Ratapan 1:1 - Eipomek1 Minop talak ulamik mutuku nirya ara, kanye deibuka, kil-kil asa arye teleb ubuka ulamik. Bukni, wini talak unyap Yerusalem mutuku ara, asik ol dem ubuku ati, wini talak ara, langapdongobuka, namin asa arye unyabe. Minop talak ara, mutuku nirya teleb asauk ulamik bukni, wini talak ara, youwak kilapu ulamak touk unyake. Minop dorapce, dib dongobuka, upra yangalamupu nirya ara, pia teleb bukni, wini talak tuba malye updeibik. အခန်းကိုကြည့်ပါ။ |
Ratapan 1:1
38 ပူးပေါင်းရင်းမြစ်များ
Yoahas elce ninye deiyoknye kibuka, talipmok talak aryuk, Mesir mutuku ninye deiyok kibuka taleamuknye, Firaun Nekho, elce Yoahas tomobukabukce, Hamat mutuku noutam bukni, mutuku si Ribla mutuku noutam binuka, dobuka wenen aik pum tam deiamuk. Winibukopura, Mesir mutuku ninye deiyoknye, Firaun bira, Yehuda mutuku ulamik ninye ati, “Anggunda, na si erebuka kina ati ara, anggun dekna weik ning weik tonun, natibuk arepnamnulume,” nyapdeiamukce, sik deice ikin deiamukba, sik amutuku ulamik ninye nirya ara, aning dekna ati, arebik ning yupa ara, tiga ribu empat ratus (3.400) kilogram perak ap, tonda tiga puluh empat (34) kilogram emas ap, aning nirya boyanuka arebik.
Ura, Mesir mutuku taleamuk ninye deiyoknye, el si Firaun Nekho birye, Yehuda tam ulamik ninye ati, “Na si erebuka kina ati, deken ning weik tonun arepnamnulume,” nyapdeiamuk ning arena ati ara, Nekho birye wipdeibukba, Yehuda mutuku ninye deiyok kibuka talibuknye, Raja Yoyakim birye, Yehuda ninye ati, “Anggun yuk-yuk talibuka dekemunye ning nirya aulye touk, deken ning el si pajak ara, anggun bona nirya aupmasilye touk, bulubuka boyamunce, yanuka arepnunulume,” nyabukba, boyanuka arelamik.
Tonda, ninye deiyoknye Raja Salomo, elcuk Efrat mek lilun tam arye dipdongobuka, otam Pilistin ninye ulamik mutuku ninye deiyok nang nirya ap, anoutam nirya ara, Salomo birye taleamuk. Weik mek, Efrat mek arye dipdongobuka, otam Mesir mutuku wililonak noutam talebuka ulamik ninye deiyok nang babye el Salomo biryuk talebuka ulamukce, yupu nyalamuk.
Nun kele. Minop talak ara, Yerusalem mutuku ap, amutuku dana-dana mutuku ap ara, yuk-yuk dana-dana tam ninye deiyok nang yangalamikce, amutuku ninye nirya obuka, amutuku nirya ap, amutuku noutam tuba ulamik nang ap, taleamik. Raja nang ara, mikip pia weik ulamika ati, weik balamuk mek, el si ara, Efrat mek bukni, otam keting kumulban tam mutuku nirya ara, weik tonun taleamik. Sikce amutuku im sirya, mutuku sirya nirya talilamika ati, amutuku noutam ulamik nang nirya arye, pajak yo bok, yuk-yuk ning nirya bululamikce, sik ninye deiyok Raja nanguk arelamik.
Ton yuk nang ara nyalamik. “Nunda yuk nang uang yo bok ton tia ati dopropmapya ani, tuba aminyan tamubuka punupnamabe. Ayo bok ara, Nun ni koproba Raja arebibiba elce wa win tuku ap, anggur tapu duk wa win tuku ap ati, “Pajak yo bok ara, winibuka arenamnulume,” nyapsilye ning ara, nunce areptibye,” nyalamik.
Ara, nun kele. Nun pia malye weik winilamupa deice arye, wenesilyame. Atuku deice wa winyaka nirya ara, weik paplirye, weik arye nong uliba linyap bukni, nun talisinyak deiyok nang, yuk mutuku deiyok nang aryuk alubuka dolonyake. Nun wenena ati, ance adeiyok nang dobuka, nun deice nyapdeamsulume. Anang arye, sik tenebikce touk, nun ap, nun weinyap ning ap ati, mikip arye talisinyakce, ikin ning nun nong deice deilisinyake. Ati Nun ni Allah, aning-aning nirya ara, nun pia kanye imun usulule. Sik Lewi yala deiyok nang arye, ayupu nirya nyabikce, Allah ati morobik.
Se, Babel mutuku talibuka, ulamlum Rajanye, min talak ara ance, ‘Nara pia mambul weiknye ununa ati, nara bereknulye talak tikilyangalamle dirina weik kurya atonun unune. Tonda, nara beren tam talak keting panaplirye, dirina weik ulamle touk unune,’ tenyamlume. Bukni, Allah arye lo arebukba, yuk mutuku nang arye, an akunum opkikba, sakluma ati, wini talak ara, pia amu tamuk ulyame. Winipmanto ara, dirina weik kurya, im deice arye tukwak saktu ura, dirina kum uptue atonun, an babye akunum upkuke. Minop talak ara, ance ninye mutuku sirya, im sirya ulamik nang nirya olamlum bukni, wini talak ara, Allah arye akunum opkukce, tukwak amu tamuk akunum pia deipkuke.
Winibiceura, sik Yerusalem mutuku, tuba kam unamak nang arye, anyasik domikce bukni, bisik bublan wekelbanak ati, weik keil poka noutam, bisik bublan potopdeibikak ara, kat ning besi arye, bublan el si, Pintu Gerbang dobik dam, bulubuka wekelbikirye, yupu weik arye malye nyabikirye, engenamake. Winipmanto ara, kilapu baju kwiripdobiceba, bananguk bukikirye, tuku deice bukuka engelamak atouk kibuka, anggun Yerusalem mutuku nang babye wininamlume. Ara, Allah arye wenepsilirye, ikin ning weik arepsilyopura, anggun babye, aning atonun kibuka, imun kanye bobuka, engenamlume. Allah arye, sik Israel yala nang nirya ati, ayupu nyabuk.
Nyapsicopura, anggun kanye noutam arye, tenipnamlume. ‘Amapu ara, yata nang arye, nunti deibuka arelamsik mapu arye nyanmasiyak do?’ tenenamlume. ‘Nun ni koproba Allah bataksukba, nun imun kanye bobuka ulamupu talak noutam ara, nun mapu nirya ara, min kum wamsuk do? Tonda mapu tonap deipmanto kum ati wamsuk do, kum do? Kume, nun mapu kum dayuka ati, kum deipmanto ulamsuke. Tonda nun pera mutuku noutam ulamupu talak ara, nun yuk bulamupa ati, amapu ara dan tam nang arye deiamik mapu yanmakce nyanmasiyak do?’ tenenamlume. Aminyan talak ara, anggun mapu weik upnin banamaka ati, ayupu nyanamlume.
Allah aning-aning talibuka deice tam Weik Erena Deiyoknye ululnye, Allah Yahweh arye, ‘Winipnamne,’ tenelye touk ulule. Elcuk nati, ‘Na yupu kekenamle’ tenen, bikina teleb kilinilirye, weik kel kina deiyok ning arenulule. Elce nyanilye yupu ati, pia batakna kum aniryuk, balye tam kibuka kum banune. Narye, Allah ati, ‘Na lik’ tenen, kum memelonune. Allah arye nyanilye touk aninguk wininune.”
Yerusalem ninyeo, anggun malye kanye bona ati, butbuta deice umunyeba butbuta palipsuk ning ara, kiliplopmunce, weik kota mutuku noutam teleb kibuka ulamak touk unamlume. Sik ninye deiyok nang arye, pia teleb bun ning deice bulamak touk, narye ereipsiniba, telebak unamlume. Tonda yuk mutuku nang arye, malye kipsikce, tapu kouamsik ninye, anggun Sion mutuku umunye ninye ara, anggun ngang dam tapu koubuka wenen aik deiamsikba bulalum ning ara, wini talak ara lopdalulume. Anggun Sion mutuku deice arye deiamsik ninye ati nyapsine.
Narye wipdeipniba, yupu laka nyanamak nang ara, anggun eipmunce kanye weik deipnamlulume. Anang ati, winibuka tenenamlulume. ‘Se, pia laka teleb yupu boyasice nang ara, sik tukwak bisik yanibuka teleb yupu boyanmasiyaka anya arye, sik yan babye pia telebe tenen, kanye delinyabe,’ tenenamlulume. Aning ara, mutuku-mutuku nirya bakirye, na laka teleb yupu laka nyapre banamake. Tonda, olana kumce, kanye talima dukdongobuka teleb una ati, yupu peterepre banamake. Tonda, ninye lyena yupu boyanamake. Ayupu nyalyanganamak nang arye, anggun Sion mutuku ululum ninye ati, ‘Anggun ni koproba Allah, aning-aning talibuka, weik deiyoknye Raja, Allah aniryuk talisilirye aulule,’ nyabuka nyanamsiyake.
Ati, anggunda ‘Yuk ninye arye, nalibuka malye nyapsikiba, alye upsilirye ilil unamsil do?’ kum tenenamlume. Imun kanye bobuka mitang asa kum unamlume. Alye kum dakalanamluma ati nyapsine. Atenen ning ara, adiparyuk bataknamlume. Winipmanto ara, anggun wel ulamlum talak arye, malye ulamlumba, alye ulamsuk ning ara, kekebuka kum dukdongobuka ulamlum ning ara, tuba tonap kum teninamlume. Tonda, sal arye kilapu domica ani, youwak batakiceba, mambul kanye bobuka ulamak touk, kum unamlume. Aning atonun ulamlum bukni, aning babye tonap tuba kum teninamlume. ‘Nun biyuk unyabe,’ kum tenenamlume.
Aning nirya ara, urdem ati kum nyapsine. Na Allah Yahweh arye nyapsine. Anggun Israel yala ninye nirya ap, yuk mutuku ninye nirya ap ara, anggun nirya kanye deibuka mot senamlume. Ara, anggun Israel ninye ara, narye pia teleb kipdeipnamsina ati, kanye deibuka, mot senamlume. Tukwak mutuku noutamak ara, ninye yala-yala weik daunyak bukni, weik mambul yala ninye ara, na mapu Israel nang unyake. Ati, anggunda mutuku-mutuku nirya daululum ninye nirya ara, weik yupu deice arye, kanye deibuka nyanamlulume. “Nun ni Allah, anda Yahweh ulyame. Ance, minop talak arye wipdeiamlum ninye, ‘Sik Israel ninye ayala-yala nirya, ton tuba kam aunyak nang ara, lyepnamlam’ tenen, moropkiyabe.” Ati nyapsine, anggun yuk mutuku ulamlum ninye nirya ara, Israel ninye ati, kanye deipmunce, mot sebuka, sik Israel ninye ati, teleb kilinamlulume.
Mizpa mutuku yayikopura, Gedalya birye, sik ayayik nang ati, nyabuk. “Anggunda, Babel nang ati, ‘Se, sikce talipsiktingba, nunda sik amu tamuk ubirye, sik pil melibuka winina ara, ‘Nun lik,’ tenena kume. Sik Babel mutuku nang malibuka pil dona ati, ilil tenena kume. Anggunda, nun mutuku asukumuk unamlum bukni, anggun nirya ara, Raja Babel, el amu tam pil don nanguk unamlume. Aning umunyeura, anggun nirya ara, teleb unamlume.”
“Naio, an asing arye elisilyame! Min talak ara, ninye weik ulamupu bukni, wini talak ara, nun mitik tonun tuba unamabe. Ati, wini talak mitik tonun tuba aunmab nang, nunce anti, moropnukabe. Ati, nunce nyapnukiab yupu ara, nun ni ance kekepsimince, an ni Allah Yahweh, an si erelyamnye biti, tenipsimince, moropsilyame.
Israel nang arye, ‘Nun ni koproba,’ nyabuka, sikce si erenyak Allah ara, na Yahweh arye nyapsine. Nara, im deice unyak yin talin malaikat nirya ara, sik deiyoknye ununa ati, na mikip weiknye birye nyapsine. Ura, anggun nirya moubuka tenipnamlume! Yerusalem mutuku ap, Yehuda mutuku noutam unyak nang nirya, sik asik dobuka unyak mutuku nirya ara, narye sik wenena ati, ikin ning arepsiba, imun kanye bobuka unyaka ara, anggun ton akunum elilulume. Wini talak ara, anggunce, amutuku tenipnamlume. Sik wenena ati, lo arepsiba, sik yuk mutuku yu nang arye, yanamikce, Yerusalem ap, Yehuda mutuku weik asik dobuka ulamik mutuku nirya ara, ulubukabikce, malye kibuka oplobikba, ton nang dibik, ton nang bobinamik. Ati ara, anggun mutuku koproba ara, oldemuk ulule. Ninye ton amutuku noutam kum unyake. Aning ara, na Allah arye ikin ning dobuka, sik deice deipseba, anggunce akunum eibuka biknamlume.
Ati ara, anggun malye ulamlum ning ati, na yu weik upnukba, wenen ning dobuka, anggun deice deipsise. Tonda, Yehuda mutuku noutam ulamik nang, sik asik dobuka ulamik sukum ap, Yerusalem mutuku, weik asik noutam ulamik nang, sik bisik yamikce balamikak nirya ara, na yu upnukba, amutuku nirya ara, obuka sice buklopseba, oldemuk ubuk. Winipmanto ara, ninye arye, uku sekikirye diplyeba, tuku nirya silal selamle atonun, wini talak Yehuda mutuku nirya, eibuka biknamlume.
Ura, min talak ara, Babel mutuku ulamik yin talin nang arye, yuk-yuk mutuku nirya ulamik nang ati, talye parapkabuka oltaklamik. Winipmanto ara, ninye arye, pakudakna ati, el si ara martalok, pakudaklamak touk, Babel nang arye, yuk mutuku nang nirya obuka, malye kibuka bataklamik. Bukni, min dakamik martalok atonun ulamik nang ara, sik martalok akunum bulaklopmake! Ati ara, wini talak ara, mutuku sirya, im sirya unyak nang nirya arye, Babel mutuku sik wenena ati, Allah arye winibuk ning kekebikcopura, ilil weik upliba, lukulanyake. Tonda, aminyan doupnamle talak babye, ilil upliba, lukulanauk unamake.
Allah Yahweh arye, ayupu ton nyapsuke. Anggun moubuka kekeplulume! Narye, anggun wenena ati, Yudea mutuku noutam nirya, ninye arye asik domikce ulamik mutuku nirya ara, uluplopniba, asik oldemuk upnamle. Ninye nirya wenepnirye, obuka sirya daknamna ati, amutuku noutam ton, pia kum unamake. Tonda, weik asik domik, Yerusalem mutuku babye, uluplopnirye, sice buklopnyopura, amutuku anyasik nirya ara, uluplopniba, tuku deice ara, keiluk upnamle. Tonda, amutuku noutam ninye nirya ara, kum kipdeipniba, ninye ton amutuku noutam kum ukcopura, bai tam ulamle yu kam arye, amutuku noutam yanuka, pia unamake,” Allah arye nyabuk.
Narye na kayapu koproba, nun neika unyap ninye ati, yukupniba, yanamak bukni, sikce na ati, ‘Nun like,’ nyabuka bataknamniake. Tonda, Allah el aik pil talibuka donyak nang, imam-imam nang ap, amutuku noutamak ninye deiyok kibuka, talibikce unyak nang nirya ap ara, amutuku bisik noutamakuk dipnamake. Winibikirye, tamubuka sik kam tuba unyak ati, din dina kumce, si tebuka, nati pia enamake.
Se, Allah arye nun Yerusalem mutuku ulamupu nang ati, pia yu ubukba wenepsuke. Winipmanto ara, Allah el yu ara, weik dua bum arye lilongolamle touk ubuka, nun dam yanuka lelipdongopsuba, pia alye usulule. Min talak Yerusalem weik asik ara, urasin pia teleb mutuku ulamuk bukni, wini talak ara, Allah arye amutuku ara, urasin pia malye kipdeibuk. Ara winipmanto, im deice pia teleb ning auptuba, im deice arye tukwak mutuku dopkweteptu atonun, pia amu tamuk deipsuk. Ara, Allah el yan dikdik sena uamuknye, aning ati, ‘Na like,’ tenen, bataktu atonun kipsuke. Deiyok ara, Allah aning-aning nirya talebuka, pia mikip weiknye birye, nun Israel nang ati, yu ubukura, uapsuka deice arye, amu tam nang atonun kipdeipsuke. Atalak aryuk, elce wibuka deibukba, el si erena ati dolamik aik ap, Yerusalem mutuku nirya babye bataksukce, pia el balye tam kepsuke.
Wini talak ara, Yerusalem mutuku unyak wisi-wisi nang, deiyok koubuka yupu nyasinyak ning ara, Allah el yupu talibuka, pil donyak nang arye, nun Israel yala nang ati, yupu nyasinyak nang nirya ara, atalak ara talye tunim abuka, tuku deiceuk bunyake. Aning ara, sikce, ‘Se, yata ning ati winipsuke do?’ tenen, ikin kanye bobuka, talima uk diplyeba, laka kina ati ara, sik anang arye, tuku bum dobuka, sik kisok deice deibuka unyake. Tonda, pia malye baju uk kinikuka unyake. Tonda, amutuku unyak wel kilapu nirya babye, Se, yata wiripnuyap do?’ tenen, sik urasin ara, tuku deiceuk luknupdongobuka bunyake.
Nun ni Allah, an ‘Naʼ tenen, nang, Israel nang ara, emas pereng-pereng alamle touk, pia teleb ulamik bukni, emas pereng-pereng alamle ning, urasin pia malye ulamle touk, anang babye, tuba teleb ton kum unyake. Aning atonun, Allah an si eren aik pum tam, moubuka deiamupu urasin pia teleb keil ara, nun mal olan nang arye, aning nirya dakuka batakikce, bisik bana ati, deiyok kounakuk yamubuka batakik. Aning atonun, nun wel nang nirya ara, nun mal olan nang arye, onauk ulamikba, sik nirya dana-dana tam, bai sakuka bindobik.
Min talak, nunda eren nang atonun ulamupubuk, nun mutuku ulamik nang arye, nunti si erelilamsikce, si erebuka kina ati, urasin teleb ning, nun kisok deice delilamsik. Bukni wini talak ara, nun babye malye una menenga arye, aning sakukba, nun dam ikin ning yayukba doprobupu. Ati, sikce nunti, kum si eresinyake. Akunum bataksike.
Aning nirya winiplyeba, eibikirye, bikikcak arye, mek kup-kup talibuka unyak deiyok nang, sik laut lilun unyak Raja-Raja nang nirya ara, sik weik bona talinyak ning batakikirye, sik ninye deiyok nang ongonyak baju, urasin pia teleb juba, kwiribuka bataknamake. Tonda, sik baju urasin teleb kibuka wiamikce ning ara, kwiribuka donokikirye, sik nong nirya, sirem taliplya deice buknamake. Atalak ara, sik ilil pia weik uplyeba, yupu nyana kumce, talye tunim abuka bukikirye, anggun Tirus nang, ikin weik upnamsil ning ara, eibikirye ‘Se,’ nyabuka ngaluknamsiake.
Anda, ninye tukwak nang arye deipkiknye, moubuka kekepnulyame. Tirus mutuku noutam unyak nang nirya arye, kanye weik deipmakce, Yerusalem mutuku nang ati, nyapnamake. “Se anango, anggunda bita dilulume! Ninye mutuku sirya, im sirya nirya, unyak nang arye, patalamuk bona dobuka, asukum arye, yuk pera mutuku weik tonun, dolkwetelamikba, dopromik. Yerusalem ara, dekna weik deiyok arye, yuk mutuku-mutuku weik donoklamikak bukni, wini talak ara, yuk mutuku yu yin nang arye, Yerusalem weik asik akunum ulubuka batakmakba, anyaik domik cang poka wekelban bisik bublan memamik bisik bublan ara, el si ara, Pintu Gerbang ara, akunum uluplobik. Ati, nun min arye talye lukparabuka, Yerusalem mutuku wektibye. Tonda, wini talak ara, sik dana-dana tam mutuku noutam unyak nang arye, nun Tirus mutuku unyabakbuk, yakirye, aning-aning nirya winibikceura, nunda bona talin nang unamabe,’ nyabik.
Na Allah Yahweh, arye aning-aning nirya talibuka, deice tam erebuka, mikip weik ununye birye, anggun Israel yala nang ati nyapsine. Dinamalume, Yerusalem mutuku weik, asik domlum ning ara, aubuk buk, amutuku dana-dana tam nirya ara, yuk-yuk mutuku nang ton aunyake. Narye Yerusalem mutuku kintinip deipsirye, yuk mutuku dana-dana antanap dongobuka unyak nang ara, naryuk kintinip deipse.
Tonda, anggun umunye asik, kota noutam nirya, anggun aik weik domluma nirya ara, narye malye kibuka uluplopnirye, kum kipniba, talye louk kipdeipnamne. Anggunce, teleb sukum teneplumce, domba basam ato ning opmunyakarye, isa si erena ati, arelulumak nirya ara, narye daklopnamne. Tonda, na si erena ati, arelyanganamnulum ning nirya ara, arepnutuma babye, narye siltong kum kekenirye, dipkoprob kanye deibuka, kum dolonamsine. Aning ara, batakniba, talye daupnamle.
Aninguk kum bukni, anggun Israel nang arye, nati, ‘Elda nun like ati, elce nyapdeipsuk yupu ara, kum kekebuka talinamabe,’ teneplumce, na yupu tuba yaniplopnumunyopura, na Allah arye, anggun unamlum mutuku nirya ara, olana deiyok ning arepnyeba, yuk mutuku yu weik yin talen nang arye, sik parang ya ap, olan ning nirya ap bobikirye, anggun dam yanuka, obuka sirya daknamsiake. Obuka sirya daksikirye, anggun nirya tapu koupsikirye, anggun babye, pera mutuku bobinamsiake. Aning winipsikcopura, yuk pera lo mutuku yu nang arye, anggun Israel nang ara, dana-dana tam mutuku bobinamsiake. Atalak noutam ara, tonok mutuku ak, kum unamlume. Dipkoprob, malye kanye bonamlume. Malye kanye bopmunce, yuk mutuku ninye asik nang ulamak touk unamlum talak ara, anggun wa windam nirya babye, malye kipdeipnamsine. Tonda, anggun unamlum asik, weik kota mutuku nirya ara, batakmunyeba, talye louk uplyeura, dimbulanguk, walang yo uk upnamle ati, nyapsine.
Minop talak, Niniwe mutuku noutam ara, ninye weik bulubikce, weik asik dobuka ulamikce, maknya kintinipdanuka ulamik. Sikce nyalalamik, “Kume, nunda, pia teleb aryuk unyabe. Nunda, pia dakeiam asa unyabe. Yuk mutuku nang nirya ara, kum olyanganamsiaka ati, nunda amutuku nun yuk unyabe. Nunda pia weik asik dobupa atonun, yuk mutuku nang nirya ara, nun teleb weik asik atonun ton, kum doptinge,” nyabuka nyalalamik. Winibuka nyalalamik bukni, amutuku pia teleb asik weik awamuk ning ara, wini talak ara, dan sukum ton ulul do? Niniwe mutuku weik asik domika ara, wini talak akunum kum dayuke. Talya bai tam kam ulamle ning, yala-yala nirya, ilil tenena kumce, talye mangkau arye, amutuku bulubuka wekelbikirye, dikdik senyake. Yata nang do nirya, amutuku bisik banamak nang ara, asik oldem ubuka ati, amutuku eibikirye, ‘Se, amutuku ulamik nang, yata deiyok ati, Allah arye, obuka sirya dakuk do?’ tenen, ilil upnamle. Allah arye, ayupu nirya nyabuk.
“Minop talak Babel mutuku ninye arye bona uto-uto talin ning ap, dekna weik ning ap, weik dololamikce arilalamikba, nukmanto kum ulamuk. Bona talin nang weik ulamikba, yuk mutuku ninye arye, ‘Se, sikda pia telebuk unyake,’ tenelamikce, amutuku ninye ati si erelamik. Ati, bona talin nang weik ulamik touk, wini talak ara, Allah arye kanye imun ning pia weika arye, sik nong deice deipliba, pia weika arye engebuka donamake. Babel mutuku unyak ninye sik talima pum tam ara, utenyake. ‘Kume, sik youwak kilapu arye, malye kanye bobuka engelamak touk, kum unyabe. Nunda weik ninye deiyok nang, Raja nang arye talye kanye bobuka pin-pin asauk ulamak touk pia unamabe,’ tenelamik. Winibuka tenelamik bukni, wini talak ara, Allah arye sikti, weik arye wenepnamle.
ကြော်ငြာတွေ