Winipmanto ara, ninye arye, kanye wangalamak anggur mek weik arye dibikceura, sik kanye wangabikceba, kum tenenipmanto ulamak touk unmabe. Ara, ance nunti, an tenen nang unyap bukni, weik ikin ning weik areamsuluma deice arye, nun imun kanye bobuka unmabe. Nun kisok yung kum kipsukba, teleb kibuka upmanto kumce, nun kanye ara, tenipmanto kum unmabe.
Roma 1:7 - Eipomek7 Ati na kayapo, anggun Roma mutuku ululum nang kan-kan arye, Allah bico tenepsukce, ‘Na mapu unamak’ tenen, wibuka deiamsuk ninye, anggun nirya ati, asurat sekeipsine. Nun ni Allah ap, nun Deiyoknye Yesus Kristus ap, ‘Sik bitinye arye bico tenesirikirye, sik kanye aryuk melisirikirye arenamsil’ tenen, Allah morosunune. Tonda, nun ni Allah ap, nun Deiyoknye Yesus Kristus ap arye, anggunti melisirica deice arye, olana ap, walana ap, ikin kanye bona ap nirya, kum upliba, ‘Sik nirya kanye deibuka, lamapdongobuka neika unamak’ tenen, anggun Roma mutuku umunyak arye, dib tenelulum ninye nirya ati, Allah morosunune. Na Paulus birye nyapsine. အခန်းကိုကြည့်ပါ။ |
Roma 1:7
70 ပူးပေါင်းရင်းမြစ်များ
Se narye dopnamkin kilo! Anda na wa win dam atonun unilyama ati, an dam yanmane. Narye na weit kil ati, bico tenenun touk, narye antibuk, pia weik tonun bico tenekunune. Tonda, anda narye akunum dopkise kil atonun ulyame. Ati, anda na wa win dam atonun unilyama ati, awa win dam binyopura, nintong pia teleb nyalamle ning, el si ara mur ap, tonda, to nyalamle ning el si ara rempah-rempah ap, tonda, mong mek ap, anggur duk mek ap, sapi moum yung, el si ara susu ap, aning nirya dobuka dinmance, pia kanye deibuka unmane. Winipmanto ara, din ning ap, teleb anggur duk mek ap, talye mangkau dadinmarumunya ani, kanye walwal upsiliba, akunum boupsilyopura, kanye deipdanuka, telebuk unamdume. Deiyok noutam ara, nun kayapu anggun bitinye asukumuk unmarumce, anggun patapsilye touk, neika mapmarumunya ani, aminyan akunum boupsilyopura, pia kanye deibuka unamrume.
Nyabukura, Yesus arye nyabuk. “Na ni Allah dam tamubuka min kum binmana anya arye, na nong kum talipnunilame. Ance tamubuka, na weit yapu nang nirya ati, ayupu laka nyalbinulyame. Ara, ‘Na Yesus ara, na ni dam, Allah el un dam tamubuka binirye unamne. Na ni bira, anggun ni uka. Na si erenun Allah ara, anggun si erelulum Allah uka. El tonoka,’ nyalbinulyame.” Yesus arye nyabuk.
Yesus arye wipdeiamuk Rasul nang ap, amutuku diba tenelamik nang, sik deiyok nang ap arye, ‘Asurat dobuka arilbinamak’ tenen, awipdeibik nang ati, surat arebik. Asurat noutamak sik sekik yupu ani. Yahudi yala kum ninye, Antiokia nang ap, Siria tam ap, Kilikia tam ap, amutuku-amutuku noutamak Yesus diba tenebuka ululum ninye ati asurat sekeipsiabe. Anggun ap, nun ap ara, Yesus dib tenebupu anya arye du weit atonun unyabe. Nunce Telebe nyapsiabe.
Ura, Allah arye el Dib Kanye weika arye arepsukba, melisilya deice, Allah arye nunti bico tenesilye ning nirya, weika arye kel kipra babyeba, nun talima pum tam weik kibuka langdipnamsile. Allah arye kanye talima arisilya ati ara, ‘Allah arye dipkoprop melipsilirye, lyepropnamsile’ tenen, kintinibuka dinauk unyaba ara, talye ati kum unyabe. Allah arye dipkoprop lyepnamsila anya arye, amenyan talak ara, ‘Se,’ tenen, malye kanye bobuka kum unamabe.
Na kayapo, nun kele. Nunce Allah ati diba tenebuka, nun kanye el deiceuk delinyap ninye nirya ati ara, yata winin ning do nirya, ikin usilye ning babye, kanam usilye ning babye, Allah arye awinisilye ning nirya dobuka, nunti teleb kilisulule. Ikin ning usilye talak babye, kanam usilye talak babye, atalak nirya ara, Allah arye pil dobuka melisilya deice arye teleb ulisulule. Winibuka melisilye nang ara, talye nang ati kum bukni, Allah arye, ‘Na mapu ubikirye, na tenyamse pil teleb kibuka donamake’ tenen, yukusilirye, wibuka deilisilye ninye ati nyapsine.
Mikip ulul ning, aning-aning nirya ara, im deice tam ulul ning ap, tukwak mutuku amu tam ulul ning ap ara, Allah arye kwepdeiamuk ning noutamak ulul ning nirya ap, aning-aning nirya aupmal bukni, aning nirya arye, Kristus bico tenesilye ning ara, kum danipkusitinge. Tonda, Yesus ap, nun ap, wilibuka yuk-yuk kum kipdeipsitinge.
Allah arye, ‘Na mapu unamak’ tenen, anggun Roma mutuku tam ululum ninye ati yukupsuka ara, aminyan winipnamuk ning laka nyalamuknye, nabi Hosea birye minop talak anggunti, ayupu sekeiyamsuk. Ayupu ara ani. Allah arye nyabuk. “Na mapu kopropa kum unyak ninye bukni, aminyan talak aninye ati, ‘Anggunda, na yala ninye kopropa unamlulume,’ nyanamne. Tonda, aninye ati, min kum arinirye, bico kum tenesinun ninye bukni, aminyan talak, narye anggunti, ‘Talima arepniliba, bico tenesinune,’ nyanamsine,” Allah arye nyabuk. (Hosea 2:23)
Sikda wininyak bukni, yata mutuku nang do nirya, Allah arye, ‘Aninye lyepnamne’ tenen, akunum wibuka yukupsuk ninye nirya ati ara, Kristus el wanwanun yo deice, pil dopsuka deice arye, akunum laka usulule. Ara, Allah el weik kel kopropnye wini lulul ning ap, el weik mikip weiknye ulul ning ap, lak kilisululba, Kristus el deice arye bikinyabe.
Narye anggun Korintus mutuku ululum ninye ati Allah morosunun ning ara ani. Ara, ‘Nun weik Ninye Deiyoknye Yesus bico tenepsilirye, el kanye aryuk talye melibuka arisilye ning ara, weik arye arenamsile’ tenen, Allah moronune. Tonda, nun Ni Koprop Allah arye bico tenepsilirye, melisilye ning ap, Allah El Dib Kanye arye nun talimak usilirye, melisilyeba, ‘Anggun ap, yuk dib tenenyak nang ap, kanye talima dukdongobuka unamlum’ tenen, Allah morosunune. ‘Anirya ara pia unamsil’ tenen, Allah morosunune. Ati, na Paulus arye telebe nyapsine. Asukumuk deipsine.
Ura, nun Deiyoknye Yesus Kristus arye, bico tenebuka el kanye aniryuk melisulul ati, ‘Anggun kanye talima nirya teleb kipdeipnamsil’ tenen, anggunti Allah morosunune. Ati na weit yapu atonun ninyeo, ‘Anyapmasin yupu dipkoprop unamle’ tenen, na Paulus birye “Amin,” nyapsine. Telebe akunuma, asukumuk deipne.
Narye anggunti, Allah morosunun ning ara, nyapnusine. Ara, nun Ni Koprop Allah ap, nun Weik Deiyoknye Yesus Kristus ap, sik bico tenesurudakce, sik kanye aryuk melisirikce ning ap, ‘Yuk nang ap talima namin asa arye neika teleb kibuka unamak’ tenena ati, aresurudake. ‘Aning nirya aresirice ning ara, anggun Efesus mutuku ninye arye, aning nirya dolonamlum’ tenen, Allah morosunune.
Telebe, sik dib tenebik ati, nun weit yapu atonun ninye nirya ati, Allah moronun ning ara nyapnusine. Ara, ‘Nun Ni Koprop Allah ap, nun Deiyoknye Yesus Kristus ap, sik bitinye arye, anggun nirya ati, mambul ning arenamsirak’ tenen, Allah morosunune. Arinamsirak ning ara, ani. Ara, yuk nang ap kanye deibuka, nimalye arye neika una deiyok ning ap, yuk nang ati bico tenebuka melildana deiyok ning ap, Allah ati weik arye diba tenena deiyok ning ap, ‘Adeiyok ning nirya arepsirikceura, pia telebuk unamak’ tenen, narye anggunti, Allah morosunune.
Nyabukopura, Musa birye Benyamin yala nang ati, morobukce nyabuk. “Anggunda, Allah bico tenyamsuk nang anya arye, Allah el dam umunyeba, elce anggunti, kalikuka dipdesilirye, keting noutam babye, lukunyan babye nirya ara, ilil pia kum aniryuk, teleb kanye bobuka unamlume. Tonoknye birye, el mi kwaknapnin balamlibuk, ami arye, talye kanye bobuka balamle touk, unamlume. Allah arye, aning atonun winibuka kalikinamsile atia.” Musa birye, Benyamin yala nang ati nyabuk. Ara, ‘Allah arye, sik Benyamin yala ninye melipnamleʼ tenen ati, morobuk.
Nun Ni Kopropa Allah ap, nun Deiyoknye Yesus Kristus ap, sik bitinye arye, anggun Pilipi mutuku dib tenelamlum ninye ati, bico tenesururakce, anggun kanye aryuk melisirice ning ap, ‘Yu ulana kumce, kanye deibuka telebuk neika unamak’ tenen, arisilye ning deiyok ning ap, arisulule. ‘Aning nirya ara, tuba-tuba weik arye tabakuka arenamsirak’ tenen, anggun Pilipi mutuku ululum ninye ati, Allah morosunune.
Nun weik deiyoknye Yesus Kristus bico tenepsilirye, talye melisilye ning arisilibuk, anggun ap, Kristus ap, kanye dukdongobuka umunce, anggun kanye noutamak wisibuka, pia unamsil talak nirya ara, ‘Anggun kanye ap, Yesus ap, kanye dukdongobuka unamlume’ tenen, Allah morosunune. ‘Apia winibuka unamsil’ tenen, akunuma, “Amin,” nyapne. Telebe, na Paulus arye akunum nyapsine. Asukumuk deipsine.
Asekeipsinam surat ara, anggun Kolose mutuku umunye ninye ati sekeipsiname. Anggun Kolose mutuku ninye ara, Allah diba tenyamlum ati, el mapu kipdeipsuke. Winipsuk ati, anggunda malye una kum aryuk, diksukumuk ululume. Anggunda, Yesus Kristus ati diba tenebuka, el ap kanye talima dukdongobuka ululume. Nun Ni Kopropa Allah arye, anggun Kolose mutuku dib tenelulum kili sal ati, bico tenesilirye, el kanye aryuk melisilye ning ap, ‘Yu ulana kumce, kanye deibuka telebuk neika unamak’ tenen, arisilya deiyok ning ap, arisulule. ‘Aning nirya ara, tuba-tuba weik arye tabakuka arenamsil’ tenen, anggun Kolose mutuku ululum kili sal ati Allah morosunune.
Aning ati ara, Allah arye anggun nirya ati, bico tenenyamsukce, ‘Aninye ara, na tenen, ninye na mapu unamak’ tenen, wibuka deiamsuka anya arye, malye una pia kum aryuk, anggun teleb-teleb ubuka wininamlum ning ara, nyapnusine. Ara, winiryuk baju ongolamaka atonun, bico tenebuka melilana ap, yuk nang ati namin kibuka melina ap, yuk nang ati kanye talima lamabuka amu tam una ap, ting-tingana kumce, namin asa arye unamlulume.
Ara, anggun yuk-yuk ululum bukni, Allah arye, ‘Sikda walana ap, oldana ap, kum aryuk, nong tonok atouk kibuka, talima dukdongobuka, namin arye neika unamake’ tenen, wibuka deiamsuke. Winibuka wipdeiamsuka anya arye, Kristus arye talima dukdongopsukba, nong tonok atonun, kibuka ululuma ati, teleb ubuka neika unamlume. Tonda, anggunce Allah ati tuba-tuba, “Telebe,” nyanamlulume.
Telebe nun kayapu. Na Paulus ap, Silas ap, Timotius ap, nun nirya arye anggun Tesalonika mutuku ninye, diba akunum tenelulum ninye ati, asurat sekeipsiabe. Anggunda, nun ni Allah ap, nun Weik Deiyoknye Yesus Kristus ap, kanye dukdongobuka ululume. Nun Ni Kopropa Allah arye, anggun Tesalonika mutuku dib tenelulum ninye ati, bico tenesilirye, el kanye aryuk melisilye ning ap, ‘Yu ulana kumce, kanye deibuka telebuk neika unamak’ tenen, arisilya deiyok ning ap, arisulule. ‘Aning nirya ara, tuba-tuba arenamsil’ tenen, anggun Tesalonika mutuku ululum kili sal ati, Allah morosunune.
Nun ni Allah moronyap talak nirya ara, anggun ulamlum ning nirya tuba tenenyabe. Tenenyap ning ara, ani. Ara, anggun diba tenelulum deice arye pil dolulum ning ap, yuk nang ati bico tenelulumak arye melilamlum ning ap, anggun pi dobuka, pil dolulum ning ap, tuba tenenyabe. Anggunda, ‘Nun Weik Deiyoknye Yesus Kristus, elce dipkoprop melinamsil’ tenen, kanye lamabuka elti, dinauk umunya deice arye, pil batakna kum aniryuk, pia pi dobuka pil dolulume.
Nun ni Allah ap, nun Deiyoknye Yesus Kristus ap, sik bitinye arye, anggun Tesalonika ninye ati, ‘Pia teleb ning arenamsirak’ tenen, Allah morosunune. Aning ara, ani; sik bitinye bico tenesurudakce, sik kanye aniryuk talye melisirikce ning apura, ‘Kanye deibuka, teleb aryuk unamak’ tenen, arisirikce ning ap, aning nirya arisirikcebuk, ‘Pia teleb unamak’ tenen, Allah morosunune. Nun Ni Kopropa Allah arye, anggun Tesalonika mutuku dib tenelulum ninye ati, bico tenesilirye, el kanye aryuk melisilye ning ap, ‘Yu ulana kumce, kanye deibuka telebuk neika unamak’ tenen, arisilya deiyok ning ap, arisulule. ‘Aning nirya ara, tuba-tuba arenamsil’ tenen, anggun Tesalonika mutuku ululum kili sal ati, Allah morosunune. Na Paulus arye nyapsine.
Ara, Allah ara ikin una ap, oldana ap, kum arye, pia telebuk ubuka, kanye deibuka una deiyoknye, elce anggunti, atalak-atalak nirya ap, anggun winin ning noutam nirya ap, ‘Kanye deibuka teleb una deiyok ning pia arenamsil’ tenen, Allah morosunune. Tonda, ‘Allah arye, anggun melipsilibuk, el ap, kanye talima dukdongobuka neika unamak’ tenen, Allah morosenyabe.
Ara, na mi Timotiuso, nun ni Allah ap, nun Deiyoknye Yesus Kristus ap, sik bitinye bico tenesururak akarye, sik kanye tenebuka talye melisirikce ning ap, nun malye una ati, wenebuka talye opsutu bukni, aning namin kipsirikirye, nun patapsilye ning talya aryuk arisirikce ning ap, tonda, ‘Yuk nang ap yu ulana kumce, kanye deibuka, telebuk neika unamle’ tenen, arikurak deiyok ning ap, arikururake. ‘Aning nirya ara, tuba-tuba weik arye tabakuka arenamkirak’ tenen, an Timotius ati, Allah morokunune.
Aning atonun, sik tilila aryuk, talye pil donyak ninye bukni, sik deiyok nang, Allah dib tenebik nang wininyakopura, sik amu tam pil dobuka unyak nang arye, ‘E, nun deiyok nang ara, Allah dib tenen nang anya arye, nun mitik nang atonun unyaba ati, mitik anun arye, si erebuka unamabe,’ tenena kume. Aning ara, pia kum bukni, apil don nang arye, sik deiyok nang dib tenebik nang ati ara, mitik anun arye kume. Pia teleb ubuka, sik pil melibuka donamake. Deiyok ara, sik pil dopbiceura, teleb winibikirye, dopropnamak nang ara, Allah dib tenen nang unyaka ati, weik arye si erebuka unamake. Tonda, amu tam ubuka, pil donyak nang arye, sik deiyok nang ati, sik adiparyuk bico tenenamak ati nyapkine. Ati, asukum deice tam nyapmakin yupu ara, urdem aryuk pil dopra unyak nang ati, mikip arye peterenalyame.
Ura na mi Timotiuso, nun Ni Kopropa Allah ap, nun Deiyoknye Yesus Kristus ap, sik bitinye arye, an Timotius ati, bico tenekurudakce, sik kanye aryuk talya melikururak ning ap, nun malye winina ati, wenebuka talya oplopsitiring bukni, aning namin kisururakce, nun patasilye ning urdem aryuk arisirice ning ap, tonda, ‘Yuk nang ap yu ulana kumce kanye deibuka, telebuk neika unamle’ tenen, arikurak deiyok ning ap, arikururake. ‘Aning nirya ara, tuba-tuba weik arye tabakuka arenamkirak’ tenen, an Timotius ati, Allah morokunune.
Ura, Tituso anda dib tenelyamnye ati, na mi kopropa atonun ulyame. Ura, na mi Tituso, nun ni Allah ap, nun Lyena Deiyoknye Yesus Kristus ap, sik bitinye arye an Titus ati, bico tenekururakce, sik kanye aryuk talye melikururak ning ap, nun malye una ati, wenebuka talye olopsitiring bukni, aning namin kisururakce, nun patasilye ning urdem aryuk arisururak ning ap, tonda, ‘Yuk nang ap, yu ulana kumce kanye deibuka telebuk unamak’ tenen, arikururak deiyok ning ap, tuba arikururake. ‘Aning nirya ara, tuba-tuba weik arye tabakuka arenamkirak’ tenen, an Titus ati, Allah morokunune.
Ura, na mi Pilemono, nun ni Allah ap, nun Deiyoknye Yesus Kristus ap, sik bitinye arye, an Pilemon ap, an aik bulubuka Allah ati, si erenyak nang ap ati, bico tenesururakce, sik kanye aryuk, talya melisirice ning ap, ura, nun patasilye ning urdem aryuk arisururak ning ap, tonda 'Yuk nang ap, yu ubuka walana kumce, kanye deibuka, telebuk neika unamak' tenen, sik bitinye arye arisururak deiyok ning ap, arisururake. 'Aning nirya ara, tuba-tuba weika arye tabakuka, arinamsirak' tenen, anggun nirya ati, Allah moronune. Na Paulus arye nyapsine.
Na kayapu, na mambul yupu nyapnuna ara, kekepnululume. Nun ni Allah arye bico pia weike tenesulule deice arye, el mapu kilisulule. Winisilye ara, talye kume. Dipkoprop Allah arye el mapu kilisulula ati, dipkoprop el mapu unyabe. Talya unyak ninye ara, Yesus diba kum tenebika ati, sikce nunti ning ara, ‘Sikda Allah el mapu unyake’ tenen, diba kum tenesinyake. Sik babye Allah mapu dipkoprop diba tenebuka kum unyake.
Nun teleb ubuka ubya deice arye, kum melisulul bukni, Allah el kanye aryuk bico tenepsilirye, talye melisulule. Winisilirye, nun kanye imun ning ap, nun patalamsilye ning nirya ap, disulula ati, aning nirya patapsilye touk, bico tenebuka melisulule. Anirya winisulula deice arye, nun ap, yuk nang ap, Allah el bidamnye ap, malye kanye bona kumce, teleb ubuka ansinibuka unyabe. Anyapman ning nirya ara, nun ni Allah ap, el Mi Koprop Yesus Kristus ap, arye pia arisururake. Aripsirikceura, dopropbibirye teleb ubuka diksukumuk una ap, bico tenebuka melilana ap arye, unamabe.
Ninye Mi Koprop Atonunye birye nyapnuk. “Yohanes, ance Efesus mutuku diba tenenyak ninye, sik melin malaikat ati ayupu sekuka dopdeiplyame. Dopdeipnulam yupu ara, ani.” Ayupu nyapmakilinye bira, talinye kume. Na sirik taruk arye kurya tekbarye talinune. Tonda, narye atekbarye weisa dirina ning eipmase ning noutamak banune. Narye ayupu nyapkine.
Ninye Mi Koprop Atonunye birye nyapnuke. “Yohanes, ance Tiatira mutuku diba tenenyak ninye, sik melina malaikat ati ayupu sekuka dopdeiplyame. Ayupu ara, ani.” “Nara, Allah el Mi Kopropa arye nyapkine. Na asing ara, weik uku buk dilamle touk unulule. Tonda, na yan ara besi ning dobuka uku noutamak dongobikiba, diplirye, mereng-mereng nyalamle touk unululnye birye nyapsine.
Ati, anggun amul aupmasiliba, anyapmasin yupu ati, ‘Deiyok ani’ tenen, kekepmanto ululum ninye ara, Allah El Dib Kanye arye, anggun diba tenelulum ninye ati nyasilye yupu ara, moubuka kekenamlulume. “Ayupu nirya ara, Tiatira mutuku unyakce, diba tenena ninye ati nyapnamlyame,” nyapnuke. Allah arye, na Yohanes ati nyapnuke.
Ninye Mi Koprop Atonunye birye nyapnuke. “Yohanes, ance Semirna mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Aning-aning nirya min kum uamuk talak ara, na akunum ulamse ati, nara Deiyok Kina Deiyoknye unune. Tonda, aning-aning nirya akunum kum uplye talak babye, na pia kam unamne anya arye, nara Sirya Dakna Deiyoknye unune. Na dipse bukni, ila tuba tonap kam buksirye, pia kam unune. Narye anggun Semirna mutuku ninye ati nyapsine.
Ninye Mi Koprop Atonunye birye nyapnuke. “Yohanes, ance Laodikia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara, ani.” Ayupu nyapsinye bira, na tenene ning nirya nong akunum upnamla ati, ‘Amin,’ nyananye unune. Nara, batakna pia kum diparyuk, Allah el yupu tuba dipkoprop nyanune. Allah arye kwepdeibuk ning nirya ara, na talinirye, weik deiyoknye unune.
Amul aupmasiliba, anyapmasin yupu ati, ‘Deiyok ani’ tenen, kekepmanto ululum ninye ara, Allah El Dib Kanye arye, anggun diba tenelulum ninye nirya ati nyasilye yupu ara, moubuka kekenamlulume, nyapsine.” Ninye Mi Koprop Atonunye birye, na Yohanes ati, nyapnuke. Anye birye nyapnuk touk, na Yohanes arye sekuka nyapsine.
Ninye Mi Koprop Atonunye birye nyapnuke. “Yohanes, ance Piladelpia mutuku diba tenenyak ninye, sik melin malaikat ati, ayupu sekuka dopdeiplyame. Dopdeipnulam yupu ara ani.” Malye winin ning tonok ning babye kum wininirye, pia diksukumnye unune. Tonda, na nyasinye ning nirya ara, pia dipkoprop yupu ati ara, ayupu batakna kumce, anyapmasin touk dipkoprop talibuka ununye birye, ayupu nyapsine. Na aryuk nyanamne yupu ara ani. Ara, “Akili sal ara, Allah el ulya im deice wekna telebe. Bukni, anang ara, im deice kum wektinge,” nyabuka, tukwak kili sal wibuka, yuk-yuk bokolina deiyoknye bira, na unune. Narye buplan pakeipnyopura, yuk nang arye abuplan ila tuba tonap kum tiriktinge. Aning atonun, narye buplan tirikdongopnyopura, yuk ninye arye kum kukeiptinge. Bublan kukulina ap, buplan tirikina ap, deiyoknye bira na uka.
ကြော်ငြာတွေ