Anggunda, anang arye kanye moubuka tenina nirya kum arye, ‘Allah arye nyasilye ning ara, anggun apu yapu arye, ‘Nun likeʼ tenen, el yupu kekena kumce, sik kisok ara, keil arye kat ulamle touk, ulamik ning ara, anggun babye winina meme. Bukni, Allah arye nyabuk ning moubuka talipmunyakarye, Allah Yahweh, el amu tam teleb kibuka unamlulume. Ati anggun nirya ara, anggun ni Allah Yahweh, el si eren aik ati, ‘Anyaik ara, ‘Naʼ tenen aik. Anyaik ara, nanguk ulule,’ nyabuka, akunum kintinibuka deiamukak, Yerusalem mutuku tamubuka tuba-tuba pia yanganamlulume. Tonda, Allah yupu kekebuka unmunce, elce nyapsuk touk, teleb upmunce, el siuk erenamlulume. Winimunyeura, Allah arye anggunti, yu weik akunum tenesilye ning ara, bataknamsile. Tonda, kanye deipnamsile.
Roma 2:5 - Eipomek5 Bukni, na kayapo. Anggunce, anggun malye umunye ning nirya ati, batakmunyopura, Allah arye namin kipsilirye, kum wenepnamsile. Bukni, anggun ilil pia kum kanye dobuka, anggun kanye talima kat upliba, anggun malye ning kum batakmunyopura, malye ninguk tuba winimunya deice arye, Allah weika arye tonap tabakuka wenepnamsile. Tuba-tuba malye winimunya deice arye, anggun bidamang arye anggun bidamang ati, malye ulilalulume. Ninye arye sik mambul ning ati, ‘Tonap weik unamsil’ tenen, dokola delilamak touk, anggun malye-malye winiluluma deice arye, anggun bidamang arye, anggun bidamang nong deice ikin ning weik delilanmalume. Allah tenyamuk talak akunum uplyopura, lakak aniryuk ninye nirya ati, lipsisikuka yupu bokeipsilirye, wenepnamsile. Wini talak ara, anggun tuba malye winilulum ninye ati, weik arye wenepnamsile. Anggun malye winin ning batakna kumce, talima kat kibuka, ‘Malye wininupyap tenena kum deice arye, malye umunya ati ara, Allah weik arye wenepnamsile. အခန်းကိုကြည့်ပါ။ |
Roma 2:5
40 ပူးပေါင်းရင်းမြစ်များ
Aning diamuk kum bukni, Raja Nebukadnesar birye nyapdeiamuk yupu babye yanibuk. Ara, Raja Nebukadnesar birye Zedekia ati, “Allah dam, ‘Na winibuka unamne,’ nyapmince, anda na nyapdeipkin yupu uk kekebuka unalyame,” nyabuk. Nyabuk bukni, Zedekia birye, “Yo, winipnamnarya,” nyaplokbukce, anyalin yupu deice arye nyabuk bukni, dipkoprob aning nirya kum winilamuk. Elce, ‘Aning nirya ara, na kum winipnamne,’ tenelamukce batakuk. Tonda, Israel nang arye, si erelamik Allah, el si Yahweh ati, Zedekia birye, ‘Kume, Allah Yahweh arye nyalul yupu nirya ara, na kum kekebuka unamneʼ tenen, kanye pum tam kat kibuka, mandipna weik ulamukce, ayupu yaniltaknauk ulamuk. Zedekia el malye ulamuk ning ati ara, ‘Bataknirye, Allah dam tamubuka binune,’ pia kum tenelamuk.
Ati, anggun ap, na ap akunum kel bikamupu ning ara, anggunti laka nyapnusine. Ara, dan mutuku do nirya, sik malye ninguk talibuka unyak nang ara, sik mutuku noutam kanye imun weik ning yalye babye, sik anang deice yaliba kum dolonyake. Tonda, Allah arye amutuku nang ati, yu weik uplyeba, amutuku nang deice deibuka wenelul talak ara, sik malye wininyak nang nirya ara, sik deice weik wenen ning mek sik dam obuka yangalule. Sikda talye kanye bobuka, telebuk unyake.
Allah arye nyasulule. Atalak noutamak, na Allah arye nyasinye yupu nirya, kekepmunyopura, ayupu moubuka talepmunce, dobolbalulume. Anggun deipkirikdop nang, Meriba mutuku noutamak ulamikce, ‘Nun lik’ tenen, kat kanye bomik touk, kum unamlulume. Aning atonun, mek pia kumak ati, ninye kum unyakak, weik pata mutuku, el si ara, Masa mutuku noutamak, anggun apu yapu yangalamikce, malye yupu weik nyapnin yangalamik tonun, kum nyanamlulume.
Winipyopura, ‘Mesir ninye malye kiplirye, Israel ninye binukce bisikuk aminyan binuyap’ tenen, na Allah arye arepneba, sik talima kat upliba, kum kel kibikirye, laut mekwen noutam bisikuk binuyake. Sik bikcopura, narye wenebuka oplopnamane. Ara, narye weiknye Firaun ap, el yin talin nang ap, el kuda libuka tuku deice ban ning, kereta kuda ap, aning deice bukuka yanmak nang ap, na mikip deice arye opnamne. Akunum opnyopura, aminyan talak yuk ninye nirya kekebikirye, na si erebuka, ‘Se Allah ara pia mambule,’ nyapnamake,” Allah arye nyabuk.
Nyabukce, ayupu ton nyabuk. “Wini talak ara, Musa anda, Israel ninye sik dam bimince, aninye bobuka bobimince, narye, ‘Ateleb mutuku arepnamkine,’ nyabuka, nyalin yupu nyapdeiamkise mutuku, anyuk binamlume. Ara, narye dopkwetepniba, na pil dona malaikat arye menekuka, melibuka balibuk, anggunda el aminyan tam bimunce, narye nukise mutuku binamlume. Unamlum bukni, sik malye winipmangu ninye ara, sapi basam urasin atonun, puturubuka memepdeibikce, aning si erenmek ning ati, na tenyamse talak akunum uplyopura, anang nirya ati, weik arye wenebuka opnamne,” Allah arye nyabuk.
Anirya winibuk bukni, weiknye Firaun birye, yakai nirya akunum dibikba eibuk. Eibukopura, ‘Naie, winira kanam asa upsile,’ tenebukce, Allah arye winipmok ning kum tenebukce, el talima tuba kat kibuka malye kibuk. Allah arye, “Firaun malye kibuka wininamle,” nyabuk touk, Musa ap, Harun ap, sik nyaprik yupu kum kekebuk. Tuba talima kat kibuka, mandipna kanye bobuk.
Ara, talye ati kum nyapkine. Amalye unyak nang arye, ‘Yuk ninye mangkau kanye bobuka bakibuk, talye karin arye anang oplonamabe’ tenen, duknunyake. Bukni, sik amalye wininyak nang ara, sik bidamnye atibuk wena welanyake. ‘Yuk nang opnuyap,’ tenenyak bukni, sik bidamnye arye, sik bidamnye ati olanyake. Aning ara, sik bidamnye uk tamubuka youlule.
Allah arye ninye tukwak ninye nirya ati wenepnamsil talak, el yu ning nun nong deice deipnamsil talak ara, bona utotoa talin weik nang uptibye babye, aning arye kum melipsetue. Bona utotoa ning deice arye, kum lyepdatibye. Bukni, malye winin ning nirya batakikirye, diksukumuk unyak ninye ara, Allah arye sik wininyak ning ap, sik talima ap dipdelirye, teleb kibuka unyak ninye ati, lyepnamle. Sik diksukumuk unyak ninye ati, wenebuka opliba, kum dipnamake. Allah arye sikti, lyepropliba, kam pia unamake.
Aning atonun, yata ninye do nirya, malye upmace talak ara, adiparyuk sik kanye talima noutamak arye, ‘Se, nun malye upmabe,’ tenebikirye, adiparyuk amalye un ning bataklamaka ninye ara, Allah arye aninye ati melibuka teleb ulinamle. Bukni, yuk nang ara malye ubikiba, deiyok nang arye, “Nun kayapu, anggunda malye upmalume,” nyabuka wenebicopura, aninye ara, pia talima kat ninye unyaka anya arye, ‘Awenen yupu nun like, kum kekenamabe,’ tenekirye, awenen yupu ara yaninauk unyake. Aninguk wininyak ninye ara, aminyan talak weik ikin ning dopdopnamake.
Yatanye do, malye uplye talak ara, ninye deiyok nang arye, “An malye unmalam ning ara, bataklyame, winina meme,” nyabuka wenenyak bukni, el mandipna kanye uplirye, ‘Kume, sik deiyok nang arye nyaninyak yupu ara, pia kum kekenamne’ tenen, sik yupu yaniltalulnye bira, aminyan ara Allah arye elti, tonok talak aryuk wenepliba, kum upra deipnamle. Akunum weneplirye, kum kipdeiplyopura, anye bira, yata wiribuka lipsisikuka deiptingba, tamubuka teleb uptu do? Ara, pia kum winipmanto.
Ayupu nirya ara, urdem ati kum nyapsine. Nun tukwak ninye nirya arye, pil donyap ning ap, tenebuka duknunyap ning aning-aning nirya ap ati, Allah eipsilirye, kel kisulula anya arye, aning nirya ati wenebuka yupu lipsisikuka bokeipnamsile. Ara, ‘Malye winilamik ning ara ani. Teleb winilamik ning ara ani,’ tenen, wipsilirye, nun pil erebirye winilamepya touk, Allah arye dekna arepnamsile. Ayupu ara, abuku Penghotba sekamuka deiyoknye birye nyabuk.
Ura nara, anggun winilulum ning nirya akunum bikamsise. Ara, anggun kanye ara, kisok kat nang ululama anya arye, deiyok nang arye, ‘Wininamlume, wininamlume,’ nyapsitinga babye, sikce nyabikce yupu ara, anggunce malye kibuka, ‘Nunda, sik nyanyak yupu kum kekepnuyabeʼ tenen, lik tenebuka ululume. Anggun una ara besi beton atonun ulule. Anggun asok ara, pia kat ning, el si perunggu atonun ubuka, ululuma anya arye, anggun mandipna kanye bobuka ululumce, wenen yupu pia kum kekelulume.
Wini talak ara, an ni koproba Allah arye, “Anggun wenena ati, winipnamsine,” nyapdeiamuk touk, akunum winipmasile. Ara, an mutuku nang, sikce Allah Yahweh anggunti, el yupu nyapdeiamsuk ning ara, sikce kum moubuka talinyake. Tonda, sikce malye winin ning tuba talibuka wininyaka arye, Allah elce ikin ning akunum areplyeba, aning ara, sik deice akunum yanmalba, dopropmaka atia.
Winibuka akunum winibikcopura, wini talak ara, narye Israel nang, sik talima pum teninyak ning nirya ara, winiryuk ninguk arepnamne. Tonda, sik kanye teninyak ning ara, pia teleb lek winiryuk ninguk arepnyopura, sik nirya ara, tonok kanye deibuka, neika unamake. Tonda, tonok Dip Kanye dobuka, sik talima nirya ara, arepnamsine. Min talak, sik talima noutam ara, kat keil atonun ulamuk ning ara, adiparyuk narye dopropnamne. Winipnirye, winiryuk kanyeuk, punubuka arepnamsine. Winipnyopura, sik talima pum tam nirya arye, natibuk diba tenepnikirye, na yupu kekenamniake.
‘Na nyanye yupu kekepnitinge,’ tenenamlam bukni, an kayapu Israel yala ninye ara, an nyanamlam yupu, pia kum kekenamkiyake. Ara, talye ati kume. Sikda, na Allah arye nyanye yupu babye, pia kum kekeninyake. Sik Israel ninye nirya ara, kanye tenina, kat kibuka anye arye, mandipna kanye bobuka, tatdayuk ninye unyakce, ‘Nun like,’ nyanyaka ati, na yupu babye, kekena kum unyake, nyapkine.” Allah arye Yehezkiel biti, laka nyabuk.
Allah Yahweh arye nyalule. Sik Israel ninye ara, pia dipkoprob teleb ton kum unyake. Teleb winin ning ara, akunum luba kibik. Bukni yu weik upliba, sik yuk nang ning nirya dalubuka dolonyake. Yu upliba, ninye ona ap, sik ning ubula dolona ap, ulamika deice arye, yuk mutuku ninye taleamik ning weik dopromik. Winilamikce, abona-bona nirya, sik keil arye deibuka, domik aik pum tam dongolamik. Ati, sik Israel ninye ara, pia diksukum winin ning ara, ton kum wininyake. Sikda pia malye-malye ninguk wininyake.” Allah arye nyabukba, Amos kekebukce sekuk.
Yata ninye do nirya, Allah elce, ‘Wininamlulume, aning ara kum wininamlulume,’ nyabuka nyasilye yupu nirya batakuka, pia malye-malye wininyak ninye arye wininyak ning ara, laka nyapnusine. Ara, yuk ninye Allah el dipkoprop yupu kekepmanto ninye unyak bukni, amalye wininyak ninye arye sik malye unyaka deice arye, yupu sekelongonyake. Wininyaka deice arye, Allah el diksukum yupu yaniltanyake. Wininyaka deice arye, yuk ninye babye, Allah el yupu moubuka kel kum bikinyake. Ati, amalye wininyak ninye nirya ara, Allah im deice ulirye, yu upliba, akunum deiyok koubuka aninye ati wenelye ning ara, akunum lakak kipnin basulule.
Na weit yapu, anggun Roma mutuku ninyeo. ‘Anggun walwal arye, anggun bidamang kanye aniryuk, ‘Nunda weik mambul weik nang unyabe,’ tenemunce, kwalilulum do?’ tenen, ayupu laka nyapsine. Ayupu ara, minop talak Allah arye duknyamuk bukni, wini talak ara akunum laka nyapsuk. Allah arye Israel yala ninye noutamak arye, ton nang ara, sik talima kat kibuk ning ara, tia talak ati ubuk. Winibukba, sik ilil pia kum kanye bobuka el yupu kekena kum arye ulamica ani, Allah arye, ‘Yahudi yala kum ninye yupa pia weik, winibukap dopropnamne,’ tenyamuk touk, sirya dakuka akunum doproplyopura, akunuma. Winibuka sirya daknamle talak ara, Israel yala ninye sik kanye talima nirya ara, namin asa aryuk unamake.
Ura, Allah arye tenelamuk touk, ‘Ninye nirya, na yu unilye ning ap, na mikip weik unilye ning ap, na wininye ning nirya ap kel kipnamniyak’ tenen, malye winin ning ap, malye winin ninye ap ati, malye kanye bomturye, el weik mikip deice arye, adiparyuk oltakalamtue. Akunum oplomtu bukni, Allah arye, ‘Minopce wenebuka kum oplopnun’ tenen, namin asa arye namin kibuka dinauk ulamuk. Winibuka ulamuka ati ara, tukwak ninye kan-kan arye, yatanye birye Allah ati weneptu do?
Ayupu nyapmasin ara, urdem ati kum nyapsine. Kume, ninye mutuku-mutuku nirya aminyan sirya talak ara, Kristus arye ninye nirya yupu bokona ati, weik ninye deiyok nang arye bulamak ning takta kursi bulamak ning deice buklibuk, el dam binamabe. Kristus arye, ninye nirya dipdesilirye, ninye yuk-yuk bukni, nirya, sik pil dolamak ning ap, yupu nyalamak ning ap, nirya awinilamak touk, yupu lipsisikuka bokeipnamsile. Ara, ninye nong ubuka pil dolamubu ning ati, teleb ning babye, malye ning babye dipdesilirye, yupu lipsisikuka bokeipnamsile. Ati, ‘Yata pil doptibyeba, Allah arye kanye deipsutu do?’ tenenauk unamnyape, nyapsine.
Nyabuka morobupue bukni, Hesyebon mutuku talibuka ulamuk ninye deiyoknye, Raja Sihon birye nunti, ‘Yo, amutuku bisik ara, telebe dabilulume,’ kum nyamsuke. Deiyok ara, ani. Nun ni koproba Allah Yahweh arye, anye Raja Sihon, elti, mandipna don ning areamukba, anye malye weik ubuka deice arye, ‘Kume, nun mutuku noutam kum binamlume,’ nyabuka, yupu seksuke. Bukni, Allah arye tenyamuk ning ara, ani. ‘Mandipna upliba, na Allah arye, Israel nang ati, mikip weik arepniba, sikce el obuka sirya daknamake,’ tenyamsuke. Allah arye winipsukce, anye Raja Sihon, el taleamuk mutuku nirya ara, nunce deiyok kibuka, el taleamuk mutuku nirya, alubuka dopropbibirye, amutuku nirya babye, oyanamle talak arye, asukum dem unmabe.
Na Allah arye nyapsine. Narye sikti, wenebuka winipnamne ning ara, tuba kum tenenun do? Aning ara, kum bataknamne. Ninye arye, sik dekna weik ning, ‘Kum dasilyak’ tenen, pia teleb touk dokola deibikirye, kunci bisik bublan dikilongolamaka atonun, sikti, wenepnamne ning, tuba tenenune. ‘Atalak ani,’ tenepnyopura, anang wenepnamne.
Ara, awinisilye ning nirya arye, nun kel bikinyabe. Allah arye, ninye nirya ati, sik winilamice ning auplye touk, diksukumuk ubuka yupu bokeipnamsile. Anggunti ara, kanye imun kanye bon ning aupmalya babye, anggunce diba tenebuka, batakna kumce, pi dobuka pil doluluma anya arye, aminyan talak ara, Allah arye anggunti, “Aninye ara, pia teleb un ninye kipnibuk, na dam wektinge,” nyapdeipnamsile. Ara, Allah arye ninye nirya ap, aning-aning ap, talibuka unamsil ning ati, diba tenemunyebuk, yuk nang arye ikin ning anggun nong deice akunum delisinyake. Ikin usilye ning nirya ara, deiyok aninguka.
Allah ati, ‘Nun like’ tenen, urasin tamubuka kum bataknamlum bukni, teleb ning ara, nyapnusine. Atalak-atalak nirya, nunce, ‘Asum ani’ tenen, tuba nyaptibye talak noutamak nirya ara, talima kwa dibuka melilanamlulume. Ara, talye ati kume. Ara, anggun talima noutamak malye un ning tuba aupmalya arye, anggun talima tam usilya deice arye, malye un ninguk talibuka winipmunyak tenena ati nyapsine. Tonda, anggunce, amalye winin ning ati, ‘Deiyok ara, dauplye. Aning ara, malye kume, tenepmunyak’ tenen, nyapsine. Winibuka tenemunyopura, aminyan ara, utenepmunya deice arye, ‘Pi dobuka malye winibibyak’ tenen, anggun nirya arye talima kwa dipdanuka melipdamunce, kalekelanamlulume. Malye winin ning nirya ara, tilila ninguk ulula ati, aning talibuka umunyopura, anggun talima kat kipdeipnamsile. ‘Winipmunyak’ tenen, anggunce anggun bidamang ati, kalekelanamlulume nyapsine.
Ati, arup nyapmasin touk, Mazmur sekamik yupu ton tenenamlume. Ayupu ara ani. ‘Asum ara, na Allah arye yukubsiniba, na yupu kekepnumunyopura, lik upsilyeba, pi dobuka, ‘Kum kekenamabe,’ tenebuka, kum wininamlulume. Minop talak anggun apu yapu ara, lik ubukba, na Allah ati, ‘Nun like,’ tenebuka bataklamnike. Anggun apu yapu malye winilamik touk, anggun wini talak diba tenelulum ninye arye, aning ton kum wininamlulume.’ (Mazmur 95:7-8)
Aning ati ara, nun kele. Allah arye tenyamuk touk, tonok talak wibukabukce, atalak ati, “Asum,” nyabuka si dobuk. Asi nyabuka, “Asum,” nyabuk talak ara, sik Israel ninye malye ulamik talakuk kume. Aning ara, keting tamun yupa weik akunum upra balamuka ani, Allah arye, Daud sekamuk yupu deice arye nyabuk. Daud birye sekamuk yupu ara, arup akunum nyapmasin bukni, ayupu tonap nyapsine. Ayupu ara ani. ‘Asum ara, na Allah arye yukubsiniba, na yupu kekepnumunyopura, anggun apu yapu malye winilamik touk winina meme. Ara, lik upsilyeba, pi dobuka, ‘Diba kum tenenamabe,’ tenebuka, kum wininamlulume. Minop talak anggun apu yapu ara, lik ubukba, na Allah ati, ‘Nun like,’ tenyamnikce bataknike. Sik winilamik touk kum wininamlulume. Allah arye nyapdeiyamuk.’ (Mazmur 95:7-8)
Anggun dekna weik ning sisilya ubuka deice arye, “Anang ara malye nang,” nyabuka, sisekipnamsile. Tonda, uku buk arye ngelum-ngelum abuka dilamle touk, asisilya atonun ubuk ning arye, anggun nong pia, uk dinauk unamsile. Winira sirya daknamle talak noutam arye akunum unyabe. Awinipsilye talak noutam arye, anggunce, ‘Aning nirya, na uk talipnamne. Aning ara, na ning’ tenen, moubuka deililamlum ning ara, pia malye ululume.
Tonda, awinibuk ning ara, talye ati kume. Deiyok ara, Allah Yahweh arye, ‘Israel nang ap, Kanaan mutuku noutam unyak nang ap, olana uk upnamak,’ tenebuka ati, sik Kanaan tam ulamik nang ara, sik talima mikip kipbukce arebuk. Winibukba, sikce amutuku-amutuku nang nirya ara, mikip ubuka yu ubukce, ‘Israel nang obuka sirya daknamabe,’ tenebikce, pirilelamik. Bukni, Allah Yahweh arye, Musa biti nyabuk ning ara, ‘Sik ap, amutuku noutam unyak nang ap ara, na kayapu nangʼ tenen, bico tenena pia kum aryuk, “Aninye nirya obuka, sirya daknamlume,” nyapdeipmok touk, anang nirya obikce, kum kipdeibik. Ara, Yahweh arye, Musa biti, “Winipnamlyame,” nyabuk touk, winibuka ati, Allah arye melibukba, Israel nang arye, amutuku ulamik nang nirya, ona uk ulamika ani, sirya dakik.
Ura, arup anyapmasin ning nirya ara, Allah aning nirya ubuka deice arye, bitinye ning lakak upsiliba, diba tenebuka kele kiptume. Tonok ning ara, diksukum un nang, kanye imun ning ap, talima winin winildena ning ap upsile talak noutam, ikin kanye bobikcopura, Allah arye aninye, sik lyen ning ati ara, el kele. Bitinye ning ara, elti, diba kum tenebikirye, pia malye wininyak ninye ara, Allah arye sikti, atalak noutam babye wenelul bukni, sirya daknamle talak, ninye bokuka oplopnamle talak, aning ati ara, ‘Sirya talak arye, pia malye kibuka oplopnamne,’ tenelule. Bukni, wini talak ara, tia talak ati, anang sik weik wenena ning tenepce delina ara, el kele.
Allah arye ayupu nyapdeibukura, aning ubuk touk, Allah el yupu nyabuka deice arye, wini talak ulul im ap, tukwak ap, tonda im ap, tukwak ap noutamak ulul ning nirya ara, tenebuka tenepce deibuka kalikilule. Aning-aning nirya ara, tenebuka tenepce deibuka kalikilamlya ani, apia daulamlye bukni, Allah teneplye talak arye, elti, yaniptabuka, pia malye winin nang ati, yupu bokeiplirye, wenebuka oploplyopura, kum ubuka daneipnamle. Atalak aryuk, wini talak tukwak mutuku ap, im noutam ulul ning nirya ap ara, Allah teneplye talak arye, el yupu nyaplibuk uku arye dipnamle. Allah arye, ‘Na tenepse talakuk, aning nirya kum ubuka deipnamne,’ tenelula anya arye, aning ara wini talak ati, talye tenebuka tenepce deibuka kalikilule.
Tonda, el im deice pil don nang, malaikat ulamikbuk, Allah arye sikti, pil deiyok aribuk ning ara, ‘Nun like’ tenen, sikce yaniplobuka yukak binuka ulamikce, pia malye-malye winilamikba, Allah arye amalaikat nirya wenebuk. Amalaikat ara, Allah arye dopdakuka, pia kat tapu, kum bulupmanto tapu arye koubuka, pia kuna pum bisik dongobuk. Dongobuk anya arye, amalaikat daulamica ani, sirya talak ninye mutuku-mutuku nirya ati, yupu bokeiplirye, wenepnamle talak ara, amalaikat babye, wenebuka oplopnamle. Oplirye, uku dil ban donoklyopura, uku pia dilibuk, dapia uk tuba dilirye, malyeuk unamake.
“Talye kum nyanmabe. Yu pia weik upliba, sik bitinye arye nun tukwak malye unyap ninye nirya ati, weika arye wenebuka opnamsirak sum, weik kanye imun sum akunum damak yanmasila ati, ikin pia weik upsiliba, weika arye donamap ati, mutuku kon ap, keil ap sakmunce, siknibuka opsutume,” nyabuka malye nyanmekce, engenmekba, kekepse.
Tonda, tenipdelulume. Anggunce anyapmasin ning ton, kum winipmunce, mandipna kanye bopmunyopura, min talak Mesir mutuku taleamuknye, Firaun ap, el taleamuk ninye nirya ara, sikce Allah yupu kekena kumce, mandipna kanye bobikura, sik dam yata wiryamuk do? Allah arye, kanye imun ning, sik nong deice deiamuk touk, anggun Pilistin mutuku ululum ninye babye, atonun winipnamsil do? Aning ara, luba kipmunyake. Allah arye, sik Mesir mutuku ninye ap, sik deiyoknye Firaun ap ati, weik tonun wenebukba, ninye weik dibik. Ton ning ara, ikin ning weik, sik nong deice deibukba, sikda imun kanye weik bobuka ulamikce, ikin kanye weik bolamik. Winilamika ani, aminyan talak ara, Mesir mutuku, sik deiyok nang arye, Israel ninye nirya batakikba, adiparyuk bindobik. Aning nirya ara, anggun Pilistin ninye ton, kum biklum do?