Ayupu ara, mikip arye nyapmarik bukni, Lot bira, ‘Binun do, kum do?’ tenen, teniltonauk unmok ati, sik Malaikat nang arye Lot ap, el kil ap, el kilmapu bitinye ap, sik taruk talipdakuka, anyasik batakuka, amutuku buru tam bobuka bobirik. Ara, Allah el si Yahweh arye, Lot ap, el mapu silip ap ati, ‘Minopce kum opnaman’ tenen, lo arebuka anya arye dobuka bobirik.
Ulangan 7:8 - Eipomek8 “Allah arye anggunti, wipdeipsuka deiyok ara, ‘Anggunda ninye weik unyaka ati ara, wipnamne,’ kum tenelamuk bukni, deiyok ara ani. Ara, elce tuba bico tenyamsukce, elce anggun apu yapu ati, ‘Wininamsine,’ nyalilamsuk yupu ati, tuba tenelirye, anggun wini talak ululum ninye ati, wipdeipsuke. Minop talak, ‘Wininamne,’ nyabuka, akunum nyabuka ati, Mesir mutuku noutamak ikin weik ulamsuk buk, dobuka lyepsuke. Mesir mutuku weik deiyoknye Firaun, el mikip weik kibukce, anggunti taleamsuke. Winilamukce, ikin pil weik, anggun apu yapu nong deice delilamukba, ikin weik ulamik. Winibuka ulamik bukni, Allah el mikip weik deice arye, lyepsukce dobuka boyasuke.” အခန်းကိုကြည့်ပါ။ |
Ulangan 7:8
44 ပူးပေါင်းရင်းမြစ်များ
Nara, oldan nang noutamak ulamsebuk, Allah arye nati, tuba bico tenelamnukce, kanye deiamnuka anya arye, lyebuka dopropnukce, pia telebak deipnuke. Weik pala mutuku noutam tikikiba, malye ning tonok ning babye, nun dam kum yanmanto ulye touk, Allah arye, na dobuka teleb mutuku deipnuka ati, kanye deibuka telebuk unune.
Ati ara, an ni koproba Allah, el si Yahweh ati, ‘Elda pia telebe,’ nyapne. Allah arye, kanye deiamkukce, anti ‘Israel ninye sik weik deiyoknye kipnamle’ tenen, wibuka deiamkukba, Israel ninye talilyame. Allah el si Yahweh arye, winibuka ara talye ati kume. Ara, Yahweh arye Israel ninye ati, bico tenelamukce, tuba tenelul deice arye, an wipdeikukba Israel ninye sik ninye deiyoknye Raja akunum ulyame. Wipdeipkukce, ‘Anye wininamle,’ tenyamkuka ara, ‘Israel ninye, sik melina ati, dipkoprob ninguk pil dopra, sik wininamak touk teleb ubuka yupu bokolina ati, teleb upnin banalame,’ tenepkukce, wipdeikuke.” Syeba mutuku deiyok kil arye, Raja Salomo biti nyabuk.
Aning ara yuk yupu ton kume. Ara, Allah el si Yahweh arye, “Winipnamsine,” nyalin yupu deice arye nyapdeiamuk ning ara, nun apu yapu Abraham ap, Isak ap, sik dam ara, ayupu nyapdeiamuk. Allah Yahweh arye, “Winipnamsine,” nyalin yupu ara, Abraham el dam nyapdeiamuk. Aning atonun ton, ayupu ara Abraham el mi Isak deice yanuka dukdongobuk. Ati ayupu ara, Allah arye apia tuba tenelule.
Nyabukce, aning ton nyabuk. “Ati ara, ani koprop, ance si erelyam Allah, Yahweh ara, pia telebnye ulul ati, ninye nirya arye, elti, telebe nyapting, tenepne. Ninye nirya arye, teleb yupu nyapmunyak arye, el siuk erenamlume. Allah arye anti, pia kanye deiamkukce anti, ‘Israel yala ninye nirya, sik ninye deiyoknye Raja kipnamle tenen, wipdeiamkukba, sik Israel mutuku ninye taliplume. Allah el si Yahweh arye winibuk ning ara, talye ati kum winibuk. Kume, ance si erelyam Allah Yahweh, sik Israel yala ninye ati, bico tenelamukce Sikda amutuku noutam pia ati unamak tenelamukce, wini talak babye tuba tenelul deice arye, an wibuka deipkukba, Israel ninye sik deiyoknye Raja akunum ulyame. Wipdeipkukce Anye bira, wininamle, Israel ninye sik melina ati, dipkoprob ning pil dobnin balyakarye, sik winilamikce touk, teleb kibuka yupu lipsisikuka bokolina ati, deiyoknye kipnamle. Tonda, diksukum ninguk talebuka, pil donamle,’ tenyamukce, wibuka deipkuke.” Ayupu nirya ara, Syeba mutuku ninye deiyok kil arye, Raja Salomo biti nyabuk.
Ara, nunti areamsulum mutuku noutam ara, an Allah ati, kum bikamik nang ulamikce, amutuku nirya talilamik bukni, yuk-yuk yala nang nirya ara, Allah an taruk koproba aryuk, anang yakuka dopkwetalamukba, sik nirya balolamik. Bukni, nun Israel yala nang nirya ara, nun apu yapu arye dobuka, amutuku noutam arye, mikip kipdomunce, asukum diamlume. ‘'Amutuku noutam ara, Allah ance, nun apu yapu teleb kibuka, asukum deiamlum bukni, sik yuk-yuk yala nang nirya ara, sik nong deice, weik imun ning delilamukba, sikda, ‘Se’ tenen, amutuku batakuka bindobik. Winilamlum bukni, nun Israel yala nang nirya ara, lobukapsulumce, lyepropsulume.
Aning ara, talye ati kum nyapne. Deiyok ara, Allah el mikip deice arye, amutuku-amutuku nirya obukabikce, alubuka doprobik. Winilamik bukni, sik taruk mikip aryuk, amutuku nirya, kum dopromik. Aning atonun, nun apu yapu, sik mikip ap, sik taruk ap arye, amutuku nirya ulamik nang ara, min obuka, sirya daklamikce, amutuku nirya kum alubuka dopropmik. Aning dem kum bukni, Allah an koproba taruk mikip deice arye, nun apu yapu meliamlum mutuku nirya, alubuka dolamik. Tonda, an babye, nun apu yapu dam ulamlumce, sikti, kanye delilaluluma deice arye, Israel nang meliamlum mutuku nirya dopromik. Winipmanto ara, an dirina weik, sik deice deiamlumce, sikti, pia teleb kililamlume. Ara talye ati kume. An Allah arye, nun apu yapu ati, kanye delilyama deice arye, sik meliamlumba, amutuku dopromik.
Winilamunyeba, doyanamle talak ara, anggun mapu arye, “Awinilamunye ning nirya ara, yata deiyok ati winilulum do?” nyabuka asipsicopura, anggunce tamubuka anggun mapu ati nyanamlume. “Kume, aning ara, nun Mesir mutuku noutam ulamupubuk, sik Mesir mutuku nang arye, ikin weik pil dilamsikba, talye piluk dolamupu bukni, ‘Allah Yahweh, el taruk mikip deice arye lopdeipsukce, lyebuka Kanaan mutuku boyanamsuk ning’, tenena ati wininyabe,” nyanamlume.
Nyabukba, Musa tamubuka Israel ninye dam yayukce, ayupu nirya Israel ninye ati, nyabuk. Asum ara, nun ni koprop Allah Yahweh, el taruk mikip deice arye, Mesir mutuku ikin kanye bobuka ulamlum talak arye, akunum lyebuka lopdeiamsuke. Ara, Mesir mutuku ninye arye tapu koubukapsikce, ikin weik pil pia, anggun nong deice delilamsikba, ikin piluk talye dolamlum bukni, Allah arye lyebuka lopdeipsuke. Ati ara, ‘Asum arye aning nirya pia tenenamapʼ tenen, keting tamun nirya ara, asum arye anggunce, ‘Kume nunda Mesir mutuku ulamupu talak ara, ikin weik pil pia weik tonun dolamupubuk, Allah Yahweh el mikip weiknye birye, lyebuka lopdeipsukce, boyanamsuka ati, pia teninamapʼ tenen, wininamlume. Ati, aning ara, asum arye pia tenenamlume. Aning tenina ati, asum arye, roti kwaning nen ning ara, pia kum dinamlume. “Allah arye nyapdeipmasile,” nyabuka, Musa birye, Israel ninye ati nyabuk.
Musa birye nyabukce, ayupu ton dukdongobuka, Allah ati nyabuk. Na nio, an mapu Abraham ap, Isak ap, Yakub ap ati, ‘Wininamsine,’ nyabuka, nyalin yupu nyalamlum ning ara, ila tuba teneipdenulyame. An si koprop deice arye nyalamlume. “Anggunda, ‘Na ninye pia unamlume’ tenen, narye anggunti, wipdeiamsise. Anggunce deipmunba, anggun mapu arye deipdanin banamak ninye ara, pia weik arepnamsine. Arepnamsin ninye nirya ara, yupa pia weik unamak ati, kum nukmanto unamake. Kurya im deice yupa weik tiklamla atonun unamake. Tonda, na nyalamsise atonun, ‘Awiniryuk mutuku nirya arepsiniba, anggunce amutuku pia talibuka, anoutam anyuk pia unamak,’ nyabuka nyapdeiamsulum ning ara, luba kina kume na nio,” Musa birye Allah ati nyabuk.
Ati ara, Israel nang nirya ati, nyapnalame. Allah arye nyasulule, “Nara anggun ni koproba Allah, na si Yahweh unune. Na mikip deice arye, Mesir nang anggun nong deice ikin pil weik disinyak noutam ara, lyepdopnamsine. Ara, na mikip ap, mambul weik ning winipnamne deice arye, Mesir nang wenebuka opnirye, lyepnamsine.
Winipsa deiyok ara ani. Narye anggun Israel ninye ati, pia bico tenesunune. Na kanye ara, anggunda ‘Naʼ tenen, ninye ululume. Anggunda akunum wipdeiamsa ati, narye lukparabuka wenebuka kum oplopsise bukni, anggun pununa ati, yuk pera mutuku ninye wenepsirye oplopse. ‘Israel ninye tuba kam unamak’ tenen, yuk mutuku ninye weik, punubuka wenepse.” Allah arye nyabuk.
Allah bico tenelamsukce, ‘Israel ninye lyenamne,’ tenelamsuka ati, Israel ninye nun dam ikin ning yangalamsukba, ikin weik ulamupu talak noutam nirya ara, el babye ikin kanye bolamuk. Winilamuka ati, ikin ulamsuk bukni, lyepsuk ning ara, ara el dam ulamuk malaikat dopdeipmokba, kum lyepropsuke. Tonda, yuk melin nang ton dolilamukba, kum lyepromsike. Aning kum bukni, nun ikin ulamsuk ning nirya ara, Allah elcuk lyelolamsuke. Allah arye, ‘Na mapu bicoe, minopce kum wenepnamne’ tenen, melibuka lyelolamsuke. Minop talak keting tamun yupa weik noutam nirya, Allah arye nun apu Yapu Israel ninye ati, melibuka bobalamsuke.
Israel ninye arye, ‘Se, nun telebak utibye’ tenen, engebuka dilamik ninye ara, morolamikba, na Allah ara, pia weik yukak ulamse bukni, sik dam lak kibuka yanamse. Sik ti nyapse. Ara, se anggun Israel ninye ati, minop talak arye anggunti, pia bico tenelamsisirye, kum bataknamsine. Ati, wini talak arye dipdongobuka, doyanamle talak nirya ara, anggunti bico tenesinirye, pia kalikuka, tuba melinamsine.
Ati ara, an nabi Yehezkiel biti, an deice nyapnukin yupu bobuka, sik Israel ninye ati nyalbinamlyame. Na Allah Yahweh Weik Eitamnye birye, aning-aning nirya talibuka, deice tam, Weik Erena Deiyoknye ununa ati ara, na tenenye touk wininune. Narye anggun dam ton winipnamne ning ara, anggun Israel ninye melina ati kum winipnamne. Anggun Israel ninye ara, anggun balalum mutuku noutamak nirya, malye weik ulamlumba, yuk mutuku ninye elilamikce, na malye una pia kumnye si ati, malye yupu nyabuka, malye ulininyake. Na si ati malye nyaninyaka ati, sik nirya arye, ‘Se, Allah elda weik mambulnye,’ tenebikirye, ‘Kel biknamniyak’ tenen ati, narye weik mambul pil donamne.
Anggun ton teneipdelulume. Narye anggun Mesir mutuku ulamlumce, pia ikin pil dolamlum noutam ara, narye lyebuka boyanamsise. Mesir mutuku ninye arye, anggun Israel ninye nirya ati, tapu koubuka deiamsikce, pia ikin pil dilamsikba, na Allah arye lyepropsise. Tonda, atalak noutam nirya ara, anggun melin ati, narye Musa ap, Harun ap, Miryam ap, dobuka deiamsirye, sik deice mikip weik arelamsiba, sikce deiyok nang kibuka boyangalamsike.
Allah an mapu koprop ara, Abraham arye deiamukba, dadeipdanin balamik nang, nun Israel yala ninye ati, tenepsimince, bico upkiliba, tamubuka lyepnamsilyame. Tonda, nun apu koproba, Yakub birye deiamukba, dadeipdanin balamika ani, deiamsik Israel nang ati, tenepsimince, bico upkiliba tamubuka lyepdopnamsilyame. Ara, minop talak ancuk, nun apu yapu nang ati, nyalin yupu deice arye, “Wininamsine,” nyapdeiamsulum touk, wininamsilyame. Pia kum bataknamsilyame. Ance nun apu yapu nang ati, “Wininamsine,” nyapdeiamsulum ning nirya ara, kum bataknamsilame. Aning nirya ara, dipkoprob pil donamsilyame. Aminyan talak babye, nun dam teleb winilinamsilyame. Ayupu nyabuka, nabi Mika birye Allah ati, nyabuka morobuk.
Deiyok ara, anggun ni Allah Yahweh arye, aning-aning talibuka, eitam erebuka, Pia Mikip Weik Deiyoknye unirye, anggun kan-kan noutam arye, pia kalikuka melinamsine. Anggun mal olan nang ap, ikin ning yanuka, ikin usulul ning nirya ara, naryuk obuka, sirya dakanune. Anggun dobuka, deice tam erebuka, tupa teleb kipdeipkamsene. Tonda, anggun Israel yala nang ara, na amu tam ululumba, na Allah arye anggunti, kanye deipsinirye, na kanye kil-kil deice arye, teleb kipdeipnamsine. Tonda, na Allah arye, anggun nirya ati, kanye delisununa ati, anggun wini talak, ikin usulul ning ap, minop talak kum dasuk ning ara, na Allah arye anggunti, ila tamubuka, teleb kipdeipsinirye, winiryuk kam un ning arenamsine. Anggun Israel nang ara, na mapu koproba ululuma ati, anggunti tenepsinirye, teleb kanye deibuka, weik yupu deice arye, kanye kil-kil mot ton nyanamne. Allah arye nyabuk.
Allah Yahweh arye, el mapu Israel ninye nirya ati nyabuk, “Narye anggun nirya ati, bico tenesunune. Bukni, anggun Israel ninye arye tamubuka, Allah nati nyanululume. ‘Kume, Allah Yahweh anda nunti yata ning winisiminya deice arye bico tenebuka melisilyam do?’ nyabuka asinululume. Bukni, na Allah Yahweh arye tamubuka nyapsine. Ara, Esau elda Yakub el weit koproba ulamuk do? Narye Yakub elti, weik arye se bicoe tenelamsirye, weika arye melilamse do, kum do? Kume, weika arye melilamse.
Ati ayupu ton nyapsine. Sik Israel yala ninye arye, Allah el laka teleb yupu, ninye lyena yupu bataklamik ati ara, Allah arye, ‘Sik Israel ninye ara, na like,’ tenelule. Bukni, Allah arye, “Aninye ara, ‘Na’ tenen ninye, na mapu kopropa unamake,” nyabuka, Israel yala ninye wiamuk ning ati ara, Allah arye sik aninye ara, tuba bico tenelule. Winilula deiyok ara, Israel ninye sik ayupu yapu ati, “Wininamsine,” nyabuka, nyalilamuk yupu tuba tenelula anya arye, pia kum bataknamle.
“Teneipdelulume. Amutuku-amutuku nirya ara, narye akunum arepmasina ati nyapsine. Allah, na si Yahweh arye anggun apu yapu Abraham ap, Isak ap, Yakub ap ati, ‘Aminyan talak, amutuku nirya arepnamsine,’ nyapdeipsa ati nyapne. Tonda, nyapse. ‘Anggunce deipmunba, anggun mapu arye, dadeipdanin balamica ani, aminyan deipnamak mapu ati, amutuku nirya arepnamsine,’ nyapdeipse. Ati, narye, ‘Anggunda amutuku binuka unamlulume,’ nyapdeipse mutuku uk, wini talak anggun bimunce, talibuka unamlulume,” nyapsine. Allah arye, Musa biti nyabukba, Musa birye Israel ninye ati, laka nyabuk.
Anggun ni koproba Allah, weik mambulnye ululce, anggunti wiamsuke. Tukwak mutuku noutamak ara, ninye yala-yala weik daunyak bukni, Allah arye, anggun apu yapu ati, bico tenebuka wiamukce, melilamukba, dadeipdanin yangalamika ani, anggun wini talak upre yangalulum ninye babye, ‘Na mapu pia unamak’ tenen, wipdeipsilirye, melisulule. Yuk nang ton kum wipdeiamuk, anggun uka. Arup babye, elce anggunti, aning tuba tenesulule.
Anggunce, sik Amon mutuku nang ap, Moab mutuku nang ap ati, anggun wininamlum ning ara, ani. Atalak arye dipdongobuka, doyanamle talak nirya ara, pia ati, sik amutuku nang ara, sikti, pia kum melinamlume. Tonda, ‘Sik amutuku nang teleb-teleb kibuka winibikirye, kanye deibuka unamakʼ tenen, sik anang ati, teleb kipdeipmunyeba, kum wininamake.
Dipkoprop, Allah elda, ninye tukwak ninye ati, bico tenelule. Allah arye, pia diksukum ninye nirya ara, el mapu kibice nang ara, elce talibuka melilule. Sik nirya ara, Allah el yan dam gutam tuku dipdongobuka, el si erenyake. Tonda Allah arye, ‘Wininamlulume,’ nyapdeiamuk yupu ati, dib tenebuka talibikirye, dobolbanyake.
Aning nirya ara, talye ning ulul bukni, anggun Israel ninye tonok ara, Allah arye akunum wipdeipsukce, ‘Na tenena ninye’ nyabuka, akunum nyapsuke. Tonda, ninye arye besi do, emas do, ‘Malye ning kum dalirye, teleb ning pia upnamle’ tenen, uku dalamikiba, uku diplirye, malye ning kum danalule. Aning atonun, Mesir mutuku noutamak, Allah arye anggun Israel ninye malye winin ning ati, kilipsukce, ‘Winira, anggunda diksukum ninye unyake,’ nyapdeipsukce, teleb ninye uk kipdeipsuke. Teleb kipdeipsukce, Mesir mutuku noutamak arye, ikin weik ulamupu buk, dalubuka dobukapsukce, lyepsuke. Wini talak, anggunda, el ‘Naʼ tenen, ninye akunum ululume. Allah arye anggunti, ‘Na mapu’ tenen, melibuka pia talipnamsile.” Musa birye nyabuk.
Aning atonun, anggun kel do? Dan mutuku ninye ati, yuk mutuku ninye talilamika noutamak, Allah arye dalubuka lyebukce, yukak bobiyuk do? Bukni, Allah arye anggun Israel ninye ati, Mesir mutuku noutam arye lyebuka boyanamsuka deiyok ara, ‘Israel nang, ‘Naʼ tenen, ninye unamak’ tenen, winibuk. Kume, yuk ninye nirya ara, ‘Allah arye aning atonun winipsuke,’ kum nyaptinge. Anggun Israel ninye uka. Allah arye aning winibuka deiyok ara, ‘Israel ninye ‘Naʼ tenen, nang unamak’ tenen, winibuk. Tonda, Allah arye anggun Israel ninye ati, Mesir mutuku noutamak arye dalubuka dobukapsukce, lyepsuk talak ara, winilina ap, ninye kum winipmanto ning ap, im deice mambul pil dona ap, ninye olana ning ap, el bidamang mikip weik kina ap, el taruk koproba arye mikip weik pil dolamuk ning ap, anirya deice arye, anggunti dalubuka lyepsuke. Aning babye, weik mambule. Aning-aning nirya ara, anggun ni koproba Allah, Yahweh, el bidamang taruk arye, mikip weik ning winibukba, ninye nirya ilil weik ulamukba, anggun Israel ninye arye, aning-aning nirya ara, anggun bidamang asing arye elilalumce, akunum kel bikamlume. Aning ara, weik mambule.
Tonda, Allah arye anggun apu yapu ati, bico tenelamuk deice arye, sikce delilamik mapu, anggun Israel ninye ati, akunum wibuka deipsuk. Ara, ‘Aninye ara, na dokola ninye unamak’ tenen, wibuka deipsuk. Winibukopura, Allah el bidamnye arye Mesir mutuku yayukce, el mikip weik deice arye, Mesir mutuku noutamak arye, anggun dalubuka dopromsukce, asukumuk boyasuke.
Anggun ni koproba Allah, el si Yahweh arye, minop talak anggun Israel ninye ati, akunum wipdeiamsukce, ‘Anang ara, ‘Naʼ tenen, ninye,’ akunum nyamsukce, tenesilya atia. Ati ara, anggun ni koproba, Yahweh arye, pia kum bataknamsile. El si pia weik mambul si ulula anya arye, ‘Yuk yala nang arye, na si malye kipnicak’ tenen, elce pia kum bataknamsile.
ကြော်ငြာတွေ