Ratapan 1:4 - Eipomek

⁴ Tonda, pia weik sum akunum dam uplye talak ara, ninye tonoknye babye, nun ni Allah, el aik dam kum yangalula atonun, ‘Sik mot nyanamak’ tenen, wipdeibik kam ninye nirya ara, malye kanye bobuka unyake. Tonda, Allah el aik siltong ning dobuka yayukba, uku dongonyak nang, sik imam-imam nang babye, ‘Se’ tenen, unyake. Sion mutuku weik bisik bublan noutamak, tonoknye tikuknye birye, pia bico kum tenepnamsile.

Ratapan 1:4 ပူးပေါင်းရင်းမြစ်များ

Yesaya 3:26

Winibiceura, sik Yerusalem mutuku, tuba kam unamak nang arye, anyasik domikce bukni, bisik bublan wekelbanak ati, weik keil poka noutam, bisik bublan potopdeibikak ara, kat ning besi arye, bublan el si, Pintu Gerbang dobik dam, bulubuka wekelbikirye, yupu weik arye malye nyabikirye, engenamake. Winipmanto ara, kilapu baju kwiripdobiceba, bananguk bukikirye, tuku deice bukuka engelamak atouk kibuka, anggun Yerusalem mutuku nang babye wininamlume. Ara, Allah arye wenepsilirye, ikin ning weik arepsilyopura, anggun babye, aning atonun kibuka, imun kanye bobuka, engenamlume. Allah arye, sik Israel yala nang nirya ati, ayupu nyabuk.

Yeremia 10:22

Wini talak anggun kekeplulume! Moubuka kekepmunce, anggun ton biknamlume. Weik lelim nyanmalak, kekenamaba ara ani. “Dabu tam arye (arah utara) unyak nang ara, kintinipmakirye, lelim weik nyanamake. ‘'Amutuku unyak yin talin nang arye, nun Yehuda tam unyap nang dam yakirye, nun weik asik dobuka, deiamupurye, aunyab mutuku nirya ara, yanuka kum kipdeipsikceba, din bulung unamabe. Tonda, amutuku nang ton pia kum upnamake. Nun mutuku nirya ara, asik oldem upnamsile. Winipyeura, nun mutuku ara, bai tam yu ulamle kam yanuka aunamake. Israel nang arye nyapnamake.

Yeremia 14:2

Weik kanye imun dou li maplirye, mek nirya kum uplye talak ara, Yehuda yala ninye, asik dobuka unyak mutuku nirya ara, dipmanto upnamake. Winipnyopura, amutuku unyak ninye nirya, weik kanye imun upliba, ikin kanye bobuka, tuku deice mabuka, ngalukunamake. Tonda, Yerusalem mutuku unyak ninye nirya arye, mambul kanye bobikirye, ‘Se, nun yanuka melipsilyame,’ nyabuka, malye nyanamake.

Yeremia 9:11

Allah Yahweh arye, ayupu ton nyapsuke. Anggun moubuka kekeplulume! Narye, anggun wenena ati, Yudea mutuku noutam nirya, ninye arye asik domikce ulamik mutuku nirya ara, uluplopniba, asik oldemuk upnamle. Ninye nirya wenepnirye, obuka sirya daknamna ati, amutuku noutam ton, pia kum unamake. Tonda, weik asik domik, Yerusalem mutuku babye, uluplopnirye, sice buklopnyopura, amutuku anyasik nirya ara, uluplopniba, tuku deice ara, keiluk upnamle. Tonda, amutuku noutam ninye nirya ara, kum kipdeipniba, ninye ton amutuku noutam kum ukcopura, bai tam ulamle yu kam arye, amutuku noutam yanuka, pia unamake,” Allah arye nyabuk.

Ratapan 1:21

Yuk daunyak nang arye, “Anye bira, imun kanye bobuka ulirye, engena dem ulule. Tonda, el melin nang ap, el kanye barin nang ap ara, pia kum unyake. “El yuk ulule,” nyabuka, lak nyabikba nati, ‘Nun like,’ teneninyak nang kekebikce, ‘E merekuka ikin weik ulule. Nunda kanye deibuka, unyabe,’ tenebikirye, pin-pin asa ulamike. Ati, na ni Allah ance onlyangasin nang ara, “Aminyan talak ara, narye ikin weik ning dobuka, anggun deice deipniba, imun kanye bon ning unamsile,” nyabuka, nyalin yupu deice akunum nyaplum ning ara, akunuma. Ati ara, adiparyuk ikin ning dobuka, nun mal olan nang ati, sik deice deipnulyame na nio! Winipminyopura, imun kanye bobuka, unamake.

Ratapan 5:13

Nun mapu wel nang ara, gandum duk teikna pil ara, weik ikin ninguk dikceba, pil donyake. Tonda, nun mapu wel nang ara, uku dan yo ati, weik yo koubuka tomolamicak, sakuka oplyeba mitang ulule.

Ratapan 5:14

Nun tam wisi-wisi nang ara, ton ap weik asik dobuka, tiriklamupu bublan dam ara, mambul yupu sisikna ati, pia kum kukuka wekelbanyake. Tonda, anyasik noutam ara, nun tam wel nang arye, bung-bung ana oceba, lelim nyaplyeba, mot ton nyanmakcebuk, kum kekenyabe.

Hosea 2:13

Aning nirya winipnamna deiyok ara, urdem ati kum winipnamne. Ara, asum-asum nirya, kam kum ulul ning, Isa Mutuku Dongonye el si Bahal atibuk, “Nun ni koprop,” nyabuka, el si erebikirye, siltong teleb ning boyakirye, uku dongobuka, el siuk eremunya ati, wenepnamsine. Tonda, amul potokuka dongolamak ning, el si ara, anting-anting ap, tonda karaklamak ning kalung ap nirya dobuka, ‘Nun tenenyap nang arye, urasin teleb kilapu tenenamsiyak’ tenen, ‘Nun tenenyap nang dan tam do?’ tenen, pia elbanyaka ati, Israel ninye wenepnamsine. Isa Mutuku Dongonye, el si Bahal, el siuk erebikirye, na Allah ati, batakaninyak dekna ati, na Allah Yahweh arye wenebuka opnamsine. Allah arye nyabukba, nabi Hosea kekebukce sekuk.

Imamat 26:22

Na Allah arye, bai tam pia yu ulamle ning, kam ning nirya dobuka deipneba, anggun dam olyanganamsiake. Aning boyakirye, anggun mapu weika tonun, yanuka obuka sirya daknamsiake. Tonda, anggunce talibuka weinamlum ning ayala-yala nirya, yanuka obuka sirya dakanamsiake. Atonun, anggun wisi nang babye onamsiake. Winipsikce bukni, ninye weik dibikcopura, anggun yupa ara, mitik tonunuk unamlume. Ninye weik dibikceba, kum danin bacopura, anggun unamlum mutuku nirya babye, anggun banalun bisik babye, dipdemunyeba, talye louk uplyeba, banmamunce eipmunba, yuk-yuk ning kum dalya arye, amutuku nirya ara, din bulanguk, walang yo uk unalume.

Mika 3:12

Ati, na nabi Mika birye nyapsine. Anggun weik malye winimunye ati, Sion mutuku ara, tuku palibuka, wa win dam atonun upnamle. Ara, Allah arye lo arepliba, Yerusalem mutuku noutam asik domik ning nirya ara, yuk mutuku nang arye yanuka, uluplobikiba, asik oldem upnamle. Winibikirye, Yerusalem mutuku noutam ulul asik nirya ara, uluplobikiba, sice butbuta atonun upnamle. Amutuku noutam dolamik asik nirya ara, kum danamle. Winiplyopura, aminyan talak yo mutmuta paplirye tiklyopura, talye bai mutuku atonun upnamle. Allah Yahweh, el si eren aik amutuku deice ulul bukni, aminyan talak, anyaik babye uluplobikiba, kum danamle. Amutuku deice ara, talye yo mutmuta palamla atonun upnamle. Na nabi Mika birye, anggun amutuku deiyok nang ati nyapsine.