Yata ninye do nirya, sikce anti, teleb yupu nyabuka, teleb kipdeibkicopura, narye anang ati, tamubuka teleb kipdeipnamne. Aning atonun, yata nang do, sikce anti, malye yupu nyabuka, an nong deice ikin ning deipkicopura, narye anang ton tamubuka, sik nong deice ikin ning delinamne. Aninye sik wenemna ati supnamne. Narye melipkineba, an deice arye, yuk ninye tukwak nang im sirya, mutuku sirya nirya ati, teleb kipdeipnamne.” Allah arye Abram biti, nyalin yupu nyapdeibuk.
Rasul 26:6 - Eipomek6 Ara, Allah arye nun apu yapu ati nyalilamuk yupu, na babye, ‘Dipkoprop winipnamsile,’ tenenun. Ara, ‘Akunum diyamikce nang aminyan talak kam bukeipnamle’ tenen, dinauk unune. Aning dib tenenuna ati ara, arup arye, anggunce yupu bokeipmanulume. အခန်းကိုကြည့်ပါ။ |
Rasul 26:6
59 ပူးပေါင်းရင်းမြစ်များ
Tonda, ance deiplum mi arye deipliba, dadeipdanin balamica ani, pia dodeipdanin binamak nang ati, narye teleb kipdeipnamne. Teleb kipdeipnyopura, anang arye dodeipdanin balamica ani, aminyan deipnamak nang deice arye, mutuku sirya, im sirya nirya, unamak ninye ati, teleb kipdeipnamne. Deiyok ara, narye nyapmakunuba ance, na yupu kekemomce, aninguk winipmalam ati, ayupu nyapkine,” Allah arye, Abraham biti nyabuk.
Tonda, ance deipminyeba, dadeipdanin balamica ani, donirye deipnamak ninye, an yala ninye ara, narye melipniba, ninye yupa pia weik upnin banamake. Ara, lukunyan noutam kurya pia nukman kumto tiklamle atonun, an yala nang yupa pia weik upnin banamake. Im sirya, mutuku sirya nirya arepsiniba, an yala nang arye talinamake. An yala nang ara, mambul ning wininamak deice arye, mutuku sirya, im sirya unyak ninye nirya ara, teleb kipdeipnamne.
Winilaminyeba, narye nyapdeipniba, an ap, akil ap, ‘Pia lik,’ tenilanamdume. Elce deipliba, dadeipdanin banamak mapu ap, ance deipminyeba, dadeipdanin balamica ani, banamak mapu ap, doyanamle talak noutamak nirya, ‘Pia lik,’ tenilanamake. Ninye nirya arye, an kisok teikuka onamkiake. Ance ninye yan dumu kisok si tobuka onamlame,” nyabuk.
Weik ninye deiyok nang arye, kwalin kama talibikirye, sik yan dana-dana deibikirye, akama noutam tuku dipdongobuka talibikirye, ninye nirya ati yupu bokolinyake. Winilamak touk an ap, ance deipminyeba dadeipdanin balamikca ani, do unamak ninye, Yehuda yala ninye noutam arye, ninye deiyok kibice nang babye tuba wininamake. Ninye deiyok nang kina ati talilamak kama ara, an yala nang arye pia talinamake. Yehuda yala nang arye akama pia talilyamica ani, aminyan sirya talak ara, akama pia talinamlanye bira, ninye deiyoknye yalyopura, akama ara el ning anya arye, el bidamnye dopropnamle.
Min talak ara, Allah Yahweh, ance nun deiyoknye Daud biti, nyalin yupu deice arye, “Pia dipkoprob, ninye deiyok talibuka un ning ara, arepkinirye, erepdeipnamkin,” nyabuka, nyalin yupu deice arye, akunum nyapdeiamlume. Allah ance, anyalin yupu deice arye, akunum nyapdeialum ati, aning ara, pia kum bataknamlame. Allah ance ayupu ton nyaplume. “Daud ance deipnalam mapu kan-kan arye, Israel yala nang, anggun ninye deiyoknye raja kina ati, ninye ton, pia wipdeipnamne.” Tonda, Daud ance biknulyame, Israel yala ninye deiyoknye kina ati, weik teleb bun ning, el si takhta deice ara, ance deipnalam mapu kankan arye, tonoknye ton wipdeipnyeba, atakhta deice buklirye, Israel yala nang nirya talinamle.
Sion mutuku noutam ara, na mikip arepnirye, lo arepnyeba, Daud birye deiplyeba, dadeipdanin banamak nanguk, wipdeipnyeba, Israel nang talepnamlanye ton, sik deiyoknye ton unamle! Na Allah arye, Israel nang talibuka, ninye deiyoknye ulul raja Daud biti, ‘Anye bira, dipkoprob, Israel nang sik ninye deiyoknye unamle’ tenen, akunum wipdeipsa ati, amutuku nirya ara, dipkoprob talinamle!
Allah Yahweh arye, ‘Tukwak mutuku noutam unyak nang, yuk-yuk nirya ara, moubuka biknamak’ tenen, elce lyelosulul nang ara, akunum lak sukum arye, peteresulule. Diba, tukwak mutuku nang, yuk-yuk nirya ara, sik asing arye, Yahweh el diksukum winibuka, pia telebuk winilye ning ara, akunum laka delilula ati, elinyake.
Allah arye tenyamuk talak akunum kiplyeura, Allah arye, Yerusalem mutuku noutam winipnamle ning nirya ara, tuba tamubuka, pia teleb kipdeipnamlarya! Tonda, sikce kouamik ning yala-yala nirya ap, yo duk moulamle ning yala nirya ap ara, weik arye paplirye, pia teleb uplye ning ara, duk weik moupnamle. Atalak ara, sik Israel yala nang lyepdoplirye, amutuku noutam kam unamak nang ara, kanye teleb kipnamle. Tonda, sik koun ning weik nong uplyeba, libuka dikirye, ‘Se, wini talak ara, aning nirya ara, pia telebuk usulule,’ tenen, kanye dipnamake.
Naryuk, Yerusalem asik dobuka unyak mutuku nirya ara, dakuka bataknirye, sice buklopnamne. Amutuku dana-dana nirya ara, ulubuka daklopnyopura, sice atonun kipdeipnyeba, aik olauk upnamlarya. Aning winipnamle ara, minop talak arye dipdongobuka, noutam talak babye, wini talak nirya babye, uluplobikceba, aik oldiamuk upnamle ning ara, pia min arye ton kum winibuke. Narye amutuku ati, pia malye kipdeipyeura, dapia aunmalya ani, aminyan talak ara, narye tenyamsenye yanamlarya. Anye bira, ‘Amutuku nirya talipnamleʼ tenen, akunum min arye wipdeiamse ati, el yalyopura, narye el tibuk arepnamne. Naryuk, Yerusalem mutuku ara, dobuka awipdeiamsinye, el deiceuk deipnamne.” Allah Yahweh arye nyabuk.
Tonda, na pil donanye Daud el yalanye wibuka deipnebuk, sik nirya talibuka ninye deiyoknye unamle. Winipmanto ara, domba basam weik unyak bukni, sik domba weina deiyoknye tonok ulirye, el domba nirya tonok kibuka deiplirye, teleb ubuka weilamle atonun, Israel ninye ayala-ayala nirya ara, sik deiyoknye tonok dem unamle. Elce Israel ninye nirya talinamle talak ara, sikce teleb un ninguk wininamake. Ara, na Allah arye, ‘Aning ara wininamlume, aning ara kum wininamlulume,’ nyapdeiamse ninguk talibuka unamake. Na yupu nirya moubuka kekenamake.
Winibuka daulamica ani, doyanamle talak ara, Israel ninye tuba tamubuka, sik ni koprop Allah Yahweh atibuk enamake. Winibuka elamikirye, Allah Yahweh el dam yanuka unamake. Tonda, sik deiyoknye bira, Daud birye deibukba, dadeipdanin yangalamik ani, Allah arye tonok deiyoknye, wibuka deipliba, ‘Anye, nun ninye deiyoknye, Raja unamsil’ tenen, el dam tamubuka yanganamake. Winibikcopura, sirya talak, sikce nati ilil upliba, ‘Se, nun ni Allah, elda weik mambulnye’ tenen, el amu tam unamake. Winibikirye, el siuk erebikcopura, Allah Yahweh arye, aning-aning nirya, weik arye yamubuka, sikti arenamle. Ara, sirya talak wininamak ning ati, laka nyapkine. Allah arye nabi Hosea biti, laka nyapdeibukba, sekuk.
Bukni, atalak noutam ara, yatanye do nirya, Allah Yahweh el tibuk si erelirye, ‘Naio, na melibuka lyepnilyame,’ nyabukam morolulnye bira, Allah aryuk aninye nirya lyepnamle. Ara, urdem ati, kum nyapsine. Deiyok ara, minop talak arye, Allah Yahweh elce nyabuk touk, Sion mutuku ap, Yerusalem mutuku noutam ap ara, ton ninye lyepnamle. Kam tuba unamak ninye ara, Allah Yahweh elce wipdeiamuk ninye ati, nyapliba, kekebice ninyeuk, kam unamake. Yuk ninye ara, Allah arye oplopliba, dibikirye, sirya daknamake. Allah arye nyapdeibukba, nabi Yoel birye sekuk.
Amutuku malye kibuka dopropnamaka deiyok nang arye, Yerusalem mutuku tamubuka welepnamake. Esau birye deiamukba, dadeipdanin yangalamik nang, Edom mutuku unyak nang ati, adeiyok nang arye, olbinamake. Winipnamak talak ara, Yerusalem mutuku nang arye, Edom tam nang nirya ati, binuka oplopnamake. Winipnamaka ati ara, dipkoprob ning ara, nara Allah Yahweh, amutuku-amutuku nirya ara, sik Deiyoknye kipnirye, atam nirya talibuka unamne. Ayupu nirya ara, Allah arye, nabi Obaja biti, yanuka lengdar deice arye, laka nyapdeibuk.
Allah arye ayupu ton nyabuk. Ati anggun Israel ninye ara, Allah el si Yahweh arye namin kipsiliba, anggun mal olan nang arye, tapu koubuka bobisicopura, ikin pil aryuk unamsiyak bukni, anggun ni koproba Allah tenebuk talak akunum dam uplyopura, lyepnamsile. Ara, Israel ninye kan-kan arye, Allah elcuk wel kil tonok wipdeipliba, mi bomlya ani, aminyan talak el mi deipnamle. Tonda, akam kil arye, el mi akunum deiplyopura, el kayapu Israel yala nang, sik wenena ati, yuk pera mutuku ninye arye, tapu koubuka bobinamik mutuku noutam unyak ninye, ninye yupa weik ning nirya ara, Allah arye lyebuka doproplirye, ila tamubuka sik min arye ulamik mutuku uk, yanuka deipliba, tonok kanye bobuka, teleb kibuka unamake.
Allah an mapu koprop ara, Abraham arye deiamukba, dadeipdanin balamik nang, nun Israel yala ninye ati, tenepsimince, bico upkiliba, tamubuka lyepnamsilyame. Tonda, nun apu koproba, Yakub birye deiamukba, dadeipdanin balamika ani, deiamsik Israel nang ati, tenepsimince, bico upkiliba tamubuka lyepdopnamsilyame. Ara, minop talak ancuk, nun apu yapu nang ati, nyalin yupu deice arye, “Wininamsine,” nyapdeiamsulum touk, wininamsilyame. Pia kum bataknamsilyame. Ance nun apu yapu nang ati, “Wininamsine,” nyapdeiamsulum ning nirya ara, kum bataknamsilame. Aning nirya ara, dipkoprob pil donamsilyame. Aminyan talak babye, nun dam teleb winilinamsilyame. Ayupu nyabuka, nabi Mika birye Allah ati, nyabuka morobuk.
Allah arye Yehuda tam unyak nang ati, tonap teleb kipdeipnamle talak ara, sik malye ulamik ning ap, tuba malye unyak ning ap ati, kum daneipnamne. Ara, Yerusalem mutuku weik asik noutam unyak nang ap, tonda Daud birye deibukba, dadeipdanin yanamak nang ap ati, narye arepnyeba, weik mek balamle atonun kibuka, banamle. Winipmanto ara, abanamle mek ara, sik malye winin ning nirya, mek likuka lyenamle. Ara, Daud tam nang ap, Yerusalem mutuku noutam unyak nang ap arye, malye wininyak ning ap, isa si erenyakce wininyak ning nirya ara, narye lyebuka, kum daneipnamne.
Allah arye nyabuk. “Se yu parango, anda bukminyak arye, domba basam weilula deiyoknye ulye touk, Allah na mapu ati, melibuka bobalula deiyoknye bira, na ap neika pil donimnye bukni, an parang arye olbinulyame. Binuka opminyeura, adomba atonun nang, na mapu nirya ara, bai sakikcak arye, mutuku yuk-yuk bibik abuka, bindopnamake. Winipnamak talak ara, na mapu koproba, sik Israel nang nirya ati, wenebuka opnamne.
Imam-imam nang, sik deiyoknye Yosua, el kisok deice amahkota kalupdeipnalam talak ara, elti, ayupu nyapnulyame. Ara, ani. “Allah Yahweh, aning-aning nirya talibuka, deice tam erebuka, im deice malaikat nirya, sik deiyoknye ulule. Elce ayupu nyapkile. “Anggun nirya, moubuka kekeplulume! Winipmanto ara, anye elda, yo taruk atonunye unamle. Anye nepnin balamlya ani, aminyan talak ara, na Allah Yahweh ati, na si eren aik dopnamnile. Ati ara, elda mambul weiknye ulule,” nyapsile.
Se, Sion mutuku noutam ululum ninye, anggun weik tonun kanye deibuka, kil-kil asa upmunce, unamlulume. Tonda, anggun Yerusalem mutuku ululum ninye nirya ara, weik tonun kanye deibuka, weik yupu deice arye, ‘Telebe,’ nyanamlulume. Anggun elilulume. Anggun ninye deiyoknye, aning nirya bisina ap, tonda pia diksukum una ap, deiyoknye yanmala ati, dilulume. El ayanamlanye bira, ninye unyak touk dipdebuka, diksukum kibuka, yupu lipsisikuka, bokolina deiyoknye ulule. Tonda, ninye lyena deiyok ning boyanmale. Bukni, anye bira, el kanye talima nimalyap asa arye, ulirye, amu tam ulule. Anye bira, winiryuk keledai basam balye deice bukuka yanganmale.
Allah Yahweh arye nyabuk. Anggun nirya moubuka dipdelulume! ‘Na yupu laka nyalbanamle’ tenen, narye wipdeipniba yanamlanye bira, na bisik yalina ati dopdeipniba, el minopce yalirye, na bisik yabuka kintinipnamnile. Akunum kintinipnilyopura, na talye karin arye yanamne. Anggunce enumunye, na Allah Yahweh ara, na si eren aik koproba noutamakuk yanamne. Tonda, anggun kanye deiplumce, ‘Se, Allah el nyalin yupu nun dam laka lelyanamlanye bira, minopce yanuka nyapsutue,’ tenemunye bira, dipkoprob minopce nyalyanamsile. Nara Allah Yahweh, aning-aning ap, im deice yin talin malaikat nirya ap, sik weik deiyoknye birye nyapsina ati, dipkoprob winipnamle.
Bukni, anggunce nati, ‘Allah elda weik mambule,’ tenebuka, na si erenululumce, na nyapdeiamse yupu uk, moubuka talipmunce, ululum ninye nirya ati, na mikip ara, anggun deice deipsiniba, keting delilamle touk upsilyopura, teleb kipdeipsinirye, lyepnamsine. Winipsinya deice arye, anggun ikin usilye ning nirya, kum daneipnamsine. Winipmanto ara, sapi basam mi poka pum tam dongamica ani, apoka pum bisik arye kubuka, bai tam bilirye, weik kanye delilamle touk upmunce, kanye delinamlume.
Nyabukce, awekmek nang dipdeyukce, ‘E ton tam nang Saduki nang wekmake, ton tam Farisi nang wekmake’ tenen, kel kibukce, aSandeheren nang kekenmekak ayupu weik arye nyabuk. “Na kayapu, na apu yapu Farisi nang ulamik atonun, na babye Farisi nang atonun unune. Na kayapu, na apu yapu Farisi nang ulamik touk, na babye, Farisinye unune. Nara, kanye teniltona kumce, pia kanye talima lamabuka, ‘Allah arye akunum diamice nang kam bukipnamle sum ara, dan talak winipnamle do?’ tenen, kanye deibuka pia dipra unune. Aning dib tenenuna ati ara, arup arye anggunce yupu lepsisikuka bokolinmanulume,” Paulus arye nyabuk
Tonda, narye Allah ati, kanye tenildena kumce, pia kanye talima lamabuka, dipra unun ning ara, aYahudi yala deiyok nang babye, atonun lamabuka dipra unyake. Ara, Allah el yupu nyasilya atonun, telebuk ulamice nang babye, ayupu yanibuka malye-malye ulamice nang babye, Allah arye akunum diamice ninye nirya kam bukeipnamle sum, ‘Yata talak winipnamsil do’ tenen, dinauk unyabe.
Bukni, tonok ninguk ara, narye winipse ning ara, lak nyapnusine. Ara, narye Sandeheren nang ati, nyapse. “Na kayapu, ‘Allah arye akunum diplamak ninye nirya kam bukeipnamle’ tenen, diba tenebuka talinya ati, anggunce, ‘An malye winiplume,’ nyabuka nyapmanulume. Ati ara, ‘Asum anggun yupu bokolinmanulume,’ nyabuka, ninye yupu lepsisikra bokolina deiyok nang, Sandeheren nang ati, nyapse. Anyapse ning ati malye tenepmaniak tenepne,” Paulus arye nyabuk.
Ura na laka nyanmasin yupu nirya akunum winibuka ati, ‘Nun bulubibyopura, yupu talipnamabe’ tenen, “Anggun buluplulume,” nyabuka moropse. Nun Yahudi yala nang nirya arye, “Allah arye aning dipkoprop arepsilyopura, yanamsile,” nyabuka dib tenebuburye, dinuk unyap ning ati, tapu koupnik ati aunmane. Paulus arye aYahudi yala nang ati nyabuk.
Dipkoprop Allah el yupu laka nyalamuknye nabi Samuel dipdongobuka, Allah el aminyan arye winipnamuk ning laka nyalamik nang arye, nyapdanin yangalamika ani, laka nyalamik nang, nabi nang nirya arye, Allah elce kintinip deiyamuknye, Mesias ara, Yesus eluk unamuk talak ati, ‘Winipnamle,’ nyabuka lak nyalilamsik.
Anyapmasin ning ara, dukdongobuka laka nyapnusine. Ara, Kristus tukwak mutuku yanuka ulamukce, nun Yahudi yala ninye melyamsuka deice arye, lakak kipsuk ning ara nyapnusine. Ara, Allah arye Yahudi yala ninye, sik minop talak ulamik ninye, nun ayupu yapu ati, “Wininamsine,” nyalilamuk yupu nirya akunum winibuk. Winilamuk ning deiyok ara, ani. Allah arye, Yahudi yala ninye ati, “Wininamsine,” nyabuka nyalin yupu nyasilye ning nirya ara, ‘Dipkoprop winilule, tenenamake’ tenen, Yesus Kristus tukwak mutuku yayukce, nun Yahudi yala ninye ati weika arye melyamsuk.
Isa Mutuku Dongonye ap, mer nirya ap, sik amu tam ulamuburye, tukwak mem ninguk talibuka ulamubu bukni, Allah arye, ‘Atalak ani,’ tenyamuk touk akunum winibukopura, Allah arye el Mi Kopropa dopdeipsuke. Allah el mi Yesus dopdeipsukba, Allah El Dib Kanye mikip deice arye tonok kil arye ami deibuk. Akil arye Allah el mi deibuk talak ara, nun Yahudi yala ninye nirya, Allah arye, “Aning ara wininamlulume, aning ara kum wininamlulume,” nyapdeibukba, Musa sekamuk yupu talibuka ulamuburye, amem yupu amu tam atonun ulamupe. Aning atonun, ami Yesus babye, Musa sekamuk yupu amu tam ulamuk. Musa sekamuk mem yupu amu tam bukuka ulamubu bukni, Allah arye el mi dopdeibukba, atalak yayuka deiyok ara ani. Ara, Allah arye nunti, ‘Musa sekamuk yupu, mem yupu amu tam unyak ninye ara, deknamne.’ Na Mi Kopropa arye aninye deklirye, mem ning amu tam unyakak arye lobuka lyepnirye, ‘Na mapu kopropa unamak’ tenen, diba tenenyak ninye ara, teleb kipdeipnamne. ‘Winipnyopura, narye sikti, kintinyamse ning nirya arepniba, sikce dopropnamak,’ tenyamsukce, el mi Yesus dobuka areamsuk.
Ati, aning kum bukni, nun ni koproba Allah Yahweh arye, minop talak na Musa wipdeiamnuk atonun, nun ni koproba Allah, el si Yahweh arye, nun Israel ninye noutamak arye, na unya atonye, tonok ton wipdeipnamsile. Ara, Allah el nyalye yupu kekeplirye, sikti, laka nyanamla deiyoknye wipdeipnamsile. Wini talak, na Musa unye atonun, aminyan talak anye bira, Allah el yupu laka lena deiyoknye unamsile. Anye akunum wipdeiplyopura, anye nyaplye yupu kekebuka, unamlulume.
Aminyan yuk talak ara, nun ni Allah pia mambulnye, ara nun Lyena Deiyoknye Yesus Kristus, im deice arye tamubuka dolyanamsil. El dolyanamsila ara, pia teleb ubuka, dirina weik arye yanamle. Men kum dolyanmasilye talak noutamak nirya ara, nun kanye bokoltona kum aryuk, ‘El dipkoprop dolyanamsil’ tenen, kanye pia deibuka, dinauk ubirye unyabe. Ati ara, tukwak mutuku noutamak tuba kam unamap talak ara, pia diksukumuk unamabe.
ကြော်ငြာတွေ