Roma 1:11 - Eipomek

¹¹ Tonda, ‘Se, sik Roma mutuku unyak ninye ap epdatibye’ tenen, patanilye ning deiyok ara aupmanile. Ara, Allah El Dib Kanye mikip deice arye arisilye pil dona deiyok ning, narye Roma mutuku ululum ninye ati melibuka arepsitiniba, ‘Anggun kanye talima mikip kibuka unamlum’ tenen, ‘Se,’ tenenune.

Roma 1:11 ပူးပေါင်းရင်းမြစ်များ

2 Samuel 13:39

Bukni, aketing kipna winilye akunum ubukura, Raja Daud bira, Amnon ati, bico ubuk ati, engelamuka ani, batakukura, akaren arye ila tamubuka, Raja Daud birye, el mi Absalom ati, weik arye bico tenebukce, ‘Se tonap epdatinimnye,’ tenelamuk.

2 Samuel 23:15

Bukni, Raja Daud birye el deiamik mutuku ati, tuba pia tenelamukce, elce nyalamuk, “Se, Betlehem mutuku bisik bublan dam, pia teleb tuku lukne mek deibukce, balye mek ara, ninye arye ton, kwebuka arepnitingba, diptinyeura, kanye deiptinye tenenune!” nyabuk.

2 Tawarikh 20:20

Akunum mapmika, berekukopura, beren tam koproba arye, sik Israel nang nirya ara, Tekoa pata mutuku tam biyik. Sik aninye binuyik talak ara, Raja Yosafat birye, ayupu nyabuk. “Yehuda tam noutam ululum nang ap, Yerusalem weik asik noutam ululum nang ap, anggunce Allah Yahweh tonok ati, dib tenepnamlulume. Dip tenepmunyeura, Allah arye melipsiliba, anggun adiparyuk talima darabuka, mikip tuba unamlume. Tonda, sik nabi-nabi nang arye nyalilamsik yupu ara, moubuka talebuka, dib tenepmunce, teleb umunyeura, anggun winin ning nirya ara, nong unamsile.” Yosafat birye, sik Israel nang ati nyabuk.

Rasul 16:5

Winilamik ati, amutuku diba tenebuka Allah yupu aik weklamik ninye ara, sik Yesus dib tenebuka pia talibik ning ara, mikip weik kibukura, pia kanye lamabuka ulamik. Tonda, asum-asum nirya ninye tonap, diba tenebik anye tabakikura, sik yupa weik kipropnin balamik.

Rasul 19:21

Anirya akunum winibukopura, Paulus tenebukce nyabuk. “Na Yerusalem mutuku binaman talak ara, Makedonia tam noutamak ap, Asia tam noutamak ap, banmanya ani, Yerusalem mutuku binamne,” nyabuk. Utenebukce nyabuk. “Asi nyapman mutuku nirya akunum binyopura, ‘Roma mutuku binamne,’ tenepsa ati, dipkoprop Roma mutuku babye, binamne.” Paulus tenebukce nyabuk.

Rasul 19:6

Tonda, Paulus taruk anang, sik gisok deice deibuk talak ara, Allah El Dib Kanye aribukba, Allah El Dib Kanye, anang sik nong deice yanuka wekukura, adeice arye sik kel kum biklamik yupu, yuk mutuku nang nyalamik yupu nyanmekba, Allah arye anang ati aribuk yupu, Allah el yupu babye, laka nyanmek.

Roma 1:12

Winipsitinyopura, anggun diba tenelulum deice arye, nati talima kwa dinamlulume. Aning atonun, na dib tenenun deice arye, anggun Roma mutuku tam ululum ninye ati, kanye talima kwa dipsitinye. Winipdatipyopura, nun nirya Yesus ati diba tenenyaba deice arye, ‘Nun talima kwa dipdatibirye kanye deibuka, neika dukdongopdatibye’ tenen, nyapsine.

Roma 15:23

Amapo, minop talak anggun ululum mutuku kum yanamse bukni, wini talak ara, na peterelamse mutuku noutamak ara, winiryuk mutuku ton kum upmala anya arye, ton binuka kum petereptinye. Tonda keting tamun yupa pia weik deice arye, ‘Se, anggun Roma mutuku noutamak umunce diba tenelulum ninye ati dilbitinye’ tenen, pia patalamnuke.

Roma 15:29

Na kele. Anggun mutuku Roma yanamne talak ara, Kristus weika arye teleb kipdeipniliba, telebuk unirye anggun dam dilyanamsine. Na kanye talima pum tam ara, teleb un ning kum suknamnila ati ara, na ap anggun ap neika unamaba deice arye, Allah arye anggun Roma mutuku ululum ninye ati pia teleb ulinamsile.

Roma 15:32

Tonda, ‘Paulus ara Allah arye tenelamuk touk, elce melibuka uruna ati, nun mutuku, Roma yalyeura, el ap, nun ap, kanye deibuka neika unamaba deice arye, el talima ap, nun talima ap kwa dib danamap’ tenen, Allah moronamnulume.

Roma 16:25

Allah el siuk weik arye erenamabe. Na Paulus arye, Yesus Kristus ninye lyena ati el laka teleb yupu dobuka peteresunune. Apeteresinye yupu deice arye, diba tenepmunyopura, Allah arye anggun kanye talima mikip kilisululba, pia batakna kumce pia talibuka unamlume. Allah elcuk mikip ulisulule. Mikip kilisululba, minop talak arye dipdongobuka, danoutam talak nirya ara, Allah arye ninye lyena ati, Yesus el laka teleb yupu ara duknyamukba ninye arye kum kekepmanto ulamik. Bukni, wini talak ara ayupu lakak kibukba, peteresinyabe.

2 Korintus 1:15

Ara, arup nyapmasin yupu, kanye bokoltona kumce, ‘Pia dipkoprop winipnamle’ tenen, dib tenepsisa ati, winibuka tenyamsise. Ara, ‘Anggun Korintus mutuku ninye ara, anggun dam minopce uruna ati, yanuka binuka unmanya ani, sik batakuka yukak binmanya ani, aminyan talak ara, tuba tamubuka tonap, anggun dam yanyopura, like bitinye sum neika unamap deice arye, teleb kipdeipnamsile,’ tenepsise.

2 Korintus 1:21

Ara, nun ap, anggun ap, Kristus ap, talima dukdongobuka neika una ap, dib tenena ap ati, el mikip arisilyopura, pia kanye talima lamapdongobuka unyabe. Winina ati, talima mikip kilina deiyok ning arisilye deiyoknye bira, Allah eluk ulule. El bidamnye aryuk nunti, ‘Aninye ara, na tenen ninye unyakce, na piluk donamniyake’ tenen, wipdeipsuke.

2 Korintus 11:4

Dipkoprop nunce Yesus el yupu peterelamsupu atonun kum bukni, yuk nang arye tilila yupu deice arye Yesus ati peterepsikceba, ‘Diba tenepnamlum’ tenen, nyapsine. Tonda, yuk nang arye, ninye lyena ati tilila yupu, peterepsikceba, ‘Tilila isa dib tenebuka dopropmunyak’ tenen, nyapsine. Anggunda, ‘Ayupu ara dib do, tilila do?’ tenen, moubuka tenena kum arye, yuk nang arye nyasikce yupu, adiparyuk kanam aryuk kekebuka dololulume. Winilulum ning ara malyeuka.

2 Korintus 9:14

Tonda, aninye nirya arye, anggun Korintus mutuku ninye ati, Allah morosinyak talak arye, sik talima melipliba, Allah moronamsiyake. Allah moronamsiyaka deice arye nyanamake, “Kume, Allah el kanye aniryuk Korintus ninye ati, bico tenebukce melyamuka ara, mitika aryuk kume. Allah arye sikti, weik arye melyamukba, pia telebuk unyake,” nyabuka Allah moronamsiyake.

Pilipi 1:8

Na talye kum nyapsine. Allah el kele. Yesus Kristus, nun nirya ati, ‘Na mapu’ tenen, pia bicoe tenesilye touk, na babye, anggun Pilipi mutuku ninye nirya ati, pia bico tenesunune. Tonda, ‘Pilipi mutuku ninye ara, na ap, neika utibye’ tenen, patanulule.

Pilipi 2:26

Epafroditus arye anggunti, ‘Se, na kayapu’ tenen, bico tenesulule. Tonda, yuk nang arye, “Nun kayapu, Epafroditus ara, uk weik dinmale,” nyabuka laka nyabikura, anggun Pilipi ninye kekeplume. Yuk nang arye, Epafroditus ati, ‘Uk dipkuk ning ara, Pilipi ninye akunum kekebik,’ nyabikura, Epafroditus kekebuk. Kekebukce, ‘Se na kayapu nang mambul kanye bopnikcak’ tenen, el babye, mambul kanye bopmale. Ati Epafroditus dobuka, anggun dam dopdeipnamasine. Aning tenenuna ara, telebuka. Na Paulus arye, nyapsine.

Pilipi 4:1

Na kayapu. Na weit yapu atonun ninyeo, pia bico tenesunune. ‘Se, kanye eibratibye’ tenen, pia tenesunune. Anggun nirya ati, na kanye pia weik deipsine. Yesus arye dekna ning arepnamnil ning deiyok ara, anggun tia. Ara, Yesus el laka teleb yupu peterelamsisibuk, anggunda diba tenelamluma ati, dekna ning arenamnile. Yesus el weik mikip deice arye, nun nong talye nong dobuka, el nong pia teleb ulye touk, nun nong im deice ninguk kwepdeipnamsile. Aning ati ara, na arup nyapmasin touk, nun Deiyoknye Yesus talima dukdongobuka umunce, diksukumuk ubuka, kanye lamapdongobukauk unamlulume.

1 Tesalonika 3:13

Tonda, nun Deiyoknye Yesus ap, el im deice melina nang, malaikat ap, tukwak tamubuka yanamak talak noutamak bukni, anggun Tesalonika ninye ara, nun ni Allah dam tikilbinamlum talak ara, ‘Anggun malye winin ning tonok ning babye, kum uplye deice arye, pia diksukumuk wininamlulum’ tenen, Allah morosunune. Tonda, ‘Winibuka wininamak’ tenen, ‘Yesus arye anggun talima mikip kilililamsilya deice arye unamak’ tenen, Allah morosunune. Na Paulus arye nyapsine.

1 Tesalonika 3:2

Winibuka tenebuburye, Timotius anggun dam dilyangana ati, dopdeipsupu. Timotius ara, talinye kume. Elda, nun weit atonunye ulule. Tonda, el ap, Allah ap, Kristus el laka teleb yupu dobuka, mutuku-mutuku nirya peterelbana ati, pil neiktoto dodurake. ‘Timotius arye, anggun diba tenemunya ati, kwa dakna ap, mikip kilina ap, upnamsil’ tenen, dobuka dopkwetebupu.

2 Tesalonika 2:17

Nun Deiyoknye Yesus Kristus ap, nun ni Allah ap, sik bitinye arye, ‘Anggun Tesalonika nang ati, anggun talima melinamsirak’ tenen, Allah morosenyabe. Tonda, ‘Anggun teleb pil donamlum ning ap, teleb yupu nyanamlum ning ap ati, mikip kipsilirye, telebuk wininamlulum’ tenen, Allah morosenyabe.

2 Tesalonika 3:3

Sik anang ara, malye ulisinyak bukni, Allah elda, batakna kumce, el nyalul yupu nirya, dipkoprop sirya dakalulnye binya arye, ‘Isa Mutuku Dongonye arye, anggunti, malye kipsilyak’ tenen, anggun kanye talima, mikip kipdeipsilirye, moubuka kalikinamsile.

Ibrani 13:9

Ura, sik yuk nang arye, urasin yuk peterenyak yupu, talye yupu yala-yala nirya peteresikceba, kekemunya deice arye, ‘Yuk malye bisik bobisicak’ tenen, sik yupu kekena kume. Allah bico tenesilirye, el kanye aniryuk melisilyeba, nun kanye talima mikip kilisilirye, talima kwa disulul ara, telebe uka. Aninguk talibuka unamlulume. Bukni, yuk nang arye, sik bidamang kanye aryuk, ‘Winina meme,’ nyabuka, din ning ati, mem nyabikirye, mem pil dolamaka deice arye, nun kanye talima mikip kum kilisulule. Din ning ati, “Aning ara dina meme,” nyabuka mem nyabikirye, mem pil donyak nang babye, wininyaka deice arye, dipkoprop kum melilanyake. Anang arye talye piluk donyake.

1 Peterus 5:10

Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.

1 Peterus 5:12

Silas melipnuka deice arye, abumang surat ara, na Peterus arye sekeipsene. Na kwit Silas ara, diba tenebuknye anya arye, nati kum batakanululce, melinululba, nun ap, neikak neika pil donyame. Elda, na weit atonun unulule. Asurat sekeipsina deiyok ara, anggun talima barina ati sekeipsene. Tonda, Allah arye, ‘Na pil donamak’ tenen, talye arisilya pil dona deiyok ning ap, Allah el kanye aniryuk talye melisilye ning ap ara, ‘Dipkoprop ninguk, akunum laka nyapsile tenenamak’ tenen, asurat ara, sekeipsene. Anyapmasin yupu nirya ara, dipkoprop anya arye, ayupu talipmunce, tunim abuka unamlulume.

2 Peterus 1:12

Ara, na kayapu, winiryuk nyapmasin ning nirya ara, anggun akunum kel bikamlume. Tonda, akunum peterelamsik yupu kekelulumce, ayupu uk talibuka, tunim abuka umunce, dobolbanauk ululume. Bukni, ‘Kanye arye tonap tenenamlum’ tenen, narye tuba-tuba ayupu uk, tuba nyanamsine.