Allah arye tenyamlye talak akunum yalyopura, Allah Yahweh arye, el ona ati, pia mikip weik tatce parang ya taleplirye, Lewiatan nyanyak yu weik kam ning ati opnamle. Ara, cakuka balirye, binuka kwanibuka, weik kwatima babye, yalirye wenebuka opnamle. Tonda elcuk, el si Naga Kwatima nyalamak ning, laut kwen noutam ulul kwatima babye, wenebuka opnamle.
Wahyu 12:3 - Eipomek3 Akil eipse talak aryuk, tonok weik mambul ning ton kutukuka tikilyayuk. Aning el urasin ara, yu weik mem kwatima atonun dayuk bukni, ining bi uamukba eipse. El kisok ara, tekbarye ubukba, akisok deice ara, weik ninye deiyok nang arye, sik kisok deice kalunyak ning el si ara mahkota, kisok kalun ning taku barye ubukba eipse. အခန်းကိုကြည့်ပါ။ |
Wahyu 12:3
27 ပူးပေါင်းရင်းမြစ်များ
Allah arye ayupu nyapdeibukba, sik Israel nang arye nyabik. “Se, nun ni Allah Yahweh, an adiparyuk kekepsimince, melibuka lyepsilyame! Na nio, an mikip weik deice aryuk, nun lyepdopsilyame! Minop talak ance nun apu yapu ati, melibuka lyepdonlum touk, nunce, ‘Adiparyuk tikibirye, nun atalak unyap nang ati ton, yanuka lyepdopsutumʼ tenen, moropkiyabe. Ura, nun ni Allah anti, nun apu yapu arye, ‘Nun ni koproba Allah, melipsilyame!’ nyabuka, moropkikba, yu weik ulamuk isa kwatima, akam ulamuk ning, el si Rahab, akunum parang ya arye sekuka omuka deiyoknye birye, yatanye birye do? Kume, yuknye birye kume. An Allah aryuk, weik laut mekwen noutam kam ulamuk kwatima, el si Naga Laut, weik laut mekwen pum tam arye lukuka oplumba, diamuke.
Ara, talye ati kuma. Deiyok ara, amutuku noutam ninye deiyok kibuka taleamikce, ulamik nang arye, sik taleamik nang talye bisikuk bobuka balamik. Winilamika ati, adeice arye, sik taleamikba, sik yupu kekelamik nang ara, kanye windung-wandung abuka, boktobuk arye, bokwang-wangap danuka yuk-yuk kililamikce, malye winin bisikuk balamik.
Nyabukce, ayupu ton nyabuk. “Tonda, na ni ance dinmalumba, apatung el yan ap, taruk ap ara, weik kat ning ubuk. Ton tam ara, kiri tuku upmok. Ton tam ara, kat ning besi upmokba eiplume. Aeiplum ning nong ara, ani. Ara, aninye deiyoknye birye, talinamle ning nirya ara, noutam arye bokuka, wilipnamle. Aning ara, na ni ance dinmalumba, aupmok ning ara, kat ning besi ap, kiri tuku ap tablakikba, eiplum touk upnamle. El mikip ara, besi atonun upnamle bukni, ton tam ara, kiri tuku ap, taplakik anya arye, atam ara mikip kum, mitanguk kipnamle.
‘Aning ara, na kel kiptinye’ tenen, ‘Se,’ tenepse. Tonda, aning el kisok deice arye, yang tagu barye (10) yang uamuk. Awamuk bukni, anoutamak arye, mitik yang ton kutukuka panalyayukba, min arye aupmok yang winilinye, luksakuk. Tonda, mitik yang welebuk ning ara, el asing dam uamuk. Tonda, el si bam bol deice arye, erepdanuka, kwalina yupu uk nyanmok. Ayang ara, mitik bukni, el urasin mikip weik ubukce, yuk belepmek ning nirya ara, sik mikip kumce, mitang ubuk. Tonda, aning el asing ton uamuk. Tonda, el si bam bol deice arye, weik erepdanuka, kwalina yupu weika arye nyanmok. Ati ara, awinibukba eipse ning ara, “Deiyok yata ning ati, winibukba eipse do?” nyabuka asipdese.
“Tonda kisok deice arye, yang tagu barye (10) belebukak eiplum ning, el nong ara ani. Dumunye el talinamla kan-kan noutamak arye, ninye deiyok nang, Raja nang ton, tagu barye nang (10) welebikirye, dumunye el talilye mutuku nirya talinamake. Winilamica ani, aminyan talak ara, ninye deiyoknye ton, panabuka tiklirye, talipnamle. El anye talipnamle urasin ara, minop arye talilamik nang atonun kume. El anye birye, el urasin yuk upliba, sik ninye deiyok nang, winilye nang ara, obuka malye kiplirye, yanibuka amu kipnamle. Winiplirye, sik talilamik ning ara, elcuk talinamle.
Aning-aning nirya akunum winibukba, tonok weik mambul ning ton, im deice tam noutamak kutukuka tikilyayuk. Aning nirya ara, ninye arye, ‘E, deiyok ani’ tenen, kum kel biktinge. Tonok weik mambul kil panalyayukba, el baju ara, keting dirina weik ulamle touk ubukba, eipse. El kisok deice deipmok ning ara, talye tiklamle kurya dukdongobuka antanapdongamuka ara, eipse. Akil el yan amu tam ara, wala bukukak eipse.
Winibukba, Weik Mem Kwatima Urasin Atonye birye akil ati, yu weik ubukba, ‘Akil min arye deiyamuk mapu nirya epnirye oplopnun’ tenen, yukak biyuk. Akil arye deiyamuk mapu nyabuk ning ara, yuk nang ati kume. Ara Allah arye, ‘Wininamlulume, aning ara kum wininamlulume,’ nyabuka, nyalisulul yupu diba tenebuka ayupu dobolbanyakce, Yesus el laka teleb yupu talibuka, pia peterenyak ninye ati nyabuk.
AMem Yu Kwatima el amu cang mikip asa arye donmoka deice arye, im noutamak tuba uamuk kurya weika arye dobukabukce, tuku deice dopkwetebuk. Winibukopura, ami bomuk kil tikmokak, urasin dam tam kalikuka tikmok. Asukum tikmoka deiyok ara, ‘Akil arye mi deipkweteplyopura, na adiparyuk ami obuka dipnune,’ tenebukce, akil dam kalikuka tikmokak, eipse.
Atalak aryuk aning ton eipse. Im deice tam noutamak nirya ara, olanauk unmekak, eipse. Aning ara, Malaikat Deiyoknye, el si ara Mikael. Mikael el amu tam bukuka unyak malaikat ap, sik nirya arye, weik Mem Kwatima Atonye ap, amem kwatima el amu tam bukuka unyak malaikat ap, nirya olanauk unmekba, eipse.
Mikael ap, el mapu silip ap arye, weik Mem Kwatima Atonye ap, el amu tam ulamik malye malaikat ap malye kibikce, sik anang nirya tukwak dopkwetebik. El urasin Mem Kwatima Atonye bira, yuknye kume. El si ara, Isa Mutuku Dongonye, tonda Setan nyanyabe. Minop talak dipdongobuka wini talak noutamak nirya, elce tukwak ninye sik talima libuka bobalamla deice arye, ninye im sirya, mutuku sirya nirya, Allah el diksukum bisik batakikirye, kirikuka malye bisikuk banyake. Allah batakuka malye bisikuk banyaka deiyok ara, eltia.
Mem Kwatima Urasin Atonye birye, laut mekwen kup-kup ak tikilbiyukba, na Yohanes arye eipse ning ara nyapnusine. Ara, laut mekwen noutamak arye, malye ulina ning, weik ning kam ulul ning kutukuka tikilyayuk. Aning el urasin ara laka nyapnune. El kisok ara tekbarye ubuk bukni, el kisok kalun ning, el si ara mahkota yuk-yuk uamuk ning ara, taku barye 10 ubuk. Tonda, el kisok tekbarye asok deice ara, si lakak ubuk. Asi sekuka deiamukba, lakak uamuk ning ara, ninye arye amalinye biti, el si siptingopura, Allah kekepturye, ‘Na like’ tenen, yu weik uptue. Amalinye el si nirya ara, Allah yanina yupu ulula ati nyapne.
Kam ulul ning pia malye ning eipsa ara, el nong ara yu weik kuse, el si ara macam tultul atonun anya arye, el potong ara, botbotokna potong tikamuk. El yan tang ara, bai tam ulamle ning, el si ara beruang ato ning anya arye, el yan tang ara pala weik ubukce, el taruk kala ara jang weik ubuk. El si ara, yu weik kuse singa kus atonun ubuk. Weik Mem Kwatima Urasin Atonye birye, ‘Laut mekwen pum tam arye yanmal ning melipnunil’ tenen, el weik mikip ap, el ninye deiyok ning ap, el talyamuk ning ap, laut mekwen noutamak arye panabuka, tikilyanmok malye kam ulul ning deice deibuk.
Mem Kwatima Urasin Atonye birye, laut mekwen pum tam arye yanmoknye biti, el mikip weik aribuka anya arye, tukwak mutuku ninye weik arye Mem Kwatima Atonye biti si erelamik. Tonda tukwak nang weik arye, laut mekwen pum tam yanmok malye ning kam ulul ning ati, ‘Se, yata ning nirya ara, el ulul touk ulul do? Kume, el pia yuk ulirye, mikip pia weiknye ulula anya arye, yata ninye arye mikip uptuba, anya biti malye kibuka opnuyap’ tenen, ‘El ti obisipting do? Kume, anye bira kum optinge ati, el si babye erenamabe,’ tenenmekce, el si erenauk ulamik.
Arup nyapmasin ning eipsopura, yuk ning eipse ning ton laka nyapnune. Im deice tam noutamak ara, pia mambul ning eipse. Ara tekbarye malaikat arye, yuk-yuk bukni, weik kanye imun ning sirya ning arepnamik ning bopmekak, eipse. Akanye imun ning, ara Allah el yu ubukba, tukwak ninye nirya ati wenebuka onmalya ani, sirya daknamle ning ati, kanye imun weik ning tekbarye sirya daknamle ning ati nyapne.
Aning eipsopura, isa winilinye birye, yakai urasin atonun ubukce, yanganmekba, eipse. Tonok ning ara, Mem Kwatima Urasin Atonye tikukba, el si bam bol pum tam arye ayakai kutukuka yayuk. Bitinye ning ara, Pia Malye Ning Kam Ulul ning, laut mekwen noutamak arye kutukuka tikilyayuknye, el si bam bol pum bisik arye yakai kutukuka yayuk. Aning atonun, winilinye ning ara, Tilila Yupu Nyana Deiyoknye, el si bam bol pum bisik arye yakai kutukuka yayuk. Aisa yakai urasin atonun danmekce yanganmekak eipse.
“Malye Kam Ulul Ning, el bol ining bi atonun ubuk ning ara, el kisok tekbarye deice ubuk yang eiplum ning ara laka nyapnune. El kisok deice 10 yang ara winipmanto ubuk bukni, aning nong ara ani. Ara, mitik tonun amu tam ninye deiyok nang, 10 nang ati ulule. Aninye deiyok nang 10 nang ara, min kum yanamaka ati, amalye deiyoknye birye, sik talinamak mutuku, 10 mutuku min bokuka kum arepmale. Bukni, aminyan talak sik deiyok nang 10 nang akunum yacopura, pia Malye Kam Ululnye sik deiyoknye birye, el amu tam sik 10 ninye deiyok nang arye talinamak mutuku, 10 mutuku bokuka arepliba, el amu tam bukuka unamake. Sikda like weik kum kam unamak bukni, sikce 10 mutuku talibuka unamak talak ara, mitik tonun dem uka.
“Apia Malye Kam Ululnye ap, el amu tam buknamak ninye deiyok nang, 10 nang ap arye, atalye yolalamik kil pia amalye kil ati, ‘Nun like,’ tenebikirye, akil ati male kipnamake. Elce talilye ning nirya dalubuka dopdobikirye, akil oplobicopura, nong demuk upnamle. Akil obikirye el nong kalebuka dinamake. Dinmaca ani, el nong kalebuka batakice ning ara, uku dongobikiba, uku arye dipnamle.”
Lukdaseba, amalaikat arye nyapnuke. “An lukulanmalam ara, yata deiyok arye do? Ninye arye kum bikamik ning, aMalye Kam Ulul Ning el kisok tekbarye, el yang sepuluh (10) ululnye ap, el balye deice bukuka balamle malye winina deiyok kil ap ati laka nyapnukine,” nyapnuke. Nyabukce, ayupu dukdongobuka nyabuk.
Kolukukce, adiparyuk, weik Mem Kwatima Urasin Atonye, ara minop talak kwatima atonun dayuknye, el si ara Isa Mutuku Dongonye, tonda Setan nyanyapnye ati, amalaikat mikip arye talipdongobuk. Malaikat arye Isa Mutuku Dongonye talibukce, weik rantai tapu arye tapu koupdongobuk. Ara, ‘Keting tamun yupa weik 1.000 tahun deice arye, pia lopmanto kum unamle’ tenen, amalaikat arye, Isa Mutuku Dongonye tapu koupdongobuk.
ကြော်ငြာတွေ