Yakub engenmokce, mambul kanye bopmukce, el baju kwiliklobukce, ‘Na mi Yusup akunum dipmale’ tenen, atalak weika arye engena ap, malye kanye bona ap, pia unmok. Tonda, amutuku ninye arye, ‘Yuk nang eipsikirye, ‘Se, sikda ninye dipmaka ati engenmake,’ tenenamsiyak’ tenen, ongolamik baju ton, Yakub birye ongobuk.
Wahyu 11:3 - Eipomek3 Tonda, na yupu laka nyana deiyok nang bitinye ati ara, na mikip weik sik deice deipnyopura, yupa weik keting tamun winilye ap, tonda noutam ning tonap, atalak noutamak nirya arye (1.260 seribu dua ratus enam puluh sum) na yupu laka nyanamrake. Ayupu nyanamdak talak ara, pia malye baju, karung goni atonun ongonamrake. Ara, ‘Imun kanye bobuka, ninye nirya arye engenamak’ tenen, amalye baju ongonamraka ati nyapkine. အခန်းကိုကြည့်ပါ။ |
Wahyu 11:3
43 ပူးပေါင်းရင်းမြစ်များ
Winiprikopura, Daud birye, Yoab ap, el mapu silip nirya ap ati, nyabuk. “Anggun ongolulum baju nirya ara, kwilikuka batakdumunce, dibikce nang engena talak ati, ongolamak baju ongoprumunce, Abnar dipmala ati, engenamlume. Tonda, Abnar weilbinuyik talak ara, Daud el babye, ninye dibikce nang, dongolbalamak kobor yo peti bopmek nang, wibuka banmekak, el Daud babye, aminyan banmok.
Ura, Elia birye, Raja Ahab biti, Allah arye nyapdeipmok yupu laka nyanmok talak ara, anang nirya kekenmekbuk, Elia birye akunum nyapdeibukopura, Ahab kekebukce el baju ongopmok ning kwiribuka batakukce, pia malye baju dobuka, el nong deice kalupdayuk. Winibuka deiyok ara, ‘Na akunum malye upse,’ tenen, ilil kanye bobuka lak kibuk. Winibukce, malye kanye bobuka, din dina kumce, din bulung uk unmok. Tonda asum arye deiyok koubuka, bisik banmok talak babye ara, malye baju aryuk ongopdongobuka, ‘Nara dipkoprob pia malye ulamsinye’ tenen, ilil unmokba, bouku sukubukba unmok.
‘Asyur mutuku deiyoknye birye, Yerusalem mutuku nang opnirya sirya daknamne,’ nyasulule nyabuka, lak nyabikopura, Yehuda tam ulamik nang sik ninye deiyoknye Raja Hizkia ayupu kekebukce, ilil kanye bobukabukce, el baju kwilikukabuce, malye baju arye, el nong nirya ongobuk, ‘Aning ara deiyok ton aupmalba upmal do,’ tenen ati, Allah el si Yahweh, el si eren aik pum tam biyuk.
Atalak aryuk, ninye deiyoknye Raja Daud birye, dileyukba, ‘Israel yala nang, weik asik domik ning Yerusalem mutuku noutam ulamik nang nirya opnunʼ tenen, yayuk malaikat ara, tukwak kiapna, im deice kiapna kibuka, lakuka yangayukce, ninye ona ati yu parang ya boyangayukba eibuk. Daud birye eibukopura, Daud birye amutuku noutam ulamik nang ati, yuk-yuk deiyok kibuka talilamik nang, sikti, nyabukba, sik nirya arye malye karung arye wiamik baju ongobukabikce, “Se, nun malye unyap ning ati opnasila atia,” nyabuka, malye kanye bobikce, tuku deice pubuka mabik.
Wala tekbarye ubukce, like dua puluh empat sum akunum ubukopura, Israel ninye nirya arye, ikin kanye bobikce, din dina kumce, si tebuka unmek. Winibuka unmekce, malye baju arye nong ongobuka, atu butbuta dobuka, sik kisok deice dikdeipdanuka unmek. Winilamika deiyok ara, sik malye ulamik ning ati, ‘Se malye winilamupu,’ tenen ati, winilamik.
Allah Yahweh, aning-aning nirya talibuka, deice tam erebuka, mikip weik ulul nye, elce im deice yin talin malaikat nirya talilule. Atalak ara, Allah arye anggunti nyapsuke. Ara, “Engepnulume, weik arye ngalukmunce, engepnamlume. Tonda, engepnamluma ati, anggun kisok potong koplulume! Koplopmunye ning ara, anggunce ikin kanye bopmunyakarye, malye baju el si karung koni ongopnamlume. “Aning nirya ara, ‘Se, nun babye malye ulamubuʼ tenen, bikilina ati aning winipnamlume,” Allah arye nyapdeipsuke.
“An kel biklyame. Asum arye, na Allah mikip dobuka an deice deipkine. Ati ance na mikip dobuka, mutuku-mutuku nirya unyak ninye ap, ninye deiyok yuk-yuk talibuka unyak weik deiyok nang ap, anang arye talinyak nang ap, an bimince na nyapkinye yupu nyapminyopura, ayupu nong upnamlarya. Ati, narye nyapdeipkiniba, ikin ning arena ap, koulamak ning kwinina ap, ninye arye donyak ning ululona ap, kum kilina ap, ninye malye kibuka ona ap, tonda, teleb ubuka lipsisikuka dona ap, winiryuk yala ning kouna ap, aning nirya, narye tenelamse touk winipnalama anya arye, ‘Ance ayupu laka nyalbinamlam’ tenen, na mikip an deice deipkine,” Allah arye nyapdeipnuk.
Wini talak ara, Yerusalem mutuku unyak wisi-wisi nang, deiyok koubuka yupu nyasinyak ning ara, Allah el yupu talibuka, pil donyak nang arye, nun Israel yala nang ati, yupu nyasinyak nang nirya ara, atalak ara talye tunim abuka, tuku deiceuk bunyake. Aning ara, sikce, ‘Se, yata ning ati winipsuke do?’ tenen, ikin kanye bobuka, talima uk diplyeba, laka kina ati ara, sik anang arye, tuku bum dobuka, sik kisok deice deibuka unyake. Tonda, pia malye baju uk kinikuka unyake. Tonda, amutuku unyak wel kilapu nirya babye, Se, yata wiripnuyap do?’ tenen, sik urasin ara, tuku deiceuk luknupdongobuka bunyake.
“Aning nirya akunum winipnimnyopura, atonun bukni, an nong sirik tam tuku deice mapnulyame. Aning winipnalam ning deiyok ara, sik Yehuda yala nang arye, malye ulamice ning kwang dakna ati, winipnalame. Tuku deice mapnalam talak ara, yupa weik, 40 sum deice arye mapnalame. Ara, lak kilina ati, 40 sum deice arye, narye arepkine. An nong sirik tam, tuku deice mapnalama deiyok ara, ani. Ara, narye Yehuda yala nang arye, malye ulamice ning wenepnamne talak ara, 40 keting tamun upnamle. Aning atonun, anda 40 sum noutam nirya ara, tuku deice an sirik tam mapnamlame. Aning ara, lak kina ati, atalak ara, sik malye winilamice ning, an nong deice deipnamkine. Awinipnalam ning ara, ‘Yehuda yala nang arye, sik malye weik winilamik ning, moubuka kel biknamakʼ tenen, lak kina ati, ance tuku deice mapnalame.”
Asipdeyukura, tonye bira, urasin teleb baju, el si lenan baju ongopmoknye bira, elda amek pu tam tikmoknye birye, el taruk bitinye im deice tam erebukce, yupu ton nyabuk. Atalak na kekenmasiba nyabuk ning ara, ani. “Kam deiyoknye Allah, Pia Kam Unamlanye, el si deice arye, dipkoprob yupu nyapkine. Aning eipmap ning nirya ara, dipkoprob nong upnamlarya. Awininmal ning nirya ara, keting tamun tiga setengah tahun deice arye winipnamle. Allah el mapu ati, yu nang arye, sik deice ikin ning boyanuka deibikca ati, olanauk ulamikca ani, sirya akunum winibikcopura, adinmalamba, kanye imun weik ning wininmal ning ara, atalakuk winibuka sirya daknamle,” nyabukba kekepse.
Winipnamle talak ara, el anye birye, Weik Erena Deiyoknye Allah, aning-aning nirya deice tam ululnye, Allah ati, malye yupu nyanamle. Malye yupu nyaplirye, Allah el wipdeiamuk nang ati, pia ikin ning, sik nong deice tuba delinamle. Winiplirye, Allah arye, ‘Aning wininamlulume. Aning ara, pia kum wininamlulume,’ nyapdeiamuk mem yupu ati ara, amalinye birye yanipnamle. Tonda Allah arye, ‘Na tenyamse talak ani,’ nyabuka, el si eren ati nyapdeiamukba, el mapu arye, el si erenamak keting tamun ap, wala ap, asum ara, ‘Kum kipdeipnamle’ tenen, piripdenamle. Winibuka unamle talak noutamak ara, Allah arye, el mapu dobuka, amalye weik deiyoknye ati, arepnamle. Ara, pia diba kum bukni, tia talak ati, Allah el mapu pirilena ati, anye el amu tam deipnamle. Atalak ara, keting tamun winilye ap, tonok ning noutamak ap deice arye, amalye deiyoknye birye, Allah el mapu talinamle.
Nyabuka asideyukura, yuk im deice malaikat arye, tamubuka nyabuk. “Kume, asum-asum nirya, beren tam ap, lukunyan ap, daupnin balamlya ani, yupa pia weik, dua ribu tiga ratus (2.300) sum ton, tuba kipnin banamle. Tonda, atalak noutam nirya ara, ninye arye, Allah el si erena ap, el si erebuka kina ati arelamak ning ara, keting noutam ap, lukunyan ap, arelyanaganyak ning ara, amalye winina deiyoknye birye, yupu sekliba, ninye arye aning boyanuka, ton ap kum arelyanganamake. Bukni, anyapman talak akunum uplyopura, Allah arye, el si eren aik ara, tuba tamubuka teleb kipdeipnamle,” nyabukba kekepse.
Nabi Yoel birye nyabuk. Se, Allah Yahweh el si eren aik koproba noutam talibuka, Allah si erena ati, kam ning obuka, uku dongolalum nang, imam-imam nang nirya arye, malye kanye bobuka engepnamlume. Anggun Allah si eren aik noutam, ongobuka pil dolulum baju kwiribuka batakmunce, malye baju arye, kisok kwatibuka malye yupu nyapmunce, engenamlulume. Ara, lukunyan noutam nirya ngalukuka, malye yupu nyabuka engenamlume. Deiyok ara, sul kwising arye, anggun wa kouamunye ning nirya, dibuka sirya dakanmaka ati, Allah arin ning ati, gandum ap, anggur mek ap, kum arelyanganamaka ati, malye yupu nyabuka, engenamlulume.
Nyanmokba, amutuku ninye nirya kekebikce, ‘Allah arye winipnamsile,’ nyapdeiamsuk ning ara, ‘Dipkoprob winipnamsile,’ tenebikce, dib tenebik. Winibikopura, aulamik ninye nirya arye, “Nun nirya wininamabe,” nyapdeibik. Ara, sik nirya arye, ‘Allah ati tenebibirye, el si erena ati, winipnuyabe’ tenen, ‘Weik nang babye, mitik nang babye, mapu kil, mapu nirya babye, nun malye winilamupu,’ teninmeka ati, malye baju ongobuka, din dina kumce, talye urdemuk unmek.
Ninye ap, domba basam ap, sapi basam ap, tonda yuk kam ulamle ning nirya ara, ‘Nun malye winilamupu,’ tenebibirye, malye kanye bobibirye, malye baju uk, ongonamabe. Tonda, nun weinyap ning, aning-aning nirya babye, malye baju dobuka, sik nong deice ongopdeipnamabe. Tonda, ‘Allah arye, nun malye winilamupu ning, namin kibuka lyepnamsil’ tenen, Allah moronamabe. Tonda, nun yu kanye bobuka, derelalamuburye, malye-malye weik winililalamupu ning ap nirya ara, bataknamabe.
Yupa bitinye keba nakub dikin (70) nang, Allah el si eren aik dam, tikuka bulubik bukni, ninye bitinye nang, sik si ara Eldad ap, Medad ap ara, Musa akunum wibukabukce, sik si sekeibuk bukni, sikda Allah el si eren aik dam kum bululyarik. Sikda, Israel ninye sik baju bol doltakna aik dam tuba unmarik. Yukak tuba unmarik bukni, Allah arye el mikip ap, el Dib Kanye ap, sik yuk deiyok nang ati arebukba, abitinye nang babye, sik ton arebukba, Allah el Dib Kanye sik talima pum tam ton wekuk. Allah el Dib Kanye sik anang arebukba, Allah el yupu lakak nyalamik nang, nabi atonun kibuka, Israel ninye sik doltakna aik damuk kekenmekak nyaprik. Ara, sik bitinye nang babye, Allah el yupu lakak nyaprik. Sik babye atalak aryuk nyaprik bukni, yuk talak ton aning atonun kum nyaprik.
Anggun Korasin mutuku umunye nang ap, Betsaida mutuku umunye nang ap, Allah arye wenebuka opnamsila ati, anggun bico. Anggunce, ‘Se,’ tenebuka mambul kanye bonamlulume. Anggun dilamlumba, anggun mutuku noutamak sirya dana pil ap, ninye kum winipmanto ning pil ap dolamsa ara, Tirus mutuku ap, Sidon mutuku ap noutamak pil dolamtinyetoura, sik amutuku bitinye unyak nang nirya arye, mambul kanye bolamtingce, sik malye ning batakuka balye tamubuka, nati akunum diba tenelamnitinge. Bukni, amutuku bitinye noutamak ara, apil kum dolamsiba, aning nirya kum elilamika ati, diba kum tenepnike.
Bukni, kum kekeplirye, ‘Telebe,’ kum nyapsilyopura, anggun kwit capu tonoknye do, bitinye nang do, dobuka neika bimunce, malye winipdeipsuknye, el dam binuka, yupu tonap lipsisikuka talinamlulume. Yuk nang ap yupu talilbinamluma deiyok ara, Allah yupu noutamak sekeiyamsuk touk, ‘Ninye bitinye nang do, ninye winilye nang do, anye bira, dipkoprop malye winibuke’ tenen, biktingce nyaptingopura, ayupu kekepnamlulume. ‘Tonoknye birye nyaplyopura, kum kekepnamlulume,’ nyabuka sekeiyamsuk touk winamlum tenen, nyapsine,” Yesus arye nyabuk.
Nyabukce, ayupu ton dukdongobuka nyabuk. “Anggun Korasin mutuku umunye nang ap, Betsaida umunye nang ap, Allah arye opnamsile ati, anggunce, ‘Se,’ tenebuka, mambul kanye bopnamlume. Anggun dilamlum talak ara, anggun mutuku noutamak ninye winipman kum pil dolamsa ara, Tirus mutuku ap, Sidon mutuku ap, noutamak pil dolamtinyetoura, sik amutuku ulamik nang nirya arye, mambul kanye bobukatingce, sik malye ning batakra kanye tamubuka, nati diba tenelamnitinge. Bukni, aning nirya kum elilamika ati, diba kum tenelamike.
Elce nati laka nyapnamle bukni, anggunda na mapu ababye, ‘Yuk ninye nirya kekenamak’ tenen, nati adiparyuk laka nyalbinamlume. Na pil deiyok kipse talak arye diprongobuka, wini talak nirya ara, na ap neika unyaba ati, anggunce tonap nati, laka nyalbinamlume.” Yesus arye el wipdeiamuk nang ati nyabuk.
Bukni, Allah El Dib Kanye anggun talima ak yanuka weksilirye, mikip weik arepsilyopura, dopropnamlume. Dopropmunyak arye, Yerusalem unyak ninye ap, Yudea tam unyak ninye ap, Samaria tam unyak ninye ap, mutuku sirya im sirya unyak ninye ap, na winilamse ning ap, peterelamsibuk kekelamlum ning ap, dobuka peterepra banamlume,” Yesus arye nyabuk.
Kam bukibukura, asum-asum tonok-tonok bukni, amutuku-amutuku kutukuka tiknabuk ninye arye elilamik. Ara, el ap min arye dib tenebuka, Galilea mutuku arye Yerusalem mutuku neika balamik nang arye Yesus elilamik. Sik elilamikce, winira nun Israel nang ati Yesus el peterelamuk ning ap, winilamuk ning ap, laka nyasinyake.
Allah ati dib tenebuburye, el mapu unyaba noutamak ara, Allah arye, nun nirya ati, ‘Pil yuk-yuk donamak’ tenen, kwepdeipsukce, pil dona deiyok ning yuk-yuk bokuka aresulule. Ara, minopce weik mambul ning ara, ‘Na yupu dobuka peterelbana ati deiya kouna deiyok nang, Rasul nang unamak’ tenen, nun Rasul nang wipdeiamsuke. Bitinye ning ara, el nyalye yupu laka peterena ap, aminyan unamle ning min kum upmalye talak, laka nyana ap, ati, ‘Nabi nang donyak pil dobuka unamake’ tenen, yuk nang wipdeiyamuk. Winilye ning ara, el yupu nirya peterena ati deiyok nang wipdeiamsuke. Yuk nang ati ara, ninye kum winipmanto ning, winipman kum pil donyak ninye ap, wipdeiyamuk. Tonda, Allah El Dib Kanye arye, mikip ariliba, ninye kwetena ninye ton wipdeiyamuk. Ton ning ara, ‘Yuk nang ati bico tenebikirye, sik patan ning ati melinang unamake’ tenen, wipdeiyamuk. Tonda, ‘Pil nirya teleb ubuka donamak’ tenen, “Wininamabe, wininamabe,” nyabuka, pil dona deiyok ning moubuka tenebikirye, pil laka nyan nang, administrasi nyalamak ap, wipdeiyamuk. Tonda, sik min kum kel bikamik bukni, Allah El Dib Kanye mikip deice arye, yuk mutuku ninye nyanyak yupu, aninye areplibuk, ayupu dobuka, nyanyak nang ton wipdeiyamuk.
Min arye like bitinye talak anggun dam yase bukni, aminyan tam yanamne ning ara, like winilye ati dilyanamsine. Allah yupu noutamak sekeipsik yupu nyapnusine. ‘Ton nang arye, yuk nang ati, “Winibuka, winibuka malye wininmake,” nyabikcopura, anggun adiparyuk dib tenebuka yupu lipsisikmunce, kum wenepnamlulume. Aning kum bukni, yuk nang tonap bitinyeto, winiliyeto tabakikirye, “Kume, nun bidamnye asing eipmabe. Sik dipkoprop amalye ning winipmangue,” nyabuka ansinibuka nyaptingopura, adeice aniryuk, ‘Diba, anang malye winipmake’ tenen, anang wenepnamlulume. Yuk nang ap tabakuka, “Nun ton dipkoprop eipmabe,” kum nyabikcopura, anang kum wenepnamlulume.’ (Ulangan 19:15)
El Kristus aryuk, ‘Apil, yala-yala nirya donamak’ tenen, el mikip deice arye, pil dona deiyok ning yala yuk-yuk bokuka, tukwak ninye ati arepsuk ning ara, ani. Allah yupu dobuka peterelbana ati, deiyok koupnamik Rasul nang ap, “Allah yupu ani,” nyanyakce, aminyan winipnamle ning lak lena nabi nang ap, Allah ati dib kum tenenyak ninye, ‘Dib tenepnamak’ tenen, peterelbana nang ap, Allah ati dib akunum tenebik ninye, sik deiyok nang ap, Allah yupu sekik ning peterena nang ap, apil dona deiyok ning nirya, el mikip deice arye, bokuka yuk-yuk arepsuke.
Ura, amalye ning winipmace nang, ikin deibuka ona ati ara, tonoknye biryuk, ‘Sik malye winipmangu ara, narye eipmanue,’ nyablya deice kum bukni, dipkoprob ninye bitinye nangto, tonda winilye nangto, anang nirya arye eibikirye, ‘Talye ning si erenyak ning,’ lak nyabikca ati ara, amalye winipmace nang, adiparyuk onamlulume. Bukni, tonap nyapne. Tonoknye biryuk eipmalirye, lak nyaplyopura, adeice aryuk, anggun anang kum onamlulume. Ara, ‘Dipkoprop amalye winin ning winipmak do, kum doʼ tenen, teniltona upsilyopura, anang batakanamlume, ona kume.
Musa birye, Israel ninye ati nyabuk. Yata malye winina ati do nirya, ninye arye malye ning winibicopura, sik winibice ning laka nyana ati ning ara, tonoknye, ‘Na asing arye eipmane,’ nyaplyopura, adeice aryuk, malye winipmalinye wenena meme. Bukni, yuk nang ap tabakuka, bitinye nang do, winilye nang arye do, ‘Kume, nun babye amalye winipmal ning eipmabe,’ nyabicopura, adeice aryuk, ‘Anye bira dipkoprob malye winipmale’ tenen, weneptume. Anye winilye ning kum eibicopura, talye diamuk kum wenepnamlyame. Anye birye winipnamle ning, tonoknye birye, ‘Na asing arye eipmane,’ nyalye bukni, yuk nang bitinye nangto, winilye nangto arye, kum eibicopura, anye bira, talye kum wenepnamlulume. Ninye wenena ati yupu bokeipnamlum talak nirya ara, ninye bitinye do winilye do, ‘Nunce ton eipmabe,’ nyabuka, laka nyabicopura, malye upmalinye wenena telebe. Kumopura, kume.” Musa birye nyabuk.
Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.
Aning nirya kiklipdebuka, ninye nong nukuka deipnulam bukni, anyaik pum tam dana-dana ninye bulubicak ara, kiklildena meme. Deiyok ara, anyaik buru tam ara, sik Yahudi yala kum ninye, diba tenena kum nang arye wala yupa weik 42 wala noutamak nirya arye, Allah el wibuka deiamukce, kanye deiyamuk asik Yerusalem mutuku yanibikirye, malye-malye kibuka deipnamaka ati nyapnune.
Anang bitinye ara, mikip deiyok ning, sik nong deice akunum ulula anya arye, sikce Allah el yupu nyanamdak talak nirya, sik nyapdica deice arye, mok pia kum cenamle. Tonda, sik tenepdice talak nirya ara, sik mikip deice arye yupu nyaprikba, tukwak mutuku mek nirya ara, ining biuk unamle. Tonda sikce nyapdicopura, tukwak mutuku im sirya, mutuku sirya nirya unyak ninye ati, kanye imun upnamle uk, ayala-yala nirya weik dinamle.
Allah arye, ‘Akil kalikuka melipnamne,’ tenyamukce, mok ap, ninye ap, pia kum ulul mutuku noutamak ara, akil arye, ‘Allah arye kwepdeiyamuk sukumuk binun’ tenen, akil arye asukum bik-bik abuka biyuk. Akil bik-bik abuka biyukce, duknupmokba, Allah arye like yupa weik keting tamun winilye ap, tonda noutam ning tonap, (1.260 sum) noutamak arye, akil ati kalikuka melilamuk.
Mem Kwatima Urasin Atonye birye, laut mekwen pum tam arye yayuk ning ati, mikip weik aribukba, aning arye weik kwalina yupu ap, el bidamang kanye aryuk tenebuka erelana yupu ap, Allah ati yanina yupu ap, weika arye nyalamukce, tukwak mutuku ning nirya talyamuk. Aning nirya talyamuk talak ara, wala yupa weik 42 wala deice arye aning nirya talyamuk.
Nyapnukopura, narye, ‘Anye binyak kipnun’ tenen, el dam gutam tuku dipdongobuka bukmase bukni, elce nyapnuk. “Amio, winina ara meme. An ap, an kwit yapu aton ninye ap, sik nirya arye Yesus el yupu talibuka, el piluk dolulume. Anggunce aning winilulum touk, na babye, el pil melinanyeuk ununa ati ara, ance nati si erena meme. Allah eltibuk kibuka, si erenamlulume. Anggun nirya arye, ‘Yuk ninye ton Yesus el laka teleb yupu, ninye lyen yupu kekenamak’ tenen, ayupu dobuka peterelamluma atonun, sik minop talak ulamikce, Allah yupu laka nyalamik nang, nabi-nabi nang babye, Yesus ati yupu nyalamik,” nyapnuke.
Aning eipsopura, aning ton eipse. Weik deiyok nang bun ning deice bukmek kili sal ton eipse. Allah arye aninye ati, yupu lepsisikuka bokolina deiyok ning akunum aribuk. Ara, ‘Yuk kili sal ati yupu lepsisikuka bokeibikirye, wenepnamak’ tenen, Allah arye aninye ati yupu lipsisikuka bokolina deiyok ning aribukba, deiyok nang bun ning deice bukmekbuk eipse. Tonda, minop talak Yesus ap, el yupu ap ati diba tenelamikce, Allah el yupu dobuka peterelamikba, yu nang arye, ‘Nun like’ tenen, sik ngang sekeltakalamik ninye, dib kanye weik aunmekak eipse. Aninye sik dib kanye nirya kam bukikce, keting tamun yupa weik 1.000 tahun deice arye, Kristus ap, sik ap arye, aning-aning nirya talibuka deiyok nang ulamikce talilamik. Anyapmasin ninye ara, talye ninye kume. Ara, Pia Malye Kam Ululnye ap, el urasin atonun ning ap ati, si kum erelamik. Tonda, anye el laka kilin ning, el nomor ara sik asok deice ap, sik taruk deice arye kum seklamik ninye ati nyapsine.
ကြော်ငြာတွေ