Rasul 6:1 - Eipomek1 Ura, Yesus yupu kekebuka dib tenebuka dobolbalamik nang weik upnin balamik talak arye, sik anang noutamak arye sik nirya Yahudi yala nang bukni, Yunani yupu nyalamik nang arye, Ibrani yupu nyalamik nang ati, malye kanye bolamikce derelamik. Deiyok ara, youwak kilapu melin ati bokuka asum-asum nirya arilamik ning ati ara nyalamik. “Ibrani tam youwak kilapu arenyak bukni, nun Yunani tam youwak kilapu ton, kum arisinyakce batakaldongosinyake,” nyalamikce dereldalamik. အခန်းကိုကြည့်ပါ။ |
Rasul 6:1
38 ပူးပေါင်းရင်းမြစ်များ
An oldan ninye ati, obuka bisipnalam talak ara, ance talilyamba, an amu tam unyak ninye nirya ara, sik kanye teniltona kum diparyuk, an dam yakirye, an ap, sik ap, neika ansinibuka, yuk mutuku ninye ati, olbinamlume. Winipmanto ara, lukunyan talak kurya dei sakuka, mutmuta deice palilamle atonun, asum-asum nirya, an amu tam unyak yin talin kam nang arye, ‘Nun ni ap, neika malye nang ati olbinamap’ tenen, an damak tuba-tuba yanganamake. Na Allah arye melisinirye, an amu tam, yin talin nang ap, an ap mikip kipdeipsiniba, an oldan ninye ati, mal olbinamlume.
Tonda, aninye deiyoknye birye, amutuku talinamle talak noutamak ara, Allah arye melilamliba, amutuku noutamak nirya ara, gandum wa pia weik panamle. Tonda, amutuku kon deice, wa wibuka koulamak gandum nirya ara, nong pia weik akunum uplyopura, kumanya yalirye pupliba, gandum bok nirya kamupliba dakalsakanamle. Tonda, sik amutuku noutamak nirya ara, sukun tuku uk unamle. Ara, Libanon mutuku, teleb sukun tuku ulamlaba, duk moulamle yo, ayala-ayala nirya, duk weik moulamle touk, nun mutuku babye atonun unamle. Amutuku noutamak unamak ninye nirya babye, yupa pia weika arye deibuka, tabakdabakibuk, aninye yupa ara, talye bai mutuku palamle mutmuta atonun, kibuka unamake. Winibuka unamak talak, sikce wa wibuka kounamak ning nirya ara, teleb kibuka papliba, libuka dinamake. Aning nirya, ‘Winibuka unamle’ tenen, Allah ati moronamabe.
Winipmunyopura, teleb ninguk winipra banamlume. Ara, diksukum un ninguk, kel bikra banamlulume. Ninye ati yupu lipsisikuka bokolin nang babye, diksukumuk nyanamlulume. Tenepce arye, tilila yupu nyabuka, kum nyanamlulume. Winipmunyopura, youwak kilapu do, kwaknamne mapu do, yuk nang arye, sik nong deice ikin ning delinamak talak ara, angguncuk lipsisikilinamlulume. Sik bidamang arye kum melipdanmanto ninye ati, melipnamlulume.
Doyanamle talak noutam nirya ara, sik Israel Anang arye, winipmanto, yo yating tukwak bilirye, ayo weik tonun neplirye, atukwak mutuku noutam nirya ara, duk pia weik tonun moulamlirye, tukwak mutuku, im sirya, mutuku sirya nirya, unyak nang arye dolonamake. Ara, Allah arye Israel nang ati, teleb kipdeipnamla deice arye, ninye tukwak nang, mutuku sirya, im sirya nirya ton, teleb kipdeipnamle.
Amutuku noutam unamak nang ara, pia kanye deibuka, weik yupu tabikirye, sikce nati, ‘Naio telebe,’ nyabuka, si erepnikirye, kanye kil-kil mot nyanamake. Narye sik teleb kipdeipniba, yuk mutuku nang nirya ara sikti, ‘Se, sikda dipkoprob mambul nang,’ nyabuka, si erenamake. Tonda, sik Israel nang ati, ‘Sikda malyeuk unyake, dauaplye,’ nyabuka, malye yupu pia kum nyanamake. Tonda, minop talak ara, ninye yupa ara, mitik kipnin balamik bukni, aminyan talak ara, narye sikti, teleb kipdeipniba, anang sik yupa ara, nukman kumto, pia weik upnin banamake.
Tonda, anggun Yerusalem mutuku ululum nang ara, anggun ni yapu ap, anggun nin yapu ap ati, ‘Telebe,’ nyabuka, sik yupu kum kekemunce, sikti kum kanye delilulume. Tonda, ninye asik nang, yuk karin mutuku arye yanuka, anggun mutuku noutam, sik ap neika ululum nang ati, ikin ning weik, sik nong deice delilulumba, ‘Seʼ tenen, imun kanye bobuka unyake. Tonda youwak kilapu ap, sik ni yapu dibikba kwaknamne mapu yanuka unyak mapu ap ara, anggun dam unyak buk, talye yupu nyaplopmunce, kum melilulume. Batakalulume.
Na Allah arye, anggun dam yanamne talak ara, talye ati kume. Anggun wenebuka yupu lipsisikuka bokolina ati yanamne. Tonda, na minopce yanamne talak ara, anggun asing keten nang ap, tonda kil talye-talye mal olan nang ap, tilila yupu nyana nang ap ati, ‘Anggunda dipkoprob malye winilulume,’ nyabuka, weik arye wenepnamsine. Aning atonun, bona utotoa kum nang ati, weik ikin pil arukikiba donyak bukni, dekna mitik tonun arinyak nang ap, youwak kilapu ap, kwaknamne mapu ap ati, sik ning ubula dolonyak nang ap, tonda ninye asik nang ati, deiyok kum upmalibuk, malye yupu sik deice nyanyakce, malye kinyak nang ap nirya ati, na yanirye, ‘Anggun malye weik ululume,’ nyabuka wenepnamsine. Deiyok ara, sik amalye-malye weik wininyak nang arye, nati ilil kum ulule. Sikce, na si kum ereninyaka ati, yanirye sikti, wenebuka oplopnamne. Na Allah Yahweh, im deice yin talin malaikat nirya, sik weik deiyoknye birye nyapsin ning ara, dipkoprob winipnamne, nyapsine. Allah arye Israel ninye ati, nyabuk.
Yesus arye ayupu nyabukopura, dukdongobuka ayupu tonap, nyabuk. “Farisi nang ap, Musa sekamuk yupu peterena deiyok nang ap ati, Allah arye wenebuka opnamsila ati, anggun bico,” nyabuk. Nyabukce, ayupu ton dukdongobuka nyabuk. Se, anggun Farisi nang ap, Musa sekamuk yupu peterena deiyok nang ap, Allah arye wenebuka opnamsila ati, anggun bico. Anggun talimak malye ning aupmasilibuk, ‘Teleb nang tenepnamsiyak’ tenen, teleb ning bola deiceuk winilulume. Anggun malye winimunye ning ara, nyapnusine. ‘Allah dib tenebibyeura, Allah arye nun dobuka nun talima talinamsilak binuyabe,’ tenenyak nang ara, anggunce yupu sekeldongolulume. Winiluluma ara, ‘Anggun aik weknuyap’ tenen, buplan dam ninye tikilyangaki bukni, yu upliba, mikip arye buplan tirikildongolamak touk, winilulume. Ara, ‘Allah ati, dib tenebibirye,’ ‘Allah talinamsilak weknuyabe,’ tenenyak ninye ati, yupu sekeldongoluluma ati nyapsine. Anggun babye dib tenebuka kum wekelulume. Tonda, ‘Nun dib tenebuka Allah talinamsiak wekenamabe,’ tenenyak nang ati ara, anggun Farisi nang arye winimunye ning deice arye, aninye ati yupu sekeldongolulume.
Saulus eibukopura, Saulus dobuka Antiokia mutuku tamubuka boyayuk. Boyayuka ati, Barnabas ap, Saulus ap, Yesus diba tenebuka talyamik nang ap, keting tamun tonok talak arye ton sum arye ton, ton sum arye ton nirya, bulubuka wekelamikbuk, sikce Antiokia mutuku ninye weik Allah yupu peterelamrik. ‘Yesus ulamuka atonun uptibye’ tenen, patalamukbuk piribuka kel kibuka diksukum ulamik nang ati, yuk talye ulamik nang arye, Antiokia mutuku arye deiyok kibikce, “Aninye ara, Kristen ninye unyake,” nyalamik. Ara, minop talak Antiokia mutuku nang arye, deiyok koubuka, “Anang ara, Kristen nang unyake,” nyalamik.
Akabus ayupu nyabuka ati, amutuku Yesus diba tenebik nang kekebikce, ‘Yudea tam diba tenebuka ulamik ninye ati, melipnamap’ tenen, sik yuk-yuk adeiamik touk bokuka arebik. Yerusalem mutuku Allah diba tenelamik nang, ‘Sik deiyok nang binuka arepnamdak’ tenen, Barnabas ap, Saulus ap, ati arebikura, abitinye nang arye aning dobuka Yerusalem mutuku binuka areprik.
Peterus arye awekmek nang ati ayupu nyanmok talak ara, ‘Dipkoprop nyanmasile’ tenen, kekebuka doprobik ninye ara, mek dongobik. Mek akunum dongobikopura, sik winiryuk dib tenebik ninye ara, min arye diba tenyamik ninye ap, tabakik. Tabakikopura, yupa weik kipnin balamuk. Asum deice arye tabakik ninye ara, 3.000 ninye diba tenebikce, Yesus ati diba tenyamik ninye ap tabakik.
Winilamika ati, adib tenelamik nang, sik kan-kan arye aning-aning nirya patalamne ninye tonok babye, dina kum ninye babye, ton kum patalamuk. Sik nirya arye Yesus wipdeiamuk Rasul nang ati, ayo bok arilyangalamikce, sikce Yesus dib tenebik nang patalamne ning ati, sik patalamuk touk bokuka arildalamik.
Delilyayikura, adeiyoknye birye nyabuk. “Nunce, ‘Yesus si deice tonap kum peternamlume,’ nyapmapu ning ara, ‘Peterena kum arye, talyeuk unamlum’ tenen, weik arye wenebuka nyapmapu. Nyapmapu bukni, anggunda, pia tuba peterenuk wininmalumbuk, Yerusalem unyak ninye weik tonap, kekenmake. Tonda, Yesus obik ning deiyok nirya ara, Sandeheren nang, sik nong deice deipminyopura, yuk nang arye, ‘Sandeheren nang, Yesus obika deiyok nang ara, anang akunuma, tenepnamak’ tenen, tenepmasulumce, tuba peterelulum do?” nyabuk.
Sik waldalamika ati, Yesus arye wibuka dopkwetebukura, el yupu bobuka peterelbalamik 12 nang arye, “Buluplulume,” nyabikura, Yesus yupu diba tenebuka dobolbalamik nang nirya kekebikce, bulubuka wekikopura, ayupu nyabik. “Nun tenepmap ara ani. Youwak kilapu melina pil ara, teleb pil bukni, apiluk talibuka dobibyopura, Allah yupu peteren pil bataktibye. Bukni, Allah yupu pil batakana ara, pia malye. Aning kum bataktibye.
Ura, Allah yupu pia peterelamikbuk, Yerusalem mutuku ulamik nang weik tonap kekelamikce, dib tenebuka tabaknin balamikce, minopce yupa weik uptabaknin balamik. Tonda, sik Yahudi yala nang, sik Allah ati arena deiyok nang Yesus peterelamuk yupu, ninye lyena ati laka teleb yupu kekelamikak arye, ninye weik tabaklamikce, Yesus el yupu talibuka dobolbalamik.
Anang arye Peterus dobuka yarikopura, Dorkas deipmek aik, alip aik deibik. Alip aik noutamak, Peterus binuka tikukbuk, youwak kilapu weik arye el balye tam nirya tikuka antapdongobik akarya nyabik. Tikra antapdongobikce, Peterus ati, “Akain ara, Dorkas arye el kam ulamuk talak nun neika ulamubu talak arye wiyamsuk baju adipdelyame,” nyabuka engenmekce, laka nyanmek.
Tonda, nun apu yapu arye, Allah ati, malye kanye bobuka, “Elce winipmasil ning ara, nun like. Elda yata ati ikin ning arisulul do?” nyabuka, Allah ati wenebuka derelamikce, elti, winildelamik touk, nunda kum wininamabe. Sikce Allah ati wenebuka winildelamikba, Allah arye, yu ubukba, el im deice melinanye malaikat tonok, el si ara, Ninye Ona Deiyok Malaikat, anye bira dobuka sik kan-kan dopdeibukura, ninye yupa weik oplobuk.
Sikti lila yupu peterena deiyok nang dipdakirye, weik yupu nyanyak ninye ara, “Nunda Ibrani yala ninye unyabe,” nyabuka nyanyak do? Na babye Ibrani yala kopropnye unune. Sikda, Israel yala ninye arye deiamik ninye unyak do? Na babye Israel yalanye birye deipnukura, aunmane. Na babye, Abraham bira, na deipkirik dopnye ulamuke.
Musa birye, Israel ninye ati nyabuk. Amutuku unamlum talak nirya ara, keting tamun yupa winilye ning, akunum kiplyopura, Allah arye arisilye ning nirya bokuka, tagu barye kibuka deipmunce, tonok ning wilibuka, sepuluh persen (10%) ton bokuka, Allah aik pil don nang, sik Lewi yala nang ap, yuk nang bona utotoa kum ninye ap ati, arepnamlulume. Tonda, aninguk bukni, anggun mutuku noutamak unyak bukni, talye tikilyangan nang ap, mitik mapu sik ni yapu, wisi nang diamikce, kwaknamne mapu ap, kilmapu apura, youwak kilapu ap ati, bokuka arepnamlulume. Arepmunyopura, anggun ululum mutuku-mutuku nirya, bona utotoa kum ninye patalamlye touk, dinamake. Urtalya ati, kum unamake.
Ara, na weik yala ara, Israel yala nang arye deipnikba, like pin barye sum akunum ubukura, na den bam bol mouse ning seknike. Na yala koprop ara, Benyamin yalanye ununa anya arye, Yahudi yala nang arye, nyalamak yupu ap, winilamik ning ap, mem ning nirya ap, na weik arye, kel kibuka ulamse. Ara, Allah arye, “Wininalulume, aning ton kum wininamlulume,” nyamukba, Musa arye seklamuk yupu, mem yupu ning ati ara, sik Farisi nang arye, ayupu uk pia talibuka diksukumuk unyaka atonun, na babye, weik arye telebuk ubuka ulamse.
Ara, Allah yupu asik buku noutamak youwak kilapu melinamluma ati, si sekna ati ara, anyapnukin ning wininyak kilapu, sikuk si sekna telebe. Sik wisi danana ara, keting tamun yupa weik 60 tahun atonun akunum uplye kilapu. Tonda, sik akanye yapu tuba kam ulamik talak, batakuka yuk nang kum dolamak kilapu sik siuk sekna telebe.
Nun ni Allah el kanye ara, ‘Diksukum diba tenena ning, talibuka una ning ara, malye ning nirya tabakuka, una kum ulul ning atia. Winibuka diba tenenyak nang arye, sik teleb unyak ning ara ani. Ara, sikce kwaknamne mapu ap, youwak kilapu ap ati, bico tenebuka melinyake’ tenelule. Tonda, anang ara diba tenena kum ninye arye, talibuka ulamice malye ning atonun ning, pia talibuka kum unyake. Diksukumuk unyake.
Allah el yupu deice arye nyasulule. “Allah arye arepsukbuk nun talima ak Dib Kanye usilya arye, ‘Anang ara na’ tenen, tenepsilirye, ‘Yuk ning pataplibuk na bataknicak’ tenen, pia kalikisulule.” Ayupu nyapsuka ara, talye yupu uk nyapsuka tenelulum do? Kume, Allah El Dib Kanye arye, ‘Yuk malye ning talibuka bicak’ tenen, pia kalikisulul ati, Allah arye, ‘Sik malye ubicak’ tenen, el mikip arisilya deice arye, pia tuba-tuba talibuka melisulule.
ကြော်ငြာတွေ