Wahyu 11:8 - Eipomek8 Oploplyopura, abitinye nang sik nong dobuka kum weipnamake. Aning kum bukni, aweik asik domikak, sik Deiyoknye wanwanun yo deice obik mutuku, Yerusalem mutuku noutamak, ninye ban bisik noutam akuk, sik nong asukumuk bataklopmakiba aupnamle. Siria talak ara, Yerusalem mutuku nirya pia malyeuk unamla ati, domon yupu deice ara, el si Mesir ap, Sodom ap si bitinye ton nyanamake. အခန်းကိုကြည့်ပါ။ |
Wahyu 11:8
40 ပူးပေါင်းရင်းမြစ်များ
Atalak ara, Allah el si Yahweh arye nyabuk. Na mapu Israel nang ara, Mesir mutuku noutamak, ikin weik unyaka ara, na elinunce, kel kinune. Ara, Mesir nang arye, ikin pil arukunyakbuk, donyak ning ara, akunum elinune. Israel ninye engenyaka ara, na kele. Tonda, ikin asa unyaka ati, na mambul kanye bonune.
Sik amutuku unyak nang arye, kanye erebuka kwalinyak deice arye, tukwak aryuk malye unyake. Sik anang nirya ara, dipkoprob laka deice arye, pia malye unyak talak ara, yuk nang ton, sik urasin eibikcopura, sik malye wininyak ning nirya bikinyake. Ara, ‘Nun malye wininyap ning duknubupe,’ tenena kumce, minop talak Sodom mutuku ulamik nang ara, lak deice noutam arye malye winilamik touk, wininyake. Ati ara, sikda bico! Ikin weik ning, sik nong deice yanamlarya! Ara, sik Yerusalem mutuku unyak nang ap, Yehuda mutuku unyak nang ap ara, sik deiceuk, kanye imun weik ning dobuka deipdayikba, ikin weik unyake.
Sik Samaria mutuku unyak nabi-nabi nang arye, malye wininyak bukni, Yerusalem mutuku unyak nabi-nabi ara, pia weik malye winikiba elinune. Ara, sikce tilila yupu deice nyanyake. Tonda dopdanamikce kilapu batakikirye, yuk kilapu talye-talye yolanyake. Atonun ton, malye ning winilamice nang ati, wenena kum diparyuk, anang ati melibikibuk, amalye wininyak nang ara, weik arye tonap tabakuka malyeuk wininyake. Nabi nang arye, sik pil teleb ubuka kum donyaka ati ara, amutuku malye wininyak ninye nirya ara, sik malye ning kum batakanyake. Tuba malyeuk wininyake. Wininyaka deice, tonoknye babye diksukum ton kum wininyake. Wininyaka anya arye, na Allah arye tenenya ara, pia malye wininyake. Sikda Sodom mutuku ulamik ninye ap, Gomora mutuku ulamik ninye ap, pia malyeuk winilamik atonun wininyake. Aning ara, na pia like.” Allah arye nyabuk.
An dukul kil ap, elce deibuk kilmapu ap atonun ara, sik Samaria tam ulamik nang, an dam bukni, dabu tam (arah utara) ulamik nang atia. Tonda, aning atonun, an weit kil ap, elce deibuk kilmapu ap atonun ara, sik Sodom mutuku ulamik nang, an dam bukni, iknapye tam (arah selatan) noutam ulamik nang atia.
Sik Sodom mutuku noutam ulamik nang nirya arye, malye winilamika deiyok ara ani. Ara, diltaknauk ulamik. Tonda, sik din ning yala-yala nirya ara, pia weik tonun, kintinip deiamik ning arye dilamikce, maknya kipdanuka ulamikce, namin arye, talye tunim abuka, kanye deibuka, teleb aryuk, pia dukdongobuka, neika ulamik. Bukni, sik aning-aning nirya, kum uamuk nang, sik pia talye kankan nang ap, aning-aning kum uamukba, pia patanauk ulamuk nang ati, ‘Sik anang ara, dauplye’ tenebuka, bataklamikce, pia kum melilamik.
Aning nirya winipnamne deice, an Mesir mutuku ulamlum talak arye, ‘Se, aning ara, winiptinye’ tenen, pia patalamkuk ning ap, tonda an talye yolamkik ning nirya ara, narye kum kipdeipnamne. Yuk talye ning nirya ati ton, ance, ‘Aning yanuka melipnamnilamca,’ kum tenenalyame. Tonda, an Mesir mutuku ulamlum talak arye, winilalum ning ati, tonap patana kum upkilya ati, pia kum teninalame.
Akilapu bitinye ara, sik wel talak ara, Mesir mutuku noutam ulamdik. Amutuku ulamdik talak, sikda talye-talye yon kilapu ulamdika ati, ninye weika arye, neika malamik. Adeice arye, sikda wel kilapu ulamaka atonun, kum ulamikba, sal arye sik moum talilamik. Min arye, sal ap neika kum malamdik bukni, atalak ara, sal arye sik moum talilamikce, neika yolalamik deice arye, malye pia weik winilamdik.
Akil ara, Mesir mutuku binuka ulamuk talak arye dipdongobuka, wini talak noutam nirya ara, ‘Ninye talye yon kil unamneʼ tenen, patalamuk touk, dipkoprob talye yon kil ulamukce, kum bataklamuk. Kilapu yolamikirye winilamak ning ara, tuba uamuk. Sik talye yolana ati, el mitik talak arye, sal arye el ap neika malamik talak arye, akil el moum talilamikce, sik anang arye, ‘Se, winipnuyabe,ʼ tenelamikce, patalamuk touk winilamika deice arye, akil malye kililamik.
Winibik talak ara, Allah arye nati nyapnuk. Se, anda ninye sirika arye deiamkiknye bira, na yupu kekepnilyame. Aning ara ance moubuka biknulyame. Apun danamuk ninye yok nirya ara, an kayapu Israel yala ninye nirya daunyake. Israel ninye ayala-ayala nirya unyak ninye arye nyanyake. “Se, nun yok ara, akunum pun dasuke. Allah arye akunum luba kipsuke ati, dorupnin banamle talak nirya ara, yatanye birye lyepsuturye, lopdeipsutu do? Kum ati ara, nunda talyeuk unamabe. Yo mungkaba dakaltaklamak atouk unamabe. Tonap, ‘Yatanye birye lyepnamsil do?’ tenen, pia kum tenenamabe.” Israel ninye arye nyanyake.
Anggun kan-kan arye dopropsirye, ton tam nang ara, oplopse. Ara, Sodom mutuku ap, Gomora mutuku ap, malye weik winilamik ninye oplomse touk, anggun Israel yala ninye babye, weik arye opsise. Winibuka wenebuka olamsisirye, Israel ninye mitik anun bataksise. Winipmanto ara, uku yo dapmakiba, uku dinmalya ani, sirika batakliba, lukuka delilamak touk, narye anggun Israel yala nang ara, mitik anunuk lyepromsise. Winibuka lyepromsise bukni, anggunce tamubuka, na dam ton kum yangalamlume. Na Allah Yahweh arye nyapsine.
Nyabuka ayupu ton nyabuk. Na dipkoprop nyapsine. Allah arye ninye mutuku-mutuku nirya bokuka deiplirye, wenepnamle talak ara, Sodom mutuku ninye ap, Gomora mutuku ninye ap ara, pia malye-malye weik winilamik bukni, aninye ati, mitikto kanam arye wenepnamle. Ara sikda minop talak na yupu kum kekelamika deice arye malye winilamika atia. Bukni, wini talak na yupu peterepra bamunyeba, anggun yupu kum kekepnamak ninye ara, aminyan talak Allah arye pia mikip arye, wenepnamle. Weneplyopura, sikda pia ikin weik unamake.
Aning winilamak atonun, Yesus babye atonun winilamuk. Ara, Yerusalem asik dolamikak batakuka, bai tamuk bobiyikce, ‘Yesus opnuyap’ tenen, Yesus dobuka wanwanun yo deice deibikba, donmoka ani, nun pununa ati dibuk. Nun dekna ati dipsuka deiyok ara, Yesus arye utenyamuk. ‘Na ining banamla deice arye, na wipdeiyamse ninye, sik malye winin ning kum daneipnirye, aninye teleb kibuka diksukum kipdeipnamne’ tenen, nun pununa ati dipsuke.
Aning nirya kel kilamik bukni, sik diba tenelamik ning nirya ila tuba, tonap batakikcopura, ila tuba tonap, sik malye winin ning tonap, kum bataktinge. Ara, kum winipmanto. Sik diba tenelamik ning batakikirye, malye winin ninguk talibuka unamake. Deiyok ara ani. Ara, sik diba tenelamik ning batakikce deice arye, Allah el Mi Kopropa dobuka wanwanun yo deice obik ning atonun, ila tuba tonap wininyake. Tonda, wininyaka deice arye, el nong deice malye ning deibikcopura, yuk talye nang arye Kristus ati, ‘Elda mambul kume’ tenen, dopnilibuka lyab-lyab anyake. Ati ara, minyuma talak diba tenebik ning, ila tuba ton akunum batakikcopura, ila tonap, sik malye winin ning batakuka diba kum teneptinge. Malye winin ninguk talibuka wininamake.
Tonda, sik asik domikce, si nyalamik mutuku Sodom mutuku ap, Gomora mutuku ap ulamik ninye ara, pia malye ulamika anya arye, Allah arye nyapdeibukura, im deice arye uku sakukce, amutuku nirya dibukura, atu uka bukuk. Amutuku nirya malye kibuka oplobuka obuka deiyok, ara sik wenena ap, tonda yuk nang laka kilina ap ati obuk. Ara, Allah ati diba kum tenebikirye, pia malye unyak ninye ara, ‘Sodom mutuku ninye ap, Gomora mutuku ninye ap, opnyopura, adeice arye, bikilina ning atonun kipnyopura, yuk malye un winin ninye kel kipnamak’ tenen, obuke. Ara, tukwak mutuku unyak ninye nirya ara, ‘Allah arye malye un ninye ara, dipkoprop wenebuka oplopnamle, tenebuka kel kipnamak’ tenen, minop talak ulamik ninye obuke.
Im deice ulamik pil don nang, amalaikat malye-malye winibik touk, Sodom mutuku ap, Gomora mutuku ap, amutuku dana-dana ulamik mutuku ninye ap, aninye nirya arye, pia malye winilamik. Sik malye winilamik ara, ani. Sik kanye nong nirya, aninguk tenyamikce, Allah arye, ‘Sal arye kilapu uk, dobuka neika unamake,’ tenyamsuk ning atonun kum bukni, aning batakuka, sal arye sal mamun dolalamikce, yolalamik. Amalye winin ning atonun ning, weik ton winilamika ati, Allah im deice arye, uku buk dopkwetebukura, aninye nirya uku dibuka, sirya dakuk atonun, aminyan ara, malye winilamice ninye nirya, uku dil ban dopkweteplibuk, uku arye diplyopura, pia dipnamake. ‘Allah arye Sodom mutuku ap, Gomora mutuku ap, winibuka atonun winipnamle ati, biknamap’ tenen, nyapne.
Dinmekbuk, atalak aryuk weik mutuku lulukna mikip arye lulukukba, Yerusalem asik domikak weike lokuka bindakuk. Aik pia weik lokuka bindakuk deice arye, ninye yupa weik 7.000 ninye oplobuk. Aning nirya winibuk ning ati, sik kam tuba unmekce, dinmek ninye ara, im deice tam talibuka ululnye Allah ati, “Anda pia mambule,” nyabuka si erenmekak, eipse.
Anang bitinye oplomliba, sik nong ara bisik noutam akuk bataknamake. Ninye nirya kum bukni, mutuku-mutuku nirya unyak ninye ap, yupu yuk-yuk nyanyak ninye ap, ninye ayala-ayala nirya ap, weik mutuku yuk-yuk unyak ninye (negara-negara) ap, ton nang weika arye adiamdice nang, sik nong bitinye awamlya ak eilinamake. Eilinamak bukni, aninye kan-kan arye tonoknye babye, “Se, anang bitinye weipnuyabe,” kum nyanamake.
Aweik ning, anggur duk darapdongobuka yanipmek ning, el nong ara, Allah el yu weik upliba, tukwak ninye nirya, weik arye wenebuka, yupu lipsisikuka bokeiplirye, opnamle ning ati ulule. Malaikat arye, anggur duk nirya, yanibuka kwangnalamak ning pum tam yamopdongobukura, anggur duk nirya daralyaninmekba, mek kwen banmok ning ara, urdem mek kume. Anggur duk yaninmekba, ining mekwen weika arye, banmoke. Pia weika arye banmoka ani, weik ining mekwen dana-dana deibuk ning, mitikto kume. Asukum arye, otam karen ara, yupa weik 300 kilometer mekwen deipra banmok. Aining karu ara, tonok meter ap, tonda noutam ning ap, satu setengah (1.5) meter mekwen weik deibukba, eipse. Na Yohanes arye nyapsine.
Minyuma malaikat lakuka banmokbuk, el aminyan tam tonok malaikat tonap aminyan lakuka yanganmokak, eipse. Bitinye yanmok malaikat ara, aminyan tam ton ayupu nyapra banmok. “Weik asik domikak, el si Babel nyalamik mutuku ara, akunum kum dale. Allah arye amutuku uamuk ning nirya dakuka atu atonun kiplopmale. Deiyok ara, Babel mutuku ulamik ninye arye, sik pia malye ning patalamukba, aninguk tenebuka pia malye winilamika deice arye, Allah bataklamikce, yuk talye ning talibuka malyeuk winilamik. Winilamek talak nirya ara, yuk mutuku ulamek ninye arye, sik malye winin ning eibuka kel bikamikce, sik babye pia malye winilamekce, Allah ati bataklamek. Aning ara, ninye kanye wangalamak mek weik arye dinyakba, sik kanye wangabikirye, pia malye winilamak touk winilamik. Winibuka pia malye weik winilamik ning ara, sik Babel mutuku ulamik ninye, sik deice ubuka anya arye, Allah arye amutuku uamuk ning nirya akunum dakloplirye, atu atonun kiplopmale,” nyabuk. Amalaikat arye nyapra banmokba, na Yohanes arye kekepse.
Mutuku lulukna weik arye lulukukba, adiparyuk weik asik domik mutuku, el si ara Babel mutuku noutamak arye, tuku nirya dilikukce, bokuka winilye kibuk. Tukwak mutuku im sirya, mutuku sirya nirya noutamak arye, weik asik domikak nirya adiparyuk lokuka biyukce, atu atonun kiplobuk. Deiyok ara, Allah arye weik mutuku si Babel mutuku ninye arye, pia malye ulamik ning nirya ati, tuba tenebukce, amutuku ninye wenena ati, yu pia weik ulamuka ati, asirya dakne talak, yu pia weik ubukba, weik mikip arye oplobuk. Allah el yu upmanto ning ara, yu weik arye kanye wangalamak mek kwebuka, tonok mek makau pum tam weika arye dikdongobikirye, yuk nang ati, mikip arye sik si bam bol pum tam dikdongobicopura mek si amubuka lupdonokmanto kum winiptingopura, Ara, Allah arye weik wenena ning arebuk ati, sik Babel mutuku tam ninye lyepdanmanto kum unmekak eipse.
Sik tekbarye malaikat, ara karu mek makau talipmek malaikat noutamak bukni, tonoknye na dam yanuka domona yupu deice arye nyapnuke. “Anda yalyame. Allah arye pia malye kil, talye yolamak kil, ninye nirya kel kiyamik kil ati, wenebuka opnamle ning kapdeipkiniba, eipnulame,” nyapnuk. Ayupu nyapnuka nong ara ani. Ara weik mek dana-dana weik asik domik mutuku, Babel mutuku noutamak ulamik ninye ara, Allah ati bataklamikce, pia malye weik winilamika ati, talye yolamak kil atonun ulamik.
“Talye Yolana Deiyok Kil eiplum ning ara, winipmanto ulul bukni, el nong ara, ani. Ara, pia weik asik domika Babel mutuku noutamak unyak ninye ati kel kinyabe. Babel mutuku unyak ninye arye, yuk mutuku deiyok nang Raja nang nirya ati, sik deice tam unyakce, ninye deiyok ning talinyake.” Malaikatnye birye laka nyapnuk touk, na Yohanes arye nyapsine.
Akil el asok deice sekuka deiyamik yupu ara, ani. “Akil el urasin ara, winipmanto kil ulul bukni, aning nong noutam ara sal arye, ‘Deiyok ara ani’ tenen, min kum biktinge. Weik asik domik mutuku si Babel mutuku tam kil talye-talye yolamak kilapu, sik nin deiyok kil ulule. Tukwak ninye arye pia tenepmanto kum ning, pia malye unyak deiyok kil ulule.” Ayupu dumbarye ara, akil el asok deice sekeiyamik ning laka ubukba, eipse.
Allah arye akanye imun ning weika arye, Babel mutuku ninye sik nong deice dopkweteplibuk yalyopura, ikin kanye bobikirye, ‘Se’ tenen, weika arye engebuka donmakiba, yuk mutuku Raja nang nirya arye, yukak arye tikuka eibikirye, ayupu nyapnamake.” ‘Se, Se. Amutuku ara, weik mambul mutuku, pia teleb ulamuk. Babel mutuku ulamlum ninye ara, mikip weik ap, pia teleb ap ulamlum bukni, wini talak adiparyuk tonok keting noutamak ara, Allah arye wenepmasilba, akunum kum daneipmasile,’ nyabuka engenamake.
Pera mutuku tam tikmakirye, Allah arye Babel mutuku unyak ninye nirya ati, wenebuka oplirye, uku dipliba, amutuku ning nirya dipliba weik tulum welenamle ning eibikirye, ayupu nyapnamake. ‘Se, atalak nirya yuk mutuku ninye arye pia teleb asik mutuku-mutuku nirya dobuka delilamikbuk, anyasik-anyasik nirya ara, mitik teleb ulamuk bukni, Babel mutuku tonok ara, pia urasin telebuk ulamuk.’
El yupu ara, mikip weika arye ayupu nyabukba, kekepse. El yupu ara, ani. “Weik asik domika, el si ara Babel mutuku, aninye ati Allah arye malye kibuka oplopnule. Oploplirye, amutuku ap amutuku unyak ninye ap, amutuku noutamak, unyak isa nirya ap, Allah arye kum daneiplirye, sirya daknamle. Amutuku noutamak ara, isa ayala-yala nirya unyake. Tonda ninye unak kum ati, pia malye maka weik daunyake. Ara teleb wininyak nang arye, ‘Amaka yala nirya ara, pia malye maka anya arye, nun lik’ tenen, pia Kum dinyak maka yala nirya amutuku noutamak unyake.
Anye birye ayupu nyabukba, na Yohanes arye kekepse. Kekepse talak ara, adiparyuk yuknye, mikip weik malaikat arye winipmanto ning una ati, tonok mutuku yangan keil, ikin weik keil dobuka ereptalibukce, laut mekwen noutamak donokukce, ayupu nyabuk. “Aweik keil dobuka, mikip arye laut mekwen noutam donokmal touk, Allah arye Babel mutuku tam ulamak ninye nirya weneplirye, mikip arye oplopmale. Wini talak arye dipdongobuka, aminyan doyanamle talak noutamak nirya ara, tuba tonap amutuku aik ap, ninye ap kum unamake.”
Babel mutuku tam ulamik ninye arye, sik mutuku noutamak, Allah el yupu laka nyana deiyok nang, nabi nang ap, Allah el mapu ap, yuk ninye weik tonap, oltakalamikba, aninye sik ining balamukba, Babel mutuku noutamak lakak ulamuk. Ati, Allah arye Babel mutuku ulamik ninye nirya oplopmalaba, amutuku ap, aninye ap, kum danmale.” Amalaikat arye nyabukba, na Yohanes arye kekepse.
ကြော်ငြာတွေ