Ratapan 2:9 - Eipomek9 Winibukba, anyasik antanap dongobuka wiamik poka noutam bukni, ninye weik wekelyangan bisik bublan nirya ara, kat ning el si besi arye, kintinyamik ning nirya ara, dakuka tukwak batakik. Tonda abublan dam wekelyanganak ati, kintinilamupu ning nirya ara, nun mal olan nang arye, aning nirya dakuka batakik. Winipsekura, nun mal olan nang arye, nun ninye deiyoknye Raja ap, el amu tam pil yuk-yuk deiyok kibuka, ulamik weik nang ap nirya ara, anang bobuka, sik pera mutuku ulamik ninye, yuk mutuku nang, sik mutuku bobuka deibikba, amutuku nang arye talinyake. Adeice arye, Allah elce nyapdeibukba, sekamuk ning ara, ton kum peteresinyake. Tonda, Allah el yupu nyapdeiplyeba, laka nyana deiyok nang, sik nabi-nabi nang ara, wini talak Allah arye, sik dam ton yanuka kum nyalule. Tonda, lengdar malamaka deice arye, Allah Yahweh arye, ‘Winipnamlume-winipnamlume. Aminyan talak ara, aning ton yanamle ati, winipnalumeʼ nyabuka, min talak nyalamuk touk, tuba ton kum lak nyalula ati, anabi nang arye, nun Israel ninye ati, ton kum laka nyasinyake. အခန်းကိုကြည့်ပါ။ |
Ratapan 2:9
27 ပူးပေါင်းရင်းမြစ်များ
Pia minop talak arye, Allah elda diksukumnye, dipkoprob el tonok ulul bukni, sik minop talak ulamik Israel nang ara, elti, moubuka kum bikamik. El yupu moubuka kum taleamika ati, el ap sik ap, epdanuka neika kum ulamik. Atonun ton, el Allah ap, ninye ap elana ati, pil dona deiyok nang, imam-imam nang ton pia kum ulamika ati, sikce kum perelamik. Tonda, Allah arye, ‘Aning ara wininamlume, aning ara kum wininamlume nyapdeiamuk yupu moubuka kum tenelamikce, talebuka bita kum ulamik. Ati, anggun apu yapu ara, talye-talyeuk ulamik.
Asipdesibuk, sik anang arye tamubuka, “Persia mutuku nang arye obuka sirya daksikce, sik mutuku bobinamsik nang ara, ton nang ara diamik bukni, ton nang yupa ara, mitik tonun tuba kam ukirye, tamubuka Yerusalem biyike. Sikda, Yehuda tam Yerusalem mutuku dam tamubuka biyik bukni, ikin weik unyake. Unyak buk, yuk mutuku nang arye, anang ati nalinyakba, alye weik ulule. Tonda, Yerusalem mutuku weik keil poka domik ning ara, dakuka uluplobik touk, tuba aubuke. Apoka bublan ara, uku dongobike,” nyapnike.
Aning nirya winipsika ati ara, wini talak ara, nun ulamupu mutuku noutam ara, ‘Allah tuba aulirye, pil tuba melibuka dosulule’ tenen, lak kilin ning tonok babye, pia kum eilinyabe. Tonda, an Allah arye nunti, yupu tuba kum nyasilyama ati, nun kan-kan noutam ara, ance nyapminba, kekebikirye, an yupu laka nyana deiyok nang, sik nabi-nabi nang ton, pia kum unyake. Tonda, nun Israel yala nang kan-kan noutam ara, tonoknye babye, ‘Allah ara, yata barye talak ton, wenepnamsil do?’ tenen, bikturye, yupu kum lak nyapsutue,’ tenelamike.
Nyapsiba, Allah el si Yahweh arye tamubuka nyapnuk. “Anang arye, nyasikce yupu ara, narye kum nyapse bukni, sikcuk tilila yupu nyanyake. Atilila nabi nang, sikcuk, ‘Allah arye nyapdeipsuk yupu nyanyabe. El si deice arye ayupu nyasinyabe,’ nyalamik bukni, dipkoprob narye kum nyapdeiamse yupu, tilila yupu uk nyanyake. Narye sik atilila yupu nyanyak nang ati, ‘Ayupu nyalbinamlyame,’ kum nyapdeiamse. Tonda na ap, sik ap neika, yupu kum taleamupu. Sik dam lengdar deice eibikce, ‘Aning winipnamle do, aning winipnamle do?’ tenen, nyalamak yupu ara, sik mining kanye aryuk tenebuka nyasinyake. Sik tilila nabi nang arye, nyanyak yupu nirya ara, tilila yupu uk nyalisinyake. Ayupu dib tenena kume.”
“Nara Allah Yahweh, aning-aning ap, im deice yin talin malaikat nirya ap, sik weik deiyoknye unune. Nara, weik erena ap, mikip weik ap, uninye birye nyapsine. Amutuku noutamak ululum Israel ninye, ayala-yala nirya ati nyapsine. Tilila yupu nyanyak nabi-nabi arye, anggun nong deice kum upnamle yupu nyalisinyak ning ara, kum kekenamlume. Sikce, ‘Aminyan talak ara, winipnamsile,’ nyanyak bukni, atilila yupu ara, pia kekena kume. Sikce nyalisinyak ning ara, sik bidamang aryuk, ‘Aning nyapnamabe’ tenen, kintinipmace ninguk, talye yupu nyasinyake. Ara, na Allah Yahweh arye, ‘Nyapnamlume,’ nyapdeipse ning ara, yanuka kum nyalisinyake. Sikce, sik kanye aryuk nyanyake.”
Warikuka antanap dongobuka ulamika ani, winilamik buk, Raja Zedekia birye, amutuku ulamik nang talibuka ulamuk bukni, koklombarye (11) tahun kibuk wala ara, dumbarye (4) wal ara, toupne barye (9) kibuk sum ara, Yerusalem asik domikce, weik cang keil poka dobuka, antanap dongamik noutam ara, sik Babel yin nang arye, akeil dakuka uluplobikce, bisik tonok botobuka, Yerusalem asik koprop wekikce, amutuku alubuka doprobik.
Winibik talak aryuk, sik Babel mutuku yin talin nang arye, Raja Zedekia el aik ap, elce talilamukba, amutuku ulamik nang, sik asik nirya ap ara, uku dongobik. Anirya uku dongobikba, dibukura, Yerusalem mutuku asik dobuka ulamikce, min talak weik cang keil poka dobuka, amutuku dana-dana tam nirya antanap dongamik ning nirya ara, akeil poka ulubuka daklobik.
Narye nyapniba, sik dana-dana tam yin nang arye, Babel mutuku olbinamak talak ara, sik Babel mutuku noutam yin talin nang nirya ara, ilil weik upliba, tonap kum olyanamake. Sik talima daksakliba, ‘Ninye olan kanye kum bopnamake. Sikce nun opsicakʼ tenen, ‘Asukumuk dungnubuka unamabe,’ tenenamake. Winibikcopura, weik keil arye domik keil asik, el si ara benteng-benteng noutamuk dungnubuka unamake. Wininamak talak ara, sik alye una kum ning nirya ara, tunim apnamle. Winipliba, kanye moubuka tenen ning nirya ara, kum danamle. Ilil weik upliba, kilapu arye, mikip pia una kumce, mitang ulamle touk, yuk yin talin nang arye, kum opmanto upnamake. Winipnamak talak ara, sik aninye arye, domik asik wekelban bisik bublan dam arye, besi ning arye kintinip deibik bublan, el si pintu gerbang nirya ara, yuk nang arye, uluplopnamake. Tonda, sik asik nirya ara, uku dongobuka, asik malye kibuka daklopnamake.
Yehuda mutuku talibuka unyak ninye nirya arye, sik mutuku koproba batakanye. Winibuka batakikirye, ‘Malye ubuka unamabe,’ tenebuka unyakce, pia malye piluk talibuka unyake. Sik amutuku unyak nang nirya ap, sik aninye mitang asa arye dopropmanto ning, sik dam ton pia kume. Yata ninye do, ‘Minopce wektinye’ tenen, weklinye bira, elce doproptue. ‘Sik ti opnamabe,’ tenenyak nang arye, warikuka antanap dongoptinga babye, sik aninye nirya arye, malye kanye boptinge.
Atalakuk, bisik balamik nang arye, sik imam nang ap, nabi nang ap ati, nyanmik. “Atam yangana meme! Aning, sik nong deice ara, bol pipmanto kum ning, pia malye ining aupmala ati, anang sik dam bana kume. Anggunda bindoplulume, nun dam yangana meme!” nyalamik. Tuba malye kum ulamik nang arye, ayupu nyalamika ati, amutuku talibuka ulamik nabi nang ap, imam nang ap nirya ara, Israel nang ulamik mutuku arye batakuka, bai sakuka bindobik. Yuk pera mutuku noutam arye, talye banauk ulamik. Talye banauk ulamik ara, yuk pera mutuku ulamik nang eibikce, sik ton nyalamik. “Anggunda nun lik ati, nun mutuku noutam ara, anggunda pia ouku mana kume. Nun mutuku noutam ara, dipkoprob kum unamlume,” nyalamik.
Allah Yahweh, elce, ‘Anye bira, ninye deiyok kibuka, ‘Naʼ tenen, nang Israel nang talibuka Raja unamleʼ tenen, wipdeiamuknye bira, nun mal olan nang arye tomobik. Nun Raja ati ara, nunce, ‘Kume, elda erebuka, nun deice tam atonun kiplyeba, nunda el amu tamuk unamabe. Elcuk kalekuka melinamsile. Winipsilyeura, yuk mutuku nang yala-yala nirya, sik noutam ubibya babye, telebuk unamabe,ʼ tenelamupu. Utenelamupu bukni, el babye, nun mal olan nang arye yanuka tomobik. Ara, ninye arye tuku pum tam weik bisik palibikceba, bai tam kam ning mangkau yangalamicak, atuku pum saklyeba tomolamak touk, tomobik.
Anang ara, ‘Bikbik abuka bibirye, lyepdanamap’ tenen, binamake. Bukni, winipmanto ara, na Allah arye sik ninye deiyoknye Raja, el youna ati, el si ara jala deipnamne. Ara, ikan dobuka ona ati atonun ning ara, kintinip deipnamne. Winipnirye, Israel yala nang, sik ninye deiyoknye, Raja bobuka, Babel mutuku dobuka bobinamap’ tenen, bisik binamake. Bukni, winipnamne talak ara, elti, tapu koubuka bobinamak mutuku, Babel mutuku ara, el asing arye kum eipnamle. Abinuka deipnamne mutuku noutamuk, dadipnamle.
Winipmanto ara, ninye arye maka tomona ati, el si jala bobikirye, maka webuka youlamak touk, narye anye biti, akunum youpnyeura, bobuka Babel mutuku bobinamake. Winipnamak talak ara, el wenena ati, el bobuka Babel mutuku noutam akunum deibikceura, narye elti, mikip arye wenepnamne. Deiyok ara, elce nati, pia teleb kum tenelamnuka ati, na nyamse yupu akunum yanipnuka ati, anye weik tonun wenepnamne!
Atalak nirya ara, yu ning tenen kanye ap, imun kanye bobuka, talima daksaknaba, malye yupu nyana ap ara, pia tuba-tuba yanganamle. Tonda, ton nang arye, ‘Se, kanye imun ning ton, asukum akunum upmale, asukum ton yanamle,ʼ nyabuka, talye yupu nyanamak bukni, aning nirya ara, talye-talye yupu nyabikiba, kekenamlume. Winipliba, anggun Israel yala nang arye, ‘Se, nabi nang ati, morobibiba, lengdar deice arye, teleb un ning ton eibikirye, nun melibuka lak nyapsitingʼ tenen, sikce morolbinamak bukni, aning babye, kum danamle. Tonda, aning atonun, imam-imam nang anggun deiyok nang ati, moronamlum bukni, sik imam nang babye, Allah yupu tuba kum peterenamsiyake. Allah arye, ‘Aning ara, wininamlume, aning ara, pia kum wininamlume,’ nyapdeiamsuk yupu ara, pia kum danamle. Atouk anggun ninye deiyok nang nirya ap, yupu bokolina deiyok nang ap babye, ‘Winibuka wininamlume,’ nyabuka, kum peterenamsiyake. Aning nirya, akunum sirya tunim apnamle
Israel ninye tuba malyeuk ucopura, pera mutuku ninye arye yakirye, Israel ninye aik dobikce, unyak mutuku noutam nirya, yanuka wariknamsiyake. Wariksikirye, parang ya arye opnamsiyake. Wariksikirye, anyasik-anyasik nirya antanabuka, domik keil poka noutam bublan botopdeiamik ning nirya, kat yo ap, besi ning ap arye domik ning nirya, uluplopnamake. Winibikirye, sik Israel ninye ayala-ayala nirya arye, ‘Aminyan talak ara, wininamabe, wininamabe,’ tenelamak ning nirya, kum daneipnamake. Ara, pera mutuku yin talin nang arye, Israel ninye nirya malye kibikirye, sik amu tam deibikcopura, sik nong deice ikin ning deibikirye, sik tenenyak ninguk, pil donamake.
Aning nirya, winipse ning ara, bikilina ati winipse. Winipse ning deiyok nong ara, ani. Ara, sik Israel ninye, sik deiyok nang unyakce, ‘Winiplulume,’ nyan nang ap, ninye deiyok nang, Raja nang ap, Israel ninye kum talinamake. Ara, keting tamun yupa weik noutam arye, urdemuk unamake. Tonda, atalak noutam, sik malye ning kum danana ati, kam ning dobuka, Allah dam arelyanganyak ning ap, Allah el si eren aik bana ap, Allah ap, ninye ap, ansinilina pil dona deiyok nang ap, aning nirya kum danamle. Israel ninye ara, urdemuk unamake. Tonda, talye ning ati, “Nun ni usulule,” nyabuka, Isa Mutuku Dongonye si eren ning babye, kum talinamake. Keting tamun yupa weik noutam arye, talibuka ukirye, mambul kanye bobuka unamake. Allah arye nyabukba, Hosea birye sekuk.
Tonda, Damsyik mutuku wekelban bisik bublan dam, kat ning el si besi beton arye, kintinibuka deiamik ning nirya ara, narye ulubuka bataknamne. Winipnyopura, amutuku arye dipdongobuka opnin banirye, mutuku si Awen mutuku tam nirya, obuka sirya dakdanamne. Aninye nirya opnamnarya. Tonda, mutuku si Bet-Eden mutuku noutam, ninye deiyok kibuka bululnye bira, opnamne. Tonda, mutuku si Siria mutuku unyak ninye babye, obuka wenepnirye, pera mutuku si, Kir mutuku nang arepneba, Kir mutuku bobikirye, wenen aik noutam binuka dipnamake. Nara, Allah Yahweh arye nyapdeipkine,” nyabukba, Amos birye kekebuk.
Anggun ap, anggun deiyoknye ap ara, Allah Yahweh arye bobuka, yuk mutuku nang unyakak ara, anggun walwal mutuku bobinamsiake. Tonda, anggun apu yapu nang babye, sik bikina kum mutuku bobinamsiake. Winipsiliba, amutuku noutam binuka umunce, amutuku nang sikce, keil ap, yo ap dobuka, ninye urasin atouk kibuka, ‘Nun ni aniʼ tenen, talye ning, isa si erelamik touk, anggun babye, atalye ning, isa si erenamlume.
Tonda, Allah Yahweh, elce anggunti, kanye deipsukce, teleb kipdeipsukba, anggunce deiplumba, dadeipdanin, yangalamunya ani, anggun mapu ara, pia weik, nukmanto kum ulamlume. Bukni, anggunce, Allah el nyabuk ning moubuka kum talipluma ati, anggun dam ikin ning arepsiliba, dopropnalume. Ara, ikin ning doropnamluma deice arye, anggun yala nang ara, mitik tonun upnin banamlume. Anggun yupa weik ulamunye ning ara, kum danamsile. Tonda, anggunce, ‘E amutuku wekibirye, talibuka teleb asa unamabeʼ tenen, binuka tia talak unamlum mutuku ara, Allah arye, tamubuka dopropnamsile. Amutuku noutam ara, weik kum unmamunye buk, tamubuka dopropnamsile.
Winibukba, Saul birye, Allah el si Yahweh ati, moron deice arye, “Naio, yata wiriptinye do?” nyabuka asipdeyuk. Asipdeyuk bukni, Allah arye elti, yupu tamubuka lak kum nyabuk. Tonda, ‘Yata wiripnaman do?’ tenen, dililamik ning, el si Urim aning ton dipdeyuk bukni, aning bisik arye, Allah arye yupu ton, laka kum nyabuk. Aning atonun, lengdar mana deice arye ton, yupu laka kum nyabuk. Tonda, aminyan winipnamuk ning, laka lena deiyok nang, Allah el nabi nang babye, Allah arye kum melibukba, anang arye Saul biti, yupu lak kum nyabik.
ကြော်ငြာတွေ