Nun nirya arye, nun ni koproba Allah Yahweh ati, “Anda pia telebnye ulyame,” nyabuka, el siuk erenamabe! Yata nang do nirya, anggunce, ‘Se, Yahweh ara, weik mikipnye ulule’ tenen, ilil ubikirye, elce nyasulul yupu, moubuka talibikirye, diksukumuk wininyak nang nirya ara, Allah arye sikti, teleb kililamlyeba, kanye deibuka unyake. Anang ara, Allah arye, “Aning wininamlume. Aning ara, pia kum wininamlume,” nyapdeiamsuk yupu ati ara, pia kanye deibikirye, aninguk talibuka dobolbanyake.
Roma 4:6 - Eipomek6 Ayupu nyapmasin touk, minop talak ulamuknye Raja Daud sekamuk yupu noutamak arye, ayupu atonun ton nyapdeisuke. Daud birye, “Sik teleb pil donyaka deice arye kum bukni, Allah el kanye aniryuk, ‘Anggunda diksukum un ninye,’ nyabuka, teleb kilisulula ninye ara, kanye deibuka, pia telebuk unamabe,” nyabuk. Daud birye Mazmur yupu noutamak sekamuk yupu ara ani. အခန်းကိုကြည့်ပါ။ |
Roma 4:6
31 ပူးပေါင်းရင်းမြစ်များ
Bukni, dan ninye do nirya, ‘Israel ninye optibye,’ tenen, ninye on ning kintinibikirye, olyasiting bukni, kum winipmanto upnamake. Aning atonun, dan nang do nirya, anggun Israel ninye ati, ‘Malye kum winipmakibuk malye yupu sik deice nyapnuyabe,’ tenepnamsiyak nang ara, urdemuk unamake. Sikce nyanamsiak yupu ara, talye urdemuk nyanmatinga babye, nong kum upnamle. Tonda ayupu nyanamsiyaka deice arye malye kum kipdeipsitinge. Narye melipsiniba, anggun Israel nang arye amalye yupu talamak nang ati, yupu sekmunyeba, yupu kum asa unamake. Nara Allah Yahweh arye anggun Israel ninye ati nyapsine. Arup nyapmasin yupu nirya ara, na amu tam unamlum nang melipsiniba, dolonamlulume. Yuk ninye arye anggunti, malye yupu nyanamsiak bukni, na Allah arye anggunti pia melipsiniba, teleb upmunyopura, yuk mutuku ninye nirya arye, kel biknamake. Ara, ‘Se, Israel ninye ara, dipkoprob Allah el ‘Naʼ tenen, ninye unyake,’ tenen, kel biknamake. Narye dekna arin ning ara, pia teleb una deiyok ning arepsiniba, telebuk unamlume. Allah arye Israel ninye ati nyabuk.
Na Allah Yahweh arye nyapsine. Amutuku talilula deiyoknye, Raja Yehuda, el unak ara, pia urasin teleb aik, istana ulye ning ati, na pia teleb kanye delinune. Ara, urasin pia teleb mutuku, Gilead mutuku ap, Libanon mutuku dup ap, ‘Urasin pia teleb ulamle,’ tenenye touk, amutuku istana Raja ati, aninguk tenenyake. Bukni, anggunce, na nyapmasin yupu moubuka kum taleplumce, malye-malyeuk winimunyopura, na nyalin yupu deice arye nyapsine. Dipkoprop amutuku ara, tamubuka malye kipdeipnamne. Winipmanto ara, pata mutuku atonun kipdeipniba, ninye ton kum unamake. Amutuku nirya ara, oldem kipdeipnamne.
Atalak noutam ara, Yehuda mutuku noutam unyak nang, anggun mal olan nang oplopniba, anang ap, tonda, Yerusalem mutuku weik asik noutam unyak nang ara, lyepropniba, sik anang nirya ara, teleb kanye deibuka unamake. Sikce, ‘Se, nun mal olan nang arye olyasicakʼ tenen, tuba kum teninamake. Atalak ara, amutuku nang arye, Yerusalem mutuku weik asik ati, “Amutuku el si ati ara, ‘Allah Yahweh nunti lyepsilirye, pia melibuka kalikinamsile,’ “nyabuka, si erenamake.
Gabriel birye nyabuk yupu ara, ani. Allah arye anggun Israel ninye ati, tekbarye tujuhpuluh kali, tekbarye talak (490) ton, lo tabakuka arepnamsile. Anyarepnamle ning deiyok ara, ani. Ara, Allah el ‘Naʼ tenen, ninye, Israel ninye ap, tonda, Yerusalem mutuku noutamak unyak nang ap arye, ‘Sik malye wininyak ning nirya bataknamak’ tenen, lo arepnamsile. Ara, sik malye-malye wininyakce, Allah el yupu yanibuka batakanyak ning ara, batakikirye, ‘Tamubuka, Allah dam tamubuka yanamak’ tenen, lo arepnamsile. Winibicopura, Allah el ‘Naʼ tenen, mutuku, Yerusalem mutuku ara, malye winilongolamice ning nirya, kum kipdeibuka, teleb kipdeipnamle. Atalak ara, sik malye winilamak ning nirya, kum daneipnamsile. Winibuka lyepsilirye, pia diksukum winin ninguk arenamsile. Adiksukum winina ara, pia kum kum danamle. Tonda, Allah arye arelamukba, ninye arye lengdar deice elilamak ning ap, Allah el yupu laka len nang, nabi-nabi nang arye, aminyan talak winipnamuk ning ap, winipnamle ning ap, laka nyanyak yupu ap, nong lak upnamle. Tonda, Allah el Pia Teleb Lengna Aik kintinibikirye, teleb ubuka dopnamake.
Anyapmasin yupu ara talye ati kume. Deiyok ara, minop talak Allah yupu deice arye, ayupu ton sekamik. ‘Allah arye el diksukumuk ulul touk, elce diksukum kililul ninye ara, sik dib tenenyak deice aryuk, kam pia unamake.’ (Habakuk 2:4) Habakuk arye ayupu sekuka deiamuk touk, Allah arye diksukum una deiyok ning, kintinipsuk ara, el laka teleb yupu, ninye lyena yupu noutamak arye, lakak nyasulule. Adiksukum una deiyok ning arisulul ning ara, deiyok kouna talak arye dipdongobuka, doryanamle talak nirya ara, dib tenenyap deice arye arisulule.
Ura, Allah el kanye aniryuk nun ninye ati diksukum kilisululnye anya arye, ninye arye, “E, nun teleb winilamupe deice arye lyepsuke,” nyabuka kwaliptibye do? Kume, aning atonun pia kum nyaptibye. Ara deiyok kum upmala atia. Ura, Musa sekamuk yupu nirya pia lipsisikuka dobolbanyaka deice arye, kwalina yupu nyaptinge do? Kume, aning ara pia kum winipmanto. Diba tenebibya deice aniryuk, Allah arye lyesilirye, diksukum ninye kilisulule.
Abraham diba tenebuka deice, Allah arye elti, akunum diksukum kibukba, daulamuka ani, aminyan talakuk, Abraham biti diksukum kipdeibuknye biti, yuk ninye ara, ‘Allah arye anye talilule, tenepnamak’ tenen, bikilin ning aribuk. Alaka kilin ning aribuk ning ara, Allah arye den bam bol mouse ning sekna pil aribukba, Abraham arye doprobuk. Aning ati ara, Abraham bira, nun deiyok kounanye, nun apu kopropa usulule. Ara, yata ninye do nirya, den bam bol mouse ning kum sekenyak bukni, ‘Allah arye diksukum ninye kipdeipnamsil’ tenen, diba tenenyak ninye nirya ara, sik apu kopropa Abraham ulule.
Bukni, Allah elda malye un ninye ati, lyepsilirye, diksukum kilisululnye ulula anya arye, elti, dib teneplinye biti, diba tenelya deice aryuk, Allah el kanye aniryuk, “Anda diksukumnye,” nyabuka, teleb kilisulule. Ara, anye teleb pil dolamlya deice arye kume. Anye el diba tenebuka deice, Allah el kanye aniryuk, anye lyelule.
‘Allah arye sik ninye nirya malye wininyak ning ati, namin kilirye, sik malye wininyak ning kum kibuka delisulul ninye ara, kanye deibuka pia telebuk unamake. Nunce Allah el yupu yanilamuburye, malye winilamupu bukni, Allah arye amalye winilamupu ning ati, akunum lyepsuk ninye ara, kanye deibuka, pia telebuk unamabe.
Ura, ayupu deice arye, “Pia telebuk unamake,” nyalamuk ning ara, Yahudi yala ninye, den bam bol sekenyak ninye atibuk nyabuk do? Yahudi yala kum ninye, den bam bol kum sekenyak ninye ap ati, ayupu nyabuk do? Kume, ninye yala-yala nirya ati nyabuk. Ayupu deice ara, akunum nyapmasine. Nun apu kopropa Abraham diba tenebuka deice aryuk, Allah arye, “Anda diksukum teleb ubuka unanye,” nyabuka teleb kipdeibuk, nyapmasine.
Allah el kanye aryuk, ‘Aninye ara, Yesus Kristus ap, kanye talima dukdongobuka neika unamake’ tenen, el mapu kipdeipsuke. Yesus Kristus nun kanye noutam pil dosilya deice aryuk, Allah el weik kele arye, pil teleb kibuka dosilye ning ara, moubuka bikinyabe. Kristus elcuk nun malye winin ning kilipsilirye, diksukum un ninye kilisulule. Allah ap, ansinilisulule. Kristus el pil dopsuka deice aryuk, nun malye winin ning kilibuka pununa ato ning punupsukce, nun malye winilamubu noutamak arye, lobuka lyepsukce, Allah el mapu kilisulule.
Ara, Allah arye nun lyena ap, yok pununa ap ati, malye winin ning tonok ning babye kum ulamukce, pia diksukum ululnye Yesus ara, Allah arye dobuka, tukwak ninye nun malye winin ning nirya el nong deice deibukba, nun malye ning nirya dobuka kum kipdeipsuke. Ara, nun malye winin ning pununa ati, winipsuke. Winibuka deiyok ara ani. Allah arye utenyamuk, ‘Tukwak ninye nirya, malye winin nang unyak bukni, nara Allah pia diksukum unye touk, Kristus ap aninye ap talima dukdongopniba, Kristus deice arye, aninye diksukum kipdeipnamne,’ tenebukce, Allah arye apil dopsuke. Na Paulus arye nyapsine.
Kristus dibuka deice arye nun malye ning nirya ati punupsukce, dekuka dopropsukce, lyepsuka deiyok ara, Allah arye nunti, ‘Teleb kilinamne’ tenen upsuke. Ara, Allah arye Abraham biti, “Teleb ulinamkine,” nyalamuk ning ara, ‘Yahudi yala kum ninye babye arenamne,’ tenyamukce kintinyamsuke. Ara, Allah arye, ‘Na mi Yesus Kristus arye pil dopnamla deice arye, Yahudi yala kum ninye babye, teleb winilinamne,’ tenyamuk. Allah arye, ‘Abraham biti teleb ulilamse touk, aninye babye teleb winilinamne. Aning ara dopropnamake’ tenen, Yesus dobuka deipsukura, Yesus dibuka deice arye deksukce, lyepsuke. Aning babye, Yesus arye nunti utenepsuke. Aninye arye, na Yesus Kristus ati, diba tenepnamniyaka deice aryuk, Allah arye, “Na Dib Kanye dobuka tukwak mutuku ninye arenamsine,” nyalilamuk ning ara, ‘Sik Yahudi yala kum ninye babye dopropnamak,’ tenyamsukce, el dibuka deice arye lyepsuke.
Winilamnulum bukni, wini talak ara, anggun min arye kanye deibuka pin-pin asa arye teleb winilamluma ara, yata deiyok arye kum winipsuk do? Na peterelamsisiba, kanye deibukap pin-pin asa arye, teleb kibuka melyamnulume. Winilamnuluma deice arye, na kele, na melina ati, anggun babye asing lukuka arepnutumopura, dipkoprop arepmanutum bukni, aning ara kum winipmanto ninge.
Ati ara, anggun Israel ninye ara, anggunda pia telebuk unamlume. Allah arye, pia teleb kipdeipnamsile. Allah el si Yahweh arye, anggun Israel ninye ati, lyepdeipsukce, wiamsuk bukni, yuk mutuku unyak ninye ati, aning atonun, sikti, ton kum wipdeiamuk. Allah arye, anggunti melisulule. Yin talin nang arye, ‘Mal arye opsicak’ tenen, ting kiniklamik touk, Allah arye anggunti, moubuka kalikisulule. Ninye arye, pia teleb parang ya bobikirye, kalikilalamak touk, Allah arye anggunti, kalikuka melipsilirye, anggun mal olan nang ati, obuka sirya daknamle. Winilula ati, el melipsilyopura, anggun mal olan nang dam bimunyopura, anang arye, ilil weik upliba, kanulongonamake. Winibikirye, ‘Se, nun ona kume, bico tenepsululume,’ nyabuka moropnamake. Anang nirya obuka, sirya dakmunce, sik nong deice yaniptapnamlume. Tonda, sik Isa Mutuku Dongonye, el si erena ati, mutuku deice delilamak ning nirya ara, daklopmunye deice, yanibuka banamlume.
Musa seklamuk yupu talibuka dobolbanirye, diksukum unya deice ara, Allah arye, ‘Anye bira telebnye ulule,’ kum tenenamnile. Aning kum bukni, pia patapnil ning ara, narye, Kristus ati diba tenenun deice aryuk, Allah arye, “Elda telebnye,” nyabuka deipnamnile. Aning ara, akunuma. Yuk winin ning deice arye, teleb kum kipdeipnamnile. Kristus ati, dib tenebibya deice aryuk, Allah arye, talye arena atonun, ‘Aning ara, diksukum teleb nang unyake,’ tenepsilirye, teleb kipdeipnamsile.
Allah el mikip deice arye nunti, ‘Malye ning nirya batakuka, diksukum un ninyeuk unamak’ tenen, nyabuka melipsukce, akunum lyepsuke. Winipsuka ara, nun teleb ubuka pil dolamupa deice arye, kum lyepsuk bukni, elce minop talak akunum tenyamsuk touk, elce nunti bico tenepsukce, el kanye aryuk nunti talye melibuka lyepsuke. Allah el kanye aryuk bico tenyamsukce, ‘Yesus Kristus el pil donamla deice arye, aninye melibuka lyepnamne’ tenen, kintiniyamsuk ning ara, Yesus Kristus deice arye kintiniyamsuke. Aning ara, aning-aning min kum kwepdeiamuk talak arye, nun Lyena Deiyoknye Yesus Kristus akunum kintinipdeiamsuke.
Bukni, tonoknye birye, nati nyapnutue. “Kume, tonye bira, diba tenen ninguk upmale. Yuknye bira, diksukum winin ninguk upmale,” nyapnutue. Bukni, narye tamubuka nyapsine. Anggunce, anggun winin ning laka nyana kum arye, “Na diba tenepse ning ara, ani,” nyabuka, talye yupu deice arye, laka peterepnutum bukni, lakak nong kum kel kipsitinye. Nara anggunti, na diksukum wininun ning, laka nyapsitinyopura, na winin ning deice arye, diba tenepse ning ara, nong lakak uplibuk, aning deice arye, kel kipnamlume.
Na kayapu, telebe nyapsine. Asurat ara, na Simon Peterus arye seksene. Yesus Kristus lyebuka talipnuka, ati el piluk donune. Tonda, ‘Na yupu dobuka peterelbanamle. Rasulnye unamle’ tenen, Yesus arye wibuka deipnuke. Allah kanye deipsukce, nunti el yupu ap, nun diba tenen ning ap, areamsukak, dobuka talyamubu ning, pia teleb ulye touk, anggun babye, atonun upsukbuk, diba tenebuka, na nyapman ning talibuka ululume. Nun Lyena Deiyoknye Yesus Kristus ara, Allah ulule. El diksukumuk ulya deice arye anggun ap, nun nirya ap ati, diba tenena ning areamsukak dopdobupu. Anggun nirya ati asurat seksene.
ကြော်ငြာတွေ