Abram bira More mutuku biyukba, Allah el si Yahweh arye, Abram dam yanuka tikukce, ayupu nyabuk. “Abram, ance deipminyeba, dadeipdanin balamica ani, dadeipdanin binamak mapu ati, amutuku nirya arepnamne,” nyabuk. Amutuku ara, Allah arye, Abram dam yanuka tikukce, ayupu nyabuka ati, Abram birye, Allah el si Yahweh ati, el si erena ap, el arena ap ati, pala keil dobukabukce, keil yangapdeibuk.
Ulangan 1:8 - Eipomek8 “Teneipdelulume. Amutuku-amutuku nirya ara, narye akunum arepmasina ati nyapsine. Allah, na si Yahweh arye anggun apu yapu Abraham ap, Isak ap, Yakub ap ati, ‘Aminyan talak, amutuku nirya arepnamsine,’ nyapdeipsa ati nyapne. Tonda, nyapse. ‘Anggunce deipmunba, anggun mapu arye, dadeipdanin balamica ani, aminyan deipnamak mapu ati, amutuku nirya arepnamsine,’ nyapdeipse. Ati, narye, ‘Anggunda amutuku binuka unamlulume,’ nyapdeipse mutuku uk, wini talak anggun bimunce, talibuka unamlulume,” nyapsine. Allah arye, Musa biti nyabukba, Musa birye Israel ninye ati, laka nyabuk. အခန်းကိုကြည့်ပါ။ |
Ulangan 1:8
39 ပူးပေါင်းရင်းမြစ်များ
Sik Amori ninye arye, malye pia weik wininyak bukni, sikti lo areamse talak ara, aning min kum upmala ati, tonap tuba malyeuk wininamake. keting tamun yupa weik, 400 tahun akunum uplyopura, ance deipminyeba, dadeipdanin banamak mapu ara, wini talak aunmalam mutuku tamubuka yakirye unamake. Allah arye, Abram biti nyalin yupu nyabuk.
Atulum welenmok makau ap, uku buk ap noutam bisik biyukce, asum aryuk Allah el si Yahweh arye, Abram biti, “Dipkoprop winipnamkine,” nyabuka nyalin yupu nyapdeibuk. Allah el si Yahweh arye, nyalin yupu nyabuk ning ara, ani. “Abramo, ance deipminba, dadeipdanin binamak mapu, an mapu nirya ara, aunmalam mutuku nirya arepnamsine. Ara, Mesir mutuku noutamak weik balamle mek arye, dukdongopbuka, pera otam weik balamle mek el si ara, Efrat mek ap, danoutam mutuku nirya ati nyapkine.
Winilamlumce, nun apu yapu, sik din patalamuk talak ara, im deice arye mana kwaning weik dolkwetelamlumba, bulubuka dilamik. Tonda, mek patalamuk talak ara, kat keil deice arye, mek areplumba, panabuka yayukba dibik. Tonda, minop talak ara, an taruk ereplumce, ance nun apu yapu ati, ‘Na si deice arye, teleb mutuku arepnamsine,’ nyalin yupu nyapdeiamsulume. Aminyan talak ara, ance sikti, ‘Wini talak amutuku akunum arepsina ati, adiparyuk amutuku wekelbimunce, talibuka unamlume,’ nyapdeamsulume.”
Anggun Israel ninye unamlum mutuku ap, yuk ninye unamak mutuku ap ara, mutuku lilun wilina ati ara, laka kilin ning deipnamsile. Ati, weik laut mekwen, el si Teberau (Bi Laut) tam arye dipdongobuka, anirye, Pilistin ninye unyak mutuku, yuk weik laut mekwen tam arye ubuka, mek pia kumak weik, pata tam arye dipdongobuka, atam arye Efrat mek biyukak arye, amutuku noutam nirya ara, anggunti sekdeipnopura, arepnamsine. Na mikip arye melipsiniba, amutuku-amutuku nirya noutam unyak ninye nirya, malye kibuka onamlume. Melinamsina deice arye, anggunce amutuku ninye nirya yakmunce, amutuku nirya dopropmunce, talibuka unamlume.
Aminyan talak ara, Allah el si Yahweh arye, Musa biti nyabuk. “Wini talak, amutuku batakmunce, Israel nang nirya, Mesir mutuku boyanamlum nang bobuka, narye nyamsise mutuku bobimince, wekelbinamlume. Amutuku ara, anggun apu yapu Abraham ap, Isak ap, Yakub ap ati, ‘Amutuku ara anggun mapu arepnamsine’ nyabuka nyalin yupu deice arye, sikti, nyalilamse. Tonda, sikce deibikiba, dadeipdanin banamak ninye nirya ati, amutuku nukunamsine, nyalilamse. Adiparyuk amutuku wekelbinamlulume,” Allah arye nyabuk. Nyabukce ayupu ton nyabuk.
Tonda, Israel nang, sik apu yapu ati, ance, “Amutuku ap, ateleb tuku ap, amutuku noutam, pia teleb ulye ning ap ara, anggunti arepnamsine,” nyabuka, akunum nyalin yupu nyapdeiamlume. Aning nyapdeiamlum touk, nun apu yapu arye deiamikak, dadeipdanin yangalamikce, deibik nang ati, amutuku ara, dobuka arepsulumba aunyabe. Amutuku ara, yata teleb winin ning do nirya ara, pia weik tonun aululba dolonyabe.
Aning ati ara, na dipkoprob Allah, na si deice arye nyapsine. Ara minop talak, na nyalin yupu deice arye, akunum nyapdeipsise. Ara, narye anggun apu yapu nang ati, ‘Amutuku tuku noutam ara, boknirye dobuka arepnamsine. Arepsinyeura, anggun ap, anggunce deipmunyakarye, dadeipdanin, binamak nang nirya ara, atuku doprobikirye, daunamnyake nyabuka, nyalin yupu deice arye nyapsise. Aning ati ara, atuku ara, ance dopropnulyame. Tonda, dipkoprob teleb kibuka bokmunce, anggun neika ululum nang ati, arepnalume.
Ati ara, sik anang ara tonoknye babye, Kanaan mutuku ton, kum eipnamake. Ara, narye sik apu yapu ati, ‘Kanaan mutuku, pia teleb mutuku arepnamsine,’ nyabuka, nyalin yupu deice arye nyapdeiamse mutuku ara, wini talak unyak wisi nang ara, binuka pia kum eipnamake. Ati, yata kili sal do nirya arye, nati, ‘Allah elda, talinye binya’ tenen, nati yaniltalamnik Israel kili sal nirya ara, Kanaan mutuku pia kum eipnamake. Sik asukumuk dipnamaka ati nyapne.
“Pia dipkoprob nyapsine. Anggunda, narye, ‘Arepnamsine,’ nyamsese yupu moubuka kum taliplume. Anggunce, ‘Kum wekelebitibye,’ tenepmalumce, ilil upmasila ati ara, na dipkoprob nyapsine, anggun Mesir mutuku noutam ulamlumba, narye lyepsisirye dobuka boyanamsise nang ara, otam mutuku pia kum dinamlume. Ara, keting tamun dua puluh tahun itam akunum kiyamlye nang nirya ara, narye sik apu yapu Abraham ap, Isak ap, Yakub ap ati, ‘Ateleb mutuku arepnamsine,’ nyabukanyalin yupu nyapdeiamse mutuku ara, anggunda kum wekenamlume. Ara, talye ati kume. Deiyok ara, sik anang nirya ara, narye nyamsese yupu kum kekebikirye, kum dobolbanyake. Nati, yanipmaniace, sik kanye pum tam arye, na nyapsi yupu kekebuka kun unyaka atia. Ati, anang nirya ara, oteleb mutuku kum wekuka unamake.
Tonda, ‘Allah arye winibuka melinamsilʼ tenen, Allah morosunune. Ara, anggun apu yapu arye, si erelamiknye, Allah Yahweh arye, anggunti tuba pia melisilirye, tabakasiliba, anggunda ninye yupa pia weik, tonap tabaknin banamsile. Ara, ninye yupa pia weik aunmaluma atonun, tonap tabakuka, seribu kali lipat ton, ninye pia weik tonun, tonap tabakdeipnamsile. Winibuka tabakeipsilyopura, Allah arye anggunti, minop talak arye nyalin yupu deice arye, ‘Winipdeipsiniba, anggun nirya ara, telebuk unamlume,’ nyapdeiamsuk touk, ubuka unamlume. ‘Allah arye winipnamsilʼ tenen, morosunune.
Allah arye nyapdeibuk yupu ara ani. ‘Ura, wini talak unamlum Israel nang ara, anggun malye un ninguk talibuka ululum nang anya arye, anggun kan-kan noutam arye, tonoknye babye, narye anggun apu yapu nang ati nyalilamse ning dopropnamlume. Narye anggun apu yapu nang ati, ‘Ateleb mutuku Kanaan tam arepsiniba, omutuku noutam arye teleb ubuka unamlume,’ nyabuka, nyalin yupu deice arye nyapdeiamsise mutuku ara, wini talak kam ululum deiyok nang ara, amutuku kum binuka weknamlume,’ nyamsuke.
Winibukce, nati ayupu nyapnuke. “Na Allah arye, anggun apu yapu ati, ‘Ateleb mutuku arepsinyeura, talipnamlume,’ nyapdeamsi touk, wini talak ara, Musa ance Israel ninye bobuka bana ati, kintinipnalyame. Ance minopce biminyeba, sikda anyapmakin mutuku, teleb mutuku binuka talibikirye, amutuku noutamakuk unamake.” Allah el si Yahweh arye nyapnuke. Musa birye, Israel ninye ati nyabuk.
Otam mutuku wekelbimunce, anggun yan otam yanibuka binamlum mutuku nirya ara, anggunce malye kibukapmunce, amutuku nirya talipmunce, unamlum mutuku ati nyapne. Ara, anggun talipnamlum mutuku wililongonak ara, outam (ara selatan) ati ara, weik pala mutuku, kata tam arye dipdongobuka, binamunya ani, deice tam sirya sekena ara, (ara utara) pera mutuku eitam Libanon mutuku ubukak, asukum binuka sekdopnamlume. Tonda, keting panalyangan tam mutuku wilinak ara, weik tonun balamle mek, Efrat mek dam arye dipdongobuka, binamunya ani, outam (ara selatan) mutuku wililongonak ara, sirya keting kumulban tam, weik laut mekwen, el si ara Laut Tengah deibukak, asukum arye binuka, bokuka dopropmunce, amutuku-amutuku nirya talibuka unamlume.
Tonda, arup arye nyapdeipmasin yupu moubuka talipmunce, pia kum batakmunyopura, Allah arye anggun kam una ati, lo weik tonun ton arepnamasile. Ara, anggun omutuku noutam wekelbimunce, unamlum mutuku ara, keting tamun tonap weik tonun mapmunce, unamlume. Amutuku ara, Allah arye anggun apu yapu ati, nyalin yupu nyapdeiamuka deice arye nyabuk. “Anggunce deipmunyeba, dadeipdanin banamak nang nirya ara, pia teleb mutuku arepnamsine. Tonda, winipmanto yupu ara, amutuku ara, sapi basam moum yung ap, mong mek ap, pia weik ulye mutuku dopropnamlume. Ara, amutuku noutam ara, yata teleb ning do, yala-yala nirya, pia teleb ning weik aulula ati nyapsine. Amutuku arepnamsine,” nyapdeiamuk. Ati ara, wini talak amutuku uk, binuka unamlume.
Winibibirye, nunda balamipya ani, Yordan mek koubuka, otam binamabe. Wininamaba ara, nun ni Allah Yahweh arye, nunti areamsuk mutuku binamaba ati, moropkiyape. Tonda, Esau birye deiamukba, dadeipdanin yanganyak nang, Edom mutuku noutam unyak nang ap, tonda Moab yala nang bukni, Ar mutuku unyakak ap ati ara, nunce ayala bitinye nang ati, ‘Anggun umunye mutuku noutam bisik ara, nun banmapya ani, otam mutuku binamabe,’ nyabuka morobububa, sik amutuku bitinye nang arye, ‘Yo, telebe, anggunda nun talibuka unyap mutuku bisik noutam binamlume,’ nyapsikba, yanganyabe,” nyabuka morobupue.
“Ati ara, Allah an mutuku im deice arye, pia teleb koprop ulyam mutuku arye dilamsilamak, nunti disilyame. Winipmince, ance wipdeiamsulum ninye, Israel ninye ati, ‘Teleb kipdeipsimince, nun patan ning arenamsilyame. Nun mutuku teleb kipdeipnamsilyame’ tenen, moropkiyabe. Ara, ance nun apu yapu ati. ‘Wininamsine, tonda pia teleb mutuku, aning-aning nirya weik ulul mutuku arepnamsine,’ nyabuka, nyapdeiamsulum touk, ‘Wini talak nunti arepnusilam’ tenen, moropkiyabe.” Anyapmasin touk nyapnamlulume. Musa birye, Israel ninye ati nyabuk.
Allah Yahweh, elce anggun melisilirye, aning-aning nirya telebuk unamsile. Tonok ning ara, anggunce talye mangkau kibuka, mapu weik tonun arepsilyeura, weik upnin banamake. Tonda, anggunce talibuka weinamlum ning, yala-yala nirya babye, weik tonun deibikiba, dadeipdanin bakcopura, pia weik unamsile. Tonda, sik delilamsik nang ati, Allah elce, nyalin yupu nyapdeiamuk ara, “Narye anggun Israel nang ati arepnamsin mutuku ara, aning-aning weik mutuku arepnamsine,” nyapdeiamuk touk ubuka, anggun apia teleb mutuku ulamunce, tuku deice wa wibuka kounamlum ning yala-yala nirya babye, nonguk uplyeura, weik tonun unamsile.
Ura, anggun nirya awekmaluma deiyok ara, talye ati kume. Deiyok ara, anggun ni koproba Allah Yahweh arye, anggunti nyalin yupu nyapdeiamsuk ning ara, talibuka wininamluma atia. Ati abulubuka wekmalum nang nirya ati, nyalin yupu deice arye sekdongopsila ati, Allah elce, “Aning-aning nirya talibuka winimunce, apil dobuka unamlume,” nyapdeipmasil touk, anggunce, “Dipkoprob, aninguk talibuka wininamabe,” nyapdeipmunce, Allah Yahweh, elce nyalin yupu nyapsilye touk, ubuka wininamlume.
Tonda, kam una deiyok ning wipmunyopura, ‘Anggunce anggun ni koproba Allah, el si Yahweh ati, kanye deipmunce, el nyalul yupu moubuka kekepmunce, eluk talibuka, dukdongobuka unamlum’ tenen, nyapsine. Wininamlum ning deiyok ara, Allah el si Yahweh ara, anggun Kam Una Deiyoknye ulula ati nyapsine. Winipmunyopura, anggun wekelbinamlum mutuku noutamak ara, anggun koproba ap, tonda anggunce deiplumba, dadeipdanin banamak ninye nirya ap, kam unamlum talak ara, lo weik arepnamsile. Ara, anggun apu yapu nang, Abraham ap, Isak ap, Yakub ap ati, Allah arye, ‘Amutuku arepnamsine,’ nyabuka, nyalilamuk mutuku ‘Bina unamlum talak ara, weik winipnamle,’ tenena ati, aning ara nyapsine. Musa birye Israel ninye ati, nyabuk.
Nyabukopura, Musa birye, Yosua biti yukubukce, Israel ninye nirya wekmeka noutamak arye nyabuk. “An kanye talima pum tam, pia moubuka tenepmince, an kanye talima pum tam ap, nong ap mikip kipdamince, ilil kumce, mikip asa unamlume. Deiyok ara, ani. Allah el si Yahweh arye, anggun apu yapu ati, ‘Amutuku arepnamsine,’ nyalamuk mutuku, Israel ninye dobuka bobinamlyame. Omutuku bimunce, ance amutuku nirya bokuka, Israel ninye nirya yuk-yuk nukminyopura, sikce amutuku dobuka, binuka talibikirye, pia daunamake. Allah arye amutuku arepsiliba, dobuka unamake atia.
Allah arye Musa biti, amutuku-amutuku nirya kapdeibukba, Musa birye eibukopura, Allah arye nyabuk. “Narye Abraham ap, Isak ap, Yakub ap ati, ‘Amutuku arepnamsine,’ nyapdeiamse mutuku atia. Ara, narye anggunce, ‘Deipmunba, dadeipdanin banamak ninye ati, amutuku nirya dobuka arepnamne,’ nyamse mutuku atia. An Musa biti ara, kapdeipmakinba, an asing arye amutuku eipmalam bukni, anda Yordan mekin koubuka, otam ulul mutuku nirya ara, kum binuka unalame. Asukumuk dipnalame.” Allah arye Musa biti, nyabuk.
Atalak ara, Musa birye, Israel ninye ati nyabuk. Anggun nirya moubuka kekeplulume. Allah arye, ‘Aning ara, wininamlulume. Tonda, aning ara kum wininamlulume,’ nyapdeipsuk yupu, narye anggunti laka nyapnusine. Ayupu moubuka kekepmunce, nimalya ap asa arye, Allah el amu tam umunyopura, kam pia unamlume. Winibuka umunyopura, Allah arye winiryuk ning arepnamsil, pia teleb weik mutuku binuka wekmunce, amutuku talibuka unamlume. Ara, anggun ni koproba, el si Yahweh, anggun apu yapu ati, kalikuka meliamukba, sikce el si erelamik Allah, elcuk nyapsuk yupu ati nyapsine.
Musa birye nyabuk. “Allah arye, nun apu yapu Abraham ap, Isak ap, Yakub ap ati, ‘Anggun mapu ara, winiryuk mutuku arepnamsine,’ nyapdeiamsuk mutuku bimunyopura, anggun amutuku binuka dopropmunce, weik asik nirya, pia teleb kota-kota binuka unamlume. Akota-kota ara, yuk nang arye domik bukni, Allah arye arepsiliba, anyasik nirya talibuka unamlume.
Musa arye ayupu yabukce, ayupu ton nyabuk. “Ura, anggun ni koproba Allah, el si Yahweh arye anggunti, ‘Aning ara, wininamlulume. Aning ara, pia kum wininamlulume,’ nyapdeipsilye yupu ara, kum bataknamlulume. Pia tuba kekepmunce, winipmunyopura, Allah arye anggun apu yapu ati, ‘Aning arepnamsine,’ nyalilamuk touk, anggun babye, aning arepnamsile. Ara, anggunti, dipkoprob tuba bico tenesilya atia.”
“Allah arye anggunti, bico tenepsilirye, anggun dam aunamsile. Tonda teleb kipsilirye, aning-aning weika arye arenamsile. Ara, anggun mapu weik arepsiliba, weika arye dadeipdanin, banamak. Tonda, anggun wa wibuka kounamlum ning weika arye melipsiliba, duk weika arye moulamliba, dakanamlume. Ura, gandum ap, anggur tapu duk ap, anggur mek ap, minyak zaitun yo duk ap, weika arye arenamsile. Tonda, anggun sapi basam ap, domba basam ap, kambing basam ap ara, mi weik delinamak. Ara, Allah arye, ‘Amutuku arepsinirye, aning-aning nirya weika arye arepnamsine,’ nyabuka, nun apu yapu ati nyalilamuk touk, arepnamsil mutuku noutamak arye arenamsile.”
“Allah arye anggunti, wipdeipsuka deiyok ara, ‘Anggunda ninye weik unyaka ati ara, wipnamne,’ kum tenelamuk bukni, deiyok ara ani. Ara, elce tuba bico tenyamsukce, elce anggun apu yapu ati, ‘Wininamsine,’ nyalilamsuk yupu ati, tuba tenelirye, anggun wini talak ululum ninye ati, wipdeipsuke. Minop talak, ‘Wininamne,’ nyabuka, akunum nyabuka ati, Mesir mutuku noutamak ikin weik ulamsuk buk, dobuka lyepsuke. Mesir mutuku weik deiyoknye Firaun, el mikip weik kibukce, anggunti taleamsuke. Winilamukce, ikin pil weik, anggun apu yapu nong deice delilamukba, ikin weik ulamik. Winibuka ulamik bukni, Allah el mikip weik deice arye, lyepsukce dobuka boyasuke.”
Musa birye, Israel ninye ati nyabuk. Allah arye, ‘Aning ara, wininamlulume. Aning ara, pia kum wininamlulume,’ nyapdeipsuk yupu nirya ara, kekebuka nimalyap asa arye unamlume. Arup arye nyapsin yupu, moubuka kekepmunce, aninguk talibuka dobolbanamlume. Winipmunyopura, Allah arye anggunti, teleb kipdeipnamsile. Winipsiliba, kam pia unamlume. Winipmunyopura, weika arye deiptapakra bamunyeba, anggun mapu pia weik unamake. Tonda, Allah arye anggun apu yapu ati, ‘Winiryuk mutuku nuknamsine,’ nyapdeiamuk mutuku, binuka talibuka unamlume. Anggun ni koproba Allah Yahweh arye, yupu nyapdeisuke.
Dipkoprop anggun diksukum una ap, anggun kanye talima teleb tenena ap ati, Allah arye, amutuku ninye obuka, sirya dakliba, anggun mutuku binuka, talibuka kum unamlume. ‘Nunda teleb nang anya arye, Allah arye amutuku arepsile,’ tenena meme. Allah arye wininamla ara, anggunti kume. Allah arye, amutuku ninye yaknamla deiyok ara, ani. Ara, amutuku ninye arye, malye-malye winin ning weika arye wininyaka ati, Allah arye melipsilyopura anggunce, aninye obuka yakmunce, amutuku binuka weknamlume. Tonda, Allah arye wininamla deiyok ton ani. Ara, Allah arye anggun apu yapu Abraham ap, Isak ap, Yakub ap ati, Allah arye ‘Wininamsine,’ nyabuka nyalin yupu deice deiamuk yupu nyabuka atonun, winipnamla atia. Amutuku arepnamsila deiyok ara, aning uka.
Ura, yuk yupu ton nyapnusine. Allah arye, nun apu kopropa Abraham biti, “Winipnamkine,” nyabuka, yupu nyalilamuk talak ara, ‘Abraham birye diba tenepnunil’ tenen, Allah arye el bidamang si ap, tabakuka nyabuk. El si nyabuka ara, elda aning-aning deice tam, weik mambulnye ulula anya arye, yuk si tabakuka kum nyapmanto. Weik ning ara, el si koprop uka. Allah arye nyabuk.
Nyabukce, ayupu ton dukdongobuka nyabuk. Ati ara, an adiparyuk dib tenebuka, ilil pia kum aniryuk, mikip arye Israel ninye, sik deiyoknye kipminyeba, anang bobuka, na arepnamsin mutuku bobiminba, dopdopnamake. Narye anggun apu yapu nang ati, ‘Amutuku arepnamsine,’ nyapdeiamse mutuku binamluma ati, nyapkine.
Israel ninye Bokim mutuku unmek talak ara, Allah el si ara Yahweh, el Allah pil donanye malaikat ara, Gilgal mutuku arye Bokim mutuku welebuka biyuk. Tia talak ati, Israel ninye bulubuka Bokim mutuku unmek sukum, Allah el pil donanye biyuk. Allah el pil donanye bira weik mambul yupu laka nyalbananye birye biyuk. Biyukce, sik Israel ninye ati ayupu nyabuk. Allah arye nyapsile. “Anggun Mesir mutuku ulalumbuk, narye lyepropsisirye, bobuka Kanaan mutuku noutamak boyanamsise. Tonda anggun apu yapu ati, ‘Winiryuk pia teleb mutuku arepnamsine. Aning ara, kum bataknamne,’ nyabuka nyalilamse yupu ara, kum batakse. Dipkoprop amutuku akunum arepsisiba, doproplumce, pia amutuku talibuka unamlume. Tonda narye anggun apu yapu ati, ‘Na tenena ninye unamlum’ tenen, ‘Pia melisiniba, teleb kipdeipnamsine,’ nyapdeiamse yupu ara, nyapdeiamse. Na ap, anggun Israel ninye ap, teleb ubuka neika una ati, ‘Teleb kipdeipnamsine,’ nyamse yupu ara, pia kum bataknamne. Ara, anggun wini talak ululum ninye ap, anggunce deipmalumba, dadeipdanin binamak ninye babye nirya ati, ayupu nyapsine.”
ကြော်ငြာတွေ