Allah Yahweh arye, ayupu nyapdeibukba, el pil don nang arye binuka, laka nyalamik bukni, Israel yala nang ap, Yehuda yala nang ap arye, ayupu kekena kumce, yaniltalamik. Ara, min talak Israel ninye, sik apu yapu arye, Allah Yahweh elce nyapdeiamuk yupu ati, kekena kumce, dip kum tenelamik touk, anoutam talak ulamik ninye babye, kekena kumce, dip kum tenelamik.
Rasul 19:9 - Eipomek9 Paulus arye peterelamuk bukni, amutuku nang tonok-tonok arye, manya deililamik akarye, ‘Nunda pia dib kum tenepnamabe,’ tenebik akarye, ayupu yanibikce, ninye kekelamik dam, Yesus arye “Winipnamlulume,” nyalilamuk bisik ati, malye-malye nyalamik. Winilamika ati, Paulus arye anang batakuka mening dam bukni, per otam yukak biyuk. Yukak binuyuka ati, amutuku dib tenebik nang dobukce, sik nirya Tiranus arye ninye weik weklamikak, peterelamuk aik weklamik. Anyaik weklamikce, asum-asum nirya Paulus arye Yesus yupu lak nyalamukura, sik nirya arye, ‘Teleb kibuka kel biknamap’ tenen, yupu talilamik. အခန်းကိုကြည့်ပါ။ |
Rasul 19:9
39 ပူးပေါင်းရင်းမြစ်များ
Anggunda, anang arye kanye moubuka tenina nirya kum arye, ‘Allah arye nyasilye ning ara, anggun apu yapu arye, ‘Nun likeʼ tenen, el yupu kekena kumce, sik kisok ara, keil arye kat ulamle touk, ulamik ning ara, anggun babye winina meme. Bukni, Allah arye nyabuk ning moubuka talipmunyakarye, Allah Yahweh, el amu tam teleb kibuka unamlulume. Ati anggun nirya ara, anggun ni Allah Yahweh, el si eren aik ati, ‘Anyaik ara, ‘Naʼ tenen aik. Anyaik ara, nanguk ulule,’ nyabuka, akunum kintinibuka deiamukak, Yerusalem mutuku tamubuka tuba-tuba pia yanganamlulume. Tonda, Allah yupu kekebuka unmunce, elce nyapsuk touk, teleb upmunce, el siuk erenamlulume. Winimunyeura, Allah arye anggunti, yu weik akunum tenesilye ning ara, bataknamsile. Tonda, kanye deipnamsile.
Winilamikbuk, sik Israel yala nang arye, ‘Kume dipkoprob nyasinyake,’ kum tenelamik. Aning kum bukni, sikce, ‘Talye yupu nyalyangasinyake,’ tenelamik. Utenelamik ati, sikce, sik nabi-nabi nang ati, nalibuka akutulamek. Tonda, ‘Allah arye nyalamsuk yupu nirya ara, nun kum kekenamabe,’ tenelamik. Winibuka ulamika ani, sirya talak ara, Allah arye sik anang ati, tulum kibukba, sik dam pia ikin ning deibuk. Winibukura, sik anang arye ton, ‘Se, winipmasila ati, Allah arye ton lyepnamsilaryaʼ tenen, binmanto bisik babye, ton kum bikik. Allah arye, kanye imun weik ning arebuk.
Israel ninye malye weik ulamik talak ara, sikti, ance asilen ning areplumce, “Narye, ‘Aning ara wininamlume, aning ara kum wininamlume,’ nyabuka nyapse Mem Yupu, tuba tonap kekebuka dobolbanamlume. Winipmunce, teleb unamlum bukni, kumopura, wenenamsine,” nyapdeiamlume. Nyabuka wenelalum bukni, mandipna kanye bobuka kwalilamikce, an nyalalum yupu yanibikce, sikce tenepne ninguk winilamik. Ance nyalalum yupu talye yaniplobuka bisina uk ulamik. Bukni, yatanye do nirya, ance, ‘Aning ara wininamlume, aning ara kum wininamlume,’ nyapdeiamsulum yupu, moubuka kekeplirye, dobolbilyopura, anye bira dipkoprob kam unamle. Bukni, atalak ara, Israel nang arye, mandipna weik ulamikce, ‘Allah el yupu ara pia kekena kumce wininamabe,’ nyaltaklamikce, an tam donga anipna arye, yuk tam kilolamik. An yupu kum moubuka taleamika deice arye, pia malye weik ulamike.
Allah arye nyasulule. Atalak noutamak, na Allah arye nyasinye yupu nirya, kekepmunyopura, ayupu moubuka talepmunce, dobolbalulume. Anggun deipkirikdop nang, Meriba mutuku noutamak ulamikce, ‘Nun lik’ tenen, kat kanye bomik touk, kum unamlulume. Aning atonun, mek pia kumak ati, ninye kum unyakak, weik pata mutuku, el si ara, Masa mutuku noutamak, anggun apu yapu yangalamikce, malye yupu weik nyapnin yangalamik tonun, kum nyanamlulume.
Yatanye do nirya, na nyanye yupu kekelulnye bira, ‘Se ayupu tonap kekeptinye’ tenen, pia pin-pin kanye bobuka ulirye, na aik dam yanuka kekelyanganamlanye bira, Allah arye melipliba, telebuk unamle. Winipmanto ara, na nyanye yupu kekena ati, asum-asum nirya, na aik bublan dam yanuka bukuka kekeplirye, ‘Yata teleb yupu ton yanuka nyapnamanil do?’ tenen, tuba moubuka kalikinamlanye bira, Allah arye, anye biti melipliba, telebuk unamle.
“Anggun Yahudi yala ninye nirya ara, anggun telebuk unamluma ati, melibuka kalikinamsinanye, na tonoka. Bukni, nara yan dum duklamle keil atonun ununa ati, winipmanto ara, ninye arye bisik bakce talak ara, keil arye yan dum dukliba, kote saklamak touk, narye wenepnamsin talak ara, anggun Yehuda yala ninye ap, Israel yala ninye ap, atonun winipnamsine. Ara, narye wenen ning weik, anggun deice arepsinyeura, anggunce, ‘Se,’ tenen, kanye imun upsilirye, talima uk dinamsila ati, nyapsine. Aning atonun winipmanto ara, ninye arye, ‘Kapang youpnamle’ tenen, mana wena wemicak, kapang mangkau arye, balibuk youlamle touk, narye wenen ning weik, anggun deice arepsinyeura, anggun Yerusalem mutuku umunye ninye nirya ara, mana wena youpliba, nurulamle touk, winipnamsile. Aning akunum nyapsine.
“Allah el si Yahweh ara, aning-aning nirya talilule, im deice yin talin malaikat nirya, sik weik deiyoknye ulule. Allah arye, nun Israel ninye ati, pia kalikuka melisululnye birye, ayupu nyasulule. “Na Allah Yahweh arye, Yerusalem mutuku ap, amutuku noutamak ululum ninye nirya ap ati, ‘Anggun malye winilulum ning dekna ati, weik arye wenepnamsine,’ nyapdeiamsise yupu ara, wini talak, dipkoprob winipnamasile. Ara, urdem ati kume. Anggunce, na nyasinye yupu kum kekemunce, pia mandipna kanye bobuka, batakalulume. Batakmunce, anggun malye winin ninguk, winimunya ati, na Allah arye, anggun damak weik ikin ning arepnamsine. Ara, anggun umunye mutuku noutamak ara, weik kanye imun ning arepnamasine. Na Allah Yahweh arye, akunum nyapsine ati, nong upnamale.” “Allah arye nyapsile,” Yeremia arye, akekenmek ninye ati, nyabuk.
Bukni, anggun Israel ninye arye, anabi nyalamik yupu ton, kum kekelamlume. Anggun apu yapu arye, sik nabi nyalamik yupu, kum kekelamik touk, anggun atalak ululum ninye babye, tuba kum kekelulume. Sik nabi-nabi nang arye, na yupu anggun dam nyalilamikba, anggun deiyok nang arye, mandipna kanye bobuka lamikce, kat kanye bobuka winilamik touk, anggun wini talak ululum ninye babye, pia weik arye malye winibuka, mandipna kanye bobuka, ulamaka atonun, anggun babye mandipna kanye bobuka ululume. Sik minop talak ulamik ninye ara, malye winilamik bukni, anggun wini talak ululum Israel ninye ara, pia weik arye tabakuka malye-malye ninguk winilulume. Anggun deiyok nang arye, malye winilamik ning ara, mitik anun uka. Anggun wini talak ululum ninye, malye winilulum ning ara, pia weik, nyabuk. Ara, Allah arye, sik Israel ninye ati, wenebukce nyabuk.
Ati, na mapu anggunti nyapsine. Anggunce sik Farisi nang ati, tenena kume, sik dauplye. Sik Farisi nang ara, bisik peterena deiyok nang atonun unyak bukni, dipkoprop ara asing kun nang atonun unyake. Tonok asing kunanye birye, yuk asing kunanye biti, ‘Narye an taruk talibuka teleb bisik bobinukine,’ nyaplirye, bobuka banmaliba, bisik noutamak weik pum wamlyak barikirye, sik bitinye nang kote sakarurake. Sik Farisi nang ara, na mapu koprop kum unyake. Sik Farisi nang ara, asing kun nang atonun unyak nang ati, dauplye, nyapsine,” Yesus arye el mapu 12 nang ati nyabuk.
Yesus arye anang ati, lik tenebukce, yupu nyabuk, “E, atalak winilul ning ara, ‘Allah el mikip deice arye dipkoprop pil dolul do?’ tenenululume. Yata ati, ‘Ninye winipmanto kum pil dopsutu’ tenen, asipdenmanulumce, winipdenmanulum do? Dipkoprop nyapsine, wini talak ululum ninye ara, malye-malyeuk winimunce, Allah ati batakuka yuk ninguk talibuka ululum ninye ati ara, anggunda ninye domice kilapu batakuka, talye kilapu yoldalamak atonun ululum atia. Anggunce, ‘El Yesus ara, Allah arye dopdeibuk tenepnululume’ tenen, ninye winipmanto kum pil dopnirye, pitin kum kipdeipnamsine. Allah yupu laka nyalamuknye Yunus arye winilamuk ning atonun winipnamasin ati, akunuma. Yuk mambul pil, ninye kum winipmanto ning ton pil kum dopnamsine.” Yesus arye sik Farisi nang ap, Saduki nang ap ati nyabuk. Nyabukce adiparyuk anang abatakuka, el mapu ap, mek lia yo wekuka bulbiyikce, Galilea mekwen deice banmeka ani, mekwen kup-kup otam biyik.
Ayupu nyabukopura, Yesus arye el tongolyanmek nang ati nyabuk. “Anango, ‘Amutuku talibik nang opbisipnamla ati, el deiyok koubuka el mapu bobinmala,’ tenepmanulumce parang ya ap, ninye on kama ap, bobuka tomolyanulum do? Atalak-atalak nirya, Allah ati arelulum aik dam tikuka peterenmasiba, anggunce kum tomopnulume.
‘Allah arye aninye ati, asing kun ning akunum aribuk. Tonda, sik kanye talima noutamak ara, kat akunum kibuk. Allah arye aninye ati, asing kuna ap, talima kat una ap, akunum aribukba wininyake. Sik asing arye teleb kibuka kum elinyake. Sik kanye talima noutamak ara, ‘Deiyok ani’ tenen, moubuka kum tenenyake. Sik kum kel bikmanto pia ulamika ani, sik malye winin ning batakuka balye tamubuka, na tam kum kipnamake. Sik malye wininyak ning bataktingopura, narye sikti, kwetebuka, teleb ulilamtinye bukni, sikda talima kat ninye anya arye, aning kum wininamake. Allah arye nyabuk.’ (Yesaya 6:10)
Saulus eibukopura, Saulus dobuka Antiokia mutuku tamubuka boyayuk. Boyayuka ati, Barnabas ap, Saulus ap, Yesus diba tenebuka talyamik nang ap, keting tamun tonok talak arye ton sum arye ton, ton sum arye ton nirya, bulubuka wekelamikbuk, sikce Antiokia mutuku ninye weik Allah yupu peterelamrik. ‘Yesus ulamuka atonun uptibye’ tenen, patalamukbuk piribuka kel kibuka diksukum ulamik nang ati, yuk talye ulamik nang arye, Antiokia mutuku arye deiyok kibikce, “Aninye ara, Kristen ninye unyake,” nyalamik. Ara, minop talak Antiokia mutuku nang arye, deiyok koubuka, “Anang ara, Kristen nang unyake,” nyalamik.
Winibuka laka nyabuka, peterebukura, sik Yahudi yala nang tonok-tonok ap, tonda Yahudi yala kum nang bukni, Allah si erelamik nang Yunani nang weik ap, tonda amutuku weik kilapu mitika kum weik ap, dib tenebikce, Paulus ap, Silas ap, sik dib tenelamrikce, doproprik ning uk, ‘Nun babye dib tenepnamabe,’ tenebikce, sik kanye yuk punubik. Sik kanye yuk punubikce, Paulus ap, Silas ap, sik tamuk kiprobik.
Winipnamsiaka ati, anggunda pia moubuka dinamlulume. Keting tamun winilye deice arye, keting noutam ap, lukunyan ap, na engena deice arye, ‘Pia moubuka tenenamlulume’ tenen, pia laka nyalamsisirye, peterelamsise yupu ara, ‘Anggun talima on ning opsilyak’ tenen, ‘Moubuka dinamlulume,’ nyabuka peterelamsise yupu ara, pia tenenamlulume.” Paulus arye nyabuk.
Yesus arye, “Winipnamlulume,” nyabuka peterelamuk Bisik ati, dib tenebuka pia telebuk ulamik ninye nirya ati, narye ikin ning sik nong deice pia delilamse ani, sik amutuku deiyok nang arye Yesus ati dib tenelamik ninye ati weik arye olamik. Tonda, sal ababye, kilapu ababye, tapu kulamsirye wenen aik pum tam dongolamse.
Bukni, tonok ninguk ara, narye winipse ning ara, lak nyapnusine. Ara, narye Sandeheren nang ati, nyapse. “Na kayapu, ‘Allah arye akunum diplamak ninye nirya kam bukeipnamle’ tenen, diba tenebuka talinya ati, anggunce, ‘An malye winiplume,’ nyabuka nyapmanulume. Ati ara, ‘Asum anggun yupu bokolinmanulume,’ nyabuka, ninye yupu lepsisikra bokolina deiyok nang, Sandeheren nang ati, nyapse. Anyapse ning ati malye tenepmaniak tenepne,” Paulus arye nyabuk.
Bukni, anggun Yahudi yala nang bukni, anggun Yesus ati diba teneplum ninye ati ara, yuk ninye mutuku-mutuku nirya arye anggunti, ‘Anang ara, sik urasin yuk kipdobikce yuk ning ati dib tenesinyak,’ anya arye, malye yupu nyabuka lululisinyake. Lululisinyaka ati, an tuba-tuba teneminye ning ap, petereminye ning ap, lak nyapsiminyeura, nun kekepnamapa ati, nun patapmasile,” nyabik.
Stefanus arye, Yesaya sekamuk yupu nyabukopura, ayupu tonap nyabuk. Anggun mandipna weik ninye ululume. Anggun talima ap, anggun amul ap, Allah arye nyasilye yupu pia kum kekelulum ninye ululumade! Anggun apu yapu ulamik touk anggun babye, winilulume. Ara, Allah Dib Kanye arye nyasulul bukni, anggun kum kekebuka dolomunyak arye yanilulume.
“Ance ‘Ur ninye tongolbilyame,’ nyapnutumce, ninye tongon surat weik arye sekdeipnutumopura, asurat deice arye dobuka, Damsyik mutuku noutamak Yahudi yala nang Allah yupu peterena aik betinirye, Yesus el yupu dib tenebuka, Yesus bisik dobolbanyak nang nirya ara, tapu koptinirye, Yerusalem mutuku wenena aik dongoptinye. Ara, sal babye, kilapu babye nirya, Yerusalem mutuku wenena aik dongoptinye,” Saulus arye anye dam biyuk akarye morobuk.
Aning ati ara, ayupu ton nyapnusine. Minop talak ulamik Israel ninye nirya ara, ‘Allah arye diksukum ninye kipdeipnamsile’ tenen, patalamukba, pia pi dobuka pirilamikce, pil weik dolamik bukni, winilamika deice, Allah arye sikti, ‘Aninye ara diksukum ninye unyake,’ tenebuka, aninye ati teleb kibuka kum deibuk. Winibuka ati, sik nirya ara, diksukum una deiyok ning kum dololamik. Allah el kanye aniryuk, ‘Na tenen ninye ani,’ tenyamuk ninyeuk wipdeiyamuk. Elce kum wiamuk ninye ati ara, sik kanye talima kat kibukba, elti, diba tenebuka kum ulamik.
Allah arye ayupu nyabuka ati ara, nun kele. Allah el kanye aniryuk tenesilye touk, ton ninye ara, oltakana kumce, bico teneplirye, melibuka lyesulule. Bukni, el tenelye touk yuk ninye ara, ‘Sik kanye talima kat unamle’ tenen, kunukna deiyok ning arilirye, ‘Aninye sik talima kat unamle’ tenen, kunukna ning arilirye, aninye sik talima kat kililule.
Ara, na nyanye yupu ap, na wininun ning ap ati, ‘Aning ara, nun like’ tenen, yanipnikirye malye kibuka bisininyak ninye weik amutuku unyak bukni, Allah yupu peterena ati, pil dona talak lo weik teleb ning, amutuku tuba upmanile anya arye, asukumuk tonap weik tonun mapnamne. Ara, ‘Peterepnibuk, ninye weik arye, dib tenepnamak do?’ tenen, unamna ati nyapsine.
Wininyak deice arye, kanye deibuka teleb ubuka neiktoto una pia kum arye, malye teneldana ap, waldana ap, oldana ap, wininyake. Awininyak ninye ara, sik kanye talima pia malye ubuka anya arye, dipkoprop moubuka kum teneptinge. Allah el dipkoprop yupu batakuka yaninyaka ati ara, wini talak ara, teleb ning kum teneptinge. Deiyok ara, sikce. Tonda, anang sik malye tenenyaka ara, ‘Allah yupu dobuka yuk nang ati peterebibyopura, aminyan ara, yuk nang arye yo bok arepsikce deice arye bona weik talin nang mapu unamabe,’ tenenyake.
Allah el si erena ap, elti, kina ap, ati ara, talye nong bol deice ninguk unamak bukni, sik kanye noutamak ara, ‘Allah el yupu ap, el winilul ning ap, atonun winiptibya babye, anirya deice arye, el mikip weksuturye, mikip kum keipsutue’ tenen, wininamake. ‘Allah el mikip ara, kum ulula anya arye, aning nirya ara, nong kum upnamle ninguk,’ tenebuka wininamake. Sirya talak unamak ninye arye, anyapmasuk touk winipnamaka anya arye, Timotius anda, anang atonun nang ap, neika una kume. Leibuka yuk akuk unamlame. Na Paulus arye nyapkine.
Ara, yuk ninye arye kanye deibuka, “Peterepsilyame,” nyanyak talak babye, lik uplibuk, “Peterena nun lik,” nyanyak talak babye, anda, ‘Yata tenepnuniak do?’ tenena kum arye, ‘Allah yupu peterepnaman’ tenen, kintinilinauk unamlame. Malye upmakce talak ara, ance, “Aning bataklulume, teleb una ara, ani,” nyabuka lipsisikuka peterenamlyame. Tuba malye unyak ninye ati, “Aning ara, meme. Bataklulume,” nyabuka, yupu sekenamlyame. Teleb akunum wininyak nang ati, “E, aning ara, telebe, aning ara, pia atonun wininamlulume,” nyabuka, sik kanye moulinamlyame. Anyapmakin pil donamlam talak nirya noutam arye, pia moubuka tenepmince, Allah el yupu nyasilye touk, teleb ubuka peterenamlyame. Tonda, aninye nirya ati, minopce wana ap, lik una ap kum bukni, nimalye aryuk peterenamlyame.
Allah ati, ‘Nun like’ tenen, urasin tamubuka kum bataknamlum bukni, teleb ning ara, nyapnusine. Atalak-atalak nirya, nunce, ‘Asum ani’ tenen, tuba nyaptibye talak noutamak nirya ara, talima kwa dibuka melilanamlulume. Ara, talye ati kume. Ara, anggun talima noutamak malye un ning tuba aupmalya arye, anggun talima tam usilya deice arye, malye un ninguk talibuka winipmunyak tenena ati nyapsine. Tonda, anggunce, amalye winin ning ati, ‘Deiyok ara, dauplye. Aning ara, malye kume, tenepmunyak’ tenen, nyapsine. Winibuka tenemunyopura, aminyan ara, utenepmunya deice arye, ‘Pi dobuka malye winibibyak’ tenen, anggun nirya arye talima kwa dipdanuka melipdamunce, kalekelanamlulume. Malye winin ning nirya ara, tilila ninguk ulula ati, aning talibuka umunyopura, anggun talima kat kipdeipnamsile. ‘Winipmunyak’ tenen, anggunce anggun bidamang ati, kalekelanamlulume nyapsine.
Ara, sikda, talye tukwak kam ulul ning nirya ara, kanye bona kum arye, talye luba kibuka, ulamaka atouk, atilila yupu peteren nang babye, unyake. Sikda, mambul ning bukni, bita kum tenebikirye, pia kum kel bikamice ning ati, “Aning ara talye ning uka,” nyabuka, malye yupu uk deilinyake. Wininyak ning ati ara, ninye arye talye tukwak kam ulul ning, tomobikirye, kanye bona kum ning, talye merekukua olamak touk, Allah arye atilila yupu peteren ninye nirya ati, talye luba kibuka oplirye, sirya daknamle. Aninye ara, Allah yaniptabuka, pia malye-malye wininyaka ning ati ara, Allah arye sikti, obuka, sirya daknamlarya.
Tonda, Allah diba tenen nang, sik kan-kan bukni, ton nang ara, atilila yupu peteren nang, pia malye-malye ulamice ning eibikirye, ‘Aninguk winipnuyabe,’ tenebuka, pia malye wininamake. Malye-malye ubicopura, yuk ninye ton eibikirye, Yesus el dipkoprop bisik ati nyanamake. “Kume. Anang ara, malye-malye ulamica ati, Yesus nyanyak yupu ara, talye yupu uka,” nyabikirye, malye yupu nyabuka deilinamsiake.
Mikael babye, kum erepdayukce malye yupu kum nyabuk bukni, atilila nang ara, sik moubuka kum tenenyak ning, kum kel bikik ning nirya ati, malye yupu nyalinyakce, talya malye yupu nyabuka akutunyake. Ninye ara, Allah arye kanye arepsukbuk, ‘Aning ara, malye, aning ara, telebe,’ tenebuka kanye bobuka unyap bukni, basam ap, kam ap ara, sik nong noutamak pataplye ninguk talye mankau arye wininyake. Atilila nyanyak nang babye, sik nong pataplye ninguk tenebuka, malye wininyake. Sik kanye bona kum arye, amalye winilamica deice arye sik bidamang ati, malye winililanyake. Winibikceopura, Allah arye aninye ati, wenebuka oplirye, uku dilamle mutuku dopkweteplyeura, apia unamake.
ကြော်ငြာတွေ