Ati, an unamlam mutuku selal selamle tukwak nirya ara, narye mek dikeipkiniba, mek balamlirye telebuk unamle. Tonda, selal selamle tukwak mek arepneba banamle. Na Dib Kanye ara an deice deipkiniba, ance deipminba dadeipdanin banamak ninye sik deice deipnamne. Na mikip sik deice deipniba, teleb kipdeipnamsine. Winipnya deice arye, sik un ning nirya telebuk upliba, sik aninye ara yupa pia weik upra banamake.
Rasul 2:39 - Eipomek39 Allah arye, ‘Aning arepnamsine,’ nyalilamsuk yupu ara, anggun ap, anggun mapu ap, sik mapu deibikibuk dadeipdanin binamak mapu ap, tonda, pera mutuku unyak nang ap ati, ayupu nyalilamsuk. Ura, Nun ni Allah arye akunum wibuka deibukce, yukupnamle ninye nirya ati, ‘Allah El Dib Kanye arepnamsile’ tenen, nyapne,” Peterus arye nyabuk. အခန်းကိုကြည့်ပါ။ |
Rasul 2:39
41 ပူးပေါင်းရင်းမြစ်များ
Anggun mapu amutuku unamak ninye nirya ara, na Allah Yahweh arye peterenamsine. Anggunce deipmunba, dadeipdanin banamak ninye ara, teleb kipdeipniba, sikce aning-aning nirya pil dobuka unamak ning ara, nong upnamle. Nong upliba bona weik talinamake. Na tam kinamake. Winibikca deice anggun nirya diksukumuk buka telebuk unamlume.
Narye Israel nang nirya, asukum unyak nang babye, pia otam mutuku noutam unyak nang babye nirya ara, narye tuba tonap teleb kipdeipyeba, tenina kum aryuk, talye tunim abuka, pia teleb unamake. Nara, Allah Yahweh arye ayupu nyapmasina ati, aning nirya ara dipkoprob nong upnamle,’ nyapsine. Na mapu koprop nirya ara, narye kwetepnirye, pia teleb kipdeipnamsine.
Tukwak nang mutuku sirya, im sirya nirya ara, Allah arye sik malye winilamik ning ati, wenebuka opnamle. Akunum winiplyopura, keting kumulban tam unyak nang arye, aning eibuka, kel bikikcopura, Allah Yahweh el mikip weik nyalul si ap, el ap ati ara, ilil weik unamake. Aning atonun, sik keting panalyangan tam unyak nang nirya ara, Allah Yahweh, el pia teleb ulye ning ap, el weik dirina ap ulya ara, eibikirye, ilil weik unamake. Allah Yahweh, el bikbik abuka yanamla ara, winipmanto, weik balamle mek deice, weik kum mikip yalirye, yanuka lontik abliba, mek silong bukuka welelamle touk ubuka, mikip arye bikbik abuka yanamle. Aning nirya ati ara, tukwak nang mutuku sirya im sirya nirya ara, elti, ilil weik unamake.
Allah el mikip arye, tukwak mutuku tamubuka yanamle talak ara, Yakub birye deiamukba, dadeipdanin yangalamik nang, el mapu koproba ati nyapnamle. “Na Yerusalem mutuku weik asik noutam tamubuka yanamna ara, ninye Lyena Deiyoknye kipnirye yanamne. Ara, na mapu, anggun nirya malye winimunye ning batakmunce, tamubuka na tam kipnumunye nang lyepnamne ati, yanamne,” nyapnamle. Nara, Allah Yahweh arye, ayupu nyapsina ati, dipkoprob aning nirya nong upnamle!
Sikce, pil donamak ning ayala-yala nirya ara, nong uk unamle. Sik amutuku ukirye delinamak mapu nirya ara, deiyok kum upmalibuk, talye karin arye mitik talak ton kum dibinamake. Tonda, yuk pera mutuku ninye arye, kum olyanganamake. Ara, na Allah Yahweh arye, sik ap, sikce deibikiba dadeipdanin banamak ninye ap ati, sik dam unirye, pia telebuk kilinamne.”
Minop talak, narye na pil donanye Yakub biti areamsibuk, elce deibukba, dadeipdanin balamik ninye ulamik mutuku uk pia ati binuka unamake. Ara, sik apu yapu ulamik mutuku uk, binuka unamake. Sikce deibikiba, dadeipdanin banamak ninye nirya babye, amutuku uk talibuka pia aunamake. Ara, wini talak ululum ninye ap, aminyan talak sik mapu ap, tonda sik mapu arye deipdanin, banamak mapu ap, doyanamle talak deibikiba, dadeipdanin banamak ninye nirya ap, sik nirya amutuku noutamuk teleb ubuka unamake. Unamak talak ara, Daud el yalanye birye, ninye deiyok kibuka aninye pia talinamle. Sik Sisinanye el tonok unamle.
Allah arye Israel ninye ati nyabuk. “Na tenepse talak, akunum dam uplyopura, narye anggun tukwak ninye nong deice, na Dib Kanye arepnamsine. Arepnamne talak, anggunce deipnamlum sal mapu ap, kilmapu ap nirya ara, na yupu nyapniba, kekebikirye, sikce laka nyanamake. Tonda, sik wisi-wisi nang unam noutamak arye, tonok-tonok nang ton, lengdar deice mabikirye, na arenamne ning lak kipniba, eibikirye, ayupu ton laka nyanamake. Tonda, wel nang, sik deice arye dotalak unamle ning, sik dam arepneba, sikce kel kibikirye, laka nyanamake.
Bukni, atalak noutam ara, yatanye do nirya, Allah Yahweh el tibuk si erelirye, ‘Naio, na melibuka lyepnilyame,’ nyabukam morolulnye bira, Allah aryuk aninye nirya lyepnamle. Ara, urdem ati, kum nyapsine. Deiyok ara, minop talak arye, Allah Yahweh elce nyabuk touk, Sion mutuku ap, Yerusalem mutuku noutam ap ara, ton ninye lyepnamle. Kam tuba unamak ninye ara, Allah Yahweh elce wipdeiamuk ninye ati, nyapliba, kekebice ninyeuk, kam unamake. Yuk ninye ara, Allah arye oplopliba, dibikirye, sirya daknamake. Allah arye nyapdeibukba, nabi Yoel birye sekuk.
Musa arye nyapdeibuk touk, sik den bam bol mouse ning akunum sekik nang, ara Yahudi yala nang, Yesus diba tenelamikce, Peterus ap neika yanmek nang ara, anirya eibik. Eibik bukni, anyaik wekik nang ara, Yahudi yala kum nang ulamik bukni, Allah El Dib Kanye yanuka, weik arye sik talima pum tam wekuka deice arye, nong deice deibukura, anang arye yuk-yuk mutuku ninye nyanyak yupu deice arye, Allah si erebik. Allah el si erebikura, Peterus ap, neika yanmek nang arye aning eibika ati, sik lukdayikce, ‘Mambule’ tenen, kanye pum tam teninmek. Aning eibikopura, ‘Mambule’ tenebik deiyok ara, ‘Allah arye bico tenesilya deice arye, el talye arisulul Dib Kanye, ato talye Yahudi yala kum ninye ara, sik den bola mouse ning kum seklamika ati, Allah arye yata wiribuka areptu do? Amalye wininyak ning ton sik babye, Allah El Dib Kanye kum doproptinge,’ tenebika ati teniltonmek.
Birikce, sik nyaprikura, amutuku diba tenebik nang bulubuka wekikura, sik Allah arye meilyamukbuk sik dolamrik pil nirya ara, laka nyaprik. Tonda, “Allah arye talye Yahudi yala kum ninye ati, ‘Diba tenepnamake,’ tenebuk talakuk, akunum upmale. Ati, Allah melipmalbuk akunum diba tenenmake,” nyabuka, ayupu ton laka nyaprik.
Nun ka Simon Peterus birye akunum laka nyapmasile. Allah arye Yahudi yala kum ninye mutuku noutamak, ‘Na’ tenen, ninye ton unamak’ tenen, minopce wipdeiyamukba, sikce Yesus ati dib tenebike. Dib tenebik deice arye, elce ninye mutuku-mutuku nirya ati, bicoe tenesilya ning ara, akunum laka nyabuka peterepsuke. Anirya ara, Simon arye akunum laka nyapmasil atia.
Ara, Antiokia mutuku diba tenebuka ulamik ninye arye, ‘Anang Yerusalem mutuku binamak’ tenen, dopkwetebikura, Fenisia tam noutamak ap, Samaria tam noutamak ap, bisik mapdin balamik. Amutuku noutamak bisik mapnin balamik talak ara, Yahudi yala kum ninye, sik malye winilamik ning batakuka donga tamubuka, Yesus diba tenebuka doprobikce talyamik ning uk, ayupu laka nyapnin balamik. Ayupu laka nyalbalamikbuk, amutuku noutamak diba tenebuka ulamik ninye kekebikak arye, ‘E, Yahudi yala kum ninye babye, Yesus ati akunum dib tenebik’ tenen, bikikce pia kanye deibik.
Allah arye nun kanye talima tenenyap ning kel kilisulule. Allah El Dib Kanye arepsuk touk, anang babye, dib tenebik deice arye Allah El Dib Kanye sikti, akunum aribuk. Aning winibuka deice arye, ‘Sik Yahudi yala kum ninye babye, diba tenebiceura, na mapu kiptinge’ tenen, Allah arye akunum laka nyapmasile.
Tonda, minop talak arye akunum wibuka deiamsuk ninye ati, ‘Na damak yalulume,’ nyabuka, nun talima pum tam yukupsuke. Allah arye yukupsuk ninye ara, nun malye winin ning kilipsukce, “Sikda diksukum un ninyeuk akunum keipsine,” nyabuka, teleb kipdeipsukba, el mapu kopropa unyabe. Diksukum teleb ninye akunum teleb kipdeipsuk nang ara, aminyan sirya talak pia teleb kipdeipsilyopura, weik arye erepdeipnamsile.
Israel ninye ara, talye ninye kume. Deiyok ara ani. Tonok ning ara, Allah arye Israel ninye ati, ‘Na mapu unamak’ tenen, “Kwaknanamsine,” nyabuka nyalilamuk. Tonda, Allah el mikip ap, pia teleb ulul ning ap, sikti, benelelamuk. Tonda, Allah arye, ninye malye winin ning namin kina ati, “Wininamlulume,” nyalilamuk nyalin yupu ara, sik Israel ninye ati nyalilamuk. Tonda, Allah arye Musa ati, ‘Aning ara wininamlulume, aning ara kum wininamlulume,’ nyalilamuk mem yupu nyalilamuk ning ara, Israel ninye ati nyalilamuk. Tonda, Allah arye, “Na si winibuka erenamnulume,” nyabukabukce, el si erena ati, anyaik pum tam unamik ning nirya ap, tonda Allah arye, “Winibuka melinamsine,” nyabuka nyalilamuk yupu ap, ayupu nirya ara, Allah arye sik Israel ninye ati, arilamuk.
Anyapmasina ara, talye ati kume. Deiyok ani. Allah el kanye ara, ‘Akilapu ara, minop dib kum tenyamik talak arye, dib tenena kum nang domik bukni, wini talak ara, akilapu dib tenebika anya arye, sik akanye yapu babye, na tenen ning unamake. Sik neika unyaka ara, malye gume,’ tenesulule. Aning atonun, anang ara, minop dib kum tenyamik talak arye, dib tenena kum kilapu domik bukni, wini talak Allah ati, dib tenebika ati ara, sikce domik kilapu babye, Allah el na tenen ning unamake. Sik neika unyaka ara, malye kume. Allah arye, winibuka tenesulule. Allah arye, aning kum tenelamtuopura, talye yoltakanyak kilapu anya arye, sik delinyak mapu ara, malye mapu uptinge. Bukni, wini talak Allah ati diba tenebika ati ara, Allah arye aning tenesulula anya arye, Allah el kanye ara, ‘Aninye sikce delinyak mapu babye, telebe uk,’ tenesulule.
Tonda, aning ton Allah ati morosunune. Ara, Allah arye, anggun kanye talima noutamak, kel kina deiyok ning, dirina arepsilibuk, elce kintenyamsuk ning nirya ati, ‘Pia moubuka kel kinamlum’ tenen, Allah morosunune. Elce kintenyamsuk ning ara, ani. Ara, Allah arye, ‘Na ap, sik ap, aminyan talak ara, pia teleb akuk neika unamabe’ tenen, yukupsukba, anggunce kintinibuka dinauk ululum ning nirya ara, moubuka kele kinamlulume. Tonda, Allah arye, ‘Na mapu ati, pia teleb kipdeipnirye, pia telebuk wininamake. Winibikiba, na ap neika unamabe’ tenen, pia weik arye, kintinpdeiamsuk ning, ‘Aning nirya kele kinamlum’ tenen, Allah morosunune.
Tonda, minop talak ara, anggun ap, Kristus ap, talima dukdongobuka min kum ulalume. Anggun apu yapu ara, Israel yala ninye kum ulamika ati, Israel yala ninye ap, ansinibuka neika kum ulalume. Allah arye, Israel ninye ati, “Wininamsine, winibuka, winibuka arenamsine,” nyapdeiyamuk bukni, anggun Efesus mutuku nang ara, bai tam ninye asik nang atonun ulaluma ati ara, aning nirya ara, kum dopropmanto ulalume. Anggunda, Allah el si bikna ap, elti, dib tenebuka neiktoto una ap, pia kum ulaluma ati, ‘Allah arye, lyepnamsila ati, kintinibuka dinamabe,’ kum tenyamlume. Talye demuk ulalume.
Nun dib tenenyap ninye nirya ara, kanye dukdongobuka nong tonok atonun unyabe. Allah El Dib Kanye arye, tonok nong atonun kilisulule. Aning atonun, Allah arye nunti, ‘Aninye lyepnamne’ tenen, yukupsukba, dib tenebuburye wini talak ara, ‘Elcuk dolyasilyopura, el ap, neika pia unamaba ara, dan talak arye, dolyanamsil do’ tenen, aning atibuk kintinipdeibuka dinauk unyabe.
Anirya ara, tuba tenebirye, anggunti Allah morosenyabe. Allah morosinyaba ara, ani. Ara, Allah arye anggunti, ‘Wininamake, wininamake,’ tenyamsuk touk, pia diksukumuk winibicopura, Allah arye anggunti, nyapnamle. Ara, “Anang ati ara, na kanye deipsine. Yukuamse talak arye, ‘Wininamake,’ tenyamse touk, akunum wininyake,” nyabuka, ‘Teleb ulinamsil’ tenen, nunce anggunti, Allah morosenyabe. Tonda, Allah arye anggunti, melipsilyopura, anggunce, ‘Teleb pil donamap’ tenen, tenelulum ning ap, dib tenemunye deice arye, winilamlum ning ap, anirya ara, ‘Allah el mikip deice arye, anggun winin ning nirya nong updeipnamsil’ tenen, Allah anggunti morosenyabe. Na Paulus arye nyapsine.
Allah el mikip deice arye nunti, ‘Malye ning nirya batakuka, diksukum un ninyeuk unamak’ tenen, nyabuka melipsukce, akunum lyepsuke. Winipsuka ara, nun teleb ubuka pil dolamupa deice arye, kum lyepsuk bukni, elce minop talak akunum tenyamsuk touk, elce nunti bico tenepsukce, el kanye aryuk nunti talye melibuka lyepsuke. Allah el kanye aryuk bico tenyamsukce, ‘Yesus Kristus el pil donamla deice arye, aninye melibuka lyepnamne’ tenen, kintiniyamsuk ning ara, Yesus Kristus deice arye kintiniyamsuke. Aning ara, aning-aning min kum kwepdeiamuk talak arye, nun Lyena Deiyoknye Yesus Kristus akunum kintinipdeiamsuke.
Arup nyapmasin yupu nirya aupmala ati, anyapnusin yupu babye kekenulume. Isa Mutuku Dongonye arye, nun tukwak ninye ati, ‘Malye winipting’ tenen, talima lilosululba ikin asa unyap talak ara, ‘Nun du kopropa Yesus arye, melinamsil’ tenen, eltibuk diba tenebuka tenenamlume. Na kayapu, Allah arye wibsukba, elti, diba tenelulum ninye ati nyapsine. Allah arye nyapsukba, ‘Allah el dam im deice binamabe’ tenen, diba tenenyap touk, anggun yuk mutuku ton ululum ninye, aning atonun diba tenelulume. Aning ati ara, anggun kanye tenen ning nirya ara, Yesus deiceuk deipmunce, eltibuk diba tenenamlume. Yesus elti, diba tenebuka eluk talibuka unyabe. Yesus ara, Allah arye tukwak ninye lyena ati, el pia kai teleb yupu laka nyana ati, deiyok kouna deiyoknye ulule. Nun ap, Allah ap, neika una ati, ansinilina deiyoknye Yesus usulule. Yesus ati diba tenebibirye, el yupu laka nyalbanyabe.
Aning ati ara, Allah arye nunti, “Wininamsin,” nyabuka nyalilamsil yupu, winiryuk yupu ara, akunum kintinipsukopura, Kristus arye, Allah ap, ninye ap dana-dana Ansinilina Deiyoknye usulule. Apil dobuka usilya deiyok ara, ani. Ara, Allah arye yukusilye ninye nirya ara, Allah arye, “Winibuka arenamsine,” nyabuka nyalilamsuk ning, ‘Dipkoprop doprobikirye, aning talibuka pia teleb unamak’ tenen, Kristus arye nun Ansinilina Deiyoknye usulule. Ura, Allah arye, ninye teleb ulina ati, yupu nyalilamukba, minop talak ayupu winilamika noutamak ara, Allah arye yukulamuk ninye, sik malye winilamik ning ap, nun malye wininyap ning ap, kum danalina ati, Kristus dibuk deice arye deksuke. Kristus arye nun lyena ati, punupdeipsuka deice arye, nun malye winilamubu ning noutamak lopdeipsukce, lyebuka deksuke. Nun punupsuka anya arye, Kristus ara nun ap, Allah ap, Ansinilina Deiyoknye usulule.
Winibuka umunye talak noutamak arye, ikin ning ton upsilyopura, Allah elce anggunti, teleb kipdeipsilirye, ‘Darapdongobuka unamak’ tenen, mikip arepsilyopura, pil pia palibuka dona ati deiyok ning arenamsile. Allah arye, ‘Sik ap, Yesus Kristus ap, kanye dukdongobuka unyaka deice arye, pia kam unamake. Teleb arye dirina kan-kan ak, na ap dukdongobuka neika unamap’ tenen, yukupsuke.
Allah el weik mikip deice arye, nun nirya ati, ‘Aninye ara, bola koplobuka kam pia unamake. Tonda, na Allah unye touk, diksukumuk unamak’ tenen, patapsilye ning nirya ara, akunum areamsuke. Ara, ‘Diksukumuk unamak’ tenen, deiyok ning areamsuka nirya ara, el ap kanye dukdongobuka neika ubirye, el ulul ning nirya kel bikanyaba deice arye, akunum areamsuke. Tonda, tuba arisulule. Allah arye nun nirya ati, nyapsuka ara, ‘Aninye ara na mapu unamake,’ tenenyamsukce, el weik mambule ulula ap, el pia teleb-teleb ubuka dirina weik ulula ap deice arye, akupsukce yukamsukce, wibuka deiamsuke.
“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.
Ayupu kekepse talak ara, tonok malaikat arye nati nyapnuke. “Anyapnukin yupu ara, seknamlyame. Ayupu ara, ani. Domba Mi Atonye, el kil dopnamal talak ati, weik kwalya kwalibuka deipnamak ning ati, elce anggunti yukupsilirye, ‘Anggunda yalulume, yamunyeura, neika dipnamape,’ nyapnamle ninye ara, Allah arye aninye ati pia teleb updeipliba, kanye deibuka telebuk unamake. Anyapkin yupu ara, dipkoprop Allah elcuk nyapmanilba, nyapkine,” nyapnuk.
ကြော်ငြာတွေ