Aning ara, talye ati kum nyapsine. Deiyok ara, anggun kwepdeiamsuknye, el Allah ati, ‘Se na dopnuknye bitonun ulule’ tenen, unamlume. Allah ara, el si Yahweh ulule. Elce anggun akanye bitonun melibuka unamsile. El dem aryuk, im deice unyak yin talin malaikat nirya talibuka, sik weik deiyoknye ulule. Anggun Israel ninye arye, malye winilamlum ning ati, opsutu bukni, anggun malye winilulum ning namin kipsilirye, anggun lyepnamsilnye bira, el Allah ulule. Anya arye, Allah ara pia Telebnye ulirye, anggunti pia kalikuka melisulule. Ninye mutuku-mutuku nirya arye, elti, ‘Allah ara, Weik Erebuka Eitamnye ulirye, tukwak mutuku, mutuku-mutuku nirya unyak ninye talilula deiyoknye bira, el si ara Allah Yahweh ulule,’ nyabuka, Allah el si atibuk erenamake.
Roma 7:4 - Eipomek4 Aning ati ara, na kayapo, arup nyapmasin touk, Kristus el nong dibuka deice, Allah arye anggun ap, Yesus ap, kanye talima dukdongopsuk ati, adeice arye anggun babye diplume. Kristus dibuk talak arye Musa sekamuk mem yupu amu tam tuba kum ulul touk, Kristus ap dukdongopsuk deice arye, anggun babye amem yupu amu tam tuba kum ululume. Allah arye winipsuka deiyok ara nyapnusine. Allah arye utenelamsuke. Ara ‘Narye nyapsiba, Musa birye sekamuk yupu talibuka ulamik bukni, wini talak ara, el dibukba narye kam bukeipsinye, Yesus Kristus, elcuk sik talilulba, el amutamuk unamake. Unyakce diksukumuk kibuka winibikirye, na Allah ati, kibuka na si erenamniake,’ Allah arye tenelamsuke. အခန်းကိုကြည့်ပါ။ |
Roma 7:4
35 ပူးပေါင်းရင်းမြစ်များ
Tonda, winipmanto ning ton. Tonok welnye birye, tonok kil ati, moun dilamlirye, dololamle touk, Yudah yala nang arye, Yudea tam mutuku nirya ati, ila ton ap, teleb kanye deibikirye, atuku nirya dopropnamake. Winipmanto ton, kil dopnamlinye birye, el dopnamlye kil yanganmaliba, eiplirye kanye delilamle touk, anggunce el siuk erelulum Allah, elce anggun Israel nang ati, kanye deipnamsile. Anggun kwepdeipsuknye, na Allah arye, anggun Israel nang dopnamsine.
Anang ara, wininyak bukni, yuk ninye, yala ning doknin banmokak, mirin tukwak sakmokbuk duk weika arye moubukce ton 30, ton 60, ton 100 moubuk touk, sikda, Allah yupu moubuka kekebikirye, diba tenebuka, kanye deibuka pia dololamak ninye ara, duk weika arye moubuk ning atouk, diksukumuk unyakce, Allah el pil weika arye tuba donyake,” Yesus arye nyabuk
Anggur tapu duk teleb ubuka moulamle atonun, na mapu anggunda, duk pia weik mounamsile. Teleb ubuka winimunya deice arye, yuk ninye nirya arye, ‘Kume anang ara, Yesus el mapu unyake’ tenen, kel kipnamake. Ninye weik akunum kel kibicopura, winimunya deice arye, na Ni Koprop Allah ati, ‘Allah ara pia telebe,’ nyabuka, el si erebikirye, elti, kinamake.
Winipmanto yupu ton nyapnusine. Ninye dona ati, arepnamace kil ara, akil dopnamalinye, elcuk akil talilamle. Akil dopnamalinye, el melina nang ara, talyeuk unyak bukni, ‘Nun kwit dan talak yanamle do?’ tenen, kintinibikirye, kekenauk unyake. Winibuka daunmakiba, kil dopnamalinye yalirye, yupu nyaplibuk kekebicopura, kanye deibuka pin-pin arye unyake. Anang kanye deibuka pin-pin arye ulamak touk, na babye atonun unune. Nara, kanye deibuka pin-pin weik arye akunum unune.
Im deice arye yayuk roti kwaning, kam una deiyoknye bira, ara na uka. Akwaning nyapmasina ara, dobuka diplinye bira, nong dipmalya babye, pia kam unamle. Domon yupu deice arye, kwaning nyapmasina ara, na nong atia. ‘Ninye mutuku-mutuku nirya lyepnebuk, kam unamak’ tenen, na nong arepsine.” Yesus arye nyabuk.
Kristus arye ulye touk, anggun diba tenelulum ninye babye, atonun tenebuka unamlume. Ara, ‘Nunda malye winin ning nirya ati ara, akunum diamice ninye atonun unyaba anya arye, aning tonap patapsiliba, pia kum wininamabe. Aning kum bukni, nun kam unamap talak nirya ara, Yesus ap, nun ap, kanye talima dukdongopsuk deice arye, Allah el siuk erebuka, wininamabe.’ Aninguk tenebuka unamlume.
Wininamluma deiyok ara nyapnusine. Wini talak ara, Allah arye, “Aning ara wininamlulume, aning ara kum wininamlulume,” nyapdeibukba, Musa birye sekeiyamsuk mem yupu amu tam tuba kum ululume. Wini talak ara, Allah bico tenesilirye, el kanye aryuk el mikip arisilirye, melisilyeba, el amutamuk ululume. Ati ara, malye una deiyok ning arye, anggunti malye kum upnamsil bukni, telebuk unamlume.
Kume. Aning pia kum wininamabe. Akunum diamice ninye arye, aning-aning nirya patalyeba kum ulamak touk, nun babye atonun malye winin ning nirya ati ara, akunum batakupa anya arye, malye winin ning ara tonap pia kum tenenamabe. Ati yata ning ati tonap talye luparabuka malye winiptibye do? Kume, nunda winiryuk talima arepsuk ninye anya arye, aning kum winiptibye.
Bukni, Isa Mutuku Dongonye arye tapu kouamsukba, el amutamuk ulamlumce, malye winin ninguk talibuka winilamluma noutamak, Allah arye akunum lyebuka loplopsukba, wini talak ara el amu tam bukuka umunyeba, elcuk anggun kanye talima talisulule. Allah el talisilya deice arye, teleb ulisulul ning ara nyapnusine. Ara diksukum teleb ubuka winin ning winipra balamibya ani, aminyan sirya talak ara, Allah ap neika kam pia unamabe.
Aning ati ara, akil el akanye tuba kam ulul talak noutamak arye, anye batakuka yuknye doplyopura, yuk ninye arye akil ati, “Akil ara, malye kil ulule. El akanye batakuka, yuknye dobuka anya arye, ubula yolamak kil atonun ulule,” nyanyake. Bukni, akil el akanye akunum diplyopura, amem yupu amu tam tuba kum ulula ati, akil arye yuknye doptua babye, yuk ninye arye elti, “Ubula yolamak kil atonun ulule,” kum nyaptinge. El akanye min arye domuknye akunum dibuka anya arye, ayupu kum nyaptinge. Ayupu ara winipmanto ning ati nyapsine.
Bukni, minop talak Musa birye sekamuk mem yupu amutamuk ulamamuburye, malyeuk winilamupe noutamak arye, wini talak Allah arye nunti wini talak akunum lyebuka lopdeipsuke. Ara Kristus dibuk talak ara, nun ni Allah arye Yesus ap, nun ap, kanye talima dukdongopsuk deice arye, akunum loplopsukba, Musa sekamuk mem yupu amu tam tuba kum unyabe. Ati ara, wini talak ara, Musa sekuka deiyamuk yupu uk talibuka, kum dobolbanyap bukni, Allah El Dib Kanye arye el mikip arisilirye, melisilya deice arye, Allah el winiryuk bisikuk banyabe. Winibuka akunum loplopsukba, wini talak, Allah El Dib Kanye mikip deice arye, Allah el teleb piluk nunce talibuka donyabe.
Allah arye wenebuka kum oplopnamsile nyapmasina ara, talye ati kum nyapsine. Aning deiyok ara nyapnusine. Ara, Yesus Kristus pil dopsuka deice arye, Allah El Dib Kanye arisiliba, el melisilya deice arye, dipna ap, malye winina deiyok ning arye, tapu kouamsuka noutamak arye, loltakasulule. Ati, aminyan ara el ap bokuka yuk-yuk kum unamabe. Kum dipnamap bukni, el ap neika pia kamuk unamabe.
Nun Deiyoknye Yesus el ining deice deksuka ara, ‘Pia tenepnamap’ tenen, mek makau bobuka, Allah ati, “Telebe,” nyabuka, neika dinyaba deice arye, Kristus el ining deice arye, lyepsuk ning ara, dopropbibyopura, el ap talima dukdongobuka neika unyap do, kum do? Aning atonun, Yesus el nong ara, wanwanun yo deice obikbuk dipsuka ara, ‘Pia tenepnamap’ tenen, tonok kwaning dobuka, bokibirye neika dinyaba deice arye, Kristus el nong arepsuka deice arye, lyepsuk ning ara, dopropbibyopura, el ap kanye talima dukdongobuka neika unyap do, kum do?
Narye anggunti tenepnirye, ‘Anang ara, na tenen nang anya arye, yuk nang dam kipdobicopura, anang arye talebikceura, malye winibicak’ tenen, anggunti kanye deibuka, yukulosunune. Allah arye nun nirya ati bico tenepsilirye, kanye talima melisiliba, yukulosilye touk na babye tenepsirye winisunune. Ara, winipmanto yupu nyapnusine. Ara, tonok tam nang arye, tonok kil dobuka, yuk tam nang ati, “Akil ara, yuk nang arye kum dobik. Pia teleb kam kiluk ulule,” nyabuka, arelamak touk, wininune. Ara, sik kil arin nang arye nyalamak touk, narye anggunti utenyamsise. ‘Korintus ninye ara, Kristus el yupu uk dib tenebikcebuk, tonoknye binyuk, Kristus elcuk aninye talipnamle’ tenen, anggun Korintus mutuku ninye ati wipdeiamsise.
Allah arye nyapdeibukba, Musa arye sekeiyamsuk yupu, mem yupu nirya moubuka talibikirye, diksukum kibuka kum dobolbanyak ninye ara, “Allah arye weneplirye, oplopnamle,” nyalamuk yupu aupmale. Bukni, Kristus arye nun tukwak mutuku ninye ati, el bidamnye nong arepdayukba, yu nang arye obikba, nun malye ulamubu ning lyepnamsuka ati dibuka deice arye, lopdeipsukce lyepsuke. Minop talak ara, mem yupu amu tam ulamububa, amem yupu arye tapu koulamsuk bukni, Yesus arye pil dopsuka deice arye akunum loplopsuke. Anyapmasin yupu ara, talye ati kum nyapsine. Ara, Allah yupu sekamik yupu noutamak aubuk yupu deice arye kel kinyabe. Ayupu ara ani. ‘Wanwanun yo deice deibuka olamak ninye ara, Allah arye aninye ati wibukaplirye, wenebuka oplopnamle.’ (Ulangan 21:23) Aning ati ara, kel kinyabe. Nun malye winina ati, Allah arye talye luparabuka oplopsutu bukni, Kristus wanwanun yo deice obikba, dibuka ara, talye ati kume. Nun malye winina ning pununa ati, dibukce lyepsuke.
Nun ap, anggun ap, ‘Nun lik,’ tenelalamuburye, kanye talima wilipdanuka pia yuk-yuk ulamubu. Bukni, Allah arye, “Aning wininamlulume, aning ara, kum wininamlulume,” nyapdeibukba, Musa arye, sekeipsuk yupu ara, mem yupu uamuk ning ara, Yesus dibuka deice arye, akunum sirya dakukce, kum kipdeibuk. Amem yupu weik aubukba, nun Yahudi ninye arye, ayupu talibuka ulamubu bukni, Kristus el nong arepsukce, lyepsuka deice arye, amem yupu nirya kum kipdeipsuke. Winipsuka deiyok ara ani. Ara, ‘Yahudi yala nang ap, Yahudi yala kum nang ap, yuk-yuk unyak bukni, na nong deice arye, aninye nirya kanye talima dukdongopniba, nong tonok atonun kibuka ukirye, winiryuk nang atonun unamake’ tenen, winipsuke. Yesus el nong arepsuk deice arye, akunuma, nun Yahudi yala nang ap, anggun Yunani yala nang ap, el Yesus ap, kanye talima dukdongobuka namin arye, teleb kipdeipsukba, wini talak ansinibuka nun neika unyabe. Wini talak ara, ‘Like,’ kum tenelanyabe. Mangkau kanye bobuka neika dukdongopdanuka unyabe.
Atalak noutam nirya ara, anggun ap, Yesus Kristus ap, talima dukdongobuka neika ululumbuk, Kristus el mikip deice melisiliba, pia diksukumuk winilamlum ani, ‘Teleb winina ati, duk weik moupnamsile’ tenen, Allah morosunune. Diksukumuk winilamunyebuk, duk weik moupsilyopura, ninye nirya eipsikirye, “Allah elda pia telebe,” nyabuka, el si erebikibuk, Allah el si weik upnamle. Winiplyopura, ‘Ninye weik el si kel kibikirye, el siuk erepnamak’ tenen, Allah morosunune.
Nunce anggun anang ati, ‘Aning nirya dolonamak’ tenen, Allah morosinyam ara, urdem ati kume. Deiyok ara, Allah arye, ‘Na mapu winibuka, winibuka diksukumuk unamake,’ tenesilye touk, dipkoprop aninguk talibuka, ‘Anggun unamlum ning nirya teleb ubuka unamlum’ tenen, Allah morosinyame. Tonda, ‘Wininamluma deice arye, Allah arye kanye delinamsil’ tenen, nunce anggunti Allah morosinyame. Winibuka winimunyopura, Allah arye kanye delinamsil ning ara, lilibuka nyapnusine. Ara, yata teleb winin ning nirya do, diksukum ninguk yala-yala nirya umunyebuk, teleb duk weik moupnin banamsile. Tonda, Allah ap, kanye dukdongobuka umunye ning ap, Allah winilul ning nirya ara, ‘Weik arye kel kipra banamak’ tenen, nunce anggunti Allah morosinyame.
Winibuka pia yuk ulalum bukni, wini talak ara, nun ni Allah arye, anggun malye ulalum ning kilibuka lyepdeipsukce, el ap, neika una ati, kanye dukdongopsuke. Teleb kipdeipsukce, el ap, dukdongobuka ansinibdeipsuk ara, el Mi Koprop Kristus ara, ninye nong dayukce, tukwak mutuku yanuka daulamuka ani, nunti dibuk deice arye teleb kipdeipsuke. Winipsuka ara, talye ati kume. Deiyok ara, ‘Na Allah arye sik dobuka, na dam deipnamsin talak ara, sik malye wini ning tonok babye, kum uptu ura, pia diksukumuk unamak’ tenen, teleb kipsukce, el ap, kanye dukdongopsuke. Akunum teleb kipdeipsuk ning ati ara, yata nang arye do nirya, ‘Aning ara, malye ning,’ nyabuka malye yupu kum nyapsitinge.
Yata mutuku do nirya, Allah el dipkoprop lak teleb yupu, ninye lyen yupu ara, dib tenen nang arye peterenyakba, ninye mutuku-mutuku nirya kekebikirye, diba tenebikcopura, dib tenen ninye weik upnin banyake. Winipmanto ara, duk moulamle yo, duk weik moulamle touk, ninye arye Allah el laka teleb yupu, diba tenebikca deice arye, diksukum winin ninguk talibuka unyakce, sik teleb winin ning weik upnin balule. Mutuku-mutuku nirya noutamak arye, ninye weik diba tenebikirye, teleb-teleb kibuka ulamak touk, anggun Kolose mutuku ninye babye, atouk ululume. Ara, ayupu kekelamlum talak arye diprongobukap, aminyan talak nirya ara, anggun kan-kan arye, Allah el laka teleb yupu kekelulumce, duk weik moupnin balyeura, weik nelamle. Winisilye ning deiyok koubuk talak ara, Allah arye nun nirya ati, bico tenesilirye, lyesilyopura, el kanye aryuk, urdem talye pia melisilye yupu, dipkoprop deiyok koubuka dololalum talak arye, deiyok kipsukce, tuba-tuba usulule.
Allah arye, “Aning ara, wininamlume. Aning ton kum wininamlulume,” nyapdeibukura, Musa arye sekeiyamsuk yupu ara, yaniplobuka kum dobolbanyabe. Ati, ayupu kum dobolbanyap ati ara, Allah arye talye luba kibuka wenebuka oplopsutue. Allah arye ayupu deice wenebuka opsutu bukni, nun diba tenenyap nang, nun lyena ati, Yesus arye amem yupu atonun yupu nirya dobuka, el opnuyik talak ara, Yesus el nong deice deipdayukce, wanwanun yo deice deibukura, obik. Yesus obika deice arye, awenena yupu kum kipdeipsukura, wini talak ara, ayupu amu tam tuba kum unyabe.
Anggunda kanye talima dukdongobuka, Kristus ap ululuma anya arye, Kristus arye anggunti, akunum dipsuka anya arye, adeice arye el dibuk touk, anggun babye, atonun akunum diplume. Aning ati ara, tukwak ninye arye, “Winina meme, aning ara kum diptume, aning talina ara meme,” nyabuka, mem yupu atonun nyaldelisinyaka ara, kekena kume. Ato yupu ara, daupnamle. Aning atonun amu tam tuba kum ululum bukni, ‘Ayupu ara mambule’ tenen, kekepmunce dobolbamunye ning ara, yata ati do? ‘Amem yupu atonun yupu nirya ara, mambule,’ tenebuka, talibuka kum unamlume.
Tonda, Kristus arye, “Allah ance tenyamnulum touk, apiluk donamne,” nyabuk touk, Allah arye Yesus ati, tenyamuk pil dipkoprop dobuka deice arye, nun malye winin ning nirya kum kipdeipsukce, diksukumuk kipdeipsuke. Diksukum kipdeipsuka ara, Yesus Kristus el nong obikba, nun malye winin ning kilibuka lyena ati dipsuke. Nun pununa ati dibukce, lyepsuke. Nun lyena ati, pil akunum sirya dakeipsuka deice arye, akunum diksukum kipdeipsuke.
Allah arye nunti, dalubuka opsutu bukni, nun opsutu ning nirya ara, Yesus Kristus arye dobuka, el nong deice deipdayukce, wanwanun yo deice delil bisukce dibuk. Nun malye un ning ati dipsuk ning ara, talye ati kume. Ara, sik yupa ninye malye un ning kum teneptingce, kum pataptu touk, nun babye, malye ning patana ap, malye winina ap, pia kum arye, ‘Diksukumuk unamak’ tenen, dibukce lyepsuke. Sikce Yesus ati obikak, dibuk deice arye, nunti akunum teleb ubuka deipsuke.
Ayupu kekepseura, tonok malaikat na damak yanmok. Anye bira, sik tekbarye malaikat arye, karu mek makau tekbarye talipmekak, amek makau pum weik kanye imun ning, tekbarye talipmek ning kan-kan bukni, tonok malaikat na dam yayukce, “Anda yalyame. Domba Mi Atonunye kil dopnul ning ara, kapdeipkiniba, eipnulame,” nyapnuke.