Wahyu 15:4 - Eipomek4 Malye winin ning tonok babye kum umince, anda Pia Telebnye ulyame. Ati ara, ninye im sirya, mutuku sirya nirya arye an ap, an si ap ati, ‘Se, elda weik mambule’ tenen, ilil ubikirye, “Allah anda pia telebe,” nyabuka an siuk pia erenamake. Tonok yala ninye babye, anti, ‘Dauplye,’ tenen, kum batakitinge. Ninye yala-yala nirya adiparyuk an siuk pia erenamkiake. Minop talak arye dipdongobuka, wini talak nirya noutamak ara, ance pia diksukum ubuka, dolamsulum pil nirya akunum lakak kipsilama ati, im sirya, mutuku sirya nirya noutamak arye, ninye ayala-ayala nirya an dam yakirye, an si pia erenamake.” Sik amekwen dam tikmek nang arye nyanmekba, kekepse. အခန်းကိုကြည့်ပါ။ |
Wahyu 15:4
44 ပူးပေါင်းရင်းမြစ်များ
Allah arye, ‘Anggunda, ‘Naʼ tenen nang’ tenen, wipdeiamuk Israel yala nang ara, Mesir mutuku noutam, ikin weik ulamik bukni, elce, ‘Anang lobuka lyepropnamne’ tenen, sik melinanye ton dopdeibuk. Winipmanto ara, anang nirya dekukce, lyeprobuk. Tonda, Allah arye, el tenen nang ati, ‘Anggunda, pia kum batakanamsine. Pia ati teleb kilinamsina ati, anggunce, wininamlume,” nyabuka, nyalin yupu deice nyadeipyamsuk yupu nirya ara, pia min kum datue. Aning nirya ara, pia aupnamlarya! Allah ara, malye winin ning tonok babye, kum winilula ati, pia Teleb Lek Ninguk winilule. Ati ara, el ap, el si ap ati, ninye tukwak nang nirya arye, ‘Se’ tenen, ilil ubikirye, el siuk erenamake. Dipkoprop teleb ning ara, sik kanye talima noutam nirya ara, el deiceuk deiptinge.
Ati ara, Allah Yahweh elti, diba tenebibirye, elti, ilil usilye ninye nirya arye, el siuk erenamabe. Tonda, nun apu koproba Yakub birye deibukba, dadeipdanin yanganyap nang nirya ara, Allah el siuk, erebuka kinamabe. Aning atonun, nun Israel yala ninye nirya arye, nun ni koproba Allah ati, “Elda weik mambule,” nyabuka, el siuk erebuka si erenmabe.
Aminyan sirya talak ara, tukwak mutuku im sirya, mutuku sirya, unyak ninye, ance kwepdeiamlum ninye yala nirya ara, an si eren ati, an damuk yanganamake. Se, Allah anda aning-aning nirya talimince, deice tam erebuka, Pia Mikip Weik Deiyoknye ulyama ati, tukwak ninye nirya, an urasin din sukum akunum yaceura, sik nirya arye, kutam tuku deice deibuka kanupdongobuka, an si atibuk erenamake. Tonda, an ap, an mikip ap, an pia teleb si ulyamnye ap ati, “Anirya ara, pia telebe,” nyabuka, an siuk erenamake.
Allah arye, ninye tukwak nang ati, yupu lipsisikuka bokeipnamle talak ara, Sion mutuku noutam unyak nang kekebikirye, kanye deibuka, kil-kil asa arye unamake. Atonun, sik Yehuda yala nang babye, Allah arye, yupu lipsisikuka bokeipnamle talak ara, kanye deibuka unamake. Kanye deibuka unamaka deiyok ara, ani. Ara, an Allah Yahweh arye, nun Israel nang ona ati ara, yupu lipsisikuka bokeipnalam talak ara, Yehuda noutam unyak nang nirya kekebikirye, kanye deibuka unamake.
Nun Israel yala nang nirya arye, Allah Yahweh, el siuk erenyaba ati, elti, ara, “Naio anda pia telebuk ulyame,” nyabuka, el si tuba erenamabe. Tonda, winipmanto ara, dikdik sena ati, el yan erebuka delilula dam, anggun nirya arye, kutam tuku deice dipdongobuka, kisok kanubuka, el siuk erenamlume. Nun ni koproba Allah, elda pia yuke. Malye winin ning tonok babye, pia kum winilirye. Teleb, lek dem ulule.
Ati ara, nun Israel yala nang nirya arye, nun si erenyap Allah, el si Yahweh ati, “Anda pia teleb ulyame,” nyabuka, el si weik tonun erenamabe. Wininamap talak arye, Allah el si eren aik domik mutuku kon deice, amutuku dam yanganamabe. Amutuku deice yapyopura, el si erebibirye, kutam tuku deice dipdongobuka, kisok kanubuka, el pia diksukumuk teleb winilul ning tenebuka, el siuk erenamabe. Aning wininamap talak ara, talye ati kume. Deiyok ara, nun ni Allah Yahweh, elda pia teleb leknye ulula ati, el siuk erebibirye, el ulye mutuku kon dam yapyopura, kutam tuku dipdongobuka, kisok kanupdongobibirye, el siuk erenamabe.
Aning ati ara, anggun keting palanyangan tam ululum nang nirya babye, Allah Yahweh ati, si erelulumce, ‘Naio, anda pia telebe nyabuka, el siuk erenamlulume. Aning atonun, weik laut mekwen lilun tam ululum nang babye, Israel nang kalikuka melilul nye, anggun ni Allah el si Yahweh atibuk, ‘Anda pia telebe, pia mikip weik mambul pil dolyame,’ nyabuka, el siuk erenamlulume.
Winipmunya ati ara, mikip weik nang, yuk-yuk mutuku daunyak nang nirya ara, Allah anti si erepkikirye, “Se, elda mambul weiknye ulule,’ nyabuka, si erenamkiyake. Tonda yu weik ap, malye kina ap unyak nang ara, sik mal olan nang, talye kanye bobuka olbanyak bukni, an tonok ati ara, weik tonun ilil upmalibuk, unamake.
Lukunyan talak noutam nirya ara, na kanye dobuka, an deiceuk deipnirye, antibuk tuba tenekunune. Wininmanya ani, atalak-atalak nirya ara, na nong ap, na kanye talima ap nirya dobuka, an deiceuk deipkinirye, ‘Allah dan talak yanuka melilyanamnilʼ tenen, ekunune. Deiyok ara, an tamubuka yamince, tukwak mutuku, mutuku sirya, im sirya nirya, noutam arye, ance, “Aning ara, wininamlume, aning ara, pia kum wininamlume,” nyabuka nyapdeipsulum yupu kekebikirye, kel bikikcopura, anang yala-yala nirya ara, ‘E, diksukum winina ara, ani,’ tenebikirye, moubuka kel biknamake.
Dipkoprop, na Allah Yahweh arye akunum nyapsine. Pia teleb koprop diksukum yupu uk nyapmasina ati, kume kum danamle. Na nyapsinye yupu ara, dipkoprob unamle. Na aryuk nyasunun ati, na nyapsise yupu ara, tuba tonap tamubuka kum doropnamne. Ati, ninye mutuku-mutuku nirya arye, na dam yanuka, gutam tuku dipdongobikirye, natibuk si erenamniyake.”
Nara Allah, aning-aning nirya deice tam erebuka ununye birye, nyapsine. Tonda, aning-aning nirya deice tam ununa ati, na siuk weik tonun ereninyaknye birye, nyapsine. Nara min talak akunum kam ulamsirye, aminyan doyanamle talak babye, na pia Kam Una Deiyoknye unune. Na ap, na si ap, Pia Teleb, Lek Ululnye unune. Nara, pia weik erenak, im deice unune. Na ununak ara, dipkoprob malye ning tonok babye kum ulula ati, pia teleb kurunak unune. Bukni, nara yata nang do nirya, sik talima amu tam kibikirye, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, talima erena kumce, malye kanye bobuka, sik kanye talima namin unyak nang ap, neika unamne. Na ap, sik epdanuka neika unamap deiyok ara, narye sik malye kanye bobuka talima lamapdongobuka unyak nang ara, mikip arepnyeba, sik kanye deipnamake. Tonda, sikce, ‘Se, nun malye unyap ning ati, alye dakdanuka unyaba ati, aning nirya batakabe,’ tenebikirye, engenyak nang ati, sik talima kwa dipnyeba, sikce kanye deibuka teleb unamake. Sik ato unyak nang, sik dam ara, na aunamne, nyapsine.
Winibuka banmekce, tonye ap, ton yuknye ap, yupu nyalanmekba kekepse. Ara, sikce, sik bidamnye ati, lakuka balsusunmekce, nyanmek yupu ara, ani. “Allah Yahweh, aning-aning nirya taliplumce, im deice yin talin malaikat nirya, sik weik deiyoknye ulyame. Allah Yahweh, anda, malye ning tonok babye kum ukilya ati, anda Pia Telebnye, Pia Telebnye, Pia Telebnye ulyame. Anda dikdik senauk umince, aning-aning nirya talibuka deice tam, Weik Erenanye ulyame. Ati, an pia mambul ap, pia teleb ap, weik dirina ap, uminye ning ara, tukwak mutuku unyak ninye nirya arye elikinyake. Aning-aning nirya elinyaka deice arye, an pia mambul uminye ning nirya ara, laka ululba, eibuka kel bikinyake,” nyanmekba eipse.
Aning nirya eipmunce, ‘Se, aning ara pia teleb’ tenen, pia teleb kanye deibuka, winipnamlulume. Winibuka kanye weik deipmunce, ngang kwakdupnamlume. Ara, sik aninye nirya arye, mutuku-mutuku nirya pera mutuku unyak ninye talibuka unyak ning weik tonun bobuka anggun dam boyanganamake. Tonda weik laut mekwen otam mutuku unyak ninye arye talinyak ning weik tonun, weik mek liya yo libikirye, laut mekwen deice bikirye, sik Israel ninye dam anyuk yanuka deibikiba. Langdibuka weik upnamle. Adeice arye kanye weik deipnamlume.
Na nio, anda Allah Yahweh, tukwak mutuku noutam nirya ara, Raja nang kibuka ninye talinyakce daunyak bukni, ancuk anang talimince, sik deice tamuk ulyame. Ati, tukwak nang kan-kan, yata tonye ton, Allah anti ilil kum uptu do? Dipkoprop Allah, anda pia mambulnye ulyama ati, ninye nirya arye, an tonok, pia si erebuka kinamkiake. Tonda, ninye nirya aunyaka kan-kan arye, weik kel bikamik nang ton aunyake. Tonda, Raja kinyak nang arye, tukwak nang nirya talibuka wininyaka kan-kan arye, Allah an atonunye ton pia kum ulule. Aning ati ara, sik anang kan-kan noutam nirya ara, na ni Allah, an atonunye ton, tonok babye pia kum ulule. Dipkoprop weiknye bira, an tonok ulyame.
Allah arye nyabukba, nabi Yeremia birye, tamubuka nyabuk. Na ni Allah Yahweh, anda erebuka ulyamce, mikip kilinilyame. Na kanye imun unilye talak ara, na ni anda, na mikip kelinilyamnye ulyame. Tonda, imun kanye bobuka, unun talak do, ikin ning yanuka unilye talak do, na mal olan nang arye opmanto uninyak talak do nirya ara, ancuk melibuka kalikinilyame. An damuk yanuka dungnubuka uniba, yuk nang arye kum opnitinge. Telebuk wininune. Tukwak mutuku im sirya, mutuku sirya, unyak nang nirya ara, ‘Elcuk melibuka lyepdopnamsilʼ tenen, an damuk yanganamake. Mutuku sirya, im sirya nirya unyak nang, an dam yakirye, nyanamake. “Nun apu yapu arye talibuka, si erelamik ning ara, nong kum ning, talye ninguk talibuka si erelamik. Tilila yupu uk, diba tenebuka taleamikce, dipkoprob nong kum upnamle ning, ninye kum melipmanto ninguk talibuka winilamik,” nyanamake.
Anggun nirya moubuka teneipdelulume! Nara, Allah Yahweh ununa ati, yata deiyok ati, anggunce nati, ilil kum usulul do? Dipkoprop ning ara, anggunce na dam yamunce, nati ilil upsutuba, ‘Se, adiparyuk nun wenebuka opsilyakʼ tenen, anggun nong nirya memepdopnamtume! Tonda, moubuka teneplulume! Na mikip weik aryuk, weik laut mekwen delinak kwepdeipsirye, ‘Amekwen ara, talye balulʼ tenen, amekwen wililona ati, laut mekwen kup-kup outam ara, keil wininga el si pasir, akunum kintinip deipse. Akintinibuka deipsak ara, laut mekwen arye deiplirye, pia unamle. Ati ara, laut mekwen weik arye deiplirye, mekwen mikip mek ombak, kibuka welepnamle bukni, pasir kup-kup, kum bisipmanto ulule. Tonda, ‘Laut mekwen deiamlyak, binuka sukulbinamleʼ tenen, wilipdopse sukum ara, kum deibisipnamle. Asukumuk pia aunamle.
Winibuka daulamica ani, doyanamle talak ara, Israel ninye tuba tamubuka, sik ni koprop Allah Yahweh atibuk enamake. Winibuka elamikirye, Allah Yahweh el dam yanuka unamake. Tonda, sik deiyoknye bira, Daud birye deibukba, dadeipdanin yangalamik ani, Allah arye tonok deiyoknye, wibuka deipliba, ‘Anye, nun ninye deiyoknye, Raja unamsil’ tenen, el dam tamubuka yanganamake. Winibikcopura, sirya talak, sikce nati ilil upliba, ‘Se, nun ni Allah, elda weik mambulnye’ tenen, el amu tam unamake. Winibikirye, el siuk erebikcopura, Allah Yahweh arye, aning-aning nirya, weik arye yamubuka, sikti arenamle. Ara, sirya talak wininamak ning ati, laka nyapkine. Allah arye nabi Hosea biti, laka nyapdeibukba, sekuk.
Na ni Allah Yahweh, anda mikip weiknye minop talak arye, aning-aning min kum kwepdeialum talak arye, an akunum aulalume. Tonda, anda kam pia unalame. An siuk erekunune. Anda, Pia Malye Ning Winina Kumnye, Pia Teleb Leknye ulyame. Ati, narye moropkine. ‘Nun Yehuda tam unyap Israel nang ara, lyepsutumba, nun kum dipnamabe’ tenen, moropkine. Na nio, ancuk nunti, yupu bokeipsutumce, nunti wenepsutum bukni, dipkoprob sik Kasdim nang ara, ance, ‘Wininamake’ tenen, wipdeipluma anya arye, sikce nunti, wenepnamsiyake. Anda, weik mutuku yangan keil atonun ulyama anya arye, an amu tam lelipdongopsutumce, kaliksutum bukni, ance tenealum touk, Kasdim mutuku nang wipdeipmunba, sikce nunti, wenebuka olyanganamsiake.
Areplyeura, ‘Yerusalem mutuku unyak nang optinye,’ tenelamik nang ara, ninye pia weik dipnamake. Bukni, mutuku sirya im sirya nirya noutam tuba kam unamak nang ara, sik kanye yuk bopnamake. Sik amutuku-amutuku nang akunum bikikceura, atalak arye dipdongobuka, dounamle talak nirya ara, Yerusalem mutuku yanganamake. Ara talye ati kum bukni, ‘Se, nunce Allah Yahweh, mikip weik Raja ulula ati, im deice yin talin malaikat nirya ara, elcuk talilula ati, el siuk erenamabeʼ tenen, pataplyeura, Yerusalem mutuku yanganamake. Anang ati yanuka olyangalamik. Tonda, Israel yala nang arye, weik kwalya, el si ara ‘Mitik Bai Aik Kwalyaʼ, kwalibuka dinamak talak babye, sik yuk mutuku nang arye, ‘Nun ap neika akwalya kwalibuka dipnamabʼ tenen, Yerusalem mutuku yanganamake. Allah Yahweh, el siuk erenamake.
Atalak ara, yuk-yuk mutuku, im sirya, mutuku sirya unyak nang nirya arye, Allah Yahweh damuk, bulubuka yanganamake. Ara, ‘Nun ap neika unamabeʼ tenen, atia. Sik anang babye, nara Allah, na mapu koproba kinamake. Wininamak talak ara, na Allah ap, sik nirya ap, amutuku noutamuk neika unamabe. Allah arye nyabuk. Nyabukba, nabi Zakaria birye, nyabuk. “Anggun nirya kekeplulume! Allah arye, ‘Aning-aning winipname,’ nyapdeipmasil yupu, nong akunum uplyopura, anggun nirya arye nati, biknamnulume. Ara, ‘Yo, elda dipkoprob Allah aryuk dopdeibukba, nun dam yanuka, laka nyapsuk touk, akunum unmal atiaʼ tenen, diba tenenamnulume. Nabi Zakaria birye, sik Israel tam nang ati, nyabuk.
Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.
Tonda, Kristus tukwak mutuku yanuka ulamuk ning deiyok ara, ani. Ara, sik Yahudi yala kum ninye arye, “Se, Allah talye luparabuka wenepsuturye oplopsutu bukni, bico tenyamsukce, lyen ning akunum kintinipdeiamsuke,” nyabuka, ‘Yahudi yala kum ninye nirya arye, Allah el siuk erenamak’ tenen, Kristus yayuke. Kristus arye, Yahudi yala kum ninye ati tenebuka, pil dolamuk ning ara, minop talak Allah el yupu deice seklamik yupu atonun winilule. Ayupu ara ani. “Na ni Allah, Yahudi yala kum ninye kan-kan unamne talak noutamak nirya ara, narye Allah an si ati, pia erenamne. An si erena ati, mot nyanamne,” nyabuk. (2 Samuel 22:50)
Anirya dinmasibuk, aminyan ara tonoknye ton, tekbarye malaikat arye, el terompet deice lelim nyabukura, im deice tam noutamak nirya, weik yupu arye nyanmekba, kekepse yupu ara, ani. Ayupu nyanmek. “Tukwak mutuku im sirya, mutuku sirya nirya talibuka ninye deiyoknye nang nirya ara, nun Ni kopropa Allah ap, elce dopkwetepsuk Ninye Lyena Deiyoknye Kristus ap, sik bitinye arye akunum malye kibuka, aning nirya talidurake. Ati wini talak arye dipdongobuka, aminyan doryanamle talak babye, aning-aning nirya taliprikirye, Weik Ninye Deiyok nang pia unamrake.”
Amalaikat weik yupu deice arye ayupu nyanmokba kekepse. “Allah arye ninye mutuku-mutuku nirya ati, yupu lipsisikuka bokeipsilirye, wenepnamsil talak ara, akunum dam upmasila ati, anggun nirya arye Allah ati ilil asa unamlulume. Ilil upsiliba, Allah ati, ‘Se, anda pia teleb ulyame,’ nyabuka, elti, si erenamlulume. Yata ning do nirya, im noutamak ap, tukwak mutuku ap, laut mekwen ap, balamle mek nirya ap, aning-aning nirya kwepdeibuknye, Allah ati, anggun nirya arye el siuk erepnamlulume,” nyapra banmokce, amalaikat lakuka banmokba, na Yohanes arye eipse.
Amek nirya ining atonun ubukba, amek ap amekwen ap ulamik ning nirya dibikopura, amek aning-aning nirya talibuka ulamuk deiyok malaikat arye ayupu nyabuk. “Allah anda minop talak ulamluma ani, tuba kamuk ulyamnye bira, malye ning tonok babye akumuk ulula anya arye, anda Pia Telebnye ulyame. Ance tukwak mutuku ninye ati, kanye imun un ning arepmalamce, wenepmalam ara, bita merekuka wininmalame.”
Anye birye ayupu nyabukba, Allah el aik pum emas meja damnye birye ayupu kekenmok ati, tamubuka nyabuk. “Dipkoprop nyaplame. Nun ni Allah anda aning-aning nirya malye kibuka, aning nirya deice tam umince, weik mikipnye ulyame. Yuk mikip ulul ning nirya ara, mikip mitik tonun ulul bukni, anda nun Weik Ninye Deiyoknye ulyame. Weik mambul pil dolalum ning ara, ninye kum winipmanto ning, pia teleb pil dolamlum ning nirya diksukumuk ulule. Ance tukwak ninye ati yupu lepsisikuka bokeipmalamce, ance aninye nirya wenebuka onmalama ara, pia diksukumuk ulyama anya arye, ‘Aning nirya ara, pia telebe. Bita merekuka onmalame’ tenen, nyapkine,” nyabuk. Allah el aik pum emas meja dam ululnye, ayupu nyanmokak, kekepse.
Allah arye yupu bokeipsilirye, usilye ning nirya ara, pia diksukumuk ulule. El nyalul yupu nirya ara dipkoprop ulule. Talye Yolana Deiyok Kil, el malye ulamuka deice yuk mutuku ninye im sirya, mutuku sirya nirya eibuka kel kiyamikce, sik babye malye winin ninguk talibuka ulamik. Ati ara, Allah arye akil ati wenebuka oplopmale. Allah el pil dolamik ninye ati, yu nang arye oltakalamikba, sik ining saklamuk ning nirya ati ara, aninye olamika deiyok ati, akil deice deipmalce, sik ining kwang dakna ati, akil wenebuka oplopmale,” nyanmekak kekepse.
El dopnamal kil ato ninye ara, pia teleb namin baju, lek ning, dirin weik ulul ning ara, akunum arepmalaba, ongopmake.” Ayupu nirya nyabikba, Na Yohanes arye, kekepse. (Na Yohanes arye nyapsine. Pia teleb namin baju nyabuk ning ara, winipmanto ulul bukni, aning nong ara, ani. Ara, Allah arye wiamukba, elti, diba tenebuka, el yupu kekebuka dobolbalamik ninye arye, diksukumuk ulamik ning ati, tenenyabe.)
Ninye Mi Koprop Atonunye birye nyapnuke. “Yohanes, ance Piladelpia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara ani.” Malye winin ning tonok ning babye kum wininirye, pia diksukumnye unune. Tonda, na nyasinye ning nirya ara, pia dipkoprop yupu ati ara, ayupu batakna kumce, anyapmasin touk dipkoprop talibuka ununye birye, ayupu nyapsine. Na aryuk nyanamne yupu ara ani. Ara, “Akili sal ara, Allah el ulya im deice wekna telebe. Bukni, anang ara, im deice kum wektinge,” nyabuka, tukwak kili sal wibuka, yuk-yuk bokolina deiyoknye bira, na unune. Narye buplan pakeipnyopura, yuk nang arye abuplan ila tuba tonap kum tiriktinge. Aning atonun, narye buplan tirikdongopnyopura, yuk ninye arye kum kukeiptinge. Bublan kukulina ap, buplan tirikina ap, deiyoknye bira na uka.
Akam unyak ning dumbarye nirya, sik yuk-yuk bukni, sik pol ara naku barye ubuk. Sik nong bol deice ara, asing pia weik ubuk. Sik pol amu tam babye asing ubuk. Sik nong ap, urasin ap, anyapmasin touk ubukba eipse. Lukunyan babye, keting noutam babye, batakna pia kumce, tuba-tuba ayupu pia nyanyake. “Minop talak ulamuka ani, wini talak tuba ulirye, aminyan sirya talak yanamlanye bira, aning-aning nirya malye kibuka, aning nirya deice tam ulirye, weik mikipnye ulule. Elda nun Weik Deiyoknye ulule. Elda malye winin ning tonok babye kum ulula ati, pia telebuk pia telebnye ulule, pia telebuk pia telebnye ulule, pia telebuk, pia telebnye ulule,” nyabuka mot senyake.
Se, nun Deiyoknye, aning-aning nirya talibuka deice tam umince, ance tenelyam touk winilyame. Malye ning tonok babye, kumuk ulule. Anda, pia dib yupu uk nyamince, diksukumuk ulyame. Minop talak tukwak mutuku malye winilamik ninye arye oltakalamsik ati ara, dan talak arye anang ati kwang daknamsilam do? Sikce opsika ati, dan talak arye yupu lipsisikuka bokeipmince, amalye nang ati wenebuka opnalam do?” nyabuka, malye nyanmekba, kekepse.
Tonda, Allah Yahweh el lek koprop, pia teleb ulye touk, yuk nang ton atonun, pia kum unyake! Aning ara, Allah elcuk, nati melin ning ara, pia tuba arenulule. Ninye arye, ‘Nun mal olan nang arye opsikcakʼ tenen, weik mutuku bulamle keil dam, keil deia pum, binuka duknunyak touk, Allah elcuk erebuka deice tam ulirye, el mikip deice arye kalikisiliba, el amu tamuk unyabe.
ကြော်ငြာတွေ