Ance nunti, “Aninguk wininamlulume. Aning ara, kum wininamlulume,” nyalisilyam yupu ara, pia diksukum yupu uk ulule. Atonun, an yupu nirya ara, dipkoprob yupu uk ulule. Tonda, an malye ning, tonok ning babye kum ukilye touk, pia diksukumuk wininalame. Anda diksukum telebnye winilalum atonun, pia teleb ubuka, diksukumuk pia wininalame. An diksukumuk winilyam ning ara, pia kum danamle. Wini talak diksukumuk winilyam touk, pia awininamlame.
Roma 3:25 - Eipomek25 Allah arye Kristus ati utenyamuk. ‘Yesus Kristus obikiba, el ining binamla deice arye, ninye tukwak ninye sik malye winilamikce ning nirya kum kipdeipnamle. Ninye tukwak ninye, sik pununa ati dipnamle. Yesus obikiba dipnamal deice arye, diba tenebikcopura, tukwak ninye sik malye wininyak ning pununa ati lyepnamle,’ Allah arye tenyamuk. Minop talak ara, ninye nirya arye malyeuk winilamikba, Allah arye, ‘Dauplye’ tenen, namin kilamuk. Bukni, Allah arye, tukwak ninye nirya ati, ‘Allah ara pia diksukumuk ulule’ tenen, ‘Moubuka kel kipnamak,’ tenebukce, Yesus Kristus tukwak mutuku dopkwetepsuke. Ara, tukwak ninye nirya arye, ‘Kume, Allah elda, malye winilamikce ning ati kum bataktue. Malye winilamikce ning nirya ati, yupu lipsisikuka wenelule,’ tenebikirye, ‘Moubuka kel kekepnamak’ tenen, nun pununa ati, Allah arye Yesus Kristus tukwak mutuku dopkwetepsuke. အခန်းကိုကြည့်ပါ။ |
Roma 3:25
51 ပူးပေါင်းရင်းမြစ်များ
Na ni Allah Yahweh, an kele. Ance, ‘Diksukum winin ning ara ani,’ nyabuka laka nyapdeipnulum yupu nirya ara, tonok ning babye duknubuka, kum batakanune. Ninye nirya arye, an si eren ati, bulubuka wekenyak aik pum tam arye, ance nyasiminye yupu nirya, lakoprop kibuka laka nyanune. Ninye nirya wekenyak sukum laka nyanune. Tonok ning babye, kum batakanune.
Tonda, Allah arye kwepdeibukba, im noutam ulye ning nirya, eipnamaka deice arye, Allah el pia teleb, diksukumuk ulul ning ara, moubuka tenebibirye, bikinyabe. Tonda, tukwak mutuku, im sirya, mutuku sirya nirya unyak nang, yuk-yuk nirya ara, elce kwepdeiamuk ning ebicopura, ‘E, Allah ara, dipkoprob pia mikip weik tonun una ap, pia teleb unanye ulule,’ tenen, moubuka bikinyake.
Allah Yahweh arye, ‘Tukwak mutuku noutam unyak nang, yuk-yuk nirya ara, moubuka biknamak’ tenen, elce lyelosulul nang ara, akunum lak sukum arye, peteresulule. Diba, tukwak mutuku nang, yuk-yuk nirya ara, sik asing arye, Yahweh el diksukum winibuka, pia telebuk winilye ning ara, akunum laka delilula ati, elinyake.
Allah el si Yahweh arye, wipdeibukba, pil donamlanye bira, imun kanye bobuka, ikin deice aryuk ulamikca ani, akunum obikiba dipnamle. Aning akunum winiplyopura, kam bukuka kanye deiplirye, imun kanye bomuk ning, nong upnamle ning eilyopura, elce, ‘Na akunum upne,’ tenen, kanye deipnamle. El imun kanye bobuka unamla deice arye, ninye tukwak ninye weik, elce sikti, ‘Akunuma, narye aninye ati, akunum teleb kipdeipmane,’ nyapdeipnamle. Adeice sik kanye talima teleb ulinamle. Na Allah ati pil donamnilnye birye, ninye mutuku-mutuku nirya malye wininyak ning wenena ati, el nong deice uk dobuka deipdanamle. Winipnamla deice arye, na Allah arye ninye mutuku-mutuku nirya noutam arye ninye weik namin kipnirye lyepropnamne.
Bukni, undi pil dobuka winmali bukni, Israel ninye, sik malye winilamice ning pununa ati, bai tam dolkweten kambing, ara Asazel kambing nyalamik ning ara, adiparyuk bataknamlule. Bukni, wiplyopura, kam kipman adiparyuk, na si Yahweh, na Allah dam boyanamnulule. Israel ninye anggun malye winina ati, narye adiparyuk wenebuka opsitinye bukni, anggun malye winina ning pununa ati, akambing dobuka, aminyan talak, Israel ninye sik malye ning, el nong deice deipniba, Harun birye lopliba, ninye kum unyak mutuku noutamak bindopnamlule. Aning ara, ‘Na Allah ap, ninye ap, epdatibirye, teleb kibuka neika uptibye’ tenena ati, Israel ninye, sik malye winin ning akambing deice deipniba, akambing arye, sik malye ning dobuka, ninye kum unyakak mutuku noutam bindopnamlule. Allah arye nyabuk. Nyabukce, ayupu ton dukdongobuka nyabuk.
“Aning akunum winiplyopura, aning ton winipnamlule. Israel ninye, sik malye ning kilina ati, Harun birye kambing basam oplirye, el ining yangalin ning pum bisik dongoplirye, bobuka, Allah na si eren aik pum tam, cang kain lalkwetenak, balye tam bobinamlule. Bobilirye, sapi basam ining dobukaplirye, mambul marikna urasin dam ap, abublan deice ap, taruk arye purupdonokliba, dulbalamle touk, akambing ining babye, amarikna el si Peti Perjanjian deice purupdonokliba dulbanamlule.
Ura, minop talak Allah arye, ‘Sikce Yesus ati winipnamake,’ akunum tenyamuk ati, min kum winipmok talak ara, el akunum tenyamukce, kel bikamuka anya arye, ‘Yuk nang arye, Yesus dobuka, sikce opnamak’ tenen, malye nang arye, Yesus dobuka anggunti arepsike. Aripsikura, sik yuk pia malye ulamik nang meilyamika arye, Yesus dobuka, wanwanun yo deice deibikce, paku dakuka, Yesus obikura, dibuke.
Ura, Allah arye anggun nirya ati, ‘Se, sik malye winin ning bataknamak do?’ tenen, bico tenesilirye, adiparyuk minopce wenebuka kum osulule. Aning kum bukni, tia talak atibuk namin kisilya deiyok ara nyapnusine. Ara, Allah arye nun tukwak unyap ninye nirya ati, ‘Se, na namin asa arye teleb ubuka melipsiniba, lo tuba awaplyopura, adeice arye sik malye wininyak ning moubuka tenebikirye batakikcopura, tamubuka na tam kipropnamak do?’ tenen, kalikuka disulule. Winisulul bukni, anggun dan do? Aning, moubuka kum tenelulumce, ‘Talya luparabuka malye winin ninguk talibuka wininamap’ tenen, ululum do? Anggunce, aning tenelulum do? ‘Allah bico tenesilirye, adiparyuk wenebuka kum osulul ning ara, elce, ‘Lo arepniba, sik malye winin ning bataknamak’ tenen, patalyeba namin kisilya ara, mambul kum ati, dauplye,’ tenemunce malye tuba winilulum do?
Allah arye Yesus dopdeipsukba, nun malye winin ning ati yanuka dipsuka deice arye, wini talak Allah el pia diksukumuk ulul ning ara, akunum lakak kipdeipsuke. Ara, Allah, pia diksukum ululnye. Yatanye do nirya, Yesus ati diba teneplinye bira, Allah arye anye biti, “Anda telebnye,” nyabuka diksukumnye kililule. Ati, nunce kel kinyabe.
Tonda, aninguk kum bukni, minop talak ara, nun ap, Allah ap neikak kum upmanto ninye ulamubu bukni, Yesus Kristus dibuka deice arye nun ap, Allah ap ansinibdeipsukba, Allah ap neika pia unamabe. Wini talak ara, nun Deiyoknye Yesus ap neik kanye talima dukdongobuka upra banamap talak noutamak nirya ara, nun Ni Kopropa Allah ati kanye delinyabe.
Aning ati ara, ayupu ton nyapnusine. Tonoknye Adam birye malye ubukba, Allah arye ninye im sirya, mutuku sirya nirya ati, “Sikda dipnauk unamake,” nyapdeiyamsuk. Aning atonun, tonoknye Yesus Kristus arye, pia diksukum pil dopsuka deice arye, ninye malye winin ning kum kilina ap, ninye lyena ap, diksukum kilina deiyok ning ap kintinyamsuke. Anyapmasin yupu ati, diba tenebuka doprobica deice arye, ninye im sirya, mutuku sirya nirya noutamak arye, diba tenenyak ninye weika arye kam pia unamake.
Wini talak ara, nun kele. Kristus obikba el ining biyuka deice arye, nun malye un ning nirya kilipsukba, Allah arye, “Yesus apil dobuk deice arye aninye ara, diksukum ninye ubuka deipsine,” nyabuka teleb kipdeipsuke. Aning ati ara, nun kele. Yesus ap kanye talima dukdongobuka unyaba deice, Allah arye malye winin nang nirya ati, yu upliba sikti, lepsisikuka bokeiplirye, amalye winin ninye obuka sirya daknamle talak ara, Kristus arye nun diba tenenyap ninye ati lobuka lyepnamsile.
Minop talak sik Yahudi yala ninye arye, ‘Kaplina ati Kwalina dipnamap’ tenen, minop kintinipmek roti nena deiyok ning nirya bai tam dopkwetebikce, nena kum roti winiryuk ning dabuka dibik touk, wininamlulume. Ayupu el nong noutamak ning ara, anggun dib teneplum ninye noutamak arye, malye winin ning nirya wibuka dopkwetepmunce, diksukum ninyeuk umunyopura, Yesus ap talima dukdongobuka telebuk unamlume. Winibuka unamluma deiyok ara, ani. Ara, sik Yahudi yala ninye, ‘Nun malye winin ning Allah arye, kum kipdaneipnamsil’ tenen, Kaplina ati Kwalina ati, domba basam opnarye, Allah ati arilamik touk, nun Kaplina ati Kwalina domba atonunye, Yesus Kristus akunum obikbuk, nun malye wininyap ning pununa ati dibuka deice arye, nun malye winin ning akunum kum kipdeipsuke. Elce akunum teleb kibuka deipsuka ati, anggunda, nena kum roti, winiryuk roti atonun, diksukum ninye umunye ning ara, kum tenepmalum bukni, Allah el kanye ara, ‘Akunum diksukum unyake,’ nyapdeipsukce, telebe tenesulule.
Ara, Allah arye nun lyena ap, yok pununa ap ati, malye winin ning tonok ning babye kum ulamukce, pia diksukum ululnye Yesus ara, Allah arye dobuka, tukwak ninye nun malye winin ning nirya el nong deice deibukba, nun malye ning nirya dobuka kum kipdeipsuke. Ara, nun malye winin ning pununa ati, winipsuke. Winibuka deiyok ara ani. Allah arye utenyamuk, ‘Tukwak ninye nirya, malye winin nang unyak bukni, nara Allah pia diksukum unye touk, Kristus ap aninye ap talima dukdongopniba, Kristus deice arye, aninye diksukum kipdeipnamne,’ tenebukce, Allah arye apil dopsuke. Na Paulus arye nyapsine.
El mi Yesus, el ining biyuk deice aryuk, nun malye wininyap ning nirya namin kipsukce, kum kipdeipsuke. Nun malye winina ati oplopsutu bukni, nun pununa ati dibuksuka deice arye lyepsuke. Nun malye ning tapu kouamsuka noutamak arye, lobuka deksukce, lyepsuke. Winipsuk ning ara, mitik tonun kume. Allah el bico tenesilye ning ap, el kanye aniryuk talye arisilye ning ap, weik arye aulye touk, weik arye areamsuke. Ara, nun malye ning ara, nukmanto kum wamsuk bukni, aning nirya kum kipdeipsukce lyepsuke.
Minop talak ara, anggunda pera mutuku pia unyak ninye, pia bai tam ninye atonun ulalum bukni, wini talak ara, kume. Kristus el ining panabuka biyuka deice arye, Kristus ap, kanye talima dukdongobuka, akunum tonok nang kipdeipsuka ati ara, Allah el tam nang kipdeipsukce, el dam akunum dopdeipsuke. Wini talak anggun babye, Allah el mapu akunum ululume.
Ura, Nuh arye Allah ati, diba tenelamuka anya arye, Allah arye, “Ninye kum elilamik ning bukni, mok weika arye cepliba, weik mekwen deipnamla anya arye, tukwak ninye nirya opnamsina ati, kanye mouplulume,” nyapdeibukba, Nuh kekebukce, elda, ‘Allah weik mambule,’ tenyamuknye anya arye, ilil ubuk. Ilil ubukba, ‘Na mapu silip nirya lyepnamsil’ tenen, weik mek liya yo kintinibukce, amek liya yo deice, weik aik ton dobuka kintinipdeibuk. Awinibuka deiyok ara, Allah ati, weik arye diba tenelamuka deice arye winibuk. Nuh bira diba tenyamuk bukni, atalak sik malye winilamik ninye ara, aning nirya kum kekebuka, diba kum tenyamik. Sikce ayupu batakikba, Allah arye aninye nirya wenebuka oplobukce, sirya dakuk. Allah arye ninye teleb ulina ati, lipsisikuka delisilya ara, diba tenenyaba deice aryuk teleb kilisulule. Aning atonun, Nuh diba tenebuka deice arye, Nuh babye doprobukba, Allah arye, Nuh biti, diksukumuk kibuka teleb kipdeibuke.
Aning atonun, Allah arye, ‘Ninye tukwak ninye weik, sik malye winin ning kum daneipnamle’ tenen, like tonok talak aryuk Kristus dopdeibukba, malye nang arye Yesus obika deice arye, nun malye winin ning nirya akunum kilibuka kum kipdeipsuke. Aminyan talak ara, Yesus Kristus ila tuba tonap, tukwak mutuku dam kutukuka tikilyanamle bukni, atalak ara, ‘Malye winin ning, na nong deice deipnikiba kilipnamne,’ tenena ati kum yanamle. Aning kum bukni, bitinye talak yanamle deiyok ara, sikce, ‘Yesus dipkoprop dolyanamsil’ tenen, elti, diba tenebuka, dinauk unyak ninye ati, lyebuka dolyanamsile.
Amarikna delilamikak deice tam delilamik ning, malaikat urasin atonun ning, el si ara Kerub, puturubuka deiyamik. Kerub ara, malaikat urasin atonun puturubuka deiyamik. AKerub deibik ning ara, ‘Nun Ni Kopropa Allah asukum dam ulule teneanamak’ tenen, delilamik. Aning puturubuka deiyamik ning ara, emas marikna deice tam deibik. Amarikna deice dolamik pil ara, ‘Allah arye ninye malye winin ning kum daneipnamsil’ tenen, ining bulubuka amarikna deice likuka, delilamikak deice tam ubuk. Aning-aning nirya delilamikba, awamuk bukni, atalak ara, winilamik ning nirya ati, yupu kum laka nyaptibye.
Allah arye ninye mutuk sirya im sirya nirya ati, “Sik nirya malye unyake,” nyabuke. Nyabuka ati, nunce, “Kume, nunda malye kum unyabe,” nyabibyopura, talye kanye bon nang arye, “Allah tililanye ulule,” nyalamak touk, nun babye atonun nyanyabe. Nyalamibyopura, Allah el yupu kekebuka, pia kum talinyap anya arye, el yupu nun talima ak kum usulule.
Nun malye tenenyap ning ap, malye wininyap ning ap, kum ubuka delina ati, akunum deksukce, lyebuka deipsuke. Allah arye nun malye unyap ning ati wenebuka opsutu bukni, ‘Sik opnyak’ tenen, nun pununa ati, Allah tenyamuk tok, sik malye nang arye, Yesus obikbuk, el ining binmoka deice arye, nun malye winin ning nirya kilibuka, kum danalisulula ak, Allah arye namin kilisulule. Ara nun malye wininyap ninguk kume. Ninye mutuk sirya im sirya nirya sik malye wininyak ning babye kiliplirye, lyelule.
Dipkoprop bico tenena ning ara ani. Ara, nunce mankau ulamuburye, Allah ati kanye kum diamube. Winilamubu bukni, nun malye unyap ning nirya awamukbuk, ‘Sik pununa ati, Na Mi Koprop Yesus obikce deice arye, sik malye ning punupnamle’ tenen, Allah elce bico tenepsukce, el Mi Koprop arepsuke. Winipsuka ara, dipkoprop bico tenena ning ara ati, nyapne.
Ura, Yesus Kristus ara, pia diksukumnye ulirye, batakna kum diparyuk, Allah ati pia dipkoprop yupu uk nyasulule. Yesus ara, dibuk bukni, Allah arye minyuma kam bukeibuknye bira, el Yesus uka. Tukwak mutuku noutamak ninye deiyok nang weik aunyak bukni, sik deice tam ulirye, aning-aning nirya talibuka weik Ninye Deiyoknye Yesus ara, elce ton anyapmasin ning arenamsile. ‘Allah ap, Yesus ap, Allah el dam bunyak dib kanye tekbarye ap, sik nirye arye anyapmasin ning arenamsiak’ tenen, Allah morosunune. Na Yohanes arye nyapsine. Yesus Kristus ara, weik arye bico tenyamsukce, el ining biyuka deice arye, nun malye un ning tapu kouamsuka noutamak arye lobuka lyepsuke.
Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.
Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.
ကြော်ငြာတွေ