Dipkoprop Allah Yahweh arye, na deiyoknye ati nyabuk. Na Allah Yahweh arye, akunum nyapkisa ati, anyapkise ning ara, tonap tenepnirye, yuk ning ton kum punubuka nyapnamne. Ara, na Allah ap, ninye ap, teleb ubuka neika una ati, ansinilina deiyoknye pil talibuka pia donamlyame. Ara, minop talak ulamuknye, el si ara Melkisedek birye, apiluk talibuka dolamuk touk, an babye, apiluk talibuka pia donamlyame.
Wahyu 11:15 - Eipomek15 Anirya dinmasibuk, aminyan ara tonoknye ton, tekbarye malaikat arye, el terompet deice lelim nyabukura, im deice tam noutamak nirya, weik yupu arye nyanmekba, kekepse yupu ara, ani. Ayupu nyanmek. “Tukwak mutuku im sirya, mutuku sirya nirya talibuka ninye deiyoknye nang nirya ara, nun Ni kopropa Allah ap, elce dopkwetepsuk Ninye Lyena Deiyoknye Kristus ap, sik bitinye arye akunum malye kibuka, aning nirya talidurake. Ati wini talak arye dipdongobuka, aminyan doryanamle talak babye, aning-aning nirya taliprikirye, Weik Ninye Deiyok nang pia unamrake.” အခန်းကိုကြည့်ပါ။ |
Wahyu 11:15
54 ပူးပေါင်းရင်းမြစ်များ
Nun ni Allah ara, aning-aning nirya deice tam erebuka ulirye, aning nirya talilule. Ara pia unamle. Ati, anggun Sion mutuku noutam ululum ninye nirya ara, wini talak arye dipdongobuka, doyanamle talak nirya babye, anggun ni Allah arye, aning-aning nirya talibuka, weik deiyoknye pia unamsile. Nun nirya, nun ni Allah Yahweh ati, “Pia teleb,” nyabuka, el siuk pia erenamabe.
Ati, se nun ni Allah, ance nunti, ‘Aning wininamlume. Aning ara, pia kum wininamlume,’ nyabuka, diksukum yupu uk nyasilyam atonun kibuka, nun tukwak mutuku sirya, im sirya nirya noutam unyap nang ati ara, yupu nyapdeipnamsilyame! Deiyok ara, ance tukwak mutuku sirya, im nirya noutam unyak nang yala-yala nirya ara, ancuk nun nirya ati, talisilyame! Anda, nun Deiyoknye ulyama ati, ancuk nunti, yupu bokeipnamsilyame.
Aminyan sirya talak ara, tukwak mutuku im sirya, mutuku sirya, unyak ninye, ance kwepdeiamlum ninye yala nirya ara, an si eren ati, an damuk yanganamake. Se, Allah anda aning-aning nirya talimince, deice tam erebuka, Pia Mikip Weik Deiyoknye ulyama ati, tukwak ninye nirya, an urasin din sukum akunum yaceura, sik nirya arye, kutam tuku deice deibuka kanupdongobuka, an si atibuk erenamake. Tonda, an ap, an mikip ap, an pia teleb si ulyamnye ap ati, “Anirya ara, pia telebe,” nyabuka, an siuk erenamake.
Atalak ara, weik lelim nyalamle ning, el si terompet, lelim weik tonun pong-pong nyaplirye, yukupliba, sik Israel nang, minop talak Asyur mutuku noutam bobinamikba, daulamika ani, sik bisik wangamuk nang ap, tonda Israel mutuku noutam, Allah arye sik apu yapu malye ulamik ning ati, inibuka donokamukba, bindomikce, Mesir mutuku noutam binuka ulamik nang ap, sik anang nirya ara, terompet lelim kekepnamake. Kekebikirye, adiparyuk tuba tonap tamubuka, Yerusalem mutuku weik asikuk yakirye, pia teleb lek aikuk, Yerusalem mutuku deice tamubuka yakirye, sik ni koproba Allah Yahweh, el siuk yanuka erenamake.
“Ura, im deice ulul ning nirya ap, tukwak mutuku noutam ulul ning nirya ap ara, na Allah Yahweh arye apil nirya dolamse ati, na si erebuka kinamnululume. Aning atonun, mutuku-mutuku nirya ap, yo palpal ap, talye palamle yo ap nirya ara, kanye deibuka mot sepmunce, na si erenamnulume. Wininamluma deiyok ara, na Allah Yahweh arye, Yakub yala ninye nirya ara, akunum lobuka lyelamse. Akunum lyelamsisa ati, na si erenamnulume. Na teleb kibuka dirina weik unilye ning ara, Israel ninye noutam lak kilinune.” Allah arye nyabuk.
Anggun Israel ninye kekepnululume. Dipkoprop anggunce bita kel kum kiamlum ninye, mutuku-mutuku nirya pera mutuku daunyak ninye ati yukupmunba, sik aninye nirya kekebikirye, adiparyuk anggun dam anyuk yanganamake. Aning atonun, yuk pera mutuku unyak ninye, sik Israel ninye bita kel kum kiyamik bukni, anggun dam bikbik abuka yanganamake. Anggun dam yanganamaka deiyok ara, na si erenululum Allah ara, na Yahweh arye anggun Israel ninye ati, wipdeiamsirye, ereipsisa ati, sik yuk yala ninye arye, ‘Se, Israel nang ara, weik mambule,’ tenesinyake. Nara malye winin ning tonok ning babye kum ununa anya arye, Pia Telebnye unirye, anggun Israel ninye ati pia kalikuka melisunune. Narye anggunti erepdeipsisirye, teleb kililamsisa ati, yuk pera mutuku ninye arye, anggun dam dilyanamake.
Elda, aning-aning nirya ap, ninye nirya ap taliplirye, ninye deiyoknye pia aunamle. Elce aning-aning nirya, talibuka unamle talak ara, kum kumdanamle. Tonda, elce, ‘Allah ap, ninye ap, teleb ubuka neika unamak’ tenen, ansinilina deiyok kibuka unamsilnye bira, pia aunamle. Aning babye, kum kumdanamle. Minop talak ninye deiyoknye, Raja Daud birye taleamuk mutuku ap, ninye ap ara, el dem arye, pia taliplirye, ninye deiyoknye pia aunamle. Raja Daud ninye deiyoknye una ati, weik mambul bun ning deice bulamuk touk, anye babye, aning deice pia abunamle. Raja Daud birye taleamuk mutuku ap, ninye ap nirya ara, ayanamlanye, el si mikip deice arye, aning-aning nirya pia talinamle. Elce pia teleb kibuka, yupu lipsisikuka bokolinamsile. Tonda, el malye winin ning tonok babye kum winilirye, pia diksukumuk unamla deice arye, amutuku nirya ap, amutuku unamak ninye nirya ap, teleb arye talinamle. Elda ninye deiyoknye kiplirye, talinamle ning nirya ara, pia aunamle. Wini talak ap, yuk sum nirya ap, pia ati unamle. Elce pia teleb unamle ning nirya, sirya dakmanto kum unamle. Aning nirya ara, talye ati kum winipnamle. Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah Yahweh, aning-aning nirya talibuka, deice tam ulirye, Weik Erenanye birye, pia pi dobuka, el mikip weik deice aniryuk, aning nirya dipkoprob pil dolya deice arye unamle. Allah arye nyapdeibukba, Yesaya birye sekeibuke.
Allah arye nyabukba, nabi Yeremia birye, tamubuka nyabuk. Na ni Allah Yahweh, anda erebuka ulyamce, mikip kilinilyame. Na kanye imun unilye talak ara, na ni anda, na mikip kelinilyamnye ulyame. Tonda, imun kanye bobuka, unun talak do, ikin ning yanuka unilye talak do, na mal olan nang arye opmanto uninyak talak do nirya ara, ancuk melibuka kalikinilyame. An damuk yanuka dungnubuka uniba, yuk nang arye kum opnitinge. Telebuk wininune. Tukwak mutuku im sirya, mutuku sirya, unyak nang nirya ara, ‘Elcuk melibuka lyepdopnamsilʼ tenen, an damuk yanganamake. Mutuku sirya, im sirya nirya unyak nang, an dam yakirye, nyanamake. “Nun apu yapu arye talibuka, si erelamik ning ara, nong kum ning, talye ninguk talibuka si erelamik. Tilila yupu uk, diba tenebuka taleamikce, dipkoprob nong kum upnamle ning, ninye kum melipmanto ninguk talibuka winilamik,” nyanamake.
Minop talak, narye na pil donanye Yakub biti areamsibuk, elce deibukba, dadeipdanin balamik ninye ulamik mutuku uk pia ati binuka unamake. Ara, sik apu yapu ulamik mutuku uk, binuka unamake. Sikce deibikiba, dadeipdanin banamak ninye nirya babye, amutuku uk talibuka pia aunamake. Ara, wini talak ululum ninye ap, aminyan talak sik mapu ap, tonda sik mapu arye deipdanin, banamak mapu ap, doyanamle talak deibikiba, dadeipdanin banamak ninye nirya ap, sik nirya amutuku noutamuk teleb ubuka unamake. Unamak talak ara, Daud el yalanye birye, ninye deiyok kibuka aninye pia talinamle. Sik Sisinanye el tonok unamle.
Ura tonap tabakuka, abisik banmokce, kiklipdeyuk ning babye, karin ara, 500 meter ton kilibuk. Asukum ara, mek pia karu weik ubuk. Ara, yan deice arye, yanibuka koubuka, bana ara, winipman kumto upse. Amek ara, na taram dam ubuka ati, mek kum koupmanto upse. Ura, nauk kum bukni, yata nang do nirya, mek kekuka, bana kel nang arye, amek piribuka koubuka, otam biting bukni, talye nang nirya arye, amek koubuka otam bana ara, kum binmanto uamukak eipse.
Winibukba, pia minop talak donirye, Kam Ulamuka ani, Pia Tuba Kam Unamle Deiyoknye, abukmoknye birye, el anye bira, Ninye Mi Atonunye ati, weik mambul ning weik arebuk. Elti arebuk ning ara, ani. Ara, ‘El mikip weik arye, aning-aning nirya talinamle’ tenen, deiyok ning ap, weik dirina ap arebuk. Tonda, ninye im sirya, mutuku sirya nirya ap, aminyan winipnamle ning nirya ap, ‘Elcuk tenelye touk unamle’ tenen, deiyok ning ton arebuk. Tonda, anyarepnya deice arye, ninye ayala-ayala nirya ap, yupu yuk-yuk nyanyak nang nirya ap, tonda im sirya, mutuku sirya nirya unyak ninye nirya arye, ‘El siuk erenamak’ tenen, adeiyok ning ton dobuka, Ninye Mi Atonunye biti arebuk. Tonda, el anye mikip weik arye talinamle ning ap, talibuka pia unamle ning ap nirya ara, ninye yuk nang arye, pia kum kum kipdeipnamake. Elce aning nirya talinamla ara, apia unamle.” Daniel birye nyabuk.
Wininamak bukni, weik Erena Ulul Deiyoknye, Allah arye aning-aning nirya deice tam ulirye, elce wibuka deiamukba, el mapu koproba ati ara, ‘Sikce na talinun ning nirya, pia talinamak’ tenen, ninye deiyok ning arepnamle. Areplyopura, el mapu arye, adeiyok ning dobuka, talibikirye unamaka ara, pia ati, sik kam unamak ara, min kum dipnamake,” nyapnuke. Ayupu ara, im deice unmoknye birye, na Daniel ati, nyabuka laka nyapnuke.
Akam ning arye, Allah el mapu tuba onmokbuk, sirya talak ara, minop talak arye, Kam Ulamuka ani, Pia Tuba Kam Unamle Deiyoknye yayuk. Yayukce, weik Erena Deiyoknye Allah, aning-aning nirya deice tam ululnye, elce wipdeiamukba, el mapu nang ati, ‘Na mapu, sik tonok ara, pia dipkoprob unamak’ tenen, ninye yupu bokeibuk. Nyabuka deice arye, dumbarye kam ulamuk ning ati, oplobuk. Amalye deiyoknye oplobukba, atalak arye dipdongobuka, doryanamuk talak ara, weik Erena Deiyoknye, el mapu aning-aning nirya talibuka, ninye deiyok ninye ulamikce, Allah talinamle ning nirya talibuka ulamikba, eipse.
Winipnamak talak ara, tukwak im sirya, mutuku sirya nirya, ninye deiyok kibuka, talinyak nang nirya ap, sik si erena ati kinyak ning ap, sik mikip deice arye, tukwak mutuku talinyak ning ap nirya ara, im deice nang dopdobikirye, Weik Erena Deiyoknye, aning-aning talibuka, mikip weik ulul Allah ara, el mapu amu tam deipnamake. Winibicopura, Allah el mikip weik deice aryuk, aning-aning nirya talinamle. Winipnamle talak ara, pia ati, min kume kum danamle. Allah aning-aning deice tam ulirye, Weik Erena Deiyoknye, mikip arye talinamle ning nirya ara, pia aunamle. Min kum kum danamle. Yuk deiyok nang nirya ara, el amu tamuk ubikirye, el siuk erebuka si erenamake. El nyalul yupu nirya, moubuka kekebikirye, aninguk wininamake. Im deice anye birye, na Daniel biti nyapnuke. Daniel arye nyabuk. “Ara, aning-aning nirya eipmase talak ara, mining dam tikmoknye dam bisirye, ‘Aning nirya nong laka nyapnilyame,’ nyabuka moropsiba, laka nyabukba kekepse,” Daniel birye nyabuk.
Winipmanto ara, ninye arye yala teleb ning, tuku telebak dokikiba, teleb ubuka palamle touk, na Allah arye, Israel ninye bobuka, teleb mutuku noutam deipnirye, pia teleb ubuka kalikuka melinamne deice arye, pia telebuk unamake. Minop talak ara, Israel ninye ati, bico tenena kumce bataklamsirye, kum melilamsa ati, ninye yuk nang nirya arye, Israel ninye ati, “Se, Allah arye aninye bico kum tenelula anya arye, sikti, ‘Lo-Ruhama,’ nyanamabe,” nyalamik. Bukni, narye Israel ninye, tonap tuba dobuka, teleb kipdeipnirye, anggunti bico tenenamsine. Aning atonun, minop talak Israel ninye bataklamsiba, yuk ninye nirya arye, sikti, “Se, aninye ara, Allah el mapu dipkoprob kum unyaka anya arye, ‘Lo-Ami,’ ” nyalamik. Minop talak nyalamik bukni, aminyan talak ara, na Allah arye Israel ninye ati, “Dipkoprop wini talak ara, anggunda na mapu koprop ululume,” nyanamsine. Nyapsiniba, anggun Israel ninye arye, nati tamubuka, “Dipkoprop, Allah, anda nun ni Allah ulyame. An tonok usilyama ati, an si uk pia erenamabe,” nyanamake. Allah arye nyabuk.
Amutuku malye kibuka dopropnamaka deiyok nang arye, Yerusalem mutuku tamubuka welepnamake. Esau birye deiamukba, dadeipdanin yangalamik nang, Edom mutuku unyak nang ati, adeiyok nang arye, olbinamake. Winipnamak talak ara, Yerusalem mutuku nang arye, Edom tam nang nirya ati, binuka oplopnamake. Winipnamaka ati ara, dipkoprob ning ara, nara Allah Yahweh, amutuku-amutuku nirya ara, sik Deiyoknye kipnirye, atam nirya talibuka unamne. Ayupu nirya ara, Allah arye, nabi Obaja biti, yanuka lengdar deice arye, laka nyapdeibuk.
Na mapu koprop ara, yuk mutuku ninye arye obuka dopropsikce, sik mutuku koproba bobiyikba, pera mutuku noutam binuka daulamika ani, wini tuba daunyakce, wini talak ara, mikip pia kumce, mitang asa unyak bukni, daulamik ninye nirya ara, mitik tonun dem tuba daunyak bukni, narye ila tamubuka weik kipdeipsiniba, anggunce deipmunyeba, dadeipdanin banamak nang nirya ara, pia weik upra banamake. Winipsinye talak ara, mikip weik ninye unamlume. Winipnamsen talak ara, na anggun ni koproba Allah ara, Sion mutuku deice unirye, anggun talinamsine. Narye anggunti, “Winibuka unamlume,” nyasiniba, pia aunamlume. Tonap tuba pia kum bataknamsine.
Aning nirya akunum winiplyeura, atalak ara, Allah Yahweh arye, mutuku sirya, im sirya unyak nang ati, ninye deiyok kibuka, Raja ulirye, tukwak nang nirya talenamle. Atalak ara, tukwak mutuku nang nirya arye, biknamake. Ara, ‘Se, diba, nun ni koproba Allah ara, el tonok ulule. Allah el si Yahweh ara, eluk ululeʼ tenen, moubuka tenebikirye, el siuk erenamake.
Atalak ara, yuk-yuk mutuku, im sirya, mutuku sirya unyak nang nirya arye, Allah Yahweh damuk, bulubuka yanganamake. Ara, ‘Nun ap neika unamabeʼ tenen, atia. Sik anang babye, nara Allah, na mapu koproba kinamake. Wininamak talak ara, na Allah ap, sik nirya ap, amutuku noutamuk neika unamabe. Allah arye nyabuk. Nyabukba, nabi Zakaria birye, nyabuk. “Anggun nirya kekeplulume! Allah arye, ‘Aning-aning winipname,’ nyapdeipmasil yupu, nong akunum uplyopura, anggun nirya arye nati, biknamnulume. Ara, ‘Yo, elda dipkoprob Allah aryuk dopdeibukba, nun dam yanuka, laka nyapsuk touk, akunum unmal atiaʼ tenen, diba tenenamnulume. Nabi Zakaria birye, sik Israel tam nang ati, nyabuk.
Anggun Israel ninye arye, na si ati, ‘Elda mambul kume,’ tenenululum bukni, yuk pera mutuku ninye, im sirya, mutuku sirya nirya unyak ninye arye, natibuk ‘Se, Allah ara, mambul weiknye’ tenen, sikce nati si pia erekirye, nati kininyake. Ara, beren tam talak arye dipdongobuka, lukunyan noutamak babye, nati kibuka si ereninanyake. Wininyaka ara, dan mutuku do nirya, ninye mutuku-mutuku nirya arye, na si erena ati, nintong teleb ning, uku dongobikirye, si erenyake. Tonda, sik malye winin ning kilina ati, kam ning pia teleb ninguk, obuka arelyanganinyake. Na Allah Yahweh aning-aning nirya talibuka, im deice yin talin malaikat, sik deiyok ununye birye nyapsine.
‘Malye upnamak do?’ tenen, ‘Weik ikin winilden ning kum arepnamsilam’ tenen, moropkiyabe. Aning kum bukni, tonda, Pia Malye Uning Deiyoknye, ara Isa Mutuku Dongonye arye, ‘Malye ulisulul anya arye, malye winibibyak’ tenen, ‘Ance kalikuka disimince melinamsilam’ tenen, moropkiyabe. Ayupu nyabuka, Allah moronamlulume. Yesus arye el yupu kekenmek nang ati nyabuk. Nyabukce ayupu tonap nyabuk.
Mutuku-mutuku nirya weik ninye deiyok nang, Raja nang ap, ninye talinyak deiyok nang ap arye, mikip kibuka erebuka tikmakce, ‘Nun ni Allah ap, elce ninye mutuku-mutuku nirya lyeplirye, talinamle’ tenen, wibuka deiamuknye, ara, Mesias ap ati, ‘Opbisipnamap’ tenen, bulubuka wekmake.” (Mazmur 2:1-2) Nyabuka moronmek. Daud arye sekamuk yupu dobuka Allah moronmek nang nyabik deice arye ayupu ton moronmek.
Allah arye, el im deice pil don nang malaikat ati, ayupu nyapdeibukba, el amu tam talye pil don nang atonun unyak bukni, el Mi Kopropa ati ara, yupu yuk nyabuke. Allah arye el Mi Kopropa ati, nyabuk yupu ara, asukum deipnusine. Ara, Allah arye nyapdeibukba, Mazmur buku noutamak arye, sekamik yupu ara ani. ‘Anda Allah ulyame. Ance ninye nirya ap, aning-aning nirya ap talibuka, weik deiyoknye unamlam talak ara, an talipnamlam ning ara, pia kum dankunamle. Sirya dakna kum, pia aunamle. Aning-aning nirya talibuka, weik deiyoknye unamlama deiyok ara, pia teleb ubuka diksukumuk unamlama atia. Aning nirya talipmince, pia diksukumuk unamlame.
Lo tonap kum upnamsil bukni, tekbarye malaikat siryanye birye, el terompet nyapnulye talak noutamak ara, Allah arye, ‘Wininamne’ tenen, minop talak akunum tenyamuk bukni, duknyamuk ning ara, pil moubuka doplirye, sirya daknamle. Allah el pil don nang, ara el yupu laka len nang, sik nabi-nabi nang ati, “Na tenyamse ning sirya daknamne,” nyabuka laka nyalamuk touk, winira nong upmale,” nyabuka amalaikat arye nyabuk.
Isa Mutuku Dongonye ap, el malaikat ap, tukwak mutuku dopkwetebikura, im deice tam tonoknye birye ayupu weik arye nyabukba, kekepse. “Wini talak ara akunuma. Diba tenenlamikba, nun weit yapu atonun unyak ninye ati, Isa Mutuku Dongonye arye, ‘Anggunda malye,’ nyabuka, malye yupu anggun nong deice delisilirye, lululisululnye bira, akunum malye kibake. Isa Mutuku Dongonye arye, diba tenen nang nirya ati, keting noutam babye, lukunyan babye nirya ara, asum-asum nirya, Allah kekelulak tiklirye, “Anggunda malye,” ululume, nyabuka lululisulule. Bukni, elda akunuma. Tukwak mutuku akunum dopkwetepmake. Ati akunuma. Nun Ni kopropa Allah arye, el mapu nirya ati lyepnule. Wini talak aryuk Allah el weik mikip deice arye, aning-aning nirya deice tam ulirye, talipliba, aning nirya el amutamuk unamle. Tonda, Allah arye, ‘Ninye nirya lyepnamle’ tenen, dopdeipsuknye Kristus ap, el Allah ap arye aning-aning nirya talibuka unamdake.”
Malye winin ning tonok babye kum umince, anda Pia Telebnye ulyame. Ati ara, ninye im sirya, mutuku sirya nirya arye an ap, an si ap ati, ‘Se, elda weik mambule’ tenen, ilil ubikirye, “Allah anda pia telebe,” nyabuka an siuk pia erenamake. Tonok yala ninye babye, anti, ‘Dauplye,’ tenen, kum batakitinge. Ninye yala-yala nirya adiparyuk an siuk pia erenamkiake. Minop talak arye dipdongobuka, wini talak nirya noutamak ara, ance pia diksukum ubuka, dolamsulum pil nirya akunum lakak kipsilama ati, im sirya, mutuku sirya nirya noutamak arye, ninye ayala-ayala nirya an dam yakirye, an si pia erenamake.” Sik amekwen dam tikmek nang arye nyanmekba, kekepse.
“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.
Ayupu nirya Kekepsopura, im deice tam noutamak arye, ninye yupa pia weika arye, yupu weik arye nyanmekba, ayupu tonap kekepse. “Haleluya, nun nirya arye, Allah el siuk pia erenamabe. Nun Ni kopropa Allah pia telebuk ulule anya arye, el dirina ara pia weik ulule. Ninye Lyena Deiyok ning ap, weik Mikip Deiyok Ulul ning nirya ap, el deiceuk ulule. Elda Weik Erenanye ulula ati ara, nun nirya arye Allah el siuk pia erenamabe.
Nyabukopura, ninye yupa pia weika arye, yupu weik arye nyanmekba, alelim ara liman ap, mek onmalirye, weik lelim nyalamle touk, lelim ap nyanmokba, kekepse. Sikce nyabik yupu ara, ani. “Nun ni Allah ati, Haleluya, nyababe. Nun Weik Deiyoknye, nun Ni Kopropa Allah arye aning-aning nirya deice tam ulirye, Weik Eitamnye ulule. Yuk mikip ning aulul bukni, elda pia mikip weiknye ulirye, aning nirya el amu tam ululbuk elcuk talilule.
Aning eipsopura, aning ton eipse. Weik deiyok nang bun ning deice bukmek kili sal ton eipse. Allah arye aninye ati, yupu lepsisikuka bokolina deiyok ning akunum aribuk. Ara, ‘Yuk kili sal ati yupu lepsisikuka bokeibikirye, wenepnamak’ tenen, Allah arye aninye ati yupu lipsisikuka bokolina deiyok ning aribukba, deiyok nang bun ning deice bukmekbuk eipse. Tonda, minop talak Yesus ap, el yupu ap ati diba tenelamikce, Allah el yupu dobuka peterelamikba, yu nang arye, ‘Nun like’ tenen, sik ngang sekeltakalamik ninye, dib kanye weik aunmekak eipse. Aninye sik dib kanye nirya kam bukikce, keting tamun yupa weik 1.000 tahun deice arye, Kristus ap, sik ap arye, aning-aning nirya talibuka deiyok nang ulamikce talilamik. Anyapmasin ninye ara, talye ninye kume. Ara, Pia Malye Kam Ululnye ap, el urasin atonun ning ap ati, si kum erelamik. Tonda, anye el laka kilin ning, el nomor ara sik asok deice ap, sik taruk deice arye kum seklamik ninye ati nyapsine.
Malaikat dumbarinye birye, el terompet nyabuka deice lelim nyabukopura, adiparyuk keting ap, wala ap, kurya ap malye updeibukba, kunukuk. Ara keting ap, wala ap ara, nong tonok-tonok bukni, anoutamak bokukabukce, mitik tam kunukuk bukni, weik tam ara tuba teleb ubuk. Kurya ara, yupa weik uamuk bukni, winilye atonun bokukabukce, mitik tam kunukukce, weik tam ara, tuba teleb ubuk. Keting ap, wala ap, kurya ap bokuka, mitik tam kunukuka deice arye, keting noutam babye, lukunyan babye, mitik talak ara, dirin kum kibukce, pia kunukuk. Ton talak ara, dirin tuba ubuk.
Aminyan ara, malaikat pamunye birye el terompet deice lelim nyabukba, im noutamak arye tonok weik kurya ton, tukwak mutuku sakukba, eipse. Akurya sakukce, malaikat atonun dayukba, Allah arye buplan kukne ning kunci aribuk. Akunci aribuka ara, tukwak mutuku noutamak tuku pum bisik weik telenga balamuk tam, el deice tam buplan tirikamuk ning kukne ati, akunci aribuk.
ကြော်ငြာတွေ