Rasul 6:10 - Eipomek

¹⁰ Stefanus el yupu dipkoprop nyalamukura, anang arye balye tam kibik akarye, ‘El yupu yanipnamap’ tenen, deiyok koubuka priplobik bukni, Allah El Dib Kanye Stefanus talima noutamak ulamuk arye, mikip weik kililamukura, weik kel ning melyamuka deice arye, Stefanus yupu teleb-telebuk nyalamukura, anang kum bisipmanto kibik.

Rasul 6:10 ပူးပေါင်းရင်းမြစ်များ

Ayub 32:18

Ara, na tenenun ning ara, pia tunim abuka, tuba kum unamne. Narye an dam nyapnamakin yupu ara, weik aupmanila ati, ayupu nirya ara, darapdongobuka kum uptinye. Na kanye talima noutam ara, ‘Aning nirya ara, adiparyuk lakak nyapnulyame,’ nyanulula ati, wini talak nyapnukine.

Ayub 32:8

Bukni, wini talak ara, akunum bikmane. Ninye tukwak nang ara, keting tamun weik ulamaka deice arye, kel weik nang kum unyake. Dipkoprob ning ara, nun tukwak mutuku nang nirya ati, kel bikna deiyok ning aresululnye bira, Allah el uka. Elda weik erebuka deice tam ulirye, aning-aning nirya talilirye, elda Mikip Weik Deiyoknye ulula ati, el Pia Teleb, Lek Dip Kanye, el pia mikip ulye deice aryuk, weik kel bikna deiyok ning arisulule.

Keluaran 4:12

Ati ara, wini talak binulyame. Ance nyapnamlam ning nirya ara, narye melibuka peterepkiniba, nyanamlyame,” nyabuk.

Yesaya 54:17

Bukni, dan ninye do nirya, ‘Israel ninye optibye,’ tenen, ninye on ning kintinibikirye, olyasiting bukni, kum winipmanto upnamake. Aning atonun, dan nang do nirya, anggun Israel ninye ati, ‘Malye kum winipmakibuk malye yupu sik deice nyapnuyabe,’ tenepnamsiyak nang ara, urdemuk unamake. Sikce nyanamsiak yupu ara, talye urdemuk nyanmatinga babye, nong kum upnamle. Tonda ayupu nyanamsiyaka deice arye malye kum kipdeipsitinge. Narye melipsiniba, anggun Israel nang arye amalye yupu talamak nang ati, yupu sekmunyeba, yupu kum asa unamake. Nara Allah Yahweh arye anggun Israel ninye ati nyapsine. Arup nyapmasin yupu nirya ara, na amu tam unamlum nang melipsiniba, dolonamlulume. Yuk ninye arye anggunti, malye yupu nyanamsiak bukni, na Allah arye anggunti pia melipsiniba, teleb upmunyopura, yuk mutuku ninye nirya arye, kel biknamake. Ara, ‘Se, Israel ninye ara, dipkoprob Allah el ‘Naʼ tenen, ninye unyake,’ tenen, kel biknamake. Narye dekna arin ning ara, pia teleb una deiyok ning arepsiniba, telebuk unamlume. Allah arye Israel ninye ati nyabuk.

Yeremia 15:20

Sik aninye noutamak, narye wibuka deipkinirye, talibuka melikiniba, mikip arye unalame. Winipmanto ara, pia kat ning, el si perunggu arye, cang poka dobikiba, kat ulamle atonun, anda sik aninye noutamak mandipna ilil kum asa unalame. Winipminba, sik aninye arye, ‘Anye bira, nun lik’ tenen, warikil yanganamkiyak bukni, kum opnamkiyake. Ara, talye ati kum nyapkine. Narye an damak unirye, anti melibuka lyepropkiniba, na amu tam unalame ati nyapkine. Na Allah Yahweh arye nyapkine ati, dipkoprob nong upnamle.

Yehezkiel 3:27

Winipnamkil bukni, yuk talak ara, narye yupu nyana deiyok ning, tuba tonap arepkiniba, tamubuka yupu nyaminyopura, narye mambul yupu ton arepkiniba, ance awenena yupu dobuka, sik Israel ninye ati, nyanamlyame. Sik ti nyanamlame. Allah el si Yahweh, aning-aning nirya deice tam talibuka, Weik Erena Deiyoknye ulula anya arye, elce, ‘Winipnamne,’ tenelul touk winilule. ‘Anye birye nyapnuk yupu ara, atia,’ nyabuka, peterenamlyame. Ayupu nyanamlam bukni, sik Israel yala ninye nirya ara, pia malye tenebuka, kanye talima kat nang ukirye, na yupu yaniltakan ninyeuk unyake. Ati, ton tam ninye ara, ance nyanamlam yupu moubuka kekenamake. Bukni, ton tam nang ara, na Allah arye nyapdeipkiniba, nyanalam yupu moubuka kum kekenamkiyake. Winibicopura, ance, ‘Anggun mandipna kanye boubuka, ninye yupu kum kekeluluma ara, bataklulume. Allah el yupu kekeplulume,’ an mikip asa arye, nyana kume. Sik kanye aryuk tenebikirye, wininamake ara, sik bidamnye daunamake. Sikda ninye yupu kekena kum unyaka anya arye, dawininamake. Na Allah arye, an Yehezkiel ati nyapkine. Allah arye nyapnuk.

Mika 3:8

Anggun tilila yupu peterelulum nabi-nabi nang ara, wininamlum bukni, na Mika bira, Allah Yahweh arye, nati bico tenenilirye, el Dib Kanye ap, el mikip ap areniliba, na talima pum tam weknilirye, langdinulule. Wininulula deice, elcuk nati, moubuka kel bikna deiyok ning ap, diksukum winina deiyok ning ap, dipkoprob kibuka, yupu lipsisikuka bokolina deiyok ning ap areniliba, moubuka tenepnirye, teleb diksukum winibuka unune. Wininuna deice arye, Israel ninye nirya ati, “Anggun malye winilulumce, Allah el yupu yanilulum ning ara, ani,” nyabuka, lakak arye nyanamne. Aning atonun, na ilil una kum kanye bobuka, adeice arye, Yakub elce deiamukba, dadeipdanin yangalamika ani, wini talak amutuku noutamak unyak ninye ati, “Anggun pia malye weik winilulum ning ara, ani,” nyabuka, lakak narye nyabuka delinamne. Nabi Mika birye nyabuk. Nyabukopura, ayupu ton dukdongobuka nyabuk.

Lukas 1:17

Minop arye, Allah yupu lak nyalamuknye, nabi Elia, Allah El Dib Kanye mikip deice arye, Allah yupu peterelamuk touk, ami neplyopura el babye, atouk wininamle. Yesus ara, aminyan yanamla ati, ami arye minop menekuka kintinilinamle. El ulya deice arye, sik Israel nang arye, sik mapu nirya ati, bico tenebuka kanye deibuka unamake. Tonda, sik Allah yupu yanibuka malye ulamice nang ara, ami el winilamlya deice arye, sik malye wininyak ning batakikirye ila tamubuka, Allah diba tenebuka, diksukum unyak nang weik kel arye unyak touk, Allah el tamuk kipropnamake. Awininamla nirya ara, Yesus arye talinamle ninye kintinilina ati wininamle.” Amalaikat arye ayupu nirya Zakaria ati nyabuk.

Lukas 21:15

Sik wenepnamsiak talak ara, narye weik kel yupu anggun kanye talima ak arepsinyeura, nyanamlum yupu ara, anang arye bisibuka yanipmanto kum winipnamsiake.

Yohanes 7:46

Wenebikbuk, ayin talin nang arye, “Kume, anye birye nyalye yupu ara, pia mambule. Yuk nang nirya ara, el nyalye touk pia kum nyalamsike,” nyabik.

Rasul 5:39

Bukni, sik awininyak ning ara, Allah mikip deice arye winilamiceura, anggunce anang ati kum sekdongoptume. Awininamak ning ara, Allah el mikip deice arye winilmatingtoura, aminyan talak, nun mankau arye Allah ati yanipmanto uptibye. Aning moupra tenepnamlulume.” Gamaliel arye ayupu nyabuk.

Rasul 6:11

Ati, anang arye yuk nang dam binuka dungnubikak arye, ‘Nyapnalume, nyapnamlulume,’ nyabuka yupu moupdeibik deice arye, anang arye Stefanus ati, “Musa sekamuk yupu ap, Allah ap ati, Stefanus pia malye yupu nyalamuka arye Allah si yanibuk anyak, nun kekebupe,” nyabuka talye kisikdeibik.

Rasul 6:9

Apil dolamuk bukni, aminyan talak ara, Yahudi yala nang Allah si erelamik aik si ara, Lipertini nang nyalamik aik weklamik nang arye Stefanus el yupu deiyok koubuka yanibik. Anyaik weklamik nang ara, Yahudi yala nang bukni, Kirene mutuku ap, Aleksandia mutuku ap, tonda Provinsi Kilikia ap, Provinsi Asia ap, atam nang arye el yupu yanibik akarye yupu weik nyanmek.

Rasul 7:51

Stefanus arye, Yesaya sekamuk yupu nyabukopura, ayupu tonap nyabuk. Anggun mandipna weik ninye ululume. Anggun talima ap, anggun amul ap, Allah arye nyasilye yupu pia kum kekelulum ninye ululumade! Anggun apu yapu ulamik touk anggun babye, winilulume. Ara, Allah Dib Kanye arye nyasulul bukni, anggun kum kekebuka dolomunyak arye yanilulume.

1 Korintus 2:4

Narye peterelamse deiyok yupu ap, peterena talak laka nyalamse yupu ap ara, pia teleb ubuka mikip arye peterepnibuk, ‘Na pia teleb yupu nyapnye deice arye, sik adiparyuk dib tenepnamak’ tenen, peterelamsise. Ara, anggunce tamubuka kum nyapmanto yupu ap, weik kel bikne yupu ap deice arye, kum peterelamsise. Aning kum bukni, na peterelamse talak noutamak arye, ninye nirya kekepmanto yupu peterelamsise bukni, Allah El Dib Kanye arye, el mikip deice arye, anggun talima noutamak pil dolamsukba, anggun moubuka kel bikamlume.