Sik nirya daulamika ani, aminyan talak Abram bira, keting tamun weik, 99 tahun nukuka wisi akunum dayuk talak ara, Allah el si Yahweh arye, el dam yanuka tikukce, elti, ayupu nyabuk. “Nara, aning-aning nirya deice tam unirye, Pia Weik Mikipnye unune. Anda, batakna pia kum dipkoprop, na yupu moubuka talipmince, dobolyangalamnimince, malye winina pia kum, teleb-telebuk unamlyame.
Wahyu 15:3 - Eipomek3 Asukum tikmek talak ara, Allah el amu tam bukuka pil dolamuknye Musa birye sekuka nyalamuk motuk senmek. Amot ara, Musa birye, Domba Mi Atonunye biti tenelamukce, amot sekuka deibukce nyalamuk. Aning atonun sik alaut mekwen damak atikmek ninye arye, Musa sekamuk mot senmekba, kekepse. Amot deice nyanmek yupu ara, ani. Nun ni Allah, anda aning-aning nirya malye kibuka, aning nirya deice tam umince, weik mikipnye, ulyame. Yuk mikip ulul ning nirya ara, mikip mitikuk ulul bukni, anda nun Weik Deiyoknye ulyame. Weik mambul pil dolyam ning ara, ninye winipmanto kum ning, sirya dakna pil dolamluma nirya ara, ‘Aning ara diksukum ulule,’ tenenyabe. Ance uminye ning ap, dib nyaminye yupu ap nirya ara, ‘Pia telebuk ulule,’ tenenyabe. Ance diksukum ubuka winiminye ning ap, dipkoprop nyalyam yupu ap nirya ara, pia telebuk ulule. Minop talak babye, anoutamak talak babye, aminyan yanamle talak babye nirya ara, aulul ning nirya ap, ninye ayala-ayala nirya ap weik deiyok talilulnye bira, an tonok uminya ati ara, anda weik Ninye Deiyoknye, Raja ulyame. အခန်းကိုကြည့်ပါ။ |
Wahyu 15:3
49 ပူးပေါင်းရင်းမြစ်များ
Ura, Harun ap, elce deibukba, dadeipdanin yangalamik nang ap, sik pil ara ani. Ara, Allah si eren ati, domik aik pum ara, siltong teleb ning bobuka uku seknarye, aning uku dongolamikba, uku dilamuk. Ayala nang uk bukni, ton nang bokuka, wipdeiamikba, Allah el arena ati, kam ning opnapnarye, aning deice delilyanganak, el si mesba kintinibuka deilin pil ap, tonda Allah arena ati kam ning bobuka yakceba, mesba deice dilamuk uku dongona pil ap, ‘Ayala nang arye, apiluk talibuka donamakʼ tenen, wipdeibik. Allah el si eren aik pum tam bukni, malye ning tonok ning babye, pia kum uamukak, pia teleb lek aik noutam ara, apil-apil nirya talibuka dolamik. Apil dolamik ning deiyok ara ani. Ara, ‘Nun Israel nang malye unyap ning ati, oplosuturye, sirya daksutu bukni, amalye ning nirya ara, kilipsilirye, kum kipdeipnamsilʼ tenen, akam ning obuka arelyangalamikce, mesba deice uku dongolamik. Harun ap, elce deiamuk mapu ap, sikce aning talibuka pil olamik. Awinilamik ning nirya ara, Allah el pil donanye Musa birye, “Aning ara wininamlume, aning ara pia kum wininamlume,’ nyapdeiamuk ning atibuk tenebuka, anyasik pil talibuka ulamik.
Lewi yala nang arye, nimalyap dolamik ati, Raja Yoas birye, imam nang, sik deiyoknye Yoyada biti, “Yalyame,” nyabukba, yayukura, asipdeyuk. “Allah Yahweh el pil donanye Musa birye, Allah si eren aik dona ap, lipsisikuka memena ap ati, amutuku unyak Israel nang nirya ati, ‘Pajak yo bok bulubuka deiplulume,’ nyapdeiamuk ning ara, amutuku nang arye tuba kum delinyak do? Yata deiyok ati, sik Lewi nang arye, ayo bok bobuka, na dam kum boyanganyak do? Wini talak ara, ance Lewi yala nang nyapminyeba, sikce Yehuda tam unyak nang ap, Yerusalem mutuku weik aik noutam unyak nang ap, sik dam bicak arye, apajak yo bok bobuka boyanamake. Ayo bok ara, talye ati kum bukni, Allah arye, ‘Aning wininamlume, aning ara kum wininamlume,’ nyapdeiamuk ning, weik pala keil deice sekuka arebukba, el si eren ati, tenda bol aik pum tam dongobuka deiamik ning lipsisikuka dona ati, arenamsiake.” Raja Yoas birye nyabuk.
Ara, talye ati kume. Deiyok ara, Allah Yahweh ara, telebuk ulirye, nun ninye ati, bico tenepsilirye, pia tuba melisilya ara, pia kum bataknamsile. Allah arye, “Wininamsine,” nyabuka, nyalina yupu deice nyasilye touk, pia dipkoprob winilule. Minop talak dorapce deibikba, dadeipdanin yanganyap ninye nirya ati, tuba-tuba tenesilirye, melisulule.
Allah, el taruk arye, pil dolul ning nirya ara, pia dipkoprob piluk dolule. Ara, elce, “Aning ara, wininamlume. Aning ara, pia kum wininamlume,” nyapdeiamsuk yupu nyamuk touk, diksukumuk pil dolule. Tonda, elce nun tukwak nang nirya ati, ‘Anye bira, na ka bukni, anye bira kume,’ tenena deice arye, kum wilosule. Aning kum bukni, pia diksukum kibuka, pil dosulule. Allah arye, “Aning ara, wininamlume. Aning ara, pia kum wininamlume,” nyalisulul yupu nirya ara, talye yupu pia kum nyalule. Ayupu nirya, nong upnamle. Allah arye nyalul yupu nirya ara, pia dipkoprob yupu nyasulule ati, aning nirya ati, ‘Diba,’ teneptibye.
Ati ara, narye Allah anti, weik kanye deibuka kibuka, si erenamne. Ara, talye ati kume, na ni Allah ance, na nong deice upnuk ning nirya ara, ‘Winipnamle’ tenen, pia teleb ubuka deiamnuluma atia. Tonda, na ni Allah an pil dolyam ning nirya ara, ninye arye kum winipmanto pil dolyama ati, narye an si atibuk, mambule tenebuka, narye kibuka si erenamkine. Tonda, ance nati, pil dopnulum deice arye, na moubuka kel kipnirye, namin asa arye, an amu tamuk unamne.
Allah Yahweh, ance tenebuka, winiminye ning nirya ara, pia diksukumuk winilyame. Malye winin ning tonok babye, pia kum winilyame. Ninye nirya sik wininyak atonun, moubuka tenemince, diksukum yupu uk, nyabuka lipsisikuka bokolisilyame. Tonda, tukwak ninye nirya ap, kam ulul ning nirya ap, Allah ance kwepdeialum ning nirya ati, Allah ance pil dosilyame. Winisiminye ning nirya ara, ance pia bico tenesiminya deice arye, teleb ubuka pil domince, melisilyame.
Diba, anang sik apu yapu tuba kam ulamik talak nirya ara, Allah arye, pia mikip weik ninye dopmankum pil dolamukba, atalak kam ulamik nang, sik asing arye elilamik. Ara, Mesir mutuku noutam bukni, amutuku si ara, Zoan mutuku dam arye, mambul weik ninye dopmankum pil domuk ning babye, kum biklamikce, luba kiamik.
Tonda, Allah ara, Pia Mikip Weik Deiyoknye, Raja ulule. Tonda, el Allah arye, “Aning ara, wininamlume. Aning ara, pia kum wininamlume,” nyapdeiamsuk yupu nyasilye touk, ninye tukwak nang ati, yupu lipsisikuka bokeipsilirye, dengna aresulule. Elce nyapdeiamsuk yupu ati, kanye delilule. Allah elcuk, ninye yupu lipsisikuka bokolina ati, “Talye yupu ap, nong kum talye nyan yupu ap, minin yupu ap, nyana kumce, diksukumuk ubuka, yuk nang ati, ninye yupu lipsisikuka bokolinamlume,” nyapdeipsuke. Allah arye, “Aning ara wininamlume. Aning ara, pia kum wininamlume,” nyapdeiamsuk yupu nyasilye touk ubuka, nun Israel nang ati, diksukum kibuka, melibuka teleb kilisulule.
Anggun talye ning si erelulum ninye ara, yupu talipmunce, dotalak wininamle ning laka nyapnamnulume. Tonda anggunce anggun bidamang ati asipdanamlume. Ara, ‘Dotalak winipnamle ning ati, min yuma talak yatanye birye nyapdeiamsuk do? Minop talak arye yatanye birye nyapdeiamsuk do?’ nyabuka asipdanamlume. Ayupu ara, na Allah Yahweh arye, nyapdeiamsise. Diksukum koprop telebuk ulirye, ninye lyelula deiyoknye bira, yuknye ton kum ulule, na Allah tonok unune.”
Nun Israel yala ninye nirya ara, ance, ‘Aning wininamlulume. Aning ara, pia kum wininamlulume,’ nyapdeiamsulum ning ara, moubuka kekebibirye, moubuka kum talinyabe. ‘Allah nyapdeipsuk yupu, nun like’ tenen, anti balye tam kibuka, talye batakanyabe. Adeice arye, nun ni Allah, an dam malye winilikinyabe. Ara, an amu tam pil donanye Musa, el dam nyapdeiamlumba, sekamuk yupu buku noutamak, lak nyalamlum yupu ara, ‘Allah na yupu yanimunyopura, narye kanye imun weik ning, anggun nong deice delinamsine. Tonda, weik arye wenepsinirye, supdongopnamsine,’ nyapdeiamsulum ning ara, wini talak nun deice akunum yangalule. Ara, talye ati kume. Nunce pia malye winilamupu buk, ance nunti, ‘Malye uk wininamak’ tenen, supdongopsulume. Asupdeipsuluma deiyok ara, nun malye winilamupa atia.
Yatanye do nirya, sik weik kel bikinyak nang ara, aning nirya, weik kel bikna arye, nong noutam ning babye, tenebuka kel kinyak nang ap, anyapnusin yupu akunum moubuka tenenyake. Ara, na Allah Yahweh arye wininun ning nirya ara, pia diksukumuk unune. Ati, yata ninye do nirya, ‘Nunce teleb bisikuk binamabe’ tenen, pataliba, na Allah arye, “Aning wininamlulume, aning kum wininamlulume,” nyalisunun yupu ara, moubuka talinyakce, dobolbanyake. Bukni, sik yuk nang ara, mandipna kanye bobuka unyakce, na nyasinye yupu amul deice aryuk kekenyak bukni, moubuka kum talinyake. Aninye ara, pol-pol asa bakibuk, yan dum dukliba, sakuka tukwak punyak touk, ubuka sakanyake. Na Allah arye, dipkoprob nyapsine.
Allah an mapu koprop ara, Abraham arye deiamukba, dadeipdanin balamik nang, nun Israel yala ninye ati, tenepsimince, bico upkiliba, tamubuka lyepnamsilyame. Tonda, nun apu koproba, Yakub birye deiamukba, dadeipdanin balamika ani, deiamsik Israel nang ati, tenepsimince, bico upkiliba tamubuka lyepdopnamsilyame. Ara, minop talak ancuk, nun apu yapu nang ati, nyalin yupu deice arye, “Wininamsine,” nyapdeiamsulum touk, wininamsilyame. Pia kum bataknamsilyame. Ance nun apu yapu nang ati, “Wininamsine,” nyapdeiamsulum ning nirya ara, kum bataknamsilame. Aning nirya ara, dipkoprob pil donamsilyame. Aminyan talak babye, nun dam teleb winilinamsilyame. Ayupu nyabuka, nabi Mika birye Allah ati, nyabuka morobuk.
Yerusalem mutuku ninye deiyok nang arye, tuba malye wininyak bukni, Allah Yahweh, elda aweik asik dobuka, unyak mutuku noutam tuba aulule. Allah elcuk tuba-tuba teleb kibuka, pia diksukumuk ulule. Elce, malye winililan ning, pia tonok babye, kum winilule. Dipkoprob asum-asum nirya ara, beren tam talak babye, sintam babye, Allah arye diksukum winin ninguk, pil dolul bukni, amutuku ati, ninye deiyok kibuka talinyak nang ara, diksukum winin ning ara, pia kum bikinyak nang anya arye, sikda, ‘Se, malye winimabeʼ tenen, alye una kumce, tuba malye-malyeuk wininyake.
Se, Sion mutuku noutam ululum ninye, anggun weik tonun kanye deibuka, kil-kil asa upmunce, unamlulume. Tonda, anggun Yerusalem mutuku ululum ninye nirya ara, weik tonun kanye deibuka, weik yupu deice arye, ‘Telebe,’ nyanamlulume. Anggun elilulume. Anggun ninye deiyoknye, aning nirya bisina ap, tonda pia diksukum una ap, deiyoknye yanmala ati, dilulume. El ayanamlanye bira, ninye unyak touk dipdebuka, diksukum kibuka, yupu lipsisikuka, bokolina deiyoknye ulule. Tonda, ninye lyena deiyok ning boyanmale. Bukni, anye bira, el kanye talima nimalyap asa arye, ulirye, amu tam ulule. Anye bira, winiryuk keledai basam balye deice bukuka yanganmale.
Ayupu nyapmasina deiyok ara, ani. Ara, Allah arye, ‘Wininamlume, aning ara kum wininamlume,’ nyapdeiamukba, Musa kekebukce sekeiyamsuk mem yupu nirya ara, Musa deice arye areamsuk. Bukni, dipkoprop winina deiyok ning ap, Allah arye el kanye aryuk nunti bico tenesilirye, melibuka lyesulul ning deiyok ning ap, tukwak ninye ati melilana deiyok ning ap, ninye lyena deiyok ning nirya ap ara, Yesus Kristus deice arye arisulule.
Aning ati ara, nun ni Allah, elda Weik Ninye Deiyoknye, Sisinanye minop dorapce dipdongobuka noutam talak ap, wini talak ap, aminyan do unamle talak ap nirya, pia unamle. Elda, pia kam ulul anya arye, kum diptue. Ninye asing arye pia kum eiptinge. Dipkoprop Allah ara, el tonoka, yuk ton kum ulule. Ati ara, ninye nirya arye, adiparyuk atalak babye, aminyan talak nirya babye, ‘El ti si erebuka, el si weik arye erepnamak’ tenen, Allah moronune. ‘Aning ara, dipkoprop unamle’ tenen, pia patanulul anya arye, Amin nyapne. Akunuma.
Tonda, Allah Yahweh, el pil dolamuknye, Musa birye anggun nirya ati, mambul weik yupu deice arye, “Aning ara, pia luba kum kinalulume. Aning ara wininamlume. Aning ara, pia kum wininamlume,” nyabuka, sekeiamsuk yupu dem, aning nirya moubuka talipmunce, kalikuka unamlume. Allah Yahweh arye, nyabuka sekeiamsuk yupu ara, ani. “Anggun ni koproba Allah, na Yahweh atibuk tuba tenemunce, anggun kanye ap, talima ap nirya ara, dobuka, na Allah deice uk deipnamnulume. Tonda narye, ‘Wininamlume, aning ton, pia kum wininamlume,’ nyapdeiamsise yupu, moubuka talipmunce, unamlume. Na Allah arye, nyapdeiamsise yupu, dem moubuka talipmunce, dukdongobuka unamlume. Tonda, anggun diksukumuk teleb umunce, narye nyapdeiamse ninguk, moubuka talipmunce, tonda natibuk talipmunce, anggun kanye ap, anggun kanye tenen ning ap arye, pia teleb ubuka unamlume. Narye tenenun touk, aninguk moubuka wininamlume.” Allah Yahweh arye, nyapsuke.
Aning-aning deice tam unirye, weik mikipnye unune. Nara, pia weik Ninye Deiyoknye Allah arye nyapsine. Aning-aning min kum uamuk talak ara, na akunum ulamse ati, na si ton, Alpa nyaninyake. Tonda, aning-aning nirya akunum kum uplyopura, nara pia kam unamne ati, na si ton Omega nyaninyake. Nara, minop talak ulamsa ani, anoutam talak unirye, aminyan doyanamle sirya talak ara, yanamne. Na Allah arye nyapsine.
“Nun Ni kopropa Allah, anda aning-aning nirya, malye kibuka, aning nirya deice tam umince, weik mikipnye ulyame. Anda nun Weik Deiyoknye ulyame. Minop talak ulaluma ani, anirye dipdongobuka tuba kamuk ulyame. An weik mikip deice arye, aning-aning nirya akunum talibuka ulyama ati, nun nirya arye anti, ‘Telebe,’ nyapkiyabe.
Anirya kekepmaseba, sik 144.000 ninye, Domba Mi Atonye birye akunum lyebuk ninye arye winiryuk mot senmek. Winiryuk mot senmekce unmekak ara, Allah el weik bun ning deice bukmokak damak nyanmek. Tonda, sik dumbarye teleb kam unyak ning ap, sik 24 wisi deiyok nang ap asukumuk, Allah el urasin tam tikmeka damak mot senmekba, kekepse. Sik yupa weik 144.000 ninye nirya arye, winiryuk mot senmek bukni, yuk nang nirya arye sik senmek mot, winiryuk ning ara, kel kum bikmanto unmek. Bukni, Domba Mi Atonye birye, sik yupa weik 144.000 ninye, tukwak mutuku noutamak arye akunum lyelamuk ninye, sikcuk amot bikamikce nyanmek.
Minyuma malaikat lakuka banmokbuk, el aminyan tam tonok malaikat tonap aminyan lakuka yanganmokak, eipse. Bitinye yanmok malaikat ara, aminyan tam ton ayupu nyapra banmok. “Weik asik domikak, el si Babel nyalamik mutuku ara, akunum kum dale. Allah arye amutuku uamuk ning nirya dakuka atu atonun kiplopmale. Deiyok ara, Babel mutuku ulamik ninye arye, sik pia malye ning patalamukba, aninguk tenebuka pia malye winilamika deice arye, Allah bataklamikce, yuk talye ning talibuka malyeuk winilamik. Winilamek talak nirya ara, yuk mutuku ulamek ninye arye, sik malye winin ning eibuka kel bikamikce, sik babye pia malye winilamekce, Allah ati bataklamek. Aning ara, ninye kanye wangalamak mek weik arye dinyakba, sik kanye wangabikirye, pia malye winilamak touk winilamik. Winibuka pia malye weik winilamik ning ara, sik Babel mutuku ulamik ninye, sik deice ubuka anya arye, Allah arye amutuku uamuk ning nirya akunum dakloplirye, atu atonun kiplopmale,” nyabuk. Amalaikat arye nyapra banmokba, na Yohanes arye kekepse.
“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.
Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.
Allah arye yupu bokeipsilirye, usilye ning nirya ara, pia diksukumuk ulule. El nyalul yupu nirya ara dipkoprop ulule. Talye Yolana Deiyok Kil, el malye ulamuka deice yuk mutuku ninye im sirya, mutuku sirya nirya eibuka kel kiyamikce, sik babye malye winin ninguk talibuka ulamik. Ati ara, Allah arye akil ati wenebuka oplopmale. Allah el pil dolamik ninye ati, yu nang arye oltakalamikba, sik ining saklamuk ning nirya ati ara, aninye olamika deiyok ati, akil deice deipmalce, sik ining kwang dakna ati, akil wenebuka oplopmale,” nyanmekak kekepse.
Akam unyak ning dumbarye nirya, sik yuk-yuk bukni, sik pol ara naku barye ubuk. Sik nong bol deice ara, asing pia weik ubuk. Sik pol amu tam babye asing ubuk. Sik nong ap, urasin ap, anyapmasin touk ubukba eipse. Lukunyan babye, keting noutam babye, batakna pia kumce, tuba-tuba ayupu pia nyanyake. “Minop talak ulamuka ani, wini talak tuba ulirye, aminyan sirya talak yanamlanye bira, aning-aning nirya malye kibuka, aning nirya deice tam ulirye, weik mikipnye ulule. Elda nun Weik Deiyoknye ulule. Elda malye winin ning tonok babye kum ulula ati, pia telebuk pia telebnye ulule, pia telebuk pia telebnye ulule, pia telebuk, pia telebnye ulule,” nyabuka mot senyake.
ကြော်ငြာတွေ