Ati ara, malye umunye ning ara, duknuna kum bukni, lakakibuka, laka nyanamlume. Nun apu yapu, sikce si erelamik Allah, el si Yahweh dam aryuk, ‘Se, dipkoprob nun malye wininyabe,’ nyabuka, laka nyanamlume. Aninguk kum bukni, winipmunyopura, Allah elce, ‘Winipnamake,’ tenesilye ninguk, el kanye delin piluk talibuka donamlume. Ara, nun dana-dana tam unyak nang ap, nun mutuku noutam unyak ninye asik nang ap, sik Israel yala nang arye, yuk mutuku kilapu dobuka boyamunce, neika umunye kilapu nirya ap ara, yukak yakdonoknamlume. Anang nirya yakdonoknamlume,” Esra birye nyabuk.
Roma 12:2 - Eipomek2 Tonda, sik diba kum tenenyak ninye arye winilamaka atonun, tuba kum wininamlum bukni, Allah arye anggun malye kanye tenen ning nirya dangupsilirye, kanye talima winiryuk ning punubuka arisilya deice arye, anggun winin ning nirya ara, telebuk wininamlulume. Anggun kanye talima winiryuk ning akunum upmasilyopura, Allah arye, ‘Wininamake,’ tenesilye ninguk, moubuka kel kinamlulume. Ara, ‘E, dipkoprop teleb winin ning ara ani. Winibibiba, Allah arye kanye deilisilye ning ani. Malye ning tonok babye kum winiplirye, diksukum winin ning ani, kel kinamlum’ tenen, nyapsine. အခန်းကိုကြည့်ပါ။ |
Roma 12:2
61 ပူးပေါင်းရင်းမြစ်များ
Allah ance nyapdeiamsulum yupu ati ara, kanye delinune. Winipmanto ara, ninye arye mong mek dipmakiba, si bam bol dam, min-min teleb lelamle ning ara, mitik teleb ulul bukni, ance nyapdeiamsulum yupu ara, pia weik teleb yupu nyapsuluma anya arye, ayupu ati, weik arye kanye delinune. Mong mek dipniba mitikto lelamnil bukni, an yupu kekepnye talak ara, weik arye kanye delinune.
Aning ati ara, na kam unamne talak nirya ara, ance, “Winibuka wininamlume. Aning ara, pia kum wininamlulume. Teleb winina ara, ani,” nyabuka, nyalisiminye touk, na babye, ‘Ayupu ara, pia dipkoprob teleb yupu,’ tenenirye, aninguk talibuka wininamne. Tonda, malye winin ning ayala-yala nirya ap, malye wininyak ninye arye, malye wininyaka ap ati, ‘Na like,’ tenebuka unamne.
Se, na ni Allah, ance ninye weik arye lyepsimince, talibuka teleb kilinamsilam ning ara, ‘Dan talak arye lyepnamsilam do?’ tenen, pia kintinibuka dinauk unune. Tonda, ance, “Aninguk wininamlulume. Aning ara, kum wininamlulume,” nyapdeiamsulum mem yupu nirya ati, na kanye talima noutam nirya arye, ‘Ayupu ara, pia telebe,’ tenenune.
Na ni Allah, ance, “Aning ara, wininalulume. Aning ara, pia kum wininamlulume. Teleb winina ara, ani,” nyapdeiamsulum yupu, nati bokuka, arenilyam ning ara, tukwak mutuku noutamak, talibuka unyak urasin teleb ning, el si ara emas ap, perak ap, dekna weik ulamle. Bukni, na kanye ara, adekna weik ning ara, mitik mambul uka. Ance nyanilyam yupu nirya ati ara, ‘Ayupu ara, weik mambul,’ tenenune. ‘Ayupu ara, weik dekna weik ning atonun ulule,’ tenepnirye, ayupu ati, kanye delinune.
Winibuka, ance teleb kibuka deipniminyopura, ila tuba tonap, kanye deibuka unamne. Tonda, na malye winipsa ati, ance kel biknulumce, ‘Elda malye winibuknye,’ tenebuka wenepnulumce, pia weik ikin ning arepnuluma deice arye, imun kanye bobuka unun bukni, ‘Ance aikin ning dobuka lyepnulumce, kum kipdeipnulumba, ila tuba tonap teleb unamne’ tenen, moropkine.
Sikda, malye unmace nang weika arye wininmakiba, epmunyopura, ‘E, nun babye amalye wininmak touk, nun babye malye unamabe,’ tenebuka, kum wininamlume. Malye nang arye malye wininmace touk, anggun ton melibuka kum wininamlume. Tonda, sik anang arye, malye winipmace, yupu lipsisikuka delina deiyok nang arye, ‘Amalye winipmace nang wenepnamakʼ tenen, bulupmace dam bimunce, ninye weik arye, “Kume, anang ara, malye kum winipmangu,” nyabuka, talye yupu nyabica babye, anggunda na mapu koproba anya arye, aning atouk melibuka kum nyanamlume. ‘Tilila yupu deice arye, teleb ning ara, malye kipdeipmuyakʼ tenen, ati nyapsine. Malye ning ara, ‘Aning ara, malye diamuk,’ nyanamlume. Teleb ning ara, ‘Aning ara, telebuk ulule,’ nyabuka, diksukum yupu dem nyanamlume. Minina yupu nyana meme.
Ati ara, se anggun Israel yala nango. Anggun malye winimunye ning nirya batakmunce, ‘Allah arye, nun kanye ap, talima ap, winiryuk ning arepsutue’ tenen, nati moronamnulume. Winibuka morolamnumunyopura, winiryuk kanye ap, talima ap, punubuka arepsinyopura, kam pia uptume. Kumopura, yata deiyok ati, ‘Dauaple, nun dipna babye, teleb uka,’ tenelulum do? Anggun Israel yala ninye, dipna ara, na like, nyapsine.
Ton ninye ara, Allah yupu kekebuka dolonyak bukni, yo duk tirmangka weiyang-weiyang kan-kan sakmok ning atonun wininyake. Ara, tukwak mutuku noutamak arye, ‘Aning doproptinirye teleb uptinye do? Yuk ning aupnutuba teleb uptinye do?’ tenen, teniltona ap, kanye bokoltona ap deice arye, Allah yupu batakalogonyake. Tonda, “Bona weik doproptinirye, telebuk uptinye,” nyabuka, sikce sik bidamang arye, tilila yupu talya nyaldanyake. Tonda, aning-aning nirya weik patapliba, ‘Aning ton doproptinye, aning ton winiptinye,’ tenenyak deice arye, lik upliba Allah yupu batakalogonyake. Wininyaka ara, tirmangka weiyang-weiyanga arye apamuk ning koupdongobukce, angkalung kipdongobukba, wen-wen alamuk touk, talya tukwak ning aning-aning nirya pia tenenyak deice arye, Allah yupu kekelamikce ning ara, batakiceba duk kum mouplirye, talya urdemuk bolule. Ara, teleb ubuka kum kekekirye, Allah yupu pia kum dobolbanyaka ati nyapsine.
Tukwak mutuku noutamak arye, ‘Aning arye, teleb uptinye do, aning arye teleb uptinye do?’ tenen, talima bintinilaliba tenildana deice arye batakanyake. Tonda, ‘Bona weik doproptinirye, telebuk uptinye,’ nyabuka, sikce sik badamnye ati, talye nyalanyake. Tonda, aning-aning nirya, yala-yala weik patalya deice arye Allah yupu batakanyake. Wininyaka ara, tirmangka weiyang-weiyanga arye apabuk ning koupdongobukce, angkalung kipdongobukura, wen-wen alamok touk, aning-aning nirya pia pataplibuk, tenelamaka deice arye, Allah yupu kekelamak ning ara, duk teleb ubuka kum moulule. Allah el yupu teleb ubuka kum kekebikirye, pia talibuka kum dobolbanyake.
Diba tenena kum, talye unyak ninye arye wininyak ning atonun winin ning ap, tenena ap, winipmunyopura, atalye nang arye sikti, ‘E, anang ap, nun ap ansinibuka unyabe. Sikda, nun wininyap atonun wininyake. Ati nunce anang ati kanye delinyabe,’ tenepnamsiake. Bukni, dipkoprop ning ara, na mapu anggun winilulum ning ap, anggun tenelulum ning ap ara, talye wininyak ninye atonun pia kum ati, anggun ansinibuka kum ululume. Talye tukwak ninye kan-kan noutamak, narye wipdeiamsisa ati, anggun na mapu ululum nang ap, talye nang ap, ansinibuka kum ululume. Anggun kanye tenelulum ning ap, anggun winilulum ning ap ara pia yuke. Sik diba tenena kum, talye unyak ninye pia yuk anya arye, aninye arye na mapu anggunti, ‘Nun lik,’ tenesinyake.” Yesus arye nyabuk.
Naio, narye na mapu ati, an yupu areamsibuk, dolonyake. Sik diba tenena kumce, tukwak mutuku talye unyak ninye arye, na mapu ati, ‘Nun lik,’ tenenyake. Ara talye ati kume. Nara, atukwak mutuku ninye malye-malyeuk winilamak touk kum wininune. Na wininye touk, na mapu babye, talye wininyak ninye atonun kum wininyaka anya arye, diba tenena kum ninye arye, na ap, na mapu ati, ‘Anang ara nun lik,’ tenesinyake.
Na kayapo, malye unyaba ati, Allah arye adiparyuk talye wenebuka oplopsutu bukni, weik arye bico tenesulule. Bico tenesilirye, pia teleb kibuka melisulule. Aning ati ara, minop talak Allah el si erena ati, kam ning obuka arilamik touk, ‘Anggun kanye talima ap, nong ap nirya ara, Allah ati arepmunce, diksukumuk unamlum’ tenen, mikip arye nyapsine. Wininamlum ning ara, talye yupu deiceuk nyabuka, nong bol deice atonun una kum bukni, anggun kanye talima pum tam ara, dipkopropa pia diksukumuk umunce, ‘Allah el pil dobuka, el siuk erenamnap’ tenen, unamlume. Winibuka upmunyopura, Allah arye kanye delinamsile.
Amalye winin ning nirya ara, pia kum wininamap bukni, nunda, ninye arye winiryuk baju ongolamak touk, nun Deiyoknye Yesus Kristus ap, neika kanye talima dukdongobuka umunyopura, Yesus el ulamle touk unamlume. Tonda, min diba kum tenyamubu talak arye, nun kanye talima pum tam malye ning patalamsuk ning ara, ila tuba tonap patapsiliba tenemunya babye, pia kum wininamlulume. Amalye winin ning ati, tuba tenebuka kum wininamlulume.
Ura, nun nirya kele. Allah arye, “Aning ara wininamlulume, aning ara pia kum wininamlulume,” nyapdeibukba, Musa birye sekeiyamsuk mem yupu ara, el kanye aryuk kum sekamuk. Allah arye nyapdeibukba, Musa birye seklamuk ati, ayupu ara dipkoprop teleb yupu uk ulule. Bukni, nara talye tukwaknye unirye, na kanye talima nirya ara, malyeuk unulule. Malye una deiyoknye birye, tapu koulongonululce, talilulba, el amutamuk unune. Na bidamang mikip deice arye teleb kum uptinye.
Ara, tukwak mutuku nirya talilye Deiyoknye Isa Mutuku Dongonye arye, sik dib tenena kum ninye ati, asing kuna atonun kum ning arilule. Winiplyopura, anang ara, Allah el dipkoprop yupu kekepman kum unyake. Winilya deiyok ara, sik kanye talima noutamak, Kristus el laka teleb yupu deice arye, Kristus el pia teleb ulya ning kel bikikirye, sik talima ak dirina atonun upliba, ‘Moubuka kel bikicak’ tenen, Isa Mutuku Dongonye arye ninye ati, asing kun ning arilule. Ariliba, Kristus el pia teleb ubuka weik mambul ulya ara, el laka teleb yupu ara pia bikman kum unyake. Allah el pia teleb ulye touk, Kristus el babye atonun ulule.
Aning atonun tuba kum tenenyaba anya arye, ayupu nyapsine. Yatanye do nirya, Kristus ati dib teneplirye, kanye talima dukdongobuka neika urikcopura, elda pia winiryuknye atonun ulule. El kanye tenena ap, el talima ap, el ulul ning ap nirya ara, Allah arye, anye bira minop arye winilamuk ning nirya kum daneiplirye, winiryuk ninguk arilule.
Nun Deiyoknye Yesus Kristus arye, ‘Atalak malye-malye wininyak ninye ara, sik malye wininyak ning ap, malye tenenyak ning ap deice arye, na mapu malye kipdeibicak’ tenen, ‘Sik malye wininyak ning noutamak arye lobuka lyepnamle,’ tenyamukce, nun malye wininyap ning kilina ati, el babye el bidamang nong arepsuke. Yesus arye nun dekna ati, el nong arepsukba, malye nang arye obikba, nun pununa ati dibuk. Ara, nun malye wininyap ning wenena ati, Allah arye talye luba kibuka oplopsutu bukni, ‘Aninye wenebuka kum oplopnamne,’ tenyamukce, Yesus arepsukba, nun pununa ati dipsuke. Aning nirya ara, nun Ni kopropa Allah arye Yesus ati, ‘Wininamle’ tenen, wipdeiyamuk touk, Yesus winibuka deice arye deksuke.
Tonda, aning ton Allah ati morosunune. Ara, Allah arye, anggun kanye talima noutamak, kel kina deiyok ning, dirina arepsilibuk, elce kintenyamsuk ning nirya ati, ‘Pia moubuka kel kinamlum’ tenen, Allah morosunune. Elce kintenyamsuk ning ara, ani. Ara, Allah arye, ‘Na ap, sik ap, aminyan talak ara, pia teleb akuk neika unamabe’ tenen, yukupsukba, anggunce kintinibuka dinauk ululum ning nirya ara, moubuka kele kinamlulume. Tonda, Allah arye, ‘Na mapu ati, pia teleb kipdeipnirye, pia telebuk wininamake. Winibikiba, na ap neika unamabe’ tenen, pia weik arye, kintinpdeiamsuk ning, ‘Aning nirya kele kinamlum’ tenen, Allah morosunune.
Minop talak ara, sik Yesus ati dib tenena kum ninye arye, malye-malye winilamak touk, anggun babye, atonun malye winilalume. Asing arye, kum eilinyap bukni, im noutamak balamak Isa mere, sikti, talipsinaba, sik weik deiyoknye Isa Mutuku Dongonye, el yupu kekebuka ulalume. Ara, Allah el yupu yaniltalamak ninye ara, Isa Mutuku Dongonye elcuk sik kanye talima taliliba, malye weik wininyake.
Aning nirya laka nyapsuk ning ati ara, Epafras arye, anggunti ayupu nyapsuk talak arye dipdongobuka, atalak ap, aminyan unamsil talak ap, atalak-atalak nirya babye, batakna kum arye, anggun Kolose nang ati, Allah pia morosinyame. ‘Allah arye anggun Kolose ninye ati wininamle’ tenen, morosinyam ning ara, nyapnusiname. Ara, Allah arye anggunti, ‘Wininamake, aning ton kum wininamake,’ tenyamsuk ning nirya ara, ‘Dipkoprop moubuka kel kibikirye, aninguk wininamak’ tenen, morosinyame. Ara, ‘Weik kel kina deiyok ning doprobikirye, kel ninye unamak’ tenen, morosinyame. Tonda, Allah El Dib Kanye arye, el mikip arisilya deice arye, nong bol deice ninguk kum bukni, ‘Pia noutamak deiyok kel ning ton moubuka tenenamak’ tenen, Allah morosinyame.
Bitinye ning ara, malye baju batakikirye, winiryuk ning ongolamak atonun, Allah arye anggunti, kanye talima winiryuk ning atonun kibuka, teleb kipdeipsukce, arepsukura, akunum dobuka ululume. Winibuka winiryuk kanye talima kintinibuka arepsuk deiyoknye Allah ara, el babye ulye touk, anggun kanye talima teleb ubribasulule. ‘Sik kanye talima teleb kipnin banamle’ tenen, el winilul ning weik kel kina deiyok ning ati, melibuka arisilya deice arye, el ulye touk, anggun kanye talima teleb kipra basulule. Ara, Allah ap, dukdongobuka umunya noutamak ara, Allah arye, ‘Na unye touk ubribanamak’ tenen, winiryuk kanye talima akunum arepsuke. Aning ati ara, malye winin ning nirya ara, pia bataknamlulume.
Tonda, anggun mutuku, Kolose mutukunye, Epafras arye, “Telebe,” nyapmasile. Elce Yesus Kristus amu tam ulirye, Yesus el pil dobuka ulule. Epafras arye anggunti, pia pi dobuka, Allah moronauk usulule. Elce morosulul ning ara, nyapnune. Ara, Allah arye el mapu nirya ati, ‘Wininamake, wininamake,’ tenesilye ning nirya ara, ‘Aning pia dipkoprop ning anya arye, Kolose nang arye aninguk talibuka pia kanye lamabuka unamak’ tenen, Allah morosulule. Tonda elce, ‘Teniltona kumce, diba tenebiceura, sik talima pia wisipnamle’ tenen, elce anggun Kolose nang ati Allah morosulule.
Nun Lyena Deiyoknye, elce lyepsuka deiyok ara, nun teleb ubuka, diksukum pil weik dolamubu deice arye, pia kume. Aning deice arye, pia kum lyepsuk bukni, nun malye winin ning ati, talya merekuka obuka bataksutu bukni, nunti kanye arepsukce, bicoe tenepsuk deice arye, el minang kanye aryuk, wibuka lyepsuke. Ninye arye, deliltakne ning dobuka, mek liklamak atonun, Allah arye, nun malye winin ning kilipsukce, winiryuk delilamak mapu atonun ubuka deipsuka deice arye, kunum lyepsukce, teleb kibuka deipsuke. Tonda, Allah El Dib Kanye arye, nun kanye noutamak wekuka pil dopsukba, kanye winiryuk ning atonun punubuka deipsuka deice arye, lyepsukce, teleb kibuka deipsuke.
Nun ni Allah el kanye ara, ‘Diksukum diba tenena ning, talibuka una ning ara, malye ning nirya tabakuka, una kum ulul ning atia. Winibuka diba tenenyak nang arye, sik teleb unyak ning ara ani. Ara, sikce kwaknamne mapu ap, youwak kilapu ap ati, bico tenebuka melinyake’ tenelule. Tonda, anang ara diba tenena kum ninye arye, talibuka ulamice malye ning atonun ning, pia talibuka kum unyake. Diksukumuk unyake.
Anggunda, Allah el tonok kanye deibuka dobolbalamtum bukni, yuk ning patapsilyeura, kanye delilulama anya arye, sik donyak kil batakuka, yuk kil dololamak nang atonun winilulume. Ara, Allah ti batakuka, yuk ninguk teneluluma atia. Anggunce aning kum tenipmalum do? Talya tukwak ubuk ning ap, diba tenena kum nang arye, Allah El Dib Kanye nyasulul yupu yaniltakirye, malye unyak ning ap, malye ning patapsilye ning ap ara, ‘Allah lik,’ tenebuka winina atonun nyapsine. Yata nang do nirya, ‘Talye tukwak ubuk ning nirya, anyuk talibuka unamne,’ tenebuka ulamice nang ara, atenenyak deice arye, ‘Allah na like,’ tenebuka akunum unyake. Ara tukwak malye ning ap, diba tenena kum ninye arye, malye unyak ning ap, Allah ap neika talibuka kum upmanto atia.
Yesus min kum diba tenyamlum talak noutamak ara, walwal ninye ulamlumce, malye ninguk patalamsukbuk, malye ulamlum touk, ulamlume. Minop talak ulamlum bukni, wini talak ara, aning atonun kum wininamlulume. Aning kum bukni, teleb mapu arye sik ni yapu yupu moubuka kekebikirye, dobolbalamak touk, anggun babye, Allah el yupu kekebuka, el teleb bisikuk dobolbanamlulume.
Wininamluma ara, talya ati kume. Deiyok ara, anggun kele, Yesus deksukce, lyepsuk ning ara, talye ning, kum winipnamle ning perak ap, emas ap, atonun ning deice arye kum deksuke. Anggun apu yapu nang arye, “Wininamlulume,” nyabuka, talye-talye peterelamsikbuk, ulalum ning talyamsuka noutam arye, Yesus arye min kum winipmanto ning deice arye, dekuka lyepsuke.
Malye winin ning akunum batakanyak ninye ara, kanye imun kanye bobuka, akunum ulamik ati, sik tukwak mutuku tuba unamak talak noutamak nirya ara, ninye talima ak, malye un ning pataplibuk kum wininamake. Malye un ning pataplibuk, ‘Malye winipnuyap’ tenen, kum unyak bukni, Allah arye, ‘Wininamak,’ tenesulul ninguk tenebuka, aninguk talibuka diksukumuk unamake.
Allah weik mambul ulirye, pia teleb-teleb ubuka ulula deice arye, “Weik mambul pil donamsine,” nyabuka, pia teleb nyalin yupu akunum nyalilamsuke. Ayupu areamsuka ara, talya urdem ati kume. Deiyok ara, Allah arye, “Wininamsine, aning ton wininamsine,” nyalisilye yupu deice arye, nun nirya ara, ‘Nada Allah pia diksukumuk unye touk unamak’ tenen, areamsuke. Tonda, adeiyok ton aupmale. Ara, sik yuk ninye, Kristus ati diba kum tenenyak ninye arye, ‘Malye un ninguk wininamap’ tenen, pataplibuk tenenyake. Wininyaka deice arye, dipkoprop sik kanye talima, pia malye-malye uplibuk malyeuk unyake. ‘Aninye ara, pia malye unyaka atonun, na mapu ton kum unamak’ tenen, Allah arye nunti, el teleb nyalin yupu areamsuke.
Sikti lila yupu nyan nang ara, nun Deiyoknye Yesus Kristus, nun Lyenanye kel bikika deice arye, diba tenena kum ninye malye wininyak ning bataklamik bukni, ila tamubuka tonap aninguk talibuka, wininmacebuk, aning arye sik talima koupdongoplirye, bisibuka pia malye-malye wininyake. Ara, diba min kum teneabik talak ara, mitik malye winilamik bukni, wini talak ara pia weik malye-malye wininyake.
Mikael ap, el mapu silip ap arye, weik Mem Kwatima Atonye ap, el amu tam ulamik malye malaikat ap malye kibikce, sik anang nirya tukwak dopkwetebik. El urasin Mem Kwatima Atonye bira, yuknye kume. El si ara, Isa Mutuku Dongonye, tonda Setan nyanyabe. Minop talak dipdongobuka wini talak noutamak nirya, elce tukwak ninye sik talima libuka bobalamla deice arye, ninye im sirya, mutuku sirya nirya, Allah el diksukum bisik batakikirye, kirikuka malye bisikuk banyake. Allah batakuka malye bisikuk banyaka deiyok ara, eltia.
Talilamukba, atalak noutamak tukwak mutuku im sirya, mutuku sirya nirya, Allah ati dib kum tenyamikce, urdem unamak ninye nirya ara, el siuk erenamake. Bukni, Kam Pia Unamak Ninye Si Sekna Buku noutamak, Allah arye si akunum sekeiamuk ninye tonok ara, amalye kam un ning, el si kum erenamake. Allah arye aning-aning min kum kwepdeiamuk talak arye, ‘Ninye Lyenanye obica deice arye, diba tenenyak kile sal lyepnamne’ tenen, Allah arye Domba Mi Atonunye kintinipdeiamsukce, tukwak mutuku dopdeiyamsuknya bira, elce aninye si sekna buku talilule. Ara kam unamak ninye sik si seklamuk buku ara, el ning uka.
ကြော်ငြာတွေ