Tonda, anyaik pil deiyok koubuka dopnamik talak ara, Daud birye sik Israel yala nang nirya ati nyabuk.” Dipkoprob nyapsine. Anggun ni koproba Allah ati, anggunce el si erelulum Allah Yahweh ara, anggun Israel nang ati akunum pia melisulule. Allah arye mikip areyamnuka deice arye, narye deiyok koubuka, nun ap dana-dana tam unyak nang ap, nun mal olan nang nirya ara, akunum olbinamupa deice arye, anang yuk-yuk ning nirya akunum malye kibuka sirya dakupu. Ati wini talak ara, sik ap, yuk yala nang nirya ap, olana kumce, teleb ubuka namin aryuk dakeiam asa unamlume. Allah el taruk deice arye, amutuku noutam nirya ara, neika kipdeipsukce, akunum teleb kipdeibuka ulule. Tonda, amutuku nirya ap, amutuku noutam ulamik nang nirya ap ara, Allah Yahweh ap, elce wipdeiamsuk Israel nang nirya ara, anggun amu tam kipdeibuk.
Rasul 9:31 - Eipomek31 Winibikce, aminyan talak, sik Yudea tam ap, Galilea tam ap, Samaria tam ap, Yesus diba tenebuka ulamik nang ara, sik diba tenena kum nang arye, ikin ning kum delilamik ati, teleb kanye bobuka ulamik. Atalak ara, Allah El Dib Kanye arye, Yesus diba tenelamik nang nirya ati, sik kanye talima mikip kipdeibukce, melina ati teleb yupu nyalamukce sik talima kwa dilamuk. Yesus ati diba tenenyak ninye nirya ara, ‘Se, nun ni Allah weik mambulnye ulule’ tenen, elti, kibuka el si erebuka ulamikce, ‘Malye winibibiba wenepsilyak’ tenen, pia kanye moubuka ulamikce, Allah ati ilil ulamuk. အခန်းကိုကြည့်ပါ။ |
Rasul 9:31
56 ပူးပေါင်းရင်းမြစ်များ
Bukni, pia dipkoprob winipnamkin ning ara, ani. Ance sal deipnamlame. Anye bira, pia namin arye dakeiam asa unanye unamle. Elda yuk nang ap yu upliba kum olanamake. Tonda, na Allah arye elti, pia melipniba, elti, mal olan nang ara, dana-dana tam mutuku nang ara, el dam kum olyanganamake. Aning wininmale ning deiyok ara, el si Salomo nyanamake. Tonda, na Allah arye arepnyeba, an mi Salomo birye, deiyok kibuka Israel nang talipnamle talak noutam nirya ara, elcuk yupu nyalamliba unamake. Tonda, na Allah arye arepnyeba, dana-dana tam unyak nang ap, Israel nang ap, mal olana kumce, namin arye teleb kibuka neika unamake. Salomo birye talibuka yupu nyapnamle talak nirya ara, olana kumce, telebuk unamake.
Na weiknye Gubenur min kum wipdeiamnik talak ara, yuk ninye deiyok nang amutuku taleamik. Aninye deiyok nang arye, amutuku ulamik ninye nirya ati, sik nong deice ikin weik ning delilamikce, “Sik uang perak yupa tonok keba obarye, empat puluh (40) arenamsulume,” nyabuka ubula dolamik. Tonda, “Din ning aning-aning nirya ap, anggur mek ap tabakuka arenamsulume,” nyabuka ubula dolamik. Nara, Gubenur min kum ulamse talak ara, amutuku talibuka ulamik ninye deiyok nang ap, sik amu tam pil melibuka dolamik nang, pegawai nang ap arye, winilamik bukni, nara aning atonun ton pia kum winilamse. Aning nirya kum winilamsa ara, talye ati kume. Teleb ubuka ulamse deiyok ara, na ni koproba Allah ati, pia ilil tenelamse ati ara, ato ning malye winin ning ton pia kum winilamse.
Narye ayupu ton dukdongobuka nyapse. “Anggun amutuku umunce, pil domunye ning nirya ara, pia dipkoprob ton kum winilulume. Malye uk winilulume! Ati anggun kam unamlum talak nirya ara, adiparyuk Allah ati ilil tenebuka unamlulume. Aning kum winipmunyopura, nun mal olan nang arye tenenamsiyaka ara, ‘Allah ara, kum ulule,’ tenebikirye, ‘Sik Yahudi yala ninye ara, talye unyake’ tenen, nalinamsiyake.
Allah arye, nun tukwak mutuku unyap nang nirya ati, nyasulule. “Dipkoprob, weik kel bikna deiyok ning ara, ani. Ara, anggun ni koproba Allah, el si Yahweh ati, ‘Se, elda pia mambule,’ tenepnulumce, nati ilil unamsile. Tonda, Allah arye, “Teleb winin ning ara, aniʼ tenen, kel bikin ning bukni, el nong noutam ara, ani. Ara, yata malye winin ning do nirya, anggunce aning bataklumce, anang dam arye kisik dakuka, yukak bimunyopura, kel weik nang unamlulume,” nyapdeipsuke. Ayupu nirya ara, Ayub birye, el kwit capu sik winilye nang ati nyabuk.
Yata nang do nirya, sikce, ‘Kume, Allah arye nyasulul yupu atonun kibuka, pia teleb wininamne. Pia teleb, weik kelnye wininamne,’ tenenyak nang nirya ara, minop weik mambul unamak ning ara, ani. Ara, Allah ati, ilil tenebikirye, elce nyasulul yupu moubuka talinyakce, dobolbanamake. Wininamaka deice arye, weik kel nang unamake. Allah arye, “Aning ara, wininamlume. Aning ara, pia kum wininamlume,” nyapdeiamsuk yupu moubuka talikirye, dobolbanyak nang ara, yata ning do nirya, nong noutam ning moubuka tenebikirye, telebuk wininyake. Dipkoprop teleb ning ara, ninye tukwak nang nirya arye, Allah ati, “Anda pia telebuk ulyame,” nyabuka, el si erenauk wininamake. El si erena ara, pia kum batakanamake.
Se, na nio Yahweh, ance nunti, ‘Aning ara, wininamlume. Aning ara, pia kum wininamlume,’ nyapdeiamsulum yupu ap, ‘Teleb winina ati, ban bisik ara ani,’ nyapdeiamsulum ning ap ara, ‘Ance peterepniminba, bita kel biktinye’ tenen, patapnil ati, moropkine na nio. Ara, talye kekena ati kum bukni, deiyok ara ance, “Dipkoprop diksukum winin ning ara, ani,” nyasilyam yupu, ‘Narye aninguk talibuka, dip ninguk winiptinye’ tenen, patapnila ati, moropkine na nio. Ance na kanye noutamak pil dopnutuma deice arye, na teniltona kumce, na kanye talima nirya tonok keipniminba, an deiceuk deipkinirye, antibuk ilil tenebuka, an amu tam unamne.
Weik ikin yupu nyapnusin ning ara ani. ‘Weik kel bikna deiyok ning, moubuka tenepnirye, telebuk unamne’ tenen, patalul ninye ara, minopce nun ni koproba Allah, el si Yahweh ati, ‘Elda pia weik mambulnye’ tenen, ilil upliba, el siuk erebikirye, el amu tamuk unyake. Bukni, kanye bona kumce, pia walwal asa unyak ninye ara, diksukum un ning nirya ati, ‘Nun like,’ tenenyake. Sikce pia weik kel bikna deiyok ning ap, tonda talye mangkau asa una kum bukni, ‘Malye ubipyak’ tenen, moubuka tenebikirye, diksukumuk un ning ati, ‘Nun like,’ tenenyake. Ara, pia walwal uk unyak ninye ati nyapne.
Tonda, anggunce yuk ning pia malye-malye unyak ninye ati, ‘Se, sik aninye wininyak ning ap, sikce talinyak ning nirya ara, na ton taliptinirye, sik wininyak atonun winiptinye,’ tenena pia meme. Aning ara kum wininamlum bukni, anggun na mapu nirya arye, nun ni Allah Yahweh ati, ‘Elda weik telebnye ulule’ tenen, el tibuk ilil tenebuka umunce, el siuk pia erenamlume.
Allah Yahweh ati, ilil upliba, el siuk erenyakce, el tam uk si erenyak ninye nirya ara, ‘Malye winin ning nirya ati, nun like,’ tenekirye, batakanyake. Nara pia weik kel bikna deiyok ning arena deiyoknye ununa ati ara, narye, ‘Aning ara na like,’ tenenun ning ara ani. Ara, malye winin ninguk, talibuka unyakce, sik talima erelanyak ninye ap, erepdanuka kwalibuka kwalina deice uk unyak ninye ap, tenen arye malye yupu nyaltakanyak ninye ap, malye ning ayala-ayala nirya, talibuka unyak ninye ap, sik nirya ati, yu uniliba, ‘Na pia like,’ tenenune.
Allah arye tenyamuk talak akunum kiplyopura, Daud birye deibukba, deipdanin yangalamikca ani, deibikceba, aminyan talak Raja kipnamlanye biti, im sirya, mutuku nirya unamak nang arye, el tibuk dinamake. Sik im sirya, mutuku sirya nirya, unamak nang nirya ara, el anye ulamlyakuk yakirye, ‘Se, anye nun ton biktibyeʼ tenen, el dam yakirye, el tibuk, si erenamake. El anye unamla ak ara, pia telebuk upnamle ati, ninye mutuku sirya, im sirya nirya eibicopura, ‘Se, el ulyak ara, pia telebe,ʼ tenenamake.
Allah arye anggun Israel mutuku ninye ati melisilya deice arye, pia teleb kibuka unamlume. Ilil una pia kum diparyuk, kanye lamapdongobuka unamlume. Elce arenamsila deiyok ning ara, mitik tonun kum bukni, pia weika arye arenamsile. Ara, ninye lyena deiyok ning ap, aning nirya kel kina deiyok ning ap, ‘Wininamaba,’ tenebikirye, dipkoprob una deiyok ning ap arenamsile. ‘Aning nirya doproptibnye,’ tenepmunyopura, anggun ni koproba Allah Yahweh atibuk, ilil upsiliba, el siuk erebuka kisal donamlulume. Winibuka umunyopura, aning nirya arenamsile. Kumopura, kume.
Nyabukce ayupu ton nyabuk. “Ura akunuma, tonok yupu ton nyapnusine. Allah yupu ara, Allah el kanye aryuk nun bico ati, talye melisulul yupu ara, ayupu mikip deice arye anggun talima darapdongobuka talipsilirye, talima wisipsilyopura, Allah arye kintinipsuk ning dopdopnamabe. Ara, Allah arye kintinibuka wibuka deiamuk nang nirya, ara, anggun nang babye, Allah arye kintinipdeibuka arepnamsil ning ara, nun adib tenenyap nanguk dopdopnamabe. Ati ara, Allah ap, Allah el yupu mikip deice ap arye, sikcuk anggunti ‘Melipnamsirak’ tenen, anggun nong dobuka Allah arepsine.
Ura, Allah yupu pia peterelamikbuk, Yerusalem mutuku ulamik nang weik tonap kekelamikce, dib tenebuka tabaknin balamikce, minopce yupa weik uptabaknin balamik. Tonda, sik Yahudi yala nang, sik Allah ati arena deiyok nang Yesus peterelamuk yupu, ninye lyena ati laka teleb yupu kekelamikak arye, ninye weik tabaklamikce, Yesus el yupu talibuka dobolbalamik.
Stefanus obik talak ara, tonoknye el si Saulus mening dam tikuka dinmokce, ‘Anye opmaka ara, merekuka opmake,’ tenebuk. Stefanus obika deice arye, adiparyuk Yerusalem mutuku noutamak bukni, dib tenena kum nang arye, Yesus ati dib tenelamik akarye, bulubuka weklamik nang ati, sik nong deice ikin ning weik delilamik. Winilamikopura, sik diba tenelamik nang arye, ‘Anang ara, olyasicak’ tenen, Yudea tam noutamak ap, Samaria mutuku noutamak ap, bik-bik abuka biyik. Anang bik-bik abuka biyik bukni, Yesus elce wibuka deiyamuk nang, 11 Rasul nang ara, sik yukak kum bindobik. Anyuk ulamik.
Ayupu nyapmasina deiyok ara ani. Diba tenebibiba, Allah arye nun kanye talima talisiliba, el yupu kekebuka dobolbanyaba deice arye, weik mambul usilye ning ara, din ning ap, mek ap, talye luparabuka dina meme. Aning ara kum bukni, weik mambul ning ara, Allah El Dib Kanye melisilya deice arye, diksukum una ap, ninye yuk nang ati, bico tenena ap, tonda ninye ati pin-pin asa arye kanye deibuka kanye lamapdongobuka arye neika una ap, anirya ara weik mambule.
Anyapmasin yupu nirya ati ara, ayupu ton nyapnusine. Asum-asum nun nirya arye, ‘Yata teleb ning winiptibyeba, nun diba tenenyap nang nirya arye, kanye deibuka namin asa arye neika unamap do?’ tenen, pia pi dobuka pirilenamlulume. Tonda, anggun nirya arye, ‘Telebuk winibirye, nun kanye talima kwa dipdabiba, nun kanye talima ap, nong ap nirya ara, wisipnamsil’ tenen, pirilenamlulume.
Ura, na Paulus arye anggun Roma mutuku noutamak diba tenebuka ululum ninye nirya ati nyapsine. Allah el melisilya deice arye, nunce elti, ‘Dipkoprop teleb kipdeipsilirye, lyepsilyopura, pia melinamsile’ tenen, kintinibuka dinauk unyabe. Anggun Roma mutuku ninye ati, Allah morosunun ning ara nyapnusine. Ara, anggunce anggun kanye talima el deiceuk deipmunce, diba tenelulumopura, atalak Allah arye anggunti, mambul kanye bona kumce, kanye deibuka teleb winina deiyok ning ap, pin-pin una deiyok ning ap, ‘Weika arye arisiliba, anggun talima pum tam langdinamsil’ tenen, na Paulus arye anggun Roma mutuku ululum ninye ati Allah morosunune. Tonda, anyapmasin ning ara, Allah arye el Dib Kanye arisiliba, el mikip deice arye melisilyeba, anggun Roma mutuku tam ninye nirya ara, ‘Dipkoprop Allah elcuk, teleb kipdeipsilirye, lyepsilyopura, pia ati melinamsile’ tenemunce, ‘Kintinibuka dinauk unamlum’ tenen, Allah morosunune. Na Paulus arye nyapsine.
Ura, Allah arye el Dib Kanye weika arye arepsukba, melisilya deice, Allah arye nunti bico tenesilye ning nirya, weika arye kel kipra babyeba, nun talima pum tam weik kibuka langdipnamsile. Allah arye kanye talima arisilya ati ara, ‘Allah arye dipkoprop melipsilirye, lyepropnamsile’ tenen, kintinibuka dinauk unyaba ara, talye ati kum unyabe. Allah arye dipkoprop lyepnamsila anya arye, amenyan talak ara, ‘Se,’ tenen, malye kanye bobuka kum unamabe.
Anyapmasina atonun, anggunce anggun ap neika ululum ninye ati, Allah El Dib Kanye mikip deice arye, yuk mutuku yupu diribuka nyapmunyopura, anggunce anggun bidamang nang ati, “Sikda, yuk mutuku ninye atonun unyake,” nyalanamlulume. Anggun Korintus mutuku ninye arye, ‘Se, Allah el pil dona ati, el mikip deice arye, pil dona deiyok ning aning-aning nirya arepsutue’ tenen, patasilibuk, ululuma anya arye, ayupu nyapsine. Allah dib tenenyak ninye nirya, sik talima kwa dina ap, mikip kilina ap, ati, moubuka kel biknamting ning uk, ‘Allah arye, apil dona deiyok ninguk arepsutuba, nun neika unyap ninye ati melimdatibye’ tenen, pia patasiliba, unamlume. Yuk ninye ati kum melipmanto ning ara, patana kume.
Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Anyapmasin yupu nirya ati ara, Allah yupu keken aik binuka, el si ati erenamlum talak ara, “Teleb winin ning ani,” nyabuka kel bikna ati ara, ‘Yata nyaptibye do?’ tenena kume. Aning ara, nyapnusine. Anggun bulubuka Allah yupu kekenamlum talak nirya ara, anggun nirya yuk-yuk bukni, tonye bira, Allah arye, elti, aribuk mot nyapnamsile. Tonye birye, “Diksukum una ati, winibuka unamabe,” nyabuka peterenamsile. Tonye birye, Allah el yupu duknyamuk bukni, anye biti lak nyabukura, kel bikuk ning ara, anggun kekena ati Allah duknyamuk yupu nong noutamak ara, lak kibuka peterenamsile. Tonye birye, el kum kel bikamuk bukni, Allah El Dib Kanye arye, areplibuk yuk mutuku yupu deice nyapnamsile. Bukni, elce peterepsilyopura, tonye bira, Allah El Dib Kanye arye, “Ayupu nong ara, ani,” laka nyabuka melipsilyopura, ayupu kekebuka kel bikilinye birye, “Ayupu deiyok ani,” nyabuka, ayupu lak kibuka laka nyapnamsile. Aning-aning nirya ara, deiyok tonokuk aupnamle. Ara, Allah dib tenena ninye kekebikca deice arye, ‘Sik talima kwa baribuka mikip kilinamap’ tenen, wininamlume. Yuk ton kume. Na Paulus arye, nyapsine.
Allah arye pil dona deiyok ning arepsuk ning ara anggun dib teneplum ninye ati, kanye talima kwa dibuka melina ap, peterena ap, talima wisilina ap ati, areamsukce, ‘Peterena deiyok nang unamak’ tenen, akunum wipdeipsuke. Ara, ‘Sik Korintus mutuku unyak ninye, sik nong deice ikin ning debibyeba, sik talima, uk dinamle’ tenen, kum pil donyabe. Allah arye apil dona deiyok ning areamsuk ning ati, kanye lon yupu nyaptinya babye, alye kum dakdanamne.
Ara, ayupu nirya nyapmasin talak ara, yata tenepmanulum do? “E, Paulus ara, ‘Ayupu nyapnyopura, telebnye tenepnamak’ tenen, nyapsine.” Yata tenepmanulum do? Kume, adeiyok ati kum nyapsine. Nunda, Kristus ap talima dukdongobuka unyabbuk, Allah arye nun wininyap ning nirya, dipdebuka yupu lipsisikuka bokeipnamsile ati, tenebuka arye talye kum nyaplopsine. Na kayapu. Na wininun ning nirya ara, ‘Anggun Korintus mutuku ninye anggun talima melipdanuka, mikip kilinamne’ tenen, wininune.
Adeiyok ati ara, na ap, anggun ap neika kum unyap talak noutamak arye, asurat deice nyapmasin touk, ayupu wenebuka sekeisunune. Tonda, ‘Na yupu kekebikirye, sik malye winin ning nirya bataktingopura, narye sik dam binuka unamap talak ara, nimalye aryuk utinyeba, talye kanye deibuka neika unamap’ tenen, ayupu atonun yupu sekuka surat dolkwetesunune. Nun Ninye Deiyoknye Yesus arye, ‘Na ti dib tenenyak ninye ati, deiyoknye unamle’ tenen, pil areamnuka deiyok ning ara, ‘Aripniba, elce sik dib tenenyak ninye ati, sik talima mikip kipdeipliba kanye talima wisipnamle’ tenen, arenulule. ‘Anggun nong deice ikin ning deiplibuk, sik kanye talima sukunamle’ tenen, pil dona deiyok ning arepnilibuk, kum pil donune.
Na kayapu, Allah arye nun nirya ati, ‘Wininamsine,’ nyabuka, arup nyapmasin yupu nyalilamsukba, aupmasila anya arye, yata malye winin ning ap, malye tenen ning ap do nirya, nun nong malye winisilye ning ap, nun kanye talima malye winisilye ning ap, adiparyuk batakibirye, diksukum ninyeuk unamabe. Ara, ‘Nun Ni Koprop Allah ara, pia mambule’ tenen, el si erena ati diksukumuk unamabe. Aning wininamaba ati, na Paulus arye nyapsine.
Aning nirya arepsuka deiyok ara, ‘Allah ati dib tenenyak ninye arye, teleb pil moubuka dobikirye, yuk dib tenenyak ninye ati, melibuka unamak’ tenen, arepsuke. Aning atonun, Allah dib tenenyak ninye arye, ateleb pil nirya donamaka deiyok ara, ‘Dib tenebikcopura, Kristus ap, talima dukdongobuka ubikirye, el nong tonok atonun unyak ninye nirya melipdakirye, sik kanye wisiplibuk, teleb ulilanamak’ tenen, apil dona deiyok ning yala-yala nirya donamabe.
Tonda, nun taruk ap, yan ap, nong deice upsuk ning, mil-mil arye, dukdongopsiliba, nun nong tonok aryuk, pil teleb ubuka dolamabe. Aning atonun, nun yuk-yuk unyap bukni, Kristus nun Deiyoknye nun talima talisilirye, el mikip deice arye, dukdongopsilyopura, nun pil yala yuk-yuk donyap deice arye, kanye talima arepdanuka melilanyabe. Wininyaba deice arye, nun kanye talima nirya wisisulule. Atalak noutamak nirya ara, nun nirya arye, yuk dib tenenyak ninye nirya ati, kanye dukdongobuka, bico tenepdabirye, melilanamabe.
Teleb pil donamak talak ara, tenebuka tilila yupu kum nyanamake. Dib yupu uk nyabuka, teleb kipdanuka pil donamake. Malye nang arye, yupu nyakibuk, yuk ninye kekenyakce, malye kanye bolamak yupu atonun yupu nirya ara, kum nyanamlulume. Aning kum bukni, anggunce yuk ninye ati, ‘Sik ikin upyle ning yata ning do? Yata teleb yupu nyaptinya deice arye, sik talima kwa diptinye do?’ tenepmunce, ninye talima kwa dina yupu uk nyanamlulume. Ara, ‘Na yupu teleb ubuka nyapnya deice arye, sik kekepnamake ninye melipnamne’ tenen, yupu moubuka nyanamlulume.
Bukni, anggun Yordan mek koubuka otam mutuku bimunyopura, Yordan mek otam ulul mutuku nirya ara, Allah el si Yahweh arye, amutuku nirya arepnamsile. Ara, Allah arye melipsilyopura, amutuku talibuka, pia unamlume. Amutuku wekuka unamlum talak ara, sik dana-dana tam unyak ninye, anggun mal olan nang ati, tuba kum tenenamlulume. Talye kanye bobuka umunce, dikdik sebuka, telebuk unamlulume. Ara, Allah arye melibuka talipsiliba, dakeiyam asa unamlume.
Na kayapu, Kristus ap, talima dukdongobuka neika umunye deice arye, anggun kanye talima noutamak melibuka kwa dibuka, mikip weik arisulule. Tonda, Kristus arye anggunti, bico tenebuka melisilya deice arye, anggun talima kwa disulule. Tonda, Allah El Dib Kanye anggun talima ak ulula deice arye, anggun kanye talima tonok kilisiliba, nimalye neika ansinibuka ululume. Tonda, anggun talima noutamak, bico tenelamunce, talima dukdongobuka ululume. Ululumce, nimalye teleb kibuka melilalulume.
Nunce anggun anang ati, ‘Aning nirya dolonamak’ tenen, Allah morosinyam ara, urdem ati kume. Deiyok ara, Allah arye, ‘Na mapu winibuka, winibuka diksukumuk unamake,’ tenesilye touk, dipkoprop aninguk talibuka, ‘Anggun unamlum ning nirya teleb ubuka unamlum’ tenen, Allah morosinyame. Tonda, ‘Wininamluma deice arye, Allah arye kanye delinamsil’ tenen, nunce anggunti Allah morosinyame. Winibuka winimunyopura, Allah arye kanye delinamsil ning ara, lilibuka nyapnusine. Ara, yata teleb winin ning nirya do, diksukum ninguk yala-yala nirya umunyebuk, teleb duk weik moupnin banamsile. Tonda, Allah ap, kanye dukdongobuka umunye ning ap, Allah winilul ning nirya ara, ‘Weik arye kel kipra banamak’ tenen, nunce anggunti Allah morosinyame.
Tonda, anang arye, talye-talye nukunyak yupu, minop talak nuklamik yupu atonun nuklamik yupu ap, nong kum upnamle yupu ap, sik apu yapu nang arye dadeipdanin, yangalamik akarye nyalamik yupu ap, moubuka talinyak akarye, ayupu uk kekenyake. Anang arye kekenyak yupu ara, talye yupu anya arye, ‘Adip aryuk bataknamak’ tenen, yupu sekenalyame nyapkine. Amalye yupu pia tenebuka talinyakce, ninye kanye wililakirye, yupu deice arye walakirye, yuk-yuk kilonyake. Allah el mapu nirya ati, bico tenebuka melina ap, teleb ubuka peterena ap ara, Allah diba tenen deice aryuk wininyaba anya arye, tilila yupu deice arye kum wininyabe. Ara, kum winipmanto, ati, atalye yupu nirya ara, ance yupu sekenalyame.
Bukni, Allah arye, aning nirya akunum ubukba, aminyan talak tonap, “Asum ani,” nyabuka anya arye, adeice arye kel kinyabe. Allah el mapu ati, dikdik sena kintinipsuk mutuku ara, tuba aulyeba, dolonamake. Ara, Allah arye like tekbarye deice arye, pil dopra balamuka ani, tekbarye sum akunum ubukba, dikdik seamuk touk, adikdik sena atonun ton, tuba aupmasile. Allah ati diba tenenyak ninye arye, adikdik senak weknamakca.
Winilamikopura, Allah Yahweh arye, Israel nang, sik apu yapu ati, “Winipnamsine. Ara, anggun amutuku bimunce, umunyopura, na mikip weik deice arye, erebuka talipsinyeba, anggunda amu tam upmunce, teleb asa unamlume,” nyapdeiamuk touk, sik nirya ara, telebuk ulamik. “Anggun olana ati, ton yakirye, min kum opnamsiyake,” nyapdeipmuk touk, telebuk ulamik. Ara, Allah arye, sik Israel nang deice mikip arebukba, sikce Kanaan mutuku ulamik nang nirya ara, olbisilamika deice arye, telebuk ulamik.