Se, na dopnamnilamnye bira! Alukunyan talak noutam nirya ara, neika mapmanumu bukni, berekninbau talak ara, moul kumanya pu aplmoba, dua ap, kunukna ap ara, kum danmoe. Ati ara, ‘Na mutuku nang arye eipkikcakʼ tenen, anda bikbik abuka bindopnulyame! Winipmanto ara, rusa basam ap, kijang basam ap, sikce pia minop bikbik abuka balamak touk, an babye, mikip arye, bikbik abuka bindopnulyame. Na aik batakmince, tamubuka binuminye talak ara, ‘Weik mutuku el si Beter mutuku dup ara, kirikuka bindopnulyamʼ tenen, nyapkine amio.
Roma 13:12 - Eipomek12 Wini talak ara domon yupu ton nyapnusine. Ara, lukunyan inipmalye talak, ninye mapmaca bereklamle touk, akunum unmala ati, kunukna noutam arye malye-malye winilamikce ning nirya ara, batakibirye, dirin ninguk talibuka diksukumuk winipribapya deice arye, ting ongolamak touk kibuka ubirye, pia kaliknauk unamabe. အခန်းကိုကြည့်ပါ။ |
Roma 13:12
30 ပူးပေါင်းရင်းမြစ်များ
Tonda, asum akunum winiplyopura, ninye nirya ara, sikce talilamik dekna weik kat ning, perak ap, emas ap, dopromikce, ‘Isa si erepnamapʼ tenen, aning deice arye, ninye urasin atonun kibuka, memepdeiamik ning, isa si erena ati, talye ning nirya ara, adiparyuk batakuka bindopnamake. Winipnamaka ara, sik anang ulamicak ara, yamba maka ap, bai tam balamle ayam mana ap ulyakuk, isa si erena ati, memebuka delinyak patung ara, batakuka bindopnamake.
Anggunce, ‘Nun ni koproba ani,’ tenen, kam kum ulul ning, isa si erena ati, isa urasin atonun puturubuka deipmunce, si erelulum ning nirya ara, malye kipdeipmunce, donoknamlume. Ara, aisa si eren ning patung-patung ara, sik bol deice ara, urasin pia teleb dekna weik ning, el si emas ap, tonda perak ap arye, taplakuka deipmunce, si erelulu ning ara, pia malye kipdeipnamlame. Ati, anggunce, ‘Aning ara pia malye ning,’ tenepmunce, aning dobuka donokmunce, “Sik isa ap, patung ap ara, nun dam pia kum deipnamabe. Sik isa mer nirya ara nun dam batakuka yukak bilulume” nyabuka, donoknamlume. Kwalye bok boyanuka, pia malye ning kilipmunce, bai tam donokolulum touk, aisa si eren ning babye, bobinuka yukak donoknamlume.
Amalye winin ning nirya ara, pia kum wininamap bukni, nunda, ninye arye winiryuk baju ongolamak touk, nun Deiyoknye Yesus Kristus ap, neika kanye talima dukdongobuka umunyopura, Yesus el ulamle touk unamlume. Tonda, min diba kum tenyamubu talak arye, nun kanye talima pum tam malye ning patalamsuk ning ara, ila tuba tonap patapsiliba tenemunya babye, pia kum wininamlulume. Amalye winin ning ati, tuba tenebuka kum wininamlulume.
Nun apu yapu malye ulamikba, Allah arye, aninye wenebuk ning ara, ‘Yuk ninye nirya kel biknamak’ tenen, winipmanto ning akunum winipsile. Nun wini talak unyap ninye ara, sirya daknamle talak akunum dam yanamsila anya arye, ayupu minop talak sekamik ning deiyok ara, ‘Sik sirya talak wini upnamak ninye mankau arye, malye winibicak’ tenen, yupu sekeldongona ati, ayupu sekeiyamsike. Ati aning nirya tenepdemunce, kanye moupnamlulume, nyapsine.
Na nyapmasin yupu dukdongobuka lak arye, kibuka laka nyapnusine. Deiyok ani. Ara, Yesus dib teneluluma ati, nun du weit atonun ululum ninyeo, anggun sal babye, kilapu babye, anggun nirya ati nyapsine. Yesus tamubuka dolyanamsil talak sirya talak ara, akunum dam upmasil anya arye, ‘Tukwak mutuku unamap talak ara, akunum sirya daknin banmabe,’ tenepmana ati, nyapsine. Wini talak arye, diprongobuka, dolyanamsil talak noutamak nirya ara, kil akunum domik nang arye, sik kilapu patalul ning atibuk, ‘Yata winipnun do?’ tenebuka, kanye dipibuka kum unamlume. Sik kam nang tenelamak atonun, mitik atonun tenenamlulume. Deiyok ara, Yesus tamubuka yanamle ning ara, weik mambule. Yuk tukwak mutuku noutamak ulul ning nirya ara, mitik mambule ati nyapsine.
Diba tenena kum ninye arye, ‘Opsilye ning malye kipnamap’ tenen, talye tukwak yin talibuka olbalamak touk kum unyabe. Sikda, talye tukwak yin talibuka olbalamak bukni, nun talinyap ning ara, pia yuke. Allah arye el im deice mikip ulul ning melisiliba, malye ning malye kina ati aning winibuka yanilongonyabe. Yin talin nang arye, anggunti opsikce ninye ati, sik domikce asik mikip asik uptu babye, anyasik nirya uluplobikirye amutuku ninye nirya obuka sirya daklamak touk, Allah melisilyeba, nunce im deice mikip ulye ning talibirye, Allah yupu yanina ninye nyanyak yupu nirya malye kibuka yaninyabe.
Tonda, tilila yupu kum nyanyap bukni, pia dipkoprop ninguk nyana ap; Allah el mikip arisilibuk, adeice arye moubuka pil dona ap; aning-aning nirya wininyabe. Anirya ara, yin nang arye, taruk dana-dana tam yin talibuka olbalamak touk, malye winina pia kum, diksukumuk unyaba deice arye, Allah el pil donyabe.
Ara, anggunda peterelamsikba, kel bikamlum ning ara, tuba tamubuka tonap nyapnusine. Ara, anggun minop talak dib kum tenyamlum talak ara, anggun kanye talima noutamak malye ning patalamsuka deice arye, anggun winin ning nirya malye kililalalume. Pia malye anya arye, “Pubundanalamle baju kwiribuka bataklamak touk, anggunce minop talak malye winin ning min arye winilamlum ning ara, aning nirya bataklulume,” nyabuka peterelamsike. Malye winin ning patana deice arye, teleb tenen ning ara, kum kipnin balamlya ani, sirya dakalule. Winiplyopura, teleb kibuka kum teneptibye.
Malye yo arye, malye yo duk moulamle atonun, sik malye wininyak ninye, sik talima kunukna deice arye, nong kum upnamle ning, malye ninguk wininyake. Sik wininyak ning nirya ati ara, pia memepdopmunce, aning kum wininamlulume. Talye kanye bobuka, aninye ap, ansinibuka una kum bukni, sik malye wininyak ning ati, laka deice arye, yupu nyapmunce, batakanamlulume. Ara, yuk nang nirya ara, moubuka kel kiptingce, ‘Amalye winin ning bataknamak’ tenen, anggunce, “Kume, sik malye winin ninye ara, kunuknak atonun malye wininyak ning ara ani-ani,” nyabuka, laka arye, laka nyapmunce, yupu sekelongonamlulume.
Sik malye wininyak ninye ap, ansinibuka una meme nyapmasina deiyok ara, ani. Minop talak ara, anggun Efesus mutuku ululum nang ara, pia malye-malye ulamluma deice arye, kunuknak atonun ninye ulamlum bukni, wini talak ara, nun Deiyoknye Yesus ap, talima dukdongobuka umunya deice arye, dirina ninye atonun akunum ululume. Ati Dirina Deiyoknye arye el mapu una ati, akunum teleb kipdeipsuka ati, dirina nang ulamak atonun diksukumuk unamlulume.
Ura, ton nang arye ara, ‘Allah yupu kekena ati, neika bulunyaba ara, nun like,’ tenekirye, Allah yupu aik kum wekenyak bukni, nunda, batakna kum arye, neika bulubuka wekelbanauk unamabe. Tonda, nun nirya arye, yuk nang nirya ati, talima kwa dibuka, melilanauk unamabe. Winibuka ulamibya ani, Yesus dolyanamsil talak, Weik Sum dam yaliba, kel kibibyopura, weika arye tonap, talima kwa baribuka melilanauk unamabe.
Aning ati ara, na kayapo, sik minop talak ulamikce, diba tenebuka diksukumuk ulamik ninye, wini nyapmasin ninye ara, dana-dana tam nirya, yupa weik aunyakce, nunti dinauk usinyake. Disinyaka ati ara, Allah arye, ‘Winibuka diksukum bisikuk banamak’ tenyamsuk touk, ikin upsilya babye, batakna kum, pia pi dobuka, abisik deiceuk mikip arye banamabe. Sik biklamak nang arye, ‘Ikin upnilyak’ tenen, talye ning nirya batakuka, tonok bisikuk mikip arye bik-bik abuka balamak touk, nun babye atonun, ‘Ikin upsilyak’ tenen, talye winin ning nirya batakibirye, Allah tenepsuk bisikuk binamabe. Aning atonun, weik mambul ning ara, malye ning patasilya deice, kanam asa arye tapu koulongona atonun ulamsil ning nirya batakibirye, Allah tenyamsuk bisikuk binamabe.
Aning ati ara, anggun kanye malye tenelulum ning nirya ap, anggun kan-kan malye un ning weik aupmalye ning nirya ap, batakanamlulume. Batakmunce, Allah arye, ‘Na yupu sik talima noutam duk moupnamle’ tenen, arepsuk ning ara, kanye talima dukdongopmunce, nimalye umunyak arye, kekebuka dolonamlume. Allah el yupu arepsuk ning ara, lyepnamsila atia.
Allah el pia ati, upnamle yupu peterelamsika ati, malye winin ning nirya ara, batakanamlulume. Ara, yuk nang ati, yu una ap, ‘Na’ tenen arye, talye nyana ap, ‘Yuk nang ning, na ton doproptinye’ tenen, talima noutamak pataplibuk tenena ap, malye winin ning aupmalye bukni, nong bol deiceuk teleb una ap, yuk nang ati talye yupu nyabuka lulundana ap, amalye winin ning yala-yala nirya ara, batakanamlulume.
Aning-aning nirya ara, na nyapmasin touk, Allah arye malye kibuka oplobuka, kum ubuka daneipnamle. Aning ati ara, anggunda yata ninye atouk ubuka unamlulum do? Kume. Yesus tukwak tamubuka yanamla ati, ‘Allah arye wibuka tenyamuk sum ara, dan sum yanamle do?’ tenen, kintinibuka pia dinauk unamlulume.
Aning ati ara, ‘Yesus tukwak mutuku tamubuka yanamle,’ nyalilamuk yupu ara, yuk nang arye, ‘Kume, Allah arye nimalya ap asa aryuk, pil donamsile,’ tenenyak atonun, anggunce aning kum tenenamlulume. Yuk nang ara, ‘Allah arye nimalyap asa pil dolule,’ tenenyak touk, pia kum tenenamlume. Aning kum bukni, Allah arye, sik nirya ati, ‘Se, aninye mutuku sirya, im sirya nirya, sik malye wininyak ning nirya, bataktingce, tamubuka diksukum bisikuk, binuka utingura, tonoknye babye, sik malye winina deice arye, nirya dibuka, kum danana kume,’ tenesulule. Utenesulula ati, tenepce adiparyuk, wenena kumce, aning-aning nirya kum kum danipmasile. Ati, elce nunti eibuka, ‘Yata wiripnamak do?’ tenen, nimalyap arye, dinauk usulule.
Na mapu ati bico tenesunune. Winira, sirya talak arye Yesus yalyopura, tukwak ubuk ning nirya kum upnamle talak ara, akunum dam upsile. “Aminyan Yesus Kristus Yanipnamle Deiyoknye yanamlarya,” nyalamikbuk, kekelamlum touk, wini talak akunuma. Akunum yanmanto upmale. Elce Kristus si yanipre yanamle touk, el mapu babye, ‘Kristus si yanipnamap’ tenen, nun dam akunum yangasinyake. Wininyaka deice arye, ‘Dipkoprop sirya talak akunum dam upmale,’ tenenyabe.
Abuku noutamak laka nyapsise ning nirya, nong upnamle talak akunum dam yanmasila ati, ninye kekenamakak abuku dobuka, aminyan wininamle ning ati, lakak laka nyanyak ninye ara, Allah arye melilyeba, kanye deibuka telebuk unamak. Tonda, ayupu nyanyakba, kekebikirye, ayupu nyasilye touk diba tenebuka, talibuka dobolbanamak ninye babye, Allah arye meliliba, kanye deibuka telebuk unamake. Anyapnusin yupu nirya, nong upnamsil talak dam akunum upmasila ati, na Yohanes arye nyapsine.
Ayupu nyapnukopura, ayupu ton dukdongobuka nyabuk. “Amenyan sirya talak upnamle ning ati, abuku noutamak seknulam yupu nirya ara, duknuna ara meme. Aning nirya wininamle talak akunum dam yanmala ati, aning kum wininamlulume. Abuku seknulam ning nirya, ‘Ninye nirya kel biknamak’ tenen, laka aryuk nyanamlyame.
ကြော်ငြာတွေ