Allah arye minopce kum wenesulula deiyok ara, ani. Allah ati, ‘Se, elda pia mambule. Mikip Weiknye ulule,’ tenen, elti, ilil tenena ara, elce nyasilye yupu, moubuka talinyak nang ati ara, Allah arye, ‘Anang nirya ati, weik tonun bico tenesinirye, winibuka telebuk kipdeipnamsine,’ nyabuka, nyalin yupu deice arye nyapdeiamsuk ning nirya ara, dipkoprob tuba-tuba aresulula ati, aning nirya nong upnamsilca! Tukwak mutuku outam, im deice ara eitam, anoutamak weik lo aupmalye ning ululnye ara, kum nukmanto. Anye atouk, Allah arye, bico tenesulul ning ara, kum nukmanto. Nun ti batakana kum diparyuk, pia weik arye bico tenepsilirye, tuba-tuba melisulule.
Wahyu 11:18 - Eipomek18 Mutuku-mutuku nirya unyakce, diba kum tenenyak ninye arye, anti yu weik ulamukba, malye yupu weik nyakinyak bukni, wini talak ara akunuma. Anda sik min arye akunum diamik ninye ati, yupu lipsisikuka bokeipmince, wenepnulam talak ara, akunum uple.” “Tonda, an amu tam bukuka an piluk dolamikce, an nyamlum yupu laka nyana deiyok nang ap, ance wiamlumba, anti diba tenyamkik ninye nirya ap, sikce, ‘Allah elda mambul weiknye’ tenen, an si erelamkik ninye nirya ati ara, sik dekna ati menenga arepnulam talak akunum upsile. Ara, an mapu bukni, weik mambul nang babye, mitik mambul nang babye ara, sik nirya ati menenga arepnulyame. Tonda, yata ninye do nirya, sikce yuk tukwak ninye ati, malye kililamik nang nirya ati ara, weik arye wenebuka oplopnulam talak akunum upsile.” အခန်းကိုကြည့်ပါ။ |
Wahyu 11:18
48 ပူးပေါင်းရင်းမြစ်များ
Aning nirya ati, kanye kum delilule bukni, Allah Yahweh, elce kanye delilul ning ara ani. Ara, yata nang do nirya ara, Allah arye, “Aning wininamlume, aning ara, pia kum wininamlulume,” nyapdeiamsuk yupu moubuka kekebikirye, el tonok ilil uplyeba, diksukumuk wininyak nang ati, Allah arye, kanye deililule. Anang ara, Allah arye, “Weik bico tenesinirye, pia teleb kilinamsine,” nyabuka, nyalin yupu deice arye nyadeipyamsuk yupu nirya, moubuka kekebikirye, Allah elcuk lyelonamsile,’ tenenyak nang ati, Allah arye kanye delilule. Yuk nang ap, yuk ning ap ati, kume.
Nun ni Allah Yahweh, ance, ‘Naʼ tenen, wipdeiamsulum nang ati, “Olana kumce, talye kanye bobuka unamlume,” nyabuka, nyalin yupu deice arye nyapnamsil ati ara, ‘Allah arye nyapnamsil yupu ara, na ton kekeptinye’ tenen, weik arye patanulule. Ara, Allah ati, diba tenebikirye, elce nyasulul yupu moubuka talibikirye, diksukumuk wininyak nang ati, ayupu nyapnamsile. Bukni, yata nang do nirya, sikce min talak malye-malye winin ning talibuka winilamlum ning ara, ila tamubuka, aninguk talipmunce, ton ap kum wininamlume.
Wini talak ara, na tenyamse ning nirya ara, anggunti akunum laka nyapmasinba, akunum kekenmalume. Bukni, sirya nirya dakne ning ati, tonok tonap nyapnusine. Ayupu ara, ani. Abuku noutamak sekeiamsik ning nirya ara, ‘Weik ikin ning ara, dan do?’ tenen, tenilelamsirye, ‘Aning ara weik mambule,’ tenepse ning ara ani. Ara, Allah el tibuk ilil tenebuka unamabe. Winibuka ubirye, Allah arye nun tukwak ninye ati, ‘Aning wininamlulume, aning ara kum wininamlulume,’ nyapdeiamsuk yupu ara, aninguk moubuka talinamabe. Aninguk talibuka bobibirye dobolbanamnyabe. Anyapmasin ning ara, urdem ati kume. Deiyok ara, Allah arye, ninye tukwak mutuku unamak ninye arye, ‘Aning ara weik mambule, tenepnamak,’ tenesilye ning ara, akunuma. Elce nyasilye yupu moubuka kekebibirye, elce nyasilye touk kibuka, el amu tam unamabe. Weik mambul ning ara, akunuma.
Winibuka unyak bukni, narye kel bikse ning ara ani. Sik malye ning talibuka unyak nang kan-kan arye, tonoknye birye malye un ning nirya ulul ning ara, yupa pia weik seratus arye malye wililucuk, tuba kam ulule. Tonda el una ati lo ara, pia weik tonun upnamle. Bukni, na kele, aminyan sirya talak ara, ikin weik ning el nong deice yanuka upnamlarya! Bukni, yata nang do nirya, Allah arye, Aning ara wininamlume, aning ara pia kum wininamlume,’ nyapdeiamsuk yupu, moubuka talibikirye, dipkoprob telebuk ubikcopura, aminyan sirya talak ara, sikda tuba telebuk unamake. Sik anang arye Allah ati, Elda pia mambul weikʼ tenen, ilil unyaka ati, aminyan sirya talak ara, Allah arye sikti, teleb kipdeipliba, sikda tuba telebuk unamake.
Winipnamle bukni, atalak ara, keting panalyangan tam, timur mutuku tam unamak nang ap, arah utara, dabu tam mutuku unamak nang ap arye, ‘Ilil uptueʼ tenen yupu, el dam nyabikiba kekeplirye, ‘Se yata winipnamne do?’ tenen, lukdanuka, ilil un ning ati, nyabikiba kekeplirye, pia yu weik upliba, malye kibuka bilirye, yuk mutuku noutam ton unyak nang ati, olbilirye, ninye weik obukaplirye, kum kipdeipnamle.
Allah tenelye touk, wininamle bukni, aminyan talak ara, Allah ap, el im deice pil don nang, malaikat nirya ap, yupu talibikirye, ninye deiyok kibukce, mikip weik deice arye, tukwak mutuku ninye talinamlanye bira, el talipnamle ning nirya dopdobikirye, pia kum kipdeipnamake. El ap, el mikip nirya ap, pia kum kipdeipnamake.
Anye bira, el kel weik deice arye, ‘Na yupu dem kekepnitingʼ tenen, ‘Naʼ tenen arye, tilila yupu nyapnamla deice, ninye weik tonun, el yupu ati, ‘E dip nyanmasile,’ tenebikirye, diba tenenamake. Ati, el wininamle ning nirya ara, nonguk kipnin banamle. Aninye deiyoknye, mikip weik, malye weik unamle Raja, elda maknya kintiniplya deice arye, kanye erenanye unamle. Tonda, elce, “Aning ara, wininamne,” nyaplyeba, el yupu kekepnamak nang, diba tenebikirye, ‘Nunda telebuk unamabe,’ tenepnamak bukni, kum bikmakibuk, elce ninye weik opnamle. Aning atonun, amalye mikip weik Raja bira, Allah elti, ilil tenena kumce, yaniplirye, ‘Allah el winin ning nirya ati, malye kibuka, kum kipnindeipnamneʼ tenen, piripnamle bukni, kum winipnamle. Piripnamle bukni, aminyan talak ara, aninye deiyoknye Raja ara, Allah el bidamnye, mikip weik deice arye, anye weneplirye, obuka kum kipdeipnamle.
Ara, Allah arye anggunti, kanye deipsuka anya arye, urdemuk arepnamsil ning, weik arye im deice kintinibuka akunum deipsuke. Aning ati ara, amalye winin ning nirya winipsicopura, anggunda kanye pia deibuka unamlulume. Amalye winin nang, anggun apu yapu arye, na yupu laka nyalamik nang, sik nabi nang ati, atouk ikin ning sik nong deice delilamika anya arye, wini talak unyak nang babye, anggunda na yupu kekelulum ninye ati, atouk malye winin ning winilinamsiake. Winipnamsiyak bukni, im deice binamlum talak ara, Allah arye menenga ning weik arye arenamsile. Aning ati ara, “Anggun kanye pia deibuka unamlulume,” nyapsine.
Yata ninye do nirya, atalak babye, yuk dotalak babye, Allah elti, ilil uplirye, amutamukirye, ‘El ara, weik mambul’ tenen, el siuk erebuka unyak ninye nirya ara, Allah arye aninye ati luba kina kumce, pia bico tenebuka melilule. Ara, atalak unyak ninye babye, sik arye mapu deibikirye, dadeipdanin, balamice ani, ninye yupa weik upninbanamak kili sal bapye, melilule.
Lo tonap kum upnamsil bukni, tekbarye malaikat siryanye birye, el terompet nyapnulye talak noutamak ara, Allah arye, ‘Wininamne’ tenen, minop talak akunum tenyamuk bukni, duknyamuk ning ara, pil moubuka doplirye, sirya daknamle. Allah el pil don nang, ara el yupu laka len nang, sik nabi-nabi nang ati, “Na tenyamse ning sirya daknamne,” nyabuka laka nyalamuk touk, winira nong upmale,” nyabuka amalaikat arye nyabuk.
Aning nirya kiklipdebuka, ninye nong nukuka deipnulam bukni, anyaik pum tam dana-dana ninye bulubicak ara, kiklildena meme. Deiyok ara, anyaik buru tam ara, sik Yahudi yala kum ninye, diba tenena kum nang arye wala yupa weik 42 wala noutamak nirya arye, Allah el wibuka deiamukce, kanye deiyamuk asik Yerusalem mutuku yanibikirye, malye-malye kibuka deipnamaka ati nyapnune.
“Atalak tukwak mutuku noutamak tuba unamak ninye ara, Allah arye tenyamuk touk, aninguk unamake. Ara Allah arye, ‘Anang ara tapu koubikirye, wenena aik dongonamake,’ tenyamuk kili sala ara, dipkoprop tapu koubuka, wenena aik bobinamake. Tonda, Allah arye, ‘Anang ati ara, yuk nang arye parang ya dobuka oplopnamake,’ tenyamuk ninye ara, dipkoprop parang ya arye oplopnamake.” “Winibuka onamsiaka ati ara, talye kanye bobuka una ara bataklulume. Aikin ning unamsil ning ati ara, Allah arye wipdeiamukba, elti, diba tenenyak ninye nirya ara, ikin uptu babye, ‘Bataknuyap do?’ tenena pia kumce, pia pi dobuka mikip aryuk unamake. Bukni, ikin weik upsiliba, imun kanye bobuka, ‘Allah bataknuyap do? tenepmunyak’ tenen, Allah el yupu nyasilye touk, ayupu uk talibuka, pia darabuka unamlulume.” Na Yohanes arye nyapsine.
Tonda, aminyan talak tuku pum bisik arye yayuknye, el yupu nyabuka deice arye, tukwak mutuku noutamak tuba ulamik ninye nirya sik sirik taruk deice laka kilin ning sekuka delilamik. Sik sirik taruk deice pitin kilina ati, kum seklamik ninye ara, sik asok deice sekelilamik. Ati ara, aminyan talak tuku pum bisik arya yayuknye birye nyapdeibukba, ninye ayala-ayala nirya, sik nong deice aning sekelilamik. Ara, weik mambul nang babye, mambul kum nang babye, tonda bona uto-uto talin nang babye, talye bona utotoa kum ninye babye, tonda dekna doldona kumce, yuk nang ati pil donyak ninye babye, sik kanye aryuk, sik yuk pil donyak ninye babye, ninye ayala-ayala nirya, sik nong deice aning laka kin ning sekelilamik.
Ara talya ati kume. Allah arye aninye nirya ati, yu pia weik upliba, weneplirye, sik nong deice ikin ning pia weika arye deiplirye, opnamle. Awininamle ning ara, winipmanto ning ati nyapne. Ara, yu weik arye ninye kanye wangalamak mek kwebuka, urdem mek ap tabakna kumce, tonok mek makau pum bisik weika arye dikdongobikiba, langdelsaklamle touk, Allah arye aninye weika arye wenenamle ning ara, ikin pia weik upliba, lyepdanmanto kum unamake. Allah arye kumasan bol kel, el si ara belerang, ara, uku buk tin weika arye dipliba, keil but-buta tong ara, siltong atonun weik lelamle ning dobuka, aninye sik nong deice deipliba, uku arye sik nong bol dilamliba, uk dilamlya ati pia donmakirye, engenamake. Engebuka donmakibuk, Domba Mi Atonye ap, Allah el im deice pil don nang, sik pia diksukum unyak malaikat nirya ap arye dinamake.
Arup nyapmasin ning eipsopura, yuk ning eipse ning ton laka nyapnune. Im deice tam noutamak ara, pia mambul ning eipse. Ara tekbarye malaikat arye, yuk-yuk bukni, weik kanye imun ning sirya ning arepnamik ning bopmekak, eipse. Akanye imun ning, ara Allah el yu ubukba, tukwak ninye nirya ati wenebuka onmalya ani, sirya daknamle ning ati, kanye imun weik ning tekbarye sirya daknamle ning ati nyapne.
Aning dinmasiba, sik teleb dumbarye kam unyak ning kan-kan, tonoknye birye, karu makau eipmase ning tekbarye dobuka, sik tekbarye malaikat ati bokuka aribuk. Akaru makau emas ning pum bisik ara, kam pia unamlanye Allah, el yu una ap, ninye wenena ap, ona ap deiyok ning nirya ubuk. Pia doyanamle talak kam unamlanye Allah ara, el yu weik ning, akaru makau emas ning pum unmokak eipse.
“Ati, Babel mutuku unyak ninye, sikce yuk nang ati malye winilamik touk, Allah arye sik wenena ati, sik nong deice pia ikin ning weika arye deipnamle. Amutuku ninye arye, yuk nang ati malye weik ulamik ning ara, mitik tonun bukni, Allah arye sik wenen ning ara, sik nong deice deipnamle ikin ning ara, pia weika arye winipnamle. Sikce yuk ninye ati, sik nong deice delilamik ning ara, ikin mitik tonunuk uamuk bukni, Allah arye sik wenena ati, sik nong deice deipnulam ning ara, ikin pia weik upnamle.”
Allah Yupu Deiyoknye, el si bam bol pum tam arye, yu weik parang ya belebukba, eipse. Aparang ya arye, sik malye winin ning talibuka unyak ninye ayala-yala nirya ap, im sirya, mutuku sirya nirya noutamak unyakce, malye wininyak kili sal ap ati, aparang ya arye opnamle. Tukwak ninye mutuku-mutuku nirya weik mikip deice arye talinamle. Ninye nirya arye, elti, malye kum kipmanto unamake. Winipmanto ati, ‘Anggur mek binamle’ tenen, weik keil deice pum lukikirye anggur dukdongobuka, yanibikiba, amekwen balamle touk, anye birye Allah ati mambul pil donamle. Ayupu nong ara, ani. Ara aning-aning nirya deice tam ulirye, weik mikip ap, weik eitamnye ap ululnye Allah ara, el yu weik upliba, tukwak malye un ninye nirya, weik arye wenebuka yupu lipsisikuka, oplopnamdak ati tenenyabe. Malye winin ninye ati wenena deiyoknye bira, akurun kuda deice bukuka balamlanye bira el uka.
Talye ninguk kum dipnamlum bukni, weik ninye deiyok nang Raja nang ap, yin talin nang sik weik deiyok nang ap, mikip unyak ninye ap, yin talin nang sik kuda basam ap, kuda balye deice bukikirye yin talibuka banyak nang ap, talye-talye unyak ninye nirya ap, mambul ninye babye, mambul kum ninye babye, yo bok deice dekikiba urdemuk pil don nang babye, sik kanye aryuk pil donyakce, yo bok donyak nang babye, aninye ayala-ayala nirya oplopniba, anggun maka nirya arye, sik nong tup dobuka dinamlume. Ati bulubuka yalulume,” nyabukba, kekepse.
Ayupu nyabikba, Kekepsopura, adiparyuk tonoknye Allah el weik ninye deiyoknye bun ning dam arye ayupu tonap nyabukba, kekepse. “Allah el amu tam bukuka, el piluk dolulum ninye nirya arye, nun Ni Kopropa Allah ati, el siuk erepnululume. Allah ati, ‘Se, elda mambul pia weike’ tenen, elti, si erelulum ninye nirya, mambul nang babye, mambul kum nang babye, anggun nirya ansinibuka el siuk erenamlulume,” nyabuk.
Dipdesiba, sik akunum diamik ninye mambul nang babye, mambul kum nang babye yanganmekak eipse. Sik nirya aweik kurun bun ning urasin tam tikilyanganmek ak, im deice tam ulul buku-buku nirya ara, yokeibik. Tonda, tonok buku ton, el si ara Kam Pia Unamak Ninye Si Sekna Buku ton yokeibmekbuk eipse. Abuku noutamak seklamik yupu nirya dipdeyikba, sik akunum diamik ninye nirya ara, sik kam tuba ulamik talak aning-aning nirya winilamik touk, sekuka delilamika ati ara, abuku sekeiyamika noutamak awamuk touk, sik akunum diamik ninye nirya ati, yupu lepsisikuka bokeibukce, wenebuk.
Ayupu kekepseura, Yesus arye ayupu nyapnuke. “Anggun kanye mouplulume. Nara, minopce anggun dam yanamne. Narye tukwak ninye sik dekna ati, menenga ning ap wenen ning ap ara, akunum kintinipse. Ninye im sirya, mutuku sirya nirya ati ara, sik wininyak ning aupmalye touk, anirya dipdenirye, anggunti yupu lipsisikuka bokeipsenirye, wenepnamsene.
ကြော်ငြာတွေ