‘Mangkau arye malye winibibyak’ tenen, Allah yupu moubuka kekebibirye, ‘Malye ning ani, teleb ning ani’ tenen, moubuka kel kibibirye, malye winin ning batakibirye, diksukum un ninguk, talibuka unamabe. Ara, Allah arye nyasilye yupu nirya, kekebuka pia talilamlenye bira, Allah arye anye biti, weik dekna ning arepliba, dopropnamle. Tonda, Allah el yupu uk moubuka talilirye, diksukumuk ululnye bira, el winin ning nirya ara, telebuk upra banamle.
Wahyu 14:13 - Eipomek13 Amalaikat winilye dinmasiba, adiparyuk im deice tam arye, ninye yupu atonun yupu arye, ayupu ton nyabukba, kekepse. Ayupu ara, ani. “Ayupu seklyame. Wini talak arye dipdongobuka, aminyan yanamle talak noutamak nirya, Yesus ap talima dukdongobuka unyak bukni, aminyan talak dipnamak ninye nirya ati, Allah arye teleb updeipliba, kanye deibuka, pia telebuk unamake,” nyabuk. Nyabukura, Allah El Dib Kanye arye nyabuk. “Dipkoprop nyaplume. Sik pil teleb ubuka dolamikba, nong uamuk ning ara, Allah arye kel kilula ati ara, aninye dibikirye, el dam welebicopura, ikin ning, sik nong deice ulamukba, pil ikin arye dolamik ning nirya batakuka, dikdik sebikirye, teleb kanye deibuka unamake. Sik ikin tonap pia kum unamake.” Allah El Dib Kanye arye nyabukba, kekepse. အခန်းကိုကြည့်ပါ။ |
Wahyu 14:13
41 ပူးပေါင်းရင်းမြစ်များ
Winibuka unamake ati, Allah Yahweh el tenelamukce, lyepdeiamuk ninyeuk, abisik bakirye, Sion mutuku tamubuka binamake. Sikce, ‘Yerusalem mutuku weknamap’ tenen, abisik banyak talak ara, sik nirya teleb aryuk kanye deibuka, Allah el si erena ati, mot nyanamake. Ikin kanye bona pia kum diparyuk, pin-pin kanye bobuka, pia unamake. Allah arye sikti, kanye bona deiyok ning arepliba, sik kanye talima pum tam arye, ‘Pia dipkoprob akunum upmasile’ tenen, kanye deibikirye, tonok kanyeuk bobuka unamake. ‘Se,’ tenen, teniltona ap, ikin kanye bona ap, ton pia kum unamake. Allah arye, aning-aning nirya kum kipdeipnamle. Nabi Yesaya birye nyabuk.
Ati, wini talak Daniel anda, ayupu batakna kumce, ayupu pia talibuka ulaminya ani, aminyan talak ara, an adiparyuk dipnalame. Bukni, aminyan talak, mutuku nirya sirya daknamle talak ara, anda tamubuka kam bukminba, Allah arye anti, dekna teleb ning ton arepkiliba, dopropnalame.” Amalaikat arye, na Daniel biti, winibuka laka nyapnuke.
Bulyayukopura, Allah im deice arye ayupu nyapdeibuk. “Anye bira, na Mi Koprop ulule. Narye elti, pia bico tenenuna anya arye, elti, na kanye pia deilinune,” Allah arye nyabuk. Nyabukopura, Allah El Dib Kanye arye, Yesus talima noutam nyapdeibukba, Yesus ara ninye pia kum ulamik mutuku, pata mutuku noutamak biyuk.
Nyabukura, Abraham arye abona talinanye ati nyabuk. Amio, anda teneplyame. An tukwak tuba kam ulamlum talak nirya ara, an patalamkuk ning nirya ara, talilamlum akarye dupsiceto ulamlume. Lazarus ara, ikin weik ulamuk ati, pia imun kanyeuk bobuka ulamuk. Wini talak ara, Lazarus im deice aunmal talak ara, Allah arye el kanye imun un ning kum danibukura, telebuk ulul bukni, anuk ara, uku dinmakil ati, imun kanye bobuka unmalame.
“Ati, yata ning do nirya, Allah arye arisilye ning nirya, yo bok ap, talye tukwak ning nirya ap, yuk nang ati bico tenebuka, melibuka talye arildamunya deice arye, anggun kayapu nang koprop kilinamlulume. Awinilamunyeura, aminyan talak talye tukwak ning nirya kum uplyopura, anggunce yuk ninye ati melildamunya ning ati, ara Allah arye anggun im deice binalum talak ara, teleb nyabuka yukupnamsile.” Yesus arye nyabuk.
Anang nirya ara, Allah el na tenen ninyeuk unyaba ati, elcuk talisulula anya arye, kam unamap talak babye, dipnamap talak babye, ‘Winipniba, Allah arye kanye deipnamnil’ tenen, wininyabe. Tonda, ‘Na wininye ning nirya deice arye el siuk erenamne’ tenen, pia pi dobuka pirinyabe. Ati nun nirya ara, kam unyap talak babye, dipnamap talak nirya babye, elcuk talisilya deice arye, el na tenen ninyeuk unyabe.
Bukni, na kayapo, moubuka teniplulume. Arup nyapmasin yupu ara, Allah arye, Kristus ati, kum kam bukeiamtopura, weik kanye imun kanye boptibye, nyapmasin bukni, aning kum wininamabe. Dipkoprop ning ara nyapnusine. Ara, Kristus dibuk bukni, Allah arye kam bukdeibukba, wini talak ara, dipkoprop pia kam ulule. Ara, wa wibuka kouamikibuk, wisiplyopura, winiryuk kwaning minopce yongobuka libikirye, dilamak atonun, Allah arye, minopce kam bukeibuknye bira, Yesus aulule. Winiryuk kwaning minopce libikirye, bai kwaning aminyan lilamak touk, dib tenenyak nang akunum diamikca ani, aminyan ara, Allah arye, kam bukeipnamle.
Aning ati ara, na bico tenepsinirye, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Anggun Korintus mutuku ninye, kanye bokoltona pia kum aniryuk, tonok kanye bobuka unamlume. Yata ning do nirya, ikin usilya deice arye, ‘Allah el yupu batakibiba, malye ning arye, yuk bisik bobisilyak’ tenen, teniltona kum, pia kalikdanuka unamlume. Allah eluk moubuka talipmunce, unamlume. Anggun kele, nun Deiyoknye Yesus ap, talima dukdongobuka ubirye, elti, ikin pil donyapa nirya ara, dipkoprop nong upnamle. Tilila pil kum donyabe. Aning ara, akunum kel kipluma anya arye, ‘Na nong ap, kanye talima tenen ning ap nirya, Yesus deiceuk deipnirye, Yesus el piluk donamne’ tenen, kanye bokoltona kum aniryuk, pia pi dobuka unamlume. Na Paulus arye, nyapmasine.
Bukni, na opnikca babye, telebe uka. Anggun nirya ati, teleb kanyeuk bobuka unamne. Anggun babye, atonun, nati teleb kanyeuk bobuka unamlulume. Ara, winipmanto yupu nyapnusine. Allah si erena ati, kam ning obuka arilamibirye, ‘Pia teleb upnul’ tenen, sirya dakana ati, aning deice teleb mek dikuka delilamap atouk ning ton nyapnusine. Ara, Allah diba teneluluma deice, el piluk dolulum ara, Allah ati arinyap ning atouk ulule. Malye nang opnicopura, Allah ati arinyap ning deice dikilongolamap mek atouk ulule. Ara, ‘Allah arin ning pia teleb upnul’ tenen, teleb mek dikuka, delilamap ning ara, na opnicopura, amek atonun uptinye.
Aning ara, urdemuk, talya kum nyapsine. Nun Deiyoknye im deice arye kwerebuka yanamle talak ara, elce weik yupu nyaplibuk, im deice pil don nang malaikat, sik deiyoknye birye, weik yupu nyana ap, Allah el im deice bung-bung ana el si ara, terompet arye lelim nyana ap, anirya akunum winiplyopura, sik Kristus diba tenelamik bukni, akunum diamik ninye ara, minopce kam bukeiplibuk, dua kan-kan noutamak welepnamake.
Ara, Allah arye do, ninye deiyok nang arye do, yupu bokuka wenena talak ati, ton ning ara, ninye wenena deiyok nang dam min kum bobinabikce talak ara, lak arye pia malye winibikceura, yuk ninye eibikirye talye lak nyabikibuk, nirya kekebuka kel kibikirye, sik malye winin nang aminyan yanganyake. Ton ning ara, teleb winin nang atonun ubuka, talye kanye bobuka ninye wenen ak yaki bukni, yupu talibikce talak aryuk, sik malye ulamice ning laka kililule.
Aning atonun, ninye arye teleb winilamak ning babye, atonun lak upnamle. Ton nang ara, sik teleb winin ning lak ubikceura, yuk ninye nirya eibikirye kel bikinyake. Ton nang ara, teleb wininyak bukni, yuk ninye arye atalak aryuk kum elikirye, kel kum bikinyake. Bukni, aning babye, aminyan talak kum duknupmanto ning ati ara, lak kipnamlarya.
Kekepsiba, Allah arye nyapnuk. “An kekepnulam ning ap, eipnulam ning ap nirya ara, moubuka seklyame. Surat sekminyopopura, Asia tam noutamak diba tenenyak ninye ati, mutuku si tekbarye dopdeipnulyame. Amutuku si ara, ani. Efesus ap, Semirna ap, Pergamus ap, Tiatira ap, Sardis ap, Piladelpia ap, Laodikia ap, ulule,” nyabuk.
Nyabukura, liman tekbarye noutamak arye, ninye yupu atonun arye nyabikba, sik nyabik yupu kekepsirye, ‘Ayupu seknun’ tenen, kintinipmase bukni, im deice tam arye yuk ninye yupu atonun arye nyapnuke. “Kume, sik tekbarye liman arye nyanmak yupu ara, sekna meme. Ayupu ara, dungnupnulyame,” nyapnuka ati ayupu kum sekse.
Anirya dinmasibuk, aminyan ara tonoknye ton, tekbarye malaikat arye, el terompet deice lelim nyabukura, im deice tam noutamak nirya, weik yupu arye nyanmekba, kekepse yupu ara, ani. Ayupu nyanmek. “Tukwak mutuku im sirya, mutuku sirya nirya talibuka ninye deiyoknye nang nirya ara, nun Ni kopropa Allah ap, elce dopkwetepsuk Ninye Lyena Deiyoknye Kristus ap, sik bitinye arye akunum malye kibuka, aning nirya talidurake. Ati wini talak arye dipdongobuka, aminyan doryanamle talak babye, aning-aning nirya taliprikirye, Weik Ninye Deiyok nang pia unamrake.”
Sik 24 wisi deiyok nang arye ayupu nirya nyabikba, kekepse. Kekepse talak aryuk im deice ning bukni, Allah el si erena aik buplan kukeibikba, anyaik pum bisik ara, marikna pum bisik deipmeka eipse. Amarikna pum bisik ara, minop talak Allah arye Musa ati, “Na mapu nirya ara, wininamak ning ara, ani, malye ati kum wininamak ning ara, ani,” nyabuka, pala keil deice sekiamuk ning deipmek ning ara eipse. Eipse talak ara, liman ap, bebeya una ap, lelim weik ap, mutuku lulukna ap, im noutamak arye dekne dukduka puru mok sakanmok ning ap, anirya eipse.
Ayupu kekepse talak ara, tonok malaikat arye nati nyapnuke. “Anyapnukin yupu ara, seknamlyame. Ayupu ara, ani. Domba Mi Atonye, el kil dopnamal talak ati, weik kwalya kwalibuka deipnamak ning ati, elce anggunti yukupsilirye, ‘Anggunda yalulume, yamunyeura, neika dipnamape,’ nyapnamle ninye ara, Allah arye aninye ati pia teleb updeipliba, kanye deibuka telebuk unamake. Anyapkin yupu ara, dipkoprop Allah elcuk nyapmanilba, nyapkine,” nyapnuk.
Ninye Mi Koprop Atonunye birye nyapnuk. “Yohanes, ance Efesus mutuku diba tenenyak ninye, sik melin malaikat ati ayupu sekuka dopdeiplyame. Dopdeipnulam yupu ara, ani.” Ayupu nyapmakilinye bira, talinye kume. Na sirik taruk arye kurya tekbarye talinune. Tonda, narye atekbarye weisa dirina ning eipmase ning noutamak banune. Narye ayupu nyapkine.
Anggun amul wapsilyopura, ‘Ayupu deiyok ara ani’ tenen, kekepmanto ninye nirya ara, Allah El Dib Kanye arye, Allah diba tenenyak ninye nirya ati nyalul yupu ara, moubuka kekenamlulume. Ara, malye winin ning nirya ati, malye kibuka kinyak ninye nirya ati ara, na pia teleb ununa noutamak tikuk yo ati, “Teleb amolul yo duk ara anggunda dakuka diplulum,” nyapnamne. Ayo duk din ning ninye nirya ara, pia kamuk unamak anya arye, ayo el si ara, Kam Una Yo nyanyabe. “Ayupu nirya ara, Efesus mutuku diba tenebuka unyak ninye ati nyapnamlyame,” nyapnuke.
Sik minyuma talak kam buknamak ninye ara, Allah arye teleb updeipliba, pia kanye deibuka unamake. Sikda pia mambule. Allah arye aninye ati webuka deiamuk ati, sikda malye winin ning tonok babye kum talinyakce, pia diksukum ninyeuk unyake. Aninye ara, Allah arye minyuma talak kam bukeipnamle. Bukni, yuk malye ninye nirya ara, dipna bitinye talak ton dipnamak bukni, atalak minyuma kam bukuka unamak ninye ara, like bitinye talak kum dipnamake. Telebuk pia kam unamake. Sikda, keting tamun yupa weik 1.000 tahun deice arye Allah ap, Kristus ap, sik amu tam buknamak bukni, sik bitinye ap, aninye ap ninye deiyok ning talibuka, aning-aning nirya talibuka unamake. Sik aninye ara, Allah el mambul pil don nang pia unamake.
Kekepse talak ara, Weik Ninye Deiyoknye, el weik kurun bun ning deice bukmoknye birye ayupu nyabuk. “Winira, yata ning do, aning-aning nirya ara, winiryuk ning kwepdeipne. Ati, na nyapnukin yupu ara, pia dipkoprop ulula ati ara, ninye nirya arye diba tenenamake. Ati, anyapnukin yupu ara, kekepmince seknulyame,” nyapnukba, kekepse.
“Allah El Dib Kanye ap, tonda Domba Mi Atonye birye, el dopnamle kil ato nang, sik diba tenenyak ninye ap, sik nirya arye nati, ‘Yanamle,’ nyabuka moroninyake. Ayupu kekebikirye, diba tenenyak ninye nirya arye nati, ‘Yalyame,’ nyabuka moroninyake. Yata ninye do nirya, kam una deiyok mek ati patalul ninye nirya ara, na dam yangana telebe. Tonda, ‘Se, amek ara dobuka diptinye’ tenen, pia pataliba, kanye talima engelul nang nirya ati, narye kam una deiyok mek, dekna kum urdem arye kwebuka arenamsin ati, amek patalul ninye nirya arye kam una deiyok mek dolyangana telebuka.”
Ayupu nyanmekba, sik nirya ati, pia teleb kurun baju yuk-yuk bokuka aribukba, dobuka ongobik. Ongobikura, ayupu ton tamubuka sikti, nyabuk. “Kume, daulamunya ani, atalak noutamak sik tukwak malye nang arye, weika arye tonap, anggun kayapu ton tabakuka onamake. Ara minop talak sik malye nang arye, anggunti oltaklamsik touk, aminyan talak babye diba tenekirye, Allah el piluk donyak ninye tonap oplopra balamica ani, na arya, ‘Winibuka ninye opnamake,’ tenyamsi touk akunum oplobicopura, amalye nang ati yupu lipsisikuka bokeipnirye, wenebuka oplopnamne,” Domba Mi Atonye birye nyapdeibukba, kekepse.
ကြော်ငြာတွေ