Nyabukura, Allah arye Abraham biti, nyabuk. “An mi ona meme. An mi ara, tonok ulul ati, ance, ‘Kume, elda na mi koprop ati, Allah arye nyapnila babye, kum arepnamne’ tenen, kum batakmalamce, ‘Ami opnun’ tenen, kintinipmalam deice arye, pia moubuka dipkoprob kel bikmakine. Anda, ‘Allah ara, weik mambulnye anya arye, el siuk erebuka, el nyanilye yupu nirya kekenamne,’ tenenilyamnye ulyama ak, kel bikmakine,” Allah arye, Abraham biti nyabuk.
Wahyu 14:7 - Eipomek7 Amalaikat weik yupu deice arye ayupu nyanmokba kekepse. “Allah arye ninye mutuku-mutuku nirya ati, yupu lipsisikuka bokeipsilirye, wenepnamsil talak ara, akunum dam upmasila ati, anggun nirya arye Allah ati ilil asa unamlulume. Ilil upsiliba, Allah ati, ‘Se, anda pia teleb ulyame,’ nyabuka, elti, si erenamlulume. Yata ning do nirya, im noutamak ap, tukwak mutuku ap, laut mekwen ap, balamle mek nirya ap, aning-aning nirya kwepdeibuknye, Allah ati, anggun nirya arye el siuk erepnamlulume,” nyapra banmokce, amalaikat lakuka banmokba, na Yohanes arye eipse. အခန်းကိုကြည့်ပါ။ |
Wahyu 14:7
44 ပူးပေါင်းရင်းမြစ်များ
Tonda, sik Israel ninye arye, nyabik. Yahweh an tonok ara, dipkoprob Allah ulyame. Yuk ton kum ulule. Ancuk im deice kwepdeiplume. Ancuk im deice ulul ning kurya ap, wala ap, keting ap, aning-aning nirya kwepdeiplume. Tonda, laut mekwen ap, laut mekwen noutamak ulul ning ap, tukwak mutuku ap, tukwak mutuku noutamak ulul ning ap, nirya ara, ancuk kwepdeiplume. Winiplumce, aning-aning nirya kam una ati, isin areplumce, meliminba, tuba kam unyake. Ati ara, im deice yin talibuka unyak malaikat nirya arye, an si erena ati, kisok kanupdongobuka si erekinyake.
“Na Allah arye nyapne. Na sum deice pil kum donamluma deiyok ara ani. Ara, like nakub barye sum deice arye, narye im ap, tuku ap, laut mekwen ap, aning noutamak ulamle ning ayala-yala nirya ap kwepdeipse. Winipsa ati, like tekbarye sum ara, na dikdik semse. Winipsa ati ara, Na Yahweh arye asum ati, teleb kipdeipsirye, ‘Asum ara ‘Naʼ tenen, weik mambul sum,’ nyabuka asum wibuka yuk deipse,” Allah el si Yahweh arye nyabuk.
Ninye ton weik yupu arye nyanamle. Ninye kumak, pata mutuku noutamak arye, Allah el si Yahweh arye yanamle bisik ara, teleb ubuka yalinamlume. Nun ni Allah yanamla ati, kwalin bisik nirya ara, diksukum kibuka yalinamlulume. El yanamle bisik ara malye uamlyak nirya, diksukum teleb kibuka yalinamlulume.
Ninye yupu atonun deice arye nyapnuke. “Allah arye nyanamsil yupu ara, lakak arye laka nyanamlulume,” nyabukba, narye, ‘Ati, yata yupu nyanamne do?’ nyabuka asipdese. Asipdesiba, elce nyapnuke. “Tukwak unyak ninye nirya ara, talye palamle mutmuta atonun ululume. Tonda keta on ning keta opmaliba, like bitinyeto, winilyeto ara, urasin teleb upmalya ani, adiparyuk sesal lebuka koluplirye, akapsakliba, kum ulul touk, tukwak ninye nirya babye aning atonun unyake.
Ura, anggun Yerusalem mutuku umunye ninye ara, weik arye erebuka bukuk mutuku kon deice welebuka binululume. Anggun Sion mutuku umunye ninye ara, pia teleb yupu nyanamlulume. Winipmunyopura, teleb yupu dopropmunce, sik Yerusalem mutuku unyak ninye nirya ati, weik yupu deice mikip arye nyanamlulume. Yerusalem mutuku umunye nang ara, pia teleb yupu nyabuka, weik arye nyanamlulume. Ayupu nirya ara, Yehuda yala ninye kekenak uk laka nyanamlulume. Ayupu nyanamlum talak ara, ‘Ayupu ara nyapnuyap do, kum do?’ tenen, ilil una kume. Sik Yehuda yala ninye unyak mutuku nirya ati, ‘Anggun ni koproba Allah akunum yanmale,’ nyabuka nyanamlulume.
“Ura, im deice ulul ning nirya ap, tukwak mutuku noutam ulul ning nirya ap ara, na Allah Yahweh arye apil nirya dolamse ati, na si erebuka kinamnululume. Aning atonun, mutuku-mutuku nirya ap, yo palpal ap, talye palamle yo ap nirya ara, kanye deibuka mot sepmunce, na si erenamnulume. Wininamluma deiyok ara, na Allah Yahweh arye, Yakub yala ninye nirya ara, akunum lobuka lyelamse. Akunum lyelamsisa ati, na si erenamnulume. Na teleb kibuka dirina weik unilye ning ara, Israel ninye noutam lak kilinune.” Allah arye nyabuk.
Allah Yahweh arye nyabuk. Anggun yupu mikip weik arye, na mapu Israel ninye sik dam nyalbinamlulume. Winipmanto ning ara, weik yupu nyalul pong-pong ana, el si terompet lelim weik tonun nyalamle touk, anggun yupu mikip weik tonun arye Israel ninye ati nyanamlume. Ara, sikce nati bataknikce, sik malye weik wininyak ning ati, lakoprop kibuka laka nyanamlulume. Sik apu koproba Yakub birye deibukba, dadeipdanin yangalamik ninye, Israel yala ninye ati, sik malye unyak ning lakak arye laka nyanamlulume.
Sik pia walwal nang arye, wininyak bukni, dipkoprob Allah, el si Yahweh ulule. Elda kam una deiyoknye ulule. Allah el tonok ara, kam pia ulule. El Allah Yahweh ara, aning-aning talibuka, pia ati, Ninye Deiyoknye Raja unamle. El ap, elce talilul ning nirya ap, pia kume, kum danamle. Pia aupnamle. Tonda, Allah elce, tukwak mutuku ap, tukwak nang ap ati, yu uplyeura, tukwak mutuku nirya ara, weik arye onamle. Tonda, Allah elce, tukwak mutuku unyak nang nirya ati, yu upturye, wenepsutu ura, tukwak mutuku unyak nang nirya ara, darapdongobuka uptinga babye, kum upnamake.
“Se anda ninye sirika arye deipkiknye ulyame. Nara, Allah Yahweh, aning-aning nirya talibuka, deice tam erebuka, pia mikip weik ununye birye, dipkoprob sik Israel tam unyak nang nirya ati, nyapne. Sirya tam akunum yanamale! Ara, anggun amutuku dana-dana tam noutam nirya ululum Israel nang nirya ati ara, na adiparyuk, akunum kum kipdeipnamsine!
“Narye anti, yupu ton laka nyapnukine. Ara, aminyan talak, sirya daknamle talak ara, ance arup eipmalam ning nirya ati, Allah el yu upliba, wininmale ning ati, laka nyapnukine. An lengdar deice arye winipmauba, eipmamu ning ara, Allah arye, ‘Atalak ani,’ tenyamuk touk, aminyan sirya daknamle talak wininmale ning ati eipmalame,” nyapnuk.
Allah Yahweh arye, nabi Hosea biti, ayupu nyabuk. Ara, lelim weik pong-pong an ning, el si terompet, ‘Ninye arye alelim kekebikirye, se tenen, moubuka kekenamakʼ tenen, lelim laka nyabuk! Deiyok ara, na Allah Yahweh arye, lo arepniba, na mapu Israel nang ati, yuk mutuku yu nang arye, olyanganamaka ati nyapne. Winipmanto ara, ayam obuka dilamle maka lakuka balirye, el din ati elyangalamle touk, narye imun kanye bon ning kintinipsa ati, Israel nang deice deipnamnarya! Aning winipnamna deiyok ara, narye, ‘Anggunce winibuka umunyeba, narye aning-aning ton melibuka wininamsine,’ nyabuka, nyalin yupu deice arye, nyapdeiamse yupu bataknike. Tonda, narye, ‘Aning ara, wininamlume. Aning ara, pia kum wininamlume,’ nyapdeiamse yupu ara, ‘Naʼ tenen nang arye, moubuka kum taleamikce, malye winin ninguk, tuba-tuba wininyake.
Anggun nirya ara, moubuka kekepnululume. Kekepmunce, anyapdeipnusin yupu ati, mambul kanye bobuka, pia moubuka talipmunce, unamlume. Na ap, na si ap ati, ‘Allah Yahweh ara, pia mambule’ tenen, teleb kibuka, si erenamnululume. Na Allah Yahweh im deice yin talin malaikat nirya, sik weik deiyoknye ununa ati ara, narye nyapsin yupu ara, moubuka kekepnululume. Anggunce na kibuka, si kum erepnumunyopura, narye anggun deice, malye yupu nyabuka sunamsine. Aninguk kum bukni, tonda narye anggunti, teleb ning ton arisinye ning babye, malye nyabuka sunamsine. Aning nirya malye ninguk arepsinyopura, dolonamlulume. Narye anggunti, ‘Wininamlulume, aning kum winipmunyopura, ikin ning arenamsine,’ nyapsise yupu nirya ara, anggunce, ‘Aning ara, mambul kum ati ara, daupmalye’ tenen, batakanululuma ati, dipkoprob narye anggunti, akunum deiyok koubuka sunamsine. Winisununa deiyok ara, anggunce na nyapdeiamse ning ara, batakluma ati susunune.
Yata ati ninye asiknye Samaria tamnye el tonok aryuk, teleb nati tamubuka nyanmanil do? Barye suse dilamuk nang ara, taku barye (10) nang kweteipmanu bukni, anye biti tonok aryuk Allah si erebuka ‘Telebe,’ nyalyanmasile. Sik yuk nang tupne barye nang Yahudi yala nang nirya ara kwetepmanu bukni, teleb nyabuka kibuka si erena ara, batakmasiake,” Yesus arye el ap neika banmek nang ati nyabuk.
“Anggun awininmalum ara, yata ati do? Nunda talye ulamak ninye atonun unyame. Nun talye tukwak nanguk unyame. Nunce anggunti, ‘Yesus arye ninye lyesulule,’ nyabuka, Yesus el laka teleb yupu boyanmasiname. Anggun amutuku ninye, talye ning si eremunya ara, batakmunce, donga ibuka, ‘Allah dipkoprop ululnye si erenamluma’ tenen, nyapsiname. Allah dipkoprop, elce im tam ap, tuku tam ap, laut mekwen ap, aulye ning noutamak ulul ning nirya ap, kwepdeibuknye bira, el uka. Ati, el siuk erenamlulume.”
Winibuk ati, Yosua birye Akan binyak yabuk, “Se, na mi anda, moubuka tenipdeminyak arye, Allah Yahweh nun dam ulirye, kekenmasila ati, asukum arye adiparyuk, laka nyapnunilyame. Ara, anggun ni Allah si Yahweh, Israel nang ati, pia moubuka kalikisulule Allah ati, el si erepnulyame. Tonda, ance malye kiyamlum ning nirya, asukum arye laka nyapnunilyame. Nati, nyapdeipnunilyame. Tonda, aning ara, ‘Naʼ tenen pia dungnulongona kume. Asukum aryuk laka nyapnunilyame,” Yosua birye, Akan biti nyabuk.
Dinmekbuk, atalak aryuk weik mutuku lulukna mikip arye lulukukba, Yerusalem asik domikak weike lokuka bindakuk. Aik pia weik lokuka bindakuk deice arye, ninye yupa weik 7.000 ninye oplobuk. Aning nirya winibuk ning ati, sik kam tuba unmekce, dinmek ninye ara, im deice tam talibuka ululnye Allah ati, “Anda pia mambule,” nyabuka si erenmekak, eipse.
Mutuku-mutuku nirya unyakce, diba kum tenenyak ninye arye, anti yu weik ulamukba, malye yupu weik nyakinyak bukni, wini talak ara akunuma. Anda sik min arye akunum diamik ninye ati, yupu lipsisikuka bokeipmince, wenepnulam talak ara, akunum uple.” “Tonda, an amu tam bukuka an piluk dolamikce, an nyamlum yupu laka nyana deiyok nang ap, ance wiamlumba, anti diba tenyamkik ninye nirya ap, sikce, ‘Allah elda mambul weiknye’ tenen, an si erelamkik ninye nirya ati ara, sik dekna ati menenga arepnulam talak akunum upsile. Ara, an mapu bukni, weik mambul nang babye, mitik mambul nang babye ara, sik nirya ati menenga arepnulyame. Tonda, yata ninye do nirya, sikce yuk tukwak ninye ati, malye kililamik nang nirya ati ara, weik arye wenebuka oplopnulam talak akunum upsile.”
Malye winin ning tonok babye kum umince, anda Pia Telebnye ulyame. Ati ara, ninye im sirya, mutuku sirya nirya arye an ap, an si ap ati, ‘Se, elda weik mambule’ tenen, ilil ubikirye, “Allah anda pia telebe,” nyabuka an siuk pia erenamake. Tonok yala ninye babye, anti, ‘Dauplye,’ tenen, kum batakitinge. Ninye yala-yala nirya adiparyuk an siuk pia erenamkiake. Minop talak arye dipdongobuka, wini talak nirya noutamak ara, ance pia diksukum ubuka, dolamsulum pil nirya akunum lakak kipsilama ati, im sirya, mutuku sirya nirya noutamak arye, ninye ayala-ayala nirya an dam yakirye, an si pia erenamake.” Sik amekwen dam tikmek nang arye nyanmekba, kekepse.
Sik nong bol tin weik ubukce, bol kobukba, akanye imun deiyoknye, Allah el si ati pia malye yupu weika arye nyanmek. Deiyok ara, sikce, ‘Akanye imun ning nun nong deice awinipmasila deiyoknye bira, Allah el uka,’ tenebikce malye yupu nyanmek. Allah El si ati malye yupu weik nyanmek bukni, sik malye-malye unyak ning ati, balye tam kibikce, kum batakik. Tonda, elti, “Anda pia telebe,” nyabuka, el si kum erenmek. Amalye winin ning nirya ara, tuba talibuka wininmekak anirya eipse.
Allah arye akanye imun ning weika arye, Babel mutuku ninye sik nong deice dopkweteplibuk yalyopura, ikin kanye bobikirye, ‘Se’ tenen, weika arye engebuka donmakiba, yuk mutuku Raja nang nirya arye, yukak arye tikuka eibikirye, ayupu nyapnamake.” ‘Se, Se. Amutuku ara, weik mambul mutuku, pia teleb ulamuk. Babel mutuku ulamlum ninye ara, mikip weik ap, pia teleb ap ulamlum bukni, wini talak adiparyuk tonok keting noutamak ara, Allah arye wenepmasilba, akunum kum daneipmasile,’ nyabuka engenamake.
Bukni, tonok keting deice aryuk, sik ap, sik dekna weik ning ap nirya ara, akunum kum danmale,” nyabuka engenamake. “Tonda aning atonun, sik laut mekwen deice, weik mek liya yo talibuka balamak deiyok nang ap, sik amu tam bukuka amek liya yo deice pil donyak nang ap, amek liya yo noutamak bukuka talye banyak ninye ap, laut mekwen noutam ning, mekin bal do, yuk ning do, dobuka dekenyaka deice arye unyak ninye ap, sik nirya winipnamake.
Winibuka nyabikirye, imun kanye bobuka, tuku but-buta dobuka, sik mining kisok deice pakdakirye, ‘Se, Babel mutuku kumdala ati, nunda mambule weike upsil’ tenen, weik arye engenamake. Engebikirye, ayupu nyapnamake.” ‘Se, Se, Babel mutuku ulamlum ninye ara, anggun bicoe. Sik mek liya yo talilamik ninye, bona yala nirya libuka sik mutuku bobalamikba, bona nirya deklamluma deice arye, amek liya yo talina deiyok nang arye bona uto-uto talin nang kilamik. Bukni, wini talak ara, tonok keting deice aryuk, Allah arye anggun Babel mutuku ululum kili sal wenebuka oplopmasilba, kum danmalume,’ nyabuka engenamake.
Ayupu nyabikba, Kekepsopura, adiparyuk tonoknye Allah el weik ninye deiyoknye bun ning dam arye ayupu tonap nyabukba, kekepse. “Allah el amu tam bukuka, el piluk dolulum ninye nirya arye, nun Ni Kopropa Allah ati, el siuk erepnululume. Allah ati, ‘Se, elda mambul pia weike’ tenen, elti, si erelulum ninye nirya, mambul nang babye, mambul kum nang babye, anggun nirya ansinibuka el siuk erenamlulume,” nyabuk.
“Se, nun ni Allah, anda nun Weik Deiyoknye usilyame. Aning-aning nirya ara, ance, ‘Winibuka, winibuka kwepdeibuka deipnamne,’ tenyamlum touk, adiparyuk kwepdeiamlumba, aning nirya ulule. Aning ati ara, an tonok ara pia telebuk ulyame. Telebe nyana yupu ap, si erena yupu ap, si kina ning ap, mikip kilina yupu ap, anirya ara, an deiceuk delinyabe. Ancuk aning nirya talibuka pia unamlame.” Sik 24 wisi deiyok nang arye Allah ati nyanyake. Na Yohanes arye nyapsine.
Malaikat winilinye birye, el terompet nyabuka deice lelim nyabukura, im noutam akuku buk weik arye dinmok kurya weik ning ara, tukwak mutuku balamuk mek ap, mek puak ap, adeice sakuk. Mek nirya aubuk bukni, winilye bokreibukce, bitinye ning batakuka telebuk ubuk bukni, bokuka tonok ning ara malye kipdeibuk.
Ati, sik Pilistin nang ara, suse weik tonun nelamukce, bukuka dilamuk suse ap, tonda, kub mana anggun mutuku noutam koulamik ning, weik tonun dilamuk ning ara, akub ap, asuse ap, urasin atonun ubuka, kat ning emas deice arye, puturubuka deipmunce, kintinip deipnamlume. Anggun nirya arye, anggun ninye deiyok nang ara, aning weik uamukba, imun kanye bobuka, ikin asa ulamluma anya arye, aning dobuka, Allah ati arenamlume. Winipmunyeba, Israel ninye arye, si erenyak Allah ati, ‘El si erepnamapʼ tenen, el si erepmunce, el dam binuka, kibuka si erenamlume. Winipmunyopura, elce anggun wenena ati, ikin ning weik aresulul ning ara, ‘Tuba tamubuka doproplirye, aning kum kipdeipnamle do, kum do?’ tenen, dinamabe. Ara, anggun nong ap, anggunce talibuka ululum mutuku ap, anggunce si erelulum ning ap ara, ‘Wenen ning ara, kum daneiplirye, bataknamle do, kum do?’ tenen, dinauk unamabe.
ကြော်ငြာတွေ