yala ninye nirya ara, pia malye tenena babye, iluk talibuka dolamik. Adolamik pil ara, Israel ninye, Kanaan mutuku min kum wekelyangalamik talak ara, min talak sik amutuku talibuka, ulamik ninye arye, apia malye ning weik talibuka winilamik. Ati, Israel ninye, amutuku binuyik talak, Allah arye Kanaan mutuku ulamik ninye yakuka donokuk. Deiyok ara, anang sikce, apil dolamik. Bukni, Rehabeam birye, Raja ulamuk talak ara, pia malye ninguk, Israel ninye bukni, Yehuda mutuku ulamik ninye babye, aninguk winipra balamike. Sikce Allah ati, diba kum tenelamik ninye, sik Kanaan tam ulamik ninye ara, aulamik touk, Rehabeam birye, amutuku taleamuk talak noutam arye, sik Israel ninye bukni, Yehuda tam ulamik ninye arye, aning atouk malye weik winilamik.
Wahyu 17:4 - Eipomek4 Akil ongopmok baju ara, pia teleb mirin ap, bi ap ubukba, abaju deice wipdeibik ning ara, emas ap, laut mekwen pum tam ulamle ning, dekna weik ning, el si ara mutiara ap, dekna weik mitik keil ap ubuk. Akil el taruk arye, karu mek makau emas arye memamek ning bopmok. Amakau pum bisik ara, akil arye pia malye-malye winilamuk ning ap, yuk ninye nirya talye-talye yolalamik ning ap ubuk. Teleb nang mutuku-mutuku nirya arye, ‘Akil winilul ning ara, pia malye ning ati, nun teleb unyap ninye arye aning ara, pia kum winiptibye,’ tenelamik bukni, akil arye aning nirya ati, kanye deiamukce, aninguk talibuka winilamuk. အခန်းကိုကြည့်ပါ။ |
Wahyu 17:4
22 ပူးပေါင်းရင်းမြစ်များ
Manasye bira, Allah Yahweh arye, ‘Aning ara, pia malye un ning,’ tenelamuk ning ara, Manasye birye, el malye un ninguk talibuka winilamuk. Amalye winilamuk ning ara, ani. Sik Israel ninye, amutuku binuyik talak ara, Kanaan mutuku ulamik ninye arye, Allah kum bikamika anya arye, sikce malye winin ning weik winilamikba, amutuku ulamik ninye nirya ara, Allah arye yakdonokamuk. Ayakdonokamuk mutuku ninye arye, malye winilamik touk, Manasye babye, malye ninguk taleamukce, malye-malye pia weik winilamuk.
An yupu ap, aminyan winipnamuk ning ap, laka nyana deiyok nang, sik nabi-nabi nang arye nunti, akunum laka nyabuka areamsik. Sik nabi nang arye, nunti nyalamsik yupu ara, ani. “Anggun binuka wekmunce, unamlum mutuku nirya ati ara, moubuka teninamlume. Amutuku noutam unyak nang nirya ara, teleb kum unyake. Allah arye, ‘Aning ara, na like,’ tenelul ninguk, talibuka pia malye weik wininyake. Malye uk wininyaka ati, amutuku nirya, otam arye dipdongobuka, atam nirya ara, malye un ning weik winilamika deice arye, pia malye ulule.
Bukni, anggun Israel yala nang ara, anggun kanye aryuk, ‘Winipnamabʼ tenen, malye tenelulum ninguk winilulume. Ara, anggunce isa el siuk erelulum deice arye, pia malye ning weik winilulum bukni, tonda, ‘Allah ati arepnuyabe,’ tenelulumce, na arena ati, yuk ning ton arenululume. Winiplulum ning ara, pia malye uka. Ara, yatanye do nirya, yim sapi basam obuka, Allah el si erena ati boyanuka arebikce talakuk, anang aryuk, sik mapu ton obikirye, isa si erena ati boyanuka arelbanyake. Tonda, domba basam mi winiryuk weinye nenmalye ning, na Allah ati binuka arebikce talakuk, sik anang aryuk, sik Kanaan tam nang ulamak touk, kam dobuka, el ngang talibuka bobikirye, isa si erena ati arelbanyake. Aning atonun ton, gandum duk boyanuka, na Allah si erena ati, yanuka arebikce talakuk, anang aryuk, sik Kanaan tam nang ulamak touk, basam ining boyanuka, isa si erena ati binuka arenyake. Tonda, gandum duk teikikirye, nintong teleb mek, el si kemenyan tabakikirye, na Allah ati, telebe nyana ati ara, na si erenyakce, aning dobuka, uku dongonmakce talakuk, anang aryuk, sik Kanaan tam nang ulamak touk, isa si erena ati, isa urasin atonun ning memebuka deiamik ning ati, ‘Nun ni telebe,’ nyabikirye, aisa si erenyake. Ati ara, sik amalye ning talibuka unyak nang nirya ara, na bataknikirye, sik kanye aryuk, ‘Winipnamabe,’ tenebikce ninguk ubuka, pia malye ning ukirye, aning nirya ati, kanye deibuka unyake. Aning nirya ara, pia malye weik wininyake.
Winipmanto yupu ton nyapnusine. Ara, minop talak ara, ninye arye dengna weik ning, el si emas doprobikirye, kat makau el si cangkir memebuka delinyak mek makau pum tam arye, anggur mek kwebuka arebikiba, yuk nang arye dinmaca ani, sik kanye wanganyake. Atonun, sik Babel mutuku nang arye, malye-malye weik winilamik. Ara, kat mek makau atonun, ara Babel mutuku nang ulamik. Kanye wangalamak anggur mek, ara Babel nang arye, malye-malye weik winilamik ning ati, nyapne. Sik malye-malye weik winilamika deice arye, yuk-yuk mutuku nang yala-yala nirya ara, aning eibuka bikamikce, malye winilamikba, pia malye winin ninguk talibuka winilamik. Mutuku sirya, im sirya nirya unyak nang arye, yu mek dibikiba, kanye wangalamaka atonun ulamik. Winipmanto ara, mutuku sirya, im sirya nirya ulamik nang ara, Babel mutuku mek makau pum tam arye, yu anggur mek kwebuka dilamik. Winilamika ati, sik anang nirya ara, motona nang malye-malye weik winilamak touk, sik babye winilamik. Bukni, awinilamik ning deiyok ara, sik Babel mutuku nang aryuk winilamike.
Malye winin ning lakak kipliba, bakanyake. Bukni, ninye ton aminyan el nong noutam ap, baju bol deice palipnamle ning ap ara, el pia moubuka kum tenelula deice arye, amuak weklirye, sakalule. Anye elti, ara winilul koproba melibuka, ‘Bico,’ kum teneptinge. Na Allah Yahweh ati ara, ‘Se, anye birye bico nyapnutua’ tenen, moropnutua babye, narye anye biti, kum meliptinye. Aning ara, el ap mal olan nang ara, akunum bisilula ati, narye anye biti, pia kum melipnamne.
Ati, anda Yeheskiel birye, sik Israel yala nang nirya ati, ayupu nyalbinulyame. Anggun ni koproba Allah Yahweh, aning-aning nirya talibuka, deice tam erebuka, Pia Mikip Weik Deiyoknye ululnye birye, anggun Israel nang ati, nyapsile. Ara, anggun yata ati, malye-malye winin ninguk ara, talibuka wininamlum do? Anggun apu yapu nang arye, malye ning talibuka, malye weik winilamik touk, anggun babye atonun, wininamlum do, kum do? Ara, na Allah arye, ‘Aning ara, pia mem ning, na pia likʼ tenenun ning ati, ‘Aning ara, winina meme,’ nyapse bukni, anggun apu yapu arye, aninguk talibuka, malye winilamik touk, anggun atalak ululum nang babye, isa ati si erenamlum do? Diksukum bisik batakuka, talye bisikuk balamlumce, isa mer atibuk erebuka balamlumce, aninguk tenepmunce, na si ati, malye weik kipdeipnamnulum do?
Winipminyopura, domba basam tup akunum lukuka yukak deipmince, yun mek makau ara, dobuka uku buk deice uk deipnulyame. Adeiplopmaminye buk, uku dinmalya ani, tin pia weik akunum uplyeura, yaruk-yaruk apnamlule. Ara, ‘Amek makau deice sisilya ulamle ning, akunum uku diplyeura, ayun mek makau tamubuka, urasin teleb upnamleʼ tenen, winipnamlame.
Ura, adomon yupu nong ara, nyapnusine. Anggunda, moubuka kekepnululume! Yerusalem mutuku ululum nango, anggunda pia malye un ning weik, malye winilamlum bukni, ‘Anang ara, tonap teleb kipdeipnamne,’ tenepsirye, pi dobuka piripdese bukni, anggunda mandipna kanye bobuka, umunya deice arye, anggun nong deice akunum malye kililamunyeba, narye anggunti kum teleb kipdeipsitinye. ‘Aning kum winipmanto,’ tenepse ati batakse. Bukni, anggun nong deice tuba malye dem usulule. Winisulula ati, sik malye ulamika ati, na weik yu arye, pia weik tonun wenepnamne. Ikin deice arye wenelamnya ani, na yu arye, ‘Winibuka anang wenepnamne,’ tenyamse ning, anggun deice deipnirye, ayu ning akunum kum kipyeura, sirya tam ara, narye tamubuka tonap, teleb kipdeipnamsine.
An ulamlum mutuku ara, Eden mutuku ulamlume. Ara, Allah elce, pia teleb palamle ning, yuk-yuk ning nirya kouamukak ulamlume. An baju deice ara, urasin pia teleb dekna weik keil arye, taplakuka wiamikba, aning ongolamlume. Ara, Yaspis keil ining bi ning ap, Krisolit keil ap, Yaspis keil poron ning ap, Pirus keil permata ap, Krisopras keil ap, Neferit keil ap, Lasurit keil ap, ining bi keil ap, Tonda akeil noutam aknapdongobik ning ara, pia teleb emasuk, uamuk. Tonda, urasin teleb ning aryuk, puturubukabikce, kintinibuka deibik ning ara, pia telebuk uamuk. Aning nirya ara, an kwepdeipkuk talak aryuk, aning kintinibuka deibuke.
Akunum boyasinyopura, anggun nong nirya ara, narye pia mek diksukum arye, anggun nirya mek likuka, teleb kipdeipnamsine. Winipsinyopura, anggun malye winimunce, Isa Mutuku Dongonye si erelulum ning nirya batakmumce, telebuk unamlume. Ara, narye mek diksukum busubuka, anggun nong deice purupdonoksinya deice arye, anggun talima pum tam malye winilulum ning ap, Isa Mutuku Dongonye si eremunye ning ap nirya ara, kum daneipnamsine.
El Raja bira, tamubuka el punun nang arye, si kum erelamik ninguk, aninguk si erenamle. Asi erenamle isa ara, ani. Ara, ninye arye cang weik keil arye, antanap dongobuka dolamak cang keil poka noutam, weik asik nirya ati, ‘Aisa elcuk, nunti kalekuka melipsiliba, yuk mutuku nang arye, yanuka kum opnamsiak’ tenen, si erenyak isa siuk, el Raja babye, aisa siuk erenamle. Elce aisa si erena ap, si erebuka kina ap ati, dengna weik ning, pia arenamle. Ara, emas ap, perak ap, yuk urasin teleb dengna weik keil ap, aning nirya boyalirye, aisa si erebuka kina ati arenamle. Ati, el punun nang, si kum erelamik isa ati, si erelirye, teleb ning arenamle.
Allah Yahweh arye nyabuk. Se, Minop talak ara, narye anggun Israel nang ati ‘Melibuka lyepnamne,’ tenepsirye, deiya koubuka melilamsise talak ara, anggunti kanye deiamse. Winipmanto ara, ninye arye, mek pia kum sukum, pia kata mutuku padan gurun noutam balamikca ani, anuotam arye, pia teleb anggur tapu duk moulamlya eibikirye, pia kanye delilamak touk, narye anggunti, kanye deipsise. Tonda, winipmanto ara, arah yo duk minop moulamleba, ninye arye eibikirye, aning dakuka dibikirye, to nyaliba, kanye pia delilamak touk, narye anggun apu yapu ati eipsirye, pia kanye deipse. Bukni, sik adiparyuk, Peor mutuku dup biyik talak ara, isa si Bahal, si erelamik. Winilamikce, isa el si Bahal ati, kanye deiamikce, ‘Elda, nun ni unamsila ati, el siuk erenamabe,’ nyabuka, el siuk erelamik. Bahal isa si erena ati, pia alye daktingce, malye kanye bobuka engepting bukni, aning kum winilamik. Anggun apu yapu nirya ara, isa si erelamika deice arye, sikce sik bidamnye ati, malye kipdeipdayike. Na Allah arye, isa Bahal ap, sik amalye un ning winilamik nang ap ati, ‘Pia na lik,’ tenenune. Ato ning ap, ato nang ap ara, na dam pia kum yatinge.
Sikda, amutuku ulamik Mesir mutuku nang arye, talye-talye ning ati, ‘Aning ara, nun niʼ tenen, si erelamik ning ara, yo ap, keil ap tonda perak ap, emas ap, deice arye puturubuka deiamikce, ‘Nun deiyoknye,’ nyabuka, si erelamikce, malye ulamik ning ara, akunum laka nyabikura, anggun ton eililamlumce, kekelamlume.
Minyuma malaikat lakuka banmokbuk, el aminyan tam tonok malaikat tonap aminyan lakuka yanganmokak, eipse. Bitinye yanmok malaikat ara, aminyan tam ton ayupu nyapra banmok. “Weik asik domikak, el si Babel nyalamik mutuku ara, akunum kum dale. Allah arye amutuku uamuk ning nirya dakuka atu atonun kiplopmale. Deiyok ara, Babel mutuku ulamik ninye arye, sik pia malye ning patalamukba, aninguk tenebuka pia malye winilamika deice arye, Allah bataklamikce, yuk talye ning talibuka malyeuk winilamik. Winilamek talak nirya ara, yuk mutuku ulamek ninye arye, sik malye winin ning eibuka kel bikamikce, sik babye pia malye winilamekce, Allah ati bataklamek. Aning ara, ninye kanye wangalamak mek weik arye dinyakba, sik kanye wangabikirye, pia malye winilamak touk winilamik. Winibuka pia malye weik winilamik ning ara, sik Babel mutuku ulamik ninye, sik deice ubuka anya arye, Allah arye amutuku uamuk ning nirya akunum dakloplirye, atu atonun kiplopmale,” nyabuk. Amalaikat arye nyapra banmokba, na Yohanes arye kekepse.
Sik dekelbalamik bona si ara nirya nukmanto kum bukni, bona aning-aning nirya ara ani. Ara emas ap, perak ap, dekna weik keil ap, laut mekwen noutam arye dolonyak ning el si mutiara ap, pia teleb namin baju mirin ning ap, ining bi ap, nintong teleb yo yala nirya ap, basam si ap, dekna weik yo ap, besi ning ap, urasin teleb keil ap, dopdobikirye puturubuka deibikirye, memenyak ning dekna weik ning aning-aning nirya dobuka dekelbalamik.
Engebikirye, ayupu ton nyanamake. “Se, Se, anggun Babel mutuku ulamlum ninye ara, mikip pia teleb ninye ulamlumce, dekna weik baju, pia namin baju ongobuka ulamlume. Sik mirin baju ap, bi baju ap, abaju deice ara emas ap, dekna weik keil mitik ning ap, laut mekwen noutamak arye dolamik ning el si mutiara ap dobuka, sik baju bol deice wibuka delilamikba, dirin weik ulamuk. Winyamukba anggunda, bona talina weik kili sal ulamluma anya arye, apia teleb baju ongolamlume.
Allah arye yupu bokeipsilirye, usilye ning nirya ara, pia diksukumuk ulule. El nyalul yupu nirya ara dipkoprop ulule. Talye Yolana Deiyok Kil, el malye ulamuka deice yuk mutuku ninye im sirya, mutuku sirya nirya eibuka kel kiyamikce, sik babye malye winin ninguk talibuka ulamik. Ati ara, Allah arye akil ati wenebuka oplopmale. Allah el pil dolamik ninye ati, yu nang arye oltakalamikba, sik ining saklamuk ning nirya ati ara, aninye olamika deiyok ati, akil deice deipmalce, sik ining kwang dakna ati, akil wenebuka oplopmale,” nyanmekak kekepse.
Apoka buplan nirya ara, laut mekwen pum tam arye dololamak ning, el si ara mutiara bukni, mitik ning ara kume. Pia weik ning ati ara, tonok buplan ara, tonok mutiara deibuka dobik. Anyasik noutamak uamuk bisik ara, dekna weik ning emas bukni, pia teleb ning kemel atonun, mek kukia dilamak emas arye deiyamikba, eipse.
Amalaikat ap, sik melibuka yin talin nang ap arye, kum obik ninye ara, sikce yuk ninye oltakalamik ning ap, kir dolamik ning ap, bai mal olamik ning ap, kilapu talye ubula yolalamik ning ap, yuk nang bon-bona ubula dolamik ning ap ati, “Se, nun malye unyabe,” nyabuka, kum batakik. Kekena kumce, malye kibuka pia malyeuk winibik. Aning nirya eipse touk, na Yohanes arye nyapsine.