Tonda, ‘Anye birye, el deipnamle mapu nirya ap, sikce deipnamak mapu nirya ap ati, “Allah el si Yahweh arye nyasilye yupu, pia moubuka talipmunce, el yupu uk dobolbanamlulume. Diksukumuk wininamlulume,” nyanamle’ tenen, nara Allah, na si Yahweh arye, Abraham akunum wipdeipse. Abraham arye nyapliba, el tam nang nirya arye aning atonun winibicopura, na Yahweh arye elti, ‘Winipnamkine,’ nyapdeipse yupu nirya dipkoprob winipnamne. Allah el si Yahweh arye Abraham biti tenebukce, ayupu nyabuk.
Roma 12:8 - Eipomek8 Allah arye yuknye biti, yuk ninye sik kanye talima melinana deiyok ning areplyopura, anye birye yuk nang ati, sik ikin unamak talak ara, elce sik kanye talima kwa dibuka melinamle. Allah arye yuknye biti, ‘Yuk ninye sik patan ning ati melibuka arenamle’ tenen, aning-aning weika arye anye arepliba, elce adeiyok ning doplyopura, anye birye yuk nang ati, kanye deibuka sik patan ning weika arye melibuka arenamle. Ura, Allah arye yuknye biti, ninye deiyoknye unamla ati, ‘Ninye deiyok talibuka unamle’ tenen, ninye deiyok nang kibuka, talibuka una deiyok ning arepliba, anye birye, pia batakna kumce, ninye deiyok piluk talibuka, teleb ubuka donamle. Atonun, Allah arye yuknye biti, ‘Anye bira, yuk nang malye winipmakca babye, adiparyuk kum wenepnamle bukni, namin kiplirye, namin asa arye melinamle,’ teneplirye, talima namin una deiyok ning arepliba, kanye deibukap, apiluk talibuka dolirye, yuk ninye ati bico tenebuka kanye talima kwa dibuka melinamle. အခန်းကိုကြည့်ပါ။ |
Roma 12:8
57 ပူးပေါင်းရင်းမြစ်များ
Tonda, Allah ati diba tenebuka, pia teleb diksukumuk wininyak nang arye, yuk talye kankan nang, aning-aning nirya, kum talinyak nang ati, bico tenekirye, anang sik patan ning weik arye, talye lukdanuka melibuka arenyake. Allah arye, “Aning ara, wininamlume. Aning ara, pia kum wininamlume,” nyapdeipsuk yupu, aninguk talibikirye, sik diksukum telebuk wininyak nang ara, sik diksukum wininyak ning babye, pia min kum upnamle. Tuba aupnamle. Tonda, yuk nang nirya arye sikti, ‘E, aning ara, dipkoprob teleb nang unyake’ tenen, sikti, si erebikirye kinauk wininamake.”
Malye ninguk, talibuka wininyak ninye arye, yuk nang sik ning ati, ‘Na kwit, an ning ton areamniminyeba, aminyan talak, na ning dobuka, an ning punupnamkine,’ nyabuka, tilila yupu nyaltakanyak bukni, dipkoprop, sikce tia talak ati, dolonyak ning nirya ara, tamubuka kum arinyake. Bukni, sik diksukum wininyak nang ara, sik kayapu nang arye pataplyopura, sik patan ning kanye teleb arye, tabakuka arinyake. Bico tenebuka arinyak ning ara, mitik tonun arye, kum arinyak bukni, weika arye tabakuka arinyake.
Ninye ton, el kanye teleb asa arye ulamlinye birye, sik talye bona talina kum ninye ati, bico teneplirye, el talilul din ning noutam arye bokuka, bona talina kum kili sal ati areplirye, teleb kibuka melilula ati ara, Allah Yahweh arye el dam yalirye pia melinamle. Ateleb kanye bonanye birye, bona talina kum ninye ati melilul touk, Allah arye anye biti weika arye melinamle.
Tonda beren tam talak arye, anggun yala ning dokonmamunya ani, sintam kiplya babye, batakna kumce, dukdongobuka dokonamlulume. Adokmamunye ning ara, yatato ning teleb ubuka paptuba, kel biktibye do? Tonda, beren tam dokmapye ning babye, sintam dokmapye ning babye nirya, telebuk ubuka paptu do? Aning ara, nun walwal anya arye, kel kum biktibya ati, pia pi dobuka pil dona uk unamlulume.
Ati ara, anggunce, ‘Apil doptinye. Apil talibuka piripnamne,’ tenepmunye touk, aninguk talibuka, pia pi dobuka, anggun pil donamlum talak nirya ara, mikip weik tonun pil donamlume. Deiyok ara, aminyan talak an pil dona ati, an kanye ara pia kum unamkile. Ara akunum diamik nang unyak mutuku, el si Sheol mutuku noutam ara, ninye arye teninyak ning ap, pil dona ap, kel weik bikin ning ap, mambul un ning ati, ‘Deiyok ara aniʼ tenen, moubuka tenen ning nirya ara, ton pia kum ulule. Tonda, ninye tukwak nang nirya ap, anggun ap, aminyan talak dipmunyopura, anggun babye, otam bimunyopura, pia asukumuk unamlume.
Aning-aning nirya teleb kipdeipnye talak ara, minop talak tenebuka malye winilamlum ning ara, kum danamle. Ara, kanye pum tam arye tenena kum yupu, talye weleyaliba, talye nyaltaklamak nang ati ara, anggunce, ‘Anang ara teleb uka,’ nyalalum ning ara, bataknamlulume. Tonda, pia malye-malye una ap, tilila yupu tana ap, unyak nang ati ara, anggunce, ‘Anang ara, erepdeipnamabe,’ nyalamlum bukni, aning ara ila tuba erelina kumce, bataknamlulume. Diksukum winin ninguk si erenamlulume.
Sikce Allah an nyapsulum touk diba tenebikirye, kanye deibuka an yupu moubuka talibuka diksukumuk unyak nang ati, ance melibuka yangasilyame. Bukni, Allah ance, ‘Wininamake, aning ara kum wininamake,’ tenesiminye ning ara, nunce, ‘Nun lik’ tenen, an yupu yanilamuburye malyeuk ulamupuba, an yu ulamkuke. Winibuka yu ulamkuka anya arye, nun wenena ati ikin ning weik nun deice delilamsulume. Nunda, pia malye un ninye unyaba ati, wini talak ara, yata wiribuka lyepsutumce, ila tamubuka teleb kipdeipsutum do?
Asipdenicopura, nara, weik ninye deiyoknye Rajanye birye, aninye ati nyapnamne. “Na dipkoprop nyapsine, nati diba tenepnik nang, na mapu ara, bona utotoa talina kum ninye ap, sekeltakne ninye ap, yuk nang arye, ‘Aninye ara mambul kume,’ tenenyak ninye ara, anggunce tonoknye babye melilamlum ning ara, nati melilamnulume.”
Dopkwetebikura, Barnabas Antiokia mutuku biyukopura, Allah arye anang ati, bico tenyamukce, pia teleb kibuka melipmok ning eibukce, pia kanye deibuk. Barnabas kanye deibukce, anang ati nyabuk. “Anggun Yesus diba tenelulum ning ara, batakna kum, pia talibuka unamlulume. Tonda, anggun kanye teniltona kum arye, anggun kanye talima bokoltona kumce, anirya ansinibuka, nun ni Yesus pia arenamlume. El tibuk pia arenamlulume,” Barnabas arye anang ati, teleb yupu nyabuk akarye, sik talima kwa dibuk.
Bukibuk, yuk nang arye, Allah arye, “Aning wininamlulume, aning kum wininamlulume,” nyapdeibukura, Musa sekamuk yupu mem yupu ap, tonda Allah nyapdeibukura, el yupu lak lena deiyok nang, sik nabi-nabi nang sekamik yupu ap, anyasik nang arye nyabikopura, sik Yahudi yala deiyok nang Allah yupu keken aik, deiyok nang arye yuk nang ati yupu nyabikura, anang arye Paulus ap, Barnabas ap, ati nyabik. “Nun kayapu, talima kwa din yupu ton aupmasilyeura, nun nyapsuturume,” nyabuka morobik.
‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume.
Tonda, Allah ati diba tenekirye, el mapu unyak ninye nirya ati, sik patalul ning kum upliba, mambul kanye bobuka ucopura, anggun talilulum ning noutam arye bokuka, aninye ati melibuka arenamlulume. Tonda, ninye asik nang nirya ap, anggun kayapo nang nirya ap ati, anggun aik buplan kukeipmunce, “Telebe,” nyabuka inilonamlulume. Aning atonun, anggun unamlum mutuku noutam yanuka unamak ninye asik nang nirya babye, teleb kibuka melinamlulume.
Atonun ning ara, pemerintah deiyok nang arye, “Pajak ati yo bok arenamsulume,” nyabuka morosinyaka ara, kekebuka arenamlulume. Ara talye ati kume. Aninye deiyok nang ara, Allah el amu tam ninye melin nang atonun unyakce, sik pil don talak nirya ara, ninye nirya ati talinyakce, ninye deiyok nang piluk donyake. Yuk yala pil ton talibuka kum donyake.
Allah ati dib tenebuburye, el mapu unyaba noutamak ara, Allah arye, nun nirya ati, ‘Pil yuk-yuk donamak’ tenen, kwepdeipsukce, pil dona deiyok ning yuk-yuk bokuka aresulule. Ara, minopce weik mambul ning ara, ‘Na yupu dobuka peterelbana ati deiya kouna deiyok nang, Rasul nang unamak’ tenen, nun Rasul nang wipdeiamsuke. Bitinye ning ara, el nyalye yupu laka peterena ap, aminyan unamle ning min kum upmalye talak, laka nyana ap, ati, ‘Nabi nang donyak pil dobuka unamake’ tenen, yuk nang wipdeiyamuk. Winilye ning ara, el yupu nirya peterena ati deiyok nang wipdeiamsuke. Yuk nang ati ara, ninye kum winipmanto ning, winipman kum pil donyak ninye ap, wipdeiyamuk. Tonda, Allah El Dib Kanye arye, mikip ariliba, ninye kwetena ninye ton wipdeiyamuk. Ton ning ara, ‘Yuk nang ati bico tenebikirye, sik patan ning ati melinang unamake’ tenen, wipdeiyamuk. Tonda, ‘Pil nirya teleb ubuka donamak’ tenen, “Wininamabe, wininamabe,” nyabuka, pil dona deiyok ning moubuka tenebikirye, pil laka nyan nang, administrasi nyalamak ap, wipdeiyamuk. Tonda, sik min kum kel bikamik bukni, Allah El Dib Kanye mikip deice arye, yuk mutuku ninye nyanyak yupu, aninye areplibuk, ayupu dobuka, nyanyak nang ton wipdeiyamuk.
Allah El Dib Kanye mikip deice arye, yuk mutuku yupu nyanyak nang ara, Allah el yupu kekena ati nyanyake. Bukni, Allah arye nyapliba, el yupu lak kibuka, laka nyabuka peterena deiyoknye birye, el yupu nyalyeba, yuk ninye nirya, sik talima melina ap, mikip kilina ap, ati, ‘Melipnun’ tenen, nyalule. Ara sik dib tenen ning mikip kilina ap, sik talima melina ap, talima wisisilye ning kilina ap, sik kanye imun usilye ning, ‘Kanam upnamle’ tenena ap, ati, teleb yupu lak akarye nyalyeba, ninye nirya arye, teleb ubuka, kekenyake.
Ara, na kayapu, nun kanye deibuka ayupu nyapsitibye. Nunce tenepce nyana kum aniryuk, nun kanye talima diksukumuk upsilirye, ayupu nyanyabe. Amutuku-mutuku nirya ulamubu talak ap, weik mambul ning anggun ap neika ulamubu talak nirya ap, malye una pia kumce, diksukumuk ulamubu. Tenepce nyana pia kum aniryuk, dipkopropuk ulamuburye, pil dolamubu. Adiksukum una ap, duknuna kumce dipkoprop una ap ara, Allah arye aresulule. Winibuka unyaba nirya ara, dib tenena kum ninye arye, ‘Nunda weik kel nang,’ tenekirye winilamak atonun, aning deice kum unyabe. Nunda, Allah el kanye aniryuk bico tenepsilirye, melisilya deice arye aresilye touk, pia diksukumuk unyabe.
Utenyamsise bukni, winira na ilil upnile. Ara, Isa Mutuku Dongonye arye, tenepce arye yupu teleb-teleb kibuka nyabukba, Hawa arye, tilila yupu dib tenebuk touk, ‘Anggun Korintus ninye babye atonun winipnamlum’ tenen, nyapsine. Ara, deiyok kouna talak ara, anggunce yuk yupu tabakuka dib tenena kum arye, dipkoprop Kristus el tonok dib tenyamlum bukni, yuk nang arye, yuk yupu peterepsikca deice arye, ‘Anggun kanye tenen ning deice arye, yuk malye bisik kirikuka bimunyak’ tenen, ilil upnile.
Ara, nun kanye talima noutamak ara, ‘Se, bona utoto talina kum nang melina ati, aning-aning bulubuka areptibye’ tenen, patana weik awabsilyopura, Allah el kanye ara, ‘Kume, anggunce auplye ning talibuka ulamak touk, arena ababye telebe. Bona weik talinyak nang arye, weik arye arenamake. Aning atouk mitika aryuk talinyak nang ara, mitika aryuk arenamake. Sik dipkoprop kum uplye ning kum arepmanto anya arye, aning ara, kum nukuka tenipnune,’ tenesulule. Ati, ‘Anggunda auplye ning taliplum atonun, bona utotowa talina kum ninye melina ati, bokuka arepnamlum’ tenen, nyapmasine.
Allah arye winibuka melisilyeba, yata ning do nirya, weik arye arepsilyopura, anggunce tuba tamubuka yuk ninye melina ati, bokuka arenamlume. Aning nirya ati weik arye arenamsil ning deiyok ara ani. Ara, aminyan lo uplye talak nirya ara, ‘Sikce yuk nang melina ati, bokuka weik arye arenamak’ tenen, aning-aning nirya arenamsile. Anggun Korintus mutuku ninye arye, yuk nang ati bokuka nun deice deipsumunyeura, yuk mutuku bobinuka arebibyopura, aning dolonamak ninye arye Allah ati, “Na ni, telebe,” pia nyanamake.
Ninye melina ati apil dopluma deice ara, yuk nang arye anggun Korintus nang ati, ‘Kume, anang ara, telebuk wininyak’ tenen, laka biknamake. Apil dolulum talak ara, ninye weik arye nyanamake. “Anggun Korintus ninye ara, ‘Kristus el laka teleb yupu dib tenenyape,’ nyalamak touk dipkoprop ayupu uk talibuka dobolbanyake. Tonda, sikce nun ap, yuk mutuku ninye ap ati, sik ning weik arye bokuka aresinyake,” nyanamake. Aning ati ara, ninye weik arye, nun Ni Koprop Allah ati, “Telebe,” nyanamake.
Ayupu nyapmasin touk, ninye nirya ara, sik talima noutamak arye, ‘Winibuka arepnamne,’ tenebikce touk, yuk ninye melina ati, bokuka arenamake. Kanye bokoltoliba, ‘Arepnun do, kum do?’ tenena ap, yuk nang arye anggunti, “Sik adiparyuk areplulume,” nyapsikce ning ap, deice arye arena kume. Sik kanye deibuka pin-pin asa arye arenyak ninye ati, Allah arye, kanye deilisulula ati, nyapsine.
Sik yo bok deice deksikiba, talye ati pil domunye nang ara, anggun deiyok nang arye, nyasice yupu ara, moubuka kekepmunce, ‘Nun deiyok nang ara, pia mambule’ tenen, si erebuka unamlume. Aning nirya ara, tenepce winina kum bukni, anggun kanye talima diksukum ubuka telebuk wininamlulume. Ara, ‘Kristus nyapsutuba, el yupu kekebuka dobolbana atonun winipnuyabe’ tenen, anggun deiyok nang arye, nyasice yupu ara, kekebuka teleb ubuka wininamlulume.
Aning kum bukni, anggun kanye teleb deice aryuk, anggun talimunye ning ton bokuka, bona talina kumnye biti arenamlume. Ara, anggun domba basam ap, kambing basam ap, gandum duk do, tonda anggur duk teikmunce, anggur mek kwenamlum ning do, anggun dam aupmasilye ning ara, el tibuk boyanuka arenamlume. Ara, Allah Yahweh arye, anggunti weik tonun yamubuka aresilye ning, anggun dam awapsilye touk dobuka, anggun pil donanye biti arenamlume.
Ati, anggun ni koproba Allah Yahweh arye, elce kintinip deiamlyakuk, pia teleb kanye deibuka umunce, aning dinamlume. Ara, anggun ap, anggun mapu ap, anggun kilmapu ap, anggun pil don nang ap, kilapu ap, tonda anggun asik noutam unamak Lewi yala nang ap, yuk mutuku arye tikilyangan ninye asik nang ap, tonda yuwak kilapu ap, sik nin ap, sik ni ap akunum dibikba, batakik mapu ap, kwangnamne nang ap, anggun nirya ara, teleb kanye uk bobuka ulamunce, kil-kil asa arye neika unamlume.
Sik yuk nang ati, talye pil dobuka melin ninye ululum nang ara, yata winin ning ati do nirya, anggun deiyok nang arye nyapsikce yupu nirya moubuka kekepmunce, aninguk wininamlulume. Ara, pil lik kanye bobuka donyak nang arye, ‘Nun deiyok nang arye, teleb pil don nang, tenepnamsiak’ tenen, ‘Nun damak uceura, eipsikce talakuk, pil teleb kibuka donamape,’ tenenyake. Aning tenelamak atouk kum wininamlulume. Aning ara, kum bukni, anggunda, ‘Nun ni Allah weik mambule’ tenen, el si erenauk ululum ninye anya arye, duknubuka winina kum arye, dipkoprop lak akuk pil teleb kibuka donamlulume. Ati anggun deiyok nang arye aruklamsiak talak babye, kum aruklamsiak talak babye, teleb ubuka pil donamlulume. Ara, Allah el si erena ati wininamlulume.
Nunce anggunti, pia bico tenebuka, kanye akunum areamsupe ati ara, nunce, anggunti utenelamsubu. ‘Allah el laka teleb yupu, ninye lyena yupu peterenauk kum wininamabe. Nun winilamap ning nirya deice arye, aninye ati weika arye melinamabe,’ tenelamuburye, kanye deibuka winilamsupu. Winilamubu deiyok ara, nunce anggunti, pia kanye delilamsupa ati nyababe.
An dam min kum yanamnye talak noutam nirya, batakna kum arye, pia tuba-tuba anyapnukin pil ara, donalyame. Ara, ‘Yuk ninye kekenamak’ tenen, laka ninye kekenak arye, Allah yupu yininamlyame. Tonda, Allah el yupu deice arye laka nyana ap, “Winiplulume,” nyabuka, peterena ap, “Winina meme,” nyabuka, wenena ap, pia wininamlyame.
Winira, yuk yupu ton nyapnukine. Allah yupu peteren nang, sik deiyok nang nirye arye, anang ati kibuka si erenamake. Allah yupu aik deiyok nang nirya ati, si erenamak bukni, weik mambul ning ara, Allah yupu pia bita lilibuka peterena ap, ‘Yuk ninye dib tenepnamak’ tenen, tilila nyana ap wininyakce, pil donyak nang ati ara, weik arye si erenamlulume nyapkine.
Tonda, bona weik talin nang ati ayupu ton nyanamlyame. “Sik bona weik talin nang ara, sik bona weik aulye touk, teleb un ning weik arye pia upmunyopura, aning ara, bona weik talin nang atonun unamake. Tonda, ‘Se aning ara, ‘Na’ tenen ning anya arye, kum arenamne’ tenen, teniltona kum aryuk, talye kanye bobuka yuk ninye ati, anggun ning weik arye bokuka arenamlume,” nyabuka peterenamlyame. Na Paulus arye nyapmakine.
Ura, ton nang arye ara, ‘Allah yupu kekena ati, neika bulunyaba ara, nun like,’ tenekirye, Allah yupu aik kum wekenyak bukni, nunda, batakna kum arye, neika bulubuka wekelbanauk unamabe. Tonda, nun nirya arye, yuk nang nirya ati, talima kwa dibuka, melilanauk unamabe. Winibuka ulamibya ani, Yesus dolyanamsil talak, Weik Sum dam yaliba, kel kibibyopura, weika arye tonap, talima kwa baribuka melilanauk unamabe.
Ura, Allah diba tenena ati, ninye deiyok nang atonun usinyak ninye arye, nyasinyak yupu moubuka kekepmunce, sik amu tam bukuka, dakeiyam asa arye unamlulume. Sikce, ‘Nun amu tam unyak ninye ara, diba tenebuka teleb unyak do, kum do?’ tenen, kalikuka disinyaka ara, urdem ati kum unyake. Aminyan talak Allah arye adeiyok nang ati, asipdeliba, sik pil nirya ati, “Winilamubu, winilamubu,” nyabuka laka nyabikiba, Allah arye anang ati, yupu lipsisikuka bokeipnamle. Kekena kumce mandipna dopmunyopura, anggun deiyok nang ikin kanye bobicopura, anggun babye anggun bidamang ati, malye winililanamlume. Ati, anggun deiyok nang arye melibuka dosinyak pil noutamak nirya ara, ‘Telebuk unyabe, nun deiyok nang arye, kanye deibuka unamak’ tenen, anggun deiyok nang arye nyasinyak touk, kekebuka dobolbanamlume. Sik yupu yanina meme.
Ura, sik ninye deiyok nang atonun ubuka, Allah el yupu peterelamsik nang ara, sik winilamik ning luba kina kume. Anang arye winilamik ning ara, tuba tenenauk unamlulume. Sikce diksukum ulamikce, teleb pil dolamika deice arye, nong kilamuk ning nirya ara, aning tuba tenenauk unamlulume. Anggun deiyok nang arye diba tenelamik touk, anggun babye atonun, diba tenebuka telebuk wininamlulume.
ကြော်ငြာတွေ