Rasul 2:30 - Eipomek

³⁰ Bukni, Daud ara, aminyan ak, winipnamuk ning ati, laka nyalamuknye nabi ulamuk. Tonda, Allah arye Daud biti, ‘Dipkoprop winipnamne,’ nyapdeibuk yupu deice arye ayupu nyabuk. ‘Daud elce deiplibuk, dadeipdanin balamica ani, sirya tam deipnamak mi ara, Daud el ulye touk, ami babye, erebuka weik ninye deiyoknye kipdeipnamne,’ Allah arye nyabuk. Allah arye nyapdeibukura, Daud kekebukce akunum kel kiyamuk.

Rasul 2:30 ပူးပေါင်းရင်းမြစ်များ

2 Samuel 23:2

Allah el si Yahweh, el Dib Kanye arye, na talima noutam arye, yupu teleb kibuka nyapdeipnukba, adeice arye yuk nang, sik kekena ati, laka nyalamse. Ara, Allah el Dib Kanye arye, na talima noutam nyapdeipnuk yupu ara, na sitang deice arye nyalamse.

Yesaya 7:14

Ati, wini talak ara, Allah elcuk apeten kina ning ara, anggun dam pitin kipnamsile. Aning ara ani. Dipkoprop ninye dona kum wel kil tonok arye, mi bomlya ani, sal mi deipnamle. Akunum deiplyopura, ami el si ara, Imanuel nyanamake.

Yeremia 30:9

Sikce na Allah Yahweh ati, pil donamniyake. Tonda, Raja Daud birye deiamukba, dadeipdanin, yangalamik nang kan-kan arye, narye ninye deiyok nang ton wipdeipyopura, aRaja nang aryuk, na mapu Israel nang talibikiba, sik amu tam teleb pil dopra wininamake.

Mika 5:2

Allah arye ayupu ton nyabuk. Ati anggun Israel ninye ara, Allah el si Yahweh arye namin kipsiliba, anggun mal olan nang arye, tapu koubuka bobisicopura, ikin pil aryuk unamsiyak bukni, anggun ni koproba Allah tenebuk talak akunum dam uplyopura, lyepnamsile. Ara, Israel ninye kan-kan arye, Allah elcuk wel kil tonok wipdeipliba, mi bomlya ani, aminyan talak el mi deipnamle. Tonda, akam kil arye, el mi akunum deiplyopura, el kayapu Israel yala nang, sik wenena ati, yuk pera mutuku ninye arye, tapu koubuka bobinamik mutuku noutam unyak ninye, ninye yupa weik ning nirya ara, Allah arye lyebuka doproplirye, ila tamubuka sik min arye ulamik mutuku uk, yanuka deipliba, tonok kanye bobuka, teleb kibuka unamake.

Matius 22:43

Nyabikopura, Yesus arye tamubuka nyabuk. Anggunce, ‘Kristus ara, nun apu kopropa Daud, el yala nang arye deibik,’ nyapmanulum ara dib nyapnulume. Bukni, Allah El Dib Kanye, Daud el talimak talibuka deice arye, Daud el bidamnye aryuk, Kristus yanamuknye biti, ‘Na ni yanamle,’ nyabuk. Daud arye, Kristus ati, ‘Na ni,’ nyabuk ning ara, deiyok ara, dan do? Daud arye nyabuk yupu ara ani.

Matius 27:35

Kum dibukopura, wanwanun yo tuku deice deibukabikce, Yesus el nong ayo deice alibuka deibikce, taruk dana-dana ap, yan tonok ak ansinibuka deibikce paku dakik. Winibikopura, Yesus el nong wanwanun yo deice deipmek yo ara, erebuka tuku palipmeka pum bisik erebuka dopkwetebik. Winibikopura, Yesus el ongolamuk baju kwiriplopmeka ara, ‘Yatanye dopropnamle do?’ tenen, sik arikal dona deice arye, el si undi arikal dopdabirye, Yesus el baju bokuka doprobik.

Markus 12:36

Allah El Dib Kanye arye, Raja Daud el talima ak talibuka deice arye, Daud elcuk Mesias yanamuknye ati, ayupu nyabuk. ‘Allah arye na ni kopropa Mesiasnye ati nyabuk. Nun bitinye nang arye ninye nirya talibuka unamnama ati, na sirik tam buknamlyame. Abulaminyebuk, aminyan, an yupu yanikinyak ninye ara, narye dobuka an amu tam deipnibuk, ance aninye nirya pia talinamlyame.’ (Mazmur 110:1) Daud arye sekamuk yupu dobuka nyapmasine,” Yesus arye nyabuk. Nyabuk ning, ayupu tonap, nyabuk.

Lukas 24:44

Yesus amekin bal dibukopura, ayupu nyabuk. “Na ap, anggun neika ulamuburye, nyalamsise yupu ara, tonap nyapnusine. Yata yupu do nirya, Musa sekamuk yupu ap, Allah yupu laka nyalamik nang, nabi-nabi sekamik yupu ap, Mazmur noutamak sekamik yupu ara, nati sekeiyamnik touk dipkoprop upnamle,” nyabuk.

Rasul 1:16

“Na kayapu, minop talak arye Allah El Dib Kanye arye, Daud, el kanye talima pum tam wekukura, utenebukce, ‘Winipnamle,’ nyabuka sekamuk yupu ara, atalak ara, Yudas kum bikamuk bukni, ayupu ara, el Yudas ati nyalamuk. Ayupu ara, kum batakmanto yupu ati, akunum winipmasile. Ara, Yesus tapu koupnamik nang dam inibuka dobuka yayukce, ‘Yesus ani,’ nyamuknye, Yudas ati Daud arye ayupu nyamuk.

Roma 1:3

Sik seklamik yupu noutamak ara, Allah el Mi Koprop ati laka nyalamik. Allah el Mi Kopropa Yesus ara, minop talak ulamuknye Daud birye deibukba, dadeipdanin yangalamika ani, Daud el yala nang arye Yesus yanuka deibik.

Roma 15:12

Aning atonun, nabi Yesaya el sekiamuk buku noutamak arye, ayupu nyabuk. ‘Yesaya birye nyabuk, “Nun apu kopropa, Isai birye deibukba, dadeipdanin yangalamik ninye deice arye deibikiba, yo kwapu youlamle touk, upnamlanye birye, anggun kan-kan yanuka tiknamle. Nun dam yanuka tiklyopura, ninye im sirya, mutuku sirya nirya ati, weik Ninye Deiyoknye kiplirye, sik nirya talinamle. Winipliba, sik Yahudi yala kum ninye arye, ‘Elce nun lyenamsile’ tenen, kintinibuka dinauk unamake,” nyabuk.’ (Yesaya 11:10)

2 Timotius 2:8

Nun apu koprop Daud arye deibukura, dadeipdanin yangalamika ani, aminyan talak deibik mi, Yesus Kristus ara, obikura, dibuk bukni, tuba tamubuka, kam bukuk. Winibuk ning anirya ara, tuba tenenamlyame. Ayupu ara, Yesus el lak teleb yupu noutam aubuk ak, dobuka peterenune.

Ibrani 1:1

Minop talak ara, Allah arye nun apu yapu nang ati, yupu nyalamuk ning ara, elce nyalamukba, el yupu laka nyalamik nang, sik nabi-nabi nang kekelamikce, nun apu yapu nang ati, laka nyalamik. Allah arye, el yupu laka nyalamik nang deice laka nyabuka nyalamsuk ning ara, like yupa weik ap, pil yala yupa weik ap dolamuka deice arye, laka nyalamsuke.

Ibrani 3:7

Ati, Allah el mapu dipkoprop una ati ara, Allah El Dib Kanye arye nyapdeibukba, Mazmur noutamak sekamik yupu ton tenenamlume. Ayupu ara ani. Arup ara, na Allah arye yukubsiniba, na yupu kekepnumunyopura, anggun apu yapu winilamik touk winina meme. Ara, lik upsiliba, pi dobuka, ‘Kum kekenamabe,’ tenebuka, kum unamlulume.

Ibrani 4:7

Aning ati ara, nun kele. Allah arye tenyamuk touk, tonok talak wibukabukce, atalak ati, “Asum,” nyabuka si dobuk. Asi nyabuka, “Asum,” nyabuk talak ara, sik Israel ninye malye ulamik talakuk kume. Aning ara, keting tamun yupa weik akunum upra balamuka ani, Allah arye, Daud sekamuk yupu deice arye nyabuk. Daud birye sekamuk yupu ara, arup akunum nyapmasin bukni, ayupu tonap nyapsine. Ayupu ara ani. ‘Asum ara, na Allah arye yukubsiniba, na yupu kekepnumunyopura, anggun apu yapu malye winilamik touk winina meme. Ara, lik upsilyeba, pi dobuka, ‘Diba kum tenenamabe,’ tenebuka, kum wininamlulume. Minop talak anggun apu yapu ara, lik ubukba, na Allah ati, ‘Nun like,’ tenyamnikce bataknike. Sik winilamik touk kum wininamlulume. Allah arye nyapdeiyamuk.’ (Mazmur 95:7-8)

Ibrani 6:17

Winilamak touk, Allah babye atonun winibuk. Ara, Allah arye “Wininamsine,” nyabuka, nyalin yupu nyapdeibuk talak ara, utenebuk. ‘Narye nyalinman yupu nyapniba, kekebuka, aminyan talak aning dopronamak ninye arye, moubuka kel kipnuyak’ tenen, el si deice ap, tabakuka nyabuk. Ara, elce, “Wininamne,” nyabuka, nyalilamuk yupu deiyok ning ara, urasin yuk kum tamupmanto ati, elce nyalul touk, dipkoprop unamle. ‘Moubuka kel kipnuyak’ tenen, el si kopropa deice arye nyalin yupu nyabuk.

Ibrani 7:21

Narye nyapmasinye, nun winiryuk ansilina deiyoknye Yesus ara, Allah arye ayupu nyalilamuka deice arye deiyok kilamuk. Allah arye anye biti nyabuk. ‘Nara, Allah arye anti, akunum nyapdeipmakin ati, na kanye tonap kum tamupnamne. Narye akunum nyapkine. Anda Allah ap, ninye ap dana-dana ansinilina deiyoknye pia unamlame, nyapkine. Allah arye nyabuk.’ (Mazmur 110:4)

2 Peterus 1:21

Aning ara pia kume. Allah el yupu laka nyalamik nang, sik nabi nang arye seklamik yupu nirya ara, talye nang arye, ‘Ayupu ara mambule, ayupu ara seklulume,’ nyalamika deice arye kum seklamik. Aning kum bukni, Allah El Dib Kanye arye, nabi nang sik talima noutam yupu nyabuka, pil dolamuka deice arye, Allah el yupu laka nyalamik nang arye, sik yupu nyabuka seklamik. Ara, Allah El Dib Kanye arye anang ati, el mikip areamuka deice arye, apil dolamik.

Wahyu 17:14

“Arebikirye, amalye deiyoknye ap tabakicopura, Domba Mi Atonye biti, opnamake. ‘Domba Mi Atonye opnamap’ tenen, piripdenamak bukni, Domba Mi Atonye birye, sik nirya ati malye kibuka oplopnamle. Winipnamla ara, talye ati kume. Ara, yuk ninye deiyok nang weik aunyak bukni, sik deice tam Weik Ninye Deiyoknye bira, eluk ulule. Tonda, yuk Raja nang weik aunyak bukni, sik deice tam weik erena Raja Deiyoknye bira, Domba Mi Atonye bira, eluk ulule. Ati ara, Domba Mi Atonye birye, sik malye un ninye deiyok nang nirya ati obuka sirya daknamle. Atalak ara, Domba Mi Atonye elce, ‘Aninye na mapu unamak’ tenen, wiamukce, yukamukba, elti, diba tenelamikce, batakna pia kumce, el yupu talibuka dobolyanganyak ninye ap, el ap neika unamake.” Amalaikat arye na Yohanes ati aning nirya laka nyapnuke.

Wahyu 19:16

Allah Yupu Deiyoknye, el keil deice ap, el baju deice ap ara, el si ton sekeiyamik. Asi ara, ani. Raja nang nirya deice tam ulul Raja. Tonda, weik ninye deiyok nang nirya deice tam ulul Deiyoknye. Asi bitinye sekuka deiamik ning deiyok ara ani. Ara, tukwak mutuku weik ninye deiyok nang, Raja-Raja nang nirya el amutamukiba, sik Weik Ninye Deiyoknye Raja ulirye, sik yuk Raja nang nirya talilule. Aning atonun, sik yuk deiyok nang nirya el amutamukirye, sik Weik Deiyoknye ulirye, sik yuk deiyok nang nirya talilule. Yata deiyok nang nirya, el amutamuk unyak ati, elce sik nirya talilule. Elda weik eitamnye ulule.