Rasul 2:4 - Eipomek4 Sik nong deice bukukura, Allah El Dib Kanye sik talima wekuka langdibukura, talibuka arye, sik nirya ara, yuk-yuk mutuku nang yupu arye nyanmek. Ara, Allah El Pia Teleb Dib Kanye arye yupu nyana deiyok ning aribuka atonun, sik yuk-yuk mutuku nang yupu nyanmek. Sik nyanmek yupu ara, kum kel kiyamik yupu bukni, yuk-yuk mutuku kili sal yupu nyanmek. အခန်းကိုကြည့်ပါ။ |
Rasul 2:4
55 ပူးပေါင်းရင်းမြစ်များ
Nyabukce, ayupu ton dukdongobuka nyabuk. Na Allah arye nyasunun yupu ara, anggun walwal umunya ati, ayupu nyapsine. Anggunce na yupu kum kekenumunya ati, na Allah Yahweh arye yuk pera mutuku, yu weik nang dopdeipniba, anggun mutuku yakirye, sik yupu diamuk nyabikiba, anggun Israel ninye ara, ayupu kum kekenamlume. Anggun olyanamsiyak nang arye, yuk mutuku yupu deice nyanamsiyaka ati nyapsine. Yuk mutuku yupu nyanamsiyaka deice arye, na Allah arye wenepnamsine.
Ura, Allah arye ayupu nyabuk. Narye na mapu koprop, anggun deice ara, ‘Narye winipnamsine. Winipsinyopura, anggunce ton wininamlume,’ nyabuka, nyalin yupu deice arye nyapsine. Na mikip weik ulye, Allah el Pia Teleb, Lek Dip Kanye ara, na mapu koproba, anggun Israel nang deice deipnamsine. Tonda, narye na nyasinye yupu dobuka peterepsinirye, anggun si pum bisik dongopnamsine. Ayupu peterepsiniba, anggunce, ‘Aninguk aupsiliba, pia ati talibuka unamabe, tenepmunyopura, ayupu ara, tuba nyapnamlume. Pia ati kum bataknamlume. Tonda, anggunce deipmunba, dadeipdanin banamak mapu babye, na nyasinye yupu dobuka, sik deice peterenamake. Anang arye deilinamak mapu ati, peterebikiba, anang babye ayupu kekebikiba kel bikikirye, talinamake. Ara, na Allah Yahweh arye, ayupu nyapsina anya arye, dipkoprob nong upnamlarya! Ara, atalak arye dipdongobuka, doyanamle talak nirya ara, peterepdanin bana uk unamlume,” nyapsine. Allah arye, sik Israel nang ati nyapdeibuk.
Na ni Allah, an yu tenipminye touk, na babye sik anang ati, yu uniliba derenune. ‘Na yu unulul ning ara, tuba pia kum darapdongobuka utinye,’ nyabuka, Allah dam lak nyapse. Nyapsiba, Allah arye tamubuka, na dam yanuka nyapnuk. “Ayu ukilye ning ara, ance ayu bobinuka, amutuku nang, sik mapu bisik banmakca noutam ap, tonda amutuku wel nang, bulubuka unamakak ap, na yupu bobinuka, laka nyapnulyame. Tonda, sal babye, sikce domik kilapu babye, tonda wisi nang babye nirya ara, sik deice ayu yupu bobinuka, lak nyapminyeba, dopropnamake.” Allah arye, ayupu nyapdeipnuke.
Ati wini talak ara, an yala nang ap, an kayapu Israel yala ninye ap, Babel mutuku yin talin nang arye, sirya obikce, tapu koubuka delilyayikba, Babel mutuku noutamak daunyak mutuku bimince, narye anti, nyalinamkin yupu nirya ara, sik kekena ati, peterelbinamlame. Sik ti nyanamlyame. ‘Allah el si Yahweh, aning nirya talibuka deice tam, Weik Erena Deiyoknye ulirye, el tenelul touk ululnye birye, nyapnuk yupu ara, ani,’ nyabuka peterelbinamlame. Ara, sikce an yupu kekenamkiyak talak babye, sikce an yupu kum kekebikirye, batakanamkiak talak babye, peterenauk wininamlyame. ‘Kum kekepmaniyak ati, bataknamne,’ pia kum tenenamlyame.” Allah arye, na Yehezkiel, nati nyapnuke.
Anggun tilila yupu peterelulum nabi-nabi nang ara, wininamlum bukni, na Mika bira, Allah Yahweh arye, nati bico tenenilirye, el Dib Kanye ap, el mikip ap areniliba, na talima pum tam weknilirye, langdinulule. Wininulula deice, elcuk nati, moubuka kel bikna deiyok ning ap, diksukum winina deiyok ning ap, dipkoprob kibuka, yupu lipsisikuka bokolina deiyok ning ap areniliba, moubuka tenepnirye, teleb diksukum winibuka unune. Wininuna deice arye, Israel ninye nirya ati, “Anggun malye winilulumce, Allah el yupu yanilulum ning ara, ani,” nyabuka, lakak arye nyanamne. Aning atonun, na ilil una kum kanye bobuka, adeice arye, Yakub elce deiamukba, dadeipdanin yangalamika ani, wini talak amutuku noutamak unyak ninye ati, “Anggun pia malye weik winilulum ning ara, ani,” nyabuka, lakak narye nyabuka delinamne. Nabi Mika birye nyabuk. Nyabukopura, ayupu ton dukdongobuka nyabuk.
Yata talak do nirya, anggun tapu koubukapsikirye, yupu talina deiyok nang sik dam bobisikcopura, yupu kum nyapnumunyop talak ara, ‘Se, yata winibuka nyapnuyap do?’ tenen, mambul kanye kum bonamlulume. Allah El Dib Kanye arye anggun talima noutamak wini talak nyapsilye ninguk, kekepmunce nyapnamlulume.
Nati, diba tenepniak nang ara, yuk nang arye, ‘Allah el mikip deice aryuk pil donyake, tenepnamak’ tenen, na mikip arepnibuk, ninye kum winipmanto ning wininamak ning ara, ani. Ninye talyamlye isa ara, na si deice aryuk yakuka dolkwetenamake. Tonda, sik kum kel bikamice yupu bukni, Allah El Dib Kanye arye el mikip areplibuk, yuk mutuku yupu deice arye nyanamake.
Deiyok ara ami neplyopura, mambul pil dolamlye ati, Allah arye anye biti kanye pia delinamle. Ami neplyopura, anggur mek kanye wangalamak mek ap, yuk talye kanye wangalamak mek ap, pia kum dinamle. Tonda, el winiryuk deiplye talak anirye, do unamle talak nirya ara, Allah El Dib Kanye ami el talima wekuka, langdiplirye, pia puto weik areplyopura Allah El Dib Kanye arye anye pia talinamle.
Bukni, Allah El Dib Kanye, anggun talima melina ati, Melinanye bira, Allah arye, na si deice arye el Dib Kanye dopdeipnamsile. Aripsiliba, Allah El Dib Kanye arye aning-aning nirya ati, peterenamsile. Tonda, na nyapdeiyamsise yupu nirya, ‘Tuba tamubuka tenepnamak’ tenen, Allah El Dib Kanye arye tonap nyanamsile.” Yesus arye nyabuk.
Bukni, Allah El Dib Kanye anggun talima ak yanuka weksilirye, mikip weik arepsilyopura, dopropnamlume. Dopropmunyak arye, Yerusalem unyak ninye ap, Yudea tam unyak ninye ap, Samaria tam unyak ninye ap, mutuku sirya im sirya unyak ninye ap, na winilamse ning ap, peterelamsibuk kekelamlum ning ap, dobuka peterepra banamlume,” Yesus arye nyabuk.
Teniltonmek bukni, aminyan talak, Peterus arye nyabuk. “Yata nang arye, ‘Kume,’ nyapsitingura, anang dobuka mek kum dongoptibye do? Nunda Allah El Dib Kanye akunum doprobupu touk, sik anang babye, Yahudi yala kum nang bukni, Allah El Dib Kanye akunum dopropmaka ati, mek dongoptibye,” Peterus arye nyabuk.
Allah arye nun kanye talima tenenyap ning kel kilisulule. Allah El Dib Kanye arepsuk touk, anang babye, dib tenebik deice arye Allah El Dib Kanye sikti, akunum aribuk. Aning winibuka deice arye, ‘Sik Yahudi yala kum ninye babye, diba tenebiceura, na mapu kiptinge’ tenen, Allah arye akunum laka nyapmasile.
Ara, Yahudi yala nang ap, ton nang Yahudi yala kum nang bukni, Yahudi yala ninye arye Allah ati diba tenebuka unyak ning uk, anang babye, Allah ati diba tenebuka unyake. Nun amutuku yuk-yuk unyap nang bulubuka awekmap bukni, Yesus ati dib tenenyak nang ara, Allah el pia teleb winilamuk yupu, ninye kum winipmanto ning, sikce laka nyanmak anyak, nun yupu koprop yuk-yuk arye kekenmabe!” nyabik.
Ati, nun kayapu, anggun akunum bikilulum nang ara, anggun noutamak arye tekbarye nang wipdeipnulume. Ara, Allah El Dib Kanye wekuka langdibukura, funguk kibuka unyak nang, sik yupu nyanyak ning ap, sik pil donyak ning ap, teleb-teleb kibuka wininyak nanguk wipdeipnulume. Wibdeipmunyeura, ‘Youwak kilapu dina bokuka arin pil donamak’ tenen, sik deiyok nang keipdeipnamabe.
Nyabikura, awekmek nang, Yesus dib tenebik nang nirya arye, ‘Winipnamabe, nyapmasiak yupu ara telebuk,’ tenebikce, kanye deibikce, ninye tekbarye nang weipdeibik. Ara, Stefanus wipdeibik. Stefanus ara, Yesus ati pia dipkoprop tenebukce, kanye talima lamapdongobuka ulamuk. Tonda Allah El Dib Kanye Stefanus talima noutamak wekamukce, langdibukura, diksukumuk winilamuk. Tonda, ninye si Pilipus ap, Pokorus ap, Nikanor ap, Timon ap, Parmenas ap, ton Antiokia deiamiknye, Nikolas ap wipdeibik. Nikolas ara, Yahudi yala kumnye bukni, Yahudi yala nang, Allah ati kibuka si erelamik ning, sik winilamik ning nirya ara Nikolas babye dobuka winilamuk.
Allah arye Stefanus ati, pia kanye deiamukce, weik melyamuk ning ap, el mikip weika arye Stefanus areamuk ning ap, adeice arye Stefanus ulamuk. Allah el mikip weik Stefanus areamuka ati, Stefanus arye ninye winipmanto kum pil ap, ‘Allah el mikip pia weik pil donmasile, tenepnamak’ tenen, laka len pil ara, ninye kum winipmanto pil dolamuk.
Yesus arye nyabukura, Ananias kekebuk akarye, Saulus el aik ulamukak binuka wekuk. Anyaik wekukura, el taruk tatang Saulus nong deice deibuk akarye nyabuk. “Na weit Sauluso, amutuku yanamluma ati, bisik yanganmumak panalyayuknye bira, nun ni kopropa Yesus. Elce, ‘Nara, an asing lapdeipnamkil’ tenen, tonda, Allah El Dib Kanye dopkweteplibuk, ‘Kanye pum tam wekilirye, langdipnamkil’ tenen, dopdeipmanile,” nyabuk.
Ura, na Paulus arye anggun Roma mutuku noutamak diba tenebuka ululum ninye nirya ati nyapsine. Allah el melisilya deice arye, nunce elti, ‘Dipkoprop teleb kipdeipsilirye, lyepsilyopura, pia melinamsile’ tenen, kintinibuka dinauk unyabe. Anggun Roma mutuku ninye ati, Allah morosunun ning ara nyapnusine. Ara, anggunce anggun kanye talima el deiceuk deipmunce, diba tenelulumopura, atalak Allah arye anggunti, mambul kanye bona kumce, kanye deibuka teleb winina deiyok ning ap, pin-pin una deiyok ning ap, ‘Weika arye arisiliba, anggun talima pum tam langdinamsil’ tenen, na Paulus arye anggun Roma mutuku ululum ninye ati Allah morosunune. Tonda, anyapmasin ning ara, Allah arye el Dib Kanye arisiliba, el mikip deice arye melisilyeba, anggun Roma mutuku tam ninye nirya ara, ‘Dipkoprop Allah elcuk, teleb kipdeipsilirye, lyepsilyopura, pia ati melinamsile’ tenemunce, ‘Kintinibuka dinauk unamlum’ tenen, Allah morosunune. Na Paulus arye nyapsine.
Yuknye biti, Allah el mikip ariliba, ninye kum winipmanto ning, mikip ning pil dolule. Yuknye bira, aminyan winipnamle ning min kum winyamlye talak arye, laka nyana deiyok ning ariliba, laka nyasulule. Allah El Dib Kanye arye, yuknye biti, Allah el teleb pil dona deiyok ning areplibuk, teneplirye, nyalule. “Apil ara, Allah el mikip deice arye, dolule. Bukni, apil ara, Isa Mutuku Dongonye mikip deice arye, dolule,” tenebuka weneplirye, laka nyasulule. Ara, ‘Tilila ning ani, dipkoprop ning ani’ tenen, wibuka kintinilina deiyok ning dololirye, ulule. Yuknye biti, elce min kel kum bikamuk yupu bukni, Allah El Dib Kanye arye, ayupu nyana deiyok ning areplibuk, dopdoplirye, yuk mutuku ninye arye, nyanyak yupu, adiparyuk teleb ubuka nyalule. Tonye bira, yuk nang arye, Allah El Dib Kanye, el mikip deice yuk mutuku nang yupu kekena deiyok ning areplibuk, yuk nang arye, yuk mutuku yupu deice arye, nyakiba, anye birye kekeplirye, “Ayupu deiyok ara, ani. Ayupu deice ara, Allah arye, nyasulule,” nyabuka yupu lipsisikuka bokolilule.
Yatanye do nirya, yuk nang ati bico tenebuka kum melilamlanye bira, yuk mutuku ninye nyalamak yupu ap, Allah el im deice pil melinang, malaikat sik yupu ap, deice arye, mambul yupu nyaptu babye, Allah el kanye ara, ‘Anye bira mambul kum ati awablye,’ tenelule. El winilul ning ara, nong kum upnamle ati, el pil ara, mambul weik kume. Winipmanto ara, besi ning obikiba, weik lelim talye nyalamle atonun, ulule. Ara anye birye, mambul yupu ap, kekena teleb yupu ap, nyalul bukni, yuk nang ati, bico tenebuka kum melilula ati, atonye bira dipkoprop weik mambul kume nyapsine.
Ara, Allah arye nunti, ‘Yuk ninye bico tenebuka melinamak’ tenen, bico tenena ati arisulul deiyok ning ara, kum kumdanapnamle. Pia aunamle. Bukni, dan mutuku do nirya, aminyan talak ara, aminyan winipnamle ning laka nyalamak ning ara, kum danamle. Sik kum kel bikamik bukni, Allah El Dib Kanye mikip deice arye, yuk mutuku ninye nyanyak yupu, talye kanye bobuka nyanyak yupu ara, aning babye kum danamle. Allah arye ariliba, weik kel bikamikce ning ara, aminyan kum danamle.
Anggun Korintus mutuku ninye nirya ara, Allah El Dib Kanye mikip deice arye, arepsutuba, yuk mutuku yupu nyaptumopura, na kanye mitik deipsitinye bukni, weik mambul ning ara, anggun nirya arye, Allah nyasilye yupu, lak akarye laka nyabuka peterenyak nang ulamtumopura, aning ati, weik arye, kanye deipsitinye. Allah yupu laka nyabuka peterelinye bira, weik mambul pil dolul bukni, Dib Kanye arye, deiyok ning areplibuk, yuk mutuku yupu deice arye, nyalulnye bira, mitik mambul piluk dolule. Deiyok ara, Allah yupu lak kibuka peterenanye birye el yupu nyalyeba, Allah dib tenenyak ninye nirya kekenyak deice arye, sik kanye talima kwa baribuka, mikip kililula ati nyapsine. Yuk mutuku yupu deice nyalinye birye, “Deiyok ani, ani,” nyabuka laka nyaptopura, sik keken ninye nirya moubuka kel biktingopura, aning babye teleb nyaptinye. Ayupu deiyok ning moubuka kum teneptingce, kum kel keptingopura, aning ara, teleb kume. Na Paulus arye, nyapsine.
Ara, kanye wangalamak mek dibikcopura, sik kanye wangabikiba, talye yolana ap, malye-malye winina ap, wininyaka anya arye, mek dibibyeba, kanye wangapsiliba malye winina ara, meme. Aning kum wininamlum bukni, Allah El Dib Kanye arepsukbuk, nun kanye talima wekuka usilinye birye, ‘Allah El Dib Kanye arye, nun kanye talima talisilye deice arye, el mikip kipdeipnamsile’ tenen, el amutamuk unamlulume.
Aning nirya bobuka, unamlum talak noutamak nirya ara, Allah El Dib Kanye arye, anggun kanye talima talisilirye, el mikip deice nyasilye touk, Allah morona ap, aning-aning nirya ap, anggun patan ning ati, Allah morona ap, pia wininamlulume. Ati, ‘Allah El Dib Kanye mikip arisilya deice arye, Allah moronamabe’ tenenauk umunce, talye kanye bobuka, lik una kum aryuk unamlulume. Tonda, batakana kum, pia pi dobuka, Allah ati pia moronamlume. Allah moronamluma ara, ani. Ara, ‘Allah arye wibuka, el mapu kipdeipsuk nang nirya ati, Allah arye melinamsile’ tenen, anggunce Allah moronamlume.
Atalak ara, Allah arye el yupu laka nyalamik nang, sik nabi nang ati, sik talima noutam arye laka nyabuk. “Kume, na Dib Kanye arye anggun talima noutamak nyapdeipsilyeura, aminyan talak winipnamle ning ati, yupu laka nyalulum ning ara, anggun wini talak ululum ninye ati kume. Aning ara, aminyan talak unamak ninye ati winipnamle,” Allah arye nyabuk. Allah arye apia teleb kilinamsil ning nirya ara, Allah el im deice pil don nang, sik malaikat babye, ‘Se, Allah arye apil dolye ning ara, pia teleb ulule’ tenen, kanye deibikirye moubuka dinyake.
Aning ara pia kume. Allah el yupu laka nyalamik nang, sik nabi nang arye seklamik yupu nirya ara, talye nang arye, ‘Ayupu ara mambule, ayupu ara seklulume,’ nyalamika deice arye kum seklamik. Aning kum bukni, Allah El Dib Kanye arye, nabi nang sik talima noutam yupu nyabuka, pil dolamuka deice arye, Allah el yupu laka nyalamik nang arye, sik yupu nyabuka seklamik. Ara, Allah El Dib Kanye arye anang ati, el mikip areamuka deice arye, apil dolamik.
Aning akunum winibukopura, Saul ap, el melinanye ap, Gibea mutuku birik. Bisik banmarik talak ara, bisik noutam arye, sik nabi-nabi nang weik yanganmeka ak, ton epdayik. Epdayik talak ara, adiparyuk, Allah el mikip, Saul deice wekuka langdibuk. Wekuka langdibukba, sik nabi-nabi nang, mot senmekce, yupu weik nyanmek ning nirya ara, Saul el babye neika ansinibuka, yupu nyanmekce senmek. Sik nirya neika, Allah el mikip deice, aminyan winipnamuk ning nyanmekce, Allah ati si erenmek.
ကြော်ငြာတွေ