Tonok talak ara, ninye tonok ton, mutuku si Bahal-Salisa arye, Allah el pil donanye, nabi Elisa dam yayuk. Ara, anye birye Elisa biti, gandum winiryuk teikmok ning ap, atonun roti kwaning dua puluh ton yanuka arebuk. Aroti ara, aketing tamun deice arye, winye yukuka lipmok ning arye, agandum winiryuk ning memepmek ning ap, bobinuka aroti dapdeibukce, Elisa biti arelyayuk. Winibukopura, Elisa birye, el melinanya biti, sik nabi-nabi nang ati nyabuk, “Aroti bokuka abukmak nabi-nabi nang ati, arepmunba sik dipnuyake,” nyabuk.
Ulangan 26:2 - Eipomek2 Daulamunya ani, wa wiamunya min yuma mouplye ning ara, yuma ning nirya ara, libukapmunce, Allah ati arelbanamlulume. Allah arye arepnamsil mutuku noutam koupmunba, moupnamle yuma ning nirya ara, aling arye libuka arepnamlulume. Arepnamlum sukum ara, Allah el si Yahweh arye, ‘Asukum ara, na si seknamne. Na si eren aik ara ani,’ nyabuka wiamukce, nyapnamsilakuk, arelbanamlulume. အခန်းကိုကြည့်ပါ။ |
Ulangan 26:2
33 ပူးပေါင်းရင်းမြစ်များ
Ura, Raja Hizkia birye, “Wininamlume,” nyabuka, amutuku nang ati yupu akunum nyapdeibukopura, Allah ati aren ning nirya ara, Israel nang, sikce Allah el si eren aik dam boyanaba, imam nang arye anyaik pum noutamuk delilamik. Aboyangalamik ning ara, sik wa wibuka koulamik ning, nong minop upni ning nirya ara, pia teleb ninguk wibuka boyangalamik. Aning ara ani. Terigu duk ap, anggur duk teikukabikce, kanye wangalamak anggur mek ap, minyak zaitun ap, mong el mek ap, arelyangalamik. Tonda, yuk-yuk yala ning wa wilamikce, koubuka lilamik ning nirya noutam arye, minyuma ning takubarye persen (10%) ton bokuka kintinipnarye, aning nirya ap, Allah si erena ati, boyanuka arelamik.
Ura, atalak ara, sik Israel ninye nirya arye, Allah el si erena ati, arelyangalamik ning ara, weik ulamuk anya arye, aning delin aik kalikna deiyok nang ton wipdeibik. Ara, sik Israel nang arye wa wibuka koulamik ning, minop fabuka nong ulamuk ning ap, sik wilamik ning min yuma ning minop delilamik ning ap, tonda, ‘Nun ni koprop Allah ati, telebe nyapnuyap’ tenen, arelyangalamik ning ap, Allah el si erena ati, anyaik delilyangalamikba, anang arye dopropna arye, anyaik deibuka kaliklamik. Aning winilamik ning ara, ani. Sik ulamik mutuku dana-dana nirya, wa wibuka koulamik ning, akunum duk moulamukba, winiryuk ning lipnopura, Allah el si erena ati arelyangalamik. Winilamik ning ara, Allah arye el mem yupu nyapdeiamuk noutam arye, ‘Na si eren aik pum pil dona deiyok nang ap, sik amu tam pil melin nang, Lewi yala nang ap, sik patan ning melina ati, aning-aning nirya anoutam arye bokuka, boyamunce arenamlume,’ nyapdeibuk. Ati, Allah arye nyapdeiamuk touk, arelyangalamik. Sik Yehuda tam ulamik nang nirya arye, Allah el si eren aik pum pil dona deiyok nang, sik imam nang ap, tonda sik pil melin nang, Lewi yala nang ap ati, kanye deibuka bico tenelamika ati, Allah arye nyapdeiamuk touk, sik ning ayala-yala nirya, tagu barye arye diprongobuka utam kintinip deipnopura, noutam bokuka tonok ning dobuka, Allah ati arelyangalamik. Ara, seper sepuluh (10%) nyalamak ning, bokuka arelyangalamik.
Narye, “Winibuka wininamlume,” nyapdeiamse ning nirya, akunum kintinipsopura, ‘Sikce apil donamap, tenebice talak uk donamak’ tenen, kintinipse. Ara, ‘Amutuku unamak ninye arye sik wininamak ning nirya delilyakiba, uku dongonamak’ tenen, narye yo nirya akunum kintinibuka deipse. Tonda, ‘Amutuku ninye arye sik ning min yuma ning nirya boyakiba, sik imam nang ati arebikiba, Allah el si erena ati, uku dongonamak’ tenen, narye kintinipse. Winipse ning ati Allah moropsirye, “Na ni Allah na winipman ning ati, ance kum luba kipnamlyame. Pia tenenamlyame. Winibuka tuba tenenimince natibuk bico tenebuka na dam aunmince, teleb kibuka melinamnilame,” nyabuka moropse. Na Gubenur Nehemia birye nyapse. Akunuma.
Nyabukce, ayupu tonap dukdongobuka nyabuk. Na Allah, na si erena ati, kam ning obuka uku dongonamlume. Wininamlumak ati, anggun minopce tuku dobuka, taplak deipmunyeura, na si erena ati, kam ning obuka arenak kintinipnamlume. Winipmunyak ara anggunce, domba basam ap, sapi basam ap, obuka boyamunyeura, ‘Nun malye wininyap ning ara, Allah arye namin kipsilirye, teleb kilinamsil tenen, uku dongolyanamlume. Tonda, ‘Allah ap, nun ap teleb kibuka neika uberye, el uk melinamsil tenen, kam ning obuka, tuku arye kintinepnamlum ning deice uku dongopmunba, uku diplirye siltong teleb ning na damak welebiliba kekepnirye, anggunti, na kanye delinamsine. Ara, narye anggunti, ‘Aning ara, anggunce na si erena ati, kintinip deipnalumak ara, aninguk deipnamlume,’ nyapnyeura, amutuku nirya ara, na siuk tuba teninamnulume. Anyapmasin touk akunum winipmunyeura, nara, anggun damuk yanganirye, anggunti teleb kilinamsine.
Anggunce talibuka ululum ning ara, anggur tapu duk mek ap, jagong atouk ning, el si gandum ap, minyak zaitun yo duk mek ap, aning nirya ara, noutam arye bokuka, na anggun ni koproba, Allah Yahweh, na atibuk bokuka, arelyanganamnulume. Tonda, anggun sal mapu min yuma winiryuk deipmunye nang nirya ara, batakna kume, adiparyuk na Allah Yahweh atibuk, arelyanganamnulume.
Tonda, anggun wa wibuka kouamunya, min yuma yongobuka lipmunye sum kiplyopura, ‘Nun ni Allah arye, arisulul ati ara, el siuk erenamabʼ tenen, asum akunum uplyeura, wa wiamunye Winye Ning libuka kwalipmunce, na si erenamnulume. Tonda, keting tamun akunum sirya daklye talak, anggun wa kouamunye ning sirya dakna ati, libuka deipnamlum talak ara, ‘Asum ara, weik sumʼ tenen, bai tam tia ati doltakan aik dopnamlume. Atalak ara, ‘E ara weik sum kipmaleʼ tenen, wa wiamunye ning libuka yana deipmunce, Wa Wiamunye Ning, Sirya Dakna Kwalya kwalipmunce, na si erenamnulume.
Aketing tamun, aketing tamun kinamle talak nirya ara, anggun wa wiamunye ning, min yuma ning pia telebnye ara, adiparyuk na Allah ati, na aik dam arelyanganamlume. Nara, anggun ni koproba, Allah Yahweh ununa atia. Tonda, domba basam tup do, kambing basam tup do, yupnamunye talak ara, sik nin yapu moum yung ap, tabakuka yuna meme, nyapsine.
“Aketing tamun, aketing tamun nirya, anggun wa wiamunya, min yuma ning ara bobuka, anggun ni koproba Allah, Yahweh arena ati, el aik arelbanamlulume. Tonda, ‘Kambing basam mi obuka, tup dapnuyap,’ tenepmunyopura, kambing basam tup ap, akambing el lin moum yung ap, tabakuka yuna meme,” Allah el si Yahweh arye nyabuk.
Nyabukce ayupu ton nyapdeipnuk. “Israel ninye ‘Anggunda ‘Naʼ tenen, ninye unamak’ tenen, naryuk wipdeiamsise. Anya arye anggunda, ‘Naʼ tenen, ninye ululume. Ninye arye wa wibuka koubikiba, kouamice ning nong upliba, weik arye kanye deibuka lilamak touk, narye anggunti minopce wibuka deiamsisa ati, narye anggunti weik arye kanye deipsise. Ati ara, anggunda na kanye deilin nang unyak tenesunune. Utenesununa ati, yata mutuku ninye do, yuk mutuku nang arye, anggun dam ikin ning deipsikirye, ‘Opnamap’ tenen, pirilamsika babye, narye aninye ati, kanye imun ning weik arelamsiba, imun kanye bobuka ulamik. Israel ninye ati, ikin ning deilisinyak ninye ara, narye sik anang dam, ikin ning sik nong deice deipseba, kanye imun ulamik. Aning ara dipkoprob na Allah Yahweh arye akunum nyapsine.” Allah arye nyapnuk. Yeremia birye nyabuka sekuk.
Aning ara, talye kum nyapsine. Deiyok ara, ani. Dipkoprob, ‘Naʼ tenen mutuku, pia teleb lek mutuku deice ara, Israel mutuku kon koproba ara, na mutuku ulula ati, pia lek diamuk teleb mutuku bukukak kon ara, sik Israel yala nang, diksukum unyak nang nirya arye, natibuk si erenamniake. Na amu tamuk ukirye, na piluk dolamnikirye, na siuk erenamniyake. Amutuku noutam ara, narye sik nirya ati, ‘Naʼ tenen nang, ‘Pia unamakʼ tenen, anggunti kanye pia delinamsine. Tonda, anggun arye, ‘Allah el si erenamapʼ tenen talak nirya ara, narye, “Winamlume,” nyapsiniba, anggunce, sik pia teleb aren ning bobuka, na si erena ati arelyanganamnulume. Atonun, anggun arye kam ning obuka, uku dongobuka, arelyanganalum ning ap, anggun kanye aryuk, ‘Allah ati arepnamabe,’ tenepmunce, nati arelyanganamnulum ning nirya ara, narye dopropnamne. Winipnamluma ati ara, narye anggunti, kanye deibuka, ‘Pia teleb tenenamsine.
Israel nang nirya arye, sik wa wibuka kouamikca ani, duk akunum moupliba, na si erena ap, ‘Telebeʼ nyana ap ati, nong linamak ning, yuk-yuk ning nirya, winiryuk ning, teleb weik ning ara, boyanuka arelyanganamnulume. Aning nirya ara, sik imam nang aryuk doprobikirye, dinamnyake. Atonun tonda, na arena ati arelyanganamak ning, yuk-yuk ning nirya ara, arepnikirye, tuba sirya bataknamak ning ara, sik imam nang aryuk doprobikirye, dinamnyake. Tonda, asum-asum nirya, Israel nang arye, roti kwaninguk dabuka dinamak talak ara, na arena ati, minop memepnamak ning ara, aning kan-kan arye bokuka, na arena ati, na si eren aik boyanganamniake. Aning babye, imam-imam nang, sik din atia. Aning lak nyapmasin touk, anggunce dipkoprob akunum winipmunyopura, narye sik Israel nang nirya ap, sik mapu silip ap, sik aik nirya ap, teleb kilinamsine.
Sik Lewi yala nang arye dopropnamaka tuku ara, noutam tuku mitik tonun ara, sikce, ‘Yuk ning dekelona ap dekdopnune. Akumopura, yo bok deice arye dekdopniba, yuk nang arye, atuku dopropnamake,’ tenena ara, pia meme. Aning ara, pia kum tenenamake. Yata nang do nirya, yuk Israel nang arye, atuku pia kum dopropnamake. Deiyok ara, atuku ara, na Allah Yahweh, ‘Naʼ tenen ninguk unulula ati, pia teleb lek sukum ulula ati, yuk talye nang nirya ara, pia kum doproptinge.
Anggunce, aketing tamun, aketing tamun nirya, wa wibuka koululum ning yala-yala nirya ansinibuka, weinye yubuka linamlum ning ara, noutam arye bokuka, mong mek ati, arelyangana telebe uka. Ara, min yuma ning aren talakuk arenamlume. Atalak ara, aning ara, arena teleb bukni, ‘Allah Yahweh arena ati, aning bobuka uku dongobibiba, nintong teleb ning welepliba, Allah kanye delinamle,’ tenena kume. Aning bitinye ara, roti kwaning nena deiyok ning ap, mong mek ap ara, bobuka yamunce, keil pala taplakuka yangabuka kintiniplum ning, el si mesba deice ara, uku yanuka kum dongonamlume.
Tonda winipmanto, anggunce yakong do, gandum do, wa wibuka kouamumnya ani, pabuka duk mouplyopura, aduk winiryuk minop wisiplyeura, dakmunce, ‘Allah el si Yahweh ati arepnune,’ tenepmunyopura, bola kopmunce, teikuka, teleb upmunye ninguk dobuka, uku buk deice dapmunce, deiamunye ninguk dobuka, Allah ati arelyanganamlume.
Winira winipmanto yupu deice nyapnusine. Ara, Allah el si erena ati, ninye arye weinye kwaning minopce yongobuka elti, aribicopura, aminyan yongonamak ning nirya babye, ‘Allah el ning uka’ tenebuka, aning nirya aribicopura, telebuk unamle. Winipmanto ning ara, yo yating ap, nong ap, telebuk uplyopura, aminyan ayo nong arye taruk kwa leklamle ning babye telebuk unamle.
Tonda, anggun Roma mutuku diba tenelulum ninye arye, Periskila ap, Akwila ap, sik aik pum, ‘Allah yupu kekenamap’ tenen, buluyak ninye, sik diba tenenyak ninye ati, “Paulus arye telebe nyapsuke,” nyabuka laka nyapnamnulume. Tonye el si ara, Epenetus, elda Asia tam noutamak unyak ninye kan-kan arye, minyuma deiyok koubuka diba tenyamuknye anya arye, elda na kanye delinanye ulule. El ti, “Paulus arye telebe nyapdeipmakile,” nyabuka nyapnamnulume.
Talye aubuk ninguk kum bukni, nun diba akunum tenebupuba, Allah El Dib Kanye areamsukba, nun talima talisiliba, unyap ninye babye, malye kanye bobuka mi deiyok dolamak touk, unyabe. Ara Allah arye el Dib Kanye minopce areamsuk ninye ubirye, nunce mambul kanye bobuka, ‘Se, Allah arye el mapu una ati kwaknapsuk ninye sirya dakna ara dan talak arye winipnamsil do? Nun ninye nong pununa ati, im deice nong pia teleb ning arepnamsila ara dan talak arye arepnamsil do?’ tenen, kanye deibuka kintinibuka dinauk unyabe.
Bukni, na kayapo, moubuka teniplulume. Arup nyapmasin yupu ara, Allah arye, Kristus ati, kum kam bukeiamtopura, weik kanye imun kanye boptibye, nyapmasin bukni, aning kum wininamabe. Dipkoprop ning ara nyapnusine. Ara, Kristus dibuk bukni, Allah arye kam bukdeibukba, wini talak ara, dipkoprop pia kam ulule. Ara, wa wibuka kouamikibuk, wisiplyopura, winiryuk kwaning minopce yongobuka libikirye, dilamak atonun, Allah arye, minopce kam bukeibuknye bira, Yesus aulule. Winiryuk kwaning minopce libikirye, bai kwaning aminyan lilamak touk, dib tenenyak nang akunum diamikca ani, aminyan ara, Allah arye, kam bukeipnamle.
Kam bukeipnamsil bukni, Allah arye, ‘Aning ara minopce, aning ara aminyan,’ tenyamsuk touk, aninguk wininamabe. Ara, Kristus ara, wa wibuka kouamica ani, wisiplyopura, winiryuk kwaning minopce yongobuka libikirye, dilamak touk, Kristus minopce kam bukeibuk. Winibuka anya arye, Kristus sirya talak arye, tukwak mutuku tamubuka yalyopura, elce talilye ninye ara, el na tenelul ninye anya arye, aminyan Allah arye, kam bukeipsiliba, pia kam unamabe.
Winibuka wininamlume. Minggu-minggu nirya, anggun Allah yupu kekena ati bulubuka weknamlum talak deice arye, anggun yuk-yuk bukni, anggun nirya arye, yo bok awapsilye ning awapsilye touk, noutamak arye bokuka, ‘Yuk mutuku dib tenebik ninye ati melibuka arenamap’ tenen, delinamlulume. Weika arye dololulnye bira, weika arye delinamle. Mitika aryuk dololulnye bira, mitika aryuk delinamle. Anggun yo bok awapsilye touk delinamlulum ning ara batakna kumce, pia arenauk unamlulume. Ara, na Paulus arye, anggun dam yanyopura, anggunce, ‘Se, Paulus yanmala anya arye, nun adiparyuk yo bok yata wiribuka bulupnuyap do?’ tenen, ‘Kanye imun upsilyak,’ tenena ati, nyapsine.
Tek barye minggu akunum nukdemunyeba, tekbarye akunum uplyopura, gandum winiryuk dakna ati, kwalin ning kwalipmunce, anggun ni koproba Allah Yahweh ati, ‘Telebe,’ nyabuka, elti, kibuka si erenamlulume. Allah si erepmunye sumuk, Allah arena ati, anggun kanye aryuk, ‘Aning ara arepnamabe,’ tenyamunce, kintinip deipmunye ning ara, boyamunce, arenamlume. Ara, Allah Yahweh, elce anggunti, teleb ubuka areamsilya atonun winibuka, weik tonun arenamlume.
Tonda, sik Israel yala ninye nirya arye, sik imam-imam nang ap, Lewi yala nang yuk nang nirya ap ati, gandum wa ap, anggur tapu duk wa ap, zaitun yo duk mek ap, min yuma wenye linamak ning ara, bobuka arelyanganamake. Tonda, anggun domba basam, potong winiryuk kopmunye ning ap nirya ara, sik imam-imam nang ap, yuk Lewi yala nang ap, sik dam anyuk arelyanganamlulume. Aning dobuka dinamaka deice arye, kam unamake. Ati, anyapmasin ning bobuka, sik Lewi yala imam-imam nang nirya ati, bokuka arenamlulume.
Allah el kanye tenena deice aniryuk, dopropsukce, el dipkoprop yupu deice arye, el mapu kipdeipsuke. El dipkoprop yupu deice arye, el mapu kipdeipsuka ara, aning-aning nirya kwepdeibuk noutam arye, utenyamuk. ‘Na mapu koprop kipdeipse nang ara, sikda minop nang atonun, weik mambul unamake. Aning-aning nirya ara, winiryuk ning kintinibuka deipnamne bukni, na mapu ara, minop atonun unamake,’ tenyamsuke. Utenyamsukce, nun dobuka, el mapu kipdeipsuke.
Allah arye Israel nang ati, “Amutuku nirya arepnamsine,” nyapdeiamuk mutuku, akunum binuka doprobik talak ara, sik Israel yala nang nirya bulubuka, Silo mutuku uk wekik. Winibikce, amutuku noutam ara, Allah ap, ninye ap epdanuka, Allah el si erena ati, tenda arye dolina aik kintinibuka deibik. Atalak ara, Kanaan noutam nirya ara, anyasik nirya, akunum obisibikce, amutuku nirya akunum dopromika ati, yuk tam nang ton, tonok nang babye, ton kum yanuka warikik. Talya urdem ulamik.
Aninye ara, sik yupa weik 144.000 unmek ninye ara, tukwak mutuku ulamik talak noutamak nirya ara, malye ning aning-aning nirya talibuka kum ulamika ati, talye yoltaklamek kilapu ap ubula kum yolalamikce, teleb diksukumuk ulamik. Domba Mi Atonye birye menekuka balibuk, el aminyan dobolbalamak ninye nirya ara, sik yupa weik 144.000 unmek ninye ara, adiparyuk elti, dobolbanyake. Tukwak ninye im sirya, mutuku sirya nirya noutamak arye, Domba Mi Atonye birye dekuka lyelamukce, Allah el si erena ati aninye dobuka Allah ati areamuk. Ara, wenye kwaning yongobuka, ‘Allah el si erepnamap’ tenen, arelamak touk, Allah el ap, Domba Mi Atonunye ap, sik bitinye si erena ati, sik yupa weik 144.000 unmek ninye dekuka lyelamukce, Allah ap, Domba Mi Atonye ap ati areamuk.
ကြော်ငြာတွေ