Winilaminyeba, narye nyapdeipniba, an ap, akil ap, ‘Pia lik,’ tenilanamdume. Elce deipliba, dadeipdanin banamak mapu ap, ance deipminyeba, dadeipdanin balamica ani, banamak mapu ap, doyanamle talak noutamak nirya, ‘Pia lik,’ tenilanamake. Ninye nirya arye, an kisok teikuka onamkiake. Ance ninye yan dumu kisok si tobuka onamlame,” nyabuk.
Roma 1:3 - Eipomek3 Sik seklamik yupu noutamak ara, Allah el Mi Koprop ati laka nyalamik. Allah el Mi Kopropa Yesus ara, minop talak ulamuknye Daud birye deibukba, dadeipdanin yangalamika ani, Daud el yala nang arye Yesus yanuka deibik. အခန်းကိုကြည့်ပါ။ |
Roma 1:3
66 ပူးပေါင်းရင်းမြစ်များ
Aning atonun, na mapu koproba, Yakub birye deiamukba, dadeipdanin banamak nang ap, tonda Raja Daud birye deiamukba, dadeipdanin banamak nang ati, ‘Winipnamsine,’ nyapdeiamuk yupu deice nyapdeipsise ning ara, punubuka kum bataknamne. Ayupu babye, pia talipnamne. Ati, Raja Daud birye deiamukba, dadeipdanin banyak nang kan-kan arye, tonoknye Raja wipdeipyopura, na mapu koproba, pia talipnamle. Ara, sik apu yapu mambul weik nang, Abraham ap, Isak ap, tonda Yakub ap, sikce deiamikba, dadeipdanin, banyak nang nirya ara, Daud el tamnye birye, pia talipnamle. Deiyok ara, narye na mapu koproba ati, bico tuba tenenune. Sik malye winilamik ning ati, adiparyuk wenebuka optinye bukni, aning kumce, na kanye aryuk, bico tenepnirye, sik malye ning namin kibuka kilipnamnarya. Winipnyopura, na mapu ara, telebuk kipdeipniba, minop talak, pia teleb ulamik touk, tuba tonap, telebuk kipdeipniba, telebuk unamake.
Allah arye nyabuk. “Na tenepse talak akunum uplyopura, Daud el taruk deice arye taleamuk ninye ap, taleamuk ning ap, taleamuk mutuku ap ara, narye tuba tamubuka, teleb kipdeipnamne. Winipmanto ara, Daud el domuk aik, abilinga nirya pun dayukce, daksakuk ning ara, tuba tamubuka punupnirye, dukdongopnirye, dobukapnirye, teleb kipdeipnamne. Wini talak ara, amutuku noutam aik ap, keil poka ap, aning nirya domik ning ara, yuk mutuku nang arye yanuka, ulubuka bataknamake. Winipnamak bukni, aminyan talak ara, na Allah arye, cang keil poka domik ning ap, sik aik ap, aning-aning nirya, pia teleb uamuk touk, tonap tuba tamubuka, teleb kipdeipnamne. Winipniba, minop talak, pia teleb uamuk touk unamle.
Winibukopura, awekuka dinmek nang arye, Yesus ati ngalukunmekce ayupu nyabik. “Se, anye bira, Daud yalanye birye deibuknye anya arye, elda Allah arye Ninye Lyenanye, ‘Mesiasnye yanuka unamle’ tenen, wibuka deibukba, akunum yanmasil do, kum do?” nyabik. Nyabik ning ara, ‘Yesus ara, Ninye Lyenanye ulul do, kum do?’ tenena ati nyabik.
Amutuku noutamak Kanaan tam ulamuk kil, Israel yala kum kil arye, Yesus dam yayuk. El kilmu talima noutamak ara, isa arye talyamuka ati, utenebuk. ‘Na kilmu talibuk isa ara, Yesus arye dobuka aisa yakuka buru dopkweteptu’ tenen, Yesus ati morolyayuk. Morolyayukce ayupu nyabuk. “Naie, anda nun deiyoknye ulyame. Anda, Daud yalanye birye deipkuknye birye, nati bico tenebuka melipnutume. Na kilmu isa talyamuka deice arye, pia ikin ubukba, kanye imun kanye bolula ati ara, ance na kilmu kweteptume,” nyabuka morobuk.
Asipdeyuk bukni, Yesus ara yupu tonap tamubuka kum nyabukce, tunim abuk. Winibukopura, ila tonap Allah arena ati, aweik deiyoknye, Kayapas birye, Yesus ati asipdeyuk. “Allah arye dinmasilak unmalama ati, talya yupu nyana kum, dipkoprop ninguk nyapnusilame. ‘Ninye weik lyeplirye, sik kanye talima talinamle’ tenen, Allah arye wipdeiyamuknye, Mesias bira, an aulyam do? Tonda, Pia Teleb Etekdopnye Allah ara, anuk el Mi Koprop ulyam do?” nyabuka asipdeyuk.
Bulyayukopura, Allah im deice arye ayupu nyapdeibuk. “Anye bira, na Mi Koprop ulule. Narye elti, pia bico tenenuna anya arye, elti, na kanye pia deilinune,” Allah arye nyabuk. Nyabukopura, Allah El Dib Kanye arye, Yesus talima noutam nyapdeibukba, Yesus ara ninye pia kum ulamik mutuku, pata mutuku noutamak biyuk.
Akilmu akunum kam bukeibukce, amutuku batakuka, bisik noutam banmoka ani, asing kuamuk nang bitinye, el balye tam tikilyarik. ‘Kwetepsetu’ tenen, weik yupu nyabuka yanuka moroprik. “Anda Daud yalanye birye deipkukba, unmalama anya arye, Ninye Lyena ati, Allah arye wibuka deipkuke. Ati bico tenepsimince, kwetepsutume,” nyabuka moroprik.
Asipdeyukba, malaikat arye tamubuka Maria ati nyabuk. “Allah El Dib Kanye an nong deice deipkilirye, Allah el mikip ara, kanya atonun an nong deice unamkile. Winipnamkila deice arye, mi bominya ani, aminyan talak, malye winin ning tonoknye babye, pia kum wininamle mi deipnamlama ati, ninye nirya arye, ‘Ami ara, Allah el Mi Koprop,’ tenebuka nyanamake.
Allah arye nun apu kopropa Abraham ati, “Winipnamne,” nyapra deiamukura, el yupu nyabuka laka nyalamik nang, nabi nang arye, sekeiyamsik touk, Allah el pil dolamuknye Daud arye deibuka, dadeipdanin, yangalamica ani, deipnamlanye bira, nun lyena ati, Lyena Deiyoknye weik mikipnye akunum erepdeipmasile.
Yupu nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.
Anang ati, “Na mapu,” nyabuka anya arye, Allah arye, ‘Na kanye delinunye’ tenen, kanye deibukce, wipdeiamuknye, tukwak mutuku dopdeipnuknye ati ara, “Allah el Mi Koprop,” kum nyapdatinye do? Ati narye, “Allah el Mi Koprop unune,” nyapmanu deice arye, anggunce, “Allah el si yanipmalame,” nyanmanuluma ara, yata deiyok ati do?
Bukni, abuku noutamak sekuka deipse yupu nirya ara, talye ati kum sekse. Ayupu nirya kekebikirye, ‘E, Yesus ara, dipkoprop Ninye Lyena Deiyoknye, Kristus ulule. Elda, Allah el Mi Koprop dipkoprop ulule’ tenen, dib tenebiceura, ‘El si deice arye kam pia unamlum’ tenen, abuku sekeipsise. Na Yohanes arye nyapsine.
Allah yupu sekamsika noutamak arye yata nyasulul do? ‘Ninye Lyena Deiyoknye, Kristus yanamle,’ nyanyaknye bira, ‘Daud el yala nang arye deipnamake.’ Tonda, ‘Nun apu Daud, el ulamuk mutuku koprop, Betlehem mutuku arye yanamsile,’ nyalula anya arye, anye Yesus ara, yata wiribuka Kristus uptu do? Aning ara kume,” nyabik.
Bukni, Daud ara, aminyan ak, winipnamuk ning ati, laka nyalamuknye nabi ulamuk. Tonda, Allah arye Daud biti, ‘Dipkoprop winipnamne,’ nyapdeibuk yupu deice arye ayupu nyabuk. ‘Daud elce deiplibuk, dadeipdanin balamica ani, sirya tam deipnamak mi ara, Daud el ulye touk, ami babye, erebuka weik ninye deiyoknye kipdeipnamne,’ Allah arye nyabuk. Allah arye nyapdeibukura, Daud kekebukce akunum kel kiyamuk.
Nun bitinye nang aryuk anye bira kum kwetepmaname. Aning kum bukni, Abraham ap, Isak ap, Yakup ap, sik moubuka talyamik Allah ara, nun apu yapu nirya talyamik Allah ara, el yupu kekebuka, el piluk melibuka ninye winipmanto kum pil dolulnye, Yesus akunum erepdeibuk. Anggunda, ‘Nun deiyok nang arye Yesus opnamak’ tenen, Yesus dobuka anang ati akunum talye areplume. Akunum areplumopura, Pilatus bira, ‘Yesus talye lopdeipnamne’ tenen, akunum tenebuk bukni anggunce, ‘Kume opdeipsilyame,’ nyaplumce, Yesus dobuka Pilatus damak delilbilumce bataklume.
Na kanye bokoltona kumce, pia pi dobuka, mikip arye peterepda banune. Ara, na kanye talima el deiceuk deipna deice arye, Allah el Mi Kopropa Yesus, el laka teleb yupu, ninye lyen yupu dobuka, mikip arye peterepra banune. Ara, na kanye talima, Yesus el deiceuk deipsa deice arye, ‘Allah el Mi Kopropa Yesus, el kai teleb yupu, ninye lyen yupu dobuka, mikip arye peterepra banune. Allah el Mi Kopropa Yesus, el amu tam unirye, el piluk dopnamne,’ tenenune. Allah elce dinmanila anya arye, na talye yupu kum nyapsine. Allah moronun talak nirya ara, anggun Roma mutuku umunye ninye ati pia tenepnirye, Allah morosunune.
Na yala nang kopropa, nun Israel yala ninye ati, imun kanye bonune. Imun kanye bonuna deiyok ara, nyapnusine. Ara, na yala ninye sik Israel ninye nirya ati, ‘Nun ni Allah arye lyeptue’ tenen, pia se tenenune. Israel yala ninye nirya lyena ati ara, ‘Allah arye na Paulus ati, bataknuturye, Kristus ap, na ap wilibuka yuk-yuk deipnutuba, adeice arye Israel ninye nirya lyeptue’ tenenune. Ara, ‘Se, na yala nang kopropa, Israel ninye nirya lyeptue’ tenen, pataniliba, nyapsine.
Tonda, nun apu yapu ara, Israel yala ninye arye delilamikba dadeipdanin, yangalamik nang ara, weik mambul nang ulamik. Tonda, ninye lyena ati, Allah arye wibuka dopkwetepsuknye, Kristus el deiamrik nang bitinye babye, sik apu yapu ara, Israel yala ninyeuk ulamik. Anirya ati ara, sik Israel ninye ara, talye ninye kum unyake, nyapmasine. Aning atonun Kristus babye, talinye kum ulule. Elda, aning-aning nirya talibuka deice tam Weik Deiyoknye kibuka ulule. Elda, dipkoprop Allah ulule. ‘El si ara, pia erenauk unamap’ tenen, Amin nyapsine.
Allah arye anggunti, ‘Na Mi Koprop Yesus Kristus ap, aninye ap kanye dukdongobuka neika unamak’ tenen, wipdeipsuknye bira, yupu talye kum nyaltakalule. Elce, ‘Wininamne,’ nyasilye touk, dipkoprop winisulula anya arye, arup nyapmasin touk melisilyeba, sirya talak ara, diksukumuk unamlume. Yesus ara, nun Weik Deiyoknye usulule.
Tonda, Israel yala ninye wininyak ning ton tenipdelulume. ‘Allah el si erebuka kipnamap’ tenen, kam ning obuka kwalibikirye, ton tam bokuka, Allah arena ati, kintinibuka deibikirye, uku dongolamake. Bukni, ton tam ara, sik deiyok nang arye, dinyake. Aning dobuka Allah ati arenyak nang ap, sik bidamnye dina ati, aning bokuka dolonyak nang ap ara, sik ananguk ati sik tonok wininyake.
Isa Mutuku Dongonye ap, mer nirya ap, sik amu tam ulamuburye, tukwak mem ninguk talibuka ulamubu bukni, Allah arye, ‘Atalak ani,’ tenyamuk touk akunum winibukopura, Allah arye el Mi Kopropa dopdeipsuke. Allah el mi Yesus dopdeipsukba, Allah El Dib Kanye mikip deice arye tonok kil arye ami deibuk. Akil arye Allah el mi deibuk talak ara, nun Yahudi yala ninye nirya, Allah arye, “Aning ara wininamlulume, aning ara kum wininamlulume,” nyapdeibukba, Musa sekamuk yupu talibuka ulamuburye, amem yupu amu tam atonun ulamupe. Aning atonun, ami Yesus babye, Musa sekamuk yupu amu tam ulamuk. Musa sekamuk mem yupu amu tam bukuka ulamubu bukni, Allah arye el mi dopdeibukba, atalak yayuka deiyok ara ani. Ara, Allah arye nunti, ‘Musa sekamuk yupu, mem yupu amu tam unyak ninye ara, deknamne.’ Na Mi Kopropa arye aninye deklirye, mem ning amu tam unyakak arye lobuka lyepnirye, ‘Na mapu kopropa unamak’ tenen, diba tenenyak ninye ara, teleb kipdeipnamne. ‘Winipnyopura, narye sikti, kintinyamse ning nirya arepniba, sikce dopropnamak,’ tenyamsukce, el mi Yesus dobuka areamsuk.
Tonda, ‘Allah arye el Mi Koprop Yesus dibukce, kam bukeibuknye birye, im deice arye dolyanamsil’ tenen, pia kanye deiplumce, kintinibuka dinauk ululum ning ara, aning ton laka nyaninyake. Ara, Allah arye, malye winilamice nang ap, malye winin ning nirya ap ati, weik arye weneplirye, oplopnamle talak noutamak ara, Yesus arye lyebuka loplopnamsile.
Anyapnukin yupu ara, ‘Tilila do, dib do?’ tenen, kum tenepmanto ning. Ara, Allah arye duknyamukbuk, ninye kum kel bikamik bukni, wini talak Allah arye anoutamak weik mambul yupu akunum laka kipdeipsuke. Ara, Allah diksukum ulye touk, nun babye, diksukum una ati, winipnamap deiyok ning ara, ani. Allah ninye nong atonun dayukce ninye eipnamik ati, laka yayuke. Allah El Dib Kanye pil dobuka deice arye, ‘Yesus ara, el dipkoprop Allah El Mi Koprop’ tenen, dib tenebuka, ‘Kel biknamak’ tenen, laka kibuk. Lak kibukura, Allah el im deice pil don nang, malaikat arye eibik. Ninye arye, Yesus el yupu dobuka, ninye mutuku-mutuku nirya ati, amutuku-amutuku nirya binuka peterelamik. Peterelamikbuk, ninye mutuku-mutuku nirya unyak ninye weik arye kekebuka dib tenelamik. Aminyan sirya talak ara, Allah arye Yesus ati, pia teleb kipdeibukce, erebuka im deice bobiyukura, im deice tam ulule.
Nun ap, anggun asurat eiplum nang ap, ‘Nun nirya arye kanye tonok tenebuka, ansinibuka unamap’ tenen, nun elilamubu ning ap, yupu kekelamubu ning ap ara, anggunti laka nyabuka peteresinyabe. Ura nun kanye tonok tenebuka, ansinibuka unyap nang ara, nun ni Allah ap, el Mi Yesus Kristus ap, dukdongobuka neika unyabe. Nun ap, nun ni Allah ap, el Mi Yesus ap, kanye tonok tenebuka, kanye talima dukdongobuka unyabe.
Aning atonun, yata ninye do nirya, sik malye-malye wininyak ninye ara, Isa Mutuku Dongonye, el mapu uk, pia tuba unyake. Yata ati do, kume. Ara, Allah arye, aning-aning nirya kweipdeibuk talak bukni, anoutam talak nirya ara, Isa Mutuku Dongonye arye, Allah yupu yanibukce, malye ulamuk touk, tuba ulula ati, el mapu ababye, atonun wininyake. Allah el Mi Koprop arye, ‘Winipnamne,’ tenyamukce, yanamuka deiyok ning ara, ani. Ara, ‘Isa Mutuku Dongonye el malye winina nirya ap, malye pil dolamle ning nirya ap, kum ubuka deipnirye, dobuka donoknamne’ tenen, Yesus yayuk.
‘Ninye mutuku-mutuku nirya lyeplirye, taliplibuk, dobolbanamaknye, Yesus eluk ulule’ tenen, diba tenenyak ninye nirya ara, sik kanye tenen ning ap, sik talima ap, dipna atouk ulamuk bukni, Allah arye akunum kam bukeibuk. Tonda nun Na ni Allah ati, sik kanye deibice ninye nirya ara, el Mi Koprop babye, sik kanye deilinyake.
Ton kel kibupu ning, ton nyapnusine. Ara, ‘Sikda Pia Dib Koprop Allah, diba tenebuka talipnamake’ tenen, Allah el Mi Koprop Yesus yayukce, kel kina deiyok ning akunum arepsuke. Pia Dib Koprop Allah ap, nun ap, talima dukdongopsukba neika unyabe. Aninguk kume. Allah el Mi Yesus Kristus el bidamnye ap, nun ap, talima dukdongopsukba, neika unyabe. Yesus Kristus elda, Dib Koprop Allah el nong tonok ulule. Tonda, elda, Pia Kam Una Deiyoknye ulule.
Tilila yupu nyanyak nang weik akunum mutuku-mutuku nirya peterelbanyake. ‘Sikce tilila yupu diba tenebikirye, talye bisik dobolyanganamsiak’ tenen, peterelbanyake. Tonda anang arye, ‘Yesus Kristus ninye nong atonun ubuka akunum yayuke’ tenen, diba kum tenenyake. Ati ayupu diba tenebuka kum peterenyake. Anang ulamak ning atonun wininyak nang nirya ara, sikda tilila nang unyake. Ton, ‘Yesus Kristus ap, el ulul ning nirya ap, bisiptibye’ tenen, unyake, nyapne.
Ninye Mi Koprop Atonunye birye nyapnuke. “Yohanes, ance Tiatira mutuku diba tenenyak ninye, sik melina malaikat ati ayupu sekuka dopdeiplyame. Ayupu ara, ani.” “Nara, Allah el Mi Kopropa arye nyapkine. Na asing ara, weik uku buk dilamle touk unulule. Tonda, na yan ara besi ning dobuka uku noutamak dongobikiba, diplirye, mereng-mereng nyalamle touk unululnye birye nyapsine.
ကြော်ငြာတွေ