Winipmanto ning ton nyapnusine. Mong mek ara, pia dina teleb ning anya arye, teleb lelule. Bukni, ‘Among mek tonok dinamne’ tenen, weik arye dimunyopura, dipkoprob mun uk dinamsile. Aning atonun, yuk ninye arye anggunti, ‘Se, anang ara teleb unyak nang,’ tenepsikirye, tuba-tuba kibuka kanye deipsikiba kekemunce, ‘E, anyapmasiyak yupu ara kekena telebe. Tuba nyapsitinge,’ tenenamlume. Bukni, anggunce, ‘Se, ninye nirya arye, nunti kibuka kanye deipsitinge’ tenen, patapliba, aning tuba-tuba tenena uk umunyopura, pia malye unamlume. Winibuka tenena uk umunyopura, anggunce anggun bidamnye atibuk, malye ulildalamlume.
Roma 12:3 - Eipomek3 Ura, na kayapo anggun nirya ati, ayupu ton nyapsine. Allah arye bico tenepnukce, el kanye aniryuk melyamnuk deice arye nyapsine. Yata ninye do nirya, anggunce anggun bidamang kanye aryuk erelilana ara malye ati, winina meme. ‘Nara, weiknye,’ tenena kum bukni, anggunce Allah ati diba tenepmunyopura, elce diba tenen deiyok ning tabakuka areamsuka atonun, anggun kanye ara amu tam bukmunce, moubuka yuk-yuk tenelanamlulume. အခန်းကိုကြည့်ပါ။ |
Roma 12:3
47 ပူးပေါင်းရင်းမြစ်များ
Ninye arye wininyak ning moubuka dinamlulume. Yata nang do nirya, sik babye sik bidamang atibuk, ‘Nunda weik kel nang unyabe,’ tenelanyak ninye ara, dipkoprob walwal uk unyake. Dipkoprop aning-aning nirya kum kel bikamik bukni, tuba walwal kanye bobuka unyak ninye arye, “Se, nunti peterepsululume,” nyabuka moropsicopura, nunce moubuka, lipsisikuka peterebibi buk, anang ara kel biktinge. Bukni, yuk ninye ara, sikce sik bidamang atibuk, ‘Nunda weik kel nang akunum unyabe,’ tenelanyak ninye ara, lipsisikuka kum peterepmanto unyake. Kel nang arye nyanyak yupu ara, moubuka kum kekenyake. Sikda maknya kintinildan nang unyak ninye anya arye, sik bidamang aryuk tenen ninguk tenenyake. Yuk nang arye nyanyak yupu ara, pia kum kekenyake.
Ati ara, na kanye aryuk tenepse ning ara, nyapnusine. Ara, anggunce, ‘Se, nara pia teleb kibuka, diksukumuk pia unamneʼ tenen, pia pi dobuka pirilulumce, mikip weik pil ara kum donamlume. Aning atonun ton, anggunce, ‘Se, nara dipkoprob kel weik bikna deiyoknye unamneʼ tenen, pia pi dobuka piripmunce weik pil ara kum donamlume. ‘Deiyok ara, weik pil doptinyeʼ tenen, pia piribuka mikip pil dolamluma deice arye minop mitang usilyeba dipnamlume. Ati aning ara, winina meme.
Kume, aning-aning nirya, akunum winiptibya babye, adeice arye, pia kum lyepnamsile. Bukni, nun ni Allah Yahweh arye, nun tukwak mutuku unyap ninye nirya ati tenesilya ara, ‘Na kanye delina ati ara, wininamake,’ tenesulule. Utenesilya ati, el minop talak akunum laka nyapdeiamsuk ara, ani. Yata ninye do nirya, pia diksukum teleb kibuka unyakce, yuk ninye nirya ati, bico tenelakirye, kanye talima, amu tam nimalyap asa kanye deibuka, telebuk unamake. Wininyakce, Allah el amu tamuk unyakce, kanye talima erena kumce, Allah ap, kanye talima dukdongobuka, neika ubicopura, Allah arye aninye ati, kanye delinamle. Aning ara, ‘Wininamake,’ tenesulule.
Birikce, Farisinye tikukce, Allah moronmok noutam arye, elce winilamuk ning atibuk ayupu nyabuk. “Na ni Allah, yuk ninye nirya malye ulamak touk kum wininune ati, teleb nyapkine. Anang ara, wininyake. Ton ning ara, ‘Weika arye dopropnamap’ tenen, yuk nang tia aryamice, ato kum bukni, weik tonap tabakuka tamudolonyak nang unyake. Ton ning ara, pia malye-malye wininyak nang ap, sik domik kilapu kum bukni, talye kilapu yona nang ap unyake. Sik wininyak atonun kum wininune. Tonda, otikmalnye yo bok boyangace buk, ubula dololamle atonun, nara kum wininune.
Na Paulus birye nyapsine. Allah arye nyapdeibukba, Yesus Kristus el pil dopnuka deice arye, ‘Paulus ara, na yupu peterena ati, deiyok kounanye unamle,’ tenyamnukce, wibuka deipnuke. Wibuka deipnukce, el kanye arye bico tenepnukce, el yupu peterena ati, pil dona deiyok ning arepnuke. Winipnuka deiyok ara, ani. Ara, Paulus arye na yupu dobuka, peterepra banamle deice arye, Yahudi yala kum ninye unyak mutuku im sirya, mutuku sirya nirya noutamak arye, ninye weik na yupu kekebikirye, dib tenepneicopura, na talibuka, na yupu kekebuka, na aminyan dobolyanganamniake. Winibiceura, Yesus Kristus el si weik arye erenamake. Ati, Allah arye, ‘Yahudi yala kum ninye, nati dib tenebica deice arye, na yupu moubuka talibikirye, diksukumuk unamak’ tenen, na Paulus ati wibuka deipnuke. Ara, ‘Paulus arye, na yupu dobuka peterelbinamle’ tenen, Allah arye wibuka deipnuke.
Ura, aning ara nyapnitinge bukni, luba kina meme. Minyuma yo taruk seklobuk ning deiyok ara, sik Israel ninye diba kum tenyamika deice arye batakuk. Aminyan dukdongobuk yo taruk ara, anggun Yahudi yala kum ninye, tuba-tuba diba tenemunya deice aryuk, tuba ululume. Aning ati ara, ‘Nunda, akunuma. Teleb ninyeuk unyabe’ tenen, anggun bidamang kanye talima erelana meme. Aning kum bukni, ‘Nun diba tenenyap ning ara lik upsilyeba, batakipyak’ tenen, adiparyuk ilil asa arye unamlulume.
Na weit yapu, anggun Roma mutuku ninyeo. ‘Anggun walwal arye, anggun bidamang kanye aniryuk, ‘Nunda weik mambul weik nang unyabe,’ tenemunce, kwalilulum do?’ tenen, ayupu laka nyapsine. Ayupu ara, minop talak Allah arye duknyamuk bukni, wini talak ara akunum laka nyapsuk. Allah arye Israel yala ninye noutamak arye, ton nang ara, sik talima kat kibuk ning ara, tia talak ati ubuk. Winibukba, sik ilil pia kum kanye bobuka el yupu kekena kum arye ulamica ani, Allah arye, ‘Yahudi yala kum ninye yupa pia weik, winibukap dopropnamne,’ tenyamuk touk, sirya dakuka akunum doproplyopura, akunuma. Winibuka sirya daknamle talak ara, Israel yala ninye sik kanye talima nirya ara, namin asa aryuk unamake.
Anggun ap, kanye talima dukdongobuka tonok kanye bobuka, anggun neikauk kanye deibuka namin asa arye unamlume. ‘Nara, weiknye unune’ tenen, anggun bidamang kanye erepdamunce, kwalinauk kum unamlume. Aning kum bukni, talye bona utotoa kum ninye ap, mambul kum nang ap, kanye talima namin asa arye teleb ubuka neika unamlume. ‘Nara, pia mambulnye’ tenen, anggunce, anggun bidamang ati kanye kum erelanamlulume.
Malye ulamse ati ara, ayupu kum nyapnitinge bukni, Allah arye nati, bico tenepnukce, el kanye aniryuk melibuka lyepnuka deice arye, el yupu peterelbana ati deiyok kouna deiyoknye una ati, wipdeipnuke. Bico tenepnukce, el kanye aniryuk melibuka lyepnuka nong ara, kum kum dayuk. Talya kum winilamse. Aning ara pia kume. Allah el yupu peterena deiyok nang nirya ara, pil mitik mikip arye, el Pil dolamik bukni, nara mikip arye, Allah el Pil dolamse. Pile weik dolamse nyapmasin bukni, dipkoprop ara, na mikip deice aryuk pil kum dolamse. Kume. Allah bico tenepnukce, el kanye aryuk melilamnukce, el mikip areamnuka deice aryuk, el Pil dolamse.
Ara, winipmanto yupu deice arye, asik dona atonun ning ton nyapnusine. Allah arye nati, ‘Na pil dopnamnil’ tenen, pil dona deiyok ning, el mikip talye arepnuka deice arye, aik dona weik kel nang arye, aik ayukumna yo pia teleb ning iklamak touk, Allah yupu peterena deiya kouna ati, Allah yupu peterelamsise. ‘Anggun dib tenepnamlum’ tenen, aik ayukumna iklamaka atonun ning, pil dolamsa ani, aminyan ara, adeice arye yuknye ton, aik nong dolamaka atonun, wini talak pil dolirye, peteresulule. Bukni, apil-apil don nang nirya ara, ‘Mankau kanye arye, malye pil donyap’ tenen, sikce sik bidamang ati, adiparyuk pia moubuka dilanamake. Ara, talye ati kum nyapsine.
Arup nyapmasin yupu aupmasil bukni, yuk ning ton nyapnusine. Ara, anggunce asipdenulum ning ara, nyapnusine. Yesus min dib kum teneplum talak, malye winina kum bukni, pil dobuka ulalumce, dib akunum tenepmunyopura, ‘Min arye, dolamse pil batakuka, yuk pil dopra unamne do?’ tenena kume. Allah arye, ‘Awinin ning ap, apil ap donamak’ tenen, wipdeiamsuk touk, aninguk talibuka wininamlulume, nyapsine. Aning nyapmasin touk, mutuku-mutuku nirya, Allah ati dib tenenyak ninye nirya ati, “Talibuka wininamlume,” nyabuka, ayupu uk peterepnabuk, kekebuka dobolbanyake.
Sikce sik bidamnye ati, talima erepdakirye, kanye lon yupu nyaldalamak touk kum nyanamake. Allah arye nunti, “Amutuku noutamak pil donamake,” tenyamsuk touk lo arepsukbuk, pil dolamubu mutuku ati, kanye lon yupu nyaptibye bukni, nun binuka pil kum dolamubuak ati, yupu kum nyapnune. Allah arye areamsuk mutuku noutamak ara, anggun mutuku Korintus mutuku ton aubuke.
Anggunce, ‘Se, Paulus arye, yuk mutuku dib tenyamik nang ara, sik mambule,’ tenelul bukni, ‘Paulus arye nun Korintus mutuku nang ati ara, mitik mambuluk tenesulule,’ tenelulum do? Kume. Neika ulamubu talak anggun ning kum morolamsise deiyok ara, yuk kume. ‘Na patan ning arepnikce deice arye ikin ning sik nong deice deipnun’ tenen, kum morolamsise. Bukni, ‘Aning kum moropsuka ati, malye ubuk,’ tenepnumunyopura, ‘Mangkau kibuka monoknamlulum’ tenen, moropsine.
Ara, yo tingkul opsilyebuk, nun nong bol weksilirye, uk weik dilamsil touk, Allah arye nati, ikin ning na nong deice deiamnuke. Deiyok ara, Paulus ara, weik mambul weik ning kekebuka eibuk ati, Paulus arye, ‘Nara, weiknye, teneplirye, kanye erepdalyak,’ tenepnukce, ikin ning na nong deice deiamnuke. Allah arye, “Dauptue,” nyabukba, Isa Mutuku Dongonye arye nati, ‘Ikin kanye bobuka unamle’ tenen, aikin ning na nong deice deipnukura, aunulule.
Ara, na kanye ara, na nyapnusin yupu ara, yuk nang arye, akunum laka nyabikba, kekepnulume. Ara, Allah arye, anggun Yahudi yala kum ninye ati, bico tenyamsukce, el kanye aryuk, ‘Sik melibuka lyepnamne’ tenen, kintinipsuk ning ara, ‘Paulus birye, ayupu dobuka peterelbinamle’ tenen, elce na wipdeipnukba, el laka teleb yupu, ninye lyen yupu, anggunti peterelyasise.
Ati, na akunum sekmasin yupu dobuka yinipnamlum deice arye, moubuka kekepmunce, kel biknamlulume. Ara, Allah arye, ‘Wininamsine,’ tenyamsukce, Kristus pil dopsuka deice arye, akunum kintinipsuk bukni, dungnyamsuk ning, ‘Deiyok ani’ tenen, moubuka kel bikamse touk, asekmasin yupu yinipmunce, ‘Anggun babye, kel biknamlume’ tenen, nyapsine.
Tonda, nun taruk ap, yan ap, nong deice upsuk ning, mil-mil arye, dukdongopsiliba, nun nong tonok aryuk, pil teleb ubuka dolamabe. Aning atonun, nun yuk-yuk unyap bukni, Kristus nun Deiyoknye nun talima talisilirye, el mikip deice arye, dukdongopsilyopura, nun pil yala yuk-yuk donyap deice arye, kanye talima arepdanuka melilanyabe. Wininyaba deice arye, nun kanye talima nirya wisisulule. Atalak noutamak nirya ara, nun nirya arye, yuk dib tenenyak ninye nirya ati, kanye dukdongobuka, bico tenepdabirye, melilanamabe.
Ara, anggun Yahudi yala kum ninye ara, anggun malye tenelamlum ning ap, talima malye ulalum ning ap, deice arye, akunum dibilamak ninye atonun ulalume. Minop talak Allah arye, “Den bam bol mouse ning kum seklamik nang, na dam kum yatinge,” nyapdeiamuk touk, anggun Yahudi yala kum ninye babye, anggun malyeuk ulamlum talak ara, Allah el dam kum yanmanto ulamlume. Minop talak noutamak winibuka pia malye ulalum bukni, atalak noutamak arye, Allah arye Kristus kam bukeibuka deice arye, anggun babye, kam bukepsuke. Allah arye, nun malye unyap ning ap, malye tenenyap ning ap, namin kipsukce, kum kipdeipsuke.
Nun Deiyoknye Yesus arye, el kanye aryuk nati, bico tenyamnukce, pia weik arye melilamnuke. Mitikanun arye kume, elti, dib tenena deiyok ning ap, yuk ninye ati, bico tenena deiyok ning ap, abitinye weik arye areamnuke. Yesus Kristus ap, kanye dukdongobuka ulamap talak noutamak arye, abitinye ning arisulule.
Diba, Hawa malye winibukura, Allah arye wenebuk bukni, Allah arye kilapu ati, lyelule. Kilapu sikda, Allah dib tenebikirye, yuk ninye ati bico tenebuka melina ap, talye ubuka una kum, kanye moubuka tenena ap, Allah diksukum ulye touk, pia diksukum winina ap, ubikceura, sik mapu delinamak talak nirya, ara, Allah arye kalekuka meliplirye, lyelule. ‘Ati, sik kilapu aning bikikirye, moubuka unamak’ tenen, na Paulus arye sekeibkine.
Ara, na kanye ara, kilapu nirya adiparyuk, talye kanye bobuka una kum, kanye moubuka tenebikirye, ‘Ninye yuk nang eipsikirye, yobsiting,’ tenebuka, ‘Pitin-pitin unamsiak’ tenen, bumang baju ongona meme. Tonda, anggunda, yuk ninye arye nun ongon ning eipsikirye, ‘Se akilapu ara, urasin pia teleb anya arye, dobuka yoptibye, tenepnamsiyak’ tenen, potong kouna ap, emas teleb ning ap, dekna weik karakna ning ap ara, dekna weik baju ap, yuk kweirya ap, dona meme. Winina ara, pia malye ati nyapne.
Nun ni Allah, el bico tenepsilirye, talye melisilya deice arye, peteresiliba kel bikinyabe. Ara, Allah yanibuka kanye talima malye winina ap, talye nang arye tukwak malye ning tenebuka kanye engena ap, ati, “Kume, aning pia kum wininamlume,” nyabuka peteresululba kel bikinyabe. Tonda, nyanamlyame. Allah bico tenesilirye, lyesulul anya arye, “Anggun patasilye ning. ‘Talye kanye bobuka winipnuyap,’ tenena kume. Anggun bidamnye ati moubuka dilanamlulume. Allah pia funguk ulirye, pia teleb ulye touk, anggun babye diksukumuk ubuka teleb nang unamlulume,” nyabuka peterepsine. Wini talak babye, aning atonun wininyabe.
Sik wisi nang nirya ati, ayupu nyabuka peterenamlyame. “Yata ning do nirya, yu mek kanye walamak mek dina do, yuk malye winin ning do, ‘Talye luparapkabuka winipnune,’ tenena meme. Anggun bidamnye ati, pia moubuka dilamunce, moubuka tenepmunce, nimalyap asa unamlulume,” nyabuka sik wisi nang nirya ati, peterenamlyame. Winibicopura, yuk ninye arye awisi nang eibikirye, “Awisi nang ara, dipkoprop teleb nang unyake,” tenebuka nyanamaka atia. Tonda, sik Allah ati, dib tenen ning ap, yuk nang ati bico tenebuka melin ning ap, ikin ning aupmalibuk, pil batakna kumce, pia pi dobuka teleb pil don ning ap, anirya ara, ‘Adip aryuk telebuk unamak’ tenen, sik wisi nang ati, peterenamlyame. Ateleb yupu kekebicopura, aminyak talak, Allah el dipkoprop yupu kekebuka, diba tenebicopura, diksukumuk ubikirye, Allah el yupu batakna kumce, pia darabukauk unamake.
Arup nyapmakin touk, ance sik kam nang ati ara, melibuka peterenamlyame. Ara, sik kanye noutamak patalul ning, ‘Talye luparabuka winipnun,’ tenena kum diparyuk, ‘Malye winibibyak’ tenen, sik wininyak ning ati bita dipdandekirye, sik mining kanye atibuk, diksukumuk unamake. ‘Winibuka unamak’ tenen, ance sik kam nang ati, anyapkanin yupu peterenamlyame.
Aning ati ara, diksukumuk una ati, anggun kanye moupmunce, ‘Allah el piluk donamap’ tenen, kintinibuka dinauk unamlulume. Tonda, ‘Malye ubibyak’ tenen, kanye moubuka kalikildanamlulume. Aning pia wininamlulume. Allah arye, Yesus laka kiplibuk, Yesus Kristus tamubuka yanamle talak ara, bico tenepsilirye, talyeuk arenamsil ning ati, ‘Dipkoprop wininamsil’ tenen, diba tenebuka, anggun kanye Allah deiceuk delinamlulume.
Winipmanto ning ara, yatanye do, Allah yupu nyalulnye bira, Allah el dam yaturye, nyaptubuk elce ila tamubuka nyapsutu touk, pia mikip deice arye peternamsile. Aning atonun, yuk ninye ati, melibuka pil dolulnye bira, Allah arye el mikip arisilya deice arye, yuk ninye ati melibuka pil donamle. Allah arye, ‘Na pil donamak’ tenen, talye arisilye pil dona deiyok ning deice arye, Yesus Kristus ap, kanye dukdongobuka umunce, anggun wininamlulum ning nirya ara, teleb ubuka unamlulume. Winibuka umunyopura, yuk nang eipsikirye, Allah el si weik arye erebikirye, elti, “Telebe,” nyanamake. Ninye mutuku-mutuku nirya arye, Allah el si erebikirye, ‘Weik mikip ululnye bira, Allah eluk,’ tenebuka, ‘Pia unamak’ tenen, Allah moronune. Akunuma.
Asurat deice arye, “Yuk nang ati, nimalye arye sik amutamak unamlulume,” nyapmasin touk, anggun wisi danana kum arye, kam nang atonun nang ati, ayupu nyapsine. Ara, sik wisi nang amutamak umunce, sik yupu kekebuka nimalye arye unamlulume. Buku Amsal yupu noutamak sekeipsik yupu aupmala ati nyapsine. Ayupu ara ani. ‘Sik kanye erebuka, dildanyak ninye ara, Allah arye aninye ati bataklirye, sik yupu sekelule. Bukni, sik kanye darabuka, talima nimalye arye amutamak unyak ninye ati ara, bico tenepsilirye, talye luba kibuka melisulule.’ (Amsal 3:34) Ayupu tuba awamsuka ati, anggunce yuk ninye nirya ati, anggun bidamnye kanye darabuka, talima nimalye arye teleb ubuka unamlulume.
Ara, yuk yupu ton nyapnusine. Anggunce anggun bidamnye ati, ‘Malye ubibyak’ tenen, kanye moupmunce kalikildanamlulume. Tonda, leibuka unamlulume. Isa Mutuku Dongonye ara, anggun oldan nang atonun usulule. Elda, singa do, bai kam do, atonun, ‘Yata ning obuka diptinye do?’ tenen, kalikinmalirye, obina yana kibuka kalikilsulule.
ကြော်ငြာတွေ