Roma 3:4 - Eipomek4 Kume, aning kum nyaptibye. Allah arye nyasilye yupu nirya ara, dipkoprop ulula anya arye, elce nyalamuk touk dipkoprop nong upnamle. Bukni, tukwak unyak ninye nirya ara tilila yupu talye nyaltakanyake. Allah yupu noutamak ara, ayupu ton sekamik. ‘Allah ance nyasiminye yupu nirya ara, dipkoprop nong upnamle anya arye, ninye nirya arye, ‘Dip yupu nyapsuke’ tenen, kel bikinamak ca. Ninye arye Allah ati, “El malye ubuk ning ara ani,” nyabuka talye nyaploptinga babye, nong kum uptue. Nyace ninye nirya ati, Allah arye malye kiplirye, wenebuka yupu lepsisikuka bokeipnamle.’ (Mazmur 51:4) အခန်းကိုကြည့်ပါ။ |
Roma 3:4
33 ပူးပေါင်းရင်းမြစ်များ
Ara, talye ati kume. Deiyok ara, Allah Yahweh ara, telebuk ulirye, nun ninye ati, bico tenepsilirye, pia tuba melisilya ara, pia kum bataknamsile. Allah arye, “Wininamsine,” nyabuka, nyalina yupu deice nyasilye touk, pia dipkoprob winilule. Minop talak dorapce deibikba, dadeipdanin yanganyap ninye nirya ati, tuba-tuba tenesilirye, melisulule.
Tonda, Allah an si eren aik, malye ning pia kumak, pia teleb lek aik ubuka dam arye, an si erena ati, tuku deice kutam dipdongobuka, anyaik eipnirye, an kekena ati, amot nyana deice arye nyanune. Wininuna deiyok ara ani. Ara, Allah an ap, an si pia telebnye ap, ance, “Winipnamne,” nyalyam yupu atonunuk kibuka, winilyam ning nirya ap, aning nirya ati, “Telebe,” nyapkine. Tonda, anda pia weik tonun bico tenesimince, “Batakna pia kumce, winibuka teleb kilinamsine,” nyabuka, nyalin yupu deice arye nyalisilyam touk, aning tuba-tuba winisilyam ning ati, narye, “Pia telebe,” nyapkine na nio. Ati ara, Allah an siuk pia erekunune. Ara, aning-aning nirya aupmal bukni, ance yuk awamlye ning deice tam ara, an si akunum erebuka deiamluma ati, an si ara, weik mambul si ulule.
Winipmanto ning ara, ninye arye nininga uamlye baju, mek likikiba, pia teleb ulamle touk, na ni Allah, ance na malye winipse ning ton nirya ati, kilipnimince, kum kipdeipnamnilyame. Tonda, na kanye talima pum tam, malye tenepse ning ara, ance anirya kilipra wipdonoknimince, telebuk kipdeipnamnilame.
Ati ara, anggun tukwak mutuku noutam ululum nang, mutuku sirya, im sirya nirya ara, Allah atibuk, diba tenebuka, el deiceuk anggun kanye talima delinamlume. Tonda, anggun kanye talima noutam, ikin usulul ning nirya ara, el tibuk laka nyanamlume. Diba, Allah ara, nun lyena deiyoknye usulule. Elce melibuka kalikinamsile.
Allah an mapu koprop ara, Abraham arye deiamukba, dadeipdanin balamik nang, nun Israel yala ninye ati, tenepsimince, bico upkiliba, tamubuka lyepnamsilyame. Tonda, nun apu koproba, Yakub birye deiamukba, dadeipdanin balamika ani, deiamsik Israel nang ati, tenepsimince, bico upkiliba tamubuka lyepdopnamsilyame. Ara, minop talak ancuk, nun apu yapu nang ati, nyalin yupu deice arye, “Wininamsine,” nyapdeiamsulum touk, wininamsilyame. Pia kum bataknamsilyame. Ance nun apu yapu nang ati, “Wininamsine,” nyapdeiamsulum ning nirya ara, kum bataknamsilame. Aning nirya ara, dipkoprob pil donamsilyame. Aminyan talak babye, nun dam teleb winilinamsilyame. Ayupu nyabuka, nabi Mika birye Allah ati, nyabuka morobuk.
Bukni, Yohanes aning winilamuk touk, na Yesus arye kum wininune. Nada, Ninye Mi Koprop Atonunye birye dina teleb ning ap, anggur mek kanye wangalamak mek ap, dipra unun bukni, nati anggun diba kum tenenyak nang arye, “Anye Yesus ara, din pia dilulnye ulule. Elda, kanye wangalamak mek pia dilulnye ulule. Ati, elda malinye ulule. Tonda, ‘Amutuku talina deiyok nang, Roma mutuku nang arye dopropnamak’ tenen, pajak yo bok bulubuka delilamak nang ap, malye-malye unyak nang ap, anye bira Yesus ara anang ap, neika ulule. Aning nirya ulula ati ara, pia malye winilule,” nyaninyake. Nati, diba tenena kum nang arye ayupu nyanyake bukni, na dipkoprop nyapsine. Weik kel nang arye teleb wininyak ning ati, yuk walwal nang arye, “Aning ara talye,” nyanyak bukni, aminyan talak ara sik weik kel nang arye wininyak ning nong akunum upliba lakak uplyopura, ninye nirya arye, ‘E sikce teleb winilamik’ tenen, kel biknamake. Aning atonun, diba tenena kum nang arye nati, “Elda malyeuk ulule,” nyabuka malye yupu nyaninyak bukni, na ap, amalye un ninye ap, neika unmabya ani, aminyan talak ara, na yupu diba tenebikirye, sik malye un ning batakuka, diksukumuk unmakce bukni, eipmunyopura, kel biknamlume. Na pil donye ning nong uplye talak aryuk kel biknamlume. Narye aninye ap neika umunya ara, telebe uka. Yesus arye nyabuk.
Winilamika ati, anggur tapu duk wa tuku deiyoknye birye, el wa dam tamubuka yanamle talak ara, el wa tia talibik nang ati, yata wiripnamle do, kume. Aminyan yanamle talak ara, awa tuku tia talyamice nang oploplirye, awa tuku dobuka yuk nang ati arepnamle. Yesus arye sik Allah arena ati deiyok nang ap, Musa sekamuk yupu peterena deiyok nang ap, sik awekmek nang nirya ap ati, adomon yupu nyabuk. Yesus arye ayupu nyanmoka ati, ayupu kekenmek nang arye, utenebik. ‘Se, anyapsil ning ara, talye ati kume. Ara, nun Yahudi ninye batakuka, Allah yupu dobuka Yahudi yala kum ninye ucak peterepra balibuk, diba tenebiceura, Allah arye sikti, el mapu kipdeipnamle,’ tenebik. Utenebikce ayupu nyabik. “Se, ‘Allah arye anyapmasilye touk winipsilyak’ tenen, malye kanye bobape. Aning ara, kume,” nyabik.
Ton nang ara kum kekenyak bukni, yuk nang el nyasilye yupu diba tenebuka kekebicopura, adeice arye, lak akarye nyasinyake. Ara, ‘Allah elda pia dipkoprop yupu uk nyasulule’ tenen, kel kibika ati, sik diba tenenyak deice arye, yuk nang babye eibikirye, ‘Allah ara dib yupu uk nyasulule’ tenen, kel kinyake.
Winira yuk yupu ton asipdenusine. Sik Israel ninye arye Allah ati malya kibuka yaniltalamikba, Allah arye el wipdeiyamuk Israel ninye ati, ‘Na like,’ tenebuka, pia batakuk do? Aning ara pia kume. Na Paulus babye Israel yalanye unune. Nun apu kopropa Abraham arye deibukba, dadeipdanin yangalamika ani, sirya talak ara, taruk bokuka delilamik ning, Benyamin yala ninye arye na deipnike.
Na kayapo, tonap asipdesine. Allah arye sik minop talak ulamik Israel ninye ati, “Ninye lyena ning ara, winibuka unamne,” nyalamuk ning ara, ‘Nun lik’ tenen, yaniltalamik. Winilamika deice arye, keil yan dum duklamsil touk, sik Israel ninye malye ulamikce, keil yan dum dukliba kote saklamak touk ulamik ning ara, lipsisikuka lyepmanto kum unyak do? Kume, lyepmanto unyak bukni, sik Israel ninye malye winilamika deice arye, ninye lyena deiyok yupu ara, yala yuk-yuk ninye sik dam anyuk akunum yangalule. Ara, Israel yala kum ninye ati, buru tam ninye ati, Allah arye ninye lyena ati laka teleb yupu, peterena deiyok nang arye ayupu dobuka, yuk mutuku ninye dam akunum yanuka peterenyaka ati nyapsine. Allah arye utenyamuk. ‘Yuk yala ninye noutamak ara, ninye weika arye lyepneba, Israel yala ninye arye, se tenebikirye, sik talima pum tamuk dinamle,’ tenyamuke. Ara, Israel ninye arye, ‘Se, yata deiyok ning ati, Allah arye yuk mutuku ninyeuk minopce lyelolul do? Allah arye nun ton lyepsitue tenen, se tenebikirye, bouku sukunamle,’ tenyamuk.
Aning ati ara, ton nang arye nyapting do? “Kume, anggunda, ‘Allah arye lyesulula deiyok ara, diba tenena deice aryuk lyesulule,’ nyalulume. Nyaluluma anya arye, anyamunya deice arye, ‘Musa sekamuk mem yupu ara mambul kume. Nong kum upnamle yupu uk ulule,’ nyabuka yaniltana atonun ululume,” nyapdeipsiting do? Kume ayupu ara dipkoprop kum nyapsiting. Allah arye diksukum kilisulula ninye arye, el yupu yaniltana kumce, Yesus ati diba tenenyaba deice, ‘Allah arye, “Aning ara wininamlulume, aning ara kum wininamlulume,” nyapdeiyamsuk yupu ara mambul’ tenen, si erebibirye diksukumuk unamabe.
Ura, na kwit capu, yuk yupu ton nyapnusine. Ton nang ara nyanyake, “Kume, Musa birye sekeiyamsuk mem yupu talibuka, aning amu tam ton kum unyabe. Allah bico tenesilirye, el kanye aryuk melisilya deiceuk unyabe. Ati ara, talye kanye bobuka malye winin ning nirya, talye luparabuka uptibye,” nyanyake. Utenebuka nyanyak bukni, ayupu nyanyak touk wininamap do? Kume, aning ara pia kum wininamabe.
Kume. Aning pia kum wininamabe. Akunum diamice ninye arye, aning-aning nirya patalyeba kum ulamak touk, nun babye atonun malye winin ning nirya ati ara, akunum batakupa anya arye, malye winin ning ara tonap pia kum tenenamabe. Ati yata ning ati tonap talye luparabuka malye winiptibye do? Kume, nunda winiryuk talima arepsuk ninye anya arye, aning kum winiptibye.
Musa birye sekamuk mem yupu, teleb yupu ulul bukni, nara, “Dipnamne,” nyapmasina ara, Musa sekamuk yupu kel kiyamsa deice arye, malye kipdeipnuka ati, “Dipnamne arya,” nyapmasin do? Aning ara kum bukni, ateleb yupu kel kiyamsa deice arye, ‘Malye winin ning ara, dipkoprop ani’ tenen, moubuka kel kiyamse. Kel bikamsirye, ‘Se, na dipkoprop pia malinye unune,’ tenyamse. Tonda, ‘Dipkoprop dipnamnarya’ tenen, kel kiyamse. Allah arye nyapdeiamsuk mem yupu ara, teleb yupu ulul bukni, na kanye talima malye weik unulule anya arye, ateleb yupu kekelamsa deice arye, ‘Se, na dipkoprop dipnamnarya’ tenen, kel kiyamse.
Yuk nang arye, “Musa sekamuk mem yupu talyamupa deice arye malye winin nang kipdeipsuka ati, Allah arye mem yupu nyapsuk ning ara, malye yupu ulule,” nyapting do? Kume, aning kum nyapsitinge. Allah arye, “Aning ara wininamlulume, aning ara pia kum wininamlulume,” nyapdeibukba, Musa birye sekeiyamsuk mem yupu, kum uamtu toura, yata yupu deice arye, ‘Malye winin deiyok ning ara ani,’ tenebuka kekeptibirye, kel biktibye do? Musa birye sekamuk mem yupu deice arye, ‘Malye winin ning ara ani,’ tenen kel kiyamupe. Winipmanto ara, Musa sekamuk yupu noutamak arye ayupu ton aulule. ‘Yuk nang sik talinyak ning ap, sik wininyak ning ap ati, ‘Se, naryuk taliptinye’ tenen, patasiliba kanye talima engena pia meme.’ (Keluaran 20:17) Bukni, ayupu kum wamtopura, yata ning deice arye, ‘Aning ara malye’ tenen, kel kiyamtibye do? Kume, aning nirya babye min kel kiyamtibye.
Ura, na kwit capu. Arup nyapmasin yupu aupsuka ati ara, nunce yata yupu nyaptibye do? Nun tukwak nang arye, “Se, Allah arye tenelye touk, ton nang ati kanye delilul bukni, yuk nang ara batakalule. Ati nunce Allah ati, malye ulule,” nyabuka, malye nyaptibye do? Kume, Allah arye malye kum winipmantonye anya arye, aning kum nyaptibye.
Anggun dib tenelulum ninye nirya ara, Yesus Kristus el nong atonun akunum umunye ning ara, moubuka kel kum bikildalulum do? Bikna kumce, talye wininyaba anya arye, dipkoprop ara nunda, Kristus el nong atonun unyap bukni, ton tam bokuka dopropnirye, talye-talye yolamak kil ap dukdongopnaman do? Kume, na kayapu, aning ara, pia malye anya arye, aning ara, kum winiptibye ning nyapsine.
Kume. Allah arye, “Wininamne,” nyabuka nyasilye touk, pia batakana kumce, dipkoprop aninguk winilamle touk, nunce anggunti nyasinyap yupu ara, atonun ulule. Kanye bokoltona deice arye, tonok talak aryuk ton ning ara, “Diba,” ton ning ara, “Kume,” kum nyasinyabe. Moubuka tenebibirye, dipkoprop ninguk nyasinyabe.
Yesus Kristus diba tenenyaba deice ara, Allah arye nunti, “Sikda diksukum ninye unyake,” nyabuka, ‘Teleb ulinamsile’ tenen, wininyap talak ara, malye winin ning ila tuba tonap winibibyopura, awininyaba deice arye yuk nang eipsikirye, nunti, “Ara Kristus ara, malye winin ning ati kanye delilule,” nyapsiting do? Aning ara kume, ayupu ara dipkoprop kum nyapsiting. Yesus Kristus birye, malye winin ning nirya ara, kanye kum delilule.
Winipnuka ati ara, Allah arye nunti bico tenepsukce, el kanye aniryuk melyamsuk ning, Yesus arye nun pununa ati dipsuka ara, ‘Dawaplye’ tenen, kum bataktinye. Aning ara talye ati kum nyapsine. Musa sekamuk yupu kekebibirye, teleb ubuka dobolbalamtibya deice ara, Allah arye nunti, “Anggunda diksukum un ninye,” nyabuka teleb ulilamsutu toura, Kristus birye nun pununa ati dibuk ning ara, nong kum uptue. Talyauk diptue. Bukni, mem yupu dobolbanyaba deice arye, Allah kum lyepnamsile. Kristus birye pil dopsuka deice aryuk lyepnamsile. Na Paulus birye nyapsine.
Narye yata ning do nirya, kanye deipnirye merkapang kum donamne. Bukni, tonok ning atibuk, si erebuka kanye deipnirye, merkapang donamne. Ara, nun Deiyoknye Yesus Kristus wanwanun yo deice obikura, nun lyena ati dipsuk ning ati, kanye deibuka, pin-pin asa arye merkapang donamne. Yuk ning nirya ara, pia kume. Yesus Kristus wanwanun yo deice obikba, nati dipnuk ara, na ap dukdongopnukce, na malye ulamse ning pununa ati dipnuke. Na lyena ati akunum dibuka anya arye, adeice arye na kanye ara ani. ‘Tukwak mutuku ulul ning, malye ning nirya ara, nati ara, aning nirya akunum kum danmala anya arye, na talima lipropnuturye, malye kum kipdeipnutue,’ tenenune. Tonda, ‘Na tenenuna ara, tukwak ulul ning, malye ning nirya ara, pia kum patanamnile’ tenen, unune. Nara, akunum dibikce ninye nirya kum patalamle atonun unune.
Nun ni Allah, yuk-yuk kum ulule. Elda keil pala yangalamla atonunuk ulule. Weik keil pia aulye touk, Allah babye, pia aulule. El tenena ap, el winilye ning ap ara, yuk-yuk kum ulule. El pil dolye ning ara, pia telebuk winilule. Tonda, el winilul ning nirya ara, dipkoprob kibuka diksukumuk winilule. Allah el pil dolul ning ara, ‘Ton tam nang, teleb kipnirye, ton tam ara, namin kipnamne,’ kum tenelirye, el nyalul touk, nirya pil dolule. Malye ning tonok babye, ton kum winiptue. El winilul ning nirya ara, yamubuka diksukumuk winilule. Ninye winilamak touk, elce teleb kibuka, yupu diksukumuk bokolisulule. Ati ara, el si erenyabe.
Anyapnukin yupu ara, ‘Tilila do, dib do?’ tenen, kum tenepmanto ning. Ara, Allah arye duknyamukbuk, ninye kum kel bikamik bukni, wini talak Allah arye anoutamak weik mambul yupu akunum laka kipdeipsuke. Ara, Allah diksukum ulye touk, nun babye, diksukum una ati, winipnamap deiyok ning ara, ani. Allah ninye nong atonun dayukce ninye eipnamik ati, laka yayuke. Allah El Dib Kanye pil dobuka deice arye, ‘Yesus ara, el dipkoprop Allah El Mi Koprop’ tenen, dib tenebuka, ‘Kel biknamak’ tenen, laka kibuk. Lak kibukura, Allah el im deice pil don nang, malaikat arye eibik. Ninye arye, Yesus el yupu dobuka, ninye mutuku-mutuku nirya ati, amutuku-amutuku nirya binuka peterelamik. Peterelamikbuk, ninye mutuku-mutuku nirya unyak ninye weik arye kekebuka dib tenelamik. Aminyan sirya talak ara, Allah arye Yesus ati, pia teleb kipdeibukce, erebuka im deice bobiyukura, im deice tam ulule.
Allah arye tilila yupu pia kum nyalule. Aning-aning kabul kum kwepdeiamuk talak ara, “Bol kobuka pia kam una deiyok ning arepnamsine,” nyabuka nyalilamsuke. Nun nirya arye, kanye teniltona kum aryuk, ‘Dipkoprop pia kam un ning arenamsil’ tenen, dib tenebuka dinauk unyabe. Wininyaba deice ara, nun dib tenen ning ap, kel bikinyap ning ap, ulule. Yuk deiyok ton kume.
Allah arye, “Wininamsine,” nyabuka, nyalilamuk yupu ap, el si kopropa deice arye nyabuk yupu ap ara, urasin yuk pia kum tamupmanto, elce nyabuk touk dipkoprop unamle. Allah arye aning bitinye ati, tilila yupu kum nyaptua anya arye, dipkoprop wininamle. Allah arye, ayupu bitinye deice nyapsuk ning deiyok ara ani. Ara, sikce, ‘Allah dipkoprop lyepnamsil’ tenen, diba tenebuka dinauk unyak ninye ara, ayupu kekebikca deice arye, talima kwa dipsilyopura, kanye teniltona kum unamake. ‘Allah arepsiliba, dopronamak ning, batakna kumce pia moubuka talibikirye unamak’ tenen, nyapsine.
Allah el Mi Koprop ati, diba tenebuka talinyak ninye ara, Allah arye el Mi ati nyasilye yupu, sik talima ak ulule. Allah arye nyasilye yupu, diba kum tenenyak ninye ara, “Allah elda tililanye ulule,” nyalamak touk unyake. Ara, anggunda Allah arye, el Mi Koprop ati laka nyabuka arepsuk yupu, diba kum tenenyaka ati nyapne.
Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.
Ninye Mi Koprop Atonunye birye nyapnuke. “Yohanes, ance Piladelpia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara ani.” Malye winin ning tonok ning babye kum wininirye, pia diksukumnye unune. Tonda, na nyasinye ning nirya ara, pia dipkoprop yupu ati ara, ayupu batakna kumce, anyapmasin touk dipkoprop talibuka ununye birye, ayupu nyapsine. Na aryuk nyanamne yupu ara ani. Ara, “Akili sal ara, Allah el ulya im deice wekna telebe. Bukni, anang ara, im deice kum wektinge,” nyabuka, tukwak kili sal wibuka, yuk-yuk bokolina deiyoknye bira, na unune. Narye buplan pakeipnyopura, yuk nang arye abuplan ila tuba tonap kum tiriktinge. Aning atonun, narye buplan tirikdongopnyopura, yuk ninye arye kum kukeiptinge. Bublan kukulina ap, buplan tirikina ap, deiyoknye bira na uka.
ကြော်ငြာတွေ