Kume na nio, ance kwepdeiamsulum nang, ‘Nun Israel yala nang ati, tonap tenepsimince, yanuka melinamsilam’ tenen, moropkiabe na nio! Ance nun Israel nang ati, ‘Anang ara, ‘Naʼ tenen nang unyaka ati, sikda pia talipnamne’ tenen, wiamsulumce, nun ikin weik ulamupu noutam arye, akunum melibuka lyepsulume na nio! Tonda, Sion mutuku ati, luba kina kum bukni, tonap tenenamlame! Ara, ance, “Amutuku ara, tia talak ati, na si eren aik aunamle,” nyapdeipsulumak ati, nyapne na nio.
Rasul 20:28 - Eipomek28 ‘Malye winipnyap’ tenen, anggun kanye talima moubuka umunyak arye melibuka dildanamlulume. Tonda, Allah El Dib Kanye arye, ‘Sik talima melipdakirye dinamak’ tenen, melin nang atonun kipsuk akarye, wibuka deipsuk nang ara, anggunce sikti, sik talima moubuka kalekuka dinamlulume. Allah el mi koprop dibukura, el ining banmok deice arye, Allah dekuka deibuk ninye ara, domba weilamak nang arye sik domba weilamak touk, Allah el diba tenebuka talinyak nang ati, melibuka weinamlulume. Anang ati moubuka dimunce, melinamlulume. အခန်းကိုကြည့်ပါ။ |
Rasul 20:28
61 ပူးပေါင်းရင်းမြစ်များ
Tonda, malye ning nirya batakuka, diksukum un ninguk talibuka unyak ninye arye, nyanyak yupu peterebikiba, yuk nang arye kekebicopura, ayupu kekece ninye nirya ara, telebuk unamake. Sik nyanyak yupu deice arye, ninye pia weik teleb kililanyake. Bukni, ‘Teleb un ning ara ani, malye un ning ara ani’ tenen, moubuka kum tenebikirye, talye walwal uk unyak ninye ara, moubuka tenina kumce, malye ninguk winipre banyaka anya arye, sik bidamanguk, akunum olilanyaka ati, dipnamake.
Tonda ninye tonok basam weina deiyoknye birye, el domba basam nirya bulubuka tonokak delilamle touk, Allah el mapu sirika nirya ara bulubuka telebak deipnamsile. Tonda, domba weina deiyoknye birye, domba basam mapu bico tenen, iribuka bobalamle touk, Allah arye el mapu koproba dobuka iribuka bobinamsile. Tonda domba basam mapu nirya sik nin birye, ‘Na mapu na dam nimalyap asa yanamal’ tenen, ‘Yalulume,’ nyapnin balibuk, sik nin yupu kekebuka balamak touk, Allah arye el mapu koproba ati atonun wininamle.
Allah arye Israel ninye ati wenelamukba, adeice arye sik moubuka tenelamik. Minop talak Musa ap, sik apu yapu ap, neika balamik ning ati teneipre ulamik. Winilamikce nyabik. “Musa birye nun apu yapu nang, Mesir mutuku ulamikba, boyangalamuk Allah ara, wini talak dan unmal do? Nun apu yapu yangalamik talak, Ining bi Laut mekwen noutam bokuka, dana-dana kiprobukba, anoutam bisik menekuka balamukba, sik aminyan yangalamik. Bukni, nun ni Allah ara, wini talak dan mutuku ulul do? Winipmanto ara, domba basam weina deiyoknye birye, el domba basam ati melibuka weilamle touk, nun apu koproba Musa biti melibuka nyalilamuk Allah ara, wini talak dan mutuku ulul do? Tonda, minop talak ulamik Israel ninye, sik noutamak, el Dib Kanye dolkwetelamuk Allah ara, wini talak dan mutuku ulul do? Akunum bataksuk do?” nyabuka asilelamik. Aning nirya ara, sik Israel ninye malye winilamikba, Allah arye sikti, wenelamuk talak ara, sik mining ninye uk asilalelamik.
Anggunce na Yeremia nyapdeipsin yupu, kum kekepnumunyopura, na adiparyuk, ninye babye kum banyakak dabinirye engenamne. Ara, sik kanye talima erena deice arye, maknya kilanyaka ati, nyapne. Na asing maka langdipnilirye, saknamnile. Ara, winipmanto ara, anggunda, Allah el weilul domba atonun ululum bukni, yu nang arye anggunti opsikirye, tomobuka sik mutuku tamubuka bobicak arye, wenen aik dongopnamsiaka ati, aning eipnirye engenamne, nyapsine. Nabi Yeremia birye, nyabuk.
Aning ati ara, Allah Yahweh arye nyabuk. Se, anggun Yerusalem mutuku ululum nango, anggun asing erebuka, dabu tam (arah utara) dipdenamlume. Anggun olyangana ati, anggun mal olan nang ton, akunum yanganmake! Ati ara, Allah arye, anggun deiyok nang ati areamsik nang, sik domba atonun talibuka ululum nang nirya ara, dan tam binuka unamak do? Tonda, anggunce ikin nyalamlum nang ara, dan mutuku biyik do? Ati, anggunce ilil yupu nyanamlum do?
Mutuku-mutuku nirya ululum ninye nirya ara, Allah el si Yahweh arye nyasilye yupu kekeplulume. Tonda, anggunce Allah nyalye yupu dopropmunce, weik laut mekwen koubuka, otam mutuku babye, laka nyalbinamlume. Sik laut mekwen kup-kup unyak ninye nirya babye kekenamake. Ayupu nyanamlulume. “Minop talak ara, anggun wenena ati, Israel ninye ayala-yala nirya, akunum wangapsinyamukba, yuk-yuk mutuku dabinuka ulamik ninye nirya, atalak ara tamubuka, sik mutuku koproba uk, boyanuka deipnamle. Winipmanto ara, domba basam weina deiyok nang arye, sik domba basam ati, teleb kibuka kaliklamak touk, Allah arye sik Israel ninye nirya ati, moubuka kalikinamsile.” Ayupu bobuka laka nyalbinamlame.
Tonda, Israel nang arye, domba arebikceba, sik deiyok nang arye, adomba basam kalimna dobuka, pia teleb ning meta ap, tup teleb ning ap, domba basam bola ap, ‘Baju wipnamapʼ tenen, domba potong alubuka dopropmunce, anggun baju ongon ninguk dobuka, baju wibukapmunce, ongopnamlume. Tonda, winipmunce, el adomba basam teleb kibuka nelamle ning ara, anggun dem obuka dilulume. Amalye ning nirya winilulum bukni, anggunda domba basam ati, yupu nyabuka, pia moubuka kum weimunce, din ning ton kum arelulume.
Na Allah arye nyapsine. Diba, anggunda na domba basam atonun nang ululuma ati, na mapu koproba ululume. Winibuka umunyeba, narye anggun patanmasilye ning nirya aresunune. Ati, anggunda dipkoprob anyak arye, nara anggun ni koproba, Allah unune. Ati nara, Allah Yahweh, aning-aning nirya talibuka, deice tam erebuka, Pia Mikip Weik Deiyoknye ununye birye, anggunti ayupu akunum nyapdeipsine.
Tonda, Asyur mutuku ninye arye, ‘Israel ninye malye kibibirye, opnamabe’ tenen, nun mutuku noutam yanuka weksetingce, nun mutuku tuku yanuka yanipsitingopura, Israel ninye nirya mikip kibikirye, sik tekbarye kalikna deiyok nang ton, wibuka tekeipnamake. Sikda, gembala atonun nang kibuka, Israel yala nang melinamake. Aning atonun, anggunti, ‘Teleb bisik ara ani, teleb winin ning wininamlum ning ara ani,’ nyabuka peterenamsiaka ati, weik deiyok nang pinbarye arye, ton wibuka deipnamake. Winibicopura, apinbarye deiyok nang arye, Israel ninye talibikirye, kalikinamake.
Nabi Mika birye, Allah ati morobuk. Se, na ni Allah Yahweh, ance an mapu koproba, Israel ninye nirya ati, wibuka deiamlumce, an mapu atonun ulamupu. Ati, ance sikti, bico tenebuka, pia moubuka kalikinamlame. Winipmanto ara, domba basam weina deiyok nang arye, sik domba basam pia teleb kibuka kaliklamak touk, ance nunti, kalikuka melinamsilame. Ara, ‘Nun Israel ninye ara, pia bai mutuku noutam atonun unyap bukni, ance lyepsimince, pia telebak deipnamsilam’ tenen, moropkine. ‘Lyepsimince, nun unamap sukum ara, pia sukulamle tuku ubuk mutuku binuka, talibuka uptibye’ tenen, moropkine. Tonda minop talak, Allah ance pia teleb mutuku, Gilead mutuku ap, Basan mutuku ap, nun Israel ninye nun apu yapu ati areamlumba, ulamik mutuku atonun, pia telebak arepsiminyeba, ‘Pia teleb mutuku noutamak unamap’ tenen, moropkine. ‘Pia teleb mutuku arepsiminyeba, nun din ning ara, weika arye dobuka dinamap’ tenen, moropkine.
Peterus anda, dib teneplumce, wini talak ara, ‘Anda Allah el Mi Koprop Kristus unamlame’ nyapmanilama anya arye, pia bulamle keil atonun ulyame. Ninye arye tuku palibuka mutuku yangan keil deice, aik ayukumna ikuka dolamak touk, yata nang do nirya, an nyapmanilam atonun diba tenebikceopura, Allah el mapu kipdeipniba, sik kanye talima ap, kanya ap, mikip unamake. Mikip weik kibuka ukirye, weik upnin banamake. Nati, dib tenepnikirye, na mapu weik upnin banamak ning ara, dipna deiyok isa mer ap, sik deiyoknye Isa Mutuku Dongonye ap arye, na mapu ati kum bisipnamake.
‘Allah arye Betlehem mutuku ati nyabuk. “Yudea tam noutamak aubuk mutuku nirya ara, mitik mambul mutuku bukni, Betlehem mutuku ara, pia weik mambule. Ara, Betlehem mutuku noutamak unyak ninye kan-kan arye, weik ninye deiyok unamlanye deipnamake. Anye bira, domba basam teleb ubuka weilamlanye atonun, Allah el mapu Israel ninye ati, bico tenebuka, ‘Wininmale’ nyabuka, pia talinamle. Aning ati ara, Betlehem mutuku ara, weik mambul mutuku nyapne,” Allah arye nyabuk.’ (Mika 5:2)
Ati ara, aning-aning winipnamle ning ara, moubuka dimunce, tenenamlulume. Yu nang arye, anggunti, ‘Yupu lipsisikuka bokolina deiyok nang arye wenebuka opnamak’ tenen, tapu koubuka arilbanamsiyake. Tonda, Yahudi yala nang arye Allah yupu peterena aik noutamak arye anggunti tapu koubuka bobisicopura, nati diba tenemunye ninye anggun wenena ati, kama arye weik kulabuka onamsiyake. Nati, dib tenepmanuluma ati, ‘Anang arye opnamak’ tenen, weik ninye deiyok nang, Gubernur nang ap, sisinanye weik ninye deiyok nang, sisin nang Raja nang ap, sik dam bobisiceura, anang kekena ati, na si deice arye pil domunye ning ara, lakak kibuka yupu laka nyanamlulume.
Aning ati ara, anggun kanye moubuka unamlulume. Malye-malye winina ap, talye kanye bobuka urdemuk una ap, kanye wangan mek talye dina apura, ‘Nun aik, nun ongon butum, nun dina ap, yata wiripnuyap do?’ tenen, teniltona ap deice arye, anggun kanye talima tenena ning ara, ikin weik upsilirye, mitang yuksilyeura, na pil dopmanto kum ululum ati, kanye pia moubuka unamlulume. Winipmanto ara, kabang bisik balamlya ak wena wemikceura, kabang talye mangkau arye balyeura, youlamla atouk, na yanamne sum mangkau kanye bopmamunye talak winipsilyak ati, kanye pia moubuka unamlulume.
Sik anang ara, ‘Allah si erepnamabe’ tenen, din dina kum arye, din si tebuka Allah siuk erelamikura, Allah El Dib Kanye arye nyabuk. “Anggunce Barnabas ap, Saulus ap, wibuka deipnululume. Na tenepse pil ‘Sik anang arye dopnamdak’ tenen, wiamsa ati, winira anggunce abitinye nang wibuka deipnululume,” nyabuk.
Nyaprik akarye Paulus ap, Barnabas ap arye, ‘Apiluk donamak’ tenen, sik Allah diba tenebik nang, ‘Sik deiyok nang unamak’ tenen, ninye yuk-yuk amutuku nang, amutuku nang, nirya wibuka deipnin balamrik. Anang wibuka deiprik talak ara, sik bitinye nang arye winiprik. Allah morona ap, Allah si erena ati, din si tebuka kwaning dina kum bulang arye, amutuku nang nun ni Yesus diba tenebika ati, adiba tenebik nang dobuka, ‘Yesus elcuk sik pataplye ning pia melinamle’ tenen, wibuka deipnin balamrikce, Yesus ati areprik.
Yu weik bai kam yalyopura, ninye arye ayam weilamice ak wekuka, obukablirye, diplyopura, sekuka mitik anun batakalul atonun, na bindopnyopura, tilila yupu peteren nang, anggun noutamak yakcopura, anggun melibuka weilulum ninye ati, sikce kanye lamapdongobuka yanuka kum unamake. Sikti lila nang arye telila yupu peterenamsiake.
Aning atonun, batakna kumce, anggun Roma mutuku diba tenelulum ninye nirya arye, elanamlum talak nirya babye, bico tenebuka, “Telebe,” nyalanamlulume. Anggun Roma ninye ati ara, yuk mutuku unyakce, Kristus ati diba tenebuka, el ap kanye talima dukdongobuka unyak ninye nirya arye anggunti, “Telebe,” nyasinyake.
Anggun wininamlum ning nirya deice arye, Yahudi yala ninye ap, Yunani yala ninye ap, yuk yala ninye nirya ap, Allah ati dib tenena ninye nirya ap ati, ‘Na winin ning eipnikirye, sik ikin kanye bobuka aminyan malye winibicak’ tenen, kanye moupmunce, diksukumuk wini unamlulume. Anggun dib tenelulum ninye arye, talye kanye bobuka winimunye ning deice arye, ‘Yuk ninye ati, mangkau arye, malye kum winililanamlulume’ tenen, nyapsine.
Aning winiluluma ara, yata deiyok ati winilulum do? Anggun aik kum upmasutuba, anggun aik pum arye, talye din ap, mek ap kum diptum do? Akumopura, aik awamli bukni, Allah dib tenena ati bulubikce ninye ara, ‘Aning ara, mambul kume’ tenen, talye tenelulumce ululum do? Tonda, sik aning-aning nirya kum uplye ninye, talye bona utotowa talina kum ninye ati, kum dibikiba, ‘Dauplye,’ teneluluma deice arye, ‘Bona utotowa talina kum ninye sik nong deice, alye dakna ning debibyeba, alye daknamake,’ tenemunce, aning winilulum do? Na kayapu, yata yupu ton nyapsitinye do? Anggun amalye ning winilulum ning ati, narye anggunti, “Urdem, aning ara, dauplye. Anggunda teleb ninye ululume,” talye nyapnusin do? Kume, aning ara, kum nyapsitinye.
“Nara, sik asa delilamak mapu atonun unune,” nyapmasina deiyok ara, ani. Ara, narye Yesus dib tenebikbuk, Allah el mapu kibuk ninye nirya ati ara, minop talak narye, ‘Aninye ap, sik dib tenenyak ning nirya ara, aning nirya kum datue’ tenen, sik nong deice ikin ning weik arye deililamsirye, ton nang ati yupu nyapsiba, olamik. Winilamse ati ara, Allah arye, ‘Na yupu peterepnin bana ati, deiyok kouna deiyok nang, Rasul nang unamake’ tenen, wipdeiyamuk nang nirya ara, na deice tamto unyake. Sikda weik mambul bukni, na dib min kum tenepse talak ara, pia malye ulamse anya arye, sik amutamuk unirye, mitik mambulnye unune. Malye ulamse anya arye, yuk ninye arye, nati, “Elda, Allah yupu peterelbana ati deiyok kouna deiyoknye, Rasulnye ulule,” kum nyapnitinge bukni, nyaninyake.
Ura, na kayapu, na talye ati kum nyapsine. Anggun kele. Yahudi yala ninye arye, diba tenebuka talinyakce wininyak ning ara, Yahudi nang dib tenenyak ning ara, na babye aninguk diba tenebuka talyamse. Aning ati dib tenebuka, ulamse ning nirya ara, yuk nang arye laka nyalamsikba, ayupu anggun akunum kekelamlumce, kel kiyamlume. Ara, ‘Yesus ati diba tenenyak ninye nirya, kum kipdeipnirye sirya daknamne’ tenen, yu weik ulamnukba, narye pi dobuka pia pirilelamsirye, sik nong deice ikin ning weika arye delilamse. Winilamse ning ara, ‘Aninye nirya obuka sirya daknamne’ tenen, winilamse.
Allah El Dib Kanye akunum arepsuk deice arye, nun kanye talima kum boktoptibye. Kume, winipmanto ara, ‘Wa wiyamubu ning nirya lilyanamap’ tenen, minopce winiryuk kwaning deililbalamak touk, Allah El Dib Kanye minopce arepsuk deice arye, nun kele kinyabe. Allah arye, kintinip deiyamsuk ning nirya ara, arepsilyopura, dipkoprop dopropnamabe. Allah arye, nun nirya ati, ‘Na mapu unamak’ tenen, nun malye winilamupa noutamak arye, akunum lopdeksuke. Lobuka deksukba, el Dib Kanye ap, ulamibya ani, aminyan sirya talak ara, pia moubuka teleb kipdeipsilirye, el dam bobinamsile. Aning-aning nirya ati ara, ninye mutuku-mutuku nirya, “Allah ara, pia telebe,” nyabuka, el si weik arye erebikirye, elti, kinamake.
El mi Yesus, el ining biyuk deice aryuk, nun malye wininyap ning nirya namin kipsukce, kum kipdeipsuke. Nun malye winina ati oplopsutu bukni, nun pununa ati dibuksuka deice arye lyepsuke. Nun malye ning tapu kouamsuka noutamak arye, lobuka deksukce, lyepsuke. Winipsuk ning ara, mitik tonun kume. Allah el bico tenesilye ning ap, el kanye aniryuk talye arisilye ning ap, weik arye aulye touk, weik arye areamsuke. Ara, nun malye ning ara, nukmanto kum wamsuk bukni, aning nirya kum kipdeipsukce lyepsuke.
El Kristus aryuk, ‘Apil, yala-yala nirya donamak’ tenen, el mikip deice arye, pil dona deiyok ning yala yuk-yuk bokuka, tukwak ninye ati arepsuk ning ara, ani. Allah yupu dobuka peterelbana ati, deiyok koupnamik Rasul nang ap, “Allah yupu ani,” nyanyakce, aminyan winipnamle ning lak lena nabi nang ap, Allah ati dib kum tenenyak ninye, ‘Dib tenepnamak’ tenen, peterelbana nang ap, Allah ati dib akunum tenebik ninye, sik deiyok nang ap, Allah yupu sekik ning peterena nang ap, apil dona deiyok ning nirya, el mikip deice arye, bokuka yuk-yuk arepsuke.
Nun kayapu telebe. Nun bitinye Paulus ap, Timotius ap, asurat sekeipsiname. Nun bitinye ara, Yesus Kristus nun talima talisilya deice, el amu tam unyamce, el yupu uk kekebuka, el piluk donyame. Asurat ara, anggun Pilipi mutuku umunce, Yesus Kristus ati diba teneplumce, eluk talibuka, diksukumuk umunye ninye ap, Allah yupu peterena nang sik melina deiyok nang ap, Allah yupu aik pil melina don nang ap, anggun nirya ati, ayupu sekeipsiname.
Ayupu sekuka dopdeipnusin ara, nun kwit Arkipus el kekena ati, ayupu dobuka el dam nyalbinulyame. Ayupu ara, ani. “Arkipus anda, ‘Apil dopnamle’ tenen, Allah arye wibuka deipkuk ning ara, ‘Dipkoprop pil donmanya ani, sirya daknamne’ tenen, kanye moubuka pil donamlame. An ap, Yesus ap, kanye dukdongobuka ururuma anya arye, Paulus arye anti, ‘Wininamlyame,’ nyabuka nyapmakile.” Ayupu ara, asurat dopropnamlum nang arye, na kwit Arkipus ati nyapnamlulume. Na Paulus arye nyapsine.
Ara, Allah yupu peteren nang. Sik deiyok talibuka pil dopmanto ninye adiparyuk wininyak ning lak nyapnukine. Sikda, malye winina pia kum winilamikibuk, yuk nang arye, “Anang wininyak ning ara, ani-ani,” kum nyapmanto nanguk, wibuka delina telebe. Sikda, kilapu tonokuk dobuka unyakce, ‘Talye kanye bobuka unune,’ tenena kum aryuk, sik bidamnye ati bita dilakirye, teleb winina ap, ninye minop wana ap, yu pola una kumce, nimalye arye una ap, anirya wininamak nang ara, apil dopnamtinge. Ato nang ati ara, yuk ninye arye, “Anang ara, dipkoprop teleb wininyake,” nyabuka, tenelamak nanguk apil dopnamtinge. Tonda, yuk ninye do, ninye asik nang do, sik aik buplan kukulinyak nang wibuka delina telebe. Tonda, yuk nang bikna ati, teleb kibuka peterepting nang wilina telebe. Winilamice ninye uka. Yuk unyak ninye ara, wilina kume.
Ara, talye ati kume. Yata nang do nirya, sik bidamnang mapu ap, sik bidamnang kilapu ap, sik bidamnang pil ap ati, dilakirye, teleb ubuka sirya dakna pil kum dobikce nang ara, yata wiribuka arye, Allah yupu peteren nang ap, Allah ati dib tenen ninye ap, sik deiyok nang kiptingce pil teleb ubuka dopting do? Aning kum winiptinge.
Minop talak apil min kum dolamlum talak ara, Allah yupu aik deiyok nang arye, sik taruk an nong deice deibuka, “Allah el pil moubuka winipman kum pil winibuka, winibuka donamle,” nyalilamkika deice arye, Allah El Dib Kanye arye pil bita dona deiyok ning arepkuk. Aripkuk ning ara, ‘Dauplye’ tenen, batakna meme. Anyuk tenebuka pi dobuka mikip arye pil donalyame.
An winin ning nirya ap, an petereminye ning nirya ap, ‘Malye nyapnikcak’ tenen, pia moubuka dildanamlyame. Ara, ‘Na babye, na peterenye yupu kekenyak ninye babye, Allah arye lyepnamsil’ tenen, an adiparyuk batakna kum arye, tuba-tuba wininamlyame. Winipminyopura, Allah arye an ap, an peterepnalam ninye ap, lyepnamsile. Na Paulus arye nyabuka sekeibkine.
Winira, yuk yupu ton nyapnukine. Allah yupu peteren nang, sik deiyok nang nirye arye, anang ati kibuka si erenamake. Allah yupu aik deiyok nang nirya ati, si erenamak bukni, weik mambul ning ara, Allah yupu pia bita lilibuka peterena ap, ‘Yuk ninye dib tenepnamak’ tenen, tilila nyana ap wininyakce, pil donyak nang ati ara, weik arye si erenamlulume nyapkine.
Aning ara, talye ati kum nyapkine. Allah yupu peteren nang, sik melina deiyok nang ara, dib tenen nang, sik kanye melipdakirye dinamak anya arye, talye pil kum donyake. Sikda, Allah el pil talibuka donamaka ati, sik adiparyuk maknya kintinibuka dina ap, yuk nang yanina ap, kum winiptinge. Tonda, yuk ninye ati minop derelana ap, wenena ap, kanye wangalamak mek pia pataplibuk, weik arye dina ap, kum winiptinge. Tonda, yu weik ubuka, yuk nang oldana ap, bona talin ning yo bok ap, weik arye dolona ati, tenepce arye, minin yupu nyana ap, anirya ara, sik adiparyuk pia kum wininamake. Amalye-malye winin nang ara, ‘Allah ati diba tenen nang, sik melina deiyok nang unamak’ tenen, wibuka pia kum delinamlyame. Aning kum bukni, ‘Allah yupu peteren nang, sik melina deiyok nang unamak’ tenen, diksukum unyak nanguk, wibuka delinamlyame.
Nun Lyena Deiyoknye Yesus arye, nun lyena ati, el mining nonguk arepsukce, nun pununa ati dipsuke. Malye winin ning noutam akuk ulamupa ati ara, nun wenena ati talye luparabuka oplopsutu bukni, ‘Akili sal ara, deknamne,’ tenelamukce, nun pununa ati, tukwak mutuku yanuka dibuk. Winibuka deksuka deiyok ara, ‘Ninye tukwak kili sal, sik malye un ning nirya kilipnirye, dekuka lopdeipniba, ‘Na’ tenen, ninye pia teleb una ninye unamake. Winibikirye, teleb winin ninguk talibuka, kanye deibuka diksukumuk unamak’ tenen, el nong deice arye deksukce, lyepsuke.
Tonda, atalak noutamak nirya ara, anggun nirya arye, anggun neika ululum ninye ati, moubuka kalekelanamlulume. Ara, Allah arye nun lyena ati, bico tenesilirye, el kanye aniryuk talye melisilye ning akunum kekebuka kel kinyak bukni, lik upliba, ‘Dawaplye, tenebuka, batakicak’ tenen, moubuka kalekelanamlulume. Tonda, ‘Allah arye bataksilyak’ tenen, ton nang malye winibikiba, yuk nang weik yu upliba, adeice arye ninye weika arye tonap tabakuka, malye kanye bobuka malye winibikirye, ‘Sik nirya malye winipdeipdacak’ tenen, pia moubuka kalekelanamlulume. Ara, urdem ati kum nyapsine. Ton tam nang arye, yu weik upliba, yuk tam nang ton, aning eibuka kekebicopura, ninye weikia arye tonap, yu upliba, ‘Sik nirya malye winibicak’ tenen, nyapsine. ‘Winipsilyak’ tenen, moubuka kalekelanamlulume.
Ura, Allah diba tenena ati, ninye deiyok nang atonun usinyak ninye arye, nyasinyak yupu moubuka kekepmunce, sik amu tam bukuka, dakeiyam asa arye unamlulume. Sikce, ‘Nun amu tam unyak ninye ara, diba tenebuka teleb unyak do, kum do?’ tenen, kalikuka disinyaka ara, urdem ati kum unyake. Aminyan talak Allah arye adeiyok nang ati, asipdeliba, sik pil nirya ati, “Winilamubu, winilamubu,” nyabuka laka nyabikiba, Allah arye anang ati, yupu lipsisikuka bokeipnamle. Kekena kumce mandipna dopmunyopura, anggun deiyok nang ikin kanye bobicopura, anggun babye anggun bidamang ati, malye winililanamlume. Ati, anggun deiyok nang arye melibuka dosinyak pil noutamak nirya ara, ‘Telebuk unyabe, nun deiyok nang arye, kanye deibuka unamak’ tenen, anggun deiyok nang arye nyasinyak touk, kekebuka dobolbanamlume. Sik yupu yanina meme.
Minop talak ara, anggun nirya domba teleb bisik batakuka, malye bisik kwekdanin balamak touk ulalum bukni, wini talak ara, sik domba weilamak Deiyoknye damuk tamubuka yangalamak touk, akunum yanuka ululume. Ara, anggun kanye talima ap, kanye ap, melipsilirye, ‘Malye ubicak’ tenen, dilesilya Deiyoknye dam, akunum yanuka ululuma ati nyapsine.
Diba tenena kum nang arye, wininyak bukni, anggunda diba tenelulum ninye ara, Allah arye, ‘Na mapu kibikirye, diksukumuk unamak’ tenen, akunum wibuka deiamsuke. Tonda, ‘Na piluk dokirye, ninye ap, Allah ap, ansinilina deiyok nang unamak’ tenen, wibuka deiamsuke. Anggunda kunuknak noutam atonun, malye ulamluma noutam ulamlumbuk, Allah yukubsukce, dobuka teleb dirinak atonun delilbisuke. Winipsuka deiyok ara, ‘Allah el si erebuka, elti, telebe nyabuka, pia unamak’ tenen, dirinak delilbisuke.
Aning atonun kum bukni, Allah malye winina pia kumce, dirinak ulamle touk, nun babye, malye winina kumce, telebuk ubirye, dirinak atouk ulamibyeura, nun nirya ap, tonok kanye tenebuka, ansinibuka unyabe. Allah el yupu uk kekebuka, dobolbabyeura, Allah el Mi Yesus, el ining arye, nun malye tenenyap ning ap, malye wininyap ning nirya ap, kum ubuka deipsilirye, lyepnamsile.
Sik 24 wisi deiyok nang arye, Domba Mi Atonye el si erena ati, winiryuk mot senmekba, kekepse. Sikce mot nyanmek yupu ara, ani. “Anda pia diksukumuk uminya deice arye, an tonok arye asekna mambul ning dobuka, taplaklamak yo pea atonun ning daklobuka, abuku yokeipsutume. Deiyok ara, sik opkikba, an ining biyuka deice arye, ninye ayala-ayala kan-kan nirya arye, ‘Allah el na tenen ninye unamak’ tenen, ninye weika arye deklume. Akunum dekuka lyeplum ninye ara, im sirya, mutuku sirya nirya ap, ninye ayala-ayala nirya ap, ayupu-ayupu nirya ap, weik mutuku nang (negara-negara) nirya ap, noutamak arye ninye weik dekuka lyepluma ati, ancuk abuku yokeipsutume.
ကြော်ငြာတွေ