Ura, na Paulus arye anggun Roma mutuku noutamak diba tenebuka ululum ninye nirya ati nyapsine. Allah el melisilya deice arye, nunce elti, ‘Dipkoprop teleb kipdeipsilirye, lyepsilyopura, pia melinamsile’ tenen, kintinibuka dinauk unyabe. Anggun Roma mutuku ninye ati, Allah morosunun ning ara nyapnusine. Ara, anggunce anggun kanye talima el deiceuk deipmunce, diba tenelulumopura, atalak Allah arye anggunti, mambul kanye bona kumce, kanye deibuka teleb winina deiyok ning ap, pin-pin una deiyok ning ap, ‘Weika arye arisiliba, anggun talima pum tam langdinamsil’ tenen, na Paulus arye anggun Roma mutuku ululum ninye ati Allah morosunune. Tonda, anyapmasin ning ara, Allah arye el Dib Kanye arisiliba, el mikip deice arye melisilyeba, anggun Roma mutuku tam ninye nirya ara, ‘Dipkoprop Allah elcuk, teleb kipdeipsilirye, lyepsilyopura, pia ati melinamsile’ tenemunce, ‘Kintinibuka dinauk unamlum’ tenen, Allah morosunune. Na Paulus arye nyapsine.
Roma 12:12 - Eipomek12 ‘Allah arye melinamnil’ tenen, kintinibuka dinauk unamlum talak nirya ara, kanye deibuka pin-pin asauk unamlulume. Ikin upsiliba, imun kanye bopmunye talak nirya ara, ‘Se, aning ara, adiparyuk minopce kum upnutue,’ tenena kum diparyuk, ‘Aupmanilya babye, telebuk wininamne,’ tenebuka, kanye lamapdongobuka unamlulume. Allah morona ayala-ayala nirya ati ara, batakna kum arye, pia Allah moronauk unamlulume. အခန်းကိုကြည့်ပါ။ |
Roma 12:12
71 ပူးပေါင်းရင်းမြစ်များ
Ninye tukwak nang arye kum bukni, ikin upmanilibuk na ni Allah arye, lyepnilyopura, teleb kibuka erepdeipniliba, yuk nang arye, nati, si erebuka kininyake. Allah ara, elcuk melibuka kalikinulule. Yata ikin ning do nirya, el dam kum yanuka opnutua ati, el dam ara, na telebuk unune. Elda pia mikip weik keil aik atonun, tonda weik mutuku kon keil atonunye ulule.
Mambul kanye bobuka, ‘Se,’ kum tenenamlulume bukni, Yesus Kristus nong deice, ikin ning deibikbuk, ikin kanye bobuk touk, nun babye atonun, ‘Ikin ning, nun nong deice deipsikca babye, telebuka’ tenen, kanye weik arye delinamlulume. Yesus, ikin ning weik ulamuk touk, upsiliba, kanye deibuka umunyopura, aminyan talak Allah arye, Yesus el weik mambul ulul ning ap, pia teleb-teleb ubuka ulul ning ap, dirina weik uplibuk, lakak nyapnamsil talak ara, kanye pia weik arye deibuka, pin-pin asa unamlulume.
Ara, na kayapu. Nun du weit atonun kipdeipsuk ninye ati nyapsine. Nun deiyoknye Yesus tamubuka kum yanmalye talak ara, teniltona kum arye, teleb kanye bobuka tunim abuka unamlulume. Winipmanto yupu ati nyapnusine. Ara, wa wibuka koulamle deiyoknye birye, ‘Na koupse ning ara teleb ubuka pablyopura, libnamanca’ tenen, tonda, ‘Dou talye manmalya ani, aminyan ara, mok yanamalca’ tenen, teleb kanye deibuka, talye luba kibuka ulamle touk, anggun babye atonun wininamlulume.
Nunce anggunti, ‘Sikda lik uplyeba, pil nirya batakuka, talya-talyauk winipmunyak’ tenen, kanye moubuka unamlulume, nyasinyabe. Aning ara kum bukni, ton nang ara, diba tenena ap, minyuma batakna kum arye, pia pi dobuka, pil dona ap deice arye, pil dopra balamikca ani, aminyan talak, ‘Allah arye nyalilamuk ning dipkoprop dololamak touk, anggun atalak ululum ninye babye, anggun ton dopropnamlulum’ tenen, nyapsine.
Aning ati ara, na kayapo, sik minop talak ulamikce, diba tenebuka diksukumuk ulamik ninye, wini nyapmasin ninye ara, dana-dana tam nirya, yupa weik aunyakce, nunti dinauk usinyake. Disinyaka ati ara, Allah arye, ‘Winibuka diksukum bisikuk banamak’ tenyamsuk touk, ikin upsilya babye, batakna kum, pia pi dobuka, abisik deiceuk mikip arye banamabe. Sik biklamak nang arye, ‘Ikin upnilyak’ tenen, talye ning nirya batakuka, tonok bisikuk mikip arye bik-bik abuka balamak touk, nun babye atonun, ‘Ikin upsilyak’ tenen, talye winin ning nirya batakibirye, Allah tenepsuk bisikuk binamabe. Aning atonun, weik mambul ning ara, malye ning patasilya deice, kanam asa arye tapu koulongona atonun ulamsil ning nirya batakibirye, Allah tenyamsuk bisikuk binamabe.
Ara, nun Deiyoknye Yesus arye, anggun melisilya deice ara, Allah arye anggunti, weik arye bicoe tenesilirye, melisilye ning nirya ara, ‘Weik bikmunce, el ap, kanye dukdongobuka unamlulum’ tenen, Allah morosenyabe. Tonda, el melisilya deice arye, Yesus Kristus ikin ning aulamuka babye, Yesus Kristus batakna pia kum aryuk, pia pi dobuka, pil mikip arye dolamuk touk, ‘Anggun babye atonun wininamlulum’ tenen, Allah morosenyabe.
Sikda, winilamak bukni, nunda, keting noutam un nang unyaba anya arye, ‘Talya parapkabuka winipnuyap’ tenena kum aniryuk, nunce nun bidamnye ati, moubuka dilabirye, telebuk wininamabe. Winibibye talak nirya ara, Allah dib tenena ap, yuk nang ati bico tenebuka melina ap ara, ninye arye ting ongolamaka atonun, nunce kalikilabirye moubuka unamabe. Tonda, yin talin nang arye, kat topi ongopbuka, kisok kalulamak atonun, wininamabe. Ara, ‘Sirya talak Allah arye malye winin nang ati, wenebuka yupu bokeiplirye, oplopnamle talak ara, nunda, dipkoprop lyepnamsile’ tenen, el deiceuk nun kanye deibuka, dinauk unamabe.
Ati ara, malye wininyak ninye nirya, sikce pil dopra bakce talak arye, ‘Aning winipnamabe,’ tenelamik touk, nong akunum uplyopura, anggun diba tenelulum ninye arye, ‘Se, yata deiyok ati, sik tenenyak ning, nong upliba dolonyak do?’ tenen, malye kanye bobuka, kum unamlulume. Sik malye nang arye, ‘Malye winin ninguk talibuka unamabe,’ tenebikirye, yupu sisikinyak ning, akunum winibikcopura, anggun diba tenelulum ninye arye, ‘Se,’ tenen, malye kanye kum bonamlume. Aning kum wininamlum bukni, anggunce tuba diba tenemunce, ‘Allah ara, dan talak yanuka melipnamsil do?’ tenen, kanye talima lamapdongobuka arye, amu tamuk umunce, kintinibuka dinauk unamlume. Ulamunya ani, dipkoprob Allah el tenebuk sum, akunum uplyopura, el tenebuk touk, nong upnamle. Anggun diba tenelulum ninye arye, ‘Allah arye minopce melipsutuba, telebuk uptibye,’ tenena kume. ‘Allah el tenebuk talakuk, teleb kipdeipnamsile’ tenen, teleb kanye bobuka, unamlume.
Aninye malye ulilalamik bukni, anda Allah el yupu nyasilye touk ubuka, el pil donanye ulyama ati, amalye winin ning nirya dam una meme. Bik-bik abuka yukak balamak atonun, amalye ning batakuka, ‘Pia telebuk winiptinye’ tenen, patapkilyeura, pi dobuka wininalyame. Ara, diksukum una ap, Allah diksukum ulye touk una ap, Allah dib tenena ap, yuk ninye ati bico tenebuka melina ap, ‘Ikin ning aupmanil’ tenena kum arye, batakna kum pia pil dona ap, yuk ninye ati, namin arye una ap, anirya ara, an adiparyuk pia piribuka wininalyame.
Malye winin ning batakikirye, diksukumuk unyak ninye ara, pia telebuk upra balamica ani, aminyan talak ara, pin-pin kanye bobuka unamake. Bukni, ninye ton pia malye ninguk ululnye birye, ‘Se aninguk uptinye’ tenen, patalul ning ara, pia dipkoprob nong kum upnamle. Elce tenelul ning nirya ara, kum danin banamle.
Bukni, na kayapo, sikce peterepsikba, Allah el yupu kekeplumce, Allah el dirina arepsukba, doproplum talak ara, ila tuba tonap tenenamlume. Malye nang arye, ikin ning weik anggun nong deice delilamsika deice arye, pia winilelamsik bukni, ikin ulamsuka babye, pia batakna kumce talibuka diba tenenauk unamlulume.
Tonda, anggun mutuku, Kolose mutukunye, Epafras arye, “Telebe,” nyapmasile. Elce Yesus Kristus amu tam ulirye, Yesus el pil dobuka ulule. Epafras arye anggunti, pia pi dobuka, Allah moronauk usulule. Elce morosulul ning ara, nyapnune. Ara, Allah arye el mapu nirya ati, ‘Wininamake, wininamake,’ tenesilye ning nirya ara, ‘Aning pia dipkoprop ning anya arye, Kolose nang arye aninguk talibuka pia kanye lamabuka unamak’ tenen, Allah morosulule. Tonda elce, ‘Teniltona kumce, diba tenebiceura, sik talima pia wisipnamle’ tenen, elce anggun Kolose nang ati Allah morosulule.
Tonda, Allah el weik mikip weik ulamle touk, elce anggun Kolose ninye ati, mikip weik arisilibuk, kanye imun ning weik upsilya babye, ‘Batakana pia kum arye, pia pi dobuka pil domunce, kanye teniltona kum arye, telebuk unamlume. Tonda, ikin upsilya babye, yuk nang ati, minpola arye yu uplibuk, pil kum batakanamlum bukni, nimalye aryuk unamak’ tenen, nunce anggunti Allah morosinyame.
Yesus ara, tukwak mutuku noutamak ulamuk talak ara, elce el dipnamuk ning ati tenebukce, el lyepmantonye Allah ati morobuke. Elce morobuka ara, “Naie, ance melipnilyame,” nyabuka, asing maka deice ap, weik malye nyana ap deice arye morobuke. Morobukce, el Yesus ara, ‘Allah ara, weik mambule anya arye, elti, si kipnirye, el amutamuk pia unamne,’ tenelamukce, talima naminye ulamuka ati, Allah arye, Yesus morobuk yupu kekebukce melilamuk.
“Atalak tukwak mutuku noutamak tuba unamak ninye ara, Allah arye tenyamuk touk, aninguk unamake. Ara Allah arye, ‘Anang ara tapu koubikirye, wenena aik dongonamake,’ tenyamuk kili sala ara, dipkoprop tapu koubuka, wenena aik bobinamake. Tonda, Allah arye, ‘Anang ati ara, yuk nang arye parang ya dobuka oplopnamake,’ tenyamuk ninye ara, dipkoprop parang ya arye oplopnamake.” “Winibuka onamsiaka ati ara, talye kanye bobuka una ara bataklulume. Aikin ning unamsil ning ati ara, Allah arye wipdeiamukba, elti, diba tenenyak ninye nirya ara, ikin uptu babye, ‘Bataknuyap do?’ tenena pia kumce, pia pi dobuka mikip aryuk unamake. Bukni, ikin weik upsiliba, imun kanye bobuka, ‘Allah bataknuyap do? tenepmunyak’ tenen, Allah el yupu nyasilye touk, ayupu uk talibuka, pia darabuka unamlulume.” Na Yohanes arye nyapsine.
Weik arye kel kina deiyok ning akunum aupmasilyopura, anggun nong ap, anggun un ning ap, ‘Malye ubibyak’ tenen, pia kalikilamunce, memelonamlulume. Anggun babye, anggunti kalikdamunce, kalikdana un ning akunum aupmasilyopura, ikin ning auapsilya babye, batakna kum arye, pil pia palibuka dona ati, una deiyok ning ton, tabakanamlulume. Batakna kum arye, pil pia palibuka dona ati winin ning, akunum aupmasilyopura, Allah diksukumuk ulye touk, teleb mikne un ning ton tabakanamlulume.
Musa ara, Allah el pil melinanye ulamuk bukni, Yesus Kristus ara, talye pil melinanye kume. El Yesus ara, Allah el mi kopropa ulirye, Allah el mapu nirya ati, anggun weik deiyoknye usulule. Apil dona babye, Kristus arye batakna kum, pia teleb ubuka dolule. Ura, Allah el mapu nyapmasina ara, nunti nyapsine. Ara, nun diba tenenyap nang arye, ilil una pia kum arye, ‘Allah dipkoprop lyesulule’ tenen, diba tenebuka kanye teniltona kum arye, pia talibuka ubibyopura, ‘Allah el mapu dipkoprop unyabe,’ teneptibye. Allah arye dipkoprop lyepnamsil ati, el laka teleb yupu, ninye lyen yupu teleb asa arye, kanye deibuka peterenyabe.
Aning ati ara, nunce yuk dib tenenyak nang dam bayibye talak nirya ara, nunce anggunti yupu laka nyabuka, kisinyabe. Sikti laka nyanyap yupu ara, ani. Ura, Allah ati dib teneluluma anya arye, yuk nang arye anggun nong deice ikin ning delisinyaka apura, yuk ikin ning usilibuk, kanye imun kanye bobuka umunya ap ara, anirya aupmalya babye, batakna pia kum aniryuk, pia pi dobuka pil dolulume. Tonda aikin ning nirya aupmalya babye, Allah ati, pia diba tenebuka, kanye lamabuka tuba ululume.
Wini talak ara, tukwak mutuku unamap talak ara, mambul ning ton winilye pia wininamle. Ara, dib tenena ap, ‘Aminyan talak ara, Yesus arye, dolyanamsile’ tenen, batakana kum aniryuk, pia dinauk una ap, yuk nang ati bico tenebuka melina ap, ara awinilye ning pia aunamle. Awinilye aupmal bukni, weik mambul ning ara, yuk nang ati bico tenebuka melinauk ulule. Na Paulus arye, nyapsine.
Sik minop talak seklamik yupu nirya ara, nun kel kina ap, peterena ap ati seklamik. Ara, Allah arye nunti, ‘Winibuka wininamak,’ tenyamsuke. ‘Allah yupu nirya kekebikca deice arye, sik kanye talima kwa dibleba, sikce, ‘Ikin upmasilya babye, Allah dipkoprop lyebuka melinamsile’ tenen, batakna kum, pia pi dobuka wininamake. Na Allah ati ara kum wininamake,’ tenyamsukce, el yupu nyalilamukba seklamik.
Anang ara wininyak bukni, yuk ninye ara, yala doknin banmokura, mirin tukwak sakukura, duk weik arye moubukce, yupa pia weik seratus moubuka touk, unyake. Sik kanye talima ara pia teleb nang anya arye, Allah yupu kekebikirye, diba tenebiceura, ikin ning awablyeura, batakna kum aryuk, pia talibuka wininyake. Allah yupu diba tenebuka, kanye deibuka pia dololamak ninye ara, Allah el pil weik arye donyake. Yesus arye el mapu ati nyabuk.
Malye un ning ayala-yala nirya talibuka unyak ninye ara, sik mining malye unyak ning deice aryuk, talibuka deiplirye olilule. Allah arye anye bira, el malye ulul ning dekna ati, weik arye wenebuka oploplirye, sirya daknamle. Bukni, ninye ton tuba-tuba malye un ning kum unyakce, Allah el nyalye yupu kekebuka, talinyakce, aninguk moubuka dobolbanyak ninye ara, dipnamak bukni, Allah sik damak ulirye, tuba-tuba melipliba, telebuk unamake. Deiyok ara, sikce teleb winin ninguk unyak ninye atia.
Aminyan yuk talak ara, nun ni Allah pia mambulnye, ara nun Lyena Deiyoknye Yesus Kristus, im deice arye tamubuka dolyanamsil. El dolyanamsila ara, pia teleb ubuka, dirina weik arye yanamle. Men kum dolyanmasilye talak noutamak nirya ara, nun kanye bokoltona kum aryuk, ‘El dipkoprop dolyanamsil’ tenen, kanye pia deibuka, dinauk ubirye unyabe. Ati ara, tukwak mutuku noutamak tuba kam unamap talak ara, pia diksukumuk unamabe.
Ara, Allah arye, ‘Na mapu unamak’ tenen, akunum wiamsuk ninye ati, utenebuk. Ara, ‘Na Allah arye duknyamse yupu ara, wini talak na mapu ati lakak nyapnamsin,’ akunum tenebuk. Ayupu duknyamuk ani, wini talak lakak nyasilya ara, nyapnusine. Ara, “Allah arye Yahudi yala kum ninye ati, kanye deiplirye, weik teleb kipdeipnamle,” nyasulule. Duknyamuk yupu noutamak, pia teleb ubuk yupu ara, “Yesus Kristus arye Yahudi yala kum ninye babye, sik kanye noutamak, el ap kanye dukdongopnamsile,” nyasulule. Anggun Kolose mutuku ninye babye, anggun talima noutamak Kristus dukdongobuka unamlulume. Winisilye talak nirya ara, anggun nirya arye, ‘Kume sirya talak ara, Allah ereipsilirye, im deice weik dirina noutamak, weik mambul ninye kipdeipnamsil’ tenen, diba tenebuka, kintinibuka dinauk unamlulume.
Allah El Dib Kanye weik arye arepsuka deiyok ara, nun malye winilamubu bukni, Allah el kanye aryuk, bico tenepsuk akarye, nun malye ning nirya, kum kipdeipsuk akarye, pia teleb winin nang atonun, akunum kipdeipsuke. Winipsuka deice arye, bol koplobuka pia kam una deiyok ning arisulula ati ara, im deice tam pia kamuk unamake. El mapu atonun kipdeipsuka ati, kanye bokoltona kum arye, ‘Dipkoprop, pia kam un ning arenamsile,’ tenen, akunum kel bikmuburye, ‘El tamubuka tukwak mutuku yanamle talak ara, yata talak do?’ tenebuka, dinauk unamapya ani, el bisikuk dobolbinamtibye.
Sirya talak ara, sik malye ning wininamak bukni, Timotius anuk ara, aning atonun kum wininamlyame. Ance na winilamse ning nirya ara, akunum kel bikamnulume. Ara, na winilamse ning ap, na peterelamse yupu ap, narye, ‘Winipnamne’ tenen, pil dolamsa deiyok ning ap, Allah ati dib tenenun ning ap, ikin ning wamnuk bukni, wana kum, nimalye arye winilamse ning ap, yuk nang ati bico tenebuka melilamse ning ap, ikin ulamnuk bukni, batakna kum arye pia pi dobuka, pil dolamse ning ap, aning nirya an akunum kel bikamnulume.
Nun ni Allah moronyap talak nirya ara, anggun ulamlum ning nirya tuba tenenyabe. Tenenyap ning ara, ani. Ara, anggun diba tenelulum deice arye pil dolulum ning ap, yuk nang ati bico tenelulumak arye melilamlum ning ap, anggun pi dobuka, pil dolulum ning ap, tuba tenenyabe. Anggunda, ‘Nun Weik Deiyoknye Yesus Kristus, elce dipkoprop melinamsil’ tenen, kanye lamabuka elti, dinauk umunya deice arye, pil batakna kum aniryuk, pia pi dobuka pil dolulume.
Ura, na weit yapu atouk ninyeo, Yesus ap, dukdongobuka umunce, weik kanye deibuka unamlulume. Minop talak ara, anyapnusin yupu akunum nyamsise bukni, ila tonap, nyapnusin ara, na ikin una kume. Tonda, ‘Mankau arye malye ning tenepmunyak’ tenen, yupu seknusine. Tonap ayupu uk kekepmunyopura, ayupu moubuka melinamsile. Anya arye, anggun melina ati ayupu nyapnusine.
Aning tonap laka nyapnusine. Yata ninye do nirya sikce, ‘Kume, Allah arye nunti, pia teleb una deiyok ning ap, kam pia una deiyok ning ap arepsutuba, elti, pia si erenamep’ tenen, patalyeba batakna kumce, pia pi dobuka, teleb winin ninguk talibuka wininyak ninye ati ara, Allah arye bol koplobuka, pia kam una deiyok ning arepnamle. Anyaripnamle ninye ara kam pia unamake.
Yesus arye wipdeibuk Rasul nang, sik peterelamik yupu kekelamik ning ap, din neika ansinibuka dilamik ning ap, neika Allah morolamik ning ap, bico tenen, melilalamik akarye, sik kanye dukdongobuka neika ulamik. ‘Nun aninguk winiptibye’ tenen, patalamuka ati, yuk ning tenena kum arye aninguk winilamik.
Anggunce yupu nyapmunyeura, isa mer nirya kekebuka kutuksakuka bura banyak ning ati, ‘Se aning ara weik mambule’ tenen, kanye kum delinamlulume. Dipkorop weik mambul ning ara, Allah arye anggun si dobuka im deice bukuu noutamak akunum sekeipsuka ati, aning ara kanye delinamlulume,” Yesus arye, sik 70 nang ati nyabuk.
Ara, Allah arye anggunti, kanye deipsuka anya arye, urdemuk arepnamsil ning, weik arye im deice kintinibuka akunum deipsuke. Aning ati ara, amalye winin ning nirya winipsicopura, anggunda kanye pia deibuka unamlulume. Amalye winin nang, anggun apu yapu arye, na yupu laka nyalamik nang, sik nabi nang ati, atouk ikin ning sik nong deice delilamika anya arye, wini talak unyak nang babye, anggunda na yupu kekelulum ninye ati, atouk malye winin ning winilinamsiake. Winipnamsiyak bukni, im deice binamlum talak ara, Allah arye menenga ning weik arye arenamsile. Aning ati ara, “Anggun kanye pia deibuka unamlulume,” nyapsine.