Ulangan 13:9 - Eipomek

⁹ Amalye yupu nyanyak nang melina meme. ‘Yuk ning si erenamabe,’ nyabuka, malye yupu talamak nang ara, adiparyuk oplopnamlulume. Anggun taruk arye, anye biti, adiparyuk minopce keil dobuka opmunce, deiyok koupmunyopura, yuk Israel ninye ap tabakuka, keil dobuka onamlulume.

Ulangan 13:9 ပူးပေါင်းရင်းမြစ်များ

Imamat 24:14

Wini talak ara, Allah ati, malye yupu nyapmalanye bira, anggun Israel nang unmalumak kan-kan arye dobuka, bai tam bobinuka deiplulume. Winibuka dopkwetepmunyopura, anye birye Allah ati, el nong deice malye yupu nyanmok buk, kekepmek nang nirya ara, amalye yupu nyapmoknye biti, el kisok deice taruk deibikcopura, anyasik ululum nang nirya arye, bita dipdenamlume. Akunum winipmunyopura, Israel nang nirya arye, keil arye anye dobuka, anye onmamunya ani, oplopmunyeba, dipnamle, nyabuk.

Matius 10:37

Nyabukopura, ayupu ton nyabuk. “Ura nada, ‘Mika arye nyalilamuk atonun unamle’ tenen, yasa ati, yata nang do nirya, anggun ni yapu ap, anggun nin yapu ap ati, weik arye kanye delilulum bukni, na ati ara, kanye mitik anun aryuk kanye delilulum nang ara, na mapu kum uptinge. Atonun ton, anggun mapu ap, anggun kil mapu ap ati, weik arye kanye talima dukuldongolulum bukni, na ati ara, kanye talima mitik anun aryuk dukuldongolulum nang ara, na mapu kum uptinge.

Lukas 14:26

“Yata nang do nirya, sik ni yapu ap, sik nin yapu ap, sik kilapu ap, sik weitcapu silip ap, sik mapu ap ati, weik arye kanye talima delilul bukni, nati ara, kanye talima mitik anun delinululce nati bataknicopura, anang ara, na mapu kum uptinge.

Yohanes 8:7

Yupu sekenmok talak ara, sik anang arye tuba-tuba asinauk unmekbuk, Yesus tikukabukce, anang ati nyabuk. “Anggun atikmalum nang kan-kan arye, malye ning tonok sirik babye kum winilamlyopura, anye birye minopce keil dobuka, akil nong deice deiyok koubuka, opnamale,” nyabuk.

Rasul 7:58

Talipdongobikce, sik anyasik dolamikak, Yerusalem noutamak arye, Stefanus talibuka, lipdakuka bai tam bobiyikce, keil dobukabikce, el nong bol deice donmek. Donmik talak ara, ton tam nang, asing aniryuk dinmek nang ara, ‘Keil dobuka mikip asa arye dopnuyap’ tenen, sik nong deice ongolamik baju kwiribukabikce, welnye tonok, el si ara Saulus, el yan dam deibik.

Ulangan 13:5

Musa birye nyabukce, ayupu ton nyabuk. “Aminyan winipnamle ning, laka nyanyak nang, nabi nang do, lengdar deice kel bikuka, laka nyanyak nang do, yuk talye ning si ati, ‘Nun ni koproba,’ nyabuka, ‘Aning si erenamabe,’ nyabice nang ara, anang tomopmunce, adiparyuk oplopnamlulume. Deiyok ara, ani. Anang arye, Allah kum tenebuk yupu, yanuka nyanyake. Sikce, ‘Anggun ni Allah Yahweh batakuka, yuk talye ning si erenamlulume,’ nyabuka, peterenyaka ati, “Anang ara, oltakanamlulume!” nyapsine. Tonda, Allah el si Yahweh arye, ‘Aning ara, wininamlulume. Aning ara, kum wininamlulume,’ nyapdeiamsuk yupu ati, ‘Anggun kekena kumce, yaniplopnamlume,’ nyabuka, malye yupu nyanyaka ati, anang tomopmunce, onamlulume! Ura, anggun kele, Mesir mutuku tuba ninye asik nang atonun ulalum talak, ikin pil weik anggun nong deice delilamsikba, ikin weik ubuka engelalum bukni, anggun ni koproba Allah, el si Yahweh arye, lobuka lyepsuk. Lyepsukce, ateleb mutuku boyasuka anya arye, elti, pia kum bataknamlulume. Sik malye nang arye, tilila nyapnamsiak nang oplopnamluma deice arye, anggun Israel ninye noutamak pia malye ning kum kibuka deipmunce, sirya dakmunyopura, sik malye nang si kiliplopnamlume.” Musa birye, Israel ninye ati nyabuk.

Ulangan 25:12

Aning ara, pia malye una ati, winiplye kil ara, el taruk sekuka bataknamlyame. Akil ati, pia bico tenepmunce, ‘Dawaplye, el taruk kum seknuyabe,’ tenena kume.

Ulangan 7:16

Musa birye, Israel ninye ati ayupu ton nyabuk. Ura, Allah arye anggunti, el mikip anggun deice deipsiliba, anggun binuka unamlum mutuku, yuk mutuku nang olbinumunyopura, aninye nirya obukapmunce, sirya daknamlulume. Amutuku ninye ati, bico tenebuka, batakna kume. Tonda, sik Isa Mutuku Dongonye si erenyak ning nirya ara, ilil tenena meme. Aning si kum erenamlulume. Winipmunyopura, wena tapu youlamle touk youpnamsila atia.

Ulangan 7:2

“Tonda, Allah el si Yahweh, el melipsilya deice arye, aninye nirya obuka, sirya daknamlume. Aninye obuka, sirya dakmunyopura, Allah arye ayala-yala unyak mutuku nirya arepsiliba, dopropmunce, amutuku unamluma ati, amutuku unyak ninye nirya obuka, sirya daknamlume. Tonda, anggun ap, ayala yuk-yuk ninye ap, yupu talilana meme. Ara, ‘Sik ap, nun ap, kanye deibuka neika uptibye’ tenen, kum nyapdeipdanamlulume. Aninye yuk-yuk nirya ara, tonok babye, ton bico tenebuka, kum bataknamlulume. Oltakna dem winipnamlume.”